A Ieova se Atua Loto Fakafetai
“Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mō ia.”—EPELU 6:10.
1. Ne fakaasi atu pefea ne Ieova a tena loto fakafetai mō te fafine Moapi ko Luta?
E FAKATĀUA malosi ne Ieova a taumafaiga a latou kolā e ‵saga tonu o fai tena loto, kae e lasi te taui e tuku ne ia mō latou. (Epelu 11:6) Ne masani a te tagata fakamaoni ko Poasa mo te uiga gali tenei o te Atua, me ne fai atu a ia ki te fafine Moapi ko Luta, telā ne tausi atu mo te alofa ki te mātua o tena avaga: “Ke taui atu ne te Aliki ki a koe e ‵tusa mo au galuega alofa ne fai. Ke maua ne koe se taui katoatoa mai te Aliki te Atua o Isalaelu.” (Luta 2:12) E mata, ne fakamanuia a Luta ne te Atua? Ao! Ne fakamau tena tala i loto i te Tusi Tapu! E se gata i ei, ne avaga laua mo Poasa kae ne fai a ia mo fai se tupuna o te tupu ko Tavita mo Iesu Keliso. (Luta 4:13, 17; Mataio 1:5, 6, 16) A te mea tenā se fakaakoakoga fua e tasi mai mea e uke i te Tusi Tapu telā e fakaasi mai i ei a te loto fakafetai o Ieova mō ana tavini.
2, 3. (a) Se a te mea e fai ei te fakaasi mai o te loto fakafetai o Ieova mo fai se mea fakaofoofogia? (e) Kaia e mafai ei ne Ieova o fakaasi mai te loto fakafetai tonu? Fakamatala mai.
2 E iloa ne Ieova me ka se amiotonu a ia māfai e se fakaasi atu ne ia te loto fakafetai. E fai mai te Epelu 6:10: “Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mō ia e auala i otou galuega alofa kolā ne fai mō otou taina kelisiano, kae koi fai nei eiloa ne koutou.” A te mea telā e fakaofoofogia ei te mea tenei, ko te fakaasimaiga ne te Atua a tena loto fakafetai ki tino loto finafinau, e tiga eiloa a latou ne tino agasala kae ‵mao foki keatea mai tena tulaga ‵malu.—Loma 3:23.
3 Ona ko ‵tou tulaga se ‵lei katoatoa, e mafai o mafau‵fau tatou me e se tāua te ‵tou taviniga kae e se ‵tau foki o maua ne tatou a fakamanuiaga a te Atua. Kae e iloa ‵lei ne Ieova a ‵tou lagonaga mo ‵tou fakanofonofoga, kae e fakatāua eiloa ne ia te ‵tou taviniga telā e fai atu mo te loto kātoa. (Mataio 22:37) Ke fai se fakatusa: E maua ne se mātua se meaalofa—se malele e se na lo ko ‵togi ‵mafa—i luga i te taipola. Ne kilo atu a ia ki te meaalofa tenā e pelā me e se aogā malosi kae ‵pei ne ia keatea. Kae i se tamā pepa telā ne tuku tasi mai mo te meaalofa tenā, e fakaasi mai i ei me ne aumai te meaalofa tenā mai tena tamaliki fafine foliki, telā ne fakamāumāu ana tupe katoa ne tausi ke ‵togi ei te mea tenā. Ne ‵fuli ei te kilokiloga a te mātua ki te meaalofa tenei. Kāti ne ‵sai atu a ia ki tena tamaliki mo ana loimata e ma‵ligi, kae fakaasi atu te ‵poko o tena loto fakafetai.
4, 5. Ne fakaakoako atu pefea a Iesu ki a Ieova i te fakaasiatuga o te loto fakafetai?
4 Ona ko te katoatoa o tena iloa i ‵tou lagonaga mo ‵tou tapulā, e fiafia eiloa a Ieova māfai e tuku atu ne tatou ki a ia a toe mea ‵lei, faitalia me e mu‵tana io me e uke. I te feitu tenei, ne fai ei a Iesu mo fai se ata ‵lei katoatoa o tena Tamana. Onoono ki te tala i te Tusi Tapu e uiga ki te fafine ko mate tena avaga. “Ne kilokilo sāle a Iesu, lavea ei ne ia a tino maumea ko lafo olotou taulaga ki loto i te koga e ‵teu ei a tupe, kae ne lavea atu foki ne ia te fafine mativa e tokotasi ko mate tena avaga, ko lafo ki ei a tupe fo‵liki e lua. Ne fai atu a ia: ‘E tonu, au e fai atu ki a koutou, ko mea a te fafine mativa tenei ko mate tena avaga ne lafo ki ei, ko sili atu eiloa i a latou katoa; me ne lafo atu olotou taulaga mai olotou koloa e uke, ka ko te fafine tenei, ne lafo atu katoa ana koloa e ola ei a ia.’ ”—Luka 21:1-4.
5 E tonu, ona ko tena iloa i te tulaga o te fafine tenei—se fafine ko mate tena avaga kae mativa—ne malamalama a Iesu i te aogā tonu o tena meaalofa, kae ne otia tena loto i ei. E mafai foki o fai atu penā e uiga ki a Ieova. (Ioane 14:9) E mata, e se fakamalosi mai ke iloa atu me faitalia ou fakanofonofoga, e talia eiloa koe ne te Atua loto fakafetai e pelā foki mo tena Tama?
Te Taui a Ieova ki te Aitiope Telā ne Mataku ki te Atua
6, 7. Kaia kae ne fakaasi atu pefea ne Ieova a tena loto fakafetai ki a Epetimeleka?
6 E fakaasi mai faeloa i te Tusi Tapu i taimi e uke a te loto fakafetai o Ieova ki a latou kolā e fai ne latou tena loto. Mafaufau ki ana faifaiga ki te Aitiope ko Epetimeleka telā ne mataku ki te Atua, i aso o Ielemia, kae se tavini i te palesi o te tupu se fakamaoni o Iuta ko Setekaia. Ne iloa ne Epetimeleka me ne ‵losi ‵se atu a pelenise o Iuta e uiga ki te pelofeta ko Ielemia kae ‵pei ne latou a ia ki loto i se vaikeli, e aunoa mo ne meakai ke mate i ei. (Ielemia 38:1-7) Ona ko tena iloa me ne takalia‵lia malosi a tino ki a Ielemia ona ko te fekau ne talai atu ne ia, ne tu ei a Epetimeleka i se tulaga fakamataku i te lipotiga ne ia o te mea tenā ki te tupu. Ne faipati atu a te Aitiope tenei mo te loto toa: “Tou ‵Malu, a te mea ne fai ne tāgata konei e se ‵lei. Ne tuku ne latou a Ielemia ki loto i se vaikeli ke mate i te fiakai, me ko seai ne meakai i te fakai.” Mai te fakatonuga a te tupu, ne puke ne Epetimeleka e toko 30 tāgata kae ne fakasao ne latou te pelofeta a te Atua.—Ielemia 38:8-13.
7 Ne matea ne Ieova a te malosi o te fakatuanaki o Epetimeleka, telā ne fesoasoani atu ke manumalo a ia i te mataku. Tela la, ne fakaasi atu ei ne Ieova a tena loto fakafetai kae fai atu ki a Epetimeleka e auala i a Ielemia: “Ka aumai ne au a te malaia ki te fakai tenei kae se ko te maumea . . . Ka ko au, te Aliki, ka puipui ne au a koe, kae ka se tuku atu koe ki tino kolā e mataku koe ki ei. Ka tausi fakalei ne au a koe, . . . Ka fakasao tou ola ona ko koe e fakatuaga mai ki a au.” (Ielemia 39:16-18) E tonu, ne faka‵sao eiloa ne Ieova a Epetimeleka, e pelā foki mo Ielemia, mai i pelenise amio matagā o Iuta kae fakamuli ifo mai te kau Papelonia, kolā ne fakasolofa ne latou a Ielusalema. “A te Aliki [ko Ieova] e alofa ki tino kolā e takalia‵lia ki amioga ma‵sei; kae ‵pui ne ia a ola o ana tino, e faka‵sao ne ia latou mai te malosi o tino amio ma‵sei,” ko pati i te Salamo 97:10.
‘Te Otou Tamana Telā e Kilo Atu Mai i se Koga se Lavea ka Taui Atu ki a Koutou’
8, 9. E pelā mo te mea ne fakaasi mai ne Iesu, ne a vaegā ‵talo e talia ne te Atua?
8 A te suā fakamaoniga o te fakatāua ne Ieova a ‵tou taviniga mo te loto finafinau e lavea atu i pati i te Tusi Tapu e uiga ki te faiga o ‵talo. “A te Aliki e fiafia manafai e ‵talo atu a tino amio ‵lei ki a ia,” ko pati a te tino poto. (Faataoto 15:8) I aso o Iesu, ne ‵talo atu a takitaki lotu i mua o tino tokouke, kae e se mai i olotou lagonaga ‵tonu, kae ko te mea fua ke ofo a tino. “E maua ne latou te lotou taui,” ko pati a Iesu. “Kafai e ‵talo koe, ulu ki loto i tou potu, ‵pono te mataloa; ko fai ei tau ‵talo ki tou Tamana telā e i te koga se lavea; ka ko tou Tamana telā e lavea ne ia koe i te koga se lavea, e avatu foki ne ia a te taui ki a koe.”—Mataio 6:5, 6.
9 Ne seki taku fakamasei ne Iesu a te faiga o ‵talo i koga e tokouke ei a tino, me ne fai foki ne ia te mea tenā i nisi taimi. (Luka 9:16) E fiafia malosi eiloa a Ieova māfai e ‵talo atu tatou ki a ia mai ‵tou ‵kanoloto, e aunoa mo te faiga o nisi tino ke ofo. A ‵tou ‵talo totino se fakasiga tenā o te ‵poko o te ‵tou a‵lofa ki te Atua mo te ‵tou tali‵tonu ki a ia. Tela la, e se ‵poi tatou me ne ‵sala atu eiloa a Iesu ki koga kolā e mafai o fai i ei ana ‵talo totino. I te taimi e tasi, ne fai ne ia te mea tenā “i te vaveao o te suā aso.” A ko te suā taimi, “ne fanake ei a ia ki te mauga o ‵talo.” Kae mai mua o filifili ne ia ana apositolo e toko 12, ne fakamāumāu ne Iesu te po kātoa o ‵talo i a ia tokotasi eiloa.—Maleko 1:35; Mataio 14:23; Luka 6:12, 13.
10. Kafai e fakaasi atu i ‵tou ‵talo a te fakamaoni mo te ‵poko o ‵tou lagonaga, se a te mea e mafai o mautinoa i a tatou?
10 Mafaufau ki te auala ne saga atu ei a Ieova ki te ‵talo mai te ‵kanoloto o tena Tama! E tonu, i nisi taimi “ne ‵talo kae fakatagi mo loimata [a Iesu] ki te Atua,” kae “ne lagona ei ne te Atua tona leo.” (Epelu 5:7; Luka 22:41-44) Kafai e fakaasi atu i ‵tou ‵talo a lagonaga ‵poko penā, e mafai o tali‵tonu tatou me e fakalogologo tonu mai mo te loto fakafetai a te ‵tou Tamana i te lagi. E tonu, “e pili faeloa a [Ieova] ki a latou kolā e ka‵laga atu ki a ia, kolā e ka‵laga ki ei mo te loto fakamaoni.”—Salamo 145:18.
11. E pefea a lagonaga o Ieova ki mea kolā e fai ne tatou i a tatou eiloa?
11 Kafai e fiafia a Ieova māfai e ‵talo atu tatou ki a ia i a tatou eiloa, e pefea la te lasi o tena fiafia māfai e faka‵logo tatou ki a ia kae seai ne tino e matea ne latou! E tonu, e iloa ne Ieova a mea a tatou e fai i a tatou eiloa. (1 Petelu 3:12) E tonu, a te ‵tou fakamaoni māfai e ‵nofo tatou i a tatou eiloa se fakasiga ‵lei tenā o te “loto kātoa” ki a Ieova, ko te tino telā e ‵mā ana lagonaga kae tu mautakitaki i te faiga o te mea tonu. (1 Nofoaiga Tupu 28:9) E fai ne vaegā amioga penā ke fiafia te loto o Ieova!—Faataoto 27:11; 1 Ioane 3:22.
12, 13. E mafai pefea o puipui ne tatou a ‵tou mafaufau mo ‵tou loto kae fai pelā mo te soko fakamaoni ko Natanielu?
12 E penā foki te puipui ne Kelisiano fakamaoni a latou mai i agasala fai ‵funa kolā e fakamasei ne latou te mafaufau mo te loto, e pelā mo te onoono ki ata o amioga ma‵sei mo amioga fakasauā. E tiga eiloa e mafai o ‵funa a nisi agasala mai tino, e iloa ne tatou me i mea katoa “e fakaasi kae tuku faka‵sau eiloa i ona mata, ko ia foki e ‵tau o avatu ki ei ne tatou a tala e uiga mō tatou.” (Epelu 4:13; Luka 8:17) Mai te taumafai o ‵kalo keatea mai mea kolā e se fakafiafia ki ei a Ieova, e maua ne tatou se loto lagona ‵ma kae fia‵fia foki ke iloa atu me e maua ne tatou te taliaga a te Atua. E tonu, e seai se fakalotolotolua me fiafia tonu a Ieova ki “te tino telā e fai ne ia mea katoa e loto ki ei te Atua, kae fai faeloa ne ia a mea ‵tonu, kae faipati ki muna ‵tonu mo te alofa.”—Salamo 15:1, 2.
13 E mafai la pefea o puipui ne tatou a ‵tou mafaufau mo ‵tou loto i loto i se lalolagi telā e ‵fonu i mea ma‵sei? (Faataoto 4:23; Efeso 2:2) I tafa o te fakaaogā katoatoa ne tatou a fakatokaga faka-te-agaga, e ‵tau o fakapelele ‵tou mafi o ‵teke keatea a mea ma‵sei kae fai a mea ‵lei, kae fai fakavave a mea konā ke mo a ma faitama a manakoga ma‵sei i loto i a tatou ko fanau mai ei te agasala. (Iakopo 1:14, 15) Mafaufau ki te lasi o tou fiafia moi ne fai atu a pati a Iesu kolā ne fai e uiga ki a Natanielu: “Kiloke, tenei eiloa te tinā Isalaelu tonu; e seai sona masei!” (Ioane 1:47) A Natanielu, telā ne fakaigoa foki ki a Patolomaio, ne maua ne ia te tauliga fakamuli ke fai mo fai se tokotasi o apositolo e toko 12 a Iesu.—Maleko 3:16-19.
Se ‘Faitaulaga Pule e Alofa Fakamagalo Kae Fakamaoni’
14. E ‵kese pefea a te saga atu o Iesu ki te mea a Malia ne fai māfai e faka‵tusa ki nisi tino?
14 Ona ko ia “ko te fakatusa o te Atua telā e se matea ki mata” ko Ieova, e tautali katoatoa atu a Iesu ki tena Tamana i te fakaasiatuga o te loto fakafetai ki a latou kolā e tavini atu ki te Atua mai i olotou ‵kanoloto ‵ma. (Kolose 1:15) E pelā mo te lima o aso a koituai o tuku atu tena ola, ne fai a Iesu mo nisi o ana soko mo fai ne tino ‵kami i te fale o Simona i Petania. I te afiafi tenā, ne puke ne Malia, te taina o Maleta mo te tuagane o Lasalo “te pauna kātoa o te sinu manogi ‵togi ‵mafa” (kāti e ‵pau mo te ‵togi o se tino i te tausaga), ‵ligi ei ne ia ki vae mo te ulu o Iesu. (Ioane 12:3) “Ai a ko fakamāumāu ei a te mea tenā?” ko pati a nisi soko. Kae ne ‵kese ‵ki te kilokiloga a Iesu e uiga ki te mea a Malia ne fai. Ne kilo atu a ia ki ei e pelā me se faiga lasi o te kaimalie kae e tāua ‵ki ona ko tena mate mo tena tanuga. Tela la, i lō te taku fakamasei ne ia a Malia, ne tavae ne Iesu a ia. Ana muna, “so se koga e folafola atu ki ei a te tala ‵lei i te lalolagi, e fai mo fakamanatuga ki tino a tena mea ne fai.”—Mataio 26:6-13.
15, 16. E aogā pefea ki a tatou a te faiga o Iesu mo fai se tino o tavini atu ki te Atua?
15 Ko tafaga la te lasi o te ‵tou tauliaga ke fai se vaegā tino loto fakafetai penei mo Iesu mo fai te ‵tou Takitaki! E tonu, ne fai te olaga o Iesu e pelā me se tagata ke fakatoka ei a ia mō te galuega telā ne tausi ne Ieova ke fai ne ia—ko te tavini atu e pelā me se Faitaulaga Sili mo te Tupu, muamua la ki te fakapotopotoga o tino fakaekegina kae fakamuli ki te lalolagi kātoa.—Kolose 1:13; Epelu 7:26; Fakaasiga 11:15.
16 A koituai o vau ki te lalolagi, ko leva ne lasi te fiafia o Iesu ki tino. (Faataoto 8:31) Mai tena faiga mo fai se tino, ne malamalama malosi a ia i tofotofoga e fe‵paki mo tatou i ‵tou taviniga ki te Atua. Ne tusi mai te apositolo ko Paulo: “E ‵tau mo [Iesu] o fai ke pelā mo ona taina i mea katoa, ko te mea ke fai a ia mo olotou faitaulaga pule e alofa kae fakamaoni . . . Kae nei la, ko mafai ne ia o fesoasoani ki a latou kolā e fakaosoosogina, me i a ia ne fakaosoosogina kae puapuagātia foki.” E malamalama a Iesu i ‘‵tou vāivāiga’ me “ne fakaosoosogina e pelā eiloa mo tatou, kae ne seki agasala la a ia.”—Epelu 2:17, 18; 4:15, 16.
17, 18. (a) Se a te mea e fakaasi mai i tusi ki fakapotopotoga e fitu i Asia Foliki e uiga ki te ‵loto o te malamalama o Iesu? (e) Se a te mea ne fakatoka ki ei a Kelisiano fakaekegina?
17 Ne lavea atu a te ‵loto o te malamalama o Iesu e uiga ki tofotofoga e fe‵paki mo ana soko mai tua o tena toe fakatumaiga. Ke mafaufau ki ana tusi ki fakapotopotoga e fitu i Asia Foliki, kolā ne tusi ne te apositolo ko Ioane. Ne fai atu a Iesu ki te fakapotopotoga i Semulana: “E iloa ne au ou puapuagā; e iloa foki ne au i a koe e mativa.” Ne fai atu eiloa a Iesu i konei me e ‘malamalamala ‵lei au i otou fakalavelave; e iloa ‵lei ne au a mea kolā e fe‵paki mo koutou.’ Ona ko tena alofa fakatasi mo te malosi pule telā ne maua ne ia ona ko ana logo‵maega ke oko ki te mate, ne toe fai mai a Iesu: “Fakamaoni eiloa ke oko ki te mate, ko tuku atu ei ne au ki a koe a te foualiki o te ola.”—Fakaasiga 2:8-10.
18 E ‵fonu ana tusi ki fakapotopotoga e fitu i fakamatalaga kolā e fakaasi mai i ei a te iloa ‵lei ne Iesu a mea faiga‵ta e fe‵paki mo ana soko mo tena loto fakafetai tonu mō te lotou ola i te fakamaoni. (Fakaasiga 2:1–3:22) Ke masaua me ne faipati a Iesu ki Kelisiano fakaekegina kolā e fakamoe‵moe ke pule fakatasi latou mo ia i te lagi. E pelā mo te lotou Aliki, e fakatokagina latou mō te lotou galuega tāua ko te fesoasoani o fakagalue mo te alofa lasi a mea aogā mai te taulaga togiola a Keliso ki tino se ‵lei katoatoa.—Fakaasiga 5:9, 10; 22:1-5.
19, 20. E fakaasi atu pefea ne latou kolā e aofia i te “vaitino tokouke” te lotou loto fakafetai ki a Ieova mo tena Tama?
19 E tonu, a te alofa o Iesu mō ana soko fakaekegina e tuku atu foki ki ana ‘nisi mamoe’ fakamaoni e lau i miliona kolā ko aofia nei i “te vaitino tokouke . . . mai fenua katoa,” kae kolā ka “‵sao i te fakasauaga lasi.” (Ioane 10:16; Fakaasiga 7:9, 14) E ua‵lolo atu a tino konei ki te feitu o Iesu ona ko te lotou loto fakafetai ki tena taulaga togiola mo te lotou fakamoemoega ke ola ki te se-gata-mai. E fakaasi atu pefea ne latou te lotou loto fakafetai? E fai latou penā mai te “tavini atu ki [te Atua] i te ao mo te po.”—Fakaasiga 7:15-17.
20 E tuku mai i te lipoti i te lalolagi kātoa mō te tausaga faka-te-taviniga ko te 2006, itulau e 27 ki te 30, se fakamaoniga manino me tavini atu eiloa a faifeau fakamaoni konei ki a Ieova “i te ao mo te po.” E tonu, i te tausaga e tasi tenā, ne fakamāumāu ne latou fakatasi mo se potukau foliki o Kelisiano fakaekegina se aofaki o itula e 1,333,966,199 i te galuega talai—e ‵pau mo tausaga e silia atu i te 150,000!
Tumau i te Fakaasiatuga o te Loto Fakafetai!
21, 22. (a) E uiga ki te fakaasiatuga o te loto fakafetai, kaia e ‵tau ei o fakaeteete a Kelisiano maise eiloa i aso nei? (e) Ne a mea ka sau‵tala ki ei i te suā mataupu?
21 I lā faifaiga ki tino se ‵lei katoatoa, ko oti ne fakaasi mai ne Ieova mo tena Tama, te ‵poko mo te lasi o te lā loto fakafetai. Kae se mea fakafanoanoa me e se fia ‵saga atu a te tokoukega o tino ki te Atua, kae e ‵saga atu eiloa ki olotou manakoga. I tena fakamatalaga e uiga ki tino kolā e ola “i aso fakaoti,” ne tusi mai a Paulo: “Ko tino ka ma‵natu fakapito, kaima‵nako ki tupe . . . ka seai lele se loto fakafetai.” (2 Timoteo 3:1-5, Phillips) Ko tafaga te ‵kese o tino penā mai Kelisiano ‵tonu, kolā e auala i olotou ‵talo mai te ‵kanoloto, te lotou faka‵logo mo te lotou taviniga mo te loto kātoa e fakaasi atu ei te lotou loto fakafetai mō mea kolā ko oti ne fai ne te Atua mō latou!—Salamo 62:8; Maleko 12:30; 1 Ioane 5:3.
22 I te suā mataupu, ka onoono tatou ki nisi fakatokaga faka-te-agaga kolā ko oti ne tuku mai ne Ieova mo te alofa ki a tatou. I te ‵tou mafau‵fau ki ‘meaalofa ‵gali’ konei, ka gasolo aka ei o ‵poko malosi atu te ‵tou loto fakafetai.—Iakopo 1:17.
Ka Tali Mai Koe Pefea?
• Ne fakaasi mai pefea ne Ieova i a ia se Atua loto fakafetai?
• Kafai e ‵nofo tatou i a tatou eiloa, e mafai pefea o fai ne tatou te loto o Ieova ke fiafia?
• I auala fea ne fakaasi atu ei ne Iesu te loto fakafetai?
• Ne fesoasoani atu pefea te olaga o Iesu e pelā me se tino, ke fai a ia mo fai se pule alofa kae loto fakafetai?
[Fakamatalaga o te Ata i te itulau e 20]
E pelā me se mātua telā e fiafia ki faifaiga alofa a tena tama, e fiafia a Ieova māfai e fai ne tatou te toe mea e mafai o fai