Fakamalosi Aka a Uiga Kolā e Mafai o Fesoasoani Atu ki te Faiga o Soko
“Olo atu koutou ki fenua katoa ke fai a tino i ei mo oku soko.”—MATAIO 28:19.
1. Ne a atamai mo uiga ne ‵tau o maua ne nisi tavini a te Atua i aso mua?
E ‵TAU mo tavini a Ieova o ati aka te atamai mo uiga kolā ka fesoasoani atu ki a latou ke fai tena loto. E ‵tusa eiloa mo te fakatonuga a te Atua, ne tiakina ei ne Apelaamo mo Sala a te fa‵kai maumea o Ulo kae ne ‵tau o maua fakamuli i ei a uiga mo atamai kolā ne manakogina mō tino e ‵nofo i faleie. (Epelu 11:8, 9, 15) A te takitaki atu ne ia o te kau Isalaelu ki loto i te Fenua o te Folafolaga, ne ‵tau ei o maua ne Iosua a te loto toa, te loto talitonu ki a Ieova, kae ke iloa foki ne ia ana Tulafono. (Iosua 1:7-9) Kae faitalia a atamai ne maua ne Pesaleli mo Oliapo, ne momea aka te ‵lei o atamai konā ona ko te agaga o te Atua ko te mea ke mafai ne tāgata konā o manuia i te ‵kau atu mo te tausiga o te galuega fakatūtū o te faleie tapu mo nisi galuega aka foki.—Esoto 31:1-11.
2. Ne a fesili ka sau‵tala tatou ki ei e uiga ki te galuega ko te faiga o soko?
2 I senitenali fakamuli ifo, ne tuku atu ei ne Iesu Keliso ki ana soko te fakatonuga tenei: “Olo atu koutou ki fenua katoa ke fai a tino i ei mo oku soko; . . . akoako atu foki latou ke faka‵logo ki mea katoa kolā ne fakatonu atu ne au ki a koutou.” (Mataio 28:19, 20) E seki tuku atu eiloa muamua ki tino te tauliaga o te faiga o se vaegā mea penei. Ne a uiga e manakogina mō te galuega ko te faiga o soko? E mafai pefea o fakamalosi aka ne tatou a vaegā uiga penā?
Fakaasi Atu te Alofa Lasi ki te Atua
3. Se a te avanoaga e maua ne tatou ona ko te fakatonuga ke fai a soko?
3 A te faipati atu ki tino mo te taumafai o fakatalitonu atu ke tapuaki atu latou ki te Atua tonu e manakogina ei ke lasi te ‵tou a‵lofa mō Ieova. Ne mafai o fakamaoni atu ne te kau Isalaelu te lotou a‵lofa ki te Atua mai i te faka‵logo mo te loto kātoa ki ana tulafono, te ofoatuga o taulaga kolā e taliagina, mo te tavae atu ki a ia i pese. (Teutelonome 10:12, 13; 30:19, 20; Salamo 21:13; 96:1, 2; 138:5) E pelā me ne tino fai soko, e tausi foki ne tatou a tulafono a te Atua, kae e fakaasi atu foki ne tatou te ‵tou a‵lofa ki a Ieova mai i te fai‵pati atu ki nisi tino e uiga ki a ia mo ana fuafuaga. E ‵tau o fai‵pati atu tatou mo te loto tali‵tonu, mai te filifiliga o pati ‵lei ke fakaasi atu ei ‵tou lagonaga ‵tonu e uiga ki te fakamoemoega telā ne tuku mai ne te Atua.—1 Tesalonia 1:5; 1 Petelu 3:15.
4. Kaia ne fiafia ei a Iesu o akoako atu a tino e uiga ki a Ieova?
4 Ona ko te lasi o tena alofa ki a Ieova, ne fiafia eiloa a Iesu o faipati atu e uiga ki fuafuaga a te Atua, te Malo, mo te tapuakiga tonu. (Luka 8:1; Ioane 4:23, 24, 31) A te tonuga loa, ne fai atu Iesu: “A taku meakai, ko te fai ne au a te loto o ia telā ne uga mai ne ia au, kae o fakapalele foki a te galuega ne tuku mai ne ia ki a au ke fai.” (Ioane 4:34) E fakasino atu eiloa a pati konei a te faisalamo ki a Iesu: “Toku Atua, e fiafia au o fai tou loto! E tausi ne au au akoakoga i toku loto. Te Aliki, i te maopoopoga o ou tino, ne taku atu ei ne au te tala ‵lei e uiga ki te fakasaoga ne koe matou. E iloa ne koe me ka fakamatala faeloa ne au i taimi katoa.”—Salamo 40:8, 9; Epelu 10:7-10.
5, 6. Se a te uiga tāua e ‵tau o maua ne tino fai soko?
5 Ona ko te alofa ki te Atua, e fai‵pati atu a tino ‵fou kolā ne fatoa tauloto ki te munatonu i te Tusi Tapu e uiga ki a Ieova mo te Malo mo te vaegā loto talitonu penā, telā e masani ei o magoi te lotou fakatalitonu atu ki nisi tino ke sukesuke ki te Tusi Tapu. (Ioane 1:41) A te alofa ki te Atua ko te ‵toe uiga tāua telā e fakamalosi aka ei tatou ke ‵kau atu ki te galuega ko te faiga o soko. Tela la, ke na tumau tatou i te fakamalosiakaga o te alofa tenā mai te fai‵tau mo te mafaufau ‵loto faeloa ki tena Muna.—1 Timoteo 4:6, 15; Fakaasiga 2:4.
6 E seai se fakalotolotolua me ne fesoasoani atu te alofa ki a Ieova ke fai a Iesu Keliso mo fai se faiakoga loto finafinau. Kae e se tenā fua te pogai e tasi ne maua ei ne ia a ikuga ma‵goi e pelā me se tino talai o te Malo. Se a la te suā uiga telā ne fai ei ke manuia a Iesu i te faiga o soko?
Fakaasi Atu te Alofa Atafai ki Tino
7, 8. E pefea te kilokiloga a Iesu ki tino?
7 Ne atafai a Iesu ki tino kae ne fakaasi atu te lasi o tena fiafia ki a latou. Mai mua foki o liutino a ia e pelā me se “tagata poto i te fakatūtū” a te Atua, ne fiafia malosi tou tagata ki tino. (Faataoto 8:30, 31) E pelā me se tino i te lalolagi, ne alofa atafai a Iesu ki tino, kae fakamalosi atu ki a latou kolā ne olo atu ki a ia. (Mataio 11:28-30) Ne fakaasi atu eiloa ne Iesu te alofa mo te atafai o Ieova, kae ne fai ei a tino ke tosina atu ki te tapuakiga ki te Atua tonu e tokotasi. Ne fakalogo‵logo atu a vaegā tino kese‵kese ki a Iesu me ne fakaasi atu ne ia te alofa atafai ki a latou mo olotou fakanofonofoga.—Luka 7:36-50; 18:15-17; 19:1-10.
8 I te taimi ne fesili atu ei se tagata me ne a ana mea e ‵tau o fai ke maua ei te ola se-gata-mai, “ne kilo alofa atu a Iesu ki a ia.” (Maleko 10:17-21) E uiga ki nisi tino kolā ne akoako ne Iesu i Petania, e fai‵tau tatou penei: “Ne alofa a Iesu ki a Maleta mo tona taina, pelā foki ki a Lasalo.” (Ioane 11:1, 5) Ona ko te lasi o te alofa o Iesu ki tino, ne taofi aka tena fia malōlō ko te mea ke akoako atu a latou. (Maleko 6:30-34) A te vaegā alofa atafai lasi penā ki tino ne fai ei ke sili atu te magoi o Iesu i te ‵takimaiga o tino ki te tapuakiga tonu i lō so se isi tino.
9. Se a te uiga ne maua ne Paulo e pelā me se tino fai soko?
9 Ne lasi foki te alofa atafai o te apositolo ko Paulo ki tino kolā ne talai atu a ia ki ei. E pelā mo ana pati ne fai atu ki tino kolā ne fai mo fai ne Kelisiano i Tesalonia: “Ona ko te motou a‵lofa ki a koutou, ko toka nei matou o ‵kau fakatasi mo koutou i te Tala ‵Lei mai i te Atua, pelā foki mo te tuku atu o omotou ola mō koutou, i te mea e fakapelepele koutou ne matou.” Ona ko taumafaiga a‵lofa a Paulo, a nisi tino i Tesalonia ne ‘‵fuli kea‵tea mai te tapuaki atu ki tupua ke tavini atu ki te Atua ola.’ (1 Tesalonia 1:9; 2:8) Kafai e a‵lofa atafai tonu tatou ki tino, e pelā mo Iesu mo Paulo, ka mafai foki o maua ne tatou te fiafia ke lavea atu me ko oko ‵tonu atu te tala ‵lei ki “tino loto ‵lei kolā ka mafai o maua te ola se-gata-mai.”—Galuega 13:48, NW.
Fakaasi Atu te Uiga ko te Taliaga o Mea Faiga‵ta
10, 11. Kaia e manakogina ei a te uiga ko te taliaga o mea faiga‵ta i te taimi e taumafai ei tatou ke fai a soko?
10 E talia mo te fiafia ne tino fai soko ma‵goi a mea faiga‵ta. E se ‵kilo atu latou ki te mauaga o te maumea e pelā me ko te ‵toe mea tāua. A te ‵tonuga loa, ne fai atu a Iesu ki ana soko: “Ko oko eiloa i te faigata i tino mauko‵loa o ulu atu ki te Malo o te Atua!” Ne ofo a soko ke lagona atu te mea tenei, kae ne toe fai atu Iesu: “Aku fanau, ko oko eiloa i te faigata te ulu atu ki te Malo o te Atua! E faigata o ulu atu a te kamela ki te pū o te nila, kae sili atu i te faigata i te tino maukoloa o ulu atu ki te Malo o te Atua.” (Maleko 10:23-25) Ne fakamalosi atu a Iesu ki ana soko ke ola i se olaga faigofie ko te mea ke mafai o ‵saga tonu atu latou ki te faiga o soko. (Mataio 6:22-24, 33) Kaia e fesoasoani mai ei a te uiga ko te taliaga o mea faiga‵ta ke fai ne tatou a soko?
11 A te akoako atu o mea kolā ne fakatonu mai ne Iesu e manakogina i ei a taumafaiga e uke. E taumafai malosi eiloa se tino fai soko ke fai se akoga faka-te-Tusi Tapu mo se tino fiafia i vaiaso katoa. Ke momea aka te uke o olotou taimi e fakamāumāu ki te ‵salaga o tino loto fakamaoni, ko oti ne tiakina ne nisi tino talai o te Malo olotou galuega ‵togi tumau kae ‵sala atu ki galuega sē tumau. E lau i afe o Kelisiano ko oti ne tauloto ki nisi ‵gana ko te mea ke oko atu latou ki nisi itukāiga i te lotou koga talai. Ko oti ne tiakina ne nisi tino fai soko olotou kāiga kae olo atu ki nisi koga io me ko nisi fenua ke ‵kau katoatoa atu ki te faiga o soko. (Mataio 9:37, 38) E manakogina a te uiga ko te taliaga o mea faiga‵ta i te faiga o mea katoa konei. Kae e uke atu foki a mea e manakogina ko te mea ke magoi koe i te faiga o soko.
Kufaki Kae sa Fakamāumāu Taimi
12, 13. Kaia e tāua malosi ei te kufaki i te faiga o soko?
12 A te kufaki ko te suā uiga telā e fesoasoani mai ki te faiga o soko. E manakogina i te ‵tou fekau faka-Kelisiano ke gasue‵sue fakavave, kae ko te faiga o soko e aofia i ei a taimi e uke kae e manakogina foki i ei a te kufaki. (1 Kolinito 7:29) Ne kufaki eiloa a Iesu i tena āfa taina ko Iakopo. E tiga eiloa kāti ne masani ‵lei a Iakopo mo te galuega talai a Iesu, ne isi eiloa se mea ne taofi aka ei tou tagata mō se vaitaimi mai te fai mo fai se soko. (Ioane 7:5) Kae i se taimi toetoe i te vā o te taimi ne mate ei a Keliso mo te Penitekoso i te 33 T.A., ne fai eiloa a Iakopo mo fai se soko, me e fai mai te Tusi Tapu me ne kau atu a ia ki tena matua, ana taina, mo te kau apositolo kolā ne maopoopo fakatasi o ‵talo sāle. (Galuega 1:13, 14) Ne gasolo atu eiloa a Iakopo ki mua i te feitu faka-te-agaga, kae ne maua fakamuli ne ia a tiute tāua i te fakapotopotoga Kelisiano.—Galuega 15:13; 1 Kolinito 15:7.
13 E pelā mo tino ‵toki lakau, e fakamalosi aka ne Kelisiano a mea kolā e ‵tupu malielie aka—ko te malamalama i te Muna a te Atua, te alofa ki a Ieova, mo uiga o Keliso. E manakogina i te mea tenei a te kufaki. Ne tusi mai a Iakopo: “Ke kufaki koutou e oku taina, ke oko ki te ‵toe foki mai o te Aliki. Kiloke, a te tino ‵toki lakau e kufaki a ia, kae fakatalitali ki tona manafa ke ‵fua mai ne fuataga ‵lei. E kufaki eiloa a ia penā ke oko ki aso e ma‵tua ei a taukai. E ‵tau eiloa mo koutou o kufaki! Ke fakama‵losi otou loto, me ko pili mai a te aso o te ‵toe foki mai o te Aliki.” (Iakopo 5:7, 8) Ne fakamalosi atu a Iakopo ki ana taina tali‵tonu ke ‘fakaasi atu te kufaki ke oko ki te ‵toe foki mai o te Aliki.’ Kafai ne seki malamalama a soko i se mea, ne fakamatala io me ne fai atu eiloa ne Iesu a fakatusaga mo te loto kufaki. (Mataio 13:10-23; Luka 19:11; 21:7; Galuega 1:6-8) Nei la, ko oti ne toe foki mai te Aliki, e ‵tau foki o fakaasi atu ne tatou te kufaki i te taimi e taumafai ei tatou o fai a soko. A tino kolā e fai mo fai a soko o Iesu i ‵tou aso nei e ‵tau o maua ne latou a akoakoga mo te kufaki.—Ioane 14:9.
14. E tiga eiloa e kufaki tatou, e mafai pefea o fakaaogā faka‵lei ‵tou taimi e pelā me ne tino fai soko?
14 E tiga eiloa e kufaki tatou, e se ‵fua mai te muna i te tokoukega o tino kolā e kamata o sukesuke mo tatou ki te Tusi Tapu. (Mataio 13:18-23) Tela la, mai tua o taumafaiga ‵lei ke fesoasoani atu ki a latou, e taofi aka eiloa ne tatou mo te poto a te fakamāumāuga o taimi mo vaegā tino penā kae taumafai o ‵sala atu ki tino kolā e sili atu te fakatāua ne latou o muna‵tonu i te Tusi Tapu. (Failauga 3:1, 6) E tonu, ke oko foki ki tino kolā e maua ne latou te loto fakafetai, kāti e manakogina se fesoasoani tai leva atu ke ‵fuli olotou kilokiloga, uiga, mo mea kolā e fakatāua ne latou i olotou olaga. Tela la, e kufaki tatou, e pelā eiloa mo Iesu ne kufaki i ana soko kolā e faigata o fakamalosi aka ne latou se kilokiloga ‵tau.—Maleko 9:33-37; 10:35-45.
Fakamalosi Aka te Atamai i te Akoako Atu
15, 16. Kaia e tāua ei ke fakafaigofie aka kae fakatoka faka‵lei māfai e taumafai tatou o fai a soko?
15 A te alofa ki te Atua, te atafai ki tino, te taliaga o mea faiga‵ta, mo te kufaki ne uiga tāua ke manuia ei i te faiga o soko. E ‵tau foki o fakamalosi aka a te atamai i te akoako atu, ko te mea ke mafai ei ne tatou o fakamatala faka‵lei atu se mataupu i se auala manino kae faigofie. E pelā mo akoakoga e uke a te Faiakoga Sili, ko Iesu Keliso, ne ma‵goi ‵ki ona ko te faigofie. Kāti e masaua ne koe a nisi vaegā fakamatalaga penā a Iesu e pelā mo mea konei: “Ke fakaputu ne otou koloa i te lagi.” “Sa avatu ne koutou te mea tapu ki kuli.” “A te poto o te Atua e fakaasi ‵tonu mai i ana galuega.” “E ‵tau mo koutou o fai te otou tiute ki te Malo, pelā foki mo otou tiute ki te Atua.” (Mataio 6:20; 7:6; 11:19; 22:21) E tonu, ne seki taku atu fua ne Iesu a fakamatalaga toe‵toe. Ne akoako atu a ia i se auala manino kae ne fakamatala faka‵lei atu foki māfai e ‵lei ke fai penā. E mafai pefea o fakaakoako atu koe ki te auala e akoako atu ei a Iesu?
16 A te fakatoka faka‵lei ko te auala e mafai ei o akoako atu i se auala faigofie kae manino. A te tino fai soko telā e se fakatoka faka‵lei e mafai o faipati ‵soko atu faeloa. E mafai eiloa o se manino a manatu tāua ona ko te uke o ana pati e fai atu e uiga ki mea katoa e iloa ne ia e uiga ki se mataupu. E ‵kese mai i ei, e mafaufau a te tino fai soko telā e fakatoka faka‵lei e uiga ki te tino telā e akoako atu ne ia, e mafaufau ‵loto ki te mataupu, kae fakamatala manino atu e pelā eiloa mo te mea e ‵tau o fai. (Faataoto 15:28; 1 Kolinito 2:1, 2) E mafaufau a ia ki te uke o mea ko iloa ne te tino akoga mo manatu foki kolā e ‵tau o faka‵mafa atu i te taimi e fai ei te akoga. Kāti e iloa ne te tino fai soko a fakamatalaga likiliki e uke kae ‵gali e uiga ki te mataupu, kae ko te fakamatala atu i se auala manino ‵lei e aofia i ei te ‵kalo keatea mai fakamatalaga kolā e se manakogina.
17. E mafai pefea o fesoasoani atu tatou ki tino ke fakasakosako atu mai te Tusi Tapu?
17 Ne fesoasoani atu foki a Iesu ki tino ke iloa ne latou o fakasakosako, i lō te taku atu fua o manatu ‵tonu. E pelā mo te taimi e tasi, ne fesili atu tou tagata: “Simona, se a tou manatu? Ko oi tino e ‵togi a tiute mo lafoga ki tupu o te lalolagi nei? Ko tino tonu o te fenua, me ko fakaa‵lofa kolā e ‵nofo i te fenua?” (Mataio 17:25) Kāti e fia‵fia malosi tatou o fakamatala atu te Tusi Tapu, kae e ‵tau o fakagalue ne tatou te loto pulea ko te mea ke tuku atu te avanoaga ki te tino akoga ke fakaasi mai io me ke fakamatala mai ana manatu e uiga ki se mataupu telā e sukesuke ki ei i te akoga faka-te-Tusi Tapu. Se mea ‵tau ke mo a ma fai atu ne tatou ki tino a fesili e uke. I lō te fai penā, fakatasi mo te atamai, fakatusaga ‵lei, mo fesili ‵lei, e mafai eiloa ne tatou o fesoasoani atu ke fakatāua ne latou a manatu i te Tusi Tapu kolā e taku mai i ‵tou tusi faka-te-Tusi Tapu.
18. Ne a mea e aofia i te fakamalosiakaga o te ‘akoako atu o akoakoga ‵tonu’?
18 E faipati te Tusi Tapu e uiga ki te ‘akoako atu o akoakoga ‵tonu.’ (2 Timoteo 4:2; Tito 1:9) E aofia i vaegā akoakoga penā a mea e uke atu i lō te fesoasoani atu fua ki se tino ke masaua fua ne ia a manatu ‵tonu. E ‵tau o fesoasoani atu tatou ki se tino akoga ke malamalama i te ‵kese o te munatonu mai i te mea ‵se, te ‵lei mo te masei, te poto mo te valea. I te taimi e fai ei ne tatou te mea tenei kae taumafai o fakamalosi aka te alofa ki a Ieova i te loto o te tino, e mafai o lavea atu ne ia te pogai e ‵tau ei o fakalogo ki a Ia.
Kau Atu mo te Loto Finafinau ki te Faiga o Soko
19. E fesoasoani atu pefea a Kelisiano katoa ki te faiga o soko?
19 A te fakapotopotoga Kelisiano se fakapotopotoga telā e aofia i te galuega ko te faiga o soko. Kafai ko fai se tino fou mo fai se soko, a te Molimau a Ieova telā ne maua ne ia kae fesoasoani atu ki a ia ke tauloto ki mea kolā e akoako mai i te Tusi Tapu, e se ko te tino tokotasi fua e maua ne ia se pogai ke fiafia. Kafai e fakatoka ne tino se potukau ke ‵sala atu ki se tamaliki ko galo, e tokotasi fua te tino mai te potukau tenā ka maua atu ne ia te tamaliki. Kae kafai ko toe ‵kau fakatasi te tamaliki mo ana matua, e fia‵fia eiloa a tino katoa ne aofia i te ‵salaatuga o te tamaliki tenā. (Luka 15:6, 7) E penā foki loa te faiga o soko, se galuega telā e aofia i ei a te fakapotopotoga kātoa. E ‵kau atu a Kelisiano katoa i te ‵sala atu ki tino kolā e mafai o fai mo fai ne soko o Iesu. Kae kafai ko kamata o kau atu se tino fou ki fakatasiga i te Kingdom Hall, e fesoasoani atu a Kelisiano katoa i konā ki te fakamalosiakaga o tena loto fakafetai ki te tapuakiga tonu. (1 Kolinito 14:24, 25) Tela la, e mafai eiloa o fia‵fia a Kelisiano katoa me e mafai o fai a soko ‵fou e selau afe i tausaga takitasi.
20. Ne a mea e ‵tau o fai ne koe māfai e fia akoako atu ne koe a nisi tino e uiga ki te munatonu i te Tusi Tapu?
20 E fia‵fia eiloa a Kelisiano fakamaoni e tokouke o akoako atu se tino e uiga ki a Ieova mo te tapuakiga tonu. Kae faitalia olotou toe taumafaiga ‵lei, e seki mafai eiloa o fai ne latou a soko. Kafai e penā loa tou tulaga, ke na tumau koe i te fakamalosi aka a tou alofa ki a Ieova, ke atafai ki tino, te taliaga o mea faiga‵ta, fakaasi atu te kufaki, kae taumafai o faka‵lei aka tou atamai i te akoako atu. E sili atu i mea katoa, ke na taumafai eiloa koe o ‵talo atu e uiga ki te manakoga ke akoako atu te munatonu. (Failauga 11:1) Ke na maua eiloa a fakamafanafanaga i te iloa atu me i so se mea e fai ne koe i te taviniga a Ieova e fesoasoani atu ki te galuega ko te faiga o soko telā e tavae atu ei ki te Atua.
E Mafai o Fakamatala Mai ne Koe?
• Kaia e tofotofo aka ei ne te galuega ko te faiga o soko te ‵tou a‵lofa ki te Atua?
• Ne a uiga e ‵tau o maua ne tino fai soko?
• Ne a mea e aofia i te ‘akoako atu o akoakoga ‵tonu’?