E Mata, e ‵Lago Atu Koe ki te Pulega Sili a Ieova?
“Fai atu ki malo katoa penei, ‘Te Aliki [ko Ieova] ko te tupu!’ ”—SALAMO 96:10.
1, 2. (a) Se a te mea fakaofoofogia telā ne tupu i a Oketopa i te 29 T.A.? (e) Se a te uiga o te mea tenā ki a Iesu?
N E TUPU se mea fakaofoofogia telā ne seki tupu aka eiloa muamua i te lalolagi, i a Oketopa i te 29 T.A. E lipoti mai te tino tusitala o te Evagelia ko Mataio: “I te otiga o Iesu ne papatiso, fanake ei mai te vai. Ne matala te lagi ki a ia, kae ne matea foki ne [Ioane te Papatiso] a te Agaga o te Atua ko fanaifo, e tino mai e pelā mo se lupe, e fakape‵pepe i . . . luga [i a Iesu]. Ne faipati mai a te leo mai te lagi penei, ‘Tenei eiloa taku Tama fagasele e fiafia au ki ei.’ ” Tenei eiloa te mea e tasi mai nisi mea, telā ne fakamau ne tino tusitala katoa e tokofa i tusi Evagelia.—Mataio 3:16, 17; Maleko 1:9-11; Luka 3:21, 22; Ioane 1:32-34.
2 A te ‵ligiatuga o te agaga tapu ki luga i a Iesu ne fakamailoga ei a ia e pelā me ko te Tino Fakaekegina, telā e fakauiga ki te Mesia, io me ko te Keliso. (Ioane 1:33) Ne fatoā sae mai eiloa fakamuli te “fanau” telā ne folafola mai! Ne tu atu eiloa i mua o Ioane te Papatiso, a te tino telā ka fakapakia ne Satani tena vae kae ka tuki pala ne ia te ulu o te fili sili tenā o Ieova mo Tena pulega sili. (Kenese 3:15) Talu mai te taimi tenā, ne iloa ‵lei ne Iesu me e ‵tau o taumafai malosi a ia ke fakataunu te fuafuaga a Ieova e uiga ki Tena pulega sili mo te Malo.
3. Ne fakatoka pefea Iesu mō te galuega ka fai ne ia ke ‵lago atu ki te pulega sili a Ieova?
3 Ko te mea ke toka tou tagata mō te galuega telā ko pili mai, “ne foki mai a Iesu i te Iolitana, ko ‵fonu i te agaga tapu, kae ne takitaki ne te agaga tapu ki te vao.” (Luka 4:1; Maleko 1:12) Ne maua ne Iesu se avanoaga mō se 40 aso i konā, ke mafaufau ‵loto ki te kinauga e uiga ki te pulega sili telā ne fakasae aka ne Satani, mo te auala e ‵tau o taofi ‵mau a Ia ki ei ke ‵lago atu ei ki te pulega sili a Ieova. E aofia i te mataupu tenā a tino ‵poto katoa—i te lagi mo te lalolagi. Tela la, se mea ‵lei ke mafau‵fau tatou ki te olaga fakamaoni o Iesu, kae ke iloa ne tatou a mea e ‵tau o fai ke fakaasi atu ei me e ma‵nako tatou o ‵lago atu ki te pulega sili a Ieova.—Iopu 1:6-12; 2:2-6.
Te Kinauga ne Fakasae Aka e Uiga ki te Pulega Sili
4. Se a te mea ne fai ne Satani telā ne fakasae aka ei te kinauga e uiga ki te pulega sili?
4 E tonu, e seai eiloa se mea i mea kolā ne fakasae aka ne ‵funa mai i a Satani. E aunoa mo te fakamāumāu taimi, ne taua atu tou tagata ki te “fanau” fakavae a te “fafine” a te Atua. (Kenese 3:15) Ne tofotofo fakatolu ne Satani a Iesu, mai i te fai atu me e ‵tau o fai ne Iesu a te mea telā e ‵lei atu ki a ia i lō te mea telā e manako tena Tamana ke fai ne ia. A te tolu o tofotofoga ne fakasae tonu aka i ei a te kinauga e uiga ki te pulega sili. Mai i te fakaasi atu ki a Iesu “a malo o te lalolagi mo olotou ‵malu,” ne fai ‵tonu atu a Satani ki a Iesu: “E avatu katoa ne au ki a koe a mea konei, manafai koe e totuli ifo o tapuaki mai ki a au.” Ona ko te mea ne iloa ‵lei ne ia me e pule atu a te Tiapolo ki “malo katoa o te lalolagi,” ne fakaasi atu ne Iesu Tena tulaga i te kinauga e uiga ki te pulega sili, mai i te tali atu: “Fano keatea e Satani! Muna a te Tusi Tapu, ‘Tapuaki ki te Aliki [ko Ieova] tou Atua, me ko ia fua e tavini koe ki ei!’ ”—Mataio 4:8-10.
5. Se a te tofiga faigata telā ne ‵tau o fakataunu ne Iesu?
5 Ne fakaasi manino mai i te olaga o Iesu me i te fakamalugāga o te pulega sili a Ieova ko te ‵toe fakamoemoega tāua ki a ia. Ne iloa ‵lei ne Iesu me e ‵tau o tumau a ia i te fakamaoni ke oko ki te mate i lima o Satani—telā ne ‵valo mai e pelā mo te fakapakiaga o te vae o te “fanau” a te fafine—ko te mea ke fakamaoni atu ei te ‵tonu o te pulega sili a te Atua. (Mataio 16:21; 17:12) Ne ‵tau foki o molimau atu a ia ki te manatu tonu me i te Malo o te Atua ko te mea faigaluega telā ko oti ne talia ne Ieova ke fakatakavale a te tino ‵teke ko Satani, kae toe fakafoki mai ei te filemu mo te tokagamalie ki mea katoa ne faite. (Mataio 6:9, 10) Ne a mea ne fai ne Iesu ke fakataunu ei tena tofiga faigata tenei?
‘Ko Pili Mai te Malo o te Atua’
6. Ne fakailoa atu pefea ne Iesu me i te Malo ko te auala telā ka fakaaogā ne te Atua ke “fakamalepe a te galuega a te Tiapolo”?
6 Muamua la, ne “fanatu ei a Iesu ki Kalilaia o folafola atu a te Tala ‵Lei mai te Atua. Ana muna: ‘Ko oko nei ki te taimi tonu, ka ko te Malo o te Atua ko pili mai!’ ” (Maleko 1:14, 15) A te ‵tonuga loa, ne fai atu a ia: “E ‵tau mo au o takutaku atu a te Tala ‵Lei o te Malo o te Atua ki nisi fa‵kai, me tenā eiloa te mea ne uga mai ei au ne te Atua, ke vau o fai.” (Luka 4:18-21, 43) Ne faimalaga atu Iesu ki kogā koga katoa o te fenua, “o takutaku atu te Tala ‵lei e uiga ki te Malo o te Atua.” (Luka 8:1) Ne fai foki ne Iesu a galuega ‵mana e uke—mai te fagaiga o te vaitino, te fakamalūga o te matagi, faka‵leiga o ma‵saki o tino, mo te faka‵tuakaga o tino ‵mate. E auala i vavega konei, ne fakamaoni ei ne Iesu me e mafai o toe faka‵lei aka ne te Atua a mea katoa kolā ne fakamaseigina mo logo‵maega kolā ne iku mai i te ‵tekeatuga i Etena kae “fakamalepe a te galuega a te Tiapolo.”—1 Ioane 3:8.
7. Se a te mea ne fakatonu atu ne Iesu ki ana soko ke fai, kae se a te mea ne iku mai i ei?
7 Ko te mea ke folafola atu te tala ‵lei e uiga ki te Malo i te ‵toe auala e mafai, ne fakamaopoopo ei ne Iesu se potukau o soko fakamaoni kae akoako atu latou ki te faiga o te galuega tenā. Muamua la, ne fakatonu ne ia ana apositolo e toko 12 kae “uga ei latou ne ia ke olo o takutaku atu a te tala i te Malo o te Atua.” (Luka 9:1, 2) Kae ne uga atu ne ia a nisi soko e toko 70 ke folafola atu te fekau: “A te Malo o te Atua ko pili mai ki a koutou.” (Luka 10:1, 8, 9) I te taimi ne ‵foki atu ei a soko konei kae lipoti atu ki a Iesu a te manuia o latou i te faiga o te galuega talai o te Malo, ne tali atu a ia: “Ne lavea ne au Satani e to ifo pelā me se uila mai i luga i te lagi.”—Luka 10:17, 18.
8. Se a te mea ne fakaasi manino mai i te olaga kātoa o Iesu?
8 Ne seki fakatamala lele eiloa Iesu i so se avanoaga ke molimau atu ki te Malo. Ne galue faeloa a ia, mai te tavini atu i te ao mo te po, ke oko foki eiloa ki te fulitua atu ki te olaga masani. Ne fai atu a ia: “E isi ne lua o alope, mo manueva e isi foki ne olotou ofaga, ka ko au te Tama a te Tagata, e seai se koga mo oku fakatapū.” (Luka 9:58; Maleko 6:31; Ioane 4:31-34) Mai mua malie o tena mate, ne fai atu Iesu mo te loto toa i mua o Ponitio Pilato: “Tenā te mea ne fanau mai ei au, kae ne vau foki ei au ki te lalolagi nei, ke molimau au ki te munatonu.” (Ioane 18:37) Ne fakaasi mai i te olaga kātoa o Iesu me ne vau a ia, e se pelā fua me se faiakoga sili io me se tino fai vavega io me se Fakaola telā e talia ne ia mea faiga‵ta, kae ke ‵lago atu ki te loto o te pulega sili a Ieova kae molimau atu foki ki te mafai o fakataunu ne te Atua tena loto e auala i te Malo.—Ioane 14:6.
‘Ko Oti ne Fakataunu!’
9. Ne iku manuia pefea a Satani i te fakapakiaga o te vae o te “fanau” a te fafine a te Atua?
9 A mea katoa kolā ne fai ne Iesu e uiga ki te Malo ne seki fakafiafia atu ki te Fili Sili, ko Satani te Tiapolo. Mai te fakaaogāga faeloa o te vaega i te lalolagi nei o tena “fanau”—ko malo fakapolitiki mo lotu—ne taumafai a Satani o tamate aka te “fanau” a te fafine a te Atua. Mai i te taimi ne fanau mai ei a ia ke oko ki te fakaotiga o tena olaga i te lalolagi, ne fai faeloa a Iesu mo fai te taketi a Satani mo ana taugasoa. I te fakaotiga, i te ‵tau mafanafana i te 33 T.A., ne oko atu ei ki te taimi ke tuku atu te Tama a te tagata ki lima o te Fili ke fakapakia ne ia tena vae. (Mataio 20:18, 19; Luka 18:31-33) E fakaasi manino mai i tala a Evagelia a te auala ne takitaki ei a tino—mai i a Iuta te Isikaliota ki faitaulaga pule, faiakoga o te tulafono, te kau Falesaio, mo te kau Loma—ne Satani ke fakamasei ne latou a Iesu kae tamate foki ne latou i se auala fakasauā i luga i te sataulo.—Galuega 2:22, 23.
10. Se a te ‵toe mea tāua ne fakataunu mai ne Iesu e auala i tena mate i luga i te sataulo?
10 Se a te mea e masaua ne koe māfai e mafaufau ki te logo‵mae o Iesu i luga i te sataulo i se mate fakalogo‵mae kae faigata? Kāti e masaua ne koe te taulaga togiola telā ne tuku atu ne Iesu mo te kaimalie mō tino agasala katoa. (Mataio 20:28; Ioane 15:13) Kāti e mafai o ofo koe i te lasi o te alofa ne fakaasi atu ne Ieova i te tukumaiga o te taulaga tenā. (Ioane 3:16) Kāti e ‵pau ou lagonaga mo te ofisa o te kautau Loma telā ne fakaosofia ke fai atu: “E tonu, ko te Tama eiloa tenei a te Atua!” (Mataio 27:54) E ‵tonu katoa eiloa a kilokiloga konei. I te suā feitu la, mafaufau ki toe pati a Iesu i luga i te sataulo: “Ko oti!” (Ioane 19:30) Se a te mea ko oti ne fakataunu? E tiga eiloa ne fakataunu mai i te olaga mo te mate o Iesu a mea e uke, e mata, a te kinauga e uiga ki te pulega sili a Ieova e se ko te ‵toe pogai tāua ne vau ei a Iesu ki te lalolagi? Kae e mata, e seki ‵valo mai me e pelā me ko te “fanau,” ka logo‵mae a ia i tofotofoga ‵lasi i lima o Satani ko te mea ke faka‵ma aka ei te igoa o Ieova mai i taku fakamaseiga katoa? (Isaia 53:3-7) A mea konei ne tiute ‵mafa ‵ki, kae ne fakataunu ne Iesu a mea konā i feitu katoa. Ko tafaga la te uke o mea ne fakataunu mai i ei!
11. Se a te mea ka fai ne Iesu ke fakataunu katoatoa mai i ei te valoaga i Etena?
11 Ona ko te fakamaoni mo tena toaga, ne fakatu mai ei a Iesu, e se pelā me se tino faka-te-foitino, kae e pelā me se “Agaga fakaola ki tino.” (1 Kolinito 15:45; 1 Petelu 3:18) Ne tauto atu a Ieova ki tena Tama telā ko oti ne faka‵malugina: “Nofo i konei i toku feitu fakaatamai, ke oko ki te taimi e tuku atu ei ne au ou fili ke ‵nofo mai lalo o ou vae.” (Salamo 110:1) E aofia i “fili” konā a te tino ‵teke sili ko Satani, mo latou kolā e aofia i tena “fanau.” E pelā me ko te Tupu i te Malo faka-Mesia o Ieova, ka fai eiloa ne Iesu Keliso te takitakiga i te fakaseaiga o tino ‵teke katoa, i te lagi mo te lalolagi. (Fakaasiga 12:7-9; 19:11-16; 20:1-3, 10) Kae ka lavea atu i ei te fakataunuga katoatoa o te valoaga i te Kenese 3:15 e pelā foki mo te ‵talo ne akoako ne Iesu ki ana soko: “Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.”—Mataio 6:10; Filipi 2:8-11.
Se Fakaakoakoga ke Tau‵tali Atu ki ei
12, 13. (a) E pefea te kilokiloga a tino ki te tala ‵lei o te Malo telā e lavea atu i aso nei? (e) Ne a mea e ‵tau o mafau‵fau tatou ki ei e uiga ki te tau‵tali atu i kalafaga o Iesu?
12 I aso nei, a te tala ‵lei o te Malo ko talai atu i fenua e uke, e pelā eiloa mo te valoaga ne fai mai ne Iesu. (Mataio 24:14) Ne iku atu i ei ki te tuku atu ne te fia miliona o tino olotou olaga ki te Atua. E fia‵fia latou ki fakamanuiaga kolā ka aumai ne te Malo. E olioli eiloa latou ke ola ki te se-gata-mai i te filemu mo te tokagamalie i te lalolagi palataiso, kae e fakailoa atu ne latou mo te fiafia te lotou fakamoemoega ki nisi tino. (Salamo 37:11; 2 Petelu 3:13) E mata, e aofia koe i tino talai o te Malo konei? Kafai e penā loa, e ‵tau eiloa o fakamālō atu ki a koe. Kae e isi aka foki se mea telā e ‵tau mo tatou taki tokotasi o mafau‵fau ki ei.
13 Ne tusi mai te apositolo ko Petelu: “I a Keliso ne puapuagātia mō koutou, kae tuku atu foki ne ia ki a koutou te fakaakoakoga, ke tau‵tali ei koutou i ona kalafaga.” (1 Petelu 2:21) Mafaufau la, me ne taku atu ne Petelu i konei a logo‵maega o Iesu, kae e se ko tena loto finafinau i te galuega talai io me ko tena atamai i te akoako atu. Ona ko te mea ne molimau atu a ia ki ei, ne iloa ‵lei ne Petelu a te lasi o te loto fiafia o Iesu ke logo‵mae, ko te mea ke ‵lago atu ei ki te pulega sili a Ieova kae fakamaoni atu foki me i a Satani se tino loi. Ne a auala e mafai o tau‵tali atu ei tatou i kalafaga o Iesu? E ‵tau o fesili ifo tatou penei: ‘E pefea te lasi o toku loto fiafia ke logo‵mae ko te mea ke ‵lago kae fakaaloalo atu ki te pulega sili a Ieova? E mata, e fakaasi atu ne au i te auala e ola ei au mo te auala e fai ei taku taviniga me i te fakamalugāga o te pulega sili a Ieova ko te ‵toe mea tāua ki a au?’—Kolose 3:17.
14, 15. (a) Ne saga atu pefea a Iesu ki manatu ‵se mo avanoaga kolā ne ofo atu ki a ia, kae kaia? (e) Se a te kinauga telā e ‵tau o masaua faeloa ne tatou? (Ke aofia a fakamatalaga i te pokisi ko te “Ke na ‵Lago Atu ki te Feitu o Ieova.”)
14 E fe‵paki tatou i aso katoa mo tofotofoga mo fakaikuga ‵lasi kae fo‵liki. Se a te mea e ‵tau o fakamalosi mai ki te auala e ‵saga atu ei tatou ki ei? E pelā mo te fakafesagai atu ki se tofotofoga ke fai se mea telā ka fakamasei ei ‵tou tulaga faka-Kelisiano, ka pefea la ‵tou kilokiloga ki ei? I te taimi ne fai atu ei a Petelu ki a Iesu ke atafai atu ki a ia, se a te kilokiloga a Iesu? “Satani, fano keatea mai i a au.” Ko muna a Iesu. “Ou mafaufauga, e se ne mafaufauga faka te Atua, kae ne mafaufauga faka te foitino!” (Mataio 16:21-23) Kafai ko maua ne tatou a avanoaga ke momea aka te ‵lei i mea tau tupe io me ko galuega ‵togi kolā e mafai o pokotia i ei ‵tou malosi faka-te-agaga, e mata, e ‵pau te ‵tou kilokiloga mo Iesu? I te taimi ne iloa ei ne Iesu me i tino kolā ne lavea ne latou ana vavega ka o‵mai o “puke fakamalosi a ia mo fai te lotou tupu,” ne fano fakavave keatea a ia mai i a latou.—Ioane 6:15.
15 Kaia ne ‵teke malosi atu ei a Iesu i feitu konei mo nisi taimi? Ona ko te mea ne lavea ‵lei ne ia se mea telā e tāua atu i lō tena puipuiga io me ko tena ‵lei eiloa. Ne manako a ia ke fai te loto o tena Tamana kae fakamaluga aka te pulega sili a Ieova faitalia a ikuga o te faiga penā. (Mataio 26:50-54) Tela la, kafai e se masaua faka‵lei ne tatou te kinauga tonu, e pelā mo te mea ne fai ne Iesu, ka isi faeloa se tulaga fakamataku ke gutugutulua io me ke taka‵vale tatou. Kaia? Me e faigofie fua o ‵to atu tatou ki matāsele a Satani, telā e poto ‵ki i te faiga o mea ma‵sei ke foliga ‵gali mai, e pelā mo te mea ne fai ne ia i te fakaosoosoga o Eva.—2 Kolinito 11:14; 1 Timoteo 2:14.
16. Se a te ‵tou fakamoemoega tāua i te fesoasoani atu ki nisi tino?
16 I te ‵tou galuega talai, e taumafai tatou ke fai‵pati atu ki tino e uiga ki mea e manava‵se latou ki ei kae fakaasi atu a tali mai i te Tusi Tapu. Tenei eiloa te auala magoi ke fakamalosi aka ei te lotou fia‵fia o suke‵suke ki te Tusi Tapu. Kae ko te ‵tou fakamoemoega sili e se ko te fesoasoani atu fua ki tino ke iloa ne latou a muna a te Tusi Tapu io me ko fakamanuiaga kolā ka aumai ne te Malo o te Atua. E ‵tau mo tatou o fesoasoani atu ke malamalama latou i te kinauga tonu e uiga ki te pulega sili a Ieova. E mata, e loto fia‵fia ke fai latou mo Kelisiano ‵tonu kae amo aka olotou “sataulo” kae ke logo‵mae mō te ‵lei o te Malo? (Maleko 8:34) E mata, e toka latou ke ‵kau fakatasi mo tino kolā e ‵lago atu ki te pulega sili a Ieova kae fakamaoni atu me i a Satani se tino loi kae se tino gutu fatufatu foki? (Faataoto 27:11) Se tulaga taulia eiloa ke fesoasoani ifo tatou ki a tatou eiloa mo nisi tino foki ke fai penā.—1 Timoteo 4:16.
Te Taimi ka ‘Pule ei te Atua i Mea Katoa’
17, 18. Se a te taimi gali telā e mafai o olioli tatou ki ei māfai e fakaasi atu me e ‵lago atu tatou ki te pulega sili a Ieova?
17 Kafai e taumafai malosi tatou ke fakaasi atu i ‵tou amioga mo ‵tou taviniga me e ‵lago atu tatou ki te pulega sili a Ieova, e mafai o ‵kilo atu tatou ki te taimi telā ka “tuku atu a te Malo o te Atua ki te Atua te Tamana” ne Iesu Keliso. Ka tupu mafea te mea tenā? E fakamatala mai te apositolo ko Paulo: “Ka oko mai te fakaotiga; ka fakatakavale ne Keliso a pule katoa fakatemoni. . . . Me e ‵tau eiloa o pule a Keliso ke oko ki te taimi ko oti ne tuku ne te Atua a fili o Keliso mai lalo i ona vae. Kafai ko palele ne tuku mea katoa mai lalo i a ia, tela la, ka nofo foki mai lalo a te Tama i a ia telā ne tuku ne ia mea katoa mai lalo i a ia, ko pule te Atua i mea katoa.”—1 Kolinito 15:24, 25, 28.
18 Kafai ko pule te Atua “i mea katoa”—ko tafaga la te gali o te taimi tenā! Ka fakataunu mai i ei te fakamoemoega o te Malo. Ka fakaseai atu ei a tino katoa kolā e ‵teke ki te pulega sili a Ieova. Ka toe fakafoki mai te filemu mo te tokagamalie ki te lagi mo te lalolagi. E pelā mo pati a te faisalamo, ka usu atu penei a mea ola katoa: “‵Viki atu ki te igoa ‵malu o [Ieova] . . . Fai atu ki malo katoa penei, ‘[Ieova] ko te tupu!’ ”—Salamo 96:8, 10.
E Mafai o Tali Mai ne Koe?
• Ne fakamuamua faeloa pefea ne Iesu te kinauga e uiga ki te pulega sili a te Atua?
• Se a te ‵toe mea tāua ne fakataunu ne Iesu e auala i tena taviniga mo tena mate?
• Ne a auala e mafai o tau‵tali atu ei tatou ki te fakaakoakoga a Iesu i te fakaasiatuga me e ‵lago atu tatou ki te pulega sili a Ieova?
[Fakamatalaga o te Ata i te itulau e 15]
KE NA ‵LAGO ATU KI TE FEITU O IEOVA
E pelā mo te mea e iloa ne taina e tokouke i Kolea e pelā foki mo nisi koga aka, kafai e fe‵paki tonu a Kelisiano mo tofotofoga faiga‵ta, e fesoasoani malosi mai ke masaua faka‵lei ne tatou a te pogai e oko mai ei a vaegā tofotofoga penā ki luga i a latou.
Ne fai mai se tokotasi o Molimau a Ieova telā ne ‵pei ki te falepuipui i taimi o te pulega a te Soviet, me i “te mea telā ne fesoasoani mai ki a matou ke kufaki, ko te malamalama faka‵lei i te kinauga telā ne fakasae aka i te fatoaga o Etena—te kinauga e uiga ki te aiā o te Atua ke pule mai. . . . Ne iloa ne matou me ne maua eiloa se avanoaga ke ‵lago atu ki te pulega sili a Ieova. . . . Ne fai ne te mea tenei ke ma‵losi matou kae ke tumau foki te motou fakamaoni.”
Ne fakamatala mai ne te suā Molimau a te mea ne fesoasoani atu ki a ia mo ana taina Molimau i se falepuipui telā ne ‵mafa ‵ki a galuega i ei. Ne fai mai tou tagata: “Ne fesoasoani mai eiloa a Ieova ki a matou. Faitalia eiloa a tulaga faiga‵ta, ne tumau matou i te matapula‵pula i te feitu faka-te-agaga. Ne fakatau fakamalosi eiloa matou ki te manatu aogā me ne ‵lago atu matou ki te feitu o Ieova i te kinauga e uiga ki te pulega sili i te lagi mo te lalolagi.”