Ke Fa‵ki i te Loto Māfatia

“Ne o‵mai katoa ana tama tāgata mo tama fāfine [a Iakopo] o faka‵lei tena loto, kae ne seki talia ne ia ke o‵mai o fakamafanafana a ia, muna a ia, ‘Au e tagi fanoanoa faeloa, ke oko foki eiloa ki te taimi e fanaifo ei au ki te lalolagi o tino ‵mate.’ Telā ne tagi eiloa a ia mō tena tama ko Iosefa.”​​—Kenese 37:​35.

NE LOTO māfatia malosi ‵ki a te tagata mua ko Iakopo i te mate o tena tama. Ne fakamoemoe eiloa a ia ke tumau tena loto māfatia ke oko ki te aso e mate ei a ia. E pelā mo Iakopo, kāti e mafaufau koe me ko tō lasi a te logo‵mae i te mate atu o se tino pele telā ka se mafai eiloa o galo atu. E mata, e fakaasi atu ne te lasi o te loto māfatia a te sē lava o te fakatuanaki ki te Atua? Ikai, e se penā loa!

E fakamatala mai i te Tusi Tapu a Iakopo e pelā me se tagata fakatuanaki. Ne fakamālō atu ki a Iakopo, fakatasi mo tena tupuna ko Apelaamo mo tena tamana ko Isaako, mō tena fakatuanaki tu ‵kese. (Epelu 11:​8, 9, 13) E tonu, i te taimi e tasi, ne tafiti tou tagata i te po kātoa mo se agelu ke tuku atu se fakamanuiaga mai i te Atua! (Kenese 32:​24-​30) E fakamaoni mai i ei, me ne malosi ‵ki eiloa a Iakopo i te feitu faka-te-agaga. Se a la te mea e mafai o tauloto ne tatou mai i te loto māfatia o Iakopo? A te loto māfatia mo te fanoanoa māfai ko mate se tino pele e se fe‵paki eiloa mo te fakatuanaki malosi ki te Atua. A te loto māfatia se lagonaga masani eiloa māfai ko mate atu se tino telā e pele ki a tatou.

Se a te Loto Māfatia?

E mafai o pokotia tatou i te loto māfatia i auala kese‵kese, kae ko te ‵toe lagonaga sē ‵lei e oko atu ki tino e tokouke ko te logo‵mae malosi. Mafaufau ki te tala o Leonardo, telā ko 14 fua ana tausaga i te taimi ne mate fakapoi ei tena tamana ona ko te fatu vāivāi. Ka se toe puli eiloa i a Leonardo a te aso ne fai atu ei ne te taina o tena mātua a te tala. Muamua la, ne ita fitifiti a ia ke talitonu me se mea tonu. Ne lavea ne ia te foitino o tena tamana i te faiga o te fanoanoa, kae koi foliga mai foki eiloa a mea katoa e pelā me ne mea sē ‵tonu. E nofo loa pelā ki se ono masina kae ne seki tagi eiloa a Leonardo. Ne masani eiloa o faka‵tali tou tagata ki te oko mai o tena tamana mai te galuega. Kāti e ‵tusa mo se tausaga e tasi kae fatoā malamalama katoatoa tou tagata i te manatu tonu me ko mate tena tamana. I te taimi tenā, ne sē sologa valevale eiloa tou tagata. A mea masani​​—e pelā mo te fanatu ki te fale e seai ne tino i ei​​—ne fakamasaua atu ki tou tagata me e galo tena tamana. I vaegā taimi penā, ne masani o tagi mautuutu a ia. Ko oko eiloa i tena sē sologa i te galo atu o tena tamana!

E fakaasi faka‵lei mai i te tala o Leonardo me e mafai eiloa o faigata ‵ki a te loto māfatia. Kae ko te ‵toe mea gali me e mafai o faka‵lei aka a te loto māfatia. Kae e mafai eiloa o leva te taimi ke fai penā. E pelā mo te leva o te taimi e manakogina ke mafu ei se pakiaga lasi, e penā foki loa māfai ko mate atu se tino pele. E nofo loa pelā ki se fia masina, nāi tausaga, io me e leva atu ke toe faka‵lei aka ei te loto māfatia. Kae ko te lasi o te logo‵mae ne lagona ne koe i te kamataga ka mafai o feoloolo i te ‵tekaatuga o taimi, kae ka kamata o foliga mai te olaga e pelā me se mea ‵lei kae aogā foki.

I te vaitaimi tenei, e fai eiloa te loto māfatia mo fai se vaega e tasi o mea e ‵tau o ‵tupu ke faka‵lei kae fakamasani foki ki te tulaga fou. Koi isi eiloa se mea e galo me ne isi se tino ne ola muamua. E ‵tau o fakamasani tatou ki te olaga e aunoa mo te tino tenā. E mafai o fesoasoani mai te loto māfatia ke fakaasi atu ou lagonaga ‵tonu. E tonu, e se ‵pau te auala e fakaasi atu ei ne tino katoa te loto māfatia. Kae e tasi te manatu tonu: A te taofi aka o tou loto māfatia e mafai o fakalogo‵mae atu i te feitu tau te mafaufau, lagonaga, mo te feitu faka-te-foitino. E mafai la pefea o fakaasi atu tou loto māfatia i auala aogā? E tuku mai eiloa ne te Tusi Tapu a nāi fakatakitakiga aogā.

Ke Fa‵ki i te Loto Māfatia

Ne iloa aka ne tino fanoa‵noa e tokouke me e mafai o fesoasoani atu ki te loto māfatia a te faipati atu ki se tino. Mafaufau la ki pati a te tino mua i te Tusi Tapu ko Iopu, telā ne logo‵mae i te ‵mate o ana tama‵liki e toko sefulu kae ne kufaki foki a ia i nisi tulaga faiga‵ta. Ana muna: “Au ko fi‵ta i te olaga nei. Fakalogo mai ki toku sē malie.” (Iopu 1:​2, 18, 19; 10:1) E lavea atu i konā me ne ‵tau o fakaasi atu ne Iopu a mea ne manavase a ia ki ei. Ne mafai pefea o fai a ia penā? Ne fakamatala mai a ia: “Fakalogo mai,” ko tena uiga, ka faipati atu ne ia a mea konā.

E fai mai a Paulo, telā ne mate atu tena mātua: “E tasi o mea ne fesoasoani mai ko te faipati atu e uiga ki toku mātua.” Tela la, a te faipati e uiga ki ou lagonaga ki se taugasoa telā e fakatalitonugina e mafai o fakafeoloolo aka ei tou loto māfatia. (Faataoto 17:17) Mai tua o te matega o tena mātua, ne fakamolemole atu a Yone ki ana taina Kelisiano ke āsi sāle atu ki a ia. E fai mai tou fafine: “Ne fesoasoani mai a te faipati atu ke fakafeoloolo aka ei toku logo‵mae.” E mafai foki o iloa aka ne koe me i te ‵fuliga o ou lagonaga ki pati kae fakaasi atu ki se tino fakalogologo mo te loto malamalama ka faigofie ei ke fa‵ki koe i tou logo‵mae.

A te tusiga foki o ou lagonaga ki lalo ko te suā fesoasoani. A tino kolā e faigata ke faipati atu e uiga ki olotou lagonaga e mafai o faigofie atu ki a latou ke fakaasi atu a mea konā mai i te tusi ki lalo. Mai tua o te mate o Saulo mo Ionatana, ne tusi ne te tagata fakamaoni ko Tavita se pese fakafanoanoa telā ne fakaasi atu i ei tena fanoanoa. Ne fai fakamuli te pese fanoanoa tenei mo fai se vaega o te tusi i te Tusi Tapu ko te Lua Samuelu.​​—2 Samuelu 1:17–​27.

E mafai foki o fakaasi atu ou lagonaga e auala i te tagi. E fai mai te Tusi Tapu: “A mea katoa konei e ‵tupu . . . e ‵tupu katoa i taimi ko oti ne filifili . . . te taimi o te tagi fanoanoa.” (Failauga 3:​1, 4) E fakamautinoa mai i ei, me i te mate o se tino e pele ki a tatou se “taimi o te tagi fanoanoa.” A loimata o te loto māfatia e se se mea e ‵tau o ‵mā tatou i ei. E aofia i te Tusi Tapu a fakaakoakoga e uke o tāgata mo fāfine fakamaoni kolā ne fakaasi faka‵sau atu te lotou loto māfatia mai i te ‵tagi. (Kenese 23:2; 2 Samuelu 1:​11, 12) Ne “tagi” Iesu Keliso i te taimi ko pili atu ei a ia ki te tanuga o tena taugasoa pele ko Lasalo, telā ne fatoā mate atu.​​—Ioane 11:​33, 35.

E manakogina a te kufaki i te taimi e taumafai ei o fakafeoloolo aka tou loto māfatia, me e mafai o fulifuli faeloa ou lagonaga. Masaua me e se ‵tau o ma koe māfai e tagi koe. Ko oti ne iloa ne tino fakamaoni e tokouke me i te tagi se vaega masani kae ‵tau foki ke faka‵lei aka ei te loto māfatia.

Ke Fakapilipili Atu ki te Atua

E fai mai te Tusi Tapu: “Fakapilipili atu koutou ki te Atua, ko fakapilipili mai ei a ia ki a koutou.” (Iakopo 4:8) E tasi o auala tāua ke fakapilipili atu ki te Atua ko te ‵talo. Ke mo a ma manatu māmā ki tena tāua! E fai mai ne te Tusi Tapu se folafolaga fakamafanafana loto: “Te Aliki e nofo pili ki a latou kolā e loto vāivāi, e faka‵sao foki ne ia a latou kolā ko seai ne olotou fakamoemoega.” (Salamo 34:18) E fakatalitonu mai foki penei ki a tatou: “Tuku atu ki te Aliki a mea e manavase koe ki ei, me ka fesoasoani a ia ki a koe; e se tiaki lele ne ia a tino fakamaoni ke taka‵vale.” (Salamo 55:22) Mafaufau la ki te mea tenei. E pelā mo te mea ne taku atu muamua, ko oti ne iloa ne tino e tokouke a te fesoasoani ke faipati atu e uiga ki ou lagonaga ki se taugasoa telā e fakatalitonugina. E sili atu te fesoasoani e maua māfai e fakaasi atu ou lagonaga ki te Atua telā ne tauto mai ke fakamafanafana ne ia ‵tou loto, i ne?​​—2 Tesalonia 2:​16, 17.

Ne fai mai a Paulo, telā ne taku atu muamua: “Kafai ko se toe ‵kafi o kufaki au i te logo‵mae kae mafaufau au me ko se toe mafai ne au o fa‵ki, e totuli ifo au kae ‵talo atu ki te Atua. Ne akai atu au ki a ia ke fesoasoani mai ki a au.” Ne talitonu katoatoa a Paulo me ne fesoasoani atu ki a ia ana ‵talo. E mafai foki o iloa aka ne koe me i te tali ki au ‵talo kolā e fai sāle atu, ka tuku mai eiloa ne “te Atua o fakamafanafanaga katoa” te loto toa mo te loto malosi ke fa‵ki koe i ei.​​—2 Kolinito 1:​3, 4; Loma 12:12.

Te Fakamoemoega ki te Toetuga

Ne fai atu Iesu: “Au ko te toetu mo te ola; so se tino e fakatuanaki ki a au, e ‵tusa eiloa me mate; kae ola eiloa a ia.” (Ioane 11:25) E akoako mai te Tusi Tapu me ka toe ola a tino ‵mate.a I te taimi ne nofo ei Iesu i te lalolagi, ne fakaasi atu ne ia me e mafai ne ia o toe faka‵tu aka a tino ‵mate. I te taimi e tasi, ne fakatu aka ne ia se tamaliki fafine ko 12 ana tausaga. Ne pefea a lagonaga o ana mātua? “Ko oko eiloa i te ofo” o laua. (Maleko 5:​42) Mai lalo i te pulega o tena Malo, ka fakatu aka ne te Tupu faka-te-lagi ko Iesu Keliso a te fia o tino ki te ola i te lalolagi nei​​—mai lalo i fakanofonofoga filemu kae amio‵tonu. (Galuega 24:15; 2 Petelu 3:​13) Mafaufau la ki te lasi o te fiafia māfai ko faka‵tu mai a tino ‵mate ki te ola kae toe ‵kau fakatasi mo olotou tino pele!

Ne faka‵piki ne Claudete ki te aisa, se ata o tena tama tagata, ko Renato, telā ne mate i te fakalavelave ne tupu ki se vakalele. Ne masani o kilo atu tou fafine ki te ata kae fai ana pati ki a ia eiloa, ‘Ka toe fetaui taua, i te toetuga.’ E fakaataata eiloa ne Leonardo i tena mafaufau tena tamana ko toe fakaola aka i te lalolagi fou telā ne folafola mai ne te Atua. E tonu, a te fakamoemoega ki te toetuga se pogai tonu o fakamafanafanaga ki a laua mo te fia o nisi tino kolā ko oti ne ‵mate atu olotou tino pele. E mafai foki o fai koe penā!

[Fakamatalaga mai lalo]

[Fakamatalaga o te Ata i te itulau e 8]

“Te Atua o Fakamafanafanaga Katoa”

“Ke fakafetai tatou ki te Atua te Tamana o te ‵tou Aliki ko Iesu Keliso, ko te Tamana telā e alofa mai ki a tatou, ko ia foki ko te Atua o fakamafanafanaga katoa.”​​—2 Kolinito 1:3.

E fakaasi mai i te fuaiupu tenei o te Tusi Tapu me e mafai o fesoasoani atu te Atua ki ana tavini fakamaoni ke kufaki i so se fakalavelave io me se tulaga faigata telā e mafai o fe‵paki mo latou. E tasi o auala e mafai o tuku mai ne Ieova a fakamafanafanaga ko te fesoasoani mai o se taugasoa io me se kāiga telā e ‵pau ‵tou talitonuga.

E masaua ne Leonardo, telā ne mate tena tamana, se tala telā ne fakamalosi kae fakamafanafana atu ki a ia. Ne fatoā oko atu eiloa a ia ki te fale, kae i te taimi ne masaua aka ne ia me e seai se tino i konā, ne kamata o tagi mautuutu tou tagata. Ne fanatu tou tagata ki se malae tafao kae sagasaga i se nofoga, telā ne kamata o toe tagi ei a ia. I te taimi ko tagi mautuutu ei a ia, ne akai atu a ia ki te Atua mō se fesoasoani. Ne tu fakapoi mai se motokā i se koga e pili atu ki a ia, kae ne lavea ne ia me i te tino fakatele se tokotasi o ana taina Kelisiano. Ne tufatufa atu ne te taina a mea a tino ki olotou fale kae ne ‵se tena auala. A te fakasaeatuga fua o te taina tenā ne fakamafanafana tonu atu eiloa ki a Leonardo.

I te taimi e tasi, ne kamata o fanoanoa kae māfatia se tagata ko mate tena avaga. Ne seki mafai o fakagata ne ia tena tagi ona ko te mea e foliga mai me ko seai eiloa se aogā o mea katoa. Ne takato tou tagata i te fola kae akai atu ki te Atua mō se fesoasoani. I te taimi koi ‵talo atu ei a ia, ne tagi te telefoni. Ko tena mokopuna fafine. Ana muna: “A te tamā sau‵talaga a maua ko lava eiloa i ei ke toe fakamalosi aka toku loto toa. Ne seki mafai o gata toku mafaufau me i tena telefoni ko te tali ki se ‵talo mō se fesoasoani.”

[Fakamatalaga o te Ata i te itulau e 7]

Ke Tuku Atu Fakamafanafanaga ki Nisi Tino

“[A te Atua] telā e fakamafanafana mai ki a matou i omotou puapuagā katoa, ko te mea ke mafai ne matou o fakamafanafana ki a latou kolā e maua ne so se puapuagā, i te fakamafanafanaga telā ne maua ne matou mai i te Atua.”​​—2 Kolinito 1:4.

Ko oti eiloa ne fakamaoni aka ne Kelisiano ‵tonu e tokouke a te uiga o pati konā. Ona ko te mea ne maua ne latou a fakamafanafanaga ke fa‵ki i te mate atu o se tino pele, ne mafai ei ne latou o tuku atu a fakamalosiga mo fakamafanafanaga ki nisi tino.

Mafaufau ki te fakaakoakoga a Claudete, telā e āsi atu faeloa ki nisi tino ke fakaasi atu ana talitonuga kolā e fakavae ki te Tusi Tapu. A koi tuai o mate atu tena tama, ne āsi sāle atu a ia ki se fafine telā ne mate tena tama tagata i te masaki ko te kenisa o te toto. Ne fiafia te fafine ki āsiga konā, kae ne mafaufau a ia me e se mafai eiloa o malamalama katoatoa a Claudete i tena logo‵mae. Kae mai tua o te matega o te tama tagata a Claudete, ne āsi atu te fafine tenā ki a Claudete kae ne fai atu tou fafine me ne fanatu fua a ia o āsi ki a Claudete me koi tumau tena fakatuanaki ona ko te mea ko mate nei tena tama tagata. Ona ko tena ofo i te malosi o te fakatuanaki o Claudete, ko fai nei ne te fafine tena akoga faka-te-Tusi Tapu mo Claudete kae ko maua foki ne ia se fakamafanafanaga lasi mai te Muna a te Atua.

Mai tua o te matega o tena tamana, ne fakaiku aka ne Leonardo ke tauloto a ia ki te ‵gana mō tino ‵tuli ko te mea ke mafai o fakaasi atu ne ia te fekau fakamafanafana loto i te Tusi Tapu ki a latou. Ne iloa aka ne ia me i ana taumafaiga ke fesoasoani atu ki tino ‵tuli ne aogā malosi eiloa ki a ia. Ana muna: “E tasi o mea ne fesoasoani mai ke fa‵ki au i toku loto māfatia ko toku manakoga ke fesoasoani atu ki tino ‵tuli ke tauloto e uiga ki te Atua. Ne fakamāumāu ne au a taimi e uke mo toku malosi ke fesoasoani atu ki a latou. Ne ‵fuli oku lagonaga fanoa‵noa ki te fiafia i te taimi ne lavea ei ne au taku akoga faka-te-Tusi Tapu muamua ko papatiso! Tenā eiloa te taimi muamua talu mai te matega o toku tamana, ne fatoā maua ei ne au se fiafia tonu lasi.”​​—Galuega 20:35.

[Ata i te itulau e 6]

Ne folafola mai ne Iesu se toe‵tuga mō tino kolā e fakatuanaki ki a ia