Te Auala E Fakamaluga Ei Ne Iesu A Te Amiotonu O Te Atua

“Ne tuku mai ne te Atua [a Keliso] e pelā mo se taulaga o agasala a tatou i tena toto, kae maua i te fakatuanaki. Ne fai a te mea nei, ko te mea ke fakaasi mai ei te amiotonu a te Atua.”​—LOMA 3:25.

1, 2. (a) Se a te mea e akoako mai i te Tusi Tapu e uiga ki te tulaga o tino? (e) Ne a fesili ka mafau‵fau tatou ki ei i te mataupu tenei?

KO LAUILOA nei a te tala faka-te-Tusi Tapu e uiga ki te ‵tekeatuga i te fatoaga o Etena. Ko lavea atu ne tatou katoa a te ikuga o te agasala a Atamu e ‵tusa mo pati konei: “Ne oko mai te agasala ki te lalolagi i te tagata e tokotasi, ne aumai foki ne tena agasala te mate. Tela la, ko oko ki tino katoa te mate, i te mea ko agasala a tino katoa.” (Loma 5:12) E tiga eiloa a ‵tou taumafaiga ke fai a te mea tonu, e fai ne tatou a mea ‵se, telā e manakogina i ei a te fakamagaloga a te Atua. Ne fai mai foki a te apositolo ko Paulo mo te fanoanoa, penei: “Me e se fai ne au te ‵lei e manako au ki ei o fai, kae fai eiloa ne au te masei telā e se manako au ki ei o fai. Ko seai la se tino malaia penei mo au!”​—Loma 7:19, 24.

² Ona ko ‵tou tulaga agasala, se mea ‵lei ke ‵sili ifo ne tatou a fesili tāua konei: Ne mafai pefea o fanau mai a Iesu te Nasaleta kae sē agasala, kae kaia ne papatiso ei a ia? Kaia ne fakamaluga ei ne Iesu a te amiotonu o Ieova i tena olaga? A ko te ‵toe mea tāua, se a te mea ko oti ne fakataunu e auala i te mate o Keliso?

Ko Fakafesili te Amiotonu o te Atua

3. Ne fakaloiloi pefea ne Satani a Eva?

³ Ne ‵teke atu mo te va‵lea a ‵tou mātua muamua, ko Atamu mo Eva ki te pulega a te Atua kae ne ‵nofo mai lalo i te pulega a “te gata taumua eiloa telā e igoa ki te Tiapolo io me ko Satani.” (Fakaasiga 12:9) Mafaufau ki te auala ne tupu ei a te fakalavelave tenei. Ne fakafesili ne Satani a te amiotonu o te pulega a Ieova te Atua. Ne fai ne ia penā mai te fesili atu ki a Eva penei: “E tonu eiloa i te Atua ne fai atu ke sa ‵kai koulua ki fuaga o so se lakau i te fatoaga?” Ne taku atu ne Eva a te fakatonuga manino a te Atua me e tasi fua te lakau e se ‵tau o ‵kai lāua ki ei, me i a lāua ma ‵mate. Kae ne ‵losi atu a Satani i te Atua e loi. “A te mea tenā sē se mea tonu; a koulua e se ‵mate,” ko muna a te Tiapolo. Ne fakaloiloi eiloa ne ia a Eva ke talitonu me e isi se mea gali telā e ‵funa ne te Atua, kae kafai e kai a ia ki te fuaga o te lakau, ka ‵pau a ia mo te Atua, kae ka tutokotasi a ia.​—Kenese 3:1-5.

4. Ne mafai pefea o ‵nofo a tino mai lalo i te pulega a Satani?

⁴ A te tonuga loa, ne fai atu a Satani me ka fia‵fia atu a tino māfai e ‵tutokotasi latou mai te Atua. I lo te taofi ‵mau ki te pulega amiotonu a te Atua, ne fakalogo a Atamu ki tena avaga mai te kai ki te fuaga telā ko oti ne fakatapu. Tela la, ne galo atu te tulaga ‵lei katoatoa o Atamu i mua o Ieova kae tuku mai ei ne ia te amoga ‵mafa o te agasala mo te mate. I te taimi eiloa tenā, ne ‵nofo a tino katoa mai lalo i te pulega a Satani, “te atua . . . o te lalolagi nei.”​—2 Kolinito 4:4; Loma 7:14.

5. (a) Ne fakamaoni mai pefea ne Ieova a te ‵tonu o ana pati? (e) Se a te fakamoemoega ne tuku atu ne te Atua ki tama‵liki a Atamu mo Eva?

⁵ Se mea tonu me ne tuku atu ne Ieova a te fakasalaga ko te mate ki a Atamu mo Eva. (Kenese 3:16-19) Kae e se fakauiga i ei me ko se taunu a te fuafuaga a te Atua. E ‵kese ‵ki a te mea ne tupu! I te taimi ne fakasala ei a Atamu mo Eva, ne tuku atu ne Ieova ki la tama‵liki se fakamoemoega gali. Ne fai ne ia a te mea tenā mai te fakailoatuga o tena fuafuaga e uiga ki se “fanau” telā e sae mai kae ka fakapakia ne Satani a tena mulivae. Kae ka mafu te pakiaga i te mulivae o te Fanau telā ne folafola mai, kae ka “tuki pala” ne ia a te ulu o Satani. (Kenese 3:15) E fakamatala likiliki mai ne te Tusi Tapu a te mea tenei mai pati konei e uiga ki a Iesu Keliso: “Ne vau te Tama a te Atua mō te pogai eiloa tenei, o fakamalepe a te galuega a te Tiapolo.” (1 Ioane 3:8) Kae e fakaasi mai pefea i faifaiga a Iesu mo tena mate me e fakamaluga ne ia te amiotonu o te Atua?

Te Uiga o te Papatisoga a Iesu

6. E iloa pefea ne tatou me ne seki maua ne Iesu te agasala mai i a Atamu?

⁶ E pelā me se tagata, ne fai eiloa a Iesu e pelā mo Atamu telā ne ‵lei katoatoa. (Loma 5:14; 1 Kolinito 15:45) E fakauiga i ei me ne fanau mai a Iesu kae ne ‵lei katoatoa. Ne mafai pefea o tonu a te mea tenā? Ne tuku atu ne te agelu ko Kapilielu a te fakamatalaga manino tenei ki te mātua o Iesu, ko Malia: “Ka oko atu ki a koe te Agaga Tapu, ka nofo foki i a koe te ‵mana o te Atua. Ona ko te feitu tenei, ka fakaigoa te tamaliki tapu tenā, ko te Tama a te Atua.” (Luka 1:35) I te kamataga o te olaga o Iesu, ne fakaasi faka‵lei atu ne Malia ki a ia a mea e uiga ki tena fanaumaiga. Tela la, i te taimi e tasi ne maua atu ei ne Malia mo Iosefa a Iesu i te faletapu o te Atua, ne fesili atu a ia, penei: “E se iloa ne koulua me ko ‵tau au o nofo i loto i te fale o toku Tamana?” (Luka 2:49) E mautinoa eiloa me ko leva ne iloa ne Iesu mai tena folikiga me i a ia ko te Tama a te Atua. A te fakamalugaga o te amiotonu o te Atua ko te ‵toe mea tāua ‵ki eiloa ki a ia.

7. Se a te mea tāua telā ne maua ne Iesu?

⁷ Ne fakaasi mai a te fiafia o Iesu ki mea faka-te-agaga mai te kau atu faeloa ki fakatasiga mō tapuakiga. Fakatasi mo te mafaufau ‵lei katoatoa, ne ‵tau o tauloto ne ia a mea ne lagona kae faitau ne ia i te Tusi Tapu faka-Epelu. (Luka 4:16) Ne maua foki ne ia se mea tāua​—se foitino ‵lei katoatoa telā e mafai o ofo atu mō tino katoa. I te taimi ne papatiso ei a ia, ne ‵talo kae ne mafaufau a Iesu e uiga ki pati fakapelofeta i te Salamo 40:6-8.​—Luka 3:21; faitau te Epelu 10:5-10.a

8. Kaia ne taumafai ei a Ioane te Papatiso o taofi a Iesu mai te papatisoga?

⁸ Ne manako a Ioane te Papatiso o taofi a Iesu mai te papatisoga. Kaia? Me ne papatiso ne Ioane a tino Iutaia ke fakamailoga ei te lotou sala‵mo mai te agasala ki te Tulafono. E pelā me se kāiga pili, ne ‵tau o iloa ‵lei ne Ioane me i a Iesu e amiotonu kae e se manakogina ke salamō a ia. Ne fakatalitonu atu ne Iesu ki a Ioane me ko ‵tau eiloa o papatiso a Ia. Ne fakamatala mai a Iesu: “Tenei te faiga ke fai ei ne tatou a mea katoa kolā e manako ki ei te Atua.”​—Mataio 3:15.

9. Se a te mea e fakamailoga ki ei te papatisoga o Iesu?

⁹ E pelā me se tino ‵lei katoatoa, ne mafai o fai atu a Iesu, me e maua ne ia te avanoaga e pelā mo Atamu, ke fai mo tamana o se kaukāiga o tino ‵lei katoatoa. Kae ne seki manako a Iesu ki se vaegā olaga penā me e se ko te loto eiloa tenā o Ieova mō ia. Ne uga mai ne te Atua a Iesu ki te lalolagi ke fakataunu ei tena tulaga e pelā me ko te Fanau telā ne folafola mai, io me ko te Mesia. Ne aofia i te mea tenei a te ofoatuga ne Iesu a tena ola ‵lei katoatoa. (Faitau te Isaia 53:5, 6, 12.) E tonu, e ‵kese ‵ki a te uiga o te papatisoga a Iesu mo tatou. E se aofia i ei a te tukuatuga ki a Ieova, me ko oti ne fai a Iesu e pelā me se vaega o te fenua o te Atua telā ne tukugina atu, ko Isalaelu. I lo te fai penā, a te papatisoga o Iesu se fakailoaga o tena tukuatuga ke fai te loto o te Atua e pelā mo te mea ne faka‵mafa mai i te Tusi Tapu e uiga ki te Mesia.

10. Se a te mea e aofia i te faiga o te loto o te Atua e pelā me ko te Mesia, kae ne a lagonaga o Iesu e uiga ki te mea tenei?

¹⁰ A te loto o Ieova mō Iesu ne aofia i ei a te talaiatuga o te tala ‵lei o te Malo o te Atua, te faiga o soko, kae fakatoka foki latou mō te galuega ko te faiga o soko i aso mai mua. A te tukuatuga o Iesu ne aofia i ei a tena toka ‵lei ke kufaki i fakasauaga mo se mate fakalogo‵mae, ko te mea ke ‵lago katoatoa atu ki te pulega amiotonu a Ieova te Atua. Ona ko te alofa tonu o Iesu ki tena Tamana faka-te-lagi, ne fiafia a ia o fai te loto o te Atua kae ne lotomalie foki o tuku atu tena foitino e pelā me se taulaga. (Ioane 14:31) Se mea fakafiafia foki ke iloa ne ia me i te tāua o tena ola ‵lei katoatoa ne mafai o ofo atu ki te Atua e pelā me se togiola ke ‵togi ei tatou mai te ‵nofo pologa ki te agasala mo te mate. E mata, ne talia ne te Atua a te tukuatuga a Iesu ko te mea ke fakafesagai atu ki tiute ‵mafa konei? Ne fai eiloa ne ia penā!

11. Ne talia pefea ne Ieova a Iesu e pelā me ko te Mesia telā ne folafola mai, io me ko te Keliso?

¹¹ E fakatalitonu mai ne tino ne tusi ne latou a tusi evagelia katoa e fa a pati a Ieova te Atua i te taimi ne fanaka ei a Iesu mai te vaitafe o Iolitana. Ne fakatalitonu mai ne Ioane te Papatiso: “Ne lavea ne au a te agaga tapu ko fanaifo e pelā mo se lupe mai te lagi, kae ne nofo i luga i a [Iesu] . . . Ne lavea ne au kae molimau foki au, Ko ia ko te Tama a te Atua.” (Ioane 1:32-34) Tela la, ne folafola mai a Ieova: “Tenei eiloa taku Tama fagasele e fiafia au ki ei.”​—Mataio 3:17; Maleko 1:11; Luka 3:22.

Fakamaoni ke Oko Eiloa ki Te Mate

12. Ne a mea ne fai ne Iesu i te tolu mo te āfa tausaga mai tua o tena papatisoga?

¹² I te tolu mo te āfa tausaga, ne aofia katoatoa a Iesu i te akoakoga o tino e uiga ki tena Tamana mo te pulega amiotonu a te Atua. Ne faimalaga atu a ia mo te fi‵ta ki koga katoa o te Fenua o te Folafolaga, kae seai se mea ne mafai o taofi aka ei a ia mai te fakalauefaatuga o te munatonu. (Ioane 4:6, 34; 18:37) Ne akoako ne Iesu a nisi tino e uiga ki te Malo o te Atua. Mai te faka‵leiga fakavavega ne ia o masaki, fagai a te vaitino, kae faka‵tu aka foki a tino ‵mate, ne fakaasi atu ei ne ia a mea kolā ka fai ne te Malo o te Atua ki tino.​—Mataio 11:4, 5.

13. Se a te mea ne akoako mai ne Iesu e uiga ki te ‵talo?

¹³ I lō te manako ki tavaega ona ko ana akoakoga mo galuega i te faka‵leiga o tino ma‵saki, ne tuku mai ne Iesu se fakaakoakoga tu ‵kese mai te avatuga o tavaega katoa ki a Ieova. (Ioane 5:19; 11:41-44) Ne fakailoa mai foki ne Iesu a toe mea tāua kolā e ‵tau o ‵talo atu tatou ki ei. E ‵tau o aofia i ‵tou ‵talo a te fakamolemole ke “tapu” te igoa o te Atua ko Ieova, kae ke sui ne te pulega amiotonu a te Atua a te pulega masei a Satani ko te mea ke “fai te mea e loto koe [Ieova] ki ei i lalo nei, e pelā mo te faiga i te lagi.” (Mataio 6:9, 10) Ne fakamalosi mai foki a Iesu ke gasue‵sue tatou e ‵tusa mo ‵tou ‵talo mai te fakamuamua ne tatou a te “Malo [o te Atua] mo tena amiotonu.”​—Mataio 6:33.

14. E tiga eiloa ne ‵lei katoatoa a Iesu, kaia e manakogina ke fai ne ia a taumafaiga e uke ke fakataunu ei tena tiute i te fuafuaga a te Atua?

¹⁴ I te taimi ko pili ei a ia o mate e pelā me se taulaga, ne kamata o logo‵mae a lagonaga o Iesu ona ko te ‵mafa o te tiute telā ne maua ne ia. E fakalagolago eiloa a te fakataunuga o fuafuaga mo te taku‵leiga o te igoa o tena Tamana ki te kufaki o Iesu i se tofotofoga mo se mate fakalogo‵mae. I aso e lima mai mua o tena mate, ne ‵talo atu a Iesu: “Nei, a toku loto ko se toka, kae ne a nei aku muna ka fai atu? Ka fai ake au pelā, ‘Te Tamana, fakaola mai au i te itula tenei’? Ka ko te mea tonu eiloa tenā ne vau ei au, ke puapuaga au i te itula tenei.” I te otiga ne fakaasi atu ana lagonaga, ne saga malosi atu a Iesu mo te fiafia ki te ‵toe mea tāua kae ‵talo atu: “Te Tamana, tuku atu te vikiga ki tou igoa!” Ne tali fakavave atu a Ieova: “Ko oti ne tuku atu ne au te ‵malu, kae ka toe tuku atu foki ne au te ‵malu.” (Ioane 12:27, 28) E tonu, ne lotomalie a Iesu ke fakafesagai atu ki te tofotofoga sili o te fakamaoni telā e seai eiloa se tino ne fakafesagai atu ki ei. Kae e mautinoa eiloa me i pati kolā ne lagona ne ia mai tena Tamana ne fakamaoni atu ei ki a Iesu me ka manumalo a ia i te fakamalugaga o te pulega sili a Ieova. Kae ne manumalo eiloa a ia i ei!

Te Mea Telā ne Fakataunu ne Iesu i Tena Mate

15. A koi tuai o mate a ia, kaia ne fai atu ei a Iesu, penei: “Ko oti”?

¹⁵ I te taimi ne tautau ei a Iesu i te sataulo i tena toe manavaga eiloa, ne fai atu a ia: “Ko oti!” (Ioane 19:30) Ko oko eiloa i te uke o mea ne mafai o fai ne Iesu fakatasi mo te fesoasoani o te Atua i te tolu mo te āfa tausaga mai tena papatisoga ke oko eiloa ki tena mate! I te taimi ne mate ei a Iesu, ne poko se mafuie, kae ne fai atu se ofisa o te kautau Loma telā e fai ne ia te fakasalaga, penei: “E tonu, ko te Tama eiloa tenei a te Atua.” (Mataio 27:54) Ko oti ne lavea muamua ne te ofisa me ne fakatauemu atu a tino ki a Iesu i ana pati i a ia ko te Tama a te Atua. E tiga eiloa ana logo‵maega, ne tumau eiloa a Iesu i te fakamaoni kae fakatalitonu atu me i a Satani se tino loi. Ne fai atu ne Satani a te ‵losiga tenei ki tino katoa kolā e ‵lago atu ki te pulega a te Atua: “A te tagata e mafai fua o tiakina ana mea katoa manafai ko manako ke ola a ia.” (Iopu 2:4) Mai tena fakamaoni, ne fakaasi atu ei ne Iesu me ne mafai ne Atamu mo Eva o fakamaoni mai lalo i tofotofoga faigofie konā. A ko te ‵toe mea tāua, ne fakamaluga aka ne te ola mo te mate o Iesu a te pulega amiotonu a Ieova. (Faitau te Faataoto 27:11.) E mata, ne fakataunu a mea katoa i te mate o Iesu? Ao, ne fakataunu eiloa!

16, 17. (a) Kaia ne mafai ei o maua ne molimau Kelisiano a Ieova i aso mua se tulaga amiotonu i ana mua? (e) E taui atu pefea ne Ieova a te fakamaoni o tena Tama, kae se a te mea ka fai faeloa ne te Aliki ko Iesu Keliso?

¹⁶ E tokouke a tavini a Ieova ne ola a koi tuai o vau a Iesu ki te lalolagi. Ne maua ne latou se tulaga amiotonu i mua o te Atua kae ne tuku atu foki ki a latou a te fakamoemoega ke toe‵tu mai. (Isaia 25:8; Tanielu 12:13) Kae se a te tulafono fakavae e mafai ei ne te Atua tapu ko Ieova, o fakamanuia a tino agasala i se auala gali? E fakamatala mai i te Tusi Tapu: “Ne tuku mai ne te Atua [a Iesu Keliso] e pelā mo se taulaga o agasala a tatou i tena toto, kae maua i te fakatuanaki. Ne fai a te mea nei, ko te mea ke fakaasi mai ei te amiotonu a te Atua, i te mea ne fakapuli ne ia a agasala kolā ko leva, i tona kufaki fakaatua. E fakamaoni i ei, me e amiotonu eiloa a ia ke oko mai ki aso nei, kae takuamiotonugina foki ne ia a te tino telā e fakatuanaki ki a Iesu.”​—Loma 3:25, 26.b

¹⁷ I te toetuga o Iesu, ne tuku atu ne Ieova ki a ia se tulaga tai maluga atu i lo te taimi mai mua o vau ki te lalolagi. Ko fai nei a Iesu e pelā me se tino faka-te-agaga ‵malu telā e se toe mate. (Epelu 1:3) E pelā me ko te Faitaulaga Sili mo te Tupu, e tumau eiloa a te Aliki ko Iesu Keliso i te fesoasoani atu ki ana soko ke fakamaluga aka a te amiotonu o te Atua. Kae e loto fakafetai tatou me i te ‵tou Tamana faka-te-lagi, ko Ieova, ko te Tino telā e tuku atu ne ia te taui ki tino katoa kolā e fai ne latou a te mea tenei kae tavini fakamaoni atu ki a ia e pelā mo tena Tama!​—Faitau te Salamo 34:3; Epelu 11:6.

18. Se a te mea ka fai‵pati tatou ki ei i te suā mataupu?

¹⁸ Ne maua eiloa ne tino fakamaoni katoa mai taimi o Apelu se fesokotakiga ‵pili mo Ieova ona ko te lotou fakatuanaki kae tali‵tonu ki te Fanau telā ne folafola mai. Ne iloa ne Ieova me i tena Tama ka fakamaoni katoatoa kae ka aumai ne tena mate se fakamagaloga mō “agasala a te lalolagi.” (Ioane 1:29) E aoga foki a te mate o Iesu ki tino kolā e ola i aso nei. (Loma 3:26) Tela la, ne a fakamanuiaga e maua ne koe mai te togiola a Keliso? Tenā eiloa te mea ka sau‵tala tatou ki ei i te suā mataupu.

[Fakamatalaga fakaopoopo]

E Tali Mai ne Koe Pefea?

• Ne fakafesili aka pefea a te amiotonu o te Atua?

• Se a te fakailoga o te papatisoga a Iesu?

• Se a te mea ne fakataunu i te mate o Iesu?

[Ata i te itulau e 10]

E iloa ne koe me se a te fakailoga o te papatisoga o Iesu?