Ke mo a Eiloa e Fakagata te Gasoloakaga o Tou Loto Fakafetai
“Ko oko eiloa i te aogā ou mafaufauga ki a au, e te Atua, ko se mafai o lau te aofaki o latou!”—SALAMO 139:17, NW.
1, 2. Kaia e ‵tau ei o fia‵fia tatou ki te Muna a te Atua, kae ne fakaasi mai pefea ne te faisalamo tena loto fakafetai?
E ISI se mea fakaofoofogia telā ne maua. I te fakafouga o te faletapu o Ieova i Ielusalema, ne maua ei ne te Faitaulaga Sili ko Hilikia “a te tusi o te Tulafono a te Aliki, ko te Tulafono telā ne aumai ne te Atua ki a Mose,” e seai se fakalotolotolua me ko ia eiloa telā ne tusi ne Mose i se 800 tausaga mai mua atu i ei! E mata, e fakaatata i tou mafaufau a lagonaga o te tupu ko Iosia, telā ne mataku ki te Atua, i te avatuga o te tusi tenā ki a ia? E tonu, ne fiafia malosi eiloa a ia ki ei kae fakatonu atu ki a Safana, te failautusi, ke faitau ki luga.—2 Nofoaiga Tupu 34:14-18.
2 I aso nei, e mafai o fai‵tau ne te fia piliona o tino a te Muna kātoa a te Atua, io me se vaega i ei. Kae e mata, e fai ne te mea tenā ke se tāua malosi i ei te Tusi Tapu? Ikai loa! A te ‵tonuga loa, e maua i ei a mafaufauga o te Atua Malosi Katoatoa, kolā ne tusi ko te mea ke aogā ki a tatou. (2 Timoteo 3:16) I te fakaasimaiga o ana lagonaga e uiga ki te Muna a te Atua, ne tusi mai te faisalamo ko Tavita: “Ko oko eiloa i te aogā ou mafaufauga ki a au, e te Atua, ko se mafai o lau te aofaki o latou!”—Salamo 139:17, NW.
3. Se a te mea e fakaasi mai i a Tavita se tagata telā ne ‵poko tena tulaga faka-te-agaga?
3 Ne seki gasolo ifo eiloa ki lalo te loto fakafetai o Tavita ki a Ieova, tena Muna, mo tena fakatokaga mō te tapuakiga tonu. E fakaasi mai ana lagonaga i salamo ‵gali e uke kolā ne ‵fatu ne ia. E pelā mo ana pati i te Salamo 27:4: “E tasi faeloa te mea ne fakatagi atu ei au ki te Aliki; e tasi foki eiloa te mea e manako au ki ei: Ke nofo au i te fale o te Aliki i toku olaga kātoa, ko te mea ke ofo au i te ‵lei katoatoa o te Aliki, kae fakatagi atu ki tena takitakiga.” E fakauiga te tugapati “ke ofo au” i te ‵gana Epelu mua ki te fakatalitali kae mafaufau, ke iloilo faka‵lei, ke kilo atu mo te fiafia mo te ofo. E manino ‵lei i a Tavita se tino ne ‵poko tena tulaga faka-te-agaga, telā ne fiafia tonu ki fakatokaga faka-te-agaga a Ieova kae ne fiafia malosi ki so se mea tonu faka-te-agaga telā ne fakaasi atu ne te Atua. Se mea aogā ke tau‵tali tatou ki tena fakaakoakoga o te loto fakafetai.—Salamo 19:7-11.
Ke Loto Fakafetai ki te Tauliaga ke Iloa te Munatonu Mai te Tusi Tapu
4. Se a te mea ne fai ei a Iesu ke ‘‵fonu i te fiafia i te agaga tapu’?
4 A te mauaga o te malamalama i te Muna a te Atua e se fakalagolago ki te poto faka-te-lalolagi, telā e maua ei te fakamatamata. I lō te fai penā, e fakalagolago eiloa tena mauaga ki te alofa tauanoa o Ieova, telā e tuku atu ne ia ki tino loto mau‵lalo, tino loto fakamaoni kolā e iloa ne latou olotou manakoga faka-te-agaga. (Mataio 5:3; 1 Ioane 5:20) I te taimi ne mafaufau ‵loto ei a Iesu e uiga ki nisi tino sē ‵lei katoatoa kolā ne tusi olotou igoa i te lagi, “ne faka‵fonu a Iesu ne te Agaga Tapu ki te fiafia, kae fai ake: ‘Toku Tamana, te Aliki o te lagi mo te lalolagi! Au e fakafetai atu ki a koe, i te mea ko fakaasi ne koe ki tino seki akoakogina, a mea kolā ne ‵funa ne koe mai tino ‵poto mo tino kolā ne a‵koga.’ ”—Luka 10:17-21.
5. Kaia ne seki manatu mā‵mā ei a soko o Iesu ki muna‵tonu o te Malo kolā ne fakaasi atu ki a latou?
5 I te otiga ne fai tena ‵talo mai tena ‵kanoloto, ne mafuli atu a Iesu ki ana soko kae fai atu: “Amutia mata kolā e ‵kilo ki mea kolā e lavea ne koutou. Au e muna atu ki a koutou, me e tokouke pelofeta mo tupu ne ma‵nako o lavea a mea ko ‵kilo nei koutou ki ei, kae ne seki mafai ne latou, kae ne fia faka‵logo foki ki mea ko lagona nei ne koutou, kae ne seki mafai ne latou.” E tonu, ne fakamalosi atu a Iesu ki ana soko fakamaoni ke mo a ma manatu mā‵mā ki muna‵tonu o te Malo kolā ko fakaasi atu ki a latou. Ne seki fakaasi atu a muna‵tonu konei ki kautupu o tavini a te Atua i aso mua, kae ne seki fakaasi atu foki ki “tino ‵poto mo tino kolā ne a‵koga” i aso o Iesu!—Luka 10:23, 24.
6, 7. (a) Ne a pogai e maua ne tatou ke fakaasi atu te loto fakafetai ki muna‵tonu mai te Atua? (e) Se a te ‵kese e matea atu i aso nei i te vā o te tapuakiga tonu mo lotu ‵se?
6 Ko uke atu a pogai i ‵tou aso nei ke maua ei ne tatou te loto fakafetai ki muna‵tonu mai te Atua, me ko oti ne fai ne Ieova, e auala i “te tavini fakamaoni kae poto” ke malamalama faka‵lei ana tino i tena Muna. (Mataio 24:45; Tanielu 12:10) E uiga ki te taimi o te gataga, ne tusi mai te pelofeta ko Tanielu: “E tokouke a tino ka ua‵lolo atu, kae ka salalau valevale te munatonu.” (Tanielu 12:4, NW) E mata, e se talitonu koe me ko oti ne “salalau valevale te munatonu” a te Atua i aso nei kae ko ma‵kona valevale a tavini a Ieova i te feitu faka-te-agaga?
7 Ko tafaga te ‵kese o mea e matea ne tatou i te vā o te maumea faka-te-agaga o tino o te Atua mo te ‵numi i mea tau tapuakiga o Papelonia te Sili! Ona ko te mea tenā, e tokouke a tino kolā ko fanoa‵noa io me e takalia‵lia ki lotu ‵se ko ‵fuli mai ki te tapuakiga tonu. A latou konei ko tino pelā me ne mamoe kolā ‘e se ma‵nako ke ‵kau atu latou ki agasala [a Papelonia te Sili] mo tena fakasalaga.’ E ‵kami ne Ieova mo ana tavini a tino penā ki loto i te fakapotopotoga Kelisiano tonu.—Fakaasiga 18:2-4; 22:17.
E Ua‵lolo Atu a Tino Loto Fakafetai ki te Atua
8, 9. E fakataunu pefea a pati i te Hakai 2:7 i aso nei?
8 E uiga ki tena fale tapuaki faka-te-agaga, ne ‵valo mai a Ieova: “Ka fakatakavale ne au a malo katoa, ka ko olotou koloa tāua ka laku mai ki konei ke faka‵fonu ei te Faletapu.” (Hakai 2:7) Ne fakataunu te valoaga fakaofoofogia tenei i taimi o Hakai i te ‵toe faka‵fokiatuga o se ‵toega o tino o te Atua ke toe fakatu ne latou te faletapu i Ielusalema. I aso nei, e fakataunu foki a pati a Hakai e uiga ki te faletapu sili faka-te-agaga o Ieova.
9 Ko oti ne ua‵lolo atu te fia miliona o tino ki te faletapu fakatusa tenei ko te mea ke tapuaki atu latou ki te Atua “i te agaga mo te fakamaoni io me ko te munatonu,” kae i tausaga takitasi e lau i selau afe a “koloa tāua” o atufenua e ua‵lolo atu faeloa ki loto i ei. (Ioane 4:23, 24) E pelā mo te mea e fakaasi mai i te lipoti i te lalolagi kātoa o te tausaga faka-te-taviniga i te 2006, e ‵tusa mo te toko 248,327 ne papatiso e fakamailoga ei te lotou tuku atu ki a Ieova. E ‵pau te mea tenā mo se aofaki masani e toko 680 o tino ‵fou i aso takitasi! E fakatalitonu mai ne te lotou a‵lofa ki te munatonu mo te lotou fia tavini atu ki a Ieova e pelā me ne tino talai o te Malo me ne filifili latou ne te Atua.—Ioane 6:44, 65.
10, 11. Fakamatala mai se tala e uiga ki te auala ne kamata ei o fia‵fia a tino ki te munatonu mai te Tusi Tapu.
10 Ne ‵saga mai a tino loto fakamaoni e tokouke konei ki te munatonu me ne matea ne latou “te mea ka tupu ki tino amio ‵tonu mo te mea ka tupu ki tino ma‵sei; pelā foki ki te tino e tavini mai ki a au mo te tino e se fia tavini mai ki a au.” (Malaki 3:18) Mafaufau la ki te tala o Wayne mo Virginia, se tauavaga kolā ne ‵lotu i se lotu Polotesano kae kolā ne uke a lā fesili ne seki maua ne tali ki ei. Ne takalia‵lia laua ki taua kae ne ‵numi laua i te mateaatuga o se faifeau e fakamanuia ne ia a sotia mo meatau. I te taimi e gasolo aka ei laua o ma‵tua, kae ko se fia ‵saga atu foki a nisi tino ‵lotu ki a laua, e tiga ko oti ne akoako atu a Virginia i akoga Aso Tapu i se fia o tausaga. “Ne seki ai se tino ne āsi mai ki a maua io me fakaasi mai sena amanaia ki te ma tulaga faka-te-agaga,” ko lā pati. “A te mea fua e tasi ne manako ki ei te lotu ko ma tupe. Ne ‵numi maua i ei.” Ne ‵numi malosi laua i te taliaga ne te lotu a amioga fakasotoma.
11 I te vaitaimi tenā ne fai a te mokopuna fafine o Wayne mo Virginia mo fai se Molimau a Ieova kae fakamuli ifo ko tena mātua telā ko te lā tama fafine. E tiga eiloa ne ita a Wayne mo Virginia e uiga ki te mea tenā i te taimi muamua, ne ‵fuli lā mafaufauga fakamuli kae ne talia ke fai se lā akoga faka-te-Tusi Tapu. “I se tolu masina fua,” ko pati a Wayne, “ne tauloto ne maua a mea e uke e uiga ki te Tusi Tapu i lō mea kolā ne iloa ne maua i tausaga e silia atu i te 70! Ne seki iloa lele ne maua i te igoa o te Atua ko Ieova, kae e seai lele eiloa se ma mea e iloa e uiga ki te Malo mo te Palataiso i te lalolagi.” Ne seki leva kae kamata o ‵kau atu te tauavaga fakamaoni tenei ki fakatasiga faka-Kelisiano e pelā foki mo te galuega talai. “E ma‵nako maua o fakaasi atu te mea tonu ki nisi tino,” ko pati a Virginia. Ne papatiso laua i te 2005 a ko taki 80 ei a lā tausaga. “Ko maua nei ne maua se fakapotopotoga o Kelisiano ‵tonu,” ko lā pati.
Ke Loto Fakafetai ki Fakatokaga ke Fai “so se Galuega ‵Lei”
12. Se a te mea e tuku mai faeloa ne Ieova ki ana tavini, kae se a te mea e ‵tau o fai ne tatou mō te ‵tou ‵lei?
12 E fesoasoani faeloa a Ieova ki ana tavini i te faiga o tena loto. E pelā mo te avatuga ki a Noa a fakatonuga likiliki e uiga ki te fouga o te vaka—se galuega telā ne ‵tau o tonu ‵kisi tena faiga i te taimi muamua eiloa! Kae ne penā eiloa. Kaia? Ona ko te mea “ne fai eiloa ne Noa a mea katoa kolā ne fakatonu atu ne te Atua” ke fai ne ia. (Kenese 6:14-22) E penā foki i aso nei, e fakatoka ne Ieova ana tavini ke fai ne latou tena loto. E tonu, a te ‵toe galuega tāua a tatou ko te talai atu o te tala ‵lei e uiga ki te Malo o te Atua telā ko oti ne fakatu aka, mo te fesoasoani atu ki tino loto ‵lei ke fai mo fai ne soko o Iesu Keliso. Kae e pelā eiloa mo Noa, a te ‵tou manuia i te feitu tenā e fakalagolago eiloa ki te ‵tou faka‵logo. E ‵tau o tau‵tali tatou mo te faka‵logo ki fakatonuga a Ieova kolā e tuku mai e auala i tena Muna mo tena fakapotopotoga.—Mataio 24:14; 28:19, 20.
13. Ne a mea e tuku mai ne Ieova ke fakamasani ei tatou?
13 Ke fakataunu te galuega tenā, e ‵tau o ‘iloa’ ne tatou o fakaaogā faka‵lei te ‵toe mea faigaluega tāua—ko te Muna a te Atua—telā e “aogā ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei, ko te mea, ko te tino telā e tavini ki te Atua, ke maua ne ia te fakamaoniga, ke lava tena uta e fai ei ne ia so se galuega ‵lei.” (2 Timoteo 2:15; 3:16, 17) E pelā eiloa mo te senitenali muamua, e tuku mai ne Ieova ki a tatou a fakamasaniga tāua e auala i te fakapotopotoga Kelisiano. I aso nei, i fakapotopotoga e 99,770 i te lalolagi kātoa, e fai i ei a te Akoga mō Tino Talai mo te Fakatasiga mō te Galuega Talai i vaiaso katoa ke fesoasoani mai ki a tatou i te faiga o te galuega talai. E mata, e fakaasi atu ne koe se loto fakafetai mō fakatasiga tāua konei mai te kau atu faeloa ki ei mo te fakaaogāga o mea e tauloto ne koe mai i ei?—Epelu 10:24, 25.
14. E fakaasi mai pefea ne tavini a Ieova a te lotou loto fakafetai mō te lotou tauliaga ke tavini atu ki te Atua? (Ke aofia a manatu kolā e fakasolo mai i itulau e 29-32.)
14 Ona ko te lotou ga‵lue malosi i te galuega talai, ko fakaasi mai ne te fia miliona o tino o te Atua i te lalolagi kātoa a te lotou loto fakafetai mō akoakoga e maua ne latou. E pelā mo te tausaga faka-te-taviniga i te 2006, ne fakamāumāu ne tino talai o te Malo e toko 6,741,444 a itula e 1,333,966,199 i vaega katoa o te galuega, e aofia i ei te faiga o akoga faka-te-Tusi Tapu e 6,286,618. Konei a nāi mea fakamalosi loto kolā e maua i te lipoti mō te lalolagi kātoa. E ‵kami atu koutou ke onoono faka‵lei ki te lipoti tenei kae ke maua a fakamalosiga mai i ei, e pelā eiloa mo fakamalosiga kolā ne maua ne ‵tou taina i te senitenali muamaua mai i lipoti e uiga ki te fakalauefaatuga o te galuega talai i te taimi tenā.—Galuega 1:15; 2:5-11, 41, 47; 4:4; 6:7.
15. Kaia e se ‵tau ei o loto vāivāi se tino e uiga ki tena taviniga ki a Ieova mo te loto kātoa?
15 A te lasi o te leo o tavaega telā e fanaka ki te Atua i tausaga takitasi e fakaasi mai i ei te ‵poko o te loto fakafetai telā e maua ne tavini a Ieova mō te tauliaga ke iloa ne latou a Ieova mo te molimau atu e uiga ki a ia. (Isaia 43:10) E tonu, e mafai o fakatusa a taulaga o tavaega kolā e ofo atu ne ‵tou nisi taina ma‵tua, ma‵saki, io me se katoatoa ki te meaalofa a te fafine ko mate tena avaga. Kae ke mo a ma puli i a tatou me e fia‵fia tonu eiloa a Ieova mo tena Tama ki tino katoa kolā e tavini atu ki a ia mo te loto kātoa, i te fai ne latou o te ‵toe mea e mafai o fai.—Luka 21:1-4; Kalatia 6:4.
16. Ne a mea faigaluega mō te faiga o akoakoga ko oti ne tuku mai ne te Atua i taimi fakamuli nei?
16 I tafa o fakamasaniga o tatou mō te galuega talai, e fakatoka tatou ne Ieova e auala i tena fakapotopotoga, ke maua a toe mea aogā i te faiga o akoakoga. E aofia i ei a tusi konei, The Truth That Leads to Eternal Life, Ke Ola Koe Ki Te Se-Gata-Mai I Te Lalolagi Palataiso, Te Iloaga Telā e Takitaki Atu ei ki te Ola Se-Gata-Mai kae fakamuli nei, ko te Ne a Mea e Akoako ‵Tonu Mai i te Tusi Tapu? A tino kolā e matea ne latou te tāua o fakatokaga konei e fakaaogā faka‵lei ne latou i te galuega talai.
Ke Fakaaogā Faka‵lei te Tusi ko te Akoakoga a te Tusi Tapu
17, 18. (a) Ne a vaega o te tusi ko te Akoakoga a te Tusi Tapu e manako koe o faka‵mafa atu i te galuega talai? (e) Se a te mea ne matea ne se toeaina āsiasi e uiga ki te tusi ko te Akoakoga a te Tusi Tapu?
17 Mai ana mataupu e 19, te fakamatalaga likiliki o mataupu fakaopoopo, mo te ‵gana manino kae faigofie telā e fakaaogā i ei, ko fai nei te tusi ko te Ne a Mea e Akoako ‵Tonu Mai i te Tusi Tapu? mo fai se fakamanuiaga lasi i te galuega talai. E pelā mo te mataupu e 12 telā e faipati i ei ki te mataupu ko “Te Vaegā Olaga Telā e Fiafia ki ei te Atua.” E fakamatala atu i te mataupu tenei ki te tino akoga a te auala e mafai ei o fai a ia e pelā me se taugasoa o te Atua, se mea telā ne seki mafaufau aka eiloa ki ei a tino e tokouke me e mafai o tupu. (Iakopo 2:23) E ‵saga mai pefea a tino ki te fesoasoani faka-te-Tusi Tapu tenei?
18 E lipoti mai se toeaina āsiasi i Ausetalia me e fai ne te tusi ko te Akoakoga a te Tusi Tapu “ke ‵saga fakavave mai a tino i te fale o fai se sau‵talaga.” Ne toe fai mai tou tagata me ko oko eiloa i te faigofie te fakaaogāga o te tusi tenei kae ko “fakamalosi atu ei ki tino talai e tokouke o te Malo ke fia‵fia ki te galuega talai. E se tioa eiloa o fakaigoa te tusi tenei ne nisi tino ki se koloa aulo!”
19-21. Fakamatala mai ne tala kolā e faka‵mafa mai i ei a te aogā o te tusi ko te Akoakoga a te Tusi Tapu.
19 “Kāti a koe ne uga mai eiloa ne te Atua,” ko pati a se fafine i Guyana ki se paenia i te mataloa o tena fale. Ne fatoā ‵sola keatea te avaga fakapouliuli a te fafine tenei kae tiakina atu a ia mo lā tama‵liki fo‵liki e tokolua. Ne ‵suke te paenia ki te mataupu muamua o te tusi ko te Akoakoga a te Tusi Tapu kae faitau atu ki luga te palakalafa e 11, mai lalo i te ulutala foliki “E Pefea a Lagonaga o te Atua ki Faifaiga sē Fakamaoni Kolā e Fe‵paki mo Tatou?” “Ne otia malosi te fafine i manatu i ei,” ko pati a te paenia. “Ne tu a ia ki luga, fano ki te koga mai tua i tena sitoa, kae ne tagi mautuutu i ei.” Ne talia ne te fafine tenei se akoga faka-te-Tusi Tapu fakatasi mo se tuagane i te koga tenā kae e tumau eiloa i te gasolo ki mua.
20 Ne mate te avaga a José, telā e nofo i Sepania, i se fakalavelave i te auala. Ne ‵sala atu a ia ki se fakamafanafanaga i te fakaaogāga o vailakau tapu, e pelā foki mo fesoasoani mai tino fakatonutonu. Kae ne seki maua se tali mai tino fakatonutonu ki te fesili telā ne logo‵mae malosi i ei a José: “Kaia ne talia ei ne te Atua a taku avaga ke mate?” I te aso e tasi, ne fetaui a José mo Francesc, telā e galue foki i te kamupane tenā. Ne fai atu te manatu o Francesc ke sau‵tala laua ki te mataupu e 11 o te tusi ko te Akoakoga a te Tusi Tapu, telā e fakaulutala penei: “Kaia e Talia ei ne te Atua a Logo‵maega?” Ne otia malosi a José i fakamatalaga mai te Tusi Tapu mo te fakatusa e uiga ki se faiakoga mo se tamaliki akoga. Ne kamata o sukesuke malosi tou tagata, kau atu ki se tamā fono, kae ko kau atu nei ki fakatasiga i te Kingdom Hall i te koga tenā.
21 A Roman, se tagata faipisinisi i Polani telā ko 40 ana tausaga, ne āva faeloa ki te Muna a te Atua. Kae ona ko tena fakalavelave i ana galuega, ne gasolo malie fua a ia ki mua i tena sukesukega faka-te-Tusi Tapu. E tiga te feitu tenā, ne kau atu a ia ki se fono lasi kae maua ei tena kopi i te tusi ko te Akoakoga a te Tusi Tapu. Fakamuli ifo, ne gasolo ei a ia ki mua. “Mai te tusi tenei,” ko ana pati, “e maua i ei a akoakoga fakavae katoa faka-te-Tusi Tapu kolā kafai ko tuku fakatasi ko maua i ei te ata saukātoa o mea katoa i ei.” Ko sukesuke faeloa nei a Roman ki te Tusi Tapu kae ko gasolo foki ki mua.
Ke Fakatumau te Gasolo ki Mua o Tou Loto Fakafetai
22, 23. E mafai pefea o fakaasi atu faeloa ne tatou te ‵tou loto fakafetai mō te fakamoemoega tenei e takato i ‵tou mua?
22 E pelā mo fakamatalaga i te Fono Lasi “Ko Pili Mai ‵Tou Fakaolataga!” e olioli eiloa a Kelisiano ‵tonu ki te “fakaolataga se-gata-mai” telā ne folafola mai ne te Atua kae ka fakataunu e auala i te toto maligi o Iesu Keliso. E seai se isi auala e ‵lei atu ke fakaasi atu ei te lasi o te ‵tou loto fakafetai mō te fakamoemoega tāua tenei i lō te tumau o tatou i te ‵ma “mai galuega ma‵sei, ko te mea ke tavini atu tatou ki te Atua ola.”—Epelu 9:12, 14.
23 E tonu, ona ko te tumau o te ono miliona tupu o tino talai o te Malo i te kufaki mo te fakamaoni i te lotou taviniga ki te Atua, i te taimi eiloa tenei, telā e lasi malosi ei te fakamalosiga ke saga atu te tino ki a ia eiloa, e fai eiloa te mea tenā mo fai se vavega. E fai foki te mea tenā mo fai se fakamaoniga me e ‵poko te loto fakafetai o tavini a Ieova e uiga ki te lotou tauliaga ke tavini atu ki te Atua, me e iloa ne latou “me se mafai o māumāu [olotou] galuega i te Aliki.” Ke mo a eiloa ma fakagata te gasolo ki mua o te loto fakafetai tenā!—1 Kolinito 15:58; Salamo 110:3.
Ka Tali Mai Koe Pefea?
• Se a te mea e akoako mai ne te faisalamo ki a tatou e uiga ki te loto fakafetai ki te Atua mō ana fakatokaga faka-te-agaga?
• E fakataunu pefea a pati i te Hakai 2:7 i aso nei?
• Ne fakatoka pefea ne Ieova ana tavini ko te mea ke magoi te lotou taviniga ki a ia?
• Ne a mea e mafai ne koe o fai ke fakaasi atu ei tou loto fakafetai mō te aga‵lei o Ieova?
[Fakamatalaga o te Ata i te itulau e 27]
E fakatoka katoatoa tatou ne Ieova ke fai ne tatou tena loto
[Fakamatalaga o te Ata i te itulau e 27]
Ne a mea e akoako ‵tonu mai i te Tusi Tapu?