Ko Oti ne Kamata “Te Faka‵tumaiga Muamua”!

“Ko latou kolā ko ‵mate kae ne tali‵tonu ki a Keliso, ko latou konā e ‵tu muamua mai te mate.”​​—1 TESALONIA 4:​16.

1, 2. (a) Se a te fakamoemoega mō latou kolā ko oti ne ‵mate? (e) Se a te mea e fakavae ki ei te ‵tou talitonuga e uiga ki te toetu? (Onoono ki te fakamatalaga mai lalo.)

“EILOA ne tino ola i a latou e ‵mate.” Ne iloa ‵lei te mea tenā talu mai te taimi ne agasala ei a Atamu. Talu mai te taimi ne kamata ei o ola a tino, ne iloa ne so se tino telā ne fanau mai i a ia ka mate fakamuli, kae e tokouke ko mafau‵fau ifo penei: ‘Se a te mea ka ‵tao mai ki ei? Se a te tulaga o tino ‵mate?’ E tali mai te Tusi Tapu: “Ka ko tino ‵mate e seai se mea a latou e iloa.”​​—Failauga 9:5.

² E mata la, e isi se fakamoemoega mō latou kolā ko oti ne ‵mate? Ao. E tonu, e ‵tau o isi ko te mea ke mafai o fakataunu te fuafuaga muamua a te Atua mō tino katoa. I te fia o senitenali ko ‵teka, ne tali‵tonu eiloa a tavini fakamaoni a te Atua ki te folafolaga a Ieova e uiga ki se Fanau telā ka fakaseai ne ia a Satani mo mea ma‵sei kolā ne fai ne ia. (Kenese 3:​15) A te tokoukega o latou ko oti ne ‵mate. Ko te mea ke matea ne latou te fakataunuga o te folafolaga tenā mo nisi valoaga kolā ne fai ne Ieova, e ‵tau o toe faka‵tu mai latou mai te mate. (Epelu 11:13) E mata, e mafai o tupu te mea tenā? Ao, e mafai. Ne fai mai te apositolo ko Paulo: “Me i tino ‵lei mo tino se ‵lei, ka faka‵tu mai katoa mai te mate.” (Galuega 24:15) Ne toe fakatu mai ne Paulo se tamataene e igoa ki a Eutikasi, telā ne tō mai te fakamalama o te tolu o fogafale kae “ne puke ake ne latou a ia ko mate.” Tenei eiloa te fakatumaiga fakaoti mai tala e iva kolā e tusi i te Tusi Tapu.​​—Galuega 20:​7-​12.a

3. Se a te fakamafanafanaga ko oti ne maua ne koe mai i pati a Iesu i te Ioane 5:​28, 29, kae kaia?

³ E fakavae te talitonu ki fakamatalaga a Paulo ki luga i faka‵tumaiga konā e iva. E fakamalosi aka i ei te ‵tou tali‵tonu ki pati a Iesu: “[Ka] oko mai eiloa te taimi e lagona ei a tena leo [o Iesu] ne latou katoa kolā e i loto i tanuga, kae ka ulu mai ei latou ki tua.” (Ioane 5:​28, 29) Ma‵faga o fakamafanafanaga gali! Kae ka fakamafanafana atu eiloa ki te fia miliona o tino kolā ko oti ne ‵mate olotou kāiga pele!

4, 5. Ne a faka‵tumaiga kese‵kese e faipati ki ei te Tusi Tapu, kae se a te faka‵tumaiga telā ka sau‵tala ki ei i te mataupu tenei?

⁴ A te tokoukega o latou kolā ka toe faka‵tu mai ka toe faka‵foki mai ki se lalolagi filemu mai lalo i te Malo o te Atua. (Salamo 37:​10, 11, 29; Isaia 11:​6-9; 35:​5, 6; 65:​21-​23) Kae ko nisi toe‵tuga ka fai mai mua atu i ei. Muamua la, ne ‵tau o toe fakatu mai a Iesu ko te mea ke mafai o tuku atu te aogā o tena taulaga ki te Atua mō tatou. Ne mate a Iesu kae ne toe fakatu mai i te 33 T.A.

⁵ E ‵tao atu ki ei, ne ‵tau o ‵kau atu a tino o te “Isalaelu a te Atua” ki te Aliki ko Iesu Keliso i te lagi, ko te koga telā ka “fakatasi faeloa [latou] mo te Aliki.” (Kalatia 6:​16; 1 Tesalonia 4:​17) E fakaigoa te mea tenā ki te “faka‵tumaiga muamua.” (Fakaasiga 20:6) Kafai ko oti ne faka‵tu aka a tino katoa i te potukau tenā, ko oko mai ei te taimi ke toe faka‵tu mai te fia miliona o tino ki te lalolagi mo te fakamoemoega ke maua ne latou te ola se-gata-mai i luga i te palataiso. Tela la, faitalia me e maua te ‵tou fakamoemoega i te lagi io me i te lalolagi, e ‵tau o fia‵fia malosi tatou ki te “faka‵tumaiga muamua.” Se a te vaegā faka‵tumaiga tenā? E fai māfea?

“Se Vaegā Foitino Pefea?”

6, 7. (a) A koituai o olo aka a Kelisiano fakaekegina ki te lagi, se a te mea e ‵tau o tupu muamua? (e) Ka faka‵tu aka latou i se vaegā foitino pefea?

⁶ I tena tusi muamua ki te kau Kolinito, ne fakasae aka ne Paulo se fesili e uiga ki te faka‵tumaiga muamua: “Ka fakatuake pefea a tino ‵mate? Se vaegā foitino pefea ka maua ne latou?” Ne tali eiloa ne ia tena fesili: “A te fuaga e toki ne koe i te laukele, e se mafai o ola seiloga ko pala. . . . Kae ne tuku atu ne te Atua ki fuaga takitasi a te vaegā foliga [io me se foitino], e pelā eiloa mo te mea ne loto a ia ki ei. . . . ka ko te gali o foitino o mea i te lagi, e ‵kese mai i te gali o foitino o mea i te lalolagi.”​​—1 Kolinito 15:​35-​40.

⁷ E fakaasi mai i pati a Paulo me i Kelisiano kolā e fakaeke ki te agaga tapu e ‵tau o ‵mate muamua a koituai o maua te lotou taui i te lagi. I te taimi e ‵mate ei latou, e ‵foki atu olotou foitino ki te ‵pefu o te laukele. (Kenese 3:​19) I te taimi tonu o te Atua, ko faka‵tu aka ei olotou foitino, se vaegā foitino telā e mafai o ola i te lagi. (1 Ioane 3:​2) E tuku atu foki ne te Atua ki a latou te ola telā e se toe mate. E se se mea ne fa‵nau mai mo latou, e pelā me se agaga e se mafai o mate telā ne manava atu ki loto i a latou. “Me i . . . te foitino se ola tumau tenei, e ‵tau o tuku atu ki luga i a ia te foitino ola tumau,” ko pati a Paulo. A te ola tumau se meaalofa mai te Atua, e ‘‵pei ki ei’ a latou kolā e aofia i te faka‵tumaiga muamua.​​—1 Kolinito 15:​50, 53; Kenese 2:7; 2 Kolinito 5:​1, 2, 8.

8. E iloa pefea ne tatou me e se filifili ne te Atua a te toko 144,000 mai lotu kese‵kese?

⁸ E toko 144,000 fua a tino e aofia i te faka‵tumaiga muamua. Ne kamata o filifili latou ne Ieova i te Penitekoso i te 33 T.A., mai tua malie fua o te fakatumaiga o Iesu. E tusi i olotou lae katoa a “igoa [o Iesu] mo tona Tamana.” (Fakaasiga 14:​1, 3) Tela la, e se filifili latou mai lotu kese‵kese e uke. A latou ne soko katoa o Keliso, kae fakaigoa katoa latou mo te fia‵fia lasi ki te igoa o te Tamana​​—ko Ieova. I te taimi e faka‵tu aka ei latou, ka tuku atu ei a galuega kolā ka fai ne latou i te lagi. A te tauliaga ke tavini atu ki te Atua i se auala penei se mea fakafiafia eiloa ki a latou.

Ko Fai Nei te Mea Tenā?

9. E fesoasoani mai pefea te Fakaasiga 12:7 mo te 17:14 ke fakatautau ne tatou te taimi e kamata ei te faka‵tumaiga muamua?

⁹ Ne kamata anafea te faka‵tumaiga muamua? E lasi te fakamaoniga me ko fai nei te mea tenā. E pelā me se fakaakoakoga, ke fakatusatusa ne tatou a mataupu e lua o te Fakaasiga. Muamua la, ke onoono ki te Fakaasiga mataupu e 12. E faitau tatou i konā me i a Iesu Keliso telā ne fatoā faū aka, fakatasi mo ana agelu ‵malu, ne taua atu ki a Satani mo ana temoni. (Fakaasiga 12:​7-9) E pelā mo te mea e fakaasi sāle atu i te mekesini tenei, ne kamata te taua tenā i te 1914.b Ke masaua la me e seai se soko fakaekegina o Keliso e fai mai me ne fakatasi atu ki a Iesu i te taua tenā i te lagi. Nei la, onoono ki te mataupu e 17 o te Fakaasiga. E fai mai i konā me i te otiga ne fakaseai atu a “Papelonia Takutakua,” ka fakatakavale ei ne te Tamā Mamoe a atufenua. E toe fai mai foki me i: “tino ne ana kalagagina kae filifilia, mo ona soko fakamaoni ka fakatakavale ne latou a latou.” (Fakaasiga 17:​5, 14) Ko tena uiga, a “tino ne ana kalagagina kae filifilia, mo ana soko fakamaoni” ko ‵tau o oti ne faka‵tu aka ko te mea ke ‵kau atu latou ki a Iesu i te fakatakavalega fakaoti o te lalolagi a Satani. Tela la, se mea ‵tau mō tino fakaekegina kolā e ‵mate mai mua o Amaketo ke toe faka‵tu aka i te vā o te 1914 mo Amaketo.

10, 11. (a) Ko oi a toeaina e toko 24, kae se a te mea ne fakaasi atu ne se tokotasi o latou ki a Ioane? (e) Se a te mea e mafai o fakaiku aka ne tatou mai te mea tenei?

¹⁰ E mata, e mafai o fai atu ne tatou te taimi tonu ne kamata ei te faka‵tumaiga muamua? E maua ne tatou se fakamaoniga i te Fakaasiga 7:​9-​15, telā e fakamatala mai i ei ne te apositolo ko Ioane a te fakaasiga e uiga ki “te vaitino tokouke, ko se mafai eiloa o faitau a latou katoa ne se tino.” Ne fakaasi atu ki a Ioane me ko oi te vaitino tokouke konei ne se tokotasi o toeaina e toko 24, kae e sui ne toeaina konei a te toko 144,000 kolā ka ‵kau fakatasi mo Iesu i te lagi.c (Luka 22:​28-​30; Fakaasiga 4:4) Ne maua foki ne Ioane se fakamoemoega i te lagi; kae ona ko te mea koi nofo atu a ia i te lalolagi i te taimi ne faipati atu ei se toeaina ki a ia, ne ‵tau ei o sui ne ia a tino fakaekegina kolā koi ‵nofo i te lalolagi kae seki maua te lotou taui i te lagi.

¹¹ Se a la te mea e mafai o fakaiku aka ne tatou mai te fakaasiatuga ne se tokotasi mai te toko 24 o toeaina a te vaitino tokouke, ki a Ioane? E foliga mai me kāti e aofia i te potukau telā e sui ne toeaina e toko 24, kolā ko oti ne toe faka‵tu aka, a te fakaokomaiga o muna‵tonu mai te Atua i aso nei. Kaia e tāua ei te mea tenā? Ona ko te mea ne fakaasi ‵tonu atu ki tavini fakaekegina a te Atua i te lalolagi me ko oi te vaitino tokouke, i te 1935. Kafai ne fakaaogā se tokotasi o te toko 24 o toeaina ke fakaoko mai te mea tonu tāua tenā, ko tena uiga ne ‵tau o fakatu aka a ia ki te lagi i se taimi mai mua o te 1935. Ko tena uiga a te faka‵tumaiga muamua ne ‵tau o kamata i se vaitaimi i te vā o te 1914 mo te 1935. E mata, e mafai o iloa ne tatou a te taimi tonu?

12. Fakamatala mai te pogai e ‵kilo atu ei ki te ‵tau mafanafana o te 1918 me kāti ko te taimi ne kamata ei te faka‵tumaiga muamua.

¹² E mafai o fesoasoani mai a te mea tenei ke mafau‵fau tatou ki mea kolā kāti e tai ‵pau i te kilokiloga faka-te-Tusi Tapu. Ne fakaekegina a Iesu Keliso mo fai te Tupu o te Malo o te Atua i te taimi ne ‵to ei a lau o lakau i te 29 T.A. I te tolu mo te āfa tausaga mai tua ifo i ei, i te ‵tau mafanafana o te 33 T.A., ne toe fakatu aka ei a ia e pelā me se tino faka-te-agaga malosi ‵ki. E mata, se mea ‵lei ke fakaiku aka me ona ko te mea ne faū a Iesu mo fai te tupu i te taimi ne ‵to ei a lau o lakau i te 1914, ne kamata te ‵toe faka‵tuakaga o ana soko fakaekegina fakamaoni i te tolu mo te āfa tausaga fakamuli ifo, i te ‵tau mafanafana o te 1918? Kāti ne mafai eiloa o tupu te mea fakafiafia tenā. E tiga eiloa e se faipati ‵tonu mai te Tusi Tapu e uiga ki te mea tenei, e fetaui eiloa te mea tenei mo nisi fuaiupu kolā e fakaasi mai me ne kamata te faka‵tumaiga muamua mai tua malie o te fakatasi mai o Keliso.

13. I te auala fea e fakaasi mai i ei i te 1 Tesalonia 4:​15-​17 me ne kamata te faka‵tumaiga muamua i te kamataga o te fakatasi mai o Keliso?

¹³ E pelā mo pati konei a Paulo: “Ko latou kolā koi ola i te aso e foki mai ei te Aliki, [e se ko te fakaotiga o tena fakatasi mai] e se mafai o mua atu i a latou kolā ko ‵mate. Ko te Aliki eiloa e vau mai te lagi mo tena leo e kalaga sāle o fakatonu, mo te leo foki o te agelu pule, mo te leo foki o te pu a te Atua! Ko latou kolā ko ‵mate kae ne tali‵tonu ki a Keliso ko latou konā ne ‵tu muamua mai te mate, ka ko tatou la kolā koi ola i te aso tenā, ka ‵luku fakatasi tatou mo latou i kaumana o fakafetaui ki te Aliki i te vateatea. Tela la, e fakatasi faeloa tatou mo te Aliki.” (1 Tesalonia 4:​15-​17) Tela la, a Kelisiano fakaekegina kolā ne ‵mate mai mua o te fakatasi mai o Keliso ne faka‵tu muamua ki te lagi mai mua o latou kolā koi ola i te taimi o tena fakatasi mai. Ko tena uiga ne ‵tau o kamata te faka‵tumaiga muamua i te kamataga o te fakatasi mai o Keliso, kae tumau eiloa te faiga tenā i te ‘taimi o tena fakatasi mai.’ (1 Kolinito 15:23) I lō te faka‵tu aka o tino ‵mate i se taimi e tasi, e fai te faka‵tumaiga muamua tenā i loto i se vaitaimi.

Ne Tuku Atu ki a Latou a “Gatu ‵Kena”

14. (a) Ne fakataunu anafea a fakaasiga kolā e maua i te Fakaasiga mataupu e 6? (e) Se a te mea telā e fakaasi mai i te Fakaasiga 6:​9?

¹⁴ Mafaufau foki ki te fakamaoniga telā e maua i te Fakaasiga mataupu e 6. E matea atu i konā a Iesu e tele mai e pelā me se Tupu ko manumalo. (Fakaasiga 6:2) E aofia a atufenua i taua fakama‵taku. (Fakaasiga 6:4) E salalau te ogegā meakai i koga katoa. (Fakaasiga 6:​5, 6) E logofiofio a tino i famai tamate tino. (Fakaasiga 6:8) E fetaui ‵lei eiloa a mea konei ne ‵valo mai mo mea ne ‵tupu talu mai te 1914. Kae e isi aka foki se isi mea ne tupu. E fai i ei ke ‵saga atu tatou ki se fatafaitaulaga. E matea atu “mai lalo i te fata faitaulaga a agaga o latou kolā ne tamate, i te folafola atu ne latou te Muna a te Atua, kae ne fakamaoni foki ki te lotou molimau atu.” (Fakaasiga 6:9) Ona ko “te ola o mea ola katoa ko te toto,” a te mea telā e fakaata ‵tonu mai i mea i lalo o te fatafaitaulaga ko toto o tavini fakamaoni a Iesu kolā ne tamate ona ko te lotou molimau atu mo te loto toa mo te loto finafinau.​​—Levitiko 17:11.

15, 16. Fakamatala mai te pogai ne fakasino atu ei a pati i te Fakaasiga 6:​10, 11 ki te faka‵tumaiga muamua.

¹⁵ E pelā mo te toto o te tino amiotonu ko Apelu, e ‵tagi atu a toto o matulo Kelisiano konei mō se fakamasinoga amiotonu. (Kenese 4:​10) “Ne ka‵laga mo te leo lasi penei: ‘Te Aliki telā e o ia te Malosi Katoatoa, e tapu kae tonu katoatoa! Ko afea, e fakamasino ei ne koe a tino o te lalolagi, kae fakasala latou ona ko te lotou tamatega o matou?’ ” Se a la te mea ne tupu? “Ne tuku atu ki a latou ke tofu te tino mo te gatu ‵kena; ne fai atu foki ki a latou ke tai malo‵lo ake malie, ke oko ki te taimi e katoa ei te aofaki o olotou taina kelisiano kolā ka tamate e pelā mo latou.”​​—Fakaasiga 6:​10, 11.

¹⁶ E mata, ne tuku atu a gatu ‵kena konei ki toto kolā e ‵moe i lalo i te fatafaitaulaga? Ikai loa! Ne tuku atu a gatu konā ki tino taki tokotasi kolā ne ma‵ligi olotou toto i se auala fakatusa, i luga i te fatafaitaulaga. Ne ofo atu olotou ola mo fai a taulaga i te igoa o Iesu kae ko faka‵tu aka nei latou e pelā me ne tino faka-te-agaga. E fakamaoni aka pefea ne tatou te mea tenā? E fai‵tau tatou penei i te kamataga o te tusi ko Fakaasiga: “A latou kolā e manumalo ka ‵pei foki ki gatu ‵kena, kae ka se ave eiloa ne au keatea olotou igoa mai i te tusi o te ola.” Ke masaua foki la me i toeaina e toko 24 ne “‵pei ki gatu ‵kena, kae isi foki i luga i olotou ulu a foualiki aulo.” (Fakaasiga 3:5; 4:4) Tela la, mai tua o te kamataga o fakamasei valevale a te lalolagi ne taua, ogegā meakai, mo masaki ‵pisi, ne faka‵tu aka ki te lagi a tino o te toko 144,000 kolā ko oti ne ‵mate, kae kolā ne fakaata mai ne toto i lalo i te fatafaitaulaga, e ‵pei ki olotou gatu ‵kena i se auala fakatusa.

17. I te feitu fea e ‵tau ei o “malo‵lo” a latou kolā ne maua olotou gatu ‵kena?

¹⁷ E ‵tau o “malo‵lo” a latou kolā ne fatoā faka‵tu aka. E ‵tau o faka‵tali latou mo te kufaki ki te aso o te taui ma sui a te Atua. E ‵tau o fakatalitonu aka ne olotou “taina kelisiano,” ko Kelisiano fakaekegina kolā koi ‵nofo i te lalolagi, a te lotou fakamaoni mai lalo i tofotofoga. Kafai e oko mai te taimi o te fakamasinoga, ko oti atu foki loa i ei te ‘malologa.’ (Fakaasiga 7:3) I te taimi tenā, ka ‵kau atu ei a latou kolā ne faka‵tu aka, ki a Iesu Keliso o fakaseai atu a tino amio matagā, e aofia i ei a latou kolā ne ‵ligi ne latou a toto o Kelisiano kolā e seai ne olotou ‵se.​​—2 Tesalonia 1:​7-​10.

Tena Uiga mō Tatou

18, 19. (a) Ne a pogai e mafai o fakaiku aka ne koe me ko fai nei te faka‵tumaiga muamua? (e) Ne a ou lagonaga e uiga ki tou malamalama i te faka‵tumaiga muamua?

¹⁸ E se fakaasi ‵tonu mai i te Muna a te Atua a te taimi tonu e fai ei te faka‵tuga muamua, kae e fakaasi mai i ei me ka fai te mea tenā i se vaitaimi, i te taimi o te fakatasi mai o Iesu. A tino kolā ka faka‵tu muamua aka ko Kelisiano fakaekegina kolā ne ‵mate mai mua o te kamataga o te fakatasi mai o Iesu. I loto i te vaitaimi o te fakatasi mai o Iesu, a Kelisiano kolā e ‵mate i te fakamaoni i luga i te lalolagi e ‵fuli fakavave, “e pela eiloa mo se kemoga o mata,” ke fai mo fai ne tino faka-te-agaga ma‵losi ‵ki. (1 Kolinito 15:52) E mata, ka maua ne tino fakaekegina katoa te lotou taui i te lagi mai mua o te taua o Amaketo? E se iloa ne tatou. Kae e iloa ne tatou me i te taimi tonu o te Atua, ka ‵tu katoa atu ei a te toko 144,000 i luga i te Mauga o Siona faka-te-lagi.

¹⁹ E iloa foki ne tatou me i te tokoukega o te toko 144,000 ko oti ne ‵kau fakatasi mo Iesu. E mu‵tana fua koi ‵toe i te lalolagi. Ko tafaga te lasi o te fakaasiga me ko pili ‵ki mai a te taimi ka fai ei te fakamasinoga a te Atua! Ko pili o fakaseai katoatoa atu te lalolagi matagā a Satani. Ka pikifao mautakitaki a Satani. Ko kamata ei te faka‵tumaiga lasi, ko mafai ei o faka‵tu mai a tino fakamaoni i luga i te fakavae o te taulaga togiola a Iesu, ki te tulaga ‵lei katoatoa e pelā mo te mea ne galo i a Atamu. Ko fakataunu eiloa nei te valoaga a Ieova i te Kenese 3:​15 i se auala fakaofoofogia. Ko tafaga te gali o te tauliaga ke ola koe i taimi konei!

[Fakamatalaga mai lalo]

E Mafai o Fakamatala Mai ne Koe?

E fesoasoani mai pefea a tusi siki konei ke iloa ne tatou te taimi o “te faka‵tumaiga muamua”?

• Fakaasiga 12:7; 17:14

• Fakaasiga 7:​13, 14

• 1 Kolinito 15:23; 1 Tesalonia 4:​15-​17

• Fakaasiga 6:​2, 9-11

[Fakamatalaga o te Ata i te itulau e 28]

Ne a faka‵tuga kolā e fai mai mua o te faka‵tumaiga o tino mai te mate?

[Fakamatalaga o te Ata i te itulau e 31]

I se auala fea e tuku atu ei a gatu ‵kena ki a latou kolā ko oti ne ‵mate?