Fakaasi Atu te Fakatuanaki i te Auala e Ola ei Koe

“Te fakatuanaki, e mate manafai e seai ne galuega alofa e fai ne tatou.”​​—⁠IAKOPO 2:​17.

1. Kaia ne ‵saga tonu atu ei a Kelisiano i aso mua ki te fakatuanaki pelā foki mo te faiga o galuega?

NE FAKAMAONI mai ne Kelisiano i aso mua a te lotou fakatuanaki i te auala ne ola ei latou. Ne fakamalosi atu a te soko ko Iakopo ki Kelisiano katoa: “Ke fai koutou mo tino kolā e tau‵tali i te muna a te Atua, kae se na ko te faka‵logo fua ki ei.” Ne toe fakaopoopo mai a ia: “A te foitino e mate manafai e seai se agaga, e penā foki a te fakatuanaki e mate manafai e seai ne galuega.” (Iakopo 1:​22; 2:​26) Kāti i se 35 tausaga mai tua o ana pati konā, ne tumau a Kelisiano e tokouke i te fakamaoni atu o te lotou fakatuanaki e auala i olotou galuega ‵lei. Kae se mea fakafanoanoa me ne seki fai penā a nisi tino. Ne fakamālō atu a Iesu ki te fakapotopotoga i Semulana; kae ne fai atu a ia ki tino e tokouke i te fakapotopotoga i Salataisa, penei: “E iloa ne au au mea e fai; e iloa foki ne au me e iai te manatu pelā i a koe e ola, kae iloa ake nei i a koe ko mate!”​​—⁠Fakaasiga 2:​8-​11; 3:⁠1.

2. Ne a fesili e ‵tau o fesili ifo ne Kelisiano ki a latou eiloa e uiga ki te lotou fakatuanaki?

² E ‵tusa mo te mea tenā, ne fakamalosi atu a Iesu ki tino i Salataisa​​—⁠kae e aofia foki i ei a tino katoa kolā ka fai‵tau fakamuli ki ana pati​​—⁠ke fakamaoni atu me e fakamuamua ne latou te lotou a‵lofa ki te munatonu faka-Kelisiano kae ke mataala faeloa i te feitu faka-te-agaga. (Fakaasiga 3:​2, 3) E mafai o fesili ifo tatou taki tokotasi ki a tatou eiloa: ‘Kae, e pefea nei aku faifaiga? E mata, e fakaasi faka‵lei atu i aku faifaiga me e taumafai malosi au o fakamaoni atu toku fakatuanaki mai mea katoa kolā e fai ne au, ke oko foki loa ki feitu kolā e se aofia i ei te galuega talai io me ko fakatasiga a te fakapotopotoga?’ (Luka 16:10) E mafai o mafau‵fau tatou ki vaega kese‵kese e uke o te olaga, kae ke fai‵pati nei tatou ki se vaega fua e tasi: ko maopoopoga ‵lasi, kolā e aofia sāle i ei a mea kolā e fai mai tua o fakaipoipoga Kelisiano.

Tamā Maopoopoga

3. Se a te kilokiloga i te Tusi Tapu e uiga ki te ‵kau ki maopoopoga?

³ E fia‵fia a te tokoukega o tatou māfai e ‵kami atu ki se maopoopoga o Kelisiano fia‵fia. A Ieova ko “te Atua fiafia,” telā e manako ko ana tavini ke fia‵fia foki. (1 Timoteo 1:​11, NW) Ne fai ne ia a Solomona ke tusi ne ia i te Tusi Tapu a te mea tonu tenei: “Au e talitonu me e ‵tau eiloa mo te tagata o fakafiafia i te olaga nei, me i te mea fakafiafia e tasi i te olaga nei, ko te kai kae inu kae fiafia. E mafai o fai ne ia te mea tenā i ana galuega i te olaga tenei.” (Failauga 3:​1, 4, 13; 8:​15) E mafai o maua ne tatou te vaegā fiafia penā i te taimi ko ‵kai ei te kāiga io me ko nisi tamā maopoopoga kolā e fai ne tino tapuaki ‵tonu.​​—⁠Iopu 1:​4, 5, 18; Luka 10:​38-​42; 14:​12-​14.

4. Se a te mea telā e ‵tau o saga tonu atu ki ei se tino telā e fakatoka ne ia se maopoopoga?

⁴ Kafai e fakatoka ne koe se maopoopoga penā, e ‵tau o mafaufau faka‵lei koe ki au fakatokaga, faitalia me ne nāi tino tali‵tonu fua e ‵kami mai ne koe ki se ‵kaiga kae ke sau‵tala fakatasi mo latou. (Loma 12:13) E ‵tau o manako koe ke lavea atu me ne “fanofano ‵lei kae gali” a mea katoa e ‵tusa mo te takitakiga a “te poto mai te lagi.” (1 Kolinito 14:40; Iakopo 3:​17) Ne tusi mai te apositolo ko Paulo: “Me ne a otou mea e fai, me ‵kai io me inu, e fai katoa ne koutou mō te vikiga o te Atua. Sa fai ne koutou se mea e ‵mae ei te loto o [te] tino.” (1 Kolinito 10:​31, 32) Ne a nisi mea e ‵tau o ‵saga tonu atu ki ei? A te mafaufau muamua faka‵lei ki mea konei, e mafai o fesoasoani mai ke fakamautinoa aka me i mea kolā e fai ne koe fakatasi mo au tino ‵kami se fakaasiga tenā o tou fakatuanaki.​​—⁠Loma 12:⁠2.

Ne a Mea e Fai i te Maopoopoga Tenā?

5. Kaia e ‵tau ei mo te tino e fakatoka ne ia te maopoopoga o mafaufau faka‵lei me e ‵tau o fakasoa atu a meainu ma‵losi kae aofia foki i ei a pese fakatagi‵tagi io me ikai?

⁵ E fe‵paki sāle a tino e fakatoka ne latou te maopoopoga mo te fakalavelave me e mata, e ‵tau o isi ne meainu ma‵losi io me ikai. E se manakogina a vaegā mea penā ke fakamalosi aka ei a tino. Ke masaua me ne fakatoka ne Iesu se ‵kaiga ki se potukau o tino e tokouke kolā ne olo atu ki a ia​​—⁠ne toe fakaopoopo atu ei ne ia a falaoa mo ika. E seki fai mai te tala me ne tuku fakavavega atu ne ia a uaina, kae e iloa ‵lei ne tatou me e mafai eiloa ne ia o fai te mea tenā. (Mataio 14:​14-​21) Kafai e fakaiku aka ne koe ke fakasoa atu a meainu ma‵losi i se maopoopoga penā, ke faka‵tau ne koe te aofaki o meainu e ‵tau o fakasoa atu, kae ke fakamautinoa aka me e isi foki ne nisi meainu mō tino kolā e se inu ki meainu ma‵losi. (1 Timoteo 3:​2, 3, 8; 5:​23; 1 Petelu 4:⁠3) Ke ‵kalo katoatoa keatea mai te fakamalosi atu ki nisi tino ke inu ki se mea telā e mafai o fai ei se tino ke “u ne se gata poisini.” (Faataoto 23:​29-​32) Kae pefea la a pese fakatagi‵tagi mo te usuusuga o pese? Kafai e aofia a pese fakatagi‵tagi i te maopoopoga tenā, e ‵tau eiloa o filifili ne koe a pese, kae ke mafaufau faka‵lei ki te ‵lau mo pati o pese. (Kolose 3:8; Iakopo 1:​21) Ne iloa aka ne Kelisiano me i te fakatagitagi mo te usuusuga o Pese o te Malo e fai ei ke gali te maopoopoga. (Efeso 5:​19, 20) Kae ke masaua o onoono faka‵lei foki ki te maluga o te leo o pese fakatagi‵tagi ko te mea ke se fakalavelave atu ki sau‵talaga gali kolā e fai io me ko tuakoi.​​—⁠Mataio 7:​12.

6. E fakaasi atu pefea ne se tino e fakatoka ne ia se maopoopoga me e malosi tena fakatuanaki e uiga ki te faiga o sau‵talaga io me ko nisi mea aka?

⁶ I vaegā maopoopoga penā, e mafai o sau‵tala a Kelisiano ki vaegā mataupu kese‵kese, fai‵tau ki se tusi i se leo maluga, io me fai atu a tala ‵gali. Kafai ko kamata o ‵seke a te sautalaga mo tulaga o Kelisiano, e mafai ne te tino ne fakatoka ne ia te maopoopoga tenā o toe fakatonu te sautalaga mo te atamai. E ‵tau foki o matapulapula a ia ke sē pule atu se tino tokotasi ki te sautalaga tenā. Kafai e lavea ne ia te mea tenā, e mafai ne ia o faipati atu i se auala poto ke aofia a nisi tino i te sautalaga, kāti mai te ‵kami mai ne ia a talavou ke fai mai olotou tala, io me fakasae aka ne ia se isi mataupu ke sau‵tala ki ei. Ka fia‵fia malosi eiloa a tino ma‵tua mo talavou ki vaegā maopoopoga penei. E pelā me ko te tino fakatonutonu, kafai e fakatoka ne koe a mea i se auala poto kae atamai, ka ‘lavea atu au faka‵tauga ‵lei’ ne tino i konā. (Filipi 4:​5, NW) Ka iloa ei ne latou me e malosi tou fakatuanaki, telā e fakavae ki ei tou olaga kātoa.

Fakaipoipoga mo ‵Kaiga o Fakaipoipoga

7. Kaia e manakogina ei ke mafaufau faka‵lei ki te faiga o fakatokaga mō se fakaipoipoga mo maopoopoga kolā e fai i ei?

⁷ A te suā fakatokaga ke fia‵fia ki ei ko fakaipoipoga o Kelisiano. Ne ‵kau atu mo te fia‵fia a tavini i aso mua a te Atua, e aofia i ei a Iesu mo ana soko ki vaegā fakafiafiaga penei, e aofia i ei a ‵kaiga. (Kenese 29:​21, 22; Ioane 2:​1, 2) Kae fakamuli nei, e fakaasi faka‵lei mai i mea ko oti ne ‵tupu, me e manakogina a taumafaiga fakapito e uke i te fakatokaga o faifaiga kolā e fai i se fakaipoipoga ko te mea ke fakaasi atu ei a faka‵tauga ‵lei kae ke paleni ‵lei foki i te feitu faka-Kelisiano. Konei la a faifaiga masani o te olaga kolā e tuku atu ei te avanoaga ki se Kelisiano ke fakaasi atu tena fakatuanaki.

8, 9. E fakamaoni mai pefea ne faifaiga kolā e fai i fakaipoipoga e uke a te ‵tonu o pati i te 1 Ioane 2:​16, 17?

⁸ E ‵kilo atu a tino e tokouke kolā e seai se lotou iloa io me se fia ‵saga atu ki fakatakitakiga a te Atua, ki te faiga o fakaipoipoga e pelā me se avanoaga ke tō silia olotou mea e fai, io me e fakasaoloto ke fai so se mea e ma‵nako ki ei. I se mekesini e tasi i Eulopa, ne fai mai se fafine fatoā avaga e uiga ki tena fakaipoipoga telā ne fai pelā mo te fakaipoipoga a se “pelenise”: ‘Ne olo maua i loto i se kaliota telā ne ‵taki ne solofanua e fa, kae tau‵tali mai i tua ko kaliota e 12 kolā ne ‵taki ne solofanua mo se isi kaliota aka kolā e ‵sopo i ei a tino tā‵tā pese. Oti aka ne ‵kai matou ki meakai tafasili i te ‵gali, kae fakalogo‵logo ki toe pese ‵gali; ko se faka‵tau eiloa i te gali. Ko te mea eiloa telā ne manako au ki ei, ne fai au pelā me se tupu fafine i te aso tenā.’

⁹ E ui eiloa e kese‵kese a tuu mo aganuu i fenua kese‵kese, e fakamaoni mai i pati konā a te ‵tonu o pati a te apositolo ko Ioane kolā ne tusi mai: “Konei katoa a mea e taku ko mea faka te lalolagi: ko manakoga agasala, ko mea e matea ne tino kae ma‵nako ki ei, mo mea katoa i te lalolagi nei kolā e fakamata‵mata ki ei a tino. E seai eiloa se mea o mea konei e māfua mai i te Tamana; e māfua katoa mai i te lalolagi.” E mata, e mafai o fakaataata ne koe i tou mafaufau ne Kelisiano ma‵tua ‵lei kolā e fia fai te lā fakaipoipoga e pelā me se fakaipoipoga a se “pelenise” mo se ‵kaiga e pelā mo ‵kaiga e fai‵tau sāle ne tatou i tala ‵kai? I lō te fai penā, e ‵tau o fakaasi mai i lā fakatokaga me ne mafau‵fau faka‵lei laua ki te fakatakitakiga me i “te tino telā e fai ne ia a te mea loto ki ei a te Atua e ola ki te se gata mai.”​​—⁠1 Ioane 2:​16, 17.

10. (a) Ke fai se fakaipoipoga ‵lei, kaia e aogā ei ke paleni faka‵lei a fakatokaga? (e) E ‵tau o fai pefea a fakaikuga e uiga ki tino ‵kami?

¹⁰ E ma‵nako a tauavaga Kelisiano ke fai ne latou a faka‵tauga ‵lei, kae e mafai o fesoasoani atu te Tusi Tapu ki a latou. E ui eiloa e tāua ‵ki a te aso o te fakaipoipoga, e iloa ne latou me ko te kamataga fua tenā o te olaga o Kelisiano e tokolua e pelā me se tauavaga kolā e fakamoe‵moe ke maua ne laua te ola se-gata-mai. E se manakogina ke fai ne laua se ‵kaiga lasi ‵ki i te taimi o te fakaipoipoga. Kafai e filifili aka ne laua ke fai se ‵kaiga, kāti e ma‵nako laua o fakagalue aka muamua te aofaki tupe e mafai o fakamāumāu ki ei mo te vaegā ‵kaiga e ma‵nako laua ki ei. (Luka 14:28) I te lā olaga e pelā me ne Kelisiano, e fai a te tagata e pelā me ko te ulu o te kāiga. (1 Kolinito 11:3; Efeso 5:​22, 23) Tela la, e ‵tau eiloa o pule atu te tagata fakaipoipo ki te ‵kaiga o te fakaipoipoga. E tonu, e ‵tau o fesokotaki atu a ia mo te alofa ki te fafine telā ka avaga a ia ki ei e uiga ki tino kolā e ma‵nako io me mafai ne laua o ‵kami ki te ‵kaiga o te fakaipoipoga. Kāti e se mafai o ‵kami mai ne laua a lā taugasoa mo kāiga katoa; tela la, e manakogina ke fai ne fakaikuga ‵lei ki ei. E ‵tau o maua ne te tokolua konei a te loto talitonu me kafai e se ‵kami ne laua a nisi taina Kelisiano, e ‵tau o maua ne latou konā a te loto malamalama kae ka se fakavāivāi atu foki ki a latou.​​—⁠Failauga 7:⁠9.

“Te Pule o te ‵Kaiga”

11. Se a te tiute e pānaki mo “te pule o te ‵kaiga” i te fakaipoipoga?

¹¹ Kafai e fakaiku aka ne se tokolua ke fai se ‵kaiga ke fakamanuia ei te fakaipoipoga, e fakamautinoa aka pefea ne laua me e ‵malu a te maopoopoga tenā? Ko oti ne iloa aka ne Molimau a Ieova, i se fia sefulu tausaga ko ‵teka, a te tāua ke fakaakoako ki te vaegā fakaipoipoga telā ne kau atu ki ei a Iesu i Kana. Ne isi se “pule o te ‵kaiga,” telā se taina talitonu eiloa. (Ioane 2:​9, 10) I se auala tai ‵pau, ka filifili aka ne se tagata fakaipoipo poto se taina Kelisiano matua ‵lei ke pānaki mo ia te tiute tenei. Kafai ko iloa ne ia a manakoga o te tagata fakaipoipo mō te maopoopoga tenā, e mafai ne te pule o te ‵kaiga o saga atu ki mea konā mai mua kae i te taimi foki e fai ei te ‵kaiga.

12. Se a te mea e ‵tau o mafaufau faka‵lei ki ei te tagata fakaipoipo e uiga ki te fakaaogāga o meainu ma‵losi?

¹² E ‵tusa mo te mea ne sau‵tala ki ei i te palakalafa e 5, e filifili aka ne nisi tauavaga ke se aofia a meainu ma‵losi i ‵kaiga o fakaipoipoga ko te mea ke se fakamasei aka ne te mea tenā a te fiafia mo te gali o te maopoopoga tenā. (Loma 13:13; 1 Kolinito 5:​11) Kae kafai e aofia ne laua a meainu ma‵losi, e ‵tau o fakamautinoa aka ne te tagata fakaipoipo me e fakasoa faka‵tau atu a mea konā. Ne isi ne uaina ne fakasoa atu i te fakaipoipoga telā ne kau ki ei a Iesu i Kana, kae ne tuku atu foki ne ia a uaina ‵lei. Se mea gali me ne fai mai te pule o te ‵kaiga tenā, penei: “A tino katoa e muamua eiloa o tufa te uaina ‵lei, kae kafai ko inu malosi a tino ki ei, ko tufa mai ei te uaina masei; kae ne tausi ne koe te uaina ‵lei ki te taimi tenei.” (Ioane 2:​10) E tonu, ne seki fakamalosi atu ne Iesu a te inu malosi ke konā, me e se talia ne ia te faifaiga tenā. (Luka 12:​45, 46) I ana pati ofo ki te ‵lei o te uaina, ne fakaasi faka‵lei mai ne te pule o te ‵kaiga me ko oti ne lavea ne ia a nisi tino ‵kami ko ko‵nā. (Galuega 2:​15; 1 Tesalonia 5:⁠7) Tela la, e ‵tau mo te tagata fakaipoipo fakatasi mo te Kelisiano fakatuagagina telā ne filifili aka ke fai mo fai te pule o te ‵kaiga, o fakamautinoa aka ne laua me e tau‵tali atu a tino katoa ki te fakatonuga tenei: “Ke mo a e ko‵nā koutou i te uaina, telā e fakamasei ne ia a koutou.”​​—⁠Efeso 5:​18; Faataoto 20:1; Hosea 4:​11.

13. Se a te mea e ‵tau o mafaufau faka‵lei ki ei se tauavaga māfai e mafau‵fau laua ke isi ne pese fakatagi‵tagi i se ‵kaiga o te fakaipoipoga, kae kaia?

¹³ E pelā mo nisi maopoopoga, kafai e isi ne pese fakatagi‵tagi i ei, e ‵tau foki o saga faka‵lei atu ki te maluga o pese fakatagi‵tagi ko te mea ke mafai o lagona faka‵lei ne tino olotou sautalaga. Ne fai mai se toeaina Kelisiano: “Kafai ko gasolo aka te po, kae ko kamata foki o ‵loto a sau‵talaga io me ko kamata o ‵saka a tino, i nisi taimi e momea aka foki eiloa te ma‵luga o pese fakatagi‵tagi. A pese kolā ne fakatagi‵tagi muamua i se maluga telā e gali te fakalogologo ki ei, e mafai eiloa o gasolo aka o ma‵luga kae fakalavelave atu ki sau‵talaga a tino. A ‵kaiga o fakaipoipoga se avanoaga gali tenā ke ‵kau fakatasi i ei a taina. Ma‵faga la o mea fakafanoanoa māfai ko fakasēaogā a te mea tenei ne pese fakatagi‵tagi kolā ko tō logoā!” Ko te taimi foki eiloa tenei e ‵tau ei o fai ne te tagata fakaipoipo mo te pule o te ‵kaiga se faiga, ko te mea ke se tuku atu ki tino fakatagi‵tagi a te pule ki te maluga o pese fakatagi‵tagi, faitalia me ne ‵togi mai latou io me ikai. Ne tusi mai a Paulo: “So se mea a koutou e fai i muna me ko faiga, ke fai ne koutou a mea katoa i te igoa o te Aliki ko Iesu.” (Kolose 3:​17) Kafai ko ‵foki atu a tino ‵kami ki olotou fale mai tua o se ‵kaiga o te fakaipoipoga, e mata, e fakamasaua atu ki a latou a pese fakatagi‵tagi me ne fai ne te tauavaga konā a mea katoa i te igoa o Iesu? E ‵tau eiloa o fai penā.

14. Se a te mea e ‵tau o masaua ne Kelisiano e uiga ki se fakaipoipoga?

¹⁴ E tonu, a te fakaipoipoga telā ne fakatoka faka‵lei ka se mafai eiloa o fakapuli. Ne fai mai a Adam mo Edyta, kolā ne fakaipoipo i tausaga e 30, e uiga ki se fakaipoipoga e tasi: “E mafai eiloa o lagona ne koe a faifaiga faka-Kelisiano i ei. Ne usu atu i ei a pese o vikiga ki a Ieova e penā foki eiloa mo nisi fakafiafiaga ‵gali. A siva mo pese fakatagi‵tagi ne seki tāua malosi. Ko se fuafuagina eiloa te gali kae fakamalosi loto foki, kae ne fetaui a mea katoa mo fakatakitakiga i te Tusi Tapu.” E manino ‵lei, me e uke a mea e mafai o fai ne se tauavaga ke fakaasi atu ei me e ola laua i te fakatuanaki e ‵tusa mo lā galuega.

Meaalofa mō te Fakaipoipoga

15. Se a te fakatakitakiga mai te Tusi Tapu e mafai o fakagalue aka e uiga ki te faiga o meaalofa?

¹⁵ I fenua e uke, se mea masani ke tuku atu ne taugasoa mo kāiga a meaalofa ki tino kolā ka fakaipoipo. Kafai e manako koe ke fai penā, se a te mea e ‵tau o masaua ne koe? Ke masaua a pati a te apositolo ko Ioane e uiga ki ‘mea kolā e fakamata‵mata ki ei a tino.’ Ne fakafetaui ne ia te vaegā fakamatamata tenā, e se ki Kelisiano kolā e fakaasi atu te lotou fakatuanaki i olotou galuega, kae ki ‘te lalolagi telā ko pili o palele atu.’ (1 Ioane 2:​16, 17) E ‵tusa mo te fakaasiga ne lavea ne Ioane, e mata, e ‵tau o fakaasi atu ne te tauavaga a igoa o tino kolā ne tuku atu olotou meaalofa? Ne tuku atu ne Kelisiano i Maketonia mo Akaia ne meaalofa ki taina i Ielusalema, kae e se fakaasi mai me ne taku atu a igoa o tino kolā ne fai meaalofa. (Loma 15:26) Kāti e ma‵nako a Kelisiano e tokouke kolā e tuku atu olotou meaalofa ke se fakaasi atu olotou igoa i lō te faiga ke ‵saga atu a tino ki a latou. E ‵tusa mo te mea tenei, ke toe onoono aka ki pati fakatonutonu a Iesu i te Mataio 6:​1-4.

16. E ‵kalo keatea pefea se tauavaga fou mai te fakalogo‵mae atu ki lagonaga o nisi tino e uiga ki meaalofa mō fakaipoipoga?

¹⁶ A te fakaasi atu o igoa o tino fai meaalofa e mafai o iku atu ki te “fakatau‵fai” me i a ai te meaalofa e sili atu i te gali io me ‵togi ‵mafa atu. Tela la, a tauavaga ‵poto e ‵kalo keatea mai te faka‵pula atu o igoa o tino fai meaalofa. A te faka‵pula atu o igoa o tino e mafai o fakamasiasi atu ki nisi tino kolā kāti e se mafai o fai ne olotou meaalofa. (Kalatia 5:​26, NW; 6:10) E se se mea masei ke iloa ne te tagata mo te fafine fakaipoipo a tino kolā ne fai meaalofa. Kāti e mafai o iloa ne laua mai se tamā tusi telā e avatu tasi mo te meaalofa, kae e se ‵tau o faitau atu ke iloa ne tino. Kafai e ‵togi, e tuku atu, io me maua se meaalofa o te fakaipoipoga, se avanoaga gali mō tatou tenā ke fakaasi atu me e fakavae eiloa ‵tou faifaiga ki te ‵tou fakatuanaki.a

17. Se a te fakamoemoega e ‵tau o maua ne Kelisiano e uiga ki te lotou fakatuanaki mo olotou galuega?

¹⁷ A te fakamaoni atu o ‵tou fakatuanaki e se ko te faiga fua ke ‵lei ‵tou amioga, te kau atu ki fakatasiga Kelisiano mo te faiga o te galuega talai. Ke na maua eiloa ne tatou katoa te fakatuanaki malosi telā ka fakavae ki ei a mea katoa kolā e fai ne tatou. E tonu, e mafai o fakaasi atu ne tatou te ‵tou fakatuanaki e auala i ‵tou faifaiga kolā e “katoatoa,” e aofia i ei a vaega katoa o te olaga kolā ne sau‵tala tatou ki ei.​​—⁠Fakaasiga 3:⁠2.

18. E lavea atu pefea te ‵tonu o pati i te Ioane 13:17 e uiga ki fakaipoipoga mo maopoopoga a Kelisiano?

¹⁸ Mai tua o te fakaakoakoga ‵lei telā ne fai ne Iesu mō ana apositolo fakamaoni i te ‵fuluga ne ia o olotou vae, ne fai atu a ia: “Ko iloa nei ne koutou a te mea tonu; amutia koutou manafai e fai ne koutou!” (Ioane 13:​4-17) I te koga e ‵nofo i ei tatou i aso nei, kāti e se manakogina io me e se se faifaiga masani ke ‵fulu ne tatou a vae o nisi tino, e pelā mo vae o se tino ‵kami a tatou. E pelā mo te mea ne sau‵tala ki ei i te mataupu tenei, e isi ne nisi vaega o te olaga kolā e mafai o fakaasi atu i ei ne tatou a ‵tou fakatuanaki e auala i faifaiga a‵lofa kae atafai, e pelā mo fakaala mo fakaipoipoga a Kelisiano. E mafai eiloa o fai penā, faitalia me i ō tatou te fakaipoipoga io me e pelā me ne tino ‵kami ki se fakaipoipoga io me ki se maopoopoga fia‵fia a Kelisiano kolā e fia fakaasi atu ne latou te lotou fakatuanaki i olotou faifaiga.

[Fakamatalaga mai lalo]

Ka Tali Mai Pefea ne Koe?

E fakamaoni atu pefea ne koe tou fakatuanaki māfai e

• fakatoka ne koe se maopoopoga?

• fakatoka ne koe se fakaipoipoga io me se ‵kaiga o te fakaipoipoga?

• tuku atu io me e maua ne koe ne meaalofa o te fakaipoipoga?

[Ata i te itulau e 14]

Faitalia me e ‵kami mai ne koe a nāi tino, ke takitaki koe ne te “poto mai te lagi”