E Mata, ne Folafola Mai ne te Atua a te Maumea o Koe?

‘E manako te Atua ke maumea koe, ke uke au motoka i te koga tuku motoka, se pisinisi manuia . . . Talitonu fua ki a ia, ‵tala tau pausi tupe, kae tuku atu katoa ki a ia a mea e mafai ne koe.’

TENĀ eiloa te fekau e fakamalosi aka ne nisi potukau o lotu i Pasili, e ‵tusa loa mo pati ne ‵lomi i se nusipepa i konā. Se fekau telā e fakatāua ne tino e tokouke. E ‵tusa mo se sukesukega ne fai i te Iunaite Sitete e uiga ki tino kolā e fai mai i a latou ne Kelisiano, e lipoti mai penei te mekesini ko te Time: “E ‵tusa mo te 61% o tino e tali‵tonu me e manako a te Atua ke mau‵mea a tino. Kae e 31% . . . ne lotoma‵lie me kafai e tuku atu au tupe ki te Atua, ka fakamanuia koe ne te Atua ki tupe e uke atu.”

A tino kolā e tali‵tonu ki te mea tenei, e taku sāle ne latou a te maumea ki te poto fou, maise eiloa i fenua i Latina Amelika, e pelā mo Pasili, kae e ua‵lolo atu a tino ki lotu kolā e folafola mai ne latou a fakamanuiaga faka-te-foitino mai i te Atua. Kae e mata, e folafola tonu atu ne te Atua a te maumea ki tino kolā e tavini atu ki a ia? E mata, ne mau‵mea a tavini katoa a te Atua i aso ko ‵teka?

Se mea tonu me i te Tusi Tapu faka-Epelu, e masani o maua ne tatou i ei a fakamanuiaga a te Atua kolā e ‵soko tasi mo te maumea faka-te-foitino. E pelā mo te Teutelonome 8:​18, e fai‵tau tatou, penei: “Masaua me ko te Aliki [ko Ieova] te otou Atua ne fai ne ia koutou ke mau‵mea.” Ne fakatalitonu atu a te mea tenei ki te kau Isalaelu me kafai e faka‵logo latou ki te Atua, ka fai ne ia latou mo fai se atufenua maumea.

Kae e a tavini taki tokotasi a te Atua? Ne maumea malosi eiloa te tagata fakamaoni ko Iopu, kae mai tua o te faiga ne Satani ke mativa a ia, ne toe fakafoki atu ne Ieova te maumea o Iopu “e lua taimi te uke” o ana mea. (Iopu 1:3; 42:10) Ne maumea foki a Apelaamo. E fai mai te Kenese 13:2 me ne “maumea [a ia] i mamoe, i kouti, i pulumakau, ke oko foki eiloa ki aulo mo siliva.” I te taimi ne ‵kau fakatasi ei a tupu e tokofa mai i te Saegala o puke fakapagota a te tama a te taina o Apelaamo ko Lota, “ne fakamaopoopo ne [Apelaamo] a tino tau katoa i tena fa‵kai, e ‵tusa mo te toluselau sefuluvalu te aofaki.” (Kenese 14:14) Ona ko te mea ne nofo pelā ki te toko 318 “a tino tau” kolā ne mafai o fakaaoga a meatau, kāti ne lasi ‵ki eiloa te kaukāiga o Apelaamo. A te manatu tonu me e mafai ne ia o tausi atu ki se kāiga lasi penā e fakaasi mai i ei me i a ia se tagata maumea, fakatasi mo ana lafu manu.

E tonu, a tavini e tokouke a te Atua i aso ko ‵teka​—⁠Apelaamo, Isaako, Iakopo, Tavita, Solomona, ne nai tino fua konā​—⁠ne mau‵mea. Kae e mata, e fakauiga te mea tenei me ka fai ne te Atua a tino katoa kolā e tavini atu ki a ia ke mau‵mea? I te suā feitu la, e mata, e fakaasi atu i te mativa o se tino me e se maua ne ia a te fakamanuiaga a te Atua? Ka tali mai i te suā mataupu a fesili konei.