Kaia E ‵Tau Ei O ‵Talo Atu I Te Igoa O Iesu?

NE AKOAKO sāle mai ne Iesu a mea e uiga ki ‵talo. I ana aso, ne ‵talo atu a takitaki lotu Iutaia i “maga o auala.” Kaia? “Ke matea latou ne tino.” A te ‵tonuga loa, e ma‵nako latou ke tavae atu a tino ki olotou faifaiga fakalotu. E fai ne tino e tokouke a ‵talo ‵loa kae fakafoki‵foki, e pelā loa me ka mafai o lagona olotou ‵talo i te “fakaaogaga o pati e uke.” (Mataio 6:5-8) Ne fakaasi faka‵sau atu ne Iesu me e seai se aoga o vaegā faifaiga konā, kae ne fesoasoani atu ki tino loto fakamaoni ke iloa ne latou a mea e se ‵tau o fai māfai ko ‵talo. Kae e uke atu foki a mea ne akoako atu ne ia i tafa o mea fua kolā e ‵tau o ‵kalo keatea mai i ei māfai ko ‵talo.

Ne akoako mai a Iesu me e ‵tau o fakaasi atu i ‵tou ‵talo a ‵tou manakoga ke faka‵malu a te igoa o te Atua, ke oko mai Tena Malo, kae ke fai Tena loto. Ne akoako mai foki a Iesu me se mea ‵lei ke akai atu tatou ki te Atua ke fesoasoani mai ki ‵tou manakoga totino. (Mataio 6:9-13; Luka 11:2-4) Mai te fakaaogaga o tala fakatusa, ne fakaasi mai ne Iesu a te manakoga ke tumau tatou, ke fakatuanaki, kae loto maulalo māfai e ma‵nako tatou ke lagona ‵tou ‵talo. (Luka 11:5-13; 18:1-14) Kae ne faka‵mafa mai ne ia ana akoakoga e auala i tena fakaakoakoga totino.—Mataio 14:23; Maleko 1:35.

E mautinoa me ne fesoasoani atu a te akoakoga tenei ki soko o Iesu ke momea aka te ‵lei o olotou ‵talo. Kae ne faka‵tali a Iesu ke oko ki tena toe po i te lalolagi ke tuku atu ne ia te ‵toe akoakoga tāua e uiga ki te faiga o ‵talo.

“Te ‵Toe ‵Fuliga Lasi i Tala Mua i te Faiga o ‵Talo”

Ne fakamāumāu ne Iesu tena toe po kātoa ke fakamalosi atu ki ana apositolo fakamaoni. Ko te taimi ‵lei foki tenā ke fakaasi atu se mea fou. “Au ko te auala mo te munatonu mo te ola,” ne fai atu Iesu. “E seai se tino e fanatu ki te Tamana māfai e se auala mai i a au.” Fakamuli ifo ne tuku atu ne ia te folafolaga fakamalosi loto tenei ki a latou: “So se mea e fakatagi mai ei koutou i toku igoa, ka fai eiloa ne au, ko te mea ke faka‵malugina te Tamana ona ko te Tama. Kafai e fakatagi mai koutou ki so se mea i toku igoa, ka fai eiloa ne au te mea tenā.” I te fakaotiotiga o ana pati, ne fai mai a ia: “Ke oko mai ki te taimi nei, e seki fakatagi atu eiloa koutou ki se mea i toku igoa. Fakatagi atu kae ka maua ne koutou, ko te mea ke katoatoa te otou fia‵fia.”—Ioane 14:6, 13, 14; 16:24.

Ne tāua ‵ki eiloa a pati konei. E taku ne se tusi e tasi a te mea tenei me ko “te ‵toe ‵fuliga lasi i tala mua i te faiga o ‵talo.” Ne seki manako a Iesu ke fai atu a ‵talo ki a ia i lō te Atua. I lō te fai penā, ne ‵tala mai ne ia se auala fou ke fanatu ki a Ieova te Atua.

A te ‵tonuga loa, ne fakalogologo faeloa te Atua ki ‵talo o ana tavini fakamaoni. (1 Samuelu 1:9-19; Salamo 65:2) Kae mai te taimi ne fai ei ne te Atua te feagaiga o te Tulafono mo Isalaelu, a tino kolā ne ma‵nako ke lagona ne ia olotou ‵talo, ne ‵tau o talia ne latou me i a Isalaelu ko te fenua filifilia a te Atua. Kae fakamuli ifo, mai te taimi o Solomona o vau ki mua, ne ‵tau o talia ne latou te faletapu e pelā me ko te koga ne filifili ne te Atua ke ofo atu ei a taulaga. (Teutelonome 9:29; 2 Nofoaiga Tupu 6:32, 33) Kae ko te vaegā tapuakiga tenei ne seki tumau. E pelā mo te mea ne tusi mai ne te apositolo ko Paulo, a te Tulafono ne tuku atu ki te kau Isalaelu mo taulaga ne ofo atu i te faletapu “se ata fakatusa fua o mea ‵lei kolā ka oko mai, kae e se ko mea ‵tonu.” (Epelu 10:1, 2) A ata fakatusa ne ‵tau o sui ki mea ‵tonu. (Kolose 2:17) Talu mai te 33 T.A., ne seki toe fakalagolago te fesokotakiga o se tino mo Ieova ki te fakalogo ki te Tulafono faka-Mose. I lō te fai penā, ne fakavae ki te lotou faka‵logo ki te tino telā ne fakasino atu ki ei te Tulafono—ko Keliso Iesu.—Ioane 15:14-16; Kalatia 3:24, 25.

Se “Igoa Telā e Sili Atu i Nisi Igoa Katoa”

Ne fakatoka ne Iesu se auala maluga ke fakapilipili atu ki a Ieova, mai te fakasino atu ki a ia e pelā me ko te taugasoa ‵mana, ko te tino telā e ‵tala ne ia te auala mō ‵tou ‵talo ke lagona kae tali mai ne te Atua. Kaia ne mafai ei ne Iesu o fai te mea tenei mō tatou?

Ona ko te mea ne fa‵nau tatou i te agasala, e seai se galuega e fai ne tatou io me se taulaga e ofo atu ne tatou e mafai o faka‵ma ei tatou mai te lailaiga tenei io me ke mafai o maua se fesokotakiga mo te ‵tou Atua tapu, ko Ieova. (Loma 3:20, 24; Epelu 1:3, 4) Kae ne ofo atu ne Iesu tena ola ‵lei katoatoa faka-te-foitino ke ‵togi ki ei a agasala a tino kolā e mafai o faka‵lei mo te Atua. (Loma 5:12, 18, 19) Tela la, so se tino e manako ke faka‵ma ana agasala ko maua ne ia te avanoaga ke maua se tulaga ‵ma i mua o Ieova mo “te saolotoga o fai‵pati atu” ki te Atua—māfai fua e fakatuanaki latou ki te taulaga a Iesu kae ‵talo atu i tena igoa.—Efeso 3:11, 12.

Kafai e ‵talo atu tatou i te igoa o Iesu, e fakaasi atu ei te ‵tou fakatuanaki ki ana tulaga tāua e tolu i te fakataunuga o te fuafuaga a te Atua: (1) A ia ko “te Tamā Mamoe a te Atua,” telā ne fai tena taulaga mo fakavae mō te fakamagaloga o agasala. (2) Ne toe fakatu aka a ia ne Ieova kae nei la ko fai pelā me ko te “faitaulaga sili” i te fakagaluegaga o mea aoga mai te togiola. (3) Ko ia fua “te auala” ke olo atu ki a Ieova i ‵talo.—Ioane 1:29; 14:6; Epelu 4:14, 15.

A te ‵talo atu i te igoa o Iesu e fakaaloalo atu ei ki a Iesu. Kae se mea ‵tau a te vaegā fakaaloaloga tenā me ko te loto eiloa o Ieova “ke ifo atu ki a ia a tino katoa . . . , i te igoa o Iesu, kae ka fakaasi ‵tonu atu ei i gutu o tino katoa i a Iesu Keliso ko te Aliki mō te vikiga o te Atua te Tamana.” (Filipi 2:10, 11) Kae e sili atu i te tāua, a te ‵talo i te igoa o Iesu, e faka‵malu atu ei ki a Ieova, ko te Tino telā ne tuku mai ne ia tena Tama ke maua ne tatou a mea aoga.—Ioane 3:16.

Ke malamalama tatou i te maluga o te tulaga o Iesu, e fakaaoga i te Tusi Tapu a tofi mo igoa kese‵kese e uiga ki a ia. A te ‵tonuga loa, ko oti ne tuku atu ki a Iesu a “te igoa telā e sili atu i nisi igoa katoa.”a Ko oti foki ne tuku atu ki a ia a te pule i mea katoa i te lagi mo te lalolagi.—Filipi 2:9; Mataio 28:18.

E sē se Faifaiga Masani Fua

Ao, e ‵tau o ‵talo atu i te igoa o Iesu māfai e ma‵nako tatou ke lagona ne Ieova ‵tou ‵talo. (Ioane 14:13, 14) Kae e se ma‵nako tatou ke fakafokifoki faeloa te fuaiupu “i te igoa o Iesu” e pelā fua me se faifaiga masani. Kaia?

Mafaufau ki se tala fakatusa. Kafai ko maua ne koe se tusi mai i se tagata faipisinisi, e mafai o fakaoti tena tusi ki pati masani i te fakaotiga. E mata, e mafaufau koe me i te mea tenā se fakaasiga tonu o lagonaga o te tagata faipisinisi? Io me ko fakaaoga fua ne ia se faifaiga masani i te tusiga o tusi? A te ‵tonuga loa, a te fakaaogaga o te igoa o Iesu i ‵tou ‵talo, e ‵tau o sili atu tena tāua i lō te fakaotiga masani o se tusi fakapisinisi. E tiga eiloa e ‵tau mo tatou o “‵talo i taimi katoa,” e ‵tau o ‵talo atu tatou mo ‵tou “loto kātoa,” kae ke se fai pelā me se faifaiga masani fua.—1 Tesalonia 5:17; Salamo 119:145.

E mafai pefea o ‵kalo keatea tatou mai te fakaaogaga o te fuaiupu “i te igoa o Iesu” e pelā me se faifaiga masani? Kaia e se mafaufau ‵loto ei koe ki uiga ‵gali o Iesu? Mafaufau ki mea ko oti ne fai ne ia, mo mea e loto fiafia a ia ke fai mō koe. Ke ‵talo fakafetai kae tavae atu ki a Ieova mō te auala fakaofoofogia ne fakaaoga ne ia tena Tama. Kafai e fai koe penā, ka momea aka tou loto talitonu ki te folafolaga a Iesu: “Kafai e fakatagi atu koutou ki te Tamana mō so se mea, ka tuku atu eiloa ne ia ki a koutou a te mea tenā i toku igoa.”—Ioane 16:23.