Te Lasi o te Logo‵mae Telā e se Mafai o Gata

NE FAI fakamuli nei ne se tagata se sukesukega ki lagonaga o tino kolā e fanoa‵noa i te galo atu o se tino pele i te mate i se taimi tai leva mai tua ifo i ei. Ne lafo atu ne ia se fakasologa o fesili ki se aofaki o mātua kolā ne ‵mate olotou tama‵liki i tausaga ko ‵teka atu. Ne seki tali atu a mātua katoa ki ei. Ne fai mai se tamana e igoa ki a Vladimir, telā ne galo atu tena tama tagata i te lima tausaga ko ‵teka, me koi faigatā eiloa ke faipati a ia e uiga ki tena tama.a

E pokotia eiloa a mātua fanoa‵noa i te vaegā fanoanoa tenā. I te sefulu tausaga ko ‵teka, ne mate ei te tamaliki tagata a Viliamu ako 18 ana tausaga me ne malemu i te tai, kae ne tusi mai a Viliamu, “Koi logo‵mae eiloa au i te mate o taku tama, kae ka logo‵mae eiloa au i toku olaga kātoa.” I te lima tausaga mai tua o te matega o tena tama tagata i se masaki seki fakamoemoegina, ne tusi mai a Lucy: “I nāi aso mai tua malie ifo o te fakalavelave tenā, ne tumau eiloa au i te mafaufau penei, ‘E se mafai eiloa o tonu te mea tenā.’ Ne mafaufau au me e moemiti masei fua au kae ko pili o ala aka. E seki leva kae kamata o iloa aka ne au me se mea tonu eiloa, ko se toe foki mai tou tagata ki te fale. Ko kātoa nei te lima tausaga ne mate atu ei taku tama, kae i nisi taimi, kafai ko nofo tokotasi au, koi tagi au e uiga ki a ia.”

Kaia e logo‵mae malosi ei a mātua pelā mo Vladimir, Viliamu, mo Lucy i se vaegā logo‵mae telā e se mafai o gata? Ke na mafau‵fau nei tatou ki nisi pogai.

Kaia e Fanoa‵noa Malosi ei?

Kafai ko fanau mai se pepe ki loto i se kāiga, e maua eiloa ne mātua a lagonaga kolā e se mafai o maua i nisi tino. A te puke atu fua ki te lā pepe, te onoono atu i te taimi e moe ei, io me ko te lavea atu o tena fakamisikata mai e maua ei ne laua se fiafia mo te lotomalie lasi. E fakatāua malosi eiloa ne mātua a‵lofa olotou tama‵liki. E akoako faka‵lei ne latou olotou tama‵liki ke ‵lei olotou amioga kae ke āva foki. (1 Tesalonia 2:​7, 11) I te taimi e gasolo aka ei o ‵tupu aka a tama‵liki e ‵tusa mo lā taumafaiga, e fakamata‵mata a mātua kae e gasolo o uke atu olotou fakamoemoega mō latou.

E ga‵lue ma‵losi a mātua atafai ke tausi atu ki olotou tama‵liki. Kāti e ‵teu aka faeloa ne latou a tupe io me ko nisi kope ko te mea ke mafai o fesoasoani atu ki olotou tama‵liki i te taimi ko kamata ei o fai olotou kāiga. (2 Kolinito 12:14) E fakasino atu eiloa te fakamāumāuga lasi tenei i feitu tau lagonaga, taimi, taumafaiga, mo tupe ki te manatu tonu e tasi tenei​​—⁠e puti aka ne mātua olotou tama‵liki ke ola, kae ke se ‵mate. Kafai ko mate se tamaliki, ko se fakaoti faka‵lei aka ei te galuega o tena putiakaga, kae ko fakasēaogā foki ei a fakamoemoega o mātua mō te tamaliki tenā. Ko fakagata atu foki i ei a te alofa mo te atafai o te mātua ki te tamaliki, telā ko ‵pono ne te ‵pui fatu ko te mate. Ko seai foki se tino e mafai o fakaasi atu ne latou ki ei te lotou loto a‵lofa. Ko maua eiloa ne mātua a te fanoanoa lasi telā e se faigofie o fakagata.

E fakatalitonu mai ne te Tusi Tapu me e maua ne mātua fanoa‵noa a te logo‵mae telā e tumau faeloa. I te fakamatalaga e uiga ki te mea ne tupu i te taimi ne lagona ei ne te toeaina mua ko Iakopo me ko oti ne tamate tena tama ko Iosefa, e fai mai te Tusi Tapu: “Ne saesae ne Iakopo ona gatu i te fanoanoa kae pei ki gatu lautaga. Ne tagi fanoanoa a ia mō tena tama i se taimi leva eiloa. Ne o‵mai katoa ana tama tāgata mo tama fāfine o faka‵lei tena loto, kae ne seki talia ne ia ke o‵mai o fakamafanafana a ia, muna a ia, ‘Au e tagi fanoanoa faeloa, ke oko foki eiloa ki te taimi e fanaifo ei au ki te lalolagi o tino ‵mate.’ ” Ne tumau eiloa a Iakopo i te fanoanoa, i te fia o tausaga mai tua ifo i ei, e uiga ki tena tama telā ne mafaufau a ia me ko mate. (Kenese 37:​34, 35; 42:​36-​38) A te suā fakaakoakoga i te Tusi Tapu ne aofia i ei se fafine fakamaoni e igoa ki a Naomi telā ne ola mai tua o te ‵matega o ana tama tāgata e tokolua. Ona ko te lasi o tena fanoanoa, ne manako ei tou fafine ke ‵fuli tena igoa mai i a Naomi, telā e fakauiga ki “Toku Matafiafia,” ki a Mala, telā e fakauiga ki “Te Logo‵mae.”​​—⁠Luta 1:​3-5, 20, 21, te fakamatalaga fakaopoopo, NW.

Kae e uke atu a mea e aofia i te Tusi Tapu i lō te fakaasimaiga fua o te fanoanoa telā e maua ne mātua. E fakaasi mai foki i ei te auala e tuku atu ei ne Ieova te malosi ki tino kolā e fanoa‵noa. I te suā mataupu, ka mafau‵fau tatou ki nisi auala kolā e tuku mai i ei ne te Atua a te fakamafanafanaga ki tino kolā e fanoa‵noa.

[Fakamatalaga mai lalo]