“A Te Agaga E Fakaasi Mai Ne Ia . . . Fuafuaga ‵Loto A Te Atua”

“A te agaga e fakaasi mai ne ia a mea katoa, e oko foki eiloa ki fuafuaga ‵loto a te Atua.”​—1 KOLINITO 2:10.

1. Se a te tusaga o te agaga tapu e fakaasi mai ne Paulo i te 1 Kolinito 2:10, kae ne a fesili e ‵sae aka i ei?

KO OKO eiloa i te ‵tou fia‵fia ki te fesoasoani o te agaga tapu o Ieova! E faipati mai te Tusi Tapu e uiga ki te agaga e pelā me se fesoasoani, se meaalofa, se molimau, mo se tino telā e fautua mō tatou. (Ioane 14:16; Galuega 2:38; Loma 8:16, 26, 27) Ne fakaasi mai ne te apositolo ko Paulo a te suā tusaga tāua o te agaga tapu: “A te agaga e fakaasi mai ne ia a mea katoa, e oko foki eiloa ki fuafuaga ‵loto a te Atua.” (1 Kolinito 2:10) A te ‵tonuga loa, e fakaaoga ne Ieova tena agaga tapu ke fakaasi mai i ei a muna‵tonu faka-te-agaga ‵loto. E aunoa mo te fesoasoani tenei, e pefea te lasi o ‵tou malamalama i fuafuaga a Ieova? (Faitau te 1 Kolinito 2:9-12.) Kae e ‵sae aka ei a nai fesili: E fakaasi mai pefea ne ‘te agaga a fuafuaga ‵loto a te Atua’? Ne fakaasi mai ne Ieova a mea konei i te senitenali muamua e auala i a ai? E fakaasi mai pefea ne te agaga a fuafuaga ‵loto i ‵tou aso nei, kae e auala foki i a ai?

2. Ne a auala e lua e galue ei te agaga?

² Ne fakaasi mai ne Iesu a auala e lua kolā e galue i ei te agaga. Mai tua malie ifo o tena mate, ne fai atu a ia ki ana apositolo: “Ka ko te fesoasoani, ko te agaga tapu tenā, ka uga mai ne te Tamana e alatu mai i toku igoa, o akoako atu ki a koutou i mea katoa; e fakamasaua atu foki a mea katoa kolā ko oti ne fai atu ne au ki a koutou.” (Ioane 14:26) Ka gasuesue eiloa a te agaga tapu e pelā me se faiakoga mo se tino fakamasaua. E pelā me se faiakoga, ka fesoasoani atu ki Kelisiano ke malamalama i mea kolā ne seki malamalama muamua latou i ei. E pelā me se tino fakamasaua, ka fesoasoani atu ki a latou ke toe masaua kae fakagalue aka i se auala tonu a mea ko oti ne fakamatala atu ki a latou.

I te Senitenali Muamua

3. Ne a pati ne taku mai ne Iesu me i “fuafuaga ‵loto a te Atua” ka fakaasi malielie mai?

³ Ne akoako atu eiloa ne Iesu ki ana soko a muna‵tonu e uke kolā e ‵fou ki a latou. Kae koi uke eiloa a mea e ‵tau o tauloto ne latou. Ne fai atu a Iesu ki te kau apositolo: “E uke a mea koi fia faipati ne au ki a koutou, kae se mafai nei ne koutou o tauloto i otou mafaufau. Kae kafai e oko mai te agaga o te munatonu, ka takitaki ne ia koutou ki munatonu katoa.” (Ioane 16:12, 13) Ne fakaasi mai ne Iesu me e auala i te agaga tapu, ka fakaasi malielie mai ei a mea ‵loto i te feitu faka-te-agaga.

4. I te aso o te Penitekoso i te 33 T.A., ne gasuesue pefea a te agaga tapu e pelā me se faiakoga mo se tino fakamasaua?

⁴ I te aso o te Penitekoso i te 33 T.A., ne oko atu ei a “te agaga o te munatonu,” telā ne ‵ligi atu ki Kelisiano e toko 120 kolā ne maopoopo fakatasi i Ielusalema. Ne isi eiloa ne fakamaoniga matea kae mafai foki o fakalogo‵logo ki ei. (Galuega 1:4, 5, 15; 2:1-4) Ne fai‵pati a soko ki ‵gana kese‵kese e uiga “ki galuega fakaofoofogia a te Atua.” (Galuega 2:5-11) Ko oko nei ki te taimi ke fakaasi mai ei se mea fou. Ne ‵valo mai ne te pelofeta ko Ioelu a te ‵ligiifoga tenei o te agaga tapu. (Ioelu 2:28-32) Ne kilo‵kilo atu a tino maimoa ki te fakataunuga i se auala e seki fakamoemoegina ne latou, kae ne fai ne te apositolo ko Petelu a te takitakiga i te fakamatalaga o te mea tenei ne tupu. (Faitau te Galuega 2:14-18.) Ne gasuesue eiloa te agaga tapu e pelā me se faiakoga i te fakamainaga faka‵lei ki a Petelu me i te mea telā ne tupu ki te kau soko ko te fakataunuga o se valoaga i aso mua. Ne gasuesue foki a te agaga e pelā me se tino fakamasaua, me ne seki siki atu fua ne Petelu a pati a Ioelu kae ko salamo foki e lua a Tavita. (Salamo 16:8-11; 110:1; Galuega 2:25-28, 34, 35) A mea kolā ne lavea kae lagona ne tino katoa ne maopoopo i konā, ne fuafuaga ‵loto eiloa a te Atua.

5, 6. (a) Mai tua o te Penitekoso i te 33 T.A., ne a fesili tāua e uiga ki te feagaiga fou ne ‵tau o tali aka? (e) Ne fakaasi atu ki a ai a mataupu konei, kae ne fai pefea a fakaikuga?

⁵ Koi uke eiloa a mataupu e manakogina ke fakamaina faka‵lei atu ki Kelisiano i te senitenali muamua. E pelā mo fesili e uiga ki te feagaiga fou telā ne kamata i te aso tenā o te Penitekoso. E mata, a te feagaiga fou ne aofia fua i ei a te kau Iutaia mo tino fakaa‵tea kolā ne ‵fuli ki te Lotu Iutaia? E mata, e talia foki a tino mai Fenua Fakaa‵tea ke aofia i ei kae fakaekegina ki te agaga tapu? (Galuega 10:45) E mata, ne ‵tau o pilitome muamua a tagata mai Fenua Fakaa‵tea kae faka‵logo ki te Tulafono a Mose? (Galuega 15:1, 5) Konei la a fesili tāua ‵ki. Ne manakogina te agaga o Ieova ke fakaasi mai ne ia a fuafuaga ‵loto. Kae e galue i a ai a te agaga?

⁶ E auala i taina kolā e fai ne latou te takitakiga e uiga ki mataupu takitasi kolā e ‵tau o mafau‵fau ki ei. A Petelu, Paulo, mo Panapa ne ‵nofo atu i te fono a te potukau pule kae ne fakamatala atu ne latou a faifaiga a Ieova ki tino mai Fenua Fakaa‵tea kolā ne seki pilitome. (Galuega 15:7-12) Ne fai ne te potukau pule se fakaikuga mai te fesoasoani o te Tusi Tapu faka-Epelu mo te agaga tapu mai tua o te iloiloga o te fakamaoniga tenei. Tenā ne fakailoa atu ei ne latou ki fakapotopotoga i se tusi e uiga ki te fakaikuga tenā.​—Faitau te Galuega 15:25-30; 16:4, 5; Efeso 3:5, 6.

7. Ne a auala ne fakaasi mai i ei a muna‵tonu ‵loto?

⁷ Ne fakamaina faka‵lei mai a nisi mataupu e uke e auala i nisi tusitusiga fakaosofia a Ioane, Petelu, Iakopo, mo Paulo. Kae i se taimi mai tua o te otiga ne tusi a te Tusi Tapu faka-Eleni, ne fakagata atu foki ei a meaalofa o te ‵valo fakapelofeta mo te fakaasiga fakavavega o te poto. (1 Kolinito 13:8) E mata, ne tumau eiloa a te agaga i te gasuesue e pelā me se faiakoga mo se tino fakamasaua? E mata, e tumau eiloa a te agaga i te fesoasoani atu ki Kelisiano ke malamalama i fuafuaga ‵loto a te Atua? Ne fakaasi mai i valoaga me e mafai eiloa.

I te Taimi o te Gataga

8, 9. Ko oi ka “maina” mai i ei a te mainaga faka-te-agaga i te taimi o te gataga?

⁸ Ne ‵valo mai se agelu e uiga ki te taimi o te gataga: “A takitaki ‵poto ka maina mai e pelā mo te ‵pula o te lagi. Ka ko tino kolā ne akoako ne latou a tino ki te mea tonu ka maina mai e pelā mo fetu ki te se gata mai. [“Kae ka salalau atu eiloa te malamalama tonu,” NW].” (Tanielu 12:3, 4) Ko oi ka maua ne latou a te poto, kae ko oi foki ka maina mai? Ne fesoasoani mai a Iesu i tena tala fakatusa e uiga ki saito mo mouku. Ne fai mai a ia e uiga ki “te gataga o te lalolagi,” ana muna: “Ka ko tino amio‵tonu, e maina e pelā mo te la i te Malo o te lotou Tamana.” (Mataio 13:39, 43) I tena fakamatalaga, ne fakasino atu a Iesu ki “tino amio‵tonu” e pelā me ko “tino o te Malo,” ko Kelisiano fakaekegina.​—Mataio 13:38.

⁹ E mata, ka “maina” atu a Kelisiano fakaekegina katoa? I se auala tai ‵pau, ao, me i Kelisiano katoa e ‵kau atu ki te galuega talai, te faiga o soko, mo te fakatau fakamalosi o te suā tino ki te suā tino i fakatasiga. E tuku mai ne te kau fakaekegina se fakaakoakoga ‵lei. (Sakalia 8:23) Kae i tafa i ei, ne ‵tau o fakaasi mai a fuafuaga ‵loto i te taimi o te gataga. Ko te valoaga eiloa ne tusi ne Tanielu ne “funa” ke oko ki te taimi tenā. (Tanielu 12:9) E pefea kae e auala foki i a ai e fakaasi mai ei ne te agaga a fuafuaga ‵loto konei?

10. (a) E auala i a ai e fakaasi mai ei ne te agaga a muna‵tonu faka-te-agaga i aso fakaoti konei? (e) Fakamatala mai te auala ne fakamaina faka‵lei mai i ei a muna‵tonu e uiga ki te faletapu faka-te-agaga sili o Ieova.

¹⁰ Kafai ko oko mai te taimi ke fakamaina faka‵lei mai se mataupu faka-te-agaga i ‵tou aso nei, e fesoasoani atu a te agaga tapu ki sui o “te tavini fakamaoni kae poto” i te laumua i te lalolagi kātoa ke iloa aka ei a muna‵tonu ‵loto kolā ne seki malamalama muamua i ei. (Mataio 24:45; 1 Kolinito 2:13) E mafau‵fau faka‵lei te Potukau Pule ki se fakamatalaga telā ne ‵fuli. (Galuega 15:6) A mea kolā e tauloto ne latou, e ‵lomi mai ne latou ke aoga ki tino katoa. (Mataio 10:27) I te gasologa o taimi, kāti e manakogina a nisi fakamatalaga, kae e ‵tau foki o fakamatala atu a mea konei mo te fakamaoni.​—Ke onoono ki te pokisi “Te Auala ne Fakaasi Mai ei ne te Agaga a te Uiga o te Faletapu Faka-te-Agaga.”

Ke Maua a Mea Aoga Mai i Galuega a te Agaga i Aso Nei

11. E maua pefea ne Kelisiano katoa i aso nei a mea aoga mai i galuega a te agaga tapu i te fakaasimaiga o fuafuaga ‵loto a te Atua?

¹¹ E maua ne Kelisiano fakamaoni katoa a mea aoga mai i galuega a te agaga tapu i te fakaasimaiga o fuafuaga ‵loto a te Atua. E pelā mo Kelisiano i te senitenali muamua, i aso nei e suke‵suke tatou ko te mea ke masaua kae fakagalue aka foki a fakamatalaga kolā e fesoasoani mai te agaga tapu ke malamalama tatou i ei. (Luka 12:11, 12) E se manakogina a akoakoga ma‵luga ko te mea ke malamalama tatou i muna‵tonu ‵loto i te feitu faka-te-agaga kolā ko oti ne ‵lomi. (Galuega 4:13) E mafai pefea o momea aka te ‵tou malamalama i fuafuaga ‵loto a te Atua? Mafaufau ki nai manatu fesoasoani.

12. Ko te taimi fea e ‵tau ei o ‵talo atu tatou mō te agaga tapu?

¹² Ke ‵talo atu mō te agaga tapu. A koi tuai o mafaufau ki se mataupu mai i te Tusi Tapu, e ‵tau o akai atu muamua tatou i se ‵talo mō te agaga tapu ke takitaki ei tatou. E tonu eiloa te mea tenei māfai ko ‵nofo taki tokotasi tatou io me e mu‵tana fua te taimi avanoa e maua ne tatou. A te ‵talo atu mo te loto maulalo ka fakafiafia malosi atu ki te loto o te ‵tou Tamana faka-te-lagi. E pelā mo te mea ne fakaasi mai ne Iesu, ka tuku mai eiloa ne Ieova tena agaga tapu māfai e fakamolemole atu tatou mo te loto fakamaoni.​—Luka 11:13.

13, 14. E aoga pefea a te fakatoka faka‵lei ki fakatasiga ke malamalama ‵lei tatou i fuafuaga ‵loto a te Atua?

¹³ Ke fakatoka mō fakatasiga. E maua ne tatou a “meakai i te taimi tonu” e auala i te tavini fakamaoni. E fakataunu ne te “tavini” tena tofiga mai i te tukumaiga o fakamatalaga kolā e fakavae ki te Tusi Tapu mo te fakatokaga o polokalame mō sukesukega mo fakatasiga. E isi ne manatu kolā ko oti ne fakatoka ke mafai ne “taina tali‵tonu” o mafaufau faka‵lei ki nisi fakamatalaga. (1 Petelu 2:17; Kolose 4:16; Iuta 3) E ga‵lue fakatasi tatou mo te agaga tapu māfai e fai ne tatou te ‵toe mea e mafai o fai ke tau‵tali atu ki manatu kolā e tuku mai.​—Fakaasiga 2:29.

¹⁴ Kafai ko fakatoka tatou ki fakatasiga Kelisiano, se mea ‵lei ke ‵suke tatou ki tusi siki i te Tusi Tapu kae taumafai ke iloa a te auala e aoga ei a tusi siki ki te mataupu e suke‵suke ki ei. Ka fai ne te mea tenei ke momea aka te ‵loto o ‵tou malamalama i te Tusi Tapu. (Galuega 17:11, 12) A te ‵suke ki tusi siki e fakatalitonu mai ei me e mafai o fesoasoani mai te agaga tapu ke masaua ne tatou a mea konei. E se gata i ei, kafai e lavea ne tatou te fakamatalaga i te Tusi Tapu, ka fesoasoani mai te agaga tapu ke fakaataata i ‵tou mafaufau a te itulau mo tusi siki e ma‵nako tatou ki ei.

15. Kaia e ‵tau ei o fai‵tau faeloa tatou ki tusi ‵fou, kae e mafai pefea o fai ne tatou a te mea tenei?

¹⁵ Ke faitau faeloa ki tusi ‵fou. E se fakaaoga i ‵tou fakatasiga a nisi mataupu kolā ne ‵lomi aka, kae ne fakatoka ke aoga ki a tatou. Ke oko foki ki ‵tou mekesini kolā e ofo atu ki tino ne fakatoka ke aoga foki ki a tatou. I te lalolagi fai valevale tenei, e masani o faka‵tali tatou ki se tino io me se mea. Kafai e ave sāle ne tatou se tusi telā e seki faitau io me ne faitau fua se vaega i ei, e mafai o fakaaoga ne tatou a avanoaga konei ke faitau ki ei. E fakalogologo faeloa a nisi tino ki DVD’s fakalogologo o ‵tou tusi i te taimi e sa‵sale i ei io me e tele atu i se motoka. Ona ko te mea ne fai faka‵lei a sukesukega ki ei kae ne tusi foki ke fia‵fia ki ei a tino fai‵tau, e fai eiloa ne mataupu katoa konei ke momea aka te ‵tou loto fakafetai ki mea faka-te-agaga.​—Sapakuka 2:2.

16. Se a te mea aoga e maua mai i te fakamau mo te iloilo ne tatou a fesili kolā e ‵sae aka i ‵tou mafaufau?

¹⁶ Mafaufau ‵loto. Ke mafaufau ‵mafa ki mea e faitau ne koe i te Tusi Tapu io me ko tusi faka-te-Tusi Tapu. I te taimi e tautali faka‵lei atu ei koe ki manatu kolā e tuku fakasolo mai, e mafai o ‵sae aka i ei a fesili. E mafai o fakamau ne koe a vaegā fesili penā kae toe sukesuke fakamuli ki ei. Kafai e iloilo aka ne tatou a mataupu kolā e fui maina tatou i ei, e mafai ei o fai tatou ke sukesuke malosi ki ei. A te malamalama e maua ne tatou e fai pelā me se vaega o ‵tou koloa totino kolā e puke mai ne tatou i taimi e ma‵nako ei tatou ki ei.​—Mataio 13:52.

17. Se a te polokalame e tau‵tali atu ki ei i te faiga o sukesukega a te kāiga mo sukesukega totino?

¹⁷ Ke fakatoka se taimi mō tapuakiga a te kāiga. Ko oti ne fakamalosi mai a te Potukau Pule ki a tatou katoa ke fakatoka se afiafi-po io me se aso i te vaiaso mō sukesukega totino io me ko sukesukega a te kāiga. A te faiga o fakamafuliga ki ‵tou fakatasiga se avanoaga ke fakagalue ne tatou te fakatokaga tenei. Ne a mea e sukesuke ki ei i te Tapuakiga a te otou Kāiga i afiafi-po? E fai‵tau a nisi tino ki te Tusi Tapu, e ‵suke ki tusi siki kolā e fia maina latou i ei kae tusi foki a nai fakamatalaga toe‵toe i olotou Tusi Tapu. E fakaaoga faka‵lei ne kāiga a te taimi ke mafau‵fau ki te auala e aoga ei ki te kāiga a te mataupu telā e suke‵suke ki ei. E filifili aka ne nisi ulu o kāiga a mataupu kolā e mafau‵fau latou me e aoga ki te kāiga ke sukesuke ki ei io me ko mataupu io me ko fesili kolā e fia suke‵suke ki ei te kāiga. Kāti ka mafaufau koe ki nisi mataupu ke suke‵suke ki ei fakamuli.a

18. Kaia e se ‵tau ei o fakata‵mala tatou mai i te sukesuke ki muna‵tonu ‵loto o te Muna a te Atua?

¹⁸ Ne fai mai a Iesu me ne gasuesue a te agaga e pelā me se fesoasoani. Tela la, e se ‵tau o fakata‵mala tatou i te suke‵suke ki muna‵tonu ‵loto o te Muna a te Atua. E fai eiloa a vaegā muna‵tonu penā mo fai se vaega o ‘te poto tāua o te Atua,’ kae e ‵kamigina tatou ke sukesuke ki ei. (Faitau te Faataoto 2:1-5.) E fakaasi mai i ei a mea e uke atu e uiga ki mea “ne fuafuagina ne te Atua mō latou kolā e a‵lofa ki a ia.” Kafai e taumafai malosi tatou o tauloto e uiga ki te Muna a Ieova, ka fesoasoani mai te agaga tapu ki a tatou, me i “te agaga e fakaasi mai ne ia a mea katoa, e oko foki eiloa ki fuafuaga ‵loto a te Atua.”​—1 Kolinito 2:9, 10.

[Fakamatalaga fakaopoopo]

Ka Tali Mai Pefea ne Koe?

• Ne a auala e lua e fesoasoani mai ei a te agaga ke malamalama tatou i “fuafuaga ‵loto a te Atua”?

• E auala i a ai e fakaasi mai ei ne te agaga tapu a muna‵tonu ‵loto i te senitenali muamua?

• E galue pefea a te agaga tapu ke fakamaina mai a nisi mea i ‵tou aso nei?

• Ne a mea e mafai o fai ne koe ke maua a mea aoga mai i te tusaga o te agaga?

[Ata i te itulau e 30]

Te Auala ne Fakaasi Mai ei ne te Agaga a te Uiga o te Faletapu Faka-te-Agaga

E aofia i “fuafuaga ‵loto a te Atua” kolā ne fakaasi mai i te senitenali muamua ko te faleie tapu kae fakamuli ifo ko te faletapu telā ne fakaata mai i ei se mea faka-te-agaga telā e sili atu. Ne taku mai ne Paulo a te mea tonu e uiga ki te “tinā fale tapuaki ave sāle i malaga, telā ne faite ne te Aliki, kae seki faite ne se tino.” (Epelu 8:2) A te mea tenei se faletapu faka-te-agaga sili, se fakatokaga ke mafai o olo atu ki te Atua e auala i te taulaga mo te faitaulaga ko Iesu Keliso.

A “te tinā fale tapuaki ave sāle i malaga” ne kamata i te 29 T.A. i te taimi ne papatiso ei a Iesu kae ne talia ne Ieova a ia e pelā me ko te tino telā ka fai mo fai se taulaga ‵lei katoatoa. (Epelu 10:5-10) Mai tua o tena mate mo tena toetuga, ne ulu atu a Iesu ki te Potu Tafasili i te Tapu o te faletapu faka-te-agaga kae ne tuku atu ne ia te tāua o tena taulaga “i mua o te Atua.”​—Epelu 9:11, 12, 24.

E isi foki se taimi ne tusi mai ei a te apositolo ko Paulo e uiga ki Kelisiano fakaekegina e pelā me e “tupu ake ke fai mo fale tapu ‵malu i te Aliki [ko Ieova].” (Efeso 2:20-22) E mata, ne ‵pau a te faletapu tenei mo te “tinā fale tapuaki ave sāle i malaga” telā ne fakamatala fakamuli atu ne ia i tena tusi ki te kau Epelu? Ne mafau‵fau a tavini a Ieova i te fia sefulu o tausaga me ne ‵pau a faletapu konā. Ne foliga mai me ne fakatoka a Kelisiano fakaekegina i te lalolagi ke fai mo “fatu” i te faletapu faka-te-lagi o Ieova.​—1 Petelu 2:5.

Kae i te fakaotiotiga o te tausaga ko te 1971, ne kamata o malamalama a sui o te potukau ko te tavini fakamaoni me i te faletapu telā ne faipati ki ei a Paulo i Efeso e se ko te faletapu faka-te-agaga sili o Ieova. Kafai ne aofia a Kelisiano fakaekegina kolā ne toe‵tu aka i “te tinā fale tapuaki ave sāle i malaga,” ne ‵tau o sae mai muamua mai tua o te kamataga o te lotou toe‵tuga i te ‘aso e foki mai ei te Aliki.’ (1 Tesalonia 4:15-17) E uiga ki te faleie tapu, ne tusi mai a Paulo: “A te fakatusa tenei, e fakauiga eiloa ki aso nei.”​—Epelu 9:9.

Kafai e fakatusa ne tatou a mea konei mo nisi tusi siki, ko lavea faka‵lei atu ei me i te faletapu faka-te-agaga e seki mafaufaugina ke faite a ko Kelisiano fakaekegina e se ko “fatu” kolā ne fakatoka i te lalolagi ke aofia i ei. I lō te fai penā, e tavini atu a Kelisiano fakaekegina i te titi mo te Potu Tapu o te faletapu faka-te-agaga, i te ofoatuga o taulaga ki te Atua mai i te avatuga o “tavaega ki te Atua.”​—Epelu 13:15.

[Ata i te itulau e 31]

E mafai pefea o momea aka te ‵tou malamalama i “fuafuaga ‵loto a te Atua”?