Ke Fakaakoako ki te Tino Fai Soko Sili
“Ke fakaeteete koutou, kae faka‵logo faka‵lei.”—LUKA 8:18.
1, 2. Kaia e ‵tau o saga tonu atu koe ki faifaiga a Iesu ki tino i te taimi o tena galuega talai?
NE FAKATAUNU ne Iesu Keliso tena tiute e pelā me se Faiakoga Sili mo te Tino Fai Soko i te taimi ne fai atu ei a ia ki ana soko: “Ke fakaeteete koutou, kae faka‵logo faka‵lei.” (Luka 8:16-18) E aogā eiloa te fakatakitakiga tenā ki tau galuega talai e pelā me se Kelisiano. Kafai e fakalogo faka‵lei koe ki fakatakitakiga faka-te-agaga kae fakagalue eiloa ne koe, ka fai eiloa koe e pelā me se tino talai magoi o te Malo. E tonu, e se lagona tonu ne koe te leo o Iesu i aso nei, kae e mafai o faitau koe e uiga ki ana pati mo ana mea ne fai kolā e fakaasi mai i te Tusi Tapu. Ne a mea ne fakaasi mai i ei e uiga ki te auala ne saga atu ei a Iesu ki tino i te taimi o tena galuega talai?
2 Ne fai a Iesu e pelā me se tino talai tafasili i te ‵lei o te tala ‵lei kae e pelā foki me se faiakoga tu ‵kese o te Tusi Tapu. (Luka 8:1; Ioane 8:28) A te galuega ko te faiga o soko e aofia i ei te talai mo te akoako atu, kae e lavea ne nisi Kelisiano kolā ne tino talai ma‵goi a te faigata ke akoako atu a tino i se auala magoi. E tiga eiloa e aofia i te talai atu a te folafolaatuga o se fekau, a te akoakoatuga o tino e uiga ki a Ieova mo ana fuafuaga e manakogina sāle i ei ke ati aka ne se tino fai soko tena fesokotakiga mo latou. (Mataio 28:19, 20) E mafai o fai te mea tenei, mai te fakaakoako atu ki a Iesu Keliso, te Faiakoga Sili mo te Tino Fai Soko.—Ioane 13:13.
3. Ne a ikuga e mafai o maua ne koe i au taumafaiga ke fakaakoako atu ki a Iesu i te faiga o soko?
3 Kafai e fakaakoako koe ki te auala ne akoako atu ei a Iesu, ko tautali atu koe ki te fakamalosiga a te apositolo ko Paulo: “Ke ‵poto koutou mo otou faiga ki tino se tali‵tonu, ke fakaaogā ‵tau te ukega o taimi. Ke isi se alofa i otou pati e fai sāle, ke faka‵kona foki ki te masima ke tumau tena aogā, ko te mea ke iloa ne koutou o tali atu ki so se tino e fesili mai ki a koutou.” (Kolose 4:5, 6) A te fakaakoako atu ki a Iesu i te galuega ko te faiga o soko e manakogina i ei a taumafaiga, kae ka fai ei ke magoi te auala e akoako atu ei koe me ka fesoasoani atu ki a koe ke mafai o “tali atu ki so se tino e fesili mai” e ‵tusa mo ana manakoga.
Ne Fakamalosi Atu a Iesu ki Nisi Tino ke Fai‵pati
4. Kaia e mafai o fai atu me i a Iesu se tino telā ne fakalogologo faka‵lei?
4 Talu mai i tena folikiga, ne fakalogologo sāle eiloa a Iesu ki tino kae fakamalosi atu ki a latou ke fakaasi mai olotou kilokiloga. E pelā mo te taimi ko 12 ei ana tausaga, ne maua atu ne ana mātua a ia e ‵nofo tasi mo faiakoga i loto i te faletapu, e “fakalogologo kae fai fesili atu ki a latou.” (Luka 2:46) Ne seki fanatu a Iesu ki te faletapu ke fakamasiasi ne ia a faiakoga ona ko tena iloa. Ne fanatu a ia ki konā o fakalogologo, faitalia me ne fai foki ne ia a fesili e uke. Ona ko tena fakalogologo faka‵lei kāti ne fai ei ke alofagina a ia ne te Atua mo tino.—Luka 2:52.
5, 6. E iloa pefea ne tatou me ne fakalogologo a Iesu ki manatu o tino kolā ne akoako ne ia?
5 Mai tua o tena papatisoga mo tena fakaekega e pelā me ko te Mesia, ne fakatumau eiloa ne Iesu a tena fiafia o fakalogologo ki tino. Ne seki saga katoatoa a ia ki ana akoakoga ko ala ei o puli i a ia a tino kolā ne aumai o fakalogo‵logo ki a ia. E masani o manava malie a ia, fesili atu me ne a olotou mafaufauga, kae fakalogologo atu ki olotou tali. (Mataio 16:13-15) E pelā mo te taimi ne mate ei te tuagane o Maleta, ko Lasalo, ne fai atu a Iesu ki tou fafine: “So se tino foki e ola nei kae fakatuanaki ki a au, e se mafai eiloa o mate.” Kae ne fesili atu a ia ki tou fafine: “E talitonu la koe ki te mea nei?” Kae ne fakalogologo faka‵lei eiloa a Iesu ki te tali a Maleta: “Ao e te Aliki! Au e talitonu i a koe ko te Keliso ko te Tama a te Atua.” (Ioane 11:26, 27) Ko tafaga la te fakamalie loto ke lagona atu i pati a Maleta konā a tena fakatuanaki!
6 I te taimi ne tiakina ei ne soko e tokouke a Iesu, ne fiafia a ia o fakalogologo ki manatu o ana apositolo. Telā ne fesili atu ei a ia: “Kae pefea koutou, e fia olo foki koutou keatea?” Ne tali mai a Simona Petelu ki a ia: “Te Aliki, ko oi te tino ka olo matou ki ei? A muna o te ola se-gata-mai, e nofo mo koe. Ko tali‵tonu matou, ka ko iloa foki ne matou i a koe ko te Tamatapu a te Atua.” (Ioane 6:66-69) Ko tafaga la te fakafiafia atu o pati konā ki a Iesu! A te fakaasimaiga ne se tino akoga te vaegā fakatuanaki penā se mea fakafiafia eiloa ki a koe.
Ne Fakalogologo a Iesu mo te Āva
7. Kaia ne tali‵tonu ei a tino Samalia e tokouke ki a Iesu?
7 A te suā pogai ne magoi ei te galuega a Iesu e pelā me se tino fai soko, me ne atafai eiloa a ia ki tino kae fakalogologo foki ki a latou mo te āva. I se taimi e tasi, ne talai atu a Iesu ki se fafine Samalia i tafa o te vaikeli o Iakopo i Sukala. I te lā sau‵talaga, ne seki faipati atu fua a Iesu; kae ne fakalogologo foki a ia ki pati a te fafine. Kae koi fakalogologo a ia ki tou fafine, ne lavea ne Iesu te fiafia o te fafine ki te tapuakiga, kae ne fai atu a ia me e salasala eiloa a te Atua ki tino kolā e tapuaki atu ki a Ia i te agaga mo te munatonu. Ne fakaasi atu ne Iesu te āva mo te fiafia ki te fafine tenei, telā ne fakaasi atu ei ne te fafine ki nisi tino a mea e uiga ki a ia, kae ne “tokouke a tino Samalia mai i te fa‵kai tenā ne tali‵tonu ki a Iesu, ona ko te molimau a te fafine.”—Ioane 4:5-29, 39-42.
8. E mafai pefea o fesoasoani mai ki a koe a te manatu e uiga ki te fia‵fia o tino o fakaasi mai olotou kilokiloga, ke mafai o kamata se sau‵talaga i te galuega talai?
8 E fia‵fia sāle a tino o fakaasi mai olotou kilokiloga. E pelā mo tino Atenai i aso mua, ne fia‵fia latou o fakaasi atu olotou kilokiloga kae fakalogo‵logo ki se mea fou. Ne iku atu te mea tenei ki te lauga magoi a te apositolo ko Paulo i te Fono o Aleopako i te fa‵kai tenā. (Galuega 17:18-34) Kafai e kamata ne koe se sau‵talaga mo se tino i te fale i te galuega talai i aso nei, kāti ka fai atu koe penei, “E āsi mai loa au ki a koe me e fiafia au o fakalogo ki ou manatu e uiga ki [se mataupu].” Ke fakalogologo ki te manatu o te tino, kae fai sou manatu e uiga ki ei, io me fai atu se fesili e uiga ki ei. Ka oti, ko fakaasi atu ei ne koe mo te atafai a mea kolā e fakaasi mai i te Tusi Tapu e uiga ki te mataupu tenā.
Ne Iloa ne Iesu Ana Pati ke Fai Atu
9. Ne a mea ne fai ne Iesu mai mua o fakamatala ne ia a mea katoa i te “Tusi” ki a Kaleopa mo tena taugasoa?
9 Ne iloa faeloa ne Iesu ana pati e ‵tau o fai atu. I tafa o te fai pelā me se tino e fakalogologo faka‵lei, ne masani o iloa faeloa ne ia a mafaufauga o tino, kae iloa ‵lei ne ia ana pati e ‵tau o fai atu. (Mataio 9:4; 12:22-30; Luka 9:46, 47) Ke fai se fakatusa: Mai tua i te toetuga o Iesu, ne sa‵sale atu ana soko e tokolua mai i Ielusalema ki Emau. “Ka koi sau‵tala laua kae mafau‵fau ki ei,” ko muna a te Tusi Tapu, “ne fakapilipili atu Iesu ki o la tafa, olo tasi ei latou. Ka ko faka‵segi o la mata, ke se matea ne laua Iesu. Kae ne fai atu a Iesu ki a laua, ‘Ne a lua tala konā e fai, kae sa‵sale?’ Kae ne ‵tu faka‵logo laua mo te mata fanoanoa. Ne tali mai te tokotasi o laua e igoa ki a Kaleopa, ‘Ko koe fua nei te tino e nofo i Ielusalema, e se ke iloagina a mea ne ‵tupu i lua aso ko ‵teka atu nei?’ Ne fai atu a ia ki a laua, ‘Ne a mea?’ ” Ne fakalogologo eiloa a te Faiakoga Sili kae koi fakamatala atu ne laua me ne akoako ne Iesu te Nasaleta a tino, fai ne ia a vavega, kae ne fakasala a ia ki te mate. Kae nei, ko fai mai a nisi tino me ko oti ne toe fakatu aka a ia mai te mate. Ne tuku eiloa ne Iesu ke fakaasi mai ne Kaleopa mo tena taugasoa a mea e iloa ne laua. Oti aka, fakamatala atu ei ne ia a mea katoa i te “Tusi” kolā e ‵tau o iloa ne laua.—Luka 24:13-27, 32.
10. E mafai pefea o iloa ne koe a kilokiloga fakalotu o se tino telā e fetaui mo koe i te galuega talai?
10 Kāti e seai sau mea e iloa ki manatu o se tino e uiga ki mea tau lotu. Ko te mea ke iloa ne koe, kāti e mafai o fai atu koe me e fiafia eiloa koe o fakalogologo ki manatu o tino e uiga ki te faiga o ‵talo. Kae, kāti e mafai o fesili atu koe, “E mata, e mafaufau koe me e isi eiloa se tino e fakalogologo mai ki ‵talo?” E fakaasi mai i tena tali a mea e uke e uiga ki te kilokiloga mo te tulaga fakalotu o te tino tenā. Kafai e fiafia a ia ki mea fakalotu, kāti e mafai o uke atu au mea e iloa e uiga ki ana kilokiloga mai te fesili atu, “E mata, e talitonu koe me e fakalogologo mai te Atua ki ‵talo katoa, io me e isi ne ‵talo e se talia ne ia?” E mafai o iku atu a vaegā fesili penā ki se sau‵talaga masani. Kafai e mafai o fakaasi atu se manatu mai te Tusi Tapu, se mea ‵lei ke fai ne koe mo te atamai, kae ke se ‵teke atu koe ki ana talitonuga. Kafai e fiafia a ia o fakalogologo ki a koe, kāti ka fiafia a ia ke toe foki atu koe. Kae, e a māfai e fakasae aka ne ia se fesili telā e se mafai ne koe o tali? E mafai o fai au sukesukega kae ke toka o toe foki atu o ‘fakamatala atu a tou fakamoemoega, kae ke fai i te loto maulalo mo te āva.’—1 Petelu 3:15,16.
Ne Akoako ne Iesu a Tino Loto ‵Lei
11. Ne a mea ka fesoasoani atu ki a koe i te ‵sala atu ki tino loto ‵lei ke akoako atu?
11 Ne maua ne te tagata ‵lei katoatoa ko Iesu a te atamai ke mafai o matea ne ia a tino loto ‵lei ke akoako atu. E sili atu te faigata ke iloa ne tatou a “tino loto ‵lei kolā ka mafai o maua te ola se gata mai.” (Galuega 13:48, NW) E penā foki a apositolo kolā ne faipati ki ei a Iesu: “Kafai e oko koutou ki se fa‵kai lasi io me se fa‵kai foliki, fesili io me ‵sala atu me isi se tino e loto malie o talia koutou.” (Mataio 10:11) E pelā mo apositolo a Iesu, e ‵tau o ‵sala atu koe ki tino kolā e talia ke fakalogo‵logo kae tauloto ki muna‵tonu mai i te Tusi Tapu. E mafai o maua ne koe a tino loto ‵lei mai te fakalogologo faka‵lei ki tino e faipati koe ki ei, kae ke iloa foki a uiga o tino taki tokotasi.
12. E mafai pefea o fakatumau ne koe tou fesoasoani atu ki se tino fiafia?
12 Kafai ko oti ne āsi atu koe ki se tino telā ne fiafia ki te fekau o te Malo, e aogā eiloa ke tumau koe i te mafaufau faeloa ki ana manakoga faka-te-agaga. Kafai e tusi ne koe ki lalo a mea ne tauloto ne koe mai tua o te sau‵talaga mo se tino e uiga ki te tala ‵lei, ka fesoasoani atu a te mea tenei ke tumau koe i te fesoasoani atu ki te tino tenā i te feitu faka-te-agaga. I taimi o toe āsiga, e manakogina ke fakalogologo faka‵lei koe māfai e fia iloa ne koe a mea e uke atu e uiga ki talitonuga o se tino, ana uiga, io me ko fakanofonofoga.
13. Ne a mea e mafai o fesoasoani atu ke iloa ne koe a lagonaga o se tino e uiga ki te Tusi Tapu?
13 E mafai pefea o fakamalosi atu koe ki tino ke fakaasi atu olotou lagonaga e uiga ki te Muna a te Atua? I nisi koga, se mea magoi ke fesili atu penei, “E mata, kai taumafai aka loa koe ke malamalama i te Tusi Tapu?” A te tali ki te fesili tenā e masani o fakaasi mai i ei te kilokiloga a se tino ki mea faka-te-agaga. A ko te suā auala ko te faitau ki se tusi siki kae fesili atu, “E mata, e ‵tagi ‵lei a te mea tenā ki a koe?” E pelā mo Iesu, e mafai o apo malosi koe i te galuega talai mai te fakaaogāga o fesili ma‵goi. Kae, e isi se mea e ‵tau o fakaeteete tatou i ei.
Ne Fakaaogā ne Iesu a Fesili Ma‵goi
14. E aunoa mo te sukesuke ne koe a tino, e mafai pefea o fakaasi atu ne koe tou fiafia ki olotou kilokiloga?
14 Ke fakaasi atu te fiafia ki manatu o nisi tino e aunoa mo te fakamasiasi atu ki a latou. Ke tau‵tali i faifaiga a Iesu. Ne seki fai a ia e pelā me se tino e sukesuke ki fakalavelave totino o te tino, kae ne fakaaogā eiloa ne ia a fesili aogā. Ne fai foki a Iesu e pelā me se tino telā e fakalogologo mo te atafai telā e fakamalosi ne ia a tino loto fakamaoni kae fai foki ke se ma‵taku i a ia. (Mataio 11:28) Ne faigofie fua ki tino valevale ke fai‵pati atu ki a ia e uiga ki olotou fakalavelave. (Maleko 1:40; 5:35, 36; 10:13,17, 46, 47) Kafai e faigofie ke fakaasi atu ne tino takitokotasi olotou kilokiloga e uiga ki te Tusi Tapu mo akoakoga i ei, e se ‵tau o sukesuke ne koe a latou.
15, 16. E mafai pefea o fai ne koe a tino ke fia sau‵tala ki mea fakalotu?
15 I tafa o te fakaaogāga o fesili ma‵goi, e mafai o fakasae aka ne koe se mataupu gali ke kamata ki ei te sau‵talaga ko fakalogologo ei koe ki manatu kolā e fai ki ei. E pelā mo pati a Iesu ki a Nikotemo: “Kafai e se toe fanau mai se tino, e se mafai eiloa o matea ne ia a te Malo o te Atua.” (Ioane 3:3) Ona ko te ‵gali ‵ki o pati konā ne seki mafai o taofi aka ne Nikotemo a te tali atu mo te fakalogologo ki a Iesu. (Ioane 3:4-20) I se auala tai ‵pau, e mafai foki o fai ne koe a tino ke fia‵fia o sau‵tala.
16 I aso nei, a te ‵saemaiga o lotu fou e uke se mataupu gali telā e fia‵fia o sau‵tala ki ei a tino i fenua pelā mo Afelika, Eulopa ki Saegalā, mo Latina Amelika. I vaegā koga penei, e mafai faeloa o kamata ne koe se sau‵talaga mai te fai atu: “E mafaufau ‵mafa sāle au ki te uke o lotu. Kae e fakamoemoe au i se taimi pili mai mua nei ke lavea atu a tino mai atufenua katoa e ‵kau fakatasi i te tapuakiga tonu. E mata, e ‵tagi ‵lei a te mea tenā ki a koe?” Mai te fai atu ne koe se mea fakaofoofogia e uiga ki tou fakamoemoega, kāti ka mafai o fakaasi mai ne tino olotou kilokiloga. Kae e faigofie ke tali atu a fesili māfai e lua a tali mautinoa ki ei. (Mataio 17:25) Kafai ko oti ne tali mai te tino ki tau fesili, ke fai atu tau tali fakatasi mo se tusi siki e tasi io me lua. (Isaia 11:9; Sefanaia 3:9) Mai te fakalogologo faka‵lei kae tusi ki lalo te tali a te tino, ka mafai o iloa ne koe a mea e ‵tau o sau‵tala ki ei i te suā āsiga.
Ne Fakalogo a Iesu ki Tama‵liki
17. Se a te mea ne fakaasi mai me ne fiafia a Iesu ki tama‵liki?
17 Ne seki fakaasi atu fua ne Iesu tena fiafia ki tino ma‵tua, kae e penā foki loa ki tama‵liki. E iloa ne ia a tafaoga kolā e fia ta‵fao ki ei a tama‵liki mo pati e fai atu ne latou. E ‵kami ne ia a tama‵liki i nisi taimi ke olo atu ki a ia. (Luka 7:31, 32; 18:15-17) Ne aofia a tama‵liki e tokouke i vaitino kolā ne fakalogo‵logo ki a Iesu. I te taimi ne ka‵laga atu ei a tama‵liki tāgata o ‵viki atu ki te Mesia, ne lavea ne Iesu te mea tenā kae ne fakaasi atu foki ne ia me ko oti ne ‵valo mai ne te Tusi Tapu a te mea tenei. (Mataio 14:21; 15:38; 21:15, 16) I aso nei, e tokouke a tama‵liki ko fai pelā me ne soko o Iesu. Tela la, e mafai pefea o fesoasoani atu koe ki a latou?
18, 19. E mafai pefea o fesoasoani atu koe ki tau tamaliki i te feitu faka-te-agaga?
18 Ke fesoasoani atu ki tau tamaliki i te feitu faka-te-agaga, e ‵tau o fakalogologo koe ki a ia. E ‵tau o maina koe i ana manatu kolā kāti e se fetaui mo mafaufauga o Ieova. Faitalia me ne a pati a tau tamaliki e fai mai, se mea poto ke fakamālō muamua atu ki a ia. Ko mafai ei ne koe o fakaaogā a tusi siki kolā e mafai o fesoasoani atu ki tau tamaliki ke malamalama i te kilokiloga a Ieova ki mea tāua.
19 E tāua ‵ki a te faiga o fesili. Kae e se fia‵fia eiloa a tama‵liki ke sukesuke aka a latou e pelā eiloa mo tino ma‵tua. I lō te tuku atu ki tau tamaliki te amoga ‵mafa ke tali a fesili ‵mafa e uke, kaia e se fai atu i ei ne koe se fakamatalaga toetoe e uiga ki a koe? E ‵tusa mo te mataupu telā e sau‵tala ki ei, kāti e mafai o fai atu koe me ne penā foki ou lagonaga kae ke fakamatala atu te pogai ne fai ei penā. Ka oti, e mafai o fesili atu koe, “E mata, e penā foki ou lagonaga?” E mafai o iku atu a te tali a tau tamaliki ki se sautalaga faka-te Tusi Tapu aogā kae fakamalosi loto.
Ke Tumau i te Fakaakoako Atu ki te Tino Fai Soko Sili
20, 21. Kaia e ‵tau ei o fai koe e pelā me se tino fakalogologo faka‵lei i tau galuega e pelā me se tino fai soko?
20 Faitalia me e sau‵tala koe mo tau tamaliki io me se isi tino ki se mataupu, e tāua ‵ki a te fakalogologo faka‵lei. Kae, se fakaasiga tonu foki eiloa o te alofa. Mai te fakalogologo, ko fai eiloa ne koe se faifaiga loto maulalo, kae ko fakaasi atu foki loa i ei a te āva mo te alofa atafai ki te tino telā e faipati mai. E tonu, a te fakalogologo e manakogina i ei a tou saga tonu atu ki mea kolā e fakaasi mai ne te tino.
21 I te taimi e fai ei ne koe te galuega faka-Kelisiano, ke tumau i te fakalogologo faka‵lei ki tino. Kafai e saga faka‵lei atu koe ki olotou pati e fai, ka mafai o iloa ne koe me ne a vaega o muna‵tonu mai i te Tusi Tapu kolā e mafai o fia‵fia latou ki ei. Ko taumafai ei koe o fesoasoani malosi atu ki a latou mai te fakaaogāga o auala kese‵kese kolā ne akoako atu ei a Iesu. Mai te fai penā, ka maua ne koe te fiafia mo te lotomalie me ko fakaakoako eiloa koe ki te Tino Fai Soko Sili.
Ka Tali Mai Koe Pefea?
• Ne fakamalosi atu pefea a Iesu ki nisi tino ke fakaasi mai olotou manatu?
• Kaia ne fakalogologo ei a Iesu ki tino kolā e akoako ne ia?
• E mafai pefea o fakaaogā ne koe a fesili i te galuega talai?
• Ne a au mea e mafai o fai ke fesoasoani atu ki tama‵liki i te feitu faka-te-agaga?
[Fakamatalaga o te Ata i te itulau e 6]
Kafai e talai atu, masaua o fakalogologo faka‵lei
[Fakamatalaga o te Ata i te itulau e 8]
E fakaakoako atu tatou ki a Iesu māfai e fesoasoani atu tatou ki tama‵liki i te feitu faka-te-agaga