Iesu Kelisoù—te Toe Misionale Sili

“I a au ne vau mai i a ia, ne uga mai foki ne ia au.”​—IOANE 7:​29.

1, 2. Se a te misionale, kae ko oi e mafai o taku me ko te ‵toe Misionale sili?

SE A te mea e mafaufau koe ki ei mafai e lagona ne koe te pati “misionale”? E mafau‵fau a nisi tino ki misionale o Lotu Kelisiano ‵Se, kolā e aofia a tino e tokouke i a latou i faifaiga fakapolitiki mo mea tau te maumea o fenua e ga‵lue latou i ei. E pelā me se Molimau a Ieova, kāti ka mafaufau koe ki misionale kolā e uga atu ne te Potukau Pule ke talai te tala ‵lei i koga kese‵kese i te lalolagi kātoa. (Mataio 24:14) E tuku katoatoa atu mo te lotomalie ne misionale konei olotou taimi mo malosi mō te faiga o te galuega tāua ko te fesoasoani ki tino ke fakapili‵pili atu ki a Ieova te Atua, kae ke maua ne latou se fesokotakiga ‵pili mo ia.​—Iakopo 4:8.

² E se sae mai a te pati “misionale” i te New World Translation of the Holy Scriptures. Kae i tena fakamatalaga fakaopoopo i te Efeso 4:​11, e fakamatala mai i te Reference Bible me i te pati Eleni telā e ‵fuli ki te “tino talai” e mafai foki o ‵fuli ki te “misionale.” A Ieova ko te ‵toe Tino Talai sili kae e se mafai o taku a ia ko te ‵toe Misionale sili, me e seki uga atu eiloa a ia ne se tino. Kae e uiga ki tena Tamana faka-te-lagi, ne fai mai a Iesu Keliso: “I a au ne vau mai i a ia, ne uga mai foki ne ia au.” (Ioane 7:​29) I se fakaasiga o te lasi o tena alofa mō tino katoa, ne uga mai ei ne Ieova a tena Tama fuatasi ki te lalolagi. (Ioane 3:​16) E mafai o taku a Iesu ko te ‵toe Misionale sili, te ‵toe Misionale ‵lei, me i te pogai e tasi ne uga mai ei a ia ki te lalolagi ko te mea ke ‘molimau atu ki te munatonu.’ (Ioane 18:37) Ne manuia katoatoa a ia i te folafolaatuga o te tala ‵lei o te Malo, kae koi aogā eiloa ki a tatou a tena galuega. E pelā me se fakaakoakoga, e mafai o fakaaogā ne tatou ana auala i te faiga o akoakoga i te galuega talai, faitalia me i a tatou ne misionale io me ikai.

3. Ne a fesili ka mafau‵fau tatou ki ei?

³ A te tulaga o Iesu e pelā me se tino talai o te Malo e ‵sae aka ei a fesili e uke penei: Ne a mea ne fe‵paki mo Iesu i tena galuega i te lalolagi? Kaia ne ma‵goi ei ana akoakoga? Kae ne a mea ne fai ei ke manuia tena galuega?

Se Agaga Kaugofie i te Talai Atu i Koga ‵Fou

4-6. Ne a nisi fakama‵fuliga ne fe‵paki mo Iesu i tena vauga ki te lalolagi?

⁴ I aso nei, kāti e manakogina ke fakamasani a misionale mo nisi Kelisiano kolā e olo atu o ga‵lue i koga kolā e manakogina malosi i ei a tino talai o te Malo, ki tulaga o te olaga kolā ko tai se ‵lei atu i lō te olaga telā ne masani latou ki ei. Kae e se mafai eiloa o faka‵pau ne tatou a te tulaga ne ola ei a Iesu i te lalolagi nei mo tena tulaga i te lagi, ko te koga telā ne ‵nofo ei a ia mo tena Tamana fakatasi mo agelu kolā ne tavini atu ki a Ieova mo te loto ‵ma. (Iopu 38:7) E pefea te ‵kese ke ‵nofo fakatasi a ia mo tino agasala i se lalolagi o te faivalevale! (Maleko 7:20-23) Ne fakafesagai foki a Iesu ki kinauga i vā o ana soko ‵pili eiloa. (Luka 20:46; 22:24) E tonu, ne ‵tonu katoatoa ana faiga ki mea katoa ne fe‵paki mo ia i te lalolagi.

⁵ Ne seki iloa fakavavega ne Iesu o faipati ki se ‵gana a tino; ne tauloto eiloa ne ia mai tena folikiga. Ko tafaga te ‵kese o te mea tenā mo tena tulaga ko te fakatonuga o agelu i te lagi! I tena nofoga i te lalolagi, ne faipati a Iesu “ki ‵gana a tino.” E ‵kese ‵ki eiloa mo ‘‵gana a agelu.’ (1 Kolinito 13:1) Kae, i te fakaaogāga o pati ‵lei, e seai eiloa se tino e ‵pau mo Iesu.​—Luka 4:​22.

⁶ Ke mafaufau ki nisi fakama‵fuliga ‵lasi ne oko ki te Tama a te Atua i tena vauga ki te lalolagi. E ui eiloa ne seki maua ne Iesu te tulaga agasala telā ne togi mai ne Atamu, ne liutino a Ia, e pelā eiloa mo tino kolā ka fai fakamuli mo fai ana “taina,” io me ne soko fakaekegina. (Faitau te Epelu 2:​17, 18.) I tena ‵toe po i te lalolagi nei, ne seki fakamolemole atu a Iesu ki tena Tamana faka-te-lagi ke uga mai ne “sotia agelu e sili atu i te fitu sefululua afe.” Kae mafaufau la ki te kau agelu i te lagi kolā ne pule atu a ia ki ei e pelā me ko te Pule o Agelu ko Mikaele! (Mataio 26:53; Iuta 9) E tonu, ne fai ne Iesu a vavega; kae ko ana mea ne fai i tena nofoga i te lalolagi nei ne mea fo‵liki fua māfai e fakatusa ki ana mea ne mafai o fai i te lagi.

7. Ne ‵saga atu pefea a tino Iutaia ki te Tulafono?

⁷ Ka koi fai ei e pelā me ko “te Muna,” mai mua o liutino a ia, kāti ne fai a Iesu e pelā me ko te Tukumuna a te Atua telā ne takitaki ne ia te kau Isalaelu i te koga lavaki. (Ioane 1:1; Esoto 23:​20-​23) Ko oti i ei ne “maua ne [latou] a te tulafono a te Atua e alatu i ana agelu,” kae ne seki tausi eiloa ne latou. (Galuega 7:​53; Epelu 2:​2, 3) A te tonuga loa, ne seki malamalama a takitaki lotu Iutaia i te senitenali muamua i te uiga tonu o te Tulafono. E pelā me se fakaakoakoga, ke mafaufau ki te tulafono e uiga ki te Sapati. (Faitau te Maleko 3:​4-6.) A faiakoga mo Falesaio ne “tiakina ne [latou] a feitu aogā o akoakoga mai i te Tulafono, e pelā mo te fai mea tonu, te alofa io me ko te alofa fakamagalo mo te fakamaoni.” (Mataio 23:23) Kae ui ei, ne seki ‵fiu eiloa a Iesu kae taofi aka tena galuega ko te folafola atu o te munatonu.

8. Kaia e mafai ei o fesoasoani mai a Iesu ki a tatou?

⁸ Ne maua ne Iesu te agaga kaugofie. Ne fakamalosi aka a ia ne te alofa ki tino kae ne manako malosi ke fesoasoani atu ki a latou. Ne seki galo lele mai i a ia te agaga ko te fia talai atu. Kae ona ko tena fakamaoni ki a Ieova i te taimi ne nofo ei i te lalolagi, ne fai a Iesu mo “māfuaga o te fakaolataga e se gata mai ki tino katoa kolā e faka‵logo ki a ia.” E se gata i ei, “ko mafai ne ia o fesoasoani ki a latou kolā e fakaosoosogina [e pelā mo tatou], me i a ia ne fakaosoosogina kae puapuagātia io me ne tofotofogina foki.”​—Epelu 2:​18; 5:​8, 9.

Ne Akoako Faka‵lei e Pelā me se Faiakoga

9, 10. Ne a vaegā akoakoga ne maua ne Iesu mai mua o uga mai ki te lalolagi?

⁹ A koituai o uga atu a Kelisiano i aso nei e pelā me ne misionale, e fakatoka ne te Potukau Pule ke akoakogina latou. E mata, ne akoakogina a Iesu Keliso? Ao, kae ne seki kau a ia ki akoga a te kau Iutaia mai mua o tena fakaekega mo fai te Mesia; io me ne akoako a ia ne nisi takitaki lotu lauiloa. (Ioane 7:​15; fakatusa ki te Galuega 22:3.) Kaia ne taulia malosi ei a Iesu ke akoako atu?

¹⁰ Faitalia a mea kolā kāti ne tauloto ne Iesu mai tena mātua, ko Malia, mo tena tamana fai ko Iosefa, ne maua ne ia a akoakoga tāua i te faiga o te galuega talai mai te ‵toe Tino maluga eiloa. E uiga ki te mea tenei, ne fai mai a Iesu: “I a au e se faipati fua i taku pule, ka ko te Tamana telā ne uga mai ne ia au, ne tuku mai foki ne ia te poloakiga ki a au, ki mea e ‵tau o taku atu, ki a koutou.” (Ioane 12:49) Ke onoono me ne maua ne te Tama a fakatonuga mautinoa e uiga ki mea e ‵tau o akoako atu ne ia. Mai mua o vau ki te lalolagi, e seai se fakalotolotolua me ne fakaaogā ne Iesu a taimi e uke ke fakalogologo ki fakatonuga mai tena Tamana. E mata, e mafai o maua ne ia ne akoakoga tai ‵lei atu mai i se isi koga?

11. E pefea te lasi o te fakaasimaiga ne Iesu a faifaiga a tena Tamana ki tino?

¹¹ Mai te taimi ne faite i ei, ne maua eiloa ne te Tama se fesokotakiga ‵pili mo tena Tamana. Mai mua o liutino, ne iloa ne Iesu a te kilokiloga a te Atua ki tino mai te onoono atu ki faifaiga a Ieova ki a latou. Ne lavea atu a te alofa o te Atua ki tino i tena Tama telā ne mafai o fai mai ne ia a pati konei: “E fia‵fia fakatasi mo te lalolagi pelā foki mo tāgata o te lalolagi.”​—Faataoto 8:​22, 31.

12, 13. (a) Ne a mea ne tauloto ne Iesu mai te onoono atu ki faifaiga a tena Tamana ki tino Isalaelu? (e) Ne fakaaogā pefea ne Iesu a akoakoga kolā ne maua ne ia?

¹² A akoakoga kolā ne maua ne te Tama ne aofia foki i ei a te onoono atu ki te auala ne fakafesagai atu ei a tena Tamana ki fakalavelave faiga‵ta. E pelā me se fakaakoakoga, ke mafaufau ki faifaiga a Ieova ki tino Isalaelu sē faka‵logo. E fai mai te Neemia 9:​28: “Kafai ko oko ki taimi o te filemu, ko toe agasala foki ei latou, tenā kae tuku atu foki ne koe latou ki lima o olotou fili. Kae i te taimi ne sala‵mo ei latou mai olotou agasala kae ko ka‵laga atu ki a koe ke faka‵sao aka latou, kae ne lagona ne koe te lotou tagi mai i te lagi, kae ne faka‵sao faeloa ne koe latou i tou alofa.” Mai te ga‵lue fakatasi mo te onoono atu ki a Ieova, ne fakaasi mai ei ne Iesu se alofa atafai penā ki tino kolā ne talai a ia ki ei.​—Ioane 5:​19.

¹³ Ne fakagalue ne Iesu a akoakoga konei i ana faifaiga atafai ki ana soko. A koituai o mate a ia i te po eiloa tenā, “ne tiaki a ia ne [ana] soko katoa, kae ‵tele keatea.” (Mataio 26:56; Ioane 13:1) Ne fakafiti foki ne te apositolo ko Petelu a Keliso fakatolu taimi! Kae, ne tuku faeloa ne Iesu te avanoaga mō ana apositolo ke toe ‵foki atu ki a ia. Ne fai atu a ia ki a Petelu: “Ne ‵talo au mō koe, ko te mea ke se gata tou fakatuanaki, kae kafai ko toe mafuli mai koe, ke fakamalosi la ne koe ou taina.” (Luka 22:32) Ne fakavae eiloa mo te manuia a te Isalaelu faka-te-agaga i luga i “apositolo mo pelofeta,” kae e maua atu i fatu tulimanu o te Ielusalema Fou a igoa o apositolo fakamaoni e toko 12 a te Tamā Mamoe, ko Iesu Keliso. Ke oko mai ki te aso nei, e manuia eiloa a Kelisiano fakaekegina fakatasi mo olotou taugasoa tukugina atu, ko ‘nisi mamoe,’ e pelā me se fakapotopotoga telā e talai atu te Malo mai lalo i lima ‵mafi o te Atua mo te takitakiga a tena Tama fagasele.​—Efeso 2:20; Ioane 10:16; Fakaasiga 21:14.

Auala ne Akoako Atu ei a Iesu

14, 15. I auala fea ne tu ‵kese i ei a akoakoga a Iesu mo akoakoga a faiakoga o te tulafono mo Falesaio?

¹⁴ Ne fakagalue aka pefea ne Iesu a mea kolā ne tauloto ne ia ke akoako ei ana soko? Kafai e fakatusa ne tatou a akoakoga a Iesu mo akoakoga a takitaki lotu Iutaia, e lavea faka‵lei ne tatou te ma‵luga fakafia atu o akoakoga a Iesu. ‘Ne fakasēaogā ne faiakoga o te tulafono mo Falesaio a te Muna a te Atua ona ko olotou akoakoga.’ E ‵kese mai i ei, a pati kolā ne fai atu ne Iesu ne seki māfua mai i a ia eiloa; ne akoako atu eiloa ne ia a te muna io me ko te fekau a te Atua. (Mataio 15:6; Ioane 14:10) Tenā foki te mea e ‵tau o fai ne tatou.

¹⁵ E isi foki se isi mea telā ne fai ei ke tu ‵kese a Iesu mai takitaki lotu. E uiga ki faiakoga o te tulafono mo Falesaio, ne fai atu a ia: “E ‵tau mo koutou o tau‵tali kae faka‵logo ki mea katoa e fakatonu atu ne latou ke fai; kae mo a la ma fakaakoako koutou ki olotou amioga. E akoako ne latou a tino ke tausi te Tulafono, kae se tausi ne latou.” (Mataio 23:3) Ne fakagalue ne Iesu a mea ne akoako ne ia. Ke mafaufau tatou ki se fakaakoakoga telā e fakamaoni mai ei te ‵tonu o te mea tenei.

16. Kaia e mafai o fai mai ei koe me ne ola eiloa a Iesu e ‵tusa mo ana pati i te Mataio 6:​19-​21?

¹⁶ Ne fakamalosi atu a Iesu ki ana soko ke “fakaputu . . . koloa i te lagi.” (Faitau te Mataio 6:​19-​21.) E mata, ne ola a Iesu e ‵tusa mo tena fakamalosiga tenā? Ao, me e mafai o fai ‵tonu atu a ia e uiga ki a ia eiloa: “E isi ne lua o alope, mo manueva e isi foki ne olotou ofaga, ka ko au te Tama a te Tagata, e seai se koga mo oku fakatapū.” (Luka 9:​58) Ne ola a Iesu i se olaga faigofie. Ne fakalavelave malosi eiloa a ia i te folafolaatuga o te tala ‵lei o te Malo, kae ne fakaasi atu ne ia te uiga o te saoloto mai te manavase telā e māfua mai i te fakaputuga o koloa i te lalolagi. Ne fakaasi mai ne Iesu a te ‵lei atu o te fakaputuga o koloa i te lagi, “telā e seai ne mogamoga mo te pala o fakamasei; e seai foki ne tino e ofa ne latou a mea kae kaisoa.” E mata, e fakalogo koe ki te fakamalosiga a Iesu ke fakaputu a koloa i te lagi?

Uiga Kolā ne Fai ei ke Fia‵fia a Tino ki a Iesu

17. Ne a uiga ne fai ei ke tu ‵kese a Iesu e pelā me se tino talai?

¹⁷ Ne a uiga ne fai ei ke tu ‵kese a Iesu e pelā me se tino talai? E tasi mai i ei ko ana faifaiga ki tino kolā ne fesoasoani atu a ia ki ei. E aofia i uiga ‵lei o Ieova kolā ne fakaakoako a Iesu ki ei ko te loto maulalo, te alofa mo te alofa atafai. Ke onoono ki te auala ne fia fakapili‵pili atu ei a tino e tokouke ki a Iesu ona ko uiga konei.

18. Kaia e mafai ei o fai atu i a Iesu ne loto maulalo?

¹⁸ I te otiga ne talia ne ia a te tauliaga ke vau ki te lalolagi, “ne tiakina katoatoa ne [Iesu] tona ‵malu faka-Atua, kae fai mo tavini. Ne liu tino a ia, ne fanau foki a ia i foliga faka te foitino.” (Filipi 2:7) A te mea tenā se faifaiga o te loto maulalo. E se gata i ei, ne seki manatu fatauvā a Iesu ki tino. Ne seki maua ne ia se vaegā kilokiloga penei, ‘E ‵tau o faka‵logo mai koutou ki a au me i a au ne vau mai te lagi.’ E ‵kese mo tino kolā ne fai ne latou a latou eiloa e pelā me ne mesia, ne seki fanatu a Iesu o fakasalalau atu tena tulaga e pelā me ko te Mesia tonu. I nisi taimi ne fai atu a ia ki tino ke se fakaasi atu ki nisi tino me ko oi a ia io me ko mea kolā ne fai ne ia. (Mataio 12:​15-​21) Ne manako a Iesu ke fakavae ne tino olotou fakaikuga ke tau‵tali atu i a ia mai i mea kolā ne lavea eiloa ne latou. Ko tafaga te manuia o ana soko me ne seki fakamoemoe te lotou Aliki ke ‵lei katoatoa latou e pelā mo agelu kolā ne ‵nofo fakatasi mo ia i te lagi!

19, 20. Ne fakamalosi atu pefea a te alofa mo te alofa atafai ki a Iesu ke fesoasoani atu ki tino?

¹⁹ Ne fakaasi atu foki ne Iesu Keliso a te alofa​—se uiga tāua o tena Tamana faka-te-lagi. (1 Ioane 4:8) Ne akoako ne Iesu a tino ona ko tena alofa. E pelā me se fakaakoakoga, ke mafaufau ki ana lagonaga e uiga ki se takitaki e tokotasi. (Faitau te Maleko 10:​17-​22.) Ne “kilo alofa” atu a Iesu ki a ia kae ne manako o fesoasoani ki tou tagata, kae ne seki mafai o tiakina ne te takitaki tenei ana koloa e uke ko te mea ke tautali atu ei i te Keliso.

²⁰ E aofia i uiga ‵gali o Iesu ko tena alofa atafai. E pelā mo tino sē ‵lei katoatoa katoa, ne fe‵paki a tino kolā ne faka‵logo ki ana akoakoga mo fakalavelave e uke. Ona ko te mea tenei, ne akoako atu ne Iesu a latou mo te alofa atafai. Ke fai se fakatusa: I se taimi e tasi, ne fakalavelave malosi a Iesu mo ana apositolo telā ne seki lava ei te taimi ke ‵kai ei latou. Kae, e pefea a lagonaga o Iesu i te taimi ne lavea ei ne ia se vaitino ko maopoopo mai? “Ko oko eiloa tena alofa ki a latou i te mea ko pelā mo mamoe e seai se lotou takitaki. Telā, kamata ei a ia o akoako atu ki a latou i mea e uke.” (Maleko 6:​34) Ne lavea ne Iesu te tulaga fakaa‵lofa o tino i te koga tenā kae ne fakaoti ana mafi o akoako latou kae fai foki vavega mō te lotou ‵lei. Ne fia‵fia malosi a nisi tino ki ana uiga ‵gali konā, ne otia olotou loto i ana pati, kae ne fai mo fai ana soko.

21. Ne a mea ka sau‵tala tatou ki ei i te suā mataupu?

²¹ E uke atu a nisi mea e mafai o tauloto ne tatou mai te galuega talai a Iesu i te lalolagi, e pelā mo te mea ka fakaasi mai i te suā mataupu. Ne a nisi auala e mafai ei o fakaakoako tatou ki a Iesu Keliso, te ‵toe Misionale sili?

Ka Tali Mai Koe Pefea?

• Ne a vaegā akoakoga ne maua ne Iesu a koituai o vau ki te lalolagi?

• Ne ma‵luga atu pefea a auala ne akoako atu ei a Iesu i lō faiakoga o te tulafono mo Falesaio?

• Ne a uiga ne fai ei ke fia‵fia a tino ki a Iesu?