Fesoasoani Atu ki Nisi Tino ke Faka‵logo ki mea Kolā e Akoako Mai i te Tusi Tapu
“A te fuaga telā ne tō ki loto i te laukele ola ‵lei, e fakasino ki tino kolā ne lagona ne latou te muna, kae ne tausi ne latou i te loto fiafia mo te fakamaoni, kae ne tumau eiloa ke oko ki te taimi ne fua mai ei.”—LUKA 8:15.
1, 2. (a) Se a te pogai ne fakatoka ei te tusi ko te Ne a Mea e Akoako ‵Tonu Mai i te Tusi Tapu? (e) I tausaga fakamuli nei, ne fakamanuia atu pefea a Ieova ki taumafaiga o ana tino ke fai a soko?
“KO SE faka‵tau i te gali o te tusi. Ko oko eiloa i te fiafia o taku akoga faka-te-Tusi Tapu ki ei. Ko oko foki eiloa i te gali ki a au. E fakafaigofie ne te tusi tenei a te kamataga o akoga faka-te-Tusi Tapu mo tino i mataloa o olotou fale.” Ko muna a se paenia tumau a Molimau a Ieova e uiga ki te tusi ko te Ne a Mea e Akoako ‵Tonu Mai i te Tusi Tapu? a Ne fai mai foki se tino talai matua o te Malo e uiga ki te tusi foki tenei: “Ne maua ne au te tulaga taulia ke fesoasoani atu ki tino e tokouke ke iloa ne latou a Ieova i te 50 tausaga ne gasuesue malosi ei au i te galuega talai. Kae e ‵tau o fai atu au, me i te tusi tenei ko se faka‵tau eiloa i te gali. Ko oko eiloa i te fakamalosi mo te ‵gali o fakamatalaga o ata mo tala fakatusa i ei.” E mata, e penā eiloa ou lagonaga e uiga ki te tusi ko te Akoakoga a te Tusi Tapu? Ne fakatoka eiloa te tusi faka-te-Tusi Tapu tenei ke fesoasoani atu ki a koe i te fakataunuga o te fakatonuga a Iesu: “Tela la, olo atu koutou ki fenua katoa ke fai a tino i ei mo oku soko; . . . akoako atu foki latou ke faka‵logo ki mea katoa kolā ne fakatonu atu ne au ki a koutou.”—Mataio 28:19, 20.
2 E seai eiloa se fakalotolotolua me ko fiafia eiloa te loto o Ieova ke lavea atu ne ia a te toko 6.6 miliona o ana Molimau e faka‵logo eiloa mo te loto fiafia ki te fakatonuga a Iesu ke fai a soko. (Faataoto 27:11) E fakamanuia eiloa ne Ieova olotou taumafaiga. E pelā mo te 2005, ne talai atu te tala ‵lei i atufenua e 235, kae e ‵tusa mo te aofaki masani, e sili atu i te 6,061,500 akoga faka-te-Tusi Tapu ne fai. Ne iku atu i ei ki te ‘lagona kae talia ne tino e tokouke a te talaiga a te Atua, e se ona ko te mea se talaiga a se tino, ka ko te talaiga eiloa a te Atua.’ (1 Tesalonia 2:13) I te lua tausaga ko ‵teka atu nei, e sili atu i te āfa miliona o soko ‵fou ne fakafetaui aka olotou olaga ki tulafono a Ieova kae tuku atu olotou ola ki te Atua.
3. Ne a fesili e uiga ki te fakaaogāga o te tusi ko te Akoakoga a te Tusi Tapu ka suke‵suke tatou ki ei i te mataupu tenei?
3 E mata, kai maua eiloa ne koe te fiafia i te faiga ne koe o se akoga faka-te-Tusi Tapu mo se tino? Koi isi eiloa ne tino “loto fiafia mo te fakamaoni” i te lalolagi kātoa kolā e lagona ne latou te muna a te Atua kae ka “tumau eiloa ke oko ki te taimi ne fua mai ei.” (Luka 8:11-15) Ke na mafaufau nei tatou ki te auala e mafai o fakaaogā ne koe te tusi ko te Akoakoga a te Tusi Tapu i te galuega ko te faiga o soko. Ka suke‵suke tatou ki fesili e tolu i te mataupu tenei: (1) E mafai pefea o kamata ne koe se akoga faka-te-Tusi Tapu? (2) Ne a toe auala ‵lei ke akoako atu ei? (3) E mafai pefea o fesoasoani atu koe ki se tino ke se fai fua mo fai se tino akoga kae ke fai foki mo fai se faiakoga o te Muna tusia a te Atua, ko te Tusi Tapu?
Te Auala e Mafai ei o Kamata ne Koe se Akoga Faka-te-Tusi Tapu
4. Kaia e se talia ei ne nisi tino ke suke‵suke latou ki te Tusi Tapu, kae e mafai pefea o fesoasoani atu ki a latou ke manumalo i olotou lagonaga penā?
4 Kafai e fai atu ke eva atu koe ki te suā feitu o te vaitafe, e iku loa o se talia ne koe te manatu tenā. Kae kafai e isi ne fatu ko oti ne fakatoka faka‵lei ke olo atu ei ki te suā feitu, kāti ka sili atu tou fia taumafai o fanatu ki te suā feitu. E penā foki loa, e mafai o se talia ne se tino fakalavelave ke sukesuke a ia ki te Tusi Tapu. Kāti e mafaufau te tino i te fale me ko tō uke a taimi mo taumafaiga e manakogina ke sukesuke ki ei. E mafai pefea o fesoasoani atu koe ki se tino penā ke manumalo i ana lagonaga penā? Mai te faiga o se sau‵talaga toetoe kae aogā, e mafai o fakaaogā ne koe te tusi ko te Akoakoga a te Tusi Tapu ke takitaki atu ei te tino ki se akoga faka-te-Tusi Tapu tumau. Kafai e fakatoka faka‵lei koe ki ei, ka fai eiloa a toe asiga takitasi e pelā mo fatu kolā ne fakatoka faka‵lei ke oko atu ei te tino tenā ki se fesokotakiga fakataugasoa mo Ieova.
5. Kaia e ‵tau ei o faitau koe ki te tusi ko te Akoakoga a te Tusi Tapu?
5 Kae koituai o fesoasoani atu koe ki se isi tino ke maua ne ia a mea aogā mai i te tusi ko te Akoakoga a te Tusi Tapu, e ‵tau o masani faka‵lei koe ki te tusi. E mata, ko oti ne faitau koe ki ei mai te kamataga ki te fakaotiga? E tasi te tauavaga ne ave ne laua te tusi i te lā malōlōga kae kamata o faitau ki ei i te taimi ne mānava malie aka ei i te matāfaga. E isi se fafine i te kogā koga tenā e ‵togi atu ne ia ana mea ki tualisi ne fanatu ki a laua, kae ne lavea ne ia te ulutala Ne a Mea e Akoako ‵Tonu Mai i te Tusi Tapu? Ne fai atu tou fafine ki te tauavaga me i ne nāi itula mai mua atu i ei, ne ‵talo atu ei a ia e uiga ki te fesili eiloa tenā, kae fakamolemole atu ki te Atua mō se tali. Ne loto fia‵fia eiloa te tauavaga o tuku atu ki te fafine tenā se kopi e tasi o te tusi tenā. E mata, kai ‘fakaaogā faka‵lei ne koe so se avanoa’ ke faitau ki te tusi tenei, kāti mō te lua o taimi, kae koi faka‵tali koe ki se mea io me ko taimi malōlō i te galuega io me ko te akoga? (Efeso 5:15, 16) Kafai e fai koe penā, ka momea aka tou masani ki te tusi faka-te-Tusi Tapu tenei kae e maua foki ne koe i ei a avanoaga ke faipati atu ki nisi tino e uiga ki mea i ei.
6, 7. E mafai pefea o fakaaogā ne koe te tusi ko te Akoakoga a te Tusi Tapu ke kamata a akoga faka-te-Tusi Tapu?
6 Kafai e ofo atu te tusi i te galuega talai, ke na fakaaogā faka‵lei a ata, tusi siki, mo fesili i te itulau e 4, 5, mo te 6. E pelā me se fakaakoakoga, e mafai o kamata ne koe se sautalaga mai i te fesili atu, “Mai i fakalavelave katoa kolā e fe‵paki mo tino i aso nei, se a tau faka‵tau ki te koga e mafai o maua i ei a toe fakatakitakiga kolā e fakatuagagina?” Mai tua o te fakalogologo faka‵lei atu ki te tali a te tino, faitau atu te 2 Timoteo 3:16, 17, kae fakamatala atu me e tuku mai i te Tusi Tapu a te auala tonu ke faka‵lei aka ei a fakalavelave o tino. Ka oti ko ‵suke atu ei ki te itulau e 4 mo te 5, kae fesili atu ki te tino i te fale: “Mai i tulaga katoa konei e fakaasi mai i itulau konei, se a te ‵toe mea telā e māfatia malosi koe i ei?” Kafai e fakasino atu te tino i te fale ki se mea e tasi, fai ki ei ke taofi ne ia te tusi kae faitau ne koe se tusi siki mai i te Tusi Tapu e uiga ki te mea tenā. Ka oti, ko faitau atu ei te itulau e 6, kae fesili atu ki te tino i te fale, “Mai fesili e ono kolā e taku mai i te fakaotiga o te itulau tenei, se a te fesili e manako malosi nei koe ki te tali?” Kafai e filifili aka ne te tino se fesili e tasi, fakaasi atu ki ei te mataupu telā ka tali mai i ei te fesili tenā, tuku atu te tusi ki a ia, kae fai a fakatokaga mautinoa ke toe foki atu o sau‵tala ki te fesili tenā.
7 A te fakamatalaga fakatomua telā ne fakatoka atu e nofo pelā ki se 5 minute te leva. Kae i nāi minute fua konā, ka iloa ei ne koe a mea kolā e manavase ki ei te tino i te fale, faitau kae fakamatala atu a tusi siki e lua, kae fakatoka te fakavae mō se toe āsiga. Kāti ka fai eiloa te sautalaga toetoe tenā mo te tino i te fale mo fai te ‵toe taimi fakamalosi kae fakamafanafana ki a ia i se taimi leva ‵ki. E mafai eiloa o iku atu ki te olioli o se tino fakalavelave ke fakamaogā a nāi minute mo koe i te taimi e fesoasoani atu ei koe ki a ia ke ‵maga atu ki ‘te auala telā e tau atu ki te ola.’ (Mataio 7:14) Fakamuli loa, kafai e gasolo aka ki luga te fiafia o te tino, ko te momea aka foki o te leva o te sukesukega. E mafai eiloa o fai te mea tenei mai te ‵kami atu ke sagasaga ki lalo kae fai te sukesukega mō se taimi tai leva.
Toe Auala ‵Lei ke Akoako Atu
8, 9. (a) E mafai pefea o fakatoka ne koe tau akoga faka-te-Tusi Tapu ke fakafesagai atu ki fakalavelave mo tofotofoga kolā e mafai o fe‵paki mo ia? (e) Tefea te koga e mafai ei o maua ne tatou a mea fakatūtū fale i te feitu faka-te-agaga kolā e se mafai o fakamasei ne te afi ke fakamalosi aka ei te fakatuanaki?
8 Kafai ko kamata o fakalogo te tino ki mea kolā e akoako mai i te Tusi Tapu, kāti ka fe‵paki a ia mo fakalavelave kolā ka faka‵lave aka ei tena gasolo atu ki mua. Ne fai mai te apositolo ko Paulo: “Ko latou katoa kolā e ma‵nako o ola i te olaga atua i te ‵soko tasi mo Keliso Iesu, ka fakasauāgina.” (2 Timoteo 3:12) Ne fakatusa ne Paulo a fakalavelave konei ki se afi telā e fakamasei ne ia a mea fakatūtū fale sē ma‵losi kae e se ko mea fakatūtū fale pelā mo aulo, siliva, mo fatu tāua. (1 Kolinito 3:10-13; 1 Petelu 1:6, 7) Ke fesoasoani atu ki au akoga faka-te-Tusi Tapu ke ati aka ne latou a uiga kolā e manakogina ke mafai o fakafesagai atu ki tofotofoga kolā e mafai o fe‵paki mo latou, e ‵tau o fesoasoani atu koe ki a latou i te atiakaga o mea fakatūtū fale kolā e se mafai o fakamasei ne te afi.
9 E fakatusa ne te faisalamo a “folafolaga a te Aliki [ko Ieova]” ki se “siliva telā ko oti ne faka‵ma fakafitu i te ogaumu.” (Salamo 12:6) A te ‵tonuga loa, e maua i te Tusi Tapu a mea fakatūtū fale tāua kolā e mafai o ati aka ei se fakatuanaki malosi. (Salamo 19:7-11; Faataoto 2:1-6) Kae e fakaasi atu ne te tusi ko te Akoakoga a te Tusi Tapu a te auala ke magoi ei koe i te fakaaogāga o te Tusi Tapu.
10. E mafai pefea ne koe o fai ke saga tonu atu tau akoga faka-te-Tusi Tapu ki te Tusi Tapu?
10 I te taimi e fai ei te sukesukega, ke fakamalosi atu ki te tino akoga ke saga tonu atu ki tusi siki kolā e tuku mai i mataupu takitasi i te taimi e fai ei te sau‵talaga. Fakaaogā a fesili ke fesoasoani ki te tino akoga ke malamalama i tusi siki fakavae kae ke fakagalue aka ne ia i tena olaga. Fakaeteete ke mo a ma fai atu ki a ia a te mea e ‵tau o fai. I lō te fai penā, ke tautali atu ki te fakaakoakoga a Iesu. I te taimi ne fanatu ei se tagata e poto i te Tulafono o fesili atu ki a ia, ne tali atu a Iesu: “Ne a muna e tusi i te Tulafono? Se a tou iloa i ei?” Ne siki atu ne te tagata a pati i te Tusi Tapu, kae ne fesoasoani atu Iesu ke iloa ne ia o fakagalue aka te manatu tenā i tena olaga. Mai te faiatuga o se tala fakatusa, ne fesoasoani atu foki a Iesu ke iloa ne te tagata tenā te auala e ‵tau o pokotia ei a ia i te akoakoga tenā. (Luka 10:25-37) E uke foki a tala fakatusa faigofie i te tusi ko te Akoakoga a te Tusi Tapu kolā e mafai o fakaaogā ne koe ke fesoasoani atu ki se tino akoga i te fakaaogāga o akoakoga fakavae i te Tusi Tapu ki a latou eiloa.
11. E pefea te uke o palakalafa e ‵tau o fai i se sukesukega e tasi?
11 E fakaaogā i te tusi ko te Akoakoga a te Tusi Tapu a tugāpati faigofie, kae manino ke fakamatala atu ei te Muna a te Atua, e pelā eiloa mo Iesu telā ne fakamatala atu ne ia a manatu faiga‵ta i tugāpati faigofie. (Mataio 7:28, 29) Ke na tautali atu koe ki tena fakaakoakoga. Ke na fakaasi atu i se auala faigofie, manino, kae tonu a fakamatalaga i ei. Ke mo a ma fai fakavave te mataupu. I lō te fai penā, ke na fakaiku aka a te aofaki o palakalafa e ‵tau o sau‵tala ki ei i akoga takitasi e ‵tusa mo fakanofonofoga mo te atamai o te tino akoga. Ne iloa ne Iesu te tapulā o ana soko kae ne seki fakafi‵ta ne ia latou ki fakamatalaga e uke atu i lō te mea e manakogina mō te taimi tenā.—Ioane 16:12.
12. E ‵tau o fakaaogā pefea ne koe a mataupu fakaopoopo?
12 E aofia i te tusi ko te Akoakoga a te Tusi Tapu a mataupu fakaopoopo e 14. E ‵tusa mo te tulaga o te tino akoga, e ‵tau o fakaiku aka ne koe, e pelā me ko te faiakoga, a te auala e ‵tau o fakaaogā i ei a mataupu konei. Kafai e faigata o malamalama se tino akoga i se mataupu io me e isi ne ana fesili e uiga ki nisi mataupu ona ko ana talitonuga mua, kāti ko lava loa i ei ke ‵saga atu ki se vaega telā e fetaui ‵lei i mataupu fakaopoopo kae fakamalosi atu ki a ia ke onoono ki te mataupu tenā i a ia eiloa. I te suā feitu la, e iku loa o manakogina te tulaga o te tino akoga ke onoono fakatasi koulua ki te mataupu tenā. E aofia i mataupu fakaopoopo a mataupu faka-te-Tusi Tapu tāua, e pelā mo “Te ‘Solu’ mo te ‘Agaga’—Ne a Mea e Fakauiga ‵Tonu ki ei a Pati Konei?” mo te “Ko oi ‘Papelonia te Sili’?” Kāti ka manako koe ke sau‵tala fakatasi koulua mo tau akoga faka-te-Tusi Tapu e uiga ki mataupu konei. Ona ko te mea e seai ne fesili e tuku mai mō mataupu i mataupu fakaopoopo, e ‵tau eiloa o masani ‵lei koe mo fakamatalaga i ei ko te mea ke mafai eiloa ne koe o fai atu a fesili aogā.
13. Se a te aogā o ‵talo ki te fakamalosiakaga o te fakatuanaki?
13 E fai mai te Salamo 127:1: “Kafai e se faite ne te Aliki te fale, e seai se aogā e ga‵lue fua ei a tufuga fai fale.” Tela la, kafai ko fakatoka koe ki se akoga faka-te-Tusi Tapu, ‵talo atu ki a Ieova mō tena fesoasoani. Ke na fakaasi atu i tau ‵talo i te kamataga mo te fakaotiga o akoga takitasi a tou fesokotakiga gali mo Ieova. Fakamalosi atu ki te tino akoga ke ‵talo atu ki a Ieova mō te poto mo te malamalama i Tena Muna mo te malosi ke fakagalue aka a pati fakatonutonu i ei. (Iakopo 1:5) Kafai e fai penā, ka fakamalosi aka ei te tino akoga ke kufaki i fakalavelave kae ka tumau eiloa te gasolo aka o malosi tena fakatuanaki.
Fesoasoani Atu ki Tino A‵koga ke Fai mo Fai ne Faiakoga
14. Ne a nisi mea e ‵tau o fai ne tino kolā e sukesuke ki te Tusi Tapu?
14 Kafai e ‵tau o faka‵logo a ‵tou akoga faka-te-Tusi Tapu ki “mea katoa” ne fakatonu atu ne Iesu ki ana soko, e ‵tau o gasolo atu latou mai te fai mo fai ne tino a‵koga i te Muna a te Atua ki faiakoga o te Muna a te Atua. (Mataio 28:19, 20; Galuega 1:6-8) Ne a mea e mafai ne koe o fai ke fesoasoani atu ki te tino akoga ke fai ne ia te vaegā gasoloatuga penā i te feitu faka-te-agaga?
15. Kaia e ‵tau ei o fakamalosi atu koe ki tau akoga faka-te-Tusi Tapu ke kau atu ki fakatasiga Kelisiano?
15 Mai te kamataga loa, ‵kami atu te tino akoga ke kau atu ki fakatasiga a te fakapotopotoga. Fakamatala atu ki a ia me i fakatasiga ko te koga e maua ei ne ia a akoakoga ke fai mo fai se faiakoga o te Muna a te Atua. Mō nāi vaiaso, ke na fakaaogā a nāi minute i te fakaotiga o au lū sukesukega ki te Tusi Tapu ke fakamatala atu te polokalame o akoakoga faka-te-agaga kolā e maua ne koe i fakatasiga mo fono kese‵kese. Ke na faipati atu mo te loto finafinau e uiga ki mea aogā kolā e maua ne koe i maopoopoga konei. (Epelu 10:24, 25) I te taimi eiloa ko kamata o kau atu faeloa te akoga faka-te-Tusi Tapu ki fakatasiga, e iku loa o fai a ia mo fai se faiakoga o te Muna a te Atua.
16, 17. Ne a nisi fakamoemoega kolā e mafai o fakatoka ne tau akoga faka-te-Tusi Tapu kae taumafai ki ei?
16 Fesoasoani atu ki te akoga faka-te-Tusi Tapu ke fakatoka ne ia a fakamoemoega kolā e mafai ne ia o fakataunu. E pelā mo te fakamalosi atu ki a ia ke fakaasi atu ne ia a mea e tauloto ne ia ki sena taugasoa io me se kāiga. Ke fesoasoani atu foki ki a ia ke taumafai o faitau ki te Tusi Tapu kātoa. Kafai e fakamalosi atu koe ki a ia ke fakatoka kae fakatumau ne ia se fakasologa tumau o faitauga ki te Tusi Tapu, ka aogā eiloa te faifaiga tenei ki a ia a koituai o papatiso a ia. E se gata i ei, kaia e se fakamalosi atu ki te akoga faka-te-Tusi Tapu ke taumafai o masaua ne ia se tusi siki e tasi telā e tali atu ki se fesili tāua mai mataupu takitasi o te tusi ko te Akoakoga a te Tusi Tapu? Mai te faiga penā, ka fai ei a ia mo fai se “tino galue telā e se ‵tau mo ia o taema ki se mea, kae se tino e akoako tonu eiloa ne ia a te munatonu a te Atua.”—2 Timoteo 2:15.
17 I lō te akoako atu ki se akoga faka-te-Tusi Tapu ke tauloto a pati takitasi i se tusi siki io me ne nāi pati fua i ei, fakamalosi atu ke fakamatala atu ne ia a tusi siki tāua i te Tusi Tapu kolā e fetaui ‵lei mo te mataupu telā e sau‵tala ki ei, māfai e manakogina ke tuku atu se tali ki tino kolā e ma‵nako ki se fakamatalaga o tena fakatuanaki. E aogā ‵ki a te faiga o tamā fakaakoakoga, kae taumafai o fakafoliga atu i a koe se kāiga io me se tino e ga‵lue tasi mo ia telā e fesili atu ki a ia ke fakamatala mai ana talitonuga. Kafai e saga faka‵lei atu te tino akoga, fakaasi atu ki ei te auala e mafai ei o tali atu i “te loto malalo mo te āva.”—1 Petelu 3:16.
18. Kafai ko mafai o kau atu tau akoga faka-te-Tusi Tapu e pelā me se tino talai kae seki papatiso, ne a nisi fesoasoani e mafai o tuku atu ne koe ki a ia?
18 Fakamuli loa, e iku loa o fetaui ‵lei te tino akoga ke kau atu ki te galuega talai. Faka‵mafa atu ki a ia me i te kau atu ki te galuega tenei se tauliaga eiloa. (2 Kolinito 4:1, 7) Kafai ko fakaiku aka ne toeaina me ko mafai o kau atu te tino akoga tenā e pelā me se tino talai kae seki papatiso, fesoasoani atu ki a ia ke fakatoka se fakamatalaga faigofie kae ke ga‵lue fakatasi mo ia i te galuega talai. Ke na tumau eiloa i te ga‵lue fakatasi mo ia i vaega kese‵kese o te galuega talai, kae akoako atu foki ke iloa ne ia o fakatoka kae fai a toe āsiga ma‵goi. Ka fai eiloa tau fakaakoakoga ‵lei mo fai se fakamalosiga ki a ia.—Luka 6:40.
Ke “Fakasao ne Koe a Koe Eiloa, Pelā Foki mo Latou Kolā e Faka‵logo Mai ki a Koe.”
19, 20. Ne a fakamoemoega e ‵tau o maua ne tatou, kae kaia?
19 E seai eiloa se fakalotolotolua, me e uke eiloa a galuega ‵mafa e manakogina ke fesoasoani atu ki se tino ‘ke iloa ne ia te munatonu.’ (1 Timoteo 2:4) Kae e se uke a mea fakafiafia i te olaga e mafai o fakatusa ki te fiafia i te fesoasoani atu ki se tino ke fakalogo ki mea kolā e akoako mai i te Tusi Tapu. (1 Tesalonia 2:19, 20) A te ‵tonuga loa, e maua eiloa ne tatou te tulaga taulia ke fai mo fai ne tino kolā “e ga‵lue fakatasi mo te Atua” i te galuega ko te akoakoatuga i te lalolagi kātoa!—1 Kolinito 3:9.
20 E auala i a Iesu Keliso mo ana agelu ‵mana, ko pili eiloa o fakamasino ne Ieova “a latou kolā e se iloa ne latou a te Atua, mo latou foki kolā e se faka‵logo ki te Tala ‵Lei e uiga ki te ‵tou Aliki ko Iesu.” (2 Tesalonia 1:6-8) Ko ‵tu atu eiloa a ola o tino i se tulaga fakamataku. E mata, e mafai ne koe o taumafai o fai se akoga faka-te-Tusi Tapu mo se tino e tokotasi i te fale i te tusi ko te Ne a Mea e Akoako ‵Tonu Mai i te Tusi Tapu? Kafai e kau atu koe ki te galuega tenei, ka maua ne koe te avanoaga ke “fakasao ne koe a koe eiloa, pelā foki mo latou kolā e faka‵logo mai ki a koe.” (1 Timoteo 4:16) Ko sili atu nei eiloa te tāua ke fesoasoani fakavave atu tatou ki nisi tino ke faka‵logo ki mea kolā e akoako mai i te Tusi Tapu.
[Fakamatalaga mai lalo]
a Ne ‵lomi ne Molimau a Ieova.
Ne a Au Mea ne Tauloto?
• Se a te pogai ne fakatoka ei te tusi ko te Akoakoga a te Tusi Tapu?
• E mafai pefea o kamata ne koe a akoga faka-te-Tusi Tapu mai te fakaaogāga o te tusi ko te Akoakoga a te Tusi Tapu?
• Ne a toe auala ‵lei ke akoako atu ei?
• E mafai pefea o fesoasoani atu koe ki se tino akoga ke fai mo fai se faiakoga o te Muna a te Atua?
[Fakamatalaga o te Ata i te itulau e 16]
E mata, e fakaaogā faka‵lei ne koe te tusi tenei?
[Fakamatalaga o te Ata i te itulau e 16]
Ne a mea e akoako ‵tonu mai i te Tusi Tapu?