Mataku ki a Ieova​—Kae Fiafia!

“Amutia io me e fiafia te tino telā e mataku ki te Aliki.”​—SALAMO 112:1.

1, 2. Ne a mea e mafai o maua i te mataku ki a Ieova?

E SE mauagofie te fiafia. E fakavae a te mauaga o te fiafia tonu ki te faiga o se filifiliga tonu, te faiga o te mea tonu, mo te fulitua atu ki te mea ‵se. Ko oti ne tuku mai ne Ieova, te Tino ne faite ne ia tatou a tena Muna, ko te Tusi Tapu, ke akoako ei tatou e uiga ki te auala e maua ei a te toe olaga ‵lei. Mai te ‵sala mo te tau‵tali atu ki fakatakitakiga a Ieova, e fakaasi atu ei a te mataku ki te Atua, ko fia‵fia kae lotoma‵lie katoatoa foki ei tatou.​—Salamo 23:1; Faataoto 14:26.

² I te mataupu tenei, ka sau‵tala tatou ki fakaakoakoga i te Tusi Tapu e pelā foki mo aso nei, kolā e fakaasi mai ei a te auala e mafai ei ne se tino, e auala i te mataku tonu ki te Atua, o maua a te malosi ke ‵teke atu a tofotofoga ke fai te mea masei mo te loto toa ke fai te mea tonu. Ka lavea ne tatou me e mafai o aumai ne te mataku ki te Atua te fiafia mai te fakamalosi mai ke faka‵tonu aka ne tatou se mea ‵se, e pelā mo te mea ne fai ne te tupu ko Tavita. Ka lavea foki ne tatou me i te mataku ki a Ieova se mea tāua ‵ki telā e mafai o togi atu ne mātua ki olotou tama‵liki. E tonu, e fakamalosi mai te Muna a te Atua ki a tatou: “Amutia io me fiafia te tino telā e mataku ki te Aliki.”​—Salamo 112:1.

Te ‵Toe Mauaga o te Fiafia Telā ko Galo

3. Se a te mea ne fesoasoani atu ki a Tavita ke toe ‵lei ana lagonaga mai i ana agasala ne fai?

³ E pelā mo te mea ne sau‵tala ki ei i te mataupu muamua, ne seki fakaasi atu ne Tavita i taimi e tolu a te mataku tonu ki te Atua kae ne agasala ei a ia. Kae ko te auala ne saga atu ei a ia ki pati polopoloki a Ieova ne fakaasi mai i ei me faitalia ana agasala ne fai, a Tavita se tino eiloa telā ne mataku ki te Atua. Ne fakamalosi atu tena āva mo tena fakaaloalo ki te Atua ke fakaasi mai tena mea ‵se, ke fakatonu tena auala, kae ke toe ati aka sena vā ‵lei mo Ieova. E ui eiloa ne logo‵mae a ia fakatasi mo nisi tino ona ko ana mea ‵se, ko tena salamo tonu eiloa telā ne tumau ei a Ieova i te ‵lago mo te fakamanuia atu ki a ia. E tuku mai eiloa ne te fakaakoakoga a Tavita te loto toa ki Kelisiano i aso nei kolā e mafai o ‵to atu ki loto i se agasala matagā.

4. E mafai pefea o toe maua ne se tino a te fiafia ona ko te mataku ki te Atua?

⁴ Ke mafaufau ki te tala o Sonja.a E ui eiloa ne tavini atu a ia e pelā me se tino talai tumau o te tala ‵lei, ne kau a ia ki taugasoa ma‵sei, ne aofia a ia i te faiga o amioga sē ‵tau o fai ne se Kelisiano, kae ne ‵tau o fakatea mai te fakapotopotoga Kelisiano. I te taimi ne toe foki mai ei tena mafaufau ‵lei, ne fai ne Sonja a mea katoa e mafai o fai ke toe faka‵lei aka ei tena vā mo Ieova. Fakamuli ifo, ne toe fakafoki mai ei a ia ki loto i te fakapotopotoga. Mai mea katoa konei, ne seki tiaki lele ne Sonja tena manakoga ke tavini atu ki a Ieova. Fakamuli ifo, ne toe fai ei a ia pelā me se paenia. Ne avaga fakamuli a ia mo se toeaina Kelisiano ‵lei, kae ko galue nei tou fafine mo te fiafia fakatasi mo tena avaga i te fakapotopotoga. E ui eiloa ne fanoanoa a Sonja ona ko tena seke mo te auala o te Kelisiano i se taimi toetoe, e fiafia eiloa a ia me ne fesoasoani atu a tena mataku ki te Atua ke toe foki mai a ia.

E ‵Lei Atu te Logo‵mae i lō te Agasala

5, 6. Fakamatala mai te auala mo te pogai ne fakasao ei ne Tavita a Saulo fakalua taimi.

⁵ E sili atu i te ‵lei māfai e fesoasoani atu a te mataku ki te Atua ke kalo keatea se tino mai te faiga o se agasala i te taimi muamua. E lavea atu te ‵tonu o te mea tenei i a Tavita. I te taimi ne ‵sala atu ei ki a Tavita mo ana kautau e toko tolu afe, ne ulu atu a Saulo ki loto i se ana​—ko te ana eiloa telā ne ‵muni i ei a Tavita mo ana tāgata. Ne fakamalosi atu ana tāgata ke tamate ne Tavita a Saulo. E mata, e se ko Ieova tenei ko tuku atu ne ia te fili o Tavita ki ana lima? Ne tolotolo lēmū atu a Tavita ki a Saulo kae ‵kati ne ia se potu laugatu mai tena gatu. Ona ko te mataku o Tavita ki te Atua, ne ma‵sei ‵ki ana lagonaga i te faiga o te tamā mea tenā. Ne fakagata ne Tavita a taumafaiga a ana tāgata, kae fai atu: “E mafai pefea o fai ne au te mea tenei ki toku aliki, te tupu fakaekegina a Ieova!”b​​—1 Samuelu 24:​1-7, NW.

⁶ I se taimi fakamuli ifo, ne malō‵lō ei a Saulo mo ana tāgata i te po e tasi, kae ne ‘fai ne Ieova ke ‵moe pala‵pala latou.’ Ne ulu lēmū atu a Tavita mo tena tuatina loto toa ko Apisai ki te kogaloto eiloa o te koga e ‵moe ei latou kae ‵tu atu i te koga telā e moe ei a Saulo. Ne manako a Apisai ke na tamate atu a Saulo. Ne taofi aka ne Tavita a tou tagata, mai te fai atu: “E fakasala eiloa ne te Aliki te tino e oko ana lima ki tena tupu ne filifilia.”​​—1 Samuelu 26:9, 12.

7. Se a te mea ne taofi ne ia a Tavita mai te faiga o se agasala?

⁷ Kaia ne seki tamate ei ne Tavita a Saulo i avanoaga e lua kolā ne maua ne ia? Me ne mataku malosi atu a ia ki a Ieova i lō tena mataku ki a Saulo. Ona ko tena mataku tonu ki te Atua, ne toka a Tavita ke logo‵mae a ia, māfai e ‵tau o fai penā, i lō te fai ne ia te agasala. (Epelu 11:25) Ne talitonu katoatoa a ia ki te alofa atafai o Ieova ki Ana tino e pelā foki eiloa mo ia. Ne iloa ne Tavita me i te fakalogo mo te talitonu ki te Atua e maua mai i ei te fiafia mo fakamanuiaga e uke, kae ko te sē amanaia ki te Atua e fai fua ei ke se talia a ia ne te Atua. (Salamo 65:4) Ne iloa foki ne ia me ka fakataunu eiloa ne te Atua a Tena folafolaga ke fai a ia mo fai te tupu kae ka tapale keatea ne ia a Saulo i tena taimi tonu mo tena auala foki.​​—1 Samuelu 26:10.

E Aumai ne te Mataku ki te Atua te Fiafia

8. E fai pefea a faifaiga a Tavita i taimi o fakalavelave mo fai se fakaakoakoga?

⁸ E pelā me ne Kelisiano, e fakamoemoe tatou ke fe‵paki mo fakatauemuga, fakasauāga mo nisi tofotofoga. (Mataio 24:9; 2 Petelu 3:3) I nisi taimi, kāti e fe‵paki tatou mo fakalavelave mai i ‵tou taina talitonu. Kae e iloa ne tatou me e lavea ne Ieova a mea katoa, e lagona ne ia ‵tou ‵talo kae, e faka‵tonu foki ne ia a mea e ‵tusa mo tena loto i tena taimi tonu. (Loma 12:​17-​21; Epelu 4:​16) Tela la, i lō te ma‵taku ki tino kolā e ‵teke mai ki a tatou, e ma‵taku tatou ki te Atua kae ‵kilo atu ki a ia ke faka‵sao ne ia tatou. E pelā mo Tavita, e se fai ne tatou te taui ma sui, io me e gutugutulua tatou i fakatakitakiga amio‵tonu ke ‵kalo keatea ei tatou mai logo‵maega. I te fakaotiga, ka maua ne tatou te fiafia. E pefea la?

9. Taku mai se fakaakoakoga e mafai ei o iku atu a te mataku ki te Atua ki te mauaga o te fiafia faitalia a fakasauāga.

⁹ “E mafaufau au ki se mātua mo tena tamaliki fafine koi talavou kolā ne ita ma ‵togi ne lā pepa kolā e fakaasi atu ei i a laua ko ‵kau atu ki se potukau fakapolitiki, ona ko te lā tulaga e pelā me ne Kelisiano,” ko pati a se misionale telā ko leva ‵ki ne galue i Afelika. “Ne ‵ta fakamasei laua ne se potukau o tāgata kae tuku atu ke olo ki te lā fale. I te lā auala o ‵foki ne taumafai a te mātua o fakamafanafana atu ki tena tamaliki fafine telā e tagi mautuutu, i tena fia malamalama i te pogai ne tupu ei te mea tenā. Ne seki fia‵fia laua i te taimi tenā, kae ne maua ne laua se loto lagona ‵ma. Fakamuli ifo, ne fia‵fia malosi laua me ne faka‵logo laua ki te Atua. Moi ne ‵togi ne laua a pepa konā, ka fia‵fia malosi eiloa a te vaitino ki a laua. Kāti ka tuku atu ne tāgata konā a kapa inu ma laua kae sakasaka atu i lā tafa ke oko eiloa ki te fale. Kae ne iloa ne te tamaliki fafine mo tena mātua, me moi ne fai ne laua te mea tenā, ka fanoa‵noa malosi eiloa laua.” Ona ko te mataku ki te Atua ne puipui ei laua mai i lagonaga sē ‵lei konā.

10, 11. Ne a ikuga ‵lei ne iku mai i te mataku o se fafine e tokotasi ki te Atua?

¹⁰ A te fakaasiatuga o te mataku ki te Atua e iku atu foki ki te fiafia māfai e fepaki mo te tofotofoga e uiga ki te fakaasiatuga o te āva ki te ola. I te taimi ne faitama ei a Malia i te tokotolu o ana tama‵liki, ne fakamalosi atu te tokita ke fakatō tena pepe. “E fakamataku ‵ki tou tulaga,” ko ana pati. “E mafai o uke a fakalavelave ka oko ki a koe i so se taimi kae mate foki koe i loto i se 24 itula. Kae ka mate foki a te pepe. Faitalia me se a te tulaga e oko ki ei, e se mafai o fakamautinoa aka me ka ‵lei te pepe.” Ko oti ne kamata o fai te akoga faka-te-Tusi Tapu a Malia mo Molimau a Ieova kae e seki papatiso a ia. Kae ne fai mai a Malia, “Ko oti ne fakaiku aka ne au ke tavini atu au ki a Ieova, kae ko oti foki ne fai taku fakaikuga ke tumau i te fakalogo ki a ia, faitalia me ne a mea e mafai o ‵tupu.”​​—Esoto 21:​22, 23.

¹¹ I te taimi koi faitama ei a ia, ne tumau eiloa a Malia i te faiga o tena akoga faka-te-Tusi Tapu kae tausi atu foki ki tena kāiga. Fakamuli ifo, ne fanau mai ei te pepe. “Ne tai faigatā loa taku fanauga i te taimi nei mafāi e fakatusa ki tama‵liki e tokolua muamua, kae e seai se fakalavelave lasi ne tupu,” ko pati a Malia. Ne fesoasoani atu a te mataku ki te Atua ke maua ne Malia se loto lagona ‵lei, kae ne seki leva kae papatiso ei a ia. I te taimi ne tupu aka ei te tamaliki tenā, ne tauloto foki a ia e uiga ki te mataku ki a Ieova, kae ko tavini atu nei tou tagata i se ofisa lagolago e tasi o Molimau a Ieova.

‘Ke Fakamalosi Atu Koe ne Ieova’

12. Ne fakamalosi atu pefea ki a Tavita a te mataku ki te Atua?

¹² Ne seki taofi aka fua a Tavita ne te mataku ki te Atua mai te faiga o mea ‵se. Ne fakamalosi atu ke gasuesue a ia mo te poto mai lalo o tulaga faiga‵ta. I se tausaga e tasi mo masina e fa, ne faka‵lafi ei a Tavita mo ana tāgata, mai i a Saulo i Sikilaka, i Filisitia. (1 Samuelu 27:​5-7) I te taimi e tasi telā ne ‵galo ei a tāgata mai te lotou fa‵kai, ne o‵mai se potukau o tino Amaleka o ‵sunu te fa‵kai kae ave ne latou a avaga a tāgata, tama‵liki mo lafu manu katoa. I te lotou fokimaiga kae lavea ne latou te mea ne tupu, ne ‵tagi mautuutu ei a Tavita mo ana tāgata. Ne mafuli fakavave te fanoanoa ki te ita, kae ne mafau‵fau a tāgata a Tavita ke peipei ne latou a ia ki fatu. E ui eiloa ne fanoanoa a ia, ne seki loto vāivāi a Tavita. (Faataoto 24:10) Ne fakamalosi atu a tena mataku ki te Atua ke ‵fuli atu a ia ki a Ieova, kae ne fai ne ia ke ‘fakamalosi atu a Ieova ki a ia.’ Mai te fesoasoani o te Atua, ne fakatakavale ei ne Tavita mo ana tāgata a tino Amaleka kae ne toe puke mai ne latou a mea katoa kolā ne ‵galo.​​—1 Samuelu 30:​1-​20.

13, 14. Ne fesoasoani atu pefea a te mataku ki te Atua ke fai ne se Kelisiano a fakaikuga ‵lei?

¹³ E fe‵paki foki a tavini a te Atua i aso nei mo tulaga kolā e manakogina i ei te talitonu ki a Ieova mo te loto toa ke gasuesue mo te mautinoa. Ke mafaufau ki te fakaakoakoga a Kristina. I te taimi koi foliki ei, ne sukesuke a Kristina mo Molimau a Ieova ki te Tusi Tapu. Kae ne manako tou fafine ke fai a ia pelā me se tino tātā piano i koniseti, kae ne manuia eiloa ana taumafaiga konā. E se gata i ei, ne manavase foki tou fafine e uiga ki te faiga o te galuega talai, kae mataku ei ma talia ne ia a tiute kolā e ‵tau o fai ne ia mai tua o te papatisoga. I te taimi ne sukesuke faeloa ei a Kristina ki te Muna a te Atua, ne kamata o lagona ne ia tena malosi. Ne iloa ei ne ia te uiga o te mataku ki a Ieova, e pelā foki mo te manako o Ieova ke a‵lofa atu ana tavini ki a ia mo olotou loto, mafaufau, foitino mo te olotou malosi kātoa. (Maleko 12:30) Ne fakamalosi atu ei te mea tenei ke tuku atu a ia ki a Ieova kae papatiso foki.

¹⁴ Ne fakamolemole atu a Kristina ki a Ieova mō se fesoasoani ke gasolo a ia ki mua i te feitu faka-te-agaga. “E iloa ne au me e aofia i te olaga o se tino tātā piano i koniseti ko te faimalaga faeloa e pelā foki mo feagaiga ke tātā i koniseti kolā e nofo ki se 400 i se tausaga,” ko te fakamatalaga a Kristina. “Tela la, ne fakaiku aka ei ne au ke fai au mo fai se faiakoga ke tausi ei au i mea tau tupe kae galue tumau foki e pelā me se tino talai.” I te taimi tenā, ko oti ne fili aka a Kristina ke kau atu i te taimi muamua eiloa ki se koniseti i te ‵toe fale fai koniseti gali eiloa i tena fenua. Ne fai mai tou fafine: “Ne fai taku koniseti muamua mo fai taku koniseti fakaoti eiloa.” Ko oti nei ne avaga a Kristina mo se toeaina Kelisiano. Nei la, ko tavini tokolua atu a laua i se ofisa lagolago e tasi o Molimau a Ieova. Ko fiafia eiloa tou fafine me ne tuku atu ne Ieova te malosi ke fai ana filifiliga ‵tonu kae ko fakaaogā ne ia nei ana taimi mo tena malosi i tena galuega.

Se Togi Tāua ‵Ki

15. Se a te mea ne manako ki ei a Tavita ke togi atu ki ana tama‵liki, kae ne fai ne ia pefea te mea tenā?

¹⁵ Ne tusi mai Tavita: “[“Aku tama,” NW], o‵mai o faka‵logo mai ki a au, ke akoako atu ne au a koutou ke ma‵taku ki te Aliki.” (Salamo 34:11) E pelā me se tamana, ne manako malosi a Tavita ke togi atu ki ana tama‵liki se mea tāua ‵ki​​—ko te mataku tonu ki a Ieova telā e paleni kae katoatoa. E auala i ana pati mo ana faifaiga, ne tuku mai ne Tavita te ata o Ieova, e pelā me se Tamana alofa, atafai kae alofa fakamagalo ki Ana tama‵liki i te lalolagi, kae e se pelā me se Atua sauā kae faimālō, telā e salasala faeloa ki mea ‵se e fai ne tatou ki Ana tulafono. Ne fesili mai Tavita: “Ko oi se tino e mafai o iloa ne ia a mea ‵se e fai ne se tino?” Ko te mea ke fakaasi mai ne ia tena loto talitonu me e se salasala faeloa a Ieova ki ‵tou mea ‵se e fai, ne toe fai mai a ia: ­“Faka‵ma ne koe au mai mea sē lavea katoa!” Ne mautinoa i a Tavita me kafai e fai ne ia te ‵toe mea e mafai o fai, e mafai eiloa o talia ne Ieova ana pati mo ana mafaufauga katoa.​​—Salamo 19:​12, 14, By­ing­ton.

16, 17. E mafai pefea o akoako ne mātua olotou tama‵liki e uiga ki te ma‵taku ki a Ieova?

¹⁶ E fai a Tavita e pelā me se fakaakoakoga ki mātua i aso nei. “Ne puti aka ne mā mātua a maua i se auala telā ne fai ei ke fia‵fia maua ki te munatonu,” ko pati a Ralph telā ko tavini fakatasi atu nei mo tena taina i se ofisa lagolago a Molimau a Ieova. “I te taimi koi fo‵liki ei maua ne aofia ne laua a maua i lā sautalaga e uiga ki mea fai a te fakapotopotoga, kae ne fai ei ke fia‵fia malosi maua ki te munatonu e pelā eiloa mo laua. Ne puti aka ne laua a maua ke tali‵tonu me mafai o fai ne maua a mea aogā i te galuega a Ieova. A te tonuga loa, ne ola te motou kāiga i se fia tausaga i se fenua telā ne manakogina malosi i ei a tino talai o te Malo kae fesoasoani atu foki ke faka‵tu aka a fakapotopotoga ‵fou.”

¹⁷ “A te mea telā ne fai ei ke tumau maua i te auala tonu e se ona ko te tau‵tali i se fakasologa o tulafono make‵ke kae ona ko te mea e fai a Ieova e pelā me se tino tonu, e atafai kae tafasili i te ‵lei ki mā mātua. Ne ‵sala atu laua ke iloa ‵lei ne laua a Ieova kae fakafiafia atu ki a ia, kae ne tauloto ne maua a mea e uke mai te lā ma‵taku mo te lā a‵lofa ‵tonu ki te Atua. Kafai ne fai ne maua se mea ‵se, e se fai ne mā mātua ke maua ne maua se lagonaga me ko sē alofa mai a Ieova ki a maua, io me fai ne laua ne fakataputapuga sē ‵tau mō maua. I te ukega o taimi e fakasaga‵saga ne laua a maua ki lalo kae fai‵pati mai ki a maua. I nisi taimi, e faipati mai eiloa te mā mātua mo ana loimata i ana mata i ana taumafaiga ke oko tonu atu a ia ki mā loto. Kae ne manuia eiloa. E auala i pati mo faifaiga a mā mātua ne iloa ei ne maua me i te mataku ki a Ieova se mea tafasili i te gali a ko te fai mo fai sena Molimau se mea fakafiafia eiloa, kae e se se amoga ‵mafa.”​​—1 Ioane 5:3.

18. Ne a mea e maua ne tatou mai te mataku ki te Atua?

¹⁸ E aofia i ‘pati fakaoti’ a Tavita, e fai‵tau tatou penei: “A te tupu telā e pulepule mo te fai mea tonu, telā e fai tena pulega mo te fakalogo ki te Atua, e pelā mo te la e maina mai i se vaveao.” (2 Samuelu 23:​1, 3, 4) Ne iloa ne Solomona, te tama mo te sui o Tavita, a te aogā o pati konei, me ne fakamolemole atu a ia ke tuku mai ne Ieova ki a ia “te poto” mo te mafai o “iloa te mea ‵lei mo te mea masei.” (1 Tupu 3:9) Ne iloa ne Solomona me i te mataku ki a Ieova ko te māfuaga o te poto mo te fiafia. Fakamuli ifo, ne fakatoetoe mai ne ia a te tusi ko Failauga ki ana pati konei: “I te otiga ne kilokilo au ki mea katoa konā, e tasi eiloa taku muna e fai atu: Mataku ki te Atua, kae tausi ki ana fakatonuga, me e tenā eiloa te pogai ne faite ei a te tagata. A te Atua ka fakamasino eiloa ne ia tatou i ‵tou mea katoa e fai, me ne mea ‵lei io me ne mea masei, ke oko foki eiloa ki mea e fai ‵funa.” (Failauga 12:​13, 14) Kafai e tau‵tali tatou ki pati polopoloki konā, ka iloa ei ne tatou me i te ikuga o te “loto maulalo” mo te mataku ki a Ieova e se ko te mauaga fua o te poto mo te fiafia kae penā foki mo te “fakaaloalogina mo te ola leva.”​​—Faataoto 22:4.

19. Se a te mea ka fesoasoani mai ke malamalama tatou i te ‘mataku ki a Ieova’?

¹⁹ Mai fakaakoakoga i te Tusi Tapu mo fakaakoakoga i aso nei, e lavea ei ne tatou me e aogā ‵ki ki te olaga o tavini ‵tonu a Ieova a te mataku tonu ki te Atua. E se gata fua i te puipui ne te vaegā mataku tenā a tatou mai te faiga o mea kolā e fakafanoanoa atu ei ki ‵tou Tamana faka-te-lagi, kae e tuku mai foki i ei a te loto toa ke fakafesagai atu ki ‵tou fili mo te malosi ke kufaki i tofotofoga mo tulaga faiga‵ta kolā e fe‵paki mo tatou. Tela la, ke na ‵saga tonu atu tatou, tino ma‵tua mo talavou, o suke‵suke malosi ki te Muna a te Atua, mafaufau ‵loto ki mea e tauloto ne tatou, kae fakapili‵pili atu ki a Ieova e auala i ‵talo kolā e fai faeloa mo te loto kātoa. Mai te fai penā, ka se maua fua ne tatou i ei a ‘te iloaga tonu e uiga ki te Atua’ kae ka malamalama foki tatou i te uiga o te ‘mataku ki a Ieova.’​​—Faataoto 2:​1-5.

[Fakamatalaga mai lalo]

E Mafai o Fakamatala Mai ne Koe?

E mafai pefea ne te mataku ki te Atua o

• fesoasoani mai ke toe maua se loto lagona ‵lei mai se agasala matagā ne fai?

• aumai ne ia te fiafia māfai e fepaki koe mo tofotofoga mo fakasauāga?

• fakamalosi mai ke fai ne tatou te loto o te Atua?

• fai pelā me se togi tāua ‵ki mō ‵tou tama‵liki?

[Ata i te itulau e 29]

A te mataku ki te Atua ko te mea tāua ‵ki telā e mafai o togi atu ne mātua ki olotou tama‵liki