Te Uiga o te Alofa ki ‵Tou Tuakoi
“E ‵tau mo koe o alofa ki tou tuakoi e pelā eiloa mo koe ki a koe.”—MATAIO 22:39.
1. E fakaasi atu pefea ne tatou me e a‵lofa tatou ki te Atua?
NE A mea e manako ki ei a Ieova ke fai ne tino kolā e tapuaki atu ki a ia? I nāi pati faigofie kae tāua ‵ki, ne fakatoetoe aka ei ne Iesu te tali. Ne fai mai a ia me i te ‵toe tulafono tafasili i te tāua, ko te alofa ki a Ieova mo ‵tou loto, agaga, mafaufau, mo te malosi kātoa. (Mataio 22:37; Maleko 12:30) E pelā mo te mea ne lavea atu ne tatou i te mataupu muamua, e aofia i te alofa ki te Atua a te fakalogo mo te tausiga o ana fakatonuga ona ko te alofa telā ne fakaasi mai ne ia. A te faiga o tena loto, e se se amoga ‵mafa ki tino kolā e a‵lofa ki te Atua; kae e maua foki ne latou te fiafia mai i ei.—Salamo 40:8; 1 Ioane 5:2, 3.
2, 3. Kaia e ‵tau ei o ‵saga tonu atu ki te fakatonuga ke a‵lofa ki ‵tou tuakoi, kae ne a fesili e ‵sae aka i ei?
2 Ne fai mai Iesu me i te lua o tulafono tafasili i te tāua, e isi sena sokoga ki te tulafono muamua: “E ‵tau mo koe o alofa ki tou tuakoi e pelā eiloa mo koe ki a koe.” (Mataio 22:39) Tenei eiloa te tulafono ka mafau‵fau tatou ki ei mo pogai ‵lei e ‵tau ei o faka‵logo tatou ki ei. E fakamailoga eiloa a taimi konei e ola tatou i ei ki te kaimanako mo te alofa ‵se. I tena fakamatalaga telā ne tusi mai e uiga ki “aso fakaoti,” ne tusi mai a te apositolo ko Paulo me i tino ka se a‵lofa ki nisi tino, kae ka a‵lofa ifo ki a latou eiloa, tupe, mo fakafiafiaga. E tokouke eiloa a tino ka “se loto a‵lofa,” io me e pelā mo te ‵fuliga a te Tusi Tapu e tasi, ka se maua ne latou “te alofa masani ki olotou kāiga.” (2 Timoteo 3:1-4) Ne ‵valo mai a Iesu Keliso: “E tokouke a tino . . . e faitogafiti te suā tino ki te suā tino, kae e se fiafia foki te suā tino ki te suā tino. A mea konā e fai ne latou ke na gasolo ei o se a‵lofa . . . a tino.”—Mataio 24:10, 12.
3 Kae masaua la, me ne seki fai mai Iesu me ka gasolo o se a‵lofa a tino katoa. E isi kae ka isi faeloa ne tino kolā e fakaasi atu ne latou a te vaegā alofa telā e manako kae e ‵tau o maua ne Ieova. A tino kolā e a‵lofa tonu ki a Ieova ka taumafai eiloa ke ‵pau te lotou kilokiloga ki nisi tino e pelā mo ia. Ko oi la ‵tou tuakoi kolā e ‵tau o a‵lofa tatou ki ei? E ‵tau o fakaasi atu pefea ne tatou te alofa ki ‵tou tuakoi? E mafai eiloa o fesoasoani mai te Tusi Tapu ki a tatou ke tali aka a fesili tāua konei.
Ko oi Toku Tuakoi?
4. E ‵tusa mo te Levitiko 19, ko oi ne ‵tau o a‵lofa atu ki ei te kau Iutaia?
4 I te taimi ne fai atu ne ia ki te Falesaio me i te lua o tulafono tafasili i te tāua ko te alofa ki tou tuakoi e pelā mo koe ki a koe eiloa, ne fakasino atu a Iesu ki se tulafono e tasi telā ne tuku atu ki te kau Isalaelu. E maua te tulafono tenā i te Levitiko 19:18. I te mataupu eiloa tenā, ne fai atu ki tino Iutaia me e ‵tau o ‵kilo atu latou ki nisi tino i tafa o olotou taina Isalaelu e pelā me ko olotou tuakoi. E fai mai penei te fuaiupu e 34: “A faiga a koutou ki a latou [tino mai fenua fakaa‵tea] ke pelā eiloa mo faiga a koutou ki otou tino Isalaelu. A koutou ke a‵lofa ki a latou e pelā mo te otou a‵lofa ki a koutou eiloa. Masaua i te otou ‵nofoga i te fenua o Aikupito a koutou ne tino fakaa‵lofa.” Tela la, ne ‵tau eiloa o fakaasi atu te alofa ki tino mai fenua fakaa‵tea, maise eiloa ko latou kolā ne ‵fuli ki te lotu Iutaia.
5. Ne pefea te malamalama o te kau Iutaia i te alofa ki tuakoi?
5 Kae ne ‵kese te kilokiloga a takitaki lotu Iutaia i aso o Iesu. Ne akoako atu a nisi o latou me ne fakauiga fua a tugāpati ko “taugasoa” mo “tuakoi” ki tino Iutaia fua. Ne ‵tau o takalia‵lia ki tino mai fenua fakaa‵tea. Ne akoako atu a vaegā faiakoga penā me i tino kolā e tapuaki ki te Atua e ‵tau o takalia‵lia ki tino kolā e se fai penā. “I se vaegā fakanofonofoga penā,” ko muna i se tusi e tasi, “e faigata eiloa ke galo atu te uiga takalialia. E isi faeloa se pogai ke ‵lago atu ei ki te uiga tenā.”
6. Ne a manatu e lua ne fakaasi mai ne Iesu i te taimi ne faipati ei a ia ki te alofa ki tuakoi?
6 I tena Lauga i Luga i te Mauga, ne fakasino atu a Iesu ki te mataupu tenei, mai te fakasino atu ki tino kolā e ‵tau o fakaasi atu ki ei te alofa. Ana muna: “Ko lagona foki ne koutou me ne fai mai penei, ‘Ke alofa atu koe ki tou tuakoi, kae takalialia ki tou fili.’ Kae fai atu au ki a koutou: ke a‵lofa atu koutou ki otou fili, ‵talo foki mō latou kolā e fakasauā ki a koutou, ko te mea ke fai koutou mo tama a te otou Tamana telā i te lagi, telā e fakamaina mai ne ia tena la ki tino amio ma‵sei mo tino amio ‵lei, e faka‵to foki ne ia a te vaiua ki tino amio‵tonu mo tino amio ma‵sei.” (Mataio 5:43-45) Ne fakaasi mai ne Iesu i konei a manatu e lua. Muamua la, e kaimalie kae atafai a Ieova ki tino ‵lei mo tino amio ma‵sei. A ko te lua, e ‵tau o tau‵tali atu tatou ki tena fakaakoakoga.
7. Se a te fakaakoakoga e tauloto ne tatou mai te tala fakatusa e uiga ki te Samalia alofa?
7 I te suā taimi, ne fesili atu se tino Iutaia telā ne iloa ‵lei ne ia te Tulafono: “Ko oi la toku tuakoi?” Ne tali atu a Iesu mai te fakamatala atu o se tala fakatusa e uiga ki se Samalia telā ne lavea ne ia se tagata, se Iutaia, telā ne ta fakamasei ne tino kaisoa kae puke ne latou ana kope tāua. E tiga eiloa ne takalia‵lia a te taulasiga o tino Iutaia ki tino Samalia, ne fai faka‵lei ne te Samalia a pa‵kiaga o te tagata kae ne ave foki ne ia ki se fale talimālō ke mafai o toe ‵lei ei a ia. Se a te akoakoga? E ‵tau o fakaasi atu ne tatou te alofa fakatuakoi ki so se tino i lō tino fua o ‵tou matakāiga, fenua, io me ko lotu.—Luka 10:25, 29, 30, 33-37.
Te Uiga o te Alofa ki ‵Tou Tuakoi
8. Ne a muna i te Levitiko 19 e uiga ki te auala ne ‵tau ei o fakaasi atu te alofa?
8 A te alofa ki tuakoi, e pelā mo te alofa ki te Atua, e se se lagonaga fua; e aofia i ei a faifaiga. E fesoasoani mai eiloa a te mafaufau ki te ‵kanotonu o te fakatonuga telā ne fakamau i te Levitiko 19, telā e fakamalosi atu ei ki tino o te Atua ke a‵lofa ki olotou tuakoi e pelā mo latou ki a latou eiloa. I konā e fai‵tau tatou me ne fakatonu atu ki te kau Isalaelu ke talia a tino ma‵tiva mo tino fakaa‵lofa ke maua ne olotou vaega mai olotou fatoaga. E se talia lele eiloa a te kaisoa, te amio ‵pelo, io me ko te faitogafiti. I te faiga o fakamasinoga, e se ‵tau mo tino Isalaelu o fakaasi atu a uiga fāpito. E tiga eiloa ne ‵tau o polopoloki ‵mafa latou māfai e manakogina, ne fai ‵tonu atu ki a latou, penei: “Sa nofo mo te loto ita ki te suā tino.” Ne fakatoe‵toe aka a fakatonuga konei mo nisi fakatonuga ki pati konei: “Alofa ki tou tuakoi e pelā eiloa mo tou alofa ki a koe eiloa.”—Levitiko 19:9-11, 15, 17, 18.
9. Kaia ne fakatonu atu ei a Ieova ki te kau Isalaelu ke ‵vae keatea latou mai nisi atufenua?
9 E tiga eiloa ne ‵tau o fakaasi atu ne te kau Isalaelu a te alofa ki nisi tino, ne ‵tau foki o ‵vae keatea latou mai tino kolā ne tapuaki ki atua ‵se. Ne fakailoa atu a Ieova ke fakaeteete latou i te fakamataku mo ikuga sē ‵lei o taugasoa ma‵sei. E pelā mo te fakatonuga a Ieova e uiga ki fenua kolā ka fakatakavale ne te kau Isalaelu: “Ke mo a eiloa e a‵vaga koutou ki tino konā, io me talia otou tama‵liki ke a‵vaga ki a latou, i te mea ma ‵taki keatea ne latou otou tama‵liki mai i te Aliki, o fai ke tapuaki atu ki nisi atua fakaa‵tea. Kafai e tupu te mea tenā, ko te Aliki [ko Ieova] ka kaitaua ki a koutou, kae ‵ta fakapalele koutou.”—Teutelonome 7:3, 4.
10. Ne a mea e ‵tau o ‵kalo keatea tatou mai i ei?
10 E penā foki loa, e ‵kalo keatea a Kelisiano mai te fai taugasoa mo tino kolā e mafai o fakavāivāi ne latou te lotou fakatuanaki. (1 Kolinito 15:33) Ne polopoloki mai foki ki a tatou: “Sa taumafai o ga‵lue tasi mo tino sē tali‵tonu,” ko tino kolā e se ‵kau atu ki te fakapotopotoga Kelisiano. (2 Kolinito 6:14) E se gata i ei, e fakatonu atu ki Kelisiano ke a‵vaga fua ki se “Kelisiano.” (1 Kolinito 7:39) Kae e se ‵tau lele eiloa o manatu fakatauemu tatou ki tino kolā e se tali‵tonu ki a Ieova. Ne mate a Iesu mō tino agasala, kae ko oti ne ‵fuli a olaga o tino e tokouke kolā ne fai ne latou a mea ma‵sei kae faka‵lei foki latou mo te Atua.—Loma 5:8; 1 Kolinito 6:9-11.
11. Se a te ‵toe auala ‵lei ke fakaasi atu ei te alofa ki tino kolā e se tavini atu ki a Ieova, kae kaia?
11 A te fakaasi atu o te alofa ki tino kolā e se tavini ki te Atua ko te ‵toe auala ‵lei ke fakaakoako atu ki a Ieova. E tiga eiloa e se fiafia a ia ki amioga ma‵sei, e fakaasi atu eiloa ne ia te alofa kaimalie ki tino katoa mai te tukuatuga o te avanoaga ke ‵fuli keatea latou mai i olotou amioga ma‵sei kae ke maua te ola se-gata-mai. (Esekielu 18:23) E “manako a ia [Ieova] . . . ke lava se taimi e salamo ei a tino” katoa. (2 Petelu 3:9) Ko tena loto eiloa ke “ola tino katoa, ka ke iloa foki ne latou te munatonu.” (1 Timoteo 2:4) Tenā eiloa te pogai ne fakatonu atu ei Iesu ki ana soko ke talai kae akoako atu kae ke ‘fai foki a tino mai fenua katoa mo soko.’ (Mataio 28:19, 20) Mai te ‵tou ‵kau atu ki te galuega tenei, e fakaasi atu ei ne tatou te alofa ki te Atua mo tuakoi, e tonu, e aofia foki i ei ‵tou fili!
Te Alofa ki ‵Tou Taina Kelisiano
12. Ne a muna ne tusi mai ne te apositolo ko Ioane e uiga ki te alofa ki ‵tou taina?
12 Ne tusi mai te apositolo ko Paulo: “E ‵tau mo tatou o fai te mea ‵lei ki tino katoa, kae fakasilisili ki a latou kolā e i loto i te kāiga Kelisiano.” (Kalatia 6:10) E pelā me ne Kelisiano, e maua eiloa ne tatou te tiute ke fakaasi atu te alofa ki tino kolā e i loto i te kāiga Kelisiano—‵tou taina mo tuagane faka-te-agaga. E pefea te tāua o te alofa tenei? Ke faka‵mafa atu te manatu tāua tenei, ne tusi mai te apositolo ko Ioane: “So se tino e ita ki so se tino, ko tona uiga se tino tatino; . . . Kafai e fai mai se tino, ‘Au e alofa ki te Atua,’ kae tela la e ita ki tena taina, a ia se tino loi. Me e se mafai a ia o alofa ki te Atua telā e seki matea ne ia, kae tela la e se alofa ki tena taina telā e matea ne ia.” (1 Ioane 3:15; 4:20) E ‵mafa eiloa a pati konei. Ne fakaaogā ne Iesu Keliso a pati konei “tino tatino” mo te “tino loi” ki a Satani te Tiapolo. (Ioane 8:44) E se ma‵nako eiloa tatou ke fakaaogā a tugāpati konā ki a tatou!
13. Ne a auala e mafai ei o fakaasi atu ne tatou te alofa ki ‵tou taina tali‵tonu?
13 “Ne akoako” a Kelisiano ‵tonu “ne te Atua ke iloa ne [latou] o fakatau a‵lofa.” (1 Tesalonia 4:9) A te ‵tou a‵lofa “e se fai fua ki pati mo muna; e ‵tau o tonu te alofa, ka ke fakaasi tonu atu i faiga.” (1 Ioane 3:18) E ‵tau o “tonu te alofa.” (Loma 12:9) E fakamalosi tatou ne te alofa ke atafai, loto alofa, fakamagalo atu, kufaki, kae ke se loto masei, fakamatamata, uiga kaitaua, io me kaimanako. (1 Kolinito 13:4, 5; Efeso 4:32) E fakamalosi aka ei tatou ke “fakatau tavini” te suā tino ki te suā tino. (Kalatia 5:13) Ne fai atu a Iesu ki ana soko ke fakatau a‵lofa latou e pelā mo ia ki a latou. (Ioane 13:34) E ‵tau foki o loto fiafia se Kelisiano o tuku atu tena ola mō ana taina tali‵tonu māfai ko manakogina ke fai penā.
14. E mafai pefea o fakaasi atu ne tatou te alofa i loto i te kāiga?
14 Kae e sili atu i ei, e ‵tau eiloa o fakaasi atu te alofa i loto i se kāiga Kelisiano kae maise foki eiloa i te vā o te tagata avaga mo tena avaga. E ‵tau eiloa o malosi ‵ki te feagaiga o te fakaipoipoga telā ne fai mai ei a Paulo: “A tāgata e ‵tau o a‵lofa ki olotou avaga e pelā eiloa mo te lotou atafai ki olotou foitino tonu.” Ne toe fakaopoopo mai tou tagata: “A te tagata e alofa ki tena avaga, e alofa foki ki a ia eiloa.” (Efeso 5:28) E lavea atu ne tatou me ne fakafokifoki mai eiloa ne Paulo te polopolokiga tenei i fuaiupu e lima mai tua ifo. A te tagata telā e alofa ki tena avaga ka se fakaakoako atu ki te kau Isalaelu i aso o Malaki kolā ne seki fakamaoni ki olotou avaga. (Malaki 2:14) Ka fakatāua ne tou tagata tena avaga. Ka alofa a ia ki tou fafine e pelā eiloa mo te alofa o Keliso ki te fakapotopotoga. Ka fakamalosi aka foki ne te alofa a te avaga fafine ke fakaasi atu te āva ki tena avaga.—Efeso 5:25, 29-33.
15. Ne a muna mo faiga ne fai atu ne nisi tino i te laveaga ne latou a faifaiga o te alofa fakataina?
15 E manino i ei, me i te vaegā alofa tenei ko te fakailoga eiloa o Kelisiano ‵tonu. Ne fai mai Iesu: “Tenā te mea e iloa ei ne tino katoa ko oku soko koutou, manafai e fakatau a‵lofa koutou!” (Ioane 13:35) A te fakatau a‵lofa o tatou e fai ei ke fakapili‵pili atu a tino ki te Atua telā e a‵lofa kae sui ne tatou. E pelā mo te tala tenei mai Mozambique e uiga ki se kāiga Molimau. “Ne seki lavea aka eiloa ne matou se mea penei muamua. I se fakatutonu, ne kamata o agi malosi mai te matagi telā ne ‵tao atu ki ei te vaiua ‵lotu mo te vaiua fatu. Ne fakamasei ne te matagi te motou fale ne faite ki lakau, kae agi keatea foki te motou tuāfale laukāpa. I te taimi ne o‵mai ei omotou taina mai fakapotopotoga ‵pili mai o fesoasoani ki te ‵toe faitega o te motou fale, ne ofo masei eiloa omotou tuakoi kae fai mai: ‘Ko oko eiloa i te ‵lei o te otou lotu. E seai aka eiloa se taimi kai maua ne matou se vaegā fesoasoani penei mai te motou lotu.’ Ne fakasino atu matou ki te Tusi Tapu kae fakaasi atu ki a latou te Ioane 13:34, 35. Ko tokouke eiloa nei omotou tuakoi ko fai olotou akoga faka-te-Tusi Tapu.”
Te Alofa ki Tino Taki Tokotasi
16. Se a te ‵kese i te alofa ki se potukau mo te alofa ki tino taki tokotasi?
16 E se faigatā ke fakaasi atu te alofa ki ‵tou tuakoi e pelā me se potukau. Kae e mafai eiloa o faigatā ke fakaasi atu te alofa ki tino taki tokotasi. E pelā mo te alofa o nisi tino ki olotou tuakoi, e gata fua i te tuku atu o se meaalofa ki fakapotopotoga fesoasoani. A te ‵tonuga loa, e sili atu i te faigofie ke fai atu me e a‵lofa tatou ki ‵tou tuakoi i lō te alofa ki se tino telā e ga‵lue tasi mo tatou kae e se fia saga sāle mai ki a tatou, se tino faigatā telā e nofo i tafa o ‵tou fale, io me se taugasoa telā ne fakafanoanoa ne ia tatou.
17, 18. Ne fakaasi atu pefea ne Iesu te alofa ki tino taki tokotasi, kae se a te pogai ne fai ei ne ia a mea konā?
17 I te alofa atu ki tino taki tokotasi, e tauloto eiloa tatou mai i a Iesu, telā ne fakaasi atu ne ia a uiga o te Atua i se auala ‵lei katoatoa. E tiga eiloa ne vau a ia ki te lalolagi o ave keatea a agasala a te lalolagi, ne fakaasi atu foki ne ia te alofa ki tino taki tokotasi—se fafine masaki, se lepela, se tamaliki. (Mataio 9:20-22; Maleko 1:40-42; 7:26, 29, 30; Ioane 1:29) E penā foki loa, e fakaasi atu ne tatou te alofa ki ‵tou tuakoi e auala i ‵tou faifaiga ki tino taki tokotasi kolā e fesokotaki atu tatou ki ei i aso takitasi.
18 Kae e se ‵tau eiloa o puli i a tatou me e isi se sokoga o te alofa ki tuakoi ki te alofa ki te Atua. E tiga eiloa ne fesoasoani atu Iesu ki tino ma‵tiva, ne faka‵lei ne ia a tino ma‵saki, kae fagai a tino fia‵kai, a te pogai ne fai ei ne ia a mea konei, e penā foki mo te akoakoga o te vaitino ko te fesoasoani atu ki tino ke toe maua se vā ‵lei mo Ieova. (2 Kolinito 5:19) Ne fai ne Iesu a mea katoa mō te vikiga o te Atua, mai te masaua faeloa me ne sui kae fakaasi atu foki ne ia a te Atua telā ne alofa a ia ki ei. (1 Kolinito 10:31) Mai te tau‵tali atu ki te fakaakoakoga a Iesu, e mafai foki o fakaasi atu ne tatou te alofa tonu ki tuakoi kae tumau i te ‵vae keatea mai te lalolagi o tino amio ma‵sei.
E A‵lofa Pefea Tatou ki ‵Tou Tuakoi e Pelā mo Tatou ki a Tatou Eiloa?
19, 20. Se a te uiga o te alofa ki ‵tou tuakoi e pelā mo tatou ki a tatou eiloa?
19 Ne fai mai Iesu: “E ‵tau mo koe o alofa ki tou tuakoi e pelā mo koe ki a koe eiloa.” Se mea masani ke atafai tatou ki a tatou eiloa kae ke maua se lagonaga ‵lei e uiga ki a tatou eiloa. Kafai e se penā loa, penei, e seai se aogā o te fakatonuga tenā. A te alofa tonu tenei e se ‵tau o faka‵segina ki te manatu fakapito telā ne taku mai ne te apositolo ko Paulo i te 2 Timoteo 3:2. I lō te fai penā, se lagonaga ‵lei kae ‵tau, e uiga ki a tatou eiloa. Ne fakamatala mai ne se tino poto i te Tusi Tapu a te mea tenā e pelā me ‘se lagonaga paleni telā e se manatu fia sili io me manatu ifo me e seai sou aogā.’
20 Ke alofa ki nisi tino e pelā mo te alofa ki a tatou eiloa e fakauiga i ei me e ‵pau ‵tou kilokiloga mo ‵tou faifaiga ki nisi tino mo kilokiloga mo faifaiga kolā e ma‵nako tatou ke fai mai ne nisi tino ki a tatou. Ne fai mai Iesu: “E pelā mo te mea e ma‵nako koutou ke fai atu ne nisi tino ki a koutou, ke fai foki eiloa ne koutou penā ki a latou.” (Mataio 7:12) Masaua la me ne seki fai mai a Iesu ke mataonoono tatou ki mea kolā ne fai mai ne nisi tino i aso ko ‵teka kae toe taui atu ki a latou. I lō te fai penā, e ‵tau o mafau‵fau tatou ki faifaiga kolā e ma‵nako tatou ke fai mai ne nisi tino ki a tatou kae fai foki penā ki a latou. Onoono foki la, me ne seki fakasino atu fua a pati a Iesu ki taugasoa mo te kautaina. Ne fakaaogā ne ia te pati “tino,” kāti ke fakaasi mai i ei me e ‵tau o fai penā ‵tou faifaiga ki tino katoa, mo so se tino e fetaui mo tatou.
21. Mai te fakaasi atu o te alofa ki nisi tino, se a te mea telā e fakaasi atu ne tatou i ei?
21 A te alofa ki ‵tou tuakoi ka puipui ei tatou mai te faiga o mea kolā e ma‵sei. Ne tusi mai te apositolo ko Paulo: “Konei la muna o te fakatonuga, ‘Sa mulilua; sa tatino; sa kaisoa; sa kaimanako,’ mo nisi fakatonuga ake, ko tuku fakatasi katoa a mea konei i te fakatonuga e tasi, ‘Alofa ki tou tuakoi, e pelā eiloa mo koe ki a koe.’ E se fai mea masei te alofa ki tuakoi.” (Loma 13:9, 10) Ka fakamalosi aka tatou ne te alofa ke ‵kilo atu ki auala e mafai ei o fai ne tatou a mea ‵lei ki nisi tino. Mai te alofa atu ki tino i ‵tou tafa, e fakaasi atu ei ne tatou me e a‵lofa foki tatou ki te tino telā ne faite ne ia te tagata ki Tena fakatusa, ko Ieova te Atua.—Kenese 1:26.
Ka Tali Mai Koe Pefea?
• Ko oi e ‵tau o fakaasi atu ne tatou ki ei te alofa, kae kaia?
• E mafai pefea o fakaasi atu ne tatou te alofa ki tino kolā e se tavini ki a Ieova?
• E fakamatala mai pefea ne te Tusi Tapu a te alofa telā e ‵tau o maua ne tatou ki ‵tou taina?
• Se a te uiga o te alofa ki ‵tou tuakoi e pelā mo tatou ki a tatou eiloa?
[Ata i te itulau e 26]
“Ko oi la toku tuakoi?”
[Ata i te itulau e 29]
E fakaasi atu foki ne Iesu te alofa ki tino taki tokotasi