Uiga Kolā e ‵Tau o Taumafai ki ei

“Taumafai o fai te amiotonu, te olaga amio Atua, te fakatuanaki, te alofa, te kufaki mo te loto maulalo.”​​—1 TIMOTEO 6:​11.

1. Ne a fakamoemoega e tuku katoatoa atu ne tino olotou olaga ki ei?

NE A mea e tuku katoatoa atu ne tino i te lalolagi i aso nei olotou olaga ki ei? E pelā mo te mea e fakaasi mai i te Tusi Tapu, e taumafai a tino e tokouke ki fakamoemoega sē aogā. E “ga‵lue malosi” a nisi tino ona ko te tali‵tonu me e iku atu a kope faka-te-foitino ki te fiafia. (Faataoto 28:19) E “fai amioga ma‵sei” a nisi tino, mai te faiga o tafaoga mo fakafiafiaga mo fai a toe mea aogā i olotou olaga. (Salamo 26:10) E tiga eiloa e taumafai malosi a tino ki vaegā fakamoemoega penā, e fai ‵tonu eiloa latou pelā “me se tino e taumafai o afuli te matagi.”​​—Failauga 1:14.

2. (a) Se a te fakailoga ne ‵kami ne te Atua a nisi Kelisiano ke taumafai ki ei? (e) Se a te fakamoemoega telā ne ofo atu ne Ieova ki te tokoukega o Kelisiano i aso nei?

² E ‵kese mai i mea konā, ke mafaufau ki te kilokiloga aogā ne maua ne te apositolo ko Paulo: “Au e tele ‵tonu eiloa ki te tapulā ke maua ne au a te fakailoga, telā ko te kalaga a te Atua e alatu i a Keliso Iesu ki te ola i te lagi.” (Filipi 3:​14) E fakaasi mai ne te Tusi Tapu me e ‵tusa mo te toko 144,000 o Kelisiano fakaekegina, e aofia i ei a Paulo, e maua ne latou te fakailoga o te ola i te lagi. Ka pule fakatasi latou mo Iesu Keliso i tena Pulega i te Afe Tausaga ki te lalolagi nei. Ko tafaga la te gali o te fakamoemoega mō vaegā tino penā, kolā ne ‵kami ne te Atua, ke taumafai ki ei! Kae e ‵kese eiloa te fakamoemoega o te tokoukega o Kelisiano ‵tonu i aso nei. Ne ofo atu ne Ieova mo te alofa ki a latou a te mea telā ne galo i a Atamu mo Eva, ko te fakamoemoega ke ola ki te se-gata-mai i te malosi ‵lei katoatoa i te lalolagi palataiso.​​—Fakaasiga 7:​4, 9; 21:​1-4.

3. E mafai pefea o fakaasi atu ne tatou te loto fakafetai mō te alofa tauanoa o te Atua?

³ E se mafai o maua ne tino agasala a te ola se-gata-mai ona ko olotou taumafaiga sē ‵lei katoatoa ke fai te mea tonu. (Isaia 64:6) E mafai fua o maua te ola se-gata-mai māfai e fakatuanaki tatou ki te fakatokaga alofa a te Atua mō te fakaolataga e auala i a Iesu Keliso. Ne a mea e mafai ne tatou o fai ke fakaasi atu ei te ‵tou loto fakafetai mō te alofa tauanoa tenā o te Atua? E tasi te mea e mafai ne tatou o fai ko te faka‵logo ki te fakatonuga tenei: “Taumafai o fai te amiotonu, te olaga amio Atua, te fakatuanaki, te alofa, te kufaki mo te loto maulalo.” (1 Timoteo 6:​11) A te mafau‵fau ki uiga konei e mafai o fesoasoani mai ki a tatou katoa ke momea aka “te fakasilisili” ne tatou te ‵tou fia taumafai atu ki ei.​​—1 Tesalonia 4:1.

‘Taumafai o Fakaasi Atu te Amiotonu’

4. Kaia e mautinoa ei me se mea tāua a te taumafai o fakaasi atu te “amiotonu” kae ne a mea muamua e ‵tau o fai ne se tino?

⁴ I ana tusi e lua ki a Timoteo, ne taku atu ne te apositolo ko Paulo a uiga kolā e ‵tau o taumafai tatou o fakaasi atu, kae ne taku atu muamua ne ia i taimi takitasi konā a te “amiotonu.” (1 Timoteo 6:​11; 2 Timoteo 2:​22) E se gata i ei, e fakamalosi mai faeloa i nisi fuaiupu i te Tusi Tapu ke taumafai tatou o fakaasi atu te amiotonu. (Faataoto 15:9; 21:21; Isaia 51:1) A te auala ke kamata o fai penā ko te taumafai “ke iloa . . . te Atua tonu e tokotasi . . . mo Iesu Keliso [telā] ne uga mai ne [ia].” (Ioane 17:3) A te taumafai o fakaasi atu te amiotonu ka fakamalosi aka ei se tino​​—ke salamō ki ana agasala mua kae “‵fuli atu ki te Atua” o fai tena loto.​​—Galuega 3:​19.

5. Ne a mea e ‵tau o fai ko te mea ke maua kae fakatumau foki ne tatou se tulaga amiotonu i mua o te Atua?

⁵ E lau i miliona a tino kolā ne taumafai tonu o fakaasi atu te amiotonu, ko oti ne tuku atu olotou ola ki a Ieova kae fakamailoga foki te mea tenā ki te papatisoga ki te vai. Kafai koe se Kelisiano papatiso nei, kai mafaufau aka koe me i te auala e ola ei koe, kae kāti ko fai eiloa koe penā, e ‵tau o fakaasi atu ei tou taumafai faeloa o fakaasi atu te amiotonu? A te vaega e tasi o te mea tenā ko tou malamalama i te Tusi Tapu e uiga ki te mea “‵lei mo te mea masei” māfai ko fe‵paki koe mo fakaikuga i te olaga. (Faitau te Epelu 5:​14.) E pelā mo tou fai mo fai se Kelisiano taka telā ko mafai o avaga, e mata, ko oti ne fakaiku katoatoa aka ne koe ke ‵teke atu ki te fai fāmau mo se tino telā e se se Kelisiano papatiso? E mafai eiloa ne koe o fai penā māfai e taumafai koe o fakaasi atu te amiotonu.​​—1 Kolinito 7:​39.

6. Ne a mea e aofia i te taumafai tonu o fakaasi atu te amiotonu?

⁶ A te amiotonu e ‵kese mai i te fia amiotonu io me ko te “manako ke tō ‵lei koe.” (Failauga 7:​16) Ne fakailoa mai ne Iesu ke mo a ma maua ne tatou se vaegā amiotonu penā i te taumafai ke fakaasi atu me e ‵lei atu tatou i lō nisi tino. (Mataio 6:1) A te taumafai tonu ke fakaasi atu te amiotonu e aofia i ei te loto​​—te fakatonutonuga o mafaufauga, kilokiloga, lagonaga, mo manakoga ‵se. Kafai e tumau tatou i te taumafai o fakaasi atu te mea tenei, kāti ka faigata eiloa o fai ne tatou se agasala matagā. (Faitau te Faataoto 4:​23; fakatusa ki te Iakopo 1:​14, 15.) E se gata i ei, ka fakamanuia ne Ieova tatou kae fesoasoani mai foki i te ‵tou taumafai o fakaasi atu a nisi uiga faka-Kelisiano tāua.

‘Taumafai o Fakaasi Atu te Olaga Amio Atua’

7. Se a “te olaga amio Atua”?

⁷ E aofia i te olaga amio Atua a te tukuatuga o ‵tou ola mo te alofa fakamaoni katoatoa. E fakamatala mai i se tikisionale faka-te-Tusi Tapu e tasi me i te pati Eleni telā ne ‵fuli ki “te olaga amio Atua” e fakauiga ki “te kilokiloga ‵lei kae aogā o te fakaeteete ke mo a ma fakavāivāi ei te mataku ‵tau ki te Atua.” Ne fakata‵mala faeloa te kau Isalaelu o fakaasi atu te vaegā olaga amio Atua penā, e pelā mo te lavea atu i te lotou sē faka‵logo mai tua o te fakasaolotoga o latou ne te Atua mai Aikupito.

8. (a) Se a te fesili ne fakasae aka ona ko te agasala a Atamu? (e) Ne fakaasi atu pefea te tali ki te “mea ‵funa” tenei?

⁸ I te fia afe o tausaga mai tua o te agasala a te tagata ‵lei katoatoa ko Atamu, ne mafai ei o fakasae aka te fesili tenei, “E mata, e mafai o ola so se tino i se olaga amio Atua ‵lei katoatoa?” I te vaitaimi kātoa eiloa tenā, ne seki mafai eiloa ne se tino agasala o ola i se olaga amio Atua ‵lei katoatoa. Kae i tena taimi tonu eiloa, ne fakaasi mai ei ne Ieova te tali ki te “mea ‵funa” tenei. Ne tuku atu ne ia te ola o tena Tama fagasele eiloa e tokotasi i te lagi ki te moegātama o Malia ke fanau mai ei e pelā me se tino ‵lei katoatoa. I tena olaga kātoa i te lalolagi, e aofia i ei tena mate fakalumalumagina, ne fakaasi atu ne Iesu a te uiga o te tukuatuga mo te alofa fakamaoni katoatoa ki te Atua tonu. Ne fakaasi mai i ana ‵talo tena kilokiloga fia tapuaki atu ki tena Tamana alofa faka-te-lagi. (Mataio 11:25; Ioane 12:​27, 28) Tela la, ne fakamalosi atu ne Ieova a Paulo ke faipati atu e uiga ki te “olaga amio Atua” mai te fakamatala atu o te fakaakoakoga ‵lei o te olaga o Iesu.​​—Faitau te 1 Timoteo 3:​16.

9. E mafai pefea o taumafai tatou ke fakaasi atu te olaga amio Atua?

⁹ Ona ko te ‵tou tulaga agasala, e se mafai ne tatou o ola i se olaga amio Atua ‵lei katoatoa. Kae e mafai eiloa o taumafai tatou ke fai penā. E manakogina i ei a te tau‵tali fakapili‵pili atu o tatou ki te fakaakoakoga a Keliso. (1 Petelu 2:​21) Tela la, ka se fai tatou pelā mo tino ‵loi kolā e “taofi ‵mau fua latou ki faiga matea o te [lotou] lotu, kae ‵teke ki tona ‵mana.” (2 Timoteo 3:5) E se fakauiga i ei me e se aofia a foliga totino i te olaga amio Atua tonu. E aofia eiloa i ei. E pelā me se fakaakoakoga, faitalia me e filifili aka ne tatou se gatu mō te fakaipoipoga io me se gatu ke fanatu ei ki te sitoa, e ‵tau faeloa o fetaui ‵tou foliga mo te faiga o tatou e pelā me ne tino “‵lotu.” (1 Timoteo 2:​9, 10) E tonu, a te taumafai o fakaasi atu te olaga amio Atua e manakogina i ei a te mafaufau ki tulaga amio‵tonu o te Atua i ‵tou olaga i aso katoa.

‘Taumafai o Fakaasi Atu te Fakatuanaki’

10. Ne a mea e ‵tau o fai ne tatou ko te mea ke fakamalosi aka ei te ‵mautakitaki o ‵tou fakatuanaki?

¹⁰ Faitau te Loma 10:17. Ke fakamalosi kae fakatumau aka te fakatuanaki ‵mautakitaki, e ‵tau o mafaufau ‵loto se Kelisiano ki muna‵tonu tāua kolā e maua i te Muna a te Atua. Ko oti ne tuku mai ne “te tavini fakamaoni kae poto” a tusi ‵gali e uke. E tolu a tusi kolā e tu ‵kese i te feitu tenei ko Te ‵Toe Tagata Sili Telā ne Ola, Learn From the Great Teacher, mo te “Come Be My Follower,” kolā ne fakatoka ke fesoasoani mai ke iloa ‵lei ne tatou a Keliso kae ke mafai foki o fakaakoako atu ki a ia. (Mataio 24:​45-​47) E fakatoka foki ne te tavini e pelā me se potukau a fakatasiga, tamā fono, mo fono ‵lasi, telā e faka‵mafa mai i te ukega o mea konā a “te talaiga a Keliso.” E mata, e lavea atu ne koe a nisi auala e mafai ei o fakaaogā faka‵lei ne tatou i se auala lasi atu a mea konei i te taimi e “puke ‵mautakitaki” ei tatou ki mea kolā e tuku mai ne te Atua?​​—Epelu 2:1.

11. Se a te aogā o te ‵talo mo te fakalogo i te ‵tou taumafai o fakaasi atu te fakatuanaki?

¹¹ A te ‵talo ko te suā auala ke ati aka ei se fakatuanaki ‵mautakitaki. Ne fakamolemole atu a soko o Iesu i te taimi e tasi ki a ia: “Fakalasi ake te motou fakatuanaki.” E mafai foki o fakamolemole atu tatou mo te loto maulalo ki te Atua ke fai foki penā. (Luka 17:5) Ko te mea ke fakalasi aka te ‵tou fakatuanaki, e ‵tau o ‵talo atu tatou mō te fesoasoani o te agaga tapu o te Atua; me i te fakatuanaki se fuataga e tasi “o te agaga.” (Kalatia 5:​22) E se gata i ei, a te fakalogo ki fakatonuga a te Atua e fakamalosi aka foki i ei ‵tou fakatuanaki. E pelā mo te taumafai o tatou ke momea aka te uke o ‵tou mea e fai i te galuega talai. Kāti ka maua eiloa ne tatou i ei se fiafia lasi ‵ki. Kae kafai e mafau‵fau tatou ki fakamanuiaga kolā e maua mai i te ‘fakamuamua o te Malo mo te amiotonu o te Atua,’ ka gasolo aka foki o lasi ‵tou fakatuanaki.​​—Mataio 6:​33.

‘Taumafai o Fakaasi Atu te Alofa’

12, 13. (a) Se a te fakatonuga fou a Iesu? (e) Ne a auala tāua e ‵tau o taumafai tatou o fakaasi atu te alofa e pelā mo Keliso?

¹² Faitau te 1 Timoteo 5:​1, 2. Ne tuku mai ne Paulo a manatu fakatonutonu aogā ki te auala e mafai ei ne Kelisiano o fakatau fakaasi atu te alofa. E ‵tau o aofia i ‵tou olaga amio Atua a te fakalogo ki te fakatonuga fou a Iesu ke “fakatau a‵lofa” tatou e pelā eiloa mo tena alofa ki a tatou. (Ioane 13:34) Ne fai mai te apositolo ko Ioane: “Kafai se tino e maumea, kae e matea foki ne ia a tena taina e mativa, kae e se alofa ki a ia; e mafai pefea o molimau mai i a ia e alofa ki te Atua i tena loto?” (1 Ioane 3:​17) E mafai o mafaufau koe ki taimi kolā ne fakaasi atu ei ne koe a te alofa i se auala ‵lei?

¹³ A te suā auala e taumafai ei tatou o fakaasi atu te alofa ko te loto fakamagalo, kae ke mo a ma tumau i te ita fakamoemoe ki ‵tou taina. (Faitau te 1 Ioane 4:​20.) I lō te fai penā, e ma‵nako tatou o tau‵tali ki pati fakamalosi konei: “Ke fakatau fesoasoani koutou i a koutou eiloa, ke fakatau fakamagalo foki koutou i a koutou eiloa, manafai e isi se mea e se malie ei te suā tino ki te suā tino. E pelā mo te Aliki ko oti ne fakamagalo ne ia koutou, e ‵tau foki mo koutou o fakatau fakamagalo.” (Kolose 3:​13) E mata, e isi se tino i te fakapotopotoga e mafai o fakaaogā ne koe ki ei a te manatu fakatonutonu tenei? E mata, ka fakamagalo ne koe a ia?

‘Taumafai o Fakaasi Atu te Kufaki’

14. Se a te mea e mafai o tauloto ne tatou mai i te fakapotopotoga i Filatelafia?

¹⁴ E tasi te mea e mafai o fai ko te taumafai ki se fakamoemoega faigofie kae e tai ‵kese eiloa māfai ko tai faigata atu te fakamoemoega ke fakataunu io me ko tō ‵mao te taimi e fai i ei i lō te mea ne fakamoe‵moe tatou ki ei. E manino ‵lei me i te taumafai atu ki te fakamoemoega ko te ola se-gata-mai e manakogina i ei a te kufaki. Ne fai atu te Aliki ko Iesu ki te fakapotopotoga i Filatelafia: “Ona ko koutou ne faka‵logo ki taku fakatonuga ke loto kufaki koutou, ka tausi faka‵lei foki ne au a koe i taimi o puapuagā.” (Fakaasiga 3:​10) A te ‵tonuga loa, ne akoako atu a Iesu e uiga ki te kufaki​​—se uiga telā e fesoasoani mai ke mo a ma ‵tuka vave ‵tou loto māfai ko fe‵paki tatou mo mea faiga‵ta mo tofotofoga. E ‵tau o fakaasi atu ne taina i te fakapotopotoga mua i Filatelafia a te kufaki tu ‵kese i tofotofoga e uke o te fakatuanaki. Tela la, ne fakatalitonu atu a Iesu me ka toe fesoasoani atu a ia ki a latou i te taimi e oko atu ei a taimi o puapuagā ‵lasi.​​—Luka 16:10.

15. Ne a mea ne akoako mai ne Iesu e uiga ki te kufaki?

¹⁵ Ne iloa ne Iesu me ne ‵tau o fe‵paki ana soko mo takalialiaga mai olotou kāiga sē tali‵tonu mo tino o te lalolagi, telā ne fakamalosi atu ei a ia i taimi e lua ki a latou: “Ka ko te tino e loto mau ke oko ki te ikuga, e ola eiloa a ia.” (Mataio 10:22; 24:13) Ne fakaasi atu foki ne Iesu a te auala ne mafai ei o maua ne ana soko i te taimi tenā a te malosi e manakogina ke kufaki latou. I se tala fakatusa e tasi, ne fakatusa ne ia a te laukele fatufatua ki tino “kolā ne lagona ne latou te muna [a te Atua], kae ne talia ne latou mo te fia‵fia” kae ne ‵tō atu keatea i te taimi ne fe‵paki ei mo tofotofoga o te fakatuanaki. Kae ne fakatusa ne ia ana soko fakamaoni ki te laukele ola ‵lei me ne “tausi” ne latou te muna a te Atua kae “ne [kufaki] eiloa ke oko ki te taimi ne ‵fua mai ei.”​​—Luka 8:​13, 15.

16. Se a te fakatokaga alofa ko oti ne fesoasoani atu ki te fia miliona o tino ke kufaki?

¹⁶ E mata, e lavea ne tatou te auala e mafai ei o kufaki? E ‵tau o “tausi” ne tatou te Muna a te Atua mai i te masaua faeloa ne tatou a mea konā i ‵tou loto mo ‵tou mafaufau. A te mauaga o te New World Translation of the Holy Scriptures​​—se ‵fuliga tonu kae faigofie o te Tusi Tapu ke faitau ki ei​​—telā ko faigofie me ko mafai o maua i ‵gana e uke atu nei. A te ‵tou mafaufau ‵loto ki se vaega o te Muna a te Atua i aso katoa ka fesoasoani mai ke maua ne tatou te malosi e manakogina ke tumau ei tatou i te ‵fua mai o fuataga ‘fakatasi mo te kufaki.’​​—Salamo 1:​1, 2.

‘Taumafai o Fakaasi Atu te Loto Maulalo’ mo te Filemu

17. (a) Kaia e tāua ‵ki ei a te ‘loto maulalo’? (e) Ne fakaasi mai pefea ne Iesu me ne loto maulalo a ia?

¹⁷ E seai eiloa se tino e fiafia māfai ko ‵losi atu ki a ia e uiga ki se pati io me se mea ne seki fai ne ia. Se mea masani eiloa mō tino ke tali atu mo te kaitaua ki ‵losiga ‵se konā. Kae ko oko eiloa i te ‵lei atu māfai e fakaasi atu ne tatou “te loto maulalo”! (Faitau te Faataoto 15:1.) E manakogina eiloa te loto malosi ke fakaasi atu te loto maulalo i ‵tou faifaiga ki ‵losiga ‵se. Ne tuku mai ne Iesu se fakaakoakoga ‵lei katoatoa i te feitu tenei. “I taimi ne fetūgina ei a ia, ne seki tali a ia i muna fetū; kae i te taimi ne puapuagatia ei a ia, ne seki mataku, kae ne tuku atu katoatoa ona fakamoemoega ki te Atua, telā ko te Famasino amiotonu.” (1 Petelu 2:​23) E se fakamoe‵moe eiloa tatou ke ‵pau ‵tou faifaiga mo Iesu, kae e mata, e mafai o ga‵lue malosi tatou ke momea aka te ‵lei o te fakaasi atu ne tatou o te loto maulalo?

18. (a) Ne a mea ‵lei e mafai o iku mai ona ko te loto maulalo? (e) Se a te suā uiga telā ne fakamalosi mai ke taumafai o fakaasi atu ne tatou?

¹⁸ I te fakaakoako atu ki a Iesu, ke na “toka [tatou] i so se taimi o fakamatala atu ki so se tino e fesili mai,” ki ‵tou talitonuga, “kae ke fai ne [tatou] i te loto maulalo mo te āva.” (1 Petelu 3:​15, 16) E tonu, a te mauaga o te loto maulalo e mafai o puipui ei a tamā kese‵kesega i kilokiloga mai te fai pelā me ne kinauga ‵lasi, i te va o tatou mo tino kolā e talai tatou ki ei mo ‵tou taina tali‵tonu foki. (2 Timoteo 2:​24, 25) E fesoasoani mai te loto maulalo ke maua ne tatou te filemu. Kāti tenā te pogai ne aofia ei ne Paulo, i te lua o ana tusi ki a Timoteo, a te “filemu” i uiga kolā e ‵tau o taumafai ki ei. (2 Timoteo 2:​22; fakatusa ki te 1 Timoteo 6:​11.) E tonu, a te “filemu” ko te suā uiga telā e fakamalosi mai te Tusi Tapu ke taumafai tatou o fakaasi atu.​​—Salamo 34:14; Epelu 12:14.

19. Mai tua o te mafau‵fau ki uiga faka-Kelisiano e fitu konei, se a te mea ko oti ne fakaiku aka ke taumafai koe o fakaasi atu, kae kaia?

¹⁹ Ko oti eiloa ne mafau‵fau tatou ki uiga faka-Kelisiano e fitu kolā ne fakamalosi mai ke taumafai tatou o fakaasi atu​​—ko te amiotonu, te olaga amio Atua, te fakatuanaki, te alofa, te kufaki, te loto maulalo, mo te filemu. Ko tafaga la te gali o te fakamanuiaga e maua ne fakapotopotoga katoa māfai e taumafai malosi a taina mo tuagane o fakaasi atu a uiga tāua konei i se auala lasi! Ka fakaaloalo atu ei ki a Ieova a te mea tenei kae talia foki ke ‵fuli ne ia ‵tou uiga ke tavae atu ei ki a ia.

Manatu ke Mafaufau ‵Loto ki ei

• Ne a mea ne aofia i te taumafai o fakaasi atu te amiotonu mo te olaga amio Atua?

• Se a te mea ka fesoasoani mai i te ‵tou taumafai o fakaasi atu te fakatuanaki mo te kufaki?

• E ‵tau o pokotia pefea te alofa i ‵tou faifaiga ki nisi tino?

• Kaia e ‵tau ei o taumafai tatou o fakaasi atu te loto maulalo mo te filemu?

[Fakamatalaga o te Ata i te itulau e 16]

Ne fakailoa atu a Iesu ke fakaeteete i te fia amiotonu ko te mea ke fai fua i ei ke ofo a tino

[Fakamatalaga o te Ata i te itulau e 17]

E mafai o taumafai tatou o fakaasi atu te fakatuanaki mai te mafaufau ‵loto ki muna‵tonu i te Muna a te Atua

[Fakamatalaga o te Ata i te itulau e 19]

E mafai o taumafai tatou o fakaasi atu te alofa mo te loto maulalo