Akoako Atu a Mea Kolā e Akoako ‵Tonu Mai i te Tusi Tapu

“Olo atu koutou ki fenua katoa ke fai a tino i ei mo oku soko; . . . akoako atu foki latou.” ​​—⁠MATAIO 28:​19, 20.

1. Ne a mea e mafai o fai atu e uiga ki te tufatufaatuga o te Tusi Tapu?

A TE MUNA a Ieova, ko te Tusi Tapu, se tusi e tasi mai i toe tusi leva mo te ‵toe tusi lauiloa telā ne tufatufa atu i te lalolagi kātoa. E tonu, ko oti eiloa ne ‵fuli a nisi vaega i ei ki ‵gana e sili atu i te 2,300. E sili atu i te 90 pasene o tino kolā e ‵nofo i te lalolagi e maua ne latou se kopi i olotou ‵gana eiloa.

2, 3. (a) Kaia e ‵numi ei a tino i akoakoga a te Tusi Tapu? (e) Ne a fesili ka mafau‵fau nei tatou ki ei?

² E lau i miliona o tino e fai‵tau ki se vaega o te Tusi Tapu i aso katoa. Ko oti ne fai‵tau fakafia a nisi tino ki ei mai te kamataga ki te fakaotiga. E kinau mai te fia afe o potukau o lotu me e fakavae olotou akoakoga ki te Tusi Tapu, kae e se lotoma‵lie latou ki mea kolā e akoako mai i ei. E fakaopoopo atu ki te lotou ‵numi ko te fakatau sē lotomalie o tino i te lotu eiloa e tasi. E fakalotolotolua a nisi tino e uiga ki te Tusi Tapu, tena māfuaga, mo tena tāua. E ‵kilo atu a tino e tokouke ki ei e pelā me se tusi tapu fua telā e fakaaogā mō te faiga o tautoga io me ko te tauto atu ke taku atu te mea tonu i fono tulafono.

³ A te ‵tonuga loa, e aofia i te Tusi Tapu a te muna io me se fekau ‵mana mai te Atua mō tino katoa. (Epelu 4:​12) Tela la, e pelā me ne Molimau a Ieova, e ma‵nako tatou ke iloa ne tino a mea kolā e akoako mai i te Tusi Tapu. E fia‵fia eiloa tatou o fai a te fakatonuga telā ne tuku atu ne Iesu Keliso ki ana soko i te taimi ne fai atu ei a ia: “Olo atu koutou ki fenua katoa ke fai a tino i ei mo oku soko, . . . akoako atu foki latou.” (Mataio 28:​19, 20) I te ‵tou galuega talai, e maua ne tatou a tino loto fakamaoni kolā ko māfatia i te ‵numi o lotu kolā ko salalau atu i te lalolagi. E ma‵nako latou ke iloa atu te munatonu e uiga ki te ‵tou Atua telā ne faite ne ia tatou mo muna a te Tusi Tapu e uiga ki te aogā o te olaga. Ke na mafau‵fau nei tatou ki fesili e tolu kolā e manava‵se ki ei a tino e tokouke. I fesili takitasi konā, ka onoono tatou ki mea kolā e akoako ‵se atu ne takitaki lotu, kae kafai ko oti, ka onoono tatou ki mea kolā e akoako ‵tonu mai i te Tusi Tapu. Konei la a fesili: (1) E mata, e atafai mai te Atua ki a tatou? (2) Kaia e ola ei tatou i konei? (3) Ne a mea e ‵tupu māfai ko ‵mate tatou?

E Mata, e Atafai Mai te Atua?

4, 5. Kaia e mafau‵fau ei a tino me e se atafai mai te Atua ki a tatou?

⁴ Ke na kamata nei tatou i te fesili, E mata, e atafai mai te Atua ki a tatou? Se mea fakafanoanoa me e mafau‵fau a tino e tokouke me i te tali ki te fesili tenā ko te ikai. Kaia e mafau‵fau ei latou penā? A te pogai e tasi, ona ko te mea e ola latou i se lalolagi telā e ‵fonu i te fakatau takalia‵lia, taua, mo logo‵maega. E fai mai latou: ‘Kafai e atafai tonu mai te Atua, e mautinoa eiloa me ka fakagata ne ia a fakalavelave kolā e ‵tupu nei.’

⁵ A te suā pogai e mafau‵fau ei a tino me e se atafai mai te Atua ki a tatou me ne fai ne takitaki lotu ke mafau‵fau latou penā. Ne a pati e masani o fai atu ne faifeau māfai ko tupu se fakalavelave? I te taimi ne ‵mate atu a tama‵liki foliki e tokolua a se fafine i se fakalavelave tupu fakafuasei i te motokā, ne fai atu te faifeau o tou fafine: “Ko te loto eiloa o te Atua. Ko manakogina ne te Atua a agelu e tokolua.” Kafai ko fai atu ne faifeau a vaegā fakamatalaga penā, e ‵losi atu eiloa latou ki te Atua mō mea ma‵sei kolā e ‵tupu. Kae ne tusi mai te soko ko Iakopo: “Kafai e fakaosoosogina se tino, ke sa manatu ake pelā, ‘Au ko fakaosoosogina ne te Atua.’ I te Atua e se mafai o fakaosoosogina ne te masei, kae fakaosooso foki ne ia tino ki te masei.” (Iakopo 1:​13) E se māfua lele mai eiloa i a Ieova te Atua a mea ma‵sei. A te ‵tonuga loa, ‘e se mafai eiloa ne te Atua Malosi o fai se mea ‵se.’​​—⁠Iopu 34:⁠10.

6. Ko oi e māfua mai i ei a amioga ma‵sei mo logo‵maega i te lalolagi tenei?

⁶ Kaia la e uke katoa ei penei a mea ma‵sei mo logo‵maega? A te pogai e tasi me ko oti ne ‵teke atu a tino ki te Atua e pelā me ko te Pule, mai te sē faka‵logo ki ana tulafono mo akoakoga amio‵tonu. Ne faka‵logo eiloa mo te sē iloa a tino ki te Fili o te Atua, ko Satani, me i “te lalolagi kātoa ko i lalo i te pule a te Tino Masei.” (1 Ioane 5:​19) A te iloaga o te mea tenei e fakafaigofie aka ei ke malamalama tatou i te pogai e ‵tupu ei a mea ma‵sei. E amio masei, e takalialia, e fakaloiloi, kae matagā ‵ki eiloa a Satani. Tela la, e ‵tau eiloa o fakamoe‵moe tatou ke fakaasi atu ne te lalolagi a uiga o tena pule. E se tioa eiloa o uke a mea ma‵sei!

7. Ne a nisi pogai e logo‵mae ei tatou?

⁷ A te tulaga sē ‵lei katoatoa o tino ko te suā pogai mō logo‵maega kolā e fe‵paki mo tatou. E fakataufai sāle a tino sē ‵lei katoatoa ki tulaga ma‵luga, kae e masani o iku atu ki taua, te pule mālō atu, mo logo‵maega. E fetaui ‵lei eiloa mo pati i te Failauga 8:9: “Ka ko tino kolā e ‵nofo i se tulaga malalo, e ‵nofo puapuagā i te pulega a tino ma‵luga.” A te suā pogai mō logo‵maega ko “te malaia e maua ne tino katoa.” (Failauga 9:​11) E masani o fe‵paki a tino mo fakalavelave ona ko te mea e ‵nofo atu latou i te koga ‵se i te taimi ‵se.

8, 9. E iloa pefea ne tatou me e atafai tonu mai eiloa a Ieova ki a tatou?

⁸ Ko oko eiloa i te fakamafanafana mai ke iloa atu me e se māfua mai i a Ieova a logo‵maega. Kae e mata, e atafai tonu mai eiloa te Atua ki mea kolā e ‵tupu i ‵tou olaga? A te tali gali ki ei ko te ao! E iloa ne tatou me e atafai mai a Ieova me e taku mai ki a tatou i tena Muna fakaosofia a te pogai ne talia ei ne ia a tino ke kausaki atu ki se auala masei. E aofia i pogai a te Atua konā a kinauga e lua: tena pulega sili mo te fakamaoni o tino. Ona ko ia ko te Atua Malosi Katoatoa telā ne faite ne ia a mea katoa, e se i o Ieova te tiute ke fakaasi mai ne ia a pogai e talia ei ne ia a logo‵maega. Kae ne fakaasi mai eiloa ne ia te mea tenā ona ko te mea e atafai mai a ia ki a tatou.

⁹ Mafaufau ki fakamaoniga me e atafai mai te Atua ki a tatou. “Ko oko eiloa i tena fanoanoa” i te taimi ne ‵fonu ei te lalolagi i amioga ma‵sei i aso o Noa. (Kenese 6:​5, 6) E mata, ko ‵kese eiloa a lagonaga o te Atua i aso nei? Ikai, me e se mafai o mafuli a ia. (Malaki 3:⁠6) E takalialia a ia ki faifaiga sē fakamaoni mo te lavea atu foki a tino e logo‵mae. E akoako mai ne te Tusi Tapu me ko pili o faka‵lei aka ne te Atua a logo‵maega katoa kolā ne iku mai i pulega a tino mo te pulega a te Tiapolo. E mata, e se fai eiloa te mea tenā mo fai se fakamaoniga tonu me e atafai mai te Atua ki a tatou?

10. E pefea a lagonaga o Ieova ki logo‵maega o tino?

¹⁰ E taku atu ne takitaki lotu a fakamatalaga ‵se e uiga ki te Atua māfai ko fai atu latou me i fakalavelave e fe‵paki mo tatou ko tena loto eiloa. E ‵kese mai i ei, ko oko eiloa i te manako o Ieova ke fakagata ne ia a logo‵maega o tino. E fai mai te 1 Petelu 5:7: “E atafai atu eiloa [a ia] ki a koutou.” Tenā eiloa te mea e akoako tonu mai i te Tusi Tapu!

Kaia e Ola ei Tatou i Konei?

11. Ne a mea e masani o akoako atu ne lotu a te lalolagi e uiga ki te olaga o tino i te lalolagi?

¹¹ Ke na mafau‵fau nei tatou ki te lua o fesili telā e mafau‵fau sāle ki ei a tino e tokouke, Kaia e ola ei tatou i konei? E tali sāle atu a lotu a te lalolagi me e se nofo tumau a te tagata i te lalolagi nei. E ‵kilo atu latou ki te ‵tou lalolagi e pelā me se koga e mānava malie aka fua i ei, io me ko te suā auala ki te ola i se isi koga. E akoako ‵se atu ne nisi faifeau me ka fakaseai atu ne te Atua te lalolagi tenei i se aso e tasi. Ona ko vaegā akoakoga penā, ne fakaiku aka ei ne tino e tokouke ke na fia‵fia katoatoa latou ki te olaga nei me ka oti ko ‵mate ei latou. Ne a mea e akoako ‵tonu mai i te Tusi Tapu e uiga ki te pogai e ‵nofo ei tatou i konei?

12-14. Ne a mea e akoako mai i te Tusi Tapu e uiga ki te fuafuaga a te Atua mō te lalolagi mo tino?

¹² E isi eiloa se fuafuaga tafasili i te gali a te Atua mō te lalolagi mo tino. “Ne seki faite ne ia [te lalolagi] ke fai mo koga sē aogā, kae ke fai mo koga e ‵nofo ei a tino.” (Isaia 45:18) E se gata i ei, “ne fakatu ne [Ieova] te lalolagi ke ‵mautakitaki i luga i ona fakavae, ko te mea ke se toe gasuesue.” (Salamo 104:⁠5) A te iloaga o mea konei e uiga ki te fuafuaga a te Atua mō te lalolagi mo tino e mafai o fesoasoani mai ki a tatou ke malamalama i te pogai e ola ei tatou i konei.

¹³ E fakaasi mai i te mataupu 1 mo te 2 o te Kenese me ne faite kae fakatokatoka faka‵lei eiloa ne Ieova te lalolagi ko te mea ke ‵nofo a tino i ei. I te fakaotiga o te vaitaimi ne faite ei a mea katoa e aofia i ei ‵tou lalolagi, ne “fiafia malosi” te Atua ki ana mea katoa ne faite. (Kenese 1:​31) Ne tuku atu ne te Atua te tagata mo te fafine muamua, ko Atamu mo Eva, ki te fatoaga gali o Etena kae ne tuku atu ne ia a mea‵kai tafasili i te gali e uke ki a laua. Ne fai atu ki te tauavaga muamua: “Fakatokouke otou tama‵liki, ko te mea ko otou fanau ke ‵nofo i te lalolagi kae pule i ei.” Ne ‵tau o fai ne laua a tama‵liki ‵lei katoatoa, faka‵solo atu a tuakoi o te lā fale i te fatoaga ki te lalolagi kātoa, kae ke tausi atu mo te alofa ki manu.​​—⁠Kenese 1:​26-​28.

¹⁴ Ko te fuafuaga eiloa a Ieova ke ola i te lalolagi ki te se-gata-mai se kāiga faka-te-foitino ‵lei katoatoa. E fai mai te Muna a te Atua: “A tino amio‵tonu ka fai mo latou te fenua, kae ka ‵nofo faeloa i ei ki te se gata mai.” (Salamo 37:29) E tonu, ne ‵tau o maua ne tino te ola se-gata-mai i te Palataiso i te lalolagi nei. Tenā eiloa te fuafuaga a te Atua, kae tenā foki eiloa te mea e akoako tonu mai i te Tusi Tapu!

Ne a Mea e ‵Tupu Māfai ko ‵Mate Tatou?

15. Ne a mea e akoako atu ne te ukega o lotu a te lalolagi e uiga ki mea e ‵tupu māfai ko ‵mate tatou?

¹⁵ Ke na sau‵tala nei tatou ki te tolu o fesili telā e manavase ki ei a tino e tokouke: Ne a mea e ‵tupu māfai ko ‵mate tatou? E akoako atu ne te ukega o lotu i te lalolagi me e isi se mea i loto i se tino telā e tumau i te ola māfai ko mate te foitino. Koi ‵piki ‵mau eiloa a nisi potukau fakalotu ki te manatu me e fakasala ne te Atua a tino amio ma‵sei mai i te fakapuapuagā o latou ki te se-gata-mai i te afi i seoli. Kae e mata, tenā eiloa te mea tonu? Ne a mea e akoako ‵tonu mai i te Tusi Tapu e uiga ki te mate?

16, 17. E ‵tusa mo te Tusi Tapu, se a te tulaga o tino ‵mate?

¹⁶ E fai mai te Muna a te Atua: “E tonu, e iloa ne tino ola i a latou e ‵mate, ka ko tino ‵mate e seai se mea a latou e iloa. E seai aka foki eiloa se mea ‵lei e maua ne latou me ko se toe manatua latou.” Ona ko tino ‵mate “e seai se mea a latou e iloa,” e se mafai o lagona, lavea, fai‵pati, io me e mafau‵fau latou. E se toe mafai o maua ne latou se mea ‵lei. Tela la, e mafai pefea o ola latou? Ko se toe mafai o fai ne latou so se galuega! E se gata i ei “a uiga alofa mo uiga ita o latou ko ‵mate fakatasi atu eiloa mo latou,” me ko se mafai o fakaasi mai ne latou olotou lagonaga.​​—⁠Failauga 9:​5, 6, 10.

¹⁷ E faigofie kae manino ‵lei eiloa a muna i Tusi Tapu e uiga ki te mataupu tenei​​—⁠e se tumau a tino ‵mate i te ola i se isi koga. E seai eiloa se mea e tiakina ne ia te foitino māfai ko mate se tino kae tumau i te ola mai i te ‵toe fanau mai ki se isi foitino, e pelā mo pati a tino kolā e tali‵tonu ki te reincarnation (te ‵toe ola mai ki se isi mea). E mafai o fai ne tatou se fakatusaga penei: A te ola telā e maua ne tatou e fai pelā me se kalokaloafi. Kafai ko mate te kalokaloafi, e se faimalaga atu ki se isi koga. E gata atu eiloa i konā.

18. Kafai ko iloa ne se akoga faka-te-Tusi Tapu me e seai se mea e iloa ne tino ‵mate, ne a fakaikuga e mafai o fai ne ia?

¹⁸ Mafaufau ki te fakamatalaga o te munatonu faigofie kae malosi tenā. Kafai e iloa ne se tino telā e sukesuke ki te Tusi Tapu me e seai se mea e iloa ne tino ‵mate, e ‵tau o faigofie ke fakaiku aka ne ia me faitalia te sē fia‵fia o ana tupuga kolā ko ‵mate i te taimi koi ola ei latou, e se mafai o fakalavelave atu latou ki a ia. E ‵tau foki o malamalama fakavave a ia i te manatu me ko se mafai ne ana tino pele kolā ko ‵mate o lagona, lavea, faipati, io me mafau‵fau latou. Tela la, e se maua ne latou a lagonaga sē sologa i pekātuli io me ko te logo‵mae i se koga telā e fakapuapuagātia ei latou i te afi. Kae e akoako mai te Tusi Tapu me ka toe faka‵tu mai ki te ola ne te Atua a tino ‵mate kolā e masaua ne ia. Ko oko eiloa i te gali o te fakamoemoega tenā!​​—⁠Ioane 5:​28, 29.

Se Tusi Fou ke Fakaaogā ne Tatou

19, 20. E pelā me ne Kelisiano, se a te tiute e maua ne tatou, kae se a te tusi faka-te-Tusi Tapu telā ne fakatoka fakapito ke fakaaogā ne tatou i te ‵tou galuega talai?

¹⁹ Ne sau‵tala tatou ki fesili fua e tolu kolā e mafau‵fau ki ei a tino e tokouke. E ‵tusa mo fesili takitasi konā, e maina kae manino ‵lei eiloa a mea kolā e akoako mai i te Tusi Tapu. Ko se faka‵tau eiloa i te gali ke fakaasi atu a muna‵tonu konā ki tino kolā e fia iloa ne latou a mea kolā e akoako mai i te Tusi Tapu! Kae e uke aka foki a nisi fesili tāua kolā e fia maua ne tino loto fakamaoni a tali fakamalie loto ki ei. E pelā me ne Kelisiano, e maua ne tatou te tiute ke fesoasoani atu ki a latou ke maua a tali ki vaegā fesili penā.

²⁰ Se mea faigata ke akoako atu a te munatonu i te Tusi Tapu i se auala telā e manino kae fakafiafia ki te loto. Ke fesoasoani mai ki a tatou ke fakafesagai atu ki te tulaga faigata tenā, ne fakatoka ei ne “te tavini fakamaoni kae poto” se tusi telā ne fakatoka fakapito eiloa ke fakaaogā ne tatou i te ‵tou galuega faka-Kelisiano. (Mataio 24:​45-47) A te ulutala o te tusi tenei, telā e 224 a itulau i ei ko te Ne a Mea e Akoako ‵Tonu Mai i te Tusi Tapu?

21, 22. Ne a nisi vaega tāua o te tusi ko te Ne a Mea e Akoako ‵Tonu Mai i te Tusi Tapu?

²¹ E uke eiloa a vaega tāua kese‵kese i te tusi tenei, telā ne ‵tala mai i te Fono Lasi a Molimau a Ieova i te 2005/2006 ko “Te Fakalogo ki te Atua.” E pelā mo itulau e lima i te kamataga, e lasi ‵ki te fesoasoani e maua i ei ki te kamataga o akoga faka-te-Tusi Tapu i fale o tino. Kāti ka momea aka te faigofie ke sau‵tala ki ata mo tusi siki kolā e maua i te fakatomuaga. E mafai foki o fakaaogā ne koe a te vaega tenei ke fakaasi atu ki se akoga faka-te-Tusi Tapu a te auala ke ‵sala atu ki mataupu mo fuaiupu i te Tusi Tapu.

²² A te auala ne fakatoka ei te tusi tenei e faigofie kae manino. Ne aofia eiloa a taumafaiga ke oko tonu atu ki te loto o se akoga faka-te-Tusi Tapu mai i te taumafai ke aofia a ia i so se taimi e mafai o fai penā. E tofu eiloa a mataupu takitasi mo nāi fesili i te kamataga mo se pokisi i te fakaotiga telā e fakaulutala penei “Mea Kolā e Akoako Mai i te Tusi Tapu.” E aofia i te pokisi a tali mai i te Tusi Tapu ki fesili i te kamataga. A ata mo fakamatalaga o ata ‵gali konā, penā foki loa mo fakatusaga i te tusi tenei ka fesoasoani atu ki se akoga faka-te-Tusi Tapu ke malamalama i manatu ‵fou. E tiga eiloa ne fakafaigofie aka a mataupu i te tusi, e isi eiloa ne mataupu fakaopoopo kolā e mafai o sukesuke ‵loto atu ki mataupu tāua e 14 māfai e manako te tino akoga ki nisi fakamatalaga fakaopoopo.

23. Ne a manatu fesoasoani e tuku mai e uiga ki te fakaaogāga o te tusi ko te Akoakoga a te Tusi Tapu i akoga faka-te-Tusi Tapu?

²³ Ne fakatoka eiloa te tusi ko te Akoakoga a te Tusi Tapu ke fesoasoani mai ki a tatou ke akoako atu a tino katoa faitalia te tulaga o olotou akoakoga mo olotou putiakaga fakalotu. Kafai e seai eiloa se iloa o se tino akoga i te Tusi Tapu, e mafai o sili atu i te fakatasi taimi e fai ei te akoga ke fakaoti ei se mataupu e tasi. Ke mo a ma fai fakavave fua te akoga, kae taumafai ke oko tonu atu ki te loto o te tino akoga. Kafai e se malamalama a ia i se tala fakatusa telā ne fakaaogā i te tusi, ke fakamatala atu io me fakaaogā se isi tala fakatusa. Ke fakatoka faka‵lei, kae ke na fakaaogā faka‵lei te tusi i te ‵toe auala magoi, kae ‵talo mō te fesoasoani o te Atua ko te mea ke mafai ne koe o ‘akoako tonu atu eiloa te munatonu.’​​—⁠2 Timoteo 2:​15.

Ke na Loto Fakafetai mō Tou Tulaga Fakaaloalo

24, 25. Ne a tulaga fakaaloalo ko oti ne tuku atu ne Ieova ki ana tino?

²⁴ Ko oti ne tuku atu ne Ieova ki ana tino a tulaga fakaaloalo. Ko oti ne fesoasoani mai a ia ke iloa ne tatou te munatonu e uiga ki a ia. Ke mo a eiloa ma manatu māmā tatou ki te tulaga taulia tenā! A te ‵tonuga loa, ne ‵funa ne te Atua ana fuafuaga mai i tino fakamata‵mata kae ne fakaasi atu ne ia ki tino loto maulalo. Ne fai atu a Iesu e uiga ki te mea tenei: “Toku Tamana, te Aliki o te lagi mo te lalolagi! Au e fakafetai atu ki a koe me ko oti ne fakaasi ne koe ki tino e seki akoakogina a mea kolā ne ‵funa ne koe mai tino ‵poto mo tino ne akoakogina.” (Mataio 11:25) Se tulaga fakaaloalo tāua eiloa kae faigata o maua ke aofia tatou i tino loto maulalo kolā e tavini atu ki te Pule Tafasili i te Maluga i te lagi mo te lalolagi, ko Ieova.

²⁵ Ko oti foki ne tuku mai ne te Atua te tauliaga o te akoakoga o nisi tino e uiga ki a ia. Masaua la me ko oti ne fakamaseigina a ia ne tino kolā e akoako atu ne latou a fakamatalaga ‵loi e uiga ki a ia. Tela la, e maua eiloa ne tino e tokouke a kilokiloga ‵se e uiga ki a Ieova, mai te mafau‵fau me e se atafai kae e se alofa mai foki a ia. E mata, e loto fiafia koe, io me loto finafinau ke fesoasoani atu ki te faka‵tonuga o fakamatalaga ‵se konā? E mata, e manako koe ke iloa ne tino i koga katoa a te munatonu e uiga ki te Atua? Tela la, ke na fakaasi atu tou fakalogo ki te Atua mai i te talai mo te akoako atu mo te loto finafinau ki nisi tino e uiga ki mea kolā e fai mai i te Tusi Tapu ki mataupu tāua konei. E ‵tau o iloa ne tino kolā e ‵sala atu ki te munatonu a mea kolā e akoako ‵tonu mai i te Tusi Tapu.

Ne a Au Tali?

• E iloa pefea ne tatou me e atafai mai te Atua ki a tatou?

• Kaia e ola ei tatou i te lalolagi nei?

• Ne a mea e ‵tupu māfai ko ‵mate tatou?

• Ne a vaega o te tusi ko te Akoakoga a te Tusi Tapu e ‵gali ki a koe?