Se Kinauga Telā e Aofia Koe i ei

E MATA, e isi sou taugasoa io me se kāiga telā e ‵pili ‵ki te lū vā? Kae e a māfai e ‵losi atu se tino me e ‵pili te lū fesokotakiga ona ko ou manakoga kaimanako? E mata, ka se logo‵mae io me kaitaua koe? Tenā eiloa te ‵losiga ko oti ne fai atu ne Satani te Tiapolo e uiga ki tino katoa kolā e maua ne latou se fesokotakiga ‵pili mo Ieova te Atua.

Mafaufau ki mea ne ‵tupu i te taimi ne iku manuia ei a taumafaiga a Satani i te faiga o te tauavaga muamua, ko Atamu mo Eva, ke soli ne laua te tulafono a te Atua kae ‵kau atu ki a ia i tena ‵tekeatuga ki te Atua. E mata, e fakauiga i te mea ne tupu me ka faka‵logo fua a tino ki a Ieova māfai e aogā ki a latou ke fai penā? (Kenese 3:​1-6) I se 2,500 tausaga mai tua o te ‵tekeatuga o Atamu, ne fakasae aka ei ne Satani te kinauga eiloa tenei​​—⁠kae i te taimi tenei ne fai ne ia ki te tagata e igoa ki a Iopu. Ona ko te manino ‵lei o te kinauga telā ne fakaasi mai i te ‵losiga telā ne fai ne te Tiapolo, ke na iloilo faka‵lei aka ne tatou te tala tenā i te Tusi Tapu.

“Ka se Mafai Eiloa o Tiakina ne au Toku Fakamaoni”

A Iopu se tagata “‵lei io me amiotonu mo te fakatuanaki,” telā ‘e tapuaki ki te Atua kae fakaeteete i a ia ma agasala.’ Kae ne ‵fuli fakakotua ne Satani te fakamaoni o Iopu. Ne fesili atu a ia ki a Ieova: “E mata e tapuaki atu eiloa a Iopu ki a koe manafai e seai sena ‵lei e maua mai i tena tapuaki atu ki a koe?” Ne taku fakamasei i konei ne te Tiapolo a te Atua mo Iopu mai te ‵losi atu me ne ‵togi ne Ieova te fakamaoni o Iopu mai te puipui mo te fakamanuia atu ki a ia. Ne faipati toa atu a Satani: “I te taimi nei, se taumate kafai e ave keatea ne koe ana mea katoa, e iku eiloa o muna masei ne ia a koe!”​​—⁠Iopu 1:​8-​11.

Ke tali atu ki ‵losiga konei, ne talia ei ne Ieova ke tofotofo aka ne Satani a Iopu. I ana taumafaiga ke ‵fuli keatea a Iopu mai te tavini atu ki te Atua, ne fakaoko takitatasi atu ei ne te Tiapolo a fakalavelave ki te tagata fakamaoni tenā. Ne kaisoa io me ne fakaseai atu a lafu manu katoa a Iopu, ne tamate ana tavini, kae ne ‵mate foki ana tama‵liki katoa. (Iopu 1:​12-​19) Kae e mata, ne iku manuia a Satani? Ikai, e se tāitāi eiloa! E tiga eiloa e se iloa ne ia me i te Tiapolo ko te pogai o ana fakalavelave, ne fai mai a Iopu: “Ne aumai ne te Aliki [ko Ieova] aku mea, kae nei ko ave keatea foki ne ia. Ke vikia te igoa o te Aliki [ko Ieova]!”​​—⁠Iopu 1:​21.

Mai tua ifo i ei, ne fanatu a Satani ki mua o Ieova, kae fai atu ki a ia: “Ne fai mai koe ki a au ke talia atu koe ke fano o fakapuapuagā a Iopu kae seai se pogai ‵tau, ka ko Iopu ne tumau eiloa tena loto fakamaoni.” (Iopu 2:​1-3) A te kinauga tāua i konei ko te fakamaoni o Iopu​​—⁠se uiga telā e manakogina i ei te fakamaoni e aunoa mo te gutugutulua ki te Atua mo te ‵piki ‵mau ki te amiotonu. Tela la, ne manumalo eiloa a Iopu i te taimi tenā i te kinauga e uiga ki te fakamaoni. Kae ne seki ‵fiu eiloa te Tiapolo.

Ne toe fai atu ne Satani se kinauga telā e pokotia i ei a tino katoa. Ana muna ki a Ieova: “A te tagata e mafai fua o tiakina ana mea katoa manafai ko manako ke ola a ia. Kafai e fakapakia ne koe tena foitino, e iku eiloa o muna masei atu ki a koe!” (Iopu 2:​4, 5) Mai te fakaaogāga o te pati “te tagata” i lō te igoa o Iopu, ne fakafesili ei ne te Tiapolo a te fakamaoni o tino katoa. E pelā me ne fai atu a ia, penei: ‘Ka fai ne se tagata so se mea ke ola ei a ia. Tuku mai ki a au se avanoaga, kae ka ‵fuli ne au so se tino keatea mai te Atua.’ E mata, ka seai eiloa se tino e tumau i te fakamaoni ki te Atua mai lalo i so se fakanofonofoga i taimi katoa?

Ne talia ne Ieova ke fakalogo‵mae ne te Tiapolo a Iopu ki se masaki matagā. Ne logo‵mae malosi a Iopu kae ne ‵talo atu ei ke na mate atu a ia. (Iopu 2:7; 14:13) Kae ne fai mai foki a Iopu: “Ke oko ki te taimi e mate ei au ka se mafai eiloa o tiakina ne au toku fakamaoni.” (Iopu 27:​5, NW) Ne fai atu ne Iopu a pati konei me ne alofa a ia ki te Atua, kae e seai eiloa se mea ne mafai o ‵fuli ne ia te mea tenā. Ne fakatalitonu mai ne Iopu i a ia se tagata fakamaoni. E fai mai te Tusi Tapu: “Kae toe fakamaumea a ia ne te Atua, kae avatu ki a ia e lua taimi te uke o ana mea i te taimi nei i lō ana mea mua.” (Iopu 42:​10-​17) E mata, e isi aka foki ne tino e pelā mo Iopu? Ne a mea ko oti ne fakaasi mai i taimi ko ‵teka?

Te Auala ne Tali Atu ei ki Pati ‵Toa

I te mataupu e 11 o te tusi ko Epelu i te Tusi Tapu, ne taku mai ne te apositolo ko Paulo a igoa o nisi tāgata mo fāfine fakamaoni mai mua o te kau Kelisiano, e aofia i ei a Noa, Apelaamo, Sala, mo Mose. Ne toe fai mai te apositolo: “Ko se lava te taimi e tala fakamaea atu ei ne au a [nisi tino].” (Epelu 11:32) Ko se faka‵tau eiloa i te tokouke o tavini fakamaoni konei a te Atua telā ne fakasino atu ei a Paulo ki a latou e pelā me ‘se kaumana lasi o molimau,’ ne fakatusa ne ia latou ki se kaumana matolutolu telā e faka‵lava i te matālagi. (Epelu 12:​1, NW) E tonu, talu mai te fia selau o tausaga ko ‵teka, ne fakaaogā ne tino e tokouke te lotou saolotoga o fai olotou filifiliga ke tumau latou i te fakamaoni ki a Ieova te Atua.​​—⁠Iosua 24:⁠15.

Ne tuku mai eiloa ne te Tama a te Atua, ko Iesu Keliso a te ‵toe tali mautinoa ki te ‵losiga a Satani me e mafai ne ia o ‵fuli a tino keatea mai i a Ieova. Ne seki mafai foki eiloa ne te logo‵mae o te mate i luga i te sataulo o tapale tena fakamaoni ki te Atua. I tena manavaga fakaoti eiloa, ne tagi atu a Iesu: “Toku Tamana, ko tuku atu ne au toku agaga ki ou lima!”​​—⁠Luka 23:⁠46.

Ko oti eiloa ne fakaasi manino mai me ne seki mafai ne te Tiapolo o ‵fuli keatea a tino katoa mai te tavini atu ki te Atua tonu. E lau i te fia o tino ko oti ne iloa ne latou a Ieova kae ‘a‵lofa ki a ia mo olotou loto kātoa mo olotou foitino kātoa mo olotou mafaufau kātoa.’ (Mataio 22:37) Ko te lotou fakamaoni ‵mautakitaki ki a Ieova e fakatalitonu atu ei te ‵se o Satani i te kinauga e uiga ki te fakamaoni o tino katoa. E mafai foki o fakamaoni atu ne koe a te ‵se o te Tiapolo mai tou fai mo fai se tino fakamaoni.

Ne a Au Mea e ‵Tau o Fai?

Ko te loto eiloa o te Atua “ke ola tino katoa, ka ke iloa foki ne latou te munatonu.” (1 Timoteo 2:⁠4) E mafai pefea o fai ne koe te mea tenā? Fakaavanoa ne taimi ke sukesuke ki te Tusi Tapu kae ‘ke iloa foki ne koe te Atua tonu e tokotasi mo te tino telā ne uga mai ne ia, ko Iesu Keliso.’​​—⁠ Ioane 17:⁠3.

Ne toa atu a Satani e uiga ki te fakamaoni o te tino mai te fakafesili ne ia te pogai e tavini atu ei a ia ki te Atua. Kafai e fakamalosi aka ou lagonaga ne te poto, e ‵tau o ‵goto ki tou loto. Kae ko te mea ke fai penā, e ‵tau o uke atu au mea e fai i lō te ‵sala atu fua ki fakamatalaga mai te Tusi Tapu. Fakamasani o mafaufau ‵loto ki au mea e tauloto. (Salamo 143:⁠5) Kafai e faitau koe ki te Tusi Tapu io me se tusi faka-te-Tusi Tapu, ke masaua o fakaaogā ne taimi o mafaufau ‵loto ki vaegā fesili penei: ‘Se a te mea e akoako mai ki a au i konei e uiga ki a Ieova? Ne a uiga o te Atua e fakaasi mai i konei? I feitu fea o toku olaga e manakogina ke fai au penei? Ne a mea e talia kae ne a mea e se talia ne te Atua? E pokotia pefea i ei oku lagonaga e uiga ki te Atua?’ Ko te mafaufau ‵loto ki vaegā mea penā ka faka‵fonu i ei tou loto ki te alofa mo te loto fakafetai ki te Tino telā ne faite ne ia a mea katoa.

E se gata fua te ‵tou fakamaoni ki te Atua i ‵tou talitonuga fakalotu. (1 Tupu 9:⁠4) A te fakatumauga o te ‵tou fakamaoni ki a Ieova te Atua e manakogina i ei a amioga ‵lei i feitu katoa o te olaga. Kae ka seai se mea e galo mai i a koe māfai e tumau koe i te fakamaoni i so se mea. A Ieova ko te “Atua fiafia,” kae e manako ke fiafia koe i te olaga. (1 Timoteo 1:​11, NW) Mafaufau nei ki au faifaiga masani kolā e ‵tau o ‵kalo keatea mai i ei ko te mea ke tumau koe i amioga ‵mā kae ke maua foki i ei se olaga fiafia mo te taliaga a te Atua.

‵Kalo Keatea Mai Faifaiga Fakatauavaga sē ‵Tau

Ne fakatoka eiloa ne Ieova a tulaga e uiga ki te fakaipoipoga i tena Muna, ko te Tusi Tapu, telā e fai mai: “Tenā te pogai e tiakina ei ne te tagata tena tamana mo tena mātua kae ‵nofo fakatasi mo te fafine, telā ko tasi ei laua.” (Kenese 2:​21-​24) Ona ko te mea ko “tasi” te foitino o te tauavaga fakaipoipo, e fakaaloalo eiloa laua ki te fakatokaga a te Atua mō te fakaipoipoga māfai e fakatapulā a lā faifaiga fakatauavaga ki a laua eiloa. Ne fai mai te apositolo ko Paulo: “E ‵tau o faka‵malu ne tino katoa a te fakaipoipoga, kae ke se lailai te lā moega; e fakasala ne te Atua a latou kolā e finalalolagi mo latou kolā e mulilua.” (Epelu 13:​4, Tusi Paia, Samoa) A te tugāpati ko te “lā moega” e fakauiga loa ki faifaiga fakatauavaga i te vā o se tagata mo se fafine kolā ko oti ne fakaipoipo i te tulafono. Ko so se tino i a laua e aofia i faifaiga fakatauavaga i tua o te fakaipoipoga, ko mulilua a ia kae ka fakamasino ne te Atua.​​—⁠Malaki 3:⁠5.

Kae e a faifaiga fakatauavaga mai mua o te fakaipoipoga? E seke foki te mea tenā mo fakanofonofoga kolā ne fakatoka ne Ieova. E fai mai te Tusi Tapu: “Tenei te loto o te Atua . . . ke faka‵mao koutou mai amioga fina lalolagi.” (1 Tesalonia 4:⁠3) A amioga fakasotoma, te mataifale, penā foki loa mo te ‵moe mo manu ne agasala a mea konā ki te Atua. (Levitiko 18:​6, 23; Loma 1:​26, 27) So se tino telā e manako o fakafiafia atu ki te Atua kae ola i se olaga fiafia tonu, e ‵tau o ‵kalo keatea mai amioga ma‵sei.

Kae e a faifaiga kolā e fakamalosi aka ei a lagonaga ma‵sei a koituai o avaga? E se fiafia a Ieova ki faifaiga penā. (Kalatia 5:​19) E ‵tau foki o tausi te mafaufau ke ‵ma mai mafaufauga ma‵sei. Ne fai mai a Iesu: “So se tino e onoono atu ki se fafine kae manako ki ei tena loto, ko mulilua a ia i te loto.” (Mataio 5:​28) E aofia foki i pati konā te onoono ki ata ma‵sei i mekesini, i tamunei, io me ko te Internet; te faitau ki tala e uiga ki faifaiga fakatauavaga; mo te fakalogologo ki lagi o pese e uiga ki mea ma‵sei. A te ‵kalo keatea mai vaegā mea penā e fakafiafia atu eiloa ki te Atua kae e maua i ei ne se tino a fakamalosiga aogā i tena olaga.

Kae e a te fakatāgata mo te fakafāfine valevale? E fakauiga te mea tenā ki “faifaiga io me ko amioga fakalata tino.” A te tagata io me se fafine avaga telā e fai ne ia te mea tenā ki se tino i tua o tena fakaipoipoga e ‵teke atu eiloa ki akoakoga fakavae i te Tusi Tapu kae se fakailoga foki o te sē āva ki a Ieova. (Efeso 5:​28-​33) Kae e pefea te sē ‵lei ke fakatau fakaasi atu ne tino ‵taka a faifaiga fakafāmau mo lā fakafia‵fia fua! Kae e a māfai ko kamata o mafaufau ‵mafa a te suā tino ki faifaiga penā? Mafaufau la ki te logo‵mae telā e mafai o māfua mai i ei. Kae e maina foki me e mafai o iku atu a faifaiga penā ki te mulilua io me ko te finalalolagi. I te suā feitu la, a faifaiga ‵ma kolā e fai atu ki fāfine io me ko tāgata e momea aka ei te āva o tino ki a koe.​​—⁠1 Timoteo 5:​1, 2.

Te Fakafiafia Atu ki te Atua i Nisi Feitu o te Olaga

E mauagofie fua a meainu ma‵losi i fenua e uke. E mata, se mea masei a te inu ki ei? A te inu ‵tau ki uaina, pia, io me ko nisi meainu ma‵losi e se fakatapu i te Tusi Tapu. (Salamo 104:15; 1 Timoteo 5:​23) Kae ko te inu valea mo te konā ne mea ma‵sei i te kilokiloga a te Atua. (1 Kolinito 5:​11-​13) E mautinoa eiloa me e se manako koe ke fakamasei tou malosi kae fakamakosu tou kāiga ne te inu valea.​​—⁠Faataoto 23:​20, 21, 29-​35.

A Ieova ko te “Atua fakamaoni.” (Salamo 31:⁠5) E fai mai te Tusi Tapu: ‘E se mafai o loi te Atua.’ (Epelu 6:​18) Kafai e manako koe ke maua te taliaga a te Atua, ka se manako eiloa koe o loi. (Faataoto 6:​16-​19; Kolose 3:​9, 10) E fakamalosi atu te Tusi Tapu ki Kelisiano: “A tino katoa e ‵tau o fai‵pati ki olotou taina ki te mea tonu.”​​—⁠Efeso 4:​25.

E penā foki te kemupolo. E tiga eiloa e lauiloa te mea tenei i tino e tokouke, a te kemupolo se vaega o te kaimanako, ona ko te mea e taumafai ke maua a tupe e uke e auala i tupe a nisi tino. E se talia ne Ieova a tino kolā e “kaima‵nako” i se auala sē fakamaoni. (1 Timoteo 3:⁠8) Kafai e fia fakafiafia atu koe ki a Ieova, ka faka‵mao eiloa koe mai so se vaega o te kemupolo, e aofia i ei a tiketi manuia, te bingo, te pelētupe, mo peti i fakatau‵telega o solofanua. Ka iloa ei ne koe me ko uke atu au tupe e ‵toe ke tausi atu ei ki manakoga o tou kāiga.

A te kaisoa, telā ko te puke o se mea telā e se i a koe, ko te suā vaega tenā o te kaimanako. E fai mai te Tusi Tapu: “Sa kaisoa.” (Esoto 20:15) Se mea masei ke ‵togi ne koe mo te iloa se mea telā ne kaisoa mo te puke o mea e aunoa mo te fanoi. E fai mai te Tusi Tapu: “A te tino telā e masani o kaisoa, e ‵tau mo ia o fakagata tena amioga tenā, ka ko kamata o fakaputuputu mo tona olaga i fua o ana galuega ‵lei e fai ne ona lima, ko te mea ke mafai ne ia o fesoasoani ki tino ma‵tiva.” (Efeso 4:​28) I lō te kaisoa ne latou a taimi mai olotou pule, e ga‵lue fakamaoni a tino kolā e a‵lofa ki a Ieova i aso kātoa. E ma‵nako latou “o fai te mea tonu i taimi katoa.” (Epelu 13:18) Kae e fesoasoani atu eiloa a te loto lagona ‵mā ke fakafilemu ei te mafaufau o se tino.

E pefea te kilokiloga a te Atua ki se tino telā e masei ‵ki māfai ko kaitaua? E polopoloki mai te Tusi Tapu: “Sa takaga ki tino mata itaita.” (Faataoto 22:24) A te kaitaua sē pulea e iku sāle atu ki faifaiga fakasauā. (Kenese 4:​5-8) E pelā mo te taui ma sui, e fai mai te Tusi Tapu: “Sa taui atu te masei ki te masei, kae pukemau te mea ‵lei i mata o tino katoa. Fai te mea e mafai ne koutou, ko te mea ke maua te olaga filemu i te vā o koutou mo nisi tino. Aku fagasele, sa taui ma sui, kae tuku eiloa ki te taui ma sui a te Atua, me ne fai mai te Tusi, ‘Muna a te Aliki, e a aku te taui ma sui, kae e a aku foki e toe ‵togi atu.’ ” (Loma 12:​17-​19) Kafai e faka‵logo tatou ki vaegā polopolokiga penā, ka sili atu te filemu o ‵tou olaga​​—⁠kae ka momea aka ei te ‵tou fia‵fia.

E Mafai o Manumalo Koe

E mata, e mafai o manumalo koe i te fakatumauga o tou fakamaoni ki te Atua faitalia a taumafaiga ke se fai penā? Ao, e mafai eiloa. Ke iloa ne koe me e manako te Atua ke manumalo koe i te fakatalitonu atu me e ‵se a Satani i te kinauga e uiga ki te fakamaoni, me e fai mai Tena Muna: “Taku tama, a koe ke poto kae fai toku loto ke fiafia, ko te mea ke tuku atu ne au se tali ki a ia telā e fakaitaita mai ki a au.”​​—⁠Faataoto 27:​11, NW.

E mafai eiloa o ‵talo atu koe ki a Ieova ke fakamalosi atu ke fai ne koe te mea tonu i tena kilokiloga. (Filipi 4:​6, 7, 13) Tela la, ke na taumafai malosi ke momea aka tou iloa i te Muna a te Atua, ko te Tusi Tapu. A te mafaufau mo te loto fakafetai ki mea e tauloto ne koe mai te Tusi Tapu ka fesoasoani atu ei ke faka‵poko aka tou alofa ki te Atua kae ka fia fakafiafia atu eiloa koe ki a ia. “Me e tenei te uiga o te alofa ki te Atua: ko te fakalogo ki ana fakatonuga,” ko muna i te 1 Ioane 5:​3, “ka ko ana fakatonuga e se na ‵mafa foki mo tatou.” Ka fia‵fia eiloa a Molimau a Ieova i tou fa‵kai o fesoasoani atu ki a koe ke sukesuke ki te Tusi Tapu. E ‵kami atu eiloa koe ke fesokotaki atu ki a latou i te koga e nofo koe i ei, io me e mafai o tusi atu koe ki a latou kolā e ‵lomi ne latou te mekesini tenei.

[Ata i te itulau e 4]

Ne tumau eiloa a Iopu i te fakamaoni mai lalo i tofotofoga

[Ata i te itulau e 7]

A te momea aka o tou iloa i te Muna a te Atua ka fakamalosi aka ei tau fakaikuga ke fai te mea tonu