“Ko Avatu ne Au te Fakaakoakoga mo Koutou”

“Ne lava ‵lei eiloa a te taimi ne ‵tau ei koutou o fai mo faiakoga.”​—EPELU 5:​12.

I TE taimi e faitau ei koe ki te tusi siki fakavae, e mata, ko mafaufau ‵mafa koe ki pati i ei? Kafai e penā loa, e se ko koe fua tokotasi. Ona ko te mea e tau‵tali tatou ki a Keliso, e iloa ne tatou me e ‵tau o fai tatou pelā me ne faiakoga. (Mataio 28:​19, 20) E se gata i ei, e ‵tau foki o fai tatou pelā me ne faiakoga apo, ona ko te vaitaimi tenei e ola ei tatou. Kae e iloa foki ne tatou me e fakalagolago ki ei a te ola o tino kolā e akoako ne tatou! (1 Timoteo 4:16) Tela la, se mea ‵lei ke fesili ifo tatou, penei: ‘E mata, e fai au mo fai se faiakoga apo? E mafai pefea o momea aka toku apo?’

² E se ‵tau o fakavāivāi mai a te vaegā manavase tenā. Kafai e mafau‵fau tatou me i te faiga o akoakoga e manakogina fua i ei a atamai fakapito, kāti ka loto vāivāi kae mafau‵fau foki tatou me e se mafai o momea aka ‵tou atamai. E se fakavae a te ‵lei o ‵tou akoako atu ki atamai fakapito kae ki se mea telā e tāua atu. Ke onoono aka ki pati a se faiakoga apo telā ne tusi i tena tusi e uiga ki te akoako atu, penei: “A te faiga ke ‵lei tau akoako atu e se fakavae ki te atamai, poto mo faifaiga fakapito. . . . E ‵tau o fakavae ki te alofa.” E tonu, e faipati mai a ia e uiga ki faiakoga i akoga a te lalolagi. Kae e aogā ‵ki eiloa ana pati ki te faiga o akoakoga telā e fai ne tatou, e pelā me ne Kelisiano. E pefea la?

³ A te ‵toe faiakoga ‵lei telā e fakaakoako tatou ki ei ko Iesu Keliso, ne fai atu ki ana soko, penei: “Ko avatu ne au te fakaakoakoga mo koutou.” (Ioane 13:15) Ne fakasino atu a ia ki te fakaasiatuga o te loto maulalo, kae ko te fakaakoakoga tenā a Iesu, e aofia i ei tena galuega tāua e pelā me se tagata i te lalolagi​​—⁠ko te akoako atu ki tino a te tala ‵lei e uiga ki te Malo o te Atua. (Luka 4:43) E seai se fakalotolotolua me ka filifili aka ne koe a te pati ko te “alofa,” ke fakamatala atu i ei a te galuega telā ne fai ne Iesu, i ne? (Kolose 1:​15; 1 Ioane 4:⁠8) Ne fakasilisili ne Iesu tena alofa ki tena Tamana faka-te-lagi, ko Ieova. (Ioane 14:31) I te faiga pelā me se faiakoga, ne fakaasi atu ei ne Iesu tena alofa mo tena loto ‵nau i auala e lua. Ne loto finafinau a ia ki muna‵tonu kolā ne akoako atu ne ia kae ne alofa foki ki tino ne akoako atu a ia ki ei. Ke na onoono faka‵lei tatou ki vaega e lua konei o te fakaakoakoga ne tuku mai ne Iesu.

Ko Leva ne ‵Nau Tena Loto ki Muna‵tonu Mai te Atua

⁴ E fakalagolago te ‵lei o te akoako atu o se faiakoga ki tena kilokiloga ki te mataupu telā e akoako ne ia. Ka mateagofie ne tama‵liki a‵koga māfai e seai sena loto finafinau kae ka fai foki latou penā. Ne fiafia faeloa a Iesu ki muna‵tonu kolā ne akoako atu ne ia e uiga ki a Ieova mo tena Malo. Ne ‵nau eiloa te loto o Iesu ki te mataupu tenei kae talu mai te taimi ne kamata ei o tauloto a ia i te fia o tausaga ne ola ei a ia i te lagi, ne loto finafinau malosi a te Tama fagasele eiloa e tokotasi a te Atua ki mea kolā ne tauloto a ia ki ei. E maua i te Isaia 50:​4, 5, a pati kolā e fetaui ‵lei, penei: “Ko oti au ne akoako ne te Aliki Sili ki muna e tau o fai ne au, ko te mea ke mafai ne au o fakamalosi a loto o tino loto vaivai. I taeao katoa, e fai ne ia toku loto ke fiafia o fakalogo ki ana akoakoga. Ne aumai ne te Aliki ki a au a te malamalama, ka ko au e seki teke io me fuli keatea mai i a ia.”

⁵ I tena tupuakaga e pelā me se tagata i te lalolagi nei, ne tumau eiloa a te fiafia o Iesu ki te poto mai te Atua. (Luka 2:52) Kae ne tupu ki a ia se mea fakaofoofogia i te taimi ne papatiso ei a ia. E fai mai te Luka 3:21 me ne “matala te lagi.” I konā foki eiloa, ne masaua ei ne Iesu tena olaga mua i te lagi. Fakamuli ifo, ne seki kai a ia mō aso e 40 i te koga lavaki. E se taumate ne fiafia malosi a ia i te mafaufau ‵loto ki akoakoga e uke kolā ne maua ne ia mai i a Ieova. E seki leva, ne tofotofogina ei tena loto ‵nau ki muna‵tonu mai te Atua.

⁶ I te taimi ne fi‵ta kae fiakai ei a Iesu, ne taumafai a Satani o tofotofo a ia. Ko tafaga la te ‵kese o tama‵liki e tokolua konei a te Atua! Ne siki mai ne laua a pati i tusitusiga Epelu​—⁠kae ‵kese ‵ki lā kilokiloga ki ei. Ne ‵fuli fakakōtua ne Satani a te Muna a te Atua, kae ne sōna fakaaogā ne ia a muna konā ke fakama‵lie aka ana manakoga totino. A te ‵tonuga loa, ne manako fua a te tino ‵teke tenei ke fakamasei ne ia a muna‵tonu a te Atua. Ona ko tena loto ‵nau, ne siki mai ne Iesu a pati i te Tusi Tapu kae ne fakaaogā mo te fakaeteete ne ia a te Muna a te Atua i ana tali takitasi. A koi tuai o tusi a pati konā ki lalo, ko leva eiloa ne ola a Iesu kae ne amanaia malosi a ia ki ei. Ne muna‵tonu tāua ‵ki eiloa mai tena Tamana faka-te-lagi! Ne fai atu a ia ki a Satani me e sili atu te tāua o pati konā i lō meakai. (Mataio 4:​1-11) E tonu, ne ‵nau eiloa te loto o Iesu ki muna‵tonu katoa kolā ne akoako atu ne Ieova. Ne fakaasi atu pefea ne ia te ‵nau o tena loto e pelā me se faiakoga?

Tena Loto ‵Nau ki Muna‵tonu Kolā ne Akoako Atu ne Ia

⁷ Ne manino ‵lei eiloa me ne ‵nau te loto o Iesu ki muna‵tonu kolā ne akoako atu ne ia. Moi manako a ia ki ei, ne mafai fua ne ia o akoako atu ana manatu totino me e uke ‵ki a mea kolā ne iloa ne ia. (Kolose 2:⁠3) Kae ui ei, ne fakamasaua atu faeloa ne ia ki tino fakalogo‵logo me i mea kolā e akoako atu ne ia e se māfua mai i a ia kae mai tena Tamana faka-te-lagi. (Ioane 7:16; 8:28; 12:19; 14:10) Ona ko tena loto ‵nau ki muna‵tonu mai te Atua ne seki mafai o sui ne ia a muna‵tonu konā ki ana manatu totino.

⁸ Ne tuku fakavave mai ne Iesu se fakaakoakoga i te taimi ne kamata ei tena galuega. Mafaufau ki te auala ne fakaasi atu muamua ne ia ki tino o te Atua me i a ia ko te Mesia telā ne folafola mai. E mata, ne fakasae atu a ia ki tino, fakailoa atu i a ia ko te Keliso, kae fai ne ia a vavega fakaofoofogia ke fakatalitonu atu i ei ana pati? Ikai. Ne fanatu a ia ki te faletapu, ko te koga telā e fai‵tau sāle i ei a tino o te Atua ki te Tusi Tapu. Ne faitau atu ne ia i konā a te valoaga i te Isaia 61:​1, 2 kae fakamatala atu ne ia me e fakauiga a pati fakapelofeta ‵tonu konā ki a ia. (Luka 4:​16-​22) Ne fakamaoni mai ne vavega e uke ne fai ne ia me e ‵lago atu a Ieova ki a ia. Ne tumau eiloa a ia i te fakalagolago atu ki te Muna a te Atua i te faiga o ana akoakoga.

⁹ I te ‵tekeatuga o takitaki lotu ki a Iesu, ne seki fia kinau a ia mo latou faitalia me ne faigofie fua ke fakatakavale ne ia latou. I lō te fai penā, ne fakaaogā ne ia te Muna a te Atua ke fakaasi faka‵sau atu te lotou ‵se. Ke masaua a te taimi ne ‵losi atu ei ne Falesaio me ne soli ne soko o Iesu a te Sapati i te taimi ne tau ei ne latou a saito i te fatoaga mo olotou ‵kai. Ne tali atu a Iesu, penei: “E seki faitau ne koutou a te tala i te mea ne fai ne Tavita mo ona tagata i te taimi ne fia ‵kai ei latou?” (Mataio 12:​1-5) E tonu, kāti ko oti eiloa ne fai‵tau a tāgata fia amio‵tonu konei ki te tala tenā i te 1 Samuelu 21:​1-6. Kafai ne fai penā, ko tena uiga ne seki maua ne latou a te manatu tāua i ei. Ne uke atu a mea ne fai ne Iesu, i lō te faitau fua ki te tala tenā. Ne mafaufau ‵loto a ia ki ei kae ne akoako atu foki ne ia a mea tāua i ei. Ne fiafia malosi a ia ki fakatakitakiga kolā ne akoako mai ne Ieova e auala i te tala tenā. Tela la, ne fakaaogā ne ia a te tala tenā, fakatasi mo se fakaakoakoga mai te Tulafono a Mose, ke fakaasi atu i ei te paleni ‵lei o te Tulafono tenā. I se auala tai ‵pau, ne fakamalosigina a Iesu ne tena alofa fakamaoni ke ‵lago atu ki te Muna a te Atua i te taimi ne taumafai ei a takitaki lotu o ‵fuli fakakōtua ne latou a manatu tāua i ei ki mea kolā e fia‵fia latou ki ei io me ke fakagalo atu te Muna a te Atua kae fakatāua olotou tuu mo aganuu.

¹⁰ Ona ko te ‵nau o tena loto ki te mataupu e akoako atu ne ia, ne seki talia ne Iesu ke akoako atu ne ia a mea konā e pelā me se mea tauloto, i se auala telā e fakafi‵ta io me pelā me se faifaiga masani e aunoa mo te loto finafinau ki ei. E fakaasi mai ne valoaga mai te Atua me i te Mesia se “tagata poto i te faipati” kae e fakaaogā foki ne ia a pati “gali.” (Salamo 45:2; Kenese 49:21) Ne fakataunu ne Iesu a valoaga konā, mai te faiga ke fia‵fia kae fia fakalogo‵logo a tino ki tena fekau, mai te fakaaogāga o “pati ‵lei” i te taimi ne akoako atu ei ne ia a muna‵tonu kolā ne fiafia malosi a ia ki ei. (Luka 4:22) E se taumate ne lavea atu tena loto finafinau mo tena mata fiafia i ana foliga ona ko te ‵nau o tena loto ki te mataupu. E pefea te fakafiafia ke fakalogologo atu ki a ia, kae pefea foki te gali o te fakaakoakoga ne tuku mai ne ia ke tautali atu ki ei māfai ko fakaasi atu ne tatou ki nisi tino a mea ne tauloto ne tatou!

¹¹ E mata, ne fai ne te lasi o te iloaga o Iesu i muna‵tonu mai te Atua mo tena apo i te faipati atu ke ‵fete a ia i te fakamatamata? E masani o tupu sāle te mea tenā ki faiakoga i aso nei. Ke masaua la me ne poto ‵ki a Iesu ona ko tena poto mai te Atua. E se ‵tau o fai ne te vaegā poto tenā ke fakamata‵mata tatou, me e “maua fua te poto i tino loto maulalo.” (Faataoto 11:​2, Tusi Paia Samoa) E isi foki se isi pogai ne seki fakamatamata i ei a Iesu.

Ne Alofa Iesu ki Tino Kolā ne Akoako ne Ia

¹² Ne lavea atu faeloa a te ‵poko o te alofa o Iesu ki tino i te auala e fai ei ana akoakoga. E se fakamatakutaku ne Iesu a tino i tena akoako atu, e pelā mo akoakoga a tino fakamata‵mata i aso nei. (Failauga 8:⁠9) Ne ofo malosi a Petelu i te laveaatuga ne ia a te vavega e tasi a Iesu, kae ne totuli ifo ei a ia i mua o Iesu. Kae ne seki manako a Iesu ke sōna ma‵taku ana soko ki a ia. Ne faipati atu a ia mo te alofa, penei, “Sa mataku” kae fakamatala atu ei ne ia ki a Petelu a te galuega gali, ko te faiga o soko telā ka fai ne ia. (Luka 5:​8-10) Ne manako a Iesu ke fakamalosigina ana soko ne te lotou loto ‵nau ki muna‵tonu tāua e uiga ki te Atua, kae e se ko te ma‵taku ki te lotou pule.

¹³ Ne lavea atu foki a te alofa o Iesu ki tino ne akoako ne ia ona ko tena atafai ki a latou. “I te laveatuga ne ia i te tokouke o tino, ne tupu ake ei tena loto alofa mō latou, me ko se toka olotou loto i te seai o se tino e fesoasoani atu, ko pela mo mamoe e seai se lotou tino tausi.” (Mataio 9:36) Ne alofa a ia ki a latou ona ko te lotou tulaga fakaa‵lofa kae ne fakamalosigina ei ke fesoasoani atu ki a latou.

¹⁴ Ke onoono ki te atafai o Iesu ki tino i te suā fakalavelave telā ne tupu. I te taimi ne fakatōtō atu ei se fafine telā ne ‵tafe tena sua i te vaitino ke patele a ia ki te kapakapa o te gatu o Iesu, ne ‵lei fakavavega ei tena masaki. Ne lagona ne Iesu a te ‵mana ko fano keatea mai i a ia, kae ne seki lavea ne ia a te tino telā ne faka‵lei aka i ei. Ne taumafai a ia ke ‵sala aka a te fafine tenā. Kaia? E se ko te mea ke fakamasiasi ei tou fafine ona ko te soli ne ia a te Tulafono io me ko fakatonuga a faiakoga mo Falesaio, e pelā mo te mea ne mafaufau tou fafine ki ei. I lō te fai penā, ne fai atu a ia ki tou fafine, penei: “Taku tama, ko tou fakatuanaki ko ola ei koe. Na fano la mo te manuia, i a koe ko ‵lei.” (Maleko 5:​25-​34) Onoono ki te atafai telā ne fakaasi atu i ana pati konā. Ne seki fai atu fua a ia, penei, ‘Ke ‵lei tou masaki.’ I lō te fai atu penā, ne fai atu a ia, penei: “Na fano la mo te manuia, i a koe ko ‵lei.” Ne fakaaogā ne Maleko se pati i konei e uiga ki te masaki telā e fakauiga tonu ki te “‵kini,” se vaegā ‵kini telā e fakaaogā e pelā me se fakasalaga. Tela la, ne fakaasi mai ne Iesu me ne tigāina valevale tou fafine i tena masaki, kāti i te feitu faka-te-foitino mo ana lagonaga foki. Ne atafai malosi a ia ki tou fafine.

¹⁵ Ne fakaasi atu foki ne Iesu tena alofa ki tino mai te fakatāua ne ia olotou uiga ‵lei. Ke mafaufau ki te mea ne tupu ki a Natanielu, telā ne fai fakamuli mo fai se apositolo. “I te laveatuga ne Iesu i a Natanielu e vau ki a ia, kae fai atu, ‘Kiloke, tenei eiloa te tina Isalaelu tonu; e seai sona masei!’ ” Ne iloilo ne Iesu a te loto o Natanielu, iloa ei ne ia a mea e uke e uiga ki a ia. E tonu, ne seki ‵lei katoatoa a Natanielu. E isi ne ana vāivāiga e pelā eiloa mo tatou katoa. A te ‵tonuga loa, i te taimi ne lagona ei ne ia a tala e uiga ki a Iesu, ne fai atu ana pati faka‵tuka, penei: “E mafai o maua se mea ‵lei mai i Nasaleta?” (Ioane 1:​45-​51) Kae e tiga eiloa e uke ‵ki a mea ne mafai ne Iesu o faipati ki ei e uiga ki a Natanielu, ne kilo atu fua a Iesu ki tena uiga ‵lei, ko te fakamaoni.

¹⁶ I se auala tai ‵pau, i te taimi ne fanatu ei se ofisa o kautau​—⁠kāti se tino mai fenua fakaatea, se tino Loma​—⁠o fakamolemole atu ki a Iesu ke faka‵lei aka se tavini telā e masaki ‵ki, ne iloa ‵lei ne Iesu me i te sotia tenā e isi foki ne ana vāivāiga. E se taumate, kāti ne ola a ofisa o kautau i aso konā i se olaga fakasauā, tatino kae tapuaki atu foki ki atua ‵se. Kae ui ei, ne kilo atu a Iesu ki te uiga ‵lei o te tino​—⁠ko tena fakatuanaki tu ‵kese. (Mataio 8:​5-13) Fakamuli ifo, i te taimi ne faipati atu ei a Iesu ki te pagota telā ne fakasataulo i ona tafa, ne seki taku fakamasei ne Iesu tou tagata ona ko ana amioga ma‵sei i aso mua, kae ne fakamalosi atu ki a ia e uiga ki te fakamoemoega i aso mai mua. (Luka 23:43) Ne iloa ne Iesu me kafai e mata onoono faeloa a ia ki vāivāiga o tino ka faka‵tuka fua i ei latou. E se taumate ne fakamalosi aka ei a tino e tokouke ke momea aka te lotou ma‵losi ona ko ana taumafaiga ke fakatāua a uiga ‵lei o nisi tino.

Te Fia Tavini Atu ki Tino

¹⁷ A te suā fakamaoniga tonu o te alofa o Iesu ki tino kolā ne akoako ne ia ko tena fia tavini atu ki a latou. I tena olaga i te lagi, ne alofa faeloa a te Tama a te Atua ki tino. (Faataoto 8:​30, 31) I tena fai pelā mo te “Muna” a Ieova io me ko tena tukumuna, kāti ne uke ‵ki a taimi ne fesokotaki atu ei a ia ki tino. (Ioane 1:⁠1) Kae ko te suā pogai ne vau ei a ia ki te lalolagi, ke akoako tonu atu ne ia a tino, “ne tiakina katoatoa ne ia tona ‵malu faka-Atua, kae fai mo tavini.” (Filipi 2:7; 2 Kolinito 8:⁠9) I te taimi ne nofo ei a ia i te lalolagi, ne seki faka‵tali a Iesu ke tavini atu a tino ki a ia. I lō te fai penā, ne fai mai a ia, penei: “E pela mo te Tama a te Tagata, e seki vau au ke tavini mai a tino ki a au, kae ke tavini atu au; ke tuku atu foki a toku ola mō tino e tokouke.” (Mataio 20:28) Ne ola eiloa a Iesu e ‵tusa mo pati konā.

¹⁸ Ne fakaoti ne Iesu ana mafi i te tavini atu mo te loto maulalo ke fesoasoani atu ki tino fakaa‵lofa kolā ne akoako ne ia. Ne sasale atu a ia i te fia selau o maila i te Fenua o te Folafolaga, ke talai atu ki so se tino telā e mafai o maua i ei. E ‵kese mo Falesaio mo faiakoga fakamata‵mata o te tulafono, ne tumau eiloa a ia i te loto maulalo kae ne faigofie o olo atu a tino ki ei. Ne olo atu ki a ia e aunoa mo te ma‵taku a tino valevale​—⁠tino ma‵luga o te fenua, sotia, lōia, fāfine, tama‵liki, tino ma‵tiva, tino ma‵saki ke oko foki loa ki tino fatauvā o te fenua. E ui eiloa ne ‵lei katoatoa a ia, e isi ne ana manakoga faka-te-foitino me ne fi‵ta kae ne fiakai foki a ia i nisi taimi. Ne fakamuamua faeloa ne ia a manakoga o nisi tino faitalia me ne fi‵ta, ne manako o malōlō io me ke ‵talo a ia.​—⁠Maleko 1:​35-​39.

¹⁹ Ne ‵pau eiloa te loto finafinau o Iesu ke tavini atu ki ana soko. Ne fai a ia penā mai te akoako atu i te alofa mo te loto kufaki. Kafai e fui malamalama latou i nisi akoakoga tāua kolā e fai atu ne ia, ne seki ‵fiu, kaitaua io me pati ‵toko atu ki a latou. Ne tumau a ia i te ‵sala atu ki nisi auala ke fakamaina atu ei ki a latou te manatu tāua. E pelā me se fakaakoakoga, ke mafau‵fau ki te fia o kinauga kolā ne fai sāle ne ona soko me ko oi te tino e sili i a latou. Ke oko foki loa ki te po mai mua o tena mate, ne maua ne Iesu a nisi auala ke akoako atu ke iloa ne latou o fakatau fakaasi atu te loto maulalo. I te feitu tenei e pelā foki mo nisi feitu aka, ne mafai eiloa o fai mai a Iesu, penei: “Ko avatu ne au te fakaakoakoga mo koutou.”​—⁠Ioane 13:​5-​15; Mataio 20:25; Maleko 9:​34-​37.

²⁰ Ke masaua me ne seki taku atu fua ne Iesu ki ana soko a te fakaakoakoga; kae ne ‘avatu eiloa ne ia te fakaakoakoga.’ Ne akoako ne ia latou i ana faifaiga. Ne seki faipati atu a ia ki a latou e pelā me se tino maluga telā e fakatonu atu a mea kolā e ‵tau o fai ne latou. Konā eiloa a faifaiga a te kau Falesaio. Ne fai mai Iesu e uiga ki a latou, penei: “E akoako ne latou a tino ke tausi te Tulafono, kae se tausi ne latou.” (Mataio 23:⁠3) Ne fakaasi atu ne Iesu mo te loto maulalo ki ana tino a‵koga a te uiga o ana akoakoga katoa mai te ola e ‵tusa mo ana akoakoga konā. Tela la, i te fakamalosi atu ki ana soko ke ola i se olaga faigofie e aunoa mo te fia maumea ne seki ‵tau o tuku taumate fua ne latou a te mea e fakauiga a ia ki ei. Ko mafai o iloa ne latou a te uiga o ana pati: “E isi ne lua o alope, mo manu eva e isi foki ne olotou ofaga, ka ko te Tama a te Tagata, e seai se koga mo ana fakatapū.” (Mataio 8:20) Ne tavini atu a Iesu ki ana soko mai te tukuatuga ne ia o se fakaakoakoga ki a latou.

²¹ E manino lei, me i a Iesu ko te ‵toe Faiakoga sili eiloa ke ola i te lalolagi nei! Ne maina ‵lei a tino loto fakamaoni kolā ne lavea kae lagona foki ne latou a ia, tena loto ‵nau ki mea ne akoako atu ne ia mo tena alofa ki tino ne akoako atu a ia ki ei. E maina foki tatou i ei māfai e sukesuke faka‵lei ki tena fakaakoakoga. E mafai la pefea o tau‵tali atu ki te fakaakoakoga ‵lei a Keliso? Ka tali mai ne te suā mataupu a te fesili tenā?

Ka Tali Mai Pefea ne Koe?

• Se a te fakavae tonu o te faiga o akoakoga ‵lei, kae ko oi ne fakaasi mai ne ia se fakaakoakoga ‵lei i te feitu tenā?

• Ne fakaasi atu pefea ne Iesu tena loto ‵nau ki muna‵tonu kolā ne akoako ne ia?

• Ne fakaasi atu pefea ne Iesu tena alofa ki tino kolā ne akoako ne ia?

• Ne a fakaakoakoga e fakaasi mai ei a te fia tavini atu o Iesu i te loto maulalo ki tino kolā ne akoako ne ia?

[Fesili mo te Sukesukega]

1. Kaia e fai ei a pati i te Epelu 5:12 ke mafaufau ‵mafa se Kelisiano?

2, 3. (a) Ne fakamatala mai pefea ne se faiakoga a te fakavae tonu ki te faiga o akoakoga ‵lei? (e) Se a te fakaakoakoga ne tuku mai ne Iesu i te faiga o akoakoga?

4. Ne fakamalosi aka pefea ne Iesu te ‵nau o tena loto ki akoakoga a Ieova?

5, 6. (a) Se a te mea ne tupu ki a Iesu i tena papatisoga, kae ne aogā pefea te mea tenā ki a ia? (e) E ‵kese pefea a Iesu mo Satani i te taimi ne fakaaogā ei ne laua te Muna a te Atua?

7. Kaia ne ‵kalo keatea ei a Iesu mai te akoako atu o ana manatu totino?

8. Ne fakaasi mai pefea ne Iesu se fakaakoakoga ‵lei o te fakalagolago ki te Muna a te Atua, i te kamataga o tena galuega?

9. I ana faifaiga ki te kau Falesaio, ne fakaasi atu pefea ne Iesu te loto ‵nau mo te fakamaoni ki te Muna a te Atua?

10. Ne fakataunu pefea ne Iesu a valoaga e uiga ki tena atamai i te akoako atu?

11. Kaia ne seki fai ei a te atamai o Iesu e pelā me se faiakoga ke ‵fete a ia i te fakamatamata?

12. Ne fakaasi atu pefea ne Iesu me ne seki manako a ia ke ma‵taku ana soko ki a ia?

13, 14. Ne fakaasi atu pefea ne Iesu tena atafai ki tino?

15, 16. Ne a mea ne ‵tupu i te galuega a Iesu telā ne fakaasi mai ei me ne fakatāua ne ia a uiga ‵lei o tino?

17, 18. I te taimi ne lotomalie ei a ia ke vau o fai a te galuega i te lalolagi nei, ne fakaasi atu pefea ne Iesu tena fia tavini atu ki nisi tino?

19. Ne tuku mai pefea ne Iesu se fakaakoakoga o te loto maulalo, te loto kufaki mo te alofa ki ana soko?

20. Se a te auala ne akoako atu ei a Iesu telā e ‵kese ei a ia mai Falesaio, kae kaia ne tāua ei te auala tenā?

21. Se a te mea ka fakamatala mai i te suā mataupu?

[Ata i te itulau e 10]

Ne fakaasi mai pefea ne Iesu me ne loto ‵nau a ia ki fakatakitakiga i loto i te Muna a te Atua?