Te ‵Sala Atu ki “Fuafuaga ‵Loto a te Atua”
“A te Agaga e fakaasi io me ‵sala ne ia a mea katoa, e oko foki eiloa ki fuafuaga ‵loto a te Atua.”—1 KOLINITO 2:10.
1. Ne a nisi muna‵tonu mai te Tusi Tapu kolā e fakafiafia atu ki tino ‵fou kolā e fai olotou a‵koga i ei?
E MAFAI o masaua ne te tokoukega o tatou i loto i te fakapotopotoga Kelisiano a te fiafia telā ne maua i te taimi ne iloa muamua ei ne tatou te munatonu. Ne iloa ne tatou te pogai e tāua ei te igoa o Ieova, te pogai e talia ei ne ia a logo‵maega, te pogai e olo atu ei a nisi tino ki te lagi, mo te fakamoemoega mō tino fakamaoni katoa i aso mai mua. Kāti ne suke‵suke muamua tatou ki te Tusi Tapu, kae ne ‵funa aka a mea konā mai i a tatou, e pelā eiloa mo te tokoukega o tino. E fai eiloa tatou e pelā me se tino telā e ‵pula faka‵toka atu ana mata ki se akau i lalo i te tai. E aunoa mo matauku, e lavea fua ne ia ne nāi mea mai mea ‵gali katoa i lalo i te tai. Kae mai te fakaaogāga o matauku io me se pōti telā e fakakilasi tena takele, ka ofo masei ei a ia ke lavea atu i te taimi muamua a kamu lanu kese‵kese, ika, manu o te tai kolā e foliga pelā me ne pulalakau mo nisi mea ola fakaofoofogina. E penā foki māfai ne kamata o fesoasoani mai se tino ke malamalama tatou i te Tusi Tapu, ko te taimi muamua e ‵kilo atu ei tatou ki “fuafuaga ‵loto a te Atua.”—1 Kolinito 2:8-10.
2. Kaia e se mafai ei o gata te fiafia mai te suke‵suke ki te Muna a te Atua?
2 E mata, e ‵tau o lotoma‵lie tatou ki ne nāi mumea fua e iloa ne tatou e uiga ki muna‵tonu mai te Tusi Tapu? A te tugāpati “fuafuaga ‵loto a te Atua” e aofia i ei te malamalama e uiga ki te poto o te Atua telā e fakaasi atu ki Kelisiano e auala i te agaga tapu kae telā ne ‵funa mai nisi tino. (1 Kolinito 2:7) E seai se tapulā ki te poto o te Atua telā e mafai o sukesuke ki ei ke maua ne tatou se fiafia lasi! E se mafai lele o iloa ne tatou a mea katoa e uiga ki te poto i auala o te Atua. E mafai eiloa o tumau a te fiafia ne maua ne tatou i te taimi muamua ne iloa ei ne tatou a akoakoga fakavae mai i te Tusi Tapu, māfai e tumau tatou e aunoa mo te ‵fiu i te ‵sala atu ki “fuafuaga ‵loto a te Atua.”
3. Kaia e ‵tau ei o maua ne tatou se malamalama katoatoa e uiga ki pogai o ‵tou talitonuga?
3 Kaia e ‵tau ei o malamalama tatou i “fuafuaga ‵loto” konā? E se gata fua i te ‵tou malamalama i mea kolā e tali‵tonu tatou ki ei kae e pelā foki mo te pogai e tali‵tonu ei tatou—ko pogai fakavae o ‵tou talitonuga—e fakamalosi aka ei te ‵tou fakatuanaki mo te ‵tou loto talitonu. E fai mai te Tusi Tapu ke fakaaogā te ‘malosi o ‵tou mafaufau’ ke “fakatalitonu aka ne [tatou] me se a te loto o te Atua, te mea ‵lei, te mea e logomalie mo te gali.” (Loma 12:1, 2) A te malamalama i te pogai e fai mai ei a Ieova ke ola tatou i se vaegā olaga, e fakamalosi aka ei te ‵tou fakaikuga ke faka‵logo ki a ia. Tela la, a te ‵tou iloa i “fuafuaga ‵loto,” e mafai o maua ei ne tatou te malosi o ‵teke atu a fakaosoosoga ke aofia i amioga ma‵sei kae ke “finafinau foki o fai te ‵lei.”—Tito 2:14.
4. Ne a mea e aofia i te faiga o sukesukega ki te Tusi Tapu?
4 Ko te mea ke malamalama i fuafuaga ‵loto e manakogina ke fai a sukesukega. Kae ko te faiga o sukesukega e se ‵pau mo te faitau fua. E aofia i ei te iloilo faka‵lei aka o fakamatalaga ke lavea atu a te auala e fetaui ei a mea konā mo mea kolā ko oti ne iloa ne tatou. (2 Timoteo 1:13) E aofia i ei a te malamalama i pogai kolā e ‵lago atu ki fakamatalaga konā. E ‵tau o aofia i sukesukega faka-te-Tusi Tapu, a te mafaufau ‵loto ki auala e mafai ei o fakagalue ne tatou a ‵tou mea e tauloto i te faiga o fakaikuga ‵poto mo te fesoasoani atu ki nisi tino. E se gata i ei, ona ko “Tusitusiga Tapu katoa ne aumai mai te Atua, kae aogā,” e ‵tau o aofia i ‵tou sukesukega a “muna katoa kolā e ‵to mai i te gutu o te Atua.” (2 Timoteo 3:16, 17; Mataio 4:4) E mafai o faigata te faiga o sukesukega ki te Tusi Tapu! Kae e mafai foki o fakafiafia, kae ko te malamalama i “fuafuaga ‵loto a te Atua” e se na lo ko faigata.
E Fesoasoani a Ieova ki Tino Loto Maulalo ke Malamalama
5. Ko oi e mafai o malamalama i “fuafuaga ‵loto a te Atua”?
5 E tiga eiloa ne seki poto malosi koe i te akoga kae e se masani ki te faiga o sukesukega, e se ‵tau o fakaiku aka ne koe me e se mafai o iloa ne koe a “fuafuaga ‵loto a te Atua.” I te taimi ne fai ei te galuega a Iesu i te lalolagi, ne fakaasi atu ne Ieova a Tena fuafuaga, e se ki tino ‵poto, kae ki tino e seki a‵koga kae ma‵lalo kolā ne lava te lotou loto maulalo ke akoako latou ne te tavini a te Atua. Ne foliga mai latou e pelā me ne pepe māfai e faka‵tusa ki tino kolā ne a‵koga. (Mataio 11:25; Galuega 4:13) E uiga ki “mea tonu . . . ne fuafuagina ne te Atua mō latou kolā e a‵lofa ki a ia,” ne tusi atu te apositolo ko Paulo ki ana taina tali‵tonu: “Ka ko tatou tonu eiloa ne fakaasi ki ei ne te Atua, ke iloa ne tatou ana mea ‵funa e alatu i tena Agaga. A te Agaga e fakaasi io me ‵sala ne ia a mea katoa, e oko foki eiloa ki fuafuaga ‵loto a te Atua.”—1 Kolinito 2:9, 10.
6. Se a te mea e fakauiga ki ei te 1 Kolinito 2:10?
6 E ‵sala atu pefea a te agaga o te Atua ki “mea katoa, e oko foki eiloa ki fuafuaga ‵loto a te Atua”? I lō te tuku atu ne ia ki Kelisiano taki tokotasi a fakaasiga kese‵kese, e fakaaogā ne Ieova a tena agaga ke takitaki ei tena fakapotopotoga, telā e fai ne ia ke malamalama i te Tusi Tapu a tino o te Atua kolā e ‵kau fakatasi. (Galuega 20:28; Efeso 4:3-6) E maua ne fakapotopotoga katoa i te lalolagi kātoa se polokalame e tai ‵pau o sukesukega ki te Tusi Tapu. E suke‵suke latou ki akoakoga mai te Tusi Tapu kātoa i se fia tausaga. E galue te agaga tapu e auala i te fakapotopotoga o fesoasoani atu ke fakagalue ne tino te kilokiloga telā e manakogina ke malamalama ei i “fuafuaga ‵loto a te Atua.”—Galuega 5:32.
Mea e Aofia i “Fuafuaga ‵Loto a te Atua”
7. Kaia e se malamalama ei a tino e tokouke i “fuafuaga ‵loto a te Atua”?
7 E se ‵tau o mafau‵fau tatou me e faigata o malamalama i “fuafuaga ‵loto.” A te malamalama i “fuafuaga ‵loto a te Atua” e ‵funa mai i te tokoukega o tino, e se ona ko te faigata ke malamalama i te poto o te Atua, kae ona ko te mea e takitaki ‵se ne Satani a tino ke ‵teke atu ki te fesoasoani o Ieova telā e tuku mai e auala i Tena fakapotopotoga.—2 Kolinito 4:3, 4.
8. Ne a fuafuaga ‵loto ne fakasino atu ki ei a Paulo i te tolu o mataupu o tena tusi ki te kau Efeso?
8 A te tolu o mataupu o te tusi a Paulo ki te kau Efeso e fakaasi mai i ei me i “fuafuaga ‵loto a te Atua” e aofia i ei a muna‵tonu e uke kolā e malamalama ‵lei i ei a te tokoukega o tino o Ieova, e pelā mo te iloaga e uiga ki te Fanau o te folafolaga, te filifiliga o tino kolā e fakamoe‵moe ke ola i te lagi, mo te Malo faka-Mesia. Ne tusi mai a Paulo: “Ne seki taku atu ki tino a mea ‵funa konei i taimi ko ‵teka, kae nei ko oti ne fakaasi ne te Atua ki apositolo ‵malu mo pelofeta e alatu i tona Agaga. Tenei la te mea ‵funa: e fakatasi tino o fenua fakaa‵tea mo tino Iutaia i fakamanuiaga a te Atua ona ko te tala ‵lei; e fai foki latou mo tino o te foitino e tasi, kae aofia foki i te folafolaga a te Atua ne fai e alatu i a Keliso Iesu.” Ne fai mai a Paulo me ko oti ne tofigina a ia “ke fai foki ke iloa ne tino katoa a te faifaiga o te fuafuaga ‵funa a te Atua . . . ne ‵funa eiloa ne ia tena fuafuaga ‵funa i kautama katoa ko ‵teka atu.”—Efeso 3:5-9.
9. Kaia e fai ei pelā me se tauliaga lasi ke malamalama i “fuafuaga ‵loto a te Atua”?
9 Ne toe fakamatala ne Paulo a te loto o te Atua “ke fakailoa atu ne te ekalesia i aso nei, a te poto o te Atua i ona vaega kese‵kese, ke iloa tonu ne pule o agelu mo malosi faka te lagi.” (Efeso 3:10) E maua ne agelu a mea aogā mai te onoono atu kae malamalama i faifaiga ‵poto a Ieova ki te fakapotopotoga Kelisiano. Mafaga o tauliaga lasi ke mafai o malamalama tatou i mea kolā e fia iloa foki ne agelu! (1 Petelu 1:10-12) Ne toe fai mai a Paulo, me e ‵tau o kausaki atu ke “iai fakatasi i a koutou mo tino katoa o te Atua, a te ‵mana e iloa tonu ei te lauefa, te loa, te maluga mo te ‵poko” o te talitonuga faka-Kelisiano. (Efeso 3:11, 18) Ke na mafaufau tatou ki nisi fakaakoakoga o fuafuaga ‵loto kolā e mafai o fakalauefa aka i ei te ‵tou malamalama.
Fakaakoakoga o Fuafuaga ‵Loto
10, 11. E ‵tusa mo pati i te Tusi Tapu, ko te taimi fea ne fai ei a Iesu e pelā me ko te vaega tāua a te “fanau” a te “fafine” faka-te-lagi a te Atua?
10 E iloa ne tatou me i a Iesu ko te vaega tāua o te “fanau” a te “fafine” a te Atua i te lagi telā e fakasino atu ki ei te Kenese 3:15. Ke fakalauefa aka te ‵tou malamalama, e mafai o fesili ifo tatou: ‘Ko te taimi fea ne fai ei a Iesu mo fai te Fanau telā ne folafola mai? E mata, ne fai penā mai mua o vau ki te lalolagi, i te taimi ne fanau mai ei e pelā me se tino, i te taimi ne papatiso ei, io me ko te taimi ne fakatu aka ei mai te mate?’
11 Ne folafola mai te Atua me i te vaega faka-te-lagi o tena fakapotopotoga, telā ne fakasino atu ki ei i valoaga me ko tena “fafine,” ka tuku mai ne ia se fanau telā ka tuki pala ne ia a te ulu o te gata. Kae ne ‵teka atu te fia tausaga, kae ne seki ai eiloa se fanau a te fafine a te Atua ne tuku mai ke fakaseai ne ia a Satani mo ana galuega. Tela la, ne fakaigoa ei a ia i te valoaga a Isaia ki “se fafine seai sena fanau” kae “fanoanoa.” (Isaia 54:1, 5, 6) Fakamuli loa, ne fanau mai ei a Iesu i Peteleema. Kae, mai tua fua o tena papatisoga, i te taimi ne fakaekegina ei a ia ki te agaga ke fai mo tama faka-te-agaga a te Atua, ne fakailoa atu ei ne Ieova, penei: “Tenei eiloa taku Tama fagasele.” (Mataio 3:17; Ioane 3:3) Ne fatoā sae mai ei i konei a te vaega tāua o te “fanau” a te fafine. Fakamuli ifo, ne fakaekegina foki a soko o Iesu ki te agaga tapu. Ne mafai ei ne te “fafine” a Ieova, telā ko leva ne fai pelā me se “fafine seai sena fanau,” o “kalaga mo te fiafia.”—Isaia 54:1; Kalatia 3:29.
12, 13. Ne a fuaiupu i te Tusi Tapu e fakaasi mai i ei me e aofia i “te tavini fakamaoni kae poto” a Kelisiano fakaekegina katoa i te lalolagi?
12 A te lua o fakaakoakoga o fuafuaga ‵loto kolā ko oti ne fakaasi mai ki a tatou, e fakasino eiloa ki te fuafuaga a te Atua ke filifili aka se toko 144,000 mai tino i te lalolagi. (Fakaasiga 14:1, 4) E talia ne tatou te akoakoga me e aofia a tino fakaekegina katoa kolā e ‵nofo i te lalolagi i so se taimi i “te tavini fakamaoni kae poto,” telā ne fai mai a Iesu me ka fakasoa mai ne ia a “meakai” mō ana nisi tavini i te taimi tonu. (Mataio 24:45) Ne a fuaiupu mai te Tusi Tapu e fakamaoni mai i ei me e tonu te talitonuga tenei? E mata, ne fakasino atu fua a Iesu ki so se Kelisiano telā e fakamalosi aka ne ia ana taina ki meakai faka-te-agaga?
13 Ne fai atu a te Atua ki te fenua o Isalaelu: “Koutou ko aku molimau; ne filifili ne au koutou ke fai mo [taku] tavini.” (Isaia 43:10) Kae, i a Nisani 11 i te tausaga e 33 T.A., ne fai atu ei a Iesu ki takitaki o Isalaelu me ko se toe talia ne te Atua te lotou fenua ke fai mo fai Tena tavini. Ne fai atu a ia: “I te Malo o te Atua e ave keatea mai i a koutou, kae tuku atu ki se fenua telā e fakaasi mai i ei ne fua ‵lei.” Ne fai atu a Iesu ki te vaitino: “Nei la, e maofa valevale te otou fenua.” (Mataio 21:43; 23:38) E pelā me se tavini a Ieova, ne seki fakamaoni io me ne ‵poto a te kau Isalaelu. (Isaia 29:13, 14) Fakamuli ifo, i te aso eiloa tenā, i te taimi ne fesili ei a Iesu, penei: “Ko oi te tavini fakamaoni kae poto?” a te tonuga loa, ne fesili atu a ia, ‘Ko oi te fenua poto ka sui ne ia a Isalaelu ke fai mo fai te tavini fakamaoni a te Atua?’ Ne tuku atu ne te apositolo ko Petelu a te tali i te taimi ne fai atu ei a ia ki te fakapotopotoga o Kelisiano fakaekegina: “A koutou . . . ko te fenua tapu, ko tino tonu o te Atua.” (1 Petelu 1:4; 2:9) A te fenua faka-te-agaga tenā, ko “te Isalaelu a te Atua,” ne fai mo fai te tavini fou a Ieova. (Kalatia 6:16) E pelā eiloa mo tino Isalaelu katoa i aso mua kolā ne fai pelā me ko te “tavini” e tokotasi, e fai foki a Kelisiano fakaekegina katoa i te lalolagi i so se taimi mo fai te “tavini fakamaoni kae poto” e tokotasi. Ma‵faga o tauliaga gali mō tatou ke maua ‵tou “meakai” e auala i te tavini a te Atua tenei!
E Mafai o Fia‵fia ki te Faiga o Sukesukega Totino
14. Kaia e maua ei te fiafia mai te sukesuke ki te Tusi Tapu, i lō te faitau fua ki ei?
14 Kafai ko fakaasi mai se mainaga fou mai te Tusi Tapu, e mata, e se fia‵fia tatou ona ko te fakamalosi mai o te mea tenā ki te ‵tou fakatuanaki? Tenā eiloa te pogai e fakafiafia malosi atu ei te faiga o sukesukega totino ki te Tusi Tapu, i lō te faitau fua ki ei. Tela la, kafai e faitau koe ki tusi faka-Kelisiano, ke fesili ifo ki a koe eiloa: ‘E fetaui pefea a te fakamatalaga tenei mo mea kolā ko maina au i ei e uiga ki te mataupu tenei? Ne a nisi fuaiupu mai te Tusi Tapu io me ko nisi manatu e mafai o mafaufau au ki ei kolā e mafai o ‵lago atu ki fakamatalaga kolā e fakaasi mai i te mataupu tenei?’ Kafai e manakogina ke fai ne nisi sukesukega, ke tusi ki lalo te fesili telā e manako koe ke maua se tali ki ei, kae ke fai mo fai te suā mataupu ke sukesuke ki ei fakamuli.
15. Ne a mataupu mō sukesukega e mafai o fakafiafia atu, kae e mafai pefea o tumau te lotou aogā?
15 Ne a mataupu mō sukesukega kolā ka fakafiafia atu ke maua ei se mainaga fou? Ko mataupu pelā mo te sukesuke ‵loto ki feagaiga kese‵kese kolā ne aofia i ei te Atua mō te ‵lei o tino katoa, e fakalasi aka ei te malamalama. E mafai o fakamalosi aka tou fakatuanaki mai te sukesuke ki valoaga kolā e fakasino atu ki a Iesu Keliso io me ko te mafaufau ‵loto ki fuaiupu takitasi o se tusi fakavaloaga i te Tusi Tapu. Kae penā foki loa māfai e toe onoono koe ki tala e uiga ki Molimau a Ieova i aso nei, mai te fakaaogāga o te tusi ko te Jehovah’s Witnesses—Proclaimers of God’s Kingdom, māfai ko oti ne ‵fuli te tusi tenā ki tau ‵gana.a E pelā foki mo te toe onoono ki “Fesili Mai te Kau Fai‵tau” i lomiga o Te Faleleoleo Maluga, ka fai i ei ke momea aka tou malamalama i nisi fuaiupu mai te Tusi Tapu. Ke mafaufau faka‵lei ki pogai faka-te-Tusi Tapu kolā ne fakaaogā ke maua ei a fakamatalaga ki mataupu konā. Ka fesoasoani atu a te mea tenei ke mafai o ‘iloa ne koe te mea ‵lei mai te mea masei’ kae ke ati aka foki i ei te poto. (Epelu 5:14) I te taimi e fai ei au sukesukega, ke tusi ne fakamatalaga toe‵toe i loto i tau ‵kopi totino o te Tusi Tapu io me i se pepa, ko te mea ke tumau te aogā o au sukesukega ki a koe eiloa mo tino kolā e mafai o fesoasoani atu koe ki ei.
Fesoasoani Atu ki Tama‵liki ke Fia‵fia o Sukesuke ki te Tusi Tapu
16. E mafai pefea o fesoasoani atu koe ke fia‵fia a tama‵liki ki sukesukega faka-te-Tusi Tapu?
16 E uke a mea e mafai o fai ne mātua ke fakamalosi aka ei te fia‵fia ki mea faka-te-agaga i olotou tama‵liki. Ke se manatu māmā ki te mafai ne tama‵liki o malamalama i fuafuaga ‵loto. Kafai e tuku atu ne koe se mataupu ke sukesuke ki ei a tama‵liki mō se sukesukega faka-te-kāiga ki te Tusi Tapu, e mafai o fesili atu koe ki a latou e uiga ki olotou mea ne tauloto. E mafai foki o aofia i te akoga faka-te-kāiga a te faiga o fakaakoakoga ke fesoasoani atu ei ke iloa ne latou o ‵pulu olotou talitonuga, kae fakatalitonu atu me e ‵tonu eiloa a mea kolā ne akoako atu ki a latou. I tafa o mea konā, e mafai o fakaaogā ne koe te tusi ko te “See the Good Land”b ke akoako atu ei a mea e uiga ki kogā koga kolā e fakamatala mai i te Tusi Tapu, kae ke maina atu foki i mea kolā e faitau ki ei i te faitauga faka-te-vaiaso ki te Tusi Tapu.
17. Kaia e ‵tau ei o paleni ‵lei tatou i te faiga o ‵tou sukesukega totino fakaopoopo ki te Tusi Tapu?
17 E mafai eiloa o gali ‵ki a te faiga o sukesukega totino fakaopoopo kae fakamalosi aka foki i ei tou fakatuanaki, kae e ‵tau foki o fakaeteete ke mo a ma fakalavelave atu ki fakatokaga mō fakatasiga a te fakapotopotoga. A fakatasiga se isi auala telā e akoako ei tatou ne Ieova e auala i “te tavini fakamaoni kae poto.” Kae ko te faiga o sukesukega fakaopoopo e mafai o tuku atu ei ne au tali aogā i taimi o fakatasiga—e pelā mo te Akoga i Potukau a te Fakapotopotoga io me ko mea tāua mai te faitauga faka-te-vaiaso ki te Tusi Tapu i te Akoga mō Tino Talai.
18. Kaia e aogā ei a taumafaiga ke sukesuke ki “fuafuaga ‵loto a te Atua”?
18 A sukesukega ‵loto ki te Muna a te Atua e mafai o fesoasoani mai ke sinā fakapilipili atu ei koe ki a Ieova. E uiga ki te tāua o vaegā sukesukega penā, e fai mai te Tusi Tapu: “E mafai ne te poto o fai tou olaga ke tokagamalie, e pelā eiloa mo te mea e mafai ne te tupe o fai. A te poto e tausi ne ia koe ke saogalemū, tenā te mea e aogā ei te poto ki te tino.” (Failauga 7:12) Tela la, a taumafaiga kolā e fai ke faka‵poko aka ei tou malamalama i mea faka-te-agaga e aogā eiloa. E folafola mai te Tusi Tapu e uiga ki tino kolā e tumau i te salasala atu: “Ka manuia eiloa koe i tau taulotoga e uiga ki te Atua.”—Faataoto 2:4, 5.
[Fakamatalaga mai lalo]
a Ne ‵lomi ne Molimau a Ieova.
b Ne ‵lomi ne Molimau a Ieova.
E Mafai o Fakamatala Mai ne Koe?
• Ne a “fuafuaga ‵loto a te Atua”?
• Kaia e se mafai ei o gata te faiga o ‵tou sukesukega ‵loto?
• Kaia e avanoa ei ki Kelisiano katoa a te fiafia telā e maua mai i te malamalama i “fuafuaga ‵loto a te Atua”?
• E mafai pefea o uke atu a mea aogā e maua ne koe mai “fuafuaga ‵loto a te Atua”?