Fakaakoako ki a Iesu ​—⁠Akoako Atu mo te Alofa

“E seki iai eiloa se tagata ne faipati pelā mo te tagata tenei!”​—⁠IOANE 7:​46.

1. Ne ‵saga atu pefea a tino ki te auala ne akoako atu ei a Iesu?

MAFAUFAU la ki te fakafiafia ke fakalogologo ki te auala e akoako atu ei a Iesu! E tuku mai i te Tusi Tapu a tala e uiga ki ana fakamalosiga ki tino kolā ne fetaui mo ia. E pelā mo te tino tusi Evagelia ko Luka, ne fakamatala mai ne ia me i tino i te fa‵kai o Iesu “ne ofo latou i pati ‵lei ne faipati ne ia.” E fai mai a Mataio me i tino kolā ne fakalogo‵logo ki a Iesu i te taimi ne akoako atu ei a ia i te Lauga i luga i te Mauga “ne ofo masei . . . i ana akoakoga.” Kae e lavea atu ne Ioane me i ofisa kolā ne uga atu ke puke fakapagota mai ne latou a Iesu ne ‵foki atu e aunoa mo ia, kae ne fai atu latou: “E seki iai eiloa se tagata ne faipati pelā mo te tagata tenei!”​—⁠Luka 4:​22; Mataio 7:​28; Ioane 7:​46.

2. Ne a auala ne fakaaoga ne Iesu i te akoako atu?

² Ne seki faka‵segina a ofisa konā. E seai eiloa se fakalotolotolua me ne fai a Iesu mo fai te ‵toe Faiakoga sili telā ne ola. Ne akoako atu a ia i se auala manino, faigofie, kae tonu. Ne fakaaoga ne ia mo te atamai a tala fakatusa mo fesili. Ne fakafetaui aka ana akoakoga ki tino kolā ne faipati atu a ia ki ei, faitalia me ne tino ma‵luga io me ne tino ma‵lalo. A muna‵tonu kolā ne akoako atu ne ia e faigofie ke malamalama i ei kae ‵tonu foki. Kae e se ko mea fua konei ne fai ei a Iesu mo fai te ‵toe Faiakoga sili.

Se Uiga Tāua​—⁠ko te Alofa

3. E pelā me se faiakoga, ne ‵kese pefea a Iesu mai i takitaki lotu i ana aso?

³ E seai eiloa se fakalotolotolua me ne isi ne tagata ‵poto kae ata‵mai i va o faiakoga o te tulafono mo Falesaio ke akoako mai ne latou. Se a te mea ne ‵kese malosi ei a te auala ne akoako atu ei a Iesu mai i a latou? Ne seai eiloa se alofa o takitaki lotu i aso konā ki tino masani. I lō te fai penā, e takalia‵lia latou ki tino penā, kae e ‵kilo atu ki ei e pelā me ne tino “malaia.” (Ioane 7:​49) E ‵kese mai i ei, ne otia te loto o Iesu kae alofa ki a latou, ona ko te mea ko fai latou “pelā mo mamoe e seai se lotou tino tausi.” (Mataio 9:​36) Ne alofa, loto malamalama, kae atafai a ia. E se gata i ei, ne seki ai foki se alofa tonu i takitaki lotu ki te Atua. (Ioane 5:​42) Ne alofa a Iesu ki tena Tamana kae ne fiafia o fai tena loto. Ne ‵fuli fakakotua ne takitaki lotu a te muna a te Atua ke fetaui mo olotou manakoga, kae ne alofa malosi a Iesu ki “te muna a te Atua”​—⁠ne akoako atu ne ia, fakamatala atu, ‵pulu ne ia, kae ne ola foki e ‵tusa mo akoakoga fakavae i ei. (Luka 11:28) E tonu, ne fakaasi atu eiloa ne Keliso a te alofa lasi, telā ne pule atu ki mea kolā ne akoako ne ia, ana faifaiga ki tino, mo te auala ne akoako ei ne ia latou.

4, 5. (a) Kaia e tāua ei ke akoako atu mo te alofa? (e) I te akoako atu, kaia e tāua foki ei a te poto mo te atamai?

⁴ Kae e a tatou? E pelā me ne soko o Keliso, e ma‵nako tatou ke fakaakoako atu ki a ia i te faiga o ‵tou galuega talai pelā foki mo ‵tou olaga. (1 Petelu 2:​21) Tela la, a te ‵tou fakamoemoega, e se gata fua i te fakaasi atu o te poto i te Tusi Tapu kae ke fakaasi atu foki a uiga o Ieova, maise eiloa tena alofa. Faitalia me e uke io me mu‵tana a mea e iloa ne tatou, e lasi a te atamai io me e foliki fua i te akoako atu, a te alofa e fakaasi atu ne tatou ka fesoasoani atu eiloa ke fakaoko atu te fekau ki loto o tino kolā e talai tatou ki ei. Ko te mea ke ma‵goi i te ‵tou galuega ko te faiga o soko, e ‵tau o fakaakoako atu tatou ki a Iesu e auala i te akoako atu mo te alofa.

⁵ E tonu, ke fai mo fai ne faiakoga ‵lei, e ‵tau o iloa ‵lei ne tatou a ‵tou mataupu kae e ‵tau foki o ata‵mai tatou ke fakaasi atu te iloaga tenā. Ne fesoasoani atu a Iesu ki ana soko ke maua ne latou a mea tāua e lua konā, kae e fesoasoani mai foki a Ieova, e auala i tena fakapotopotoga, ki a tatou i aso nei. (Faitau te Isaia 54:13; Luka 12:42.) Koi ‵tau eiloa mo tatou o taumafai ke se akoako atu fua i ‵tou mafaufau kae ko ‵tou loto foki. Kafai e tuku fakatasi a te iloa, te atamai, mo te alofa, e mafai eiloa o fai mo fai te ‵toe mea fakamalie loto. Ne a la auala e mafai ei o fakaasi atu ne tatou a te alofa i te taimi e akoako atu ei tatou? Ne fai pefea ne Iesu mo ana soko a mea konā? Ke onoono aka tatou ki ei.

E ‵Tau mo Tatou o A‵lofa ki a Ieova

6. E fai‵pati atu pefea tatou e uiga ki se tino telā e a‵lofa tatou ki ei?

⁶ E fia fai‵pati atu tatou ki mea kolā e fia‵fia malosi tatou ki ei. Kafai e fai‵pati atu tatou e uiga ki se mea telā e pele ki ‵tou loto, e kamata o poko ma‵tagi tatou kae lavea atu a te loto finafinau mo te alofa. E tonu eiloa te mea tenei, maise eiloa māfai ko fai‵pati tatou ki se tino telā e a‵lofa malosi tatou ki ei. E masani eiloa o naunau ‵tou loto ke na fakaasi atu ki nisi tino a mea e iloa ne tatou e uiga ki te tino tenā. E tavae, fakaaloalo, kae ‵pulu foki ne tatou a te tino tenā. E fai tatou penā me e ma‵nako tatou ke tosina atu foki a loto o nisi tino ki te tino tenā mo ana uiga e pelā eiloa mo tatou.

7. Se a te mea ne fakamalosi aka ne te alofa o Iesu ki te Atua ke fai ne ia?

⁷ A koi tuai o ati aka ne tatou a te alofa ki a Ieova i nisi tino, e ‵tau o iloa kae e a‵lofa foki tatou ki a ia. A te ‵tonuga loa, e fakavae a te tapuakiga tonu ki te alofa ki te Atua. (Mataio 22:​36-​38) Ne tuku mai ne Iesu se fakaakoakoga ‵lei katoatoa. Ne alofa a ia ki a Ieova mo tena loto, mafaufau, ola, mo tena malosi kātoa. Ona ko te mea kāti ne fakamāumāu ne ia te fia piliona o tausaga i te lagi mo tena Tamana faka-te-lagi, ne iloa ‵lei ne Iesu a ia. A te ikuga? Ne fai mai a Iesu: “Au e alofa ki te Tamana.” (Ioane 14:31) Ne lavea atu a te alofa tenā i mea katoa ne faipati kae fai ne Iesu. Ne fakamalosi atu faeloa a te mea tenā ki a ia ke fai ne ia a mea kolā e fakafiafia atu ki te Atua. (Ioane 8:​29) Ne fakamalosi atu a te mea tenā ki a ia ke taku fakamasei ne ia a takitaki lotu, kolā ne fakaloiloi atu me e sui ne latou a te Atua. Ne fakamalosi atu foki ke faipati atu a ia e uiga ki a Ieova kae ke fesoasoani atu ki nisi tino ke iloa kae a‵lofa ki te Atua.

8. Se a te mea ne fakamalosi atu ki soko o Iesu ke fai ne latou ona ko te alofa ki te Atua?

⁸ E pelā mo Iesu, ne a‵lofa foki ana soko i te senitenali muamua ki a Ieova, kae ne fakamalosi aka latou ne te alofa tenei ke talai atu te tala ‵lei mo te loto malosi mo te loto finafinau. Ne faka‵fonu ne latou a Ielusalema ki olotou akoakoga, faitalia me ne ‵teke atu a takitaki lotu ma‵losi ki a latou. Ne seki mafai eiloa o fakagata ne soko te lotou fai‵pati e uiga ki mea ne lavea kae lagona ne latou. (Galuega 4:​20; 5:​28) Ne iloa ne latou me e fakatasi atu a Ieova ki a latou kae ka fakamanuia foki ne ia latou​—⁠kae ne fakamanuia eiloa ne ia latou! A te ‵tonuga loa, e se sili atu i te 30 tausaga mai tua o te mate o Iesu, kae ne mafai ne te apositolo ko Paulo o tusi mai me i te tala ‵lei “ko oti ne folafolagina ki tino katoa mai lalo o te lagi.”​—⁠Kolose 1:​23.

9. E mafai pefea o fakamalosi aka te ‵tou a‵lofa ki te Atua?

⁹ Kafai e ma‵nako tatou ke fai pelā me ne faiakoga apo, e ‵tau foki o fakamautinoa aka ne tatou me e tumau loa tatou i te fakamalosi aka o te ‵tou a‵lofa ki te Atua. E mafai pefea o fai ne tatou a te mea tenā? Mai i te fai‵pati atu faeloa ki te Atua e auala i ‵talo. E fakamalosi aka foki ne tatou ‵tou a‵lofa ki te Atua mai i te sukesuke ki tena Muna, mai te faitau ki tusi faka-te-Tusi Tapu, mo te ‵kau atu ki fakatasiga Kelisiano. I te taimi e gasolo aka ei ‵tou iloa e uiga ki te Atua, ka ‵fonu ‵tou loto i te alofa ki a ia. Kae kafai ko fakaasi atu ne tatou a te ‵tou a‵lofa ki te Atua i pati mo faiga, ka lavea ne nisi tino a te mea tenā kae ka fia fakapili‵pili atu foki latou ki a Ieova.​—⁠Faitau te Salamo 104:​33, 34.

E ‵Tau o Fia‵fia Malosi Tatou ki Mea e Akoako Atu ne Tatou

10. Se a te fakailoga o se faiakoga ‵lei?

¹⁰ A te fakailoga o se faiakoga ‵lei ko te fiafia malosi ki mea e akoako atu ne ia. E ‵tau o talitonu a ia me e ‵tonu, e aoga, kae e tāua foki. Kafai e atafai a te faiakoga ki mea e akoako atu ne ia, ka lavea atu tena loto finafinau, mai te fakamalosi atu ki tino kolā e akoako a ia ki ei. I te suā feitu la, kafai e se fakatāua malosi ne te faiakoga a mea e akoako atu ne ia, e mafai pefea o fakamoemoe a ia ke fakatāua ne ana tamaliki akoga a mea kolā e lagona ne latou? Ke mo a eiloa ma manatu māmā koe ki tau fakaakoakoga e pelā me se faiakoga o te Muna a te Atua. Ne fai mai a Iesu: “Kafai te tamaliki akoga ko palele ana akoakoga, ko ‵pau ei mo tena faiakoga.”​—⁠Luka 6:​40.

11. Kaia ne alofa malosi ei a Iesu ki mea ne akoako atu ne ia?

¹¹ Ne fiafia malosi a Iesu ki mea ne akoako atu ne ia. Ne iloa ne ia me e isi se mea tāua e ‵tau o fakaasi atu ne ia​—⁠te munatonu e uiga ki tena Tamana faka-te-lagi, ko “muna a te Atua” mo “muna o te ola se gata mai.” (Ioane 3:​34; 6:​68) A muna‵tonu kolā ne akoako atu ne Iesu e fai pelā me se mainaga telā e fakaasi faka‵sau atu i ei a mea ma‵sei kae faka‵mafa atu foki i ei a mea ‵lei. E aumai i ei a te fakamoemoega mo fakamafanafanaga ki tino loto maulalo kolā ne fakaloiloi ne takitaki lotu ‵se kae fakasaua ne te Tiapolo. (Galuega 10:38) Ne seki lavea atu fua a te alofa o Iesu mō te munatonu i ana akoakoga kae i ana mea katoa ne fai.

12. E pefea a lagonaga o te apositolo ko Paulo e uiga ki te tala ‵lei?

¹² E pelā mo Iesu, ne a‵lofa kae fakatāua malosi foki ne ana soko a te munatonu e uiga ki a Ieova mo Keliso telā ne seki mafai ei ne tino ‵teke o faka‵tuka atu ki a latou ke mo a ma fai‵pati atu ki nisi tino. Ne tusi atu a Paulo ki taina Kelisiano i Loma: “Ko oko eiloa i toku fia folafola atu te tala ‵lei . . . I a au e se ma i te tala ‵lei: i te mea ko te ‵mana o te Atua e fakaola i ei a latou katoa kolā e fakatuanaki.” (Loma 1:​15, 16) Ne kilo atu a Paulo ki ei e pelā me se tulaga fakaaloalo ke folafola atu a te munatonu. Ne tusi mai a ia: “Au ko te ‵toe tino sē taulia eiloa, . . . ka ko tuku mai ne te Atua a te galuega tenei, o folafola atu a te Tala ‵Lei o te koloa tumau o Keliso, ki tino o fenua fakaa‵tea.” (Efeso 3:⁠8) E sē se mea faigata ke fakaataata i ‵tou mafaufau a te loto finafinau o Paulo i te taimi ne akoako ei ne ia a nisi tino e uiga ki a Ieova mo Ana fuafuaga.

13. Ne a pogai e ‵tau ei o fia‵fia malosi tatou ki te tala ‵lei?

¹³ A te tala ‵lei telā e maua i te Muna a te Atua e fai ei ke iloa ne tatou a te Mafuaga kae ke maua se fesokotakiga alofa mo ia. E tuku mai ne te tala ‵lei tenā a tali fakama‵lie loto ki fesili tāua o te olaga kae e isi foki sena ‵mana ke ‵fuli ei ‵tou olaga, e tuku mai foki i ei se fakamoemoega ki a tatou, kae e fakamalosi aka ei tatou i taimi o fakalavelave. E se gata i ei, e fakasino atu ki te auala e maua ei se olaga aoga telā ka se mafai eiloa o isi se gataga ki ei. E seai aka foki eiloa se poto e sili atu tena gali io me ko tena tāua i lō te tala ‵lei. Se meaalofa tafasili i te gali ne tuku mai ki a tatou, telā e maua i ei ne tatou a te fiafia lasi. Kae e fakaopoopo mai foki a te fiafia māfai ko fakaasi atu ne tatou a te meaalofa tenā ki nisi tino.​—⁠Galuega 20:⁠35.

14. E mafai pefea o fakamalosi aka ne tatou a te ‵tou a‵lofa ki mea e akoako atu ne tatou?

¹⁴ Ne a mea e mafai o fai ne koe ke fakamalosi aka ei te lasi o tou fiafia ki te tala ‵lei? I te taimi e faitau ei koe ki te Muna a te Atua, mānava malie aka kae mafaufau ‵loto ki mea ne faitau ne koe. E pelā mo te fakaataata i tou mafaufau me e olo fakatasi atu koulua mo Iesu i te faiga o tena galuega talai i te lalolagi io me e faima‵laga fakatasi atu koulua mo te apositolo ko Paulo. Mafaufau i a koe ko nofo atu i te lalolagi fou, kae lavea atu a te ‵kese o te olaga i ei. Mafaufau ki fakamanuiaga ko oti ne maua ne koe ona ko tou fakalogo ki te tala ‵lei. Kafai e fakatumau ne koe a te malosi o tou alofa ki te tala ‵lei, ka lavea atu foki ne tino kolā e akoako ne koe a te alofa tenā. Ona ko pogai ‵lei konei, e ‵tau eiloa mo tatou o mafaufau faka‵lei ki mea ko oti ne tauloto ne tatou kae ‵saga tonu atu ki mea e akoako atu ne tatou.​—⁠Faitau te 1 Timoteo 4:​15, 16.

E ‵Tau mo Tatou o A‵lofa ki Tino

15. Kaia e ‵tau ei o alofa se faiakoga ki ana tamaliki a‵koga?

¹⁵ A te faiakoga ‵lei e fai ne ia ke se ma io me mataku tena tino akoga ko te mea ke maua te loto finafinau ki mea e tauloto ne ia kae ke fiafia foki o fakaasi mai ana manatu. E tuku atu ne se faiakoga alofa a te poto ona ko te mea e atafai tonu a ia ki ana tamaliki akoga. E fakafetaui aka ne ia ana akoakoga ki olotou manakoga mo te lotou malamalama. E mafaufau faeloa a ia ki te atamai mo fakanofonofoga o tena tamaliki akoga. Kafai e maua ne faiakoga a te vaegā alofa penā, ka iloa ne tamaliki a‵koga a te mea tenā, kae ka fai a te akoakoga mo te tauloto e pelā me se mea fakafiafia.

16. Ne a auala ne fakaasi atu ei ne Iesu a te alofa ki tino?

¹⁶ Ne fakaasi atu ne Iesu a te vaegā alofa tenā. A te ‵toe fakaasiga sili o tena alofa ko te tuku atu o tena ola ‵lei katoatoa faka-te-foitino ko te mea ke mafai o fakaola ei a nisi tino. (Ioane 15:13) I te faiga o tena taviniga, ne atafai atu eiloa a Iesu e aunoa mo te fi‵ta ki tino i te feitu faka-te-foitino kae maise eiloa i te feitu faka-te-agaga. I lō te fakamoemoe ke olo atu a tino ki a ia, ne faimalaga atu a ia i te fia selau o maila i ana vae ke taku atu te tala ‵lei ki a latou. (Mataio 4:​23-​25; Luka 8:⁠1) Ne kufaki kae malamalama a ia. I te taimi ne ‵tau ei o fakatonutonu aka ana soko, ne fai eiloa ne ia mo te alofa. (Maleko 9:​33-​37) Ne fakamalosi ne ia latou mai te fakaasi atu o tena loto talitonu me ka magoi eiloa a te galuega e fai ne latou e pelā me ne tino talai o te tala ‵lei. E seai eiloa se tino e sili atu tena fai mo fai se faiakoga alofa i lō Iesu. A te alofa ne fakaasi atu ne ia ki ana soko ne fakamalosi atu ki a latou ke a‵lofa atu ki a ia kae tausi ana fakatonuga.​—⁠Faitau te Ioane 14:⁠15.

17. Ne fakaasi atu pefea ne soko o Iesu a te alofa ki nisi tino?

¹⁷ E pelā mo Iesu, ne fakaasi atu ne ana soko a te alofa lasi mo te atafai ki tino kolā ne talai latou ki ei. A te kufaki i fakasauaga mo te mate, ne tavini atu ei latou ki nisi tino kae ne manumalo i te talaiatuga o te tala ‵lei. Ko tafaga la te lasi o te lotou atafai ki tino kolā ne fesoasoani atu latou ki ei i te feitu faka-te-agaga! Ne lavea atu foki a lagonaga ‵loto o te apositolo ko Paulo, telā ne tusi mai: “Kae ne ga‵lue eiloa matou mo te loto a‵lofa i te ‵tou fakatasiga, e pelā eiloa mo te alofa o te matua manafai e tausi ana tama‵liki. Ona ko te motou a‵lofa ki a koutou, ko toka nei matou o ‵kau fakatasi mo koutou i te Tala ‵Lei mai i te Atua, pelā foki mo te tuku atu o omotou ola mō koutou, i te mea e fakapelepele koutou ne matou.”​—⁠1 Tesalonia 2:​7, 8.

18, 19. (a) Kaia e loto fia‵fia ei tatou ke fakamāumāu ‵tou mea i te faiga o te galuega talai? (e) Tuku mai se fakaakoakoga ke fakaasi mai i ei me e lavea ne nisi tino a te alofa telā e fakaasi atu ne tatou.

¹⁸ E penā foki i aso nei, e talai atu a Molimau a Ieova i te lalolagi kātoa ke ‵sala atu ki tino kolā e fia iloa kae fia tavini atu foki ki te Atua. A te ‵tonuga loa, i te 17 tausaga ko ‵teka atu nei, ko oti eiloa ne fakamāumāu ne tatou a itula e sili atu i te piliona i tausaga katoa i te galuega talai mo te faiga o soko​—⁠kae e tumau eiloa tatou i te faiga o te galuega tenā. E fai eiloa tatou penā mo te loto fia‵fia, faitalia me e manakogina i te faiga o te galuega talai a te fakamāumāuga o ‵tou taimi, malosi, mo kope faka-te-foitino. E pelā mo Iesu, e malamalama tatou me e manako te ‵tou Tamana alofa faka-te-lagi ke maua ne tino a te poto telā e takitaki atu ei ki te ola se-gata-mai. (Ioane 17:3; 1 Timoteo 2:​3, 4) E fakamalosi aka tatou ne te alofa ke fesoasoani atu ki tino loto fakamaoni ke iloa kae a‵lofa ki a Ieova e pelā mo tatou.

¹⁹ E lavea atu ne nisi tino a te alofa e fakaasi atu ne tatou. E pelā mo se tuagane paenia i te Iunaite Sitete ne tusi atu ne ia a tusi ke fakamafanafana ki tino kolā ne ‵galo atu olotou tino pele i te mate. I te tali atu ki tou fafine, ne tusi atu se tagata e tokotasi: “A te lagonaga muamua ne maua ne au ko toku ofo me ne taumafai malosi se tino o tusi atu se tusi ki se tino e se iloa ne ia ke fesoasoani atu ke mafai ne ia o kufaki i taimi faiga‵ta. E mafai fua o fakaiku aka ne au me e alofa eiloa koe ki nisi tino mo te Atua telā e takitaki ne ia koe i te auala ki te ola.”

20. E pefea te tāua ke akoako atu mo te alofa?

²⁰ Ne fai pelā me kafai e ga‵lue fakatasi a te alofa mo te atamai, e mafai o iku atu ki se mea gali ‵ki. I ‵tou akoakoga, e taumafai tatou ke fesoasoani atu ki ‵tou tino a‵koga ke ati aka ne latou se mafaufau telā e iloa ne ia a Ieova mo se loto telā e alofa ki a ia. E tonu, ke fai tatou e pelā me ne faiakoga apo, e ‵tau o maua ne tatou a te alofa telā e tolu ana vaega​—⁠ko te alofa ki te Atua, te alofa ki te munatonu, mo te alofa ki tino. I te taimi e ati aka ei ne tatou a te vaegā alofa tenā kae fakaasi atu i te ‵tou galuega talai, e se maua fua ne tatou a te fiafia o te tuku atu o mea kae e maua foki a te lotomalie i te iloa atu me e fakaakoako atu tatou ki a Iesu kae fakafiafia atu foki ki a Ieova.

Ka Tali Mai Pefea ne Koe?

• I te taimi e akoako ei ne tatou a nisi tino ki te tala ‵lei, kaia e tāua ei ke maua ne tatou a

te alofa ki te Atua?

te alofa ki mea e akoako atu ne tatou?

te alofa ki tino kolā e akoako ne tatou?

[Ata i te itulau e 21]

Ne a mea ne fai ei ke ‵kese a te auala e akoako atu ei a Iesu mai faiakoga o te Tulafono mo Falesaio?

[Ata i te itulau e 24]

A te ‵lei o te akoako atu e manakogina i ei a te poto, te atamai, kae sili atu i mea katoa, ko te alofa