“‵Tagi Fakatasi mo Latou Kolā e ‵Tagi”

1, 2. Kaia e manakogina ei ke sau‵tala tatou ki auala kolā e mafai o fakamafanafana atu ki se tino telā ne mate atu sena tino pele? (Ke onoono ki te ata i te kamataga.)

“KO TAI kātoa nei te tasi tausaga mai tua o te matega o te mā tamaliki tagata, ne logo‵mae malosi māua” ko pati a Susi. Ne fai mai te suā Kelisiano me i te taimi ne mate fakapoi ei tena avaga, ne “seki mafai o fakamatala te ‵mae” telā ne maua ne ia. Se mea fakafanoanoa me tokouke foki a nisi tino e maua ne latou te vaegā logo‵mae tenā. E tokouke a Kelisiano e se ma‵nako ke ‵mate olotou tino pele mai mua o Amaketo. Faitalia me ko oti ne mate atu sou tino pele io me iloa ne koe se tino telā ne mate sena tino pele, kāti ka mafaufau koe, ‘E mafai pefea ne tino fanoa‵noa o fakafesagai atu ki te lotou logo‵mae?’

² Kāti ko oti ne lagona ne koe a te tuagapati e fai sale me vau malielie eiloa te taimi ka galo atu ei te fanoanoa. Kae mata, e tonu te manatu tenā? Ne fai mai se fafine telā ko mate tena avaga, “Ko oti ne iloa ne au te ‵tonuga, me i mea kolā e fai ne se tino i te taimi e fanoanoa i ei, e fesoasoani ei ke faka‵lei tena loto fanoanoa.” E tonu, e pelā eiloa mo te pakiaga, a te logo‵mae o ia e fanofano malie eiloa o ‵lei māfai e tausi faka‵lei atu ki ei. Ne a mea e mafai o fesoasoani atu ki tino kolā ko ‵mate olotou tino pele, ke faka‵lei aka te logo‵mae o latou?

IEOVA​—“TE ATUA O FAKAMAFANAFANAGA KATOA”

3, 4. Kaia e tali‵tonu ei tatou i a Ieova e malamalama i te tino fanoanoa telā e manako ki fakamafanafanaga?

³ E seai se fakalotolotolua me i te ‵tou Tamana alofa i te lagi ko Ieova, ko te pogai o fakamafanafaga katoa. (Faitau te 2 Kolinito 1:3, 4.) A Ieova, te ‵toe fakaakoakoga sili o te loto alofa, ne fakatalitonu mai penei ki ana tino: “Au ko te Atua telā e fakamafanafana atu ki a koe.”​—Isa. 51:12, NW; Sala. 119:50, 52, 76.

⁴ Ko oti foki ne iloa ne te ‵tou Tamana alofa a te lagonaga ki te galo atu o se tino pele, e pelā mo Apelaamo, Isaako, Iakopo, Mose, mo te tupu ko Tavita. (Nume. 12:6-8; Mata. 22:31, 32; Galu. 13:22) E fakatalitonu mai i te Muna a te Atua, i a Ieova e olioli mo te kufaki​—e manako malosi—ki te taimi ka toe faka‵foki mai ei ne ia a latou ki te ola. (Iopu 14:14, 15) Ka maua ei ne latou te fia‵fia mo te malosi katoatoa. Mafaufau foki ki te Tama fagasele e tokotasi a te Atua—“te pogai o tena fiafia”—ne mate i se mate fakalogo‵mae. (Faata. 8:22, 30) E se mafai ne pati o fakamatala te logo‵mae telā ne maua ne Ieova.​—Ioa. 5:20; 10:17.

5, 6. E mafai pefea o fakamafanafana tatou ne Ieova?

⁵ E malosi te ‵tou loto tali‵tonu i a Ieova ka fesoasoani mai ki a tatou. Tela la, sa fakatalave ke fakaasi katoatoa atu ki a Ia e auala i ‵talo, a ‵tou logo‵maega. Ko oko eiloa i te fakamafanafana mai ke iloa atu i a Ieova e malamalama i ‵tou logo‵mae, kae tuku mai foki ne ia te fakamafanafanaga telā e ma‵nako malosi tatou ki ei! Kae tuku mai pefea ne ia?

⁶ E tasi te auala e fesoasoani mai te Atua ko “te fakamafanafanaga e maua mai i te agaga tapu.” (Galu. 9:31) A te malosi galue o te Atua se fesoasoani aoga ki fakamafanafanaga. Ne tauto mai a Iesu i te Tamana i te lagi e fiafia malosi o tuku mai tena “agaga tapu ki a latou kolā e fakamolemole atu e uiga ki ei.” (Luka 11:13) Ne fai mai a Susi telā ne fakaasi atu muamua: “E uke a taimi ne to‵tuli ifo māua kae fakamolemole atu ki a Ieova ke fakamafanafana mai. I taimi takitasi, ne puipui faeloa ne te filemu o te Atua a mafaufau mo loto o māua.”​—Faitau te Filipi 4:6, 7.

IESU​—SE FAITAULAGA SILI LOTO ALOFA

7, 8. Kaia e tali‵tonu tatou me ka tuku mai ne Iesu a fakamafanafanaga?

⁷ Ne fakaasi faka‵lei mai te loto alofa o Ieova e auala i pati mo faifaiga a tena tama atafai, ko Iesu, i te taimi ne nofo ei i te lalolagi nei. (Ioa. 5:19) Ne uga mai a Iesu ke fakamafanafana a “tino fanoa‵noa” mo “latou katoa kolā e ‵tagi fanoanoa.” (Isa. 61:1, 2; Luka 4:17-21) Tela la, ne iloa a ia e pelā me se tino alofa atafai—ne kilo mai a ia mo te alofa ki te logo‵mae o tino kae ne manako malosi ke fakamafanafana atu ki te lotou logo‵mae.​—Epe. 2:17.

⁸ I te taimi koi foliki ei a Iesu, e mautinoa eiloa me ne fakafesagai a ia mo te ‵mate o ana kāiga mo ana taugasoa. E foliga mai i a Iosefa, tena tamana puke, ne mate kae koi talavou a ia.a Mafaufau ki te fanoanoa o Iesu telā se tino loto alofa, telā kāti ko tai kātoa io me fatoa kātoa tena 20 tausaga, ke fakafesagai atu ki tena logo‵mae, penā foki tena mātua, taina, mo ana tuagane.

9. Ne fakaasi atu pefea ne Iesu a tena loto alofa i te taimi ne mate ei a Lasalo?

⁹ I te taimi ne kamata ei ne Iesu a tena taviniga, ne fakaasi mai foki ei a te ‵loto o tena atamai mo ana lagonaga. Mafaufau ki se fakaakoakoga, ko te taimi ne mate i ei a tena taugasoa pele ko Lasalo. E tiga eiloa ne iloa ne Iesu me ka toe fakatu aka ne ia a Lasalo, ne lagona ne ia te logo‵mae telā ne oko ki a Malia mo Maleta. Ne otia malosi tena loto ona ko te lasi o tena alofa telā ne tagi ei a ia.​—Ioa.11:33-36.

10. Kaia e mafai ei o tali‵tonu tatou ki te loto alofa o Iesu i aso nei?

¹⁰ E mafai pefea o fesoasoani mai te loto alofa mo fakamafanafanaga ne tuku mai ne Iesu ki a tatou i aso nei? E fakatalitonu mai te Tusi Tapu me “e se mafuli a Iesu Keliso i te aso anafi mo te aso nei, ke oko eiloa ki te se-gata-mai.” (Epe. 13:8) Ona ko te mea e malamalama a te “Sui Sili o te ola” i lagonaga fanoanoa, e “mafai ei o fesoasoani mai a ia ki tino kolā e tofotofogina.” (Galu. 3:15; Epe. 2:10, 18) Tela la, e tali‵tonu tatou me ka tumau eiloa te fesoasoani mai o Keliso ona ko te tigaina o tino, e malamalama i te lotou fanoa‵noa, kae tuku atu ne ia a fakamafanafanaga ki a latou “i te taimi tonu.”​—Faitau te Epelu 4:15, 16.

“FAKAMAFANAFANAGA MAI I TUSITUSIGA TAPU”

11. Ne a tusi fai‵tau ne fakamafanafana malosi atu ki a koe?

¹¹ A te tala ki te lasi o te fanoanoa o Iesu i te taimi ne mate ei a Lasalo, se mea fua e tasi mai tusi fai‵tau fakamafanafana e uke kolā e maua i te Muna a te Atua. Kae setioa eiloa o fai mai “me i mea katoa kolā ne tusi i aso mua ne tusi ke akoako ei tatou, me e auala i te ‵tou kufaki mo fakamafanafanaga mai i Tusitusiga Tapu, ko mafai ei o maua ne tatou a te fakamoemoega.” (Loma 15:4) Kafai koe e fanoanoa, e mafai o maua foki ne koe a fakamafanafanaga mai i tusi fai‵tau kolā e fakaasi atu mai lalo:

• “Te Aliki [Ieova] e nofo pili ki a latou kolā e loto vāi‵vai, e faka‵sao foki ne ia a latou kolā ko seai ne olotou fakamoemoega.”​—Sala. 34:18, 19.

• “I taimi e manavase kae se toka ei au, ko koe [Ieova] e fakamafanafana kae fakafiafia mai ki a au.”​—Sala. 94:19.

• “E se gata i ei, ke i luga i a koutou te ‵tou Aliki ko Iesu Keliso mo te Atua te ‵tou Tamana, kolā e a‵lofa mai ki a tatou kae tuku mai foki ne lāua a fakamafanafanaga se-gata-mai mo te fakamoemoega gali e auala i te alofa tauanoa, ke fakamafanafana atu ki otou loto kae fakama‵losi atu foki ki a koutou.”​—2 Tesa. 2:16, 17.b

TE FAKAPOTOPOTOGA​—SE POGAI O FAKAMAFANAFANAGA SILI

12. Se a te auala tāua e tasi e mafai ei o fai tatou e pelā me ne fakamafanafanaga ki nisi tino?

¹² A te suā auala e tuku mai ei a fakamafanafanaga ki tino fanoa‵noa ko te fakapotopotoga Kelisiano. (Faitau te 1 Tesalonia 5:11.) E mafai pefea ne koe o fakamafanafana a latou kolā e “fanoa‵noa”? (Faata. 17:22) Ke masaua me isi se “taimi o te nofo ‵mu mo te taimi o te faipati.” (Fai. 3:7) Ne fai mai a Dalene, se fafine ko mate tena avaga: “E manakogina ke fakaasi mai ne latou kolā ko ‵mate olotou tino pele a olotou mafaufauga mo olotou lagonaga. Tela la, te mea tāua e mafai o fai ne koe ki se tino penā ko te fakalogo faka‵lei​—e aunoa mo se fakalavelave atu ki ana pati.” Ne toe fakaopoopo mai ne Junia, telā ne fakamate tena tuagane: “E tiga eiloa e se mafai ne koe o malamalama katoatoa i tena tulaga fanoanoa, a te mea tāua, ko tou manako ke malamalama i ana lagonaga.”

13. Se a te mea e ‵tau o masaua ne tatou e uiga ki te fanoanoa?

¹³ Ke masaua foki me kese‵kese a te auala e fakaasi ei ne tino a te lotou fanoa‵noa. I nisi taimi, ko te loto fua o te tino e malamalama tonu i te logo‵mae e maua ne ia, kae e mafai o faigata ke faipati mai ne ia ki tua ana lagonaga ‵loto. Ne fai mai te Muna a te Atua: “E iloa eiloa ne te loto tena logo‵mae. Kae e seai se tino mai tua e fia‵fia fakatasi mo ia.” (Faata. 14:10, NW) Kafai foki e fakaasi atu ne se tino ana lagonaga, e se faigofie ki nisi tino ke malama‵lama i te mea e taumafai a ia o fakaasi atu.

14. E mafai pefea o tuku atu ne tatou a pati fakamafanafana ki tino fanoa‵noa?

¹⁴ E maina tatou me e faigata ke iloa a pati e ‵tau e fai atu ki se tino telā e logo‵mae i te fanoanoa. Kae tiga i ei, ne fai mai te Tusi Tapu me i “muna kolā e fai mo te mafaufau e mafai o fakasao ne ia te tino.” (Faata. 12:18) Ne maua ne tino e tokouke a auala ke fakamafanafana atu mai i te polosiua Kafai ko Mate Sou Tino Pele.c A te fesoasoani aoga e mafai o fai ne koe ko te “‵tagi fakatasi mo latou kolā e ‵tagi.” (Loma 12:15) “Ne fakaasi atu ne au i oku loimata a mea i toku loto,” ko pati a Gaby, se fafine telā ne mate tena avaga. “Tenā te pogai e maua ei ne au a fakamafanafanaga māfai e ‵tagi fakatasi au mo taugasoa. I te taimi tenā, e se maua ne au te lagonaga me nofo tokotasi au mo toku fanoanoa.”

15. E mafai pefea o tuku atu ne tatou a fakamafanafanaga māfai e faigata ke faipati ‵tonu atu tatou ki te tino? (Ke onoono ki te pokisi “Pati Fakamafanafana.”)

¹⁵ Kafai e faigata ki a koe ke faipati ‵tonu atu ki se tino fanoanoa, kāti e faigofie ke tuku atu a fakamafanafanaga e auala i se tusi fakamafanafana, meli-iti, io me se selefoni. E mafai o siki atu ne koe se tusi siki fakamafanafana, faka‵foki atu a uiga ‵gali o te tino mate, io me fakaasi atu se taimi fakafiafia telā e se mafai o puli i a koe. “Ne magoi atu a tamā fekau fakamafanafana io me se ‵kamiga ke fakatasi mo taina Kelisiano i lō a pati e mafai ne au o fai atu,” ko pati a Junia. “A vaegā fakaasiga penā o te alofa e fai ei ke iloa ne au i a au e alofagina kae atafaigina foki.”

16. Se a te auala magoi ke tuku atu a fakamafanafanga?

¹⁶ Ke mo a e manatu māmā ki te tāua o au ‵talo kolā e fai atu io me fai mō taina Kelisiano kolā ne ‵mate olotou tino pele. E tiga eiloa e faigata ke fai au ‵talo i se auala telā e fakaasi atu ei ou lagonaga, au ‵talo kolā e fai atu mo te loto kātoa mō latou, ke oko foki loa ki ou loimata io me ko tou leo polepole kae tagi, e mafai eiloa o fai pelā me se faka‵leiga malosi ki te fanoanoa. Ne fai mai a Dalene, “i nisi taimi, kafai e au‵mai a tuagane o fakamafanafana au, e fakamolemole atu au me fia‵fia latou o fai se ‵talo. Kamata ei latou o ‵talo, e masani sale o faigata a pati kamata, kae i te ukega o taimi, e fia fua a fuaiupu e fai atu, ko olotou leo eiloa ko gasolo o ma‵losi kae fai atu ne latou se ‵talo fakaotia loto. A te malosi o te lotou fakatuanaki, te lotou a‵lofa kae ‵saga tonu mai, se fakamalosiga lasi ki te fakatuanaki.”

TUMAU TE TUKU ATU O FAKAMAFANAFANAGA

17-19. Kaia e manakogina ke tumau faeloa i te tuku atu o fakamafanafanaga?

¹⁷ E mafai o kese‵kese a te leva e fanoa‵noa i ei a tino. Tela la, ke fakaavanoa atu a koe ki a latou, ke oko loa ki masina mai tua atu māfai ko ‵foki a nisi tino ki olotou fale. “A takaga e masani o fia‵fia fakatasi kae fakatau a‵lofa. A taina e ‵tau o fakatau fesoasoani i taimi o fakalavelave.” (Faata. 17:17) A taina Kelisiano e mafai o fai pelā me se fakamafanafanaga lasi ki se tino fanoanoa ke oko foki eiloa ki te taimi ko mafai ei o fakafesagai atu a ia ki tena fanoanoa.​—Faitau te 1 Tesalonia 3:7.

¹⁸ Masaua me mafai foki o fakamāfua aka te logo‵mae o tino kolā ne ‵mate olotou tino pele mai i aso fakamanatu, pese, ata, mea fai, ke oko foki ki manogi, leo, io me ne aso i tausaga. E isi ne mea ka fai tokotasi ne se tino ko mate tena avaga mō te taimi muamua—e pelā mo te kau atu ki fono io me ko te Fakamanatuga​—e mafai o fakalogo‵mae a vaegā taimi penā. “Ne mafaufau au me ka fakafanoanoa māfai ko oko ki te aso fakamanatu o te ma fakaipoipoga,” ko pati a se taina, “ne seki faigofie ki a au. Kae ne fakatoka ne nāi taina mo tuagane se tamā maopoopoga mo oku taugasoa ‵pili ko au ke se nofo tokotasi.”

¹⁹ Ke masaua, me sē ko aso fakapito fua e manakogina ei ne latou a fakamalosiga. “E masani sale o aoga malosi a te fesoasoani atu i se aso telā e seki fakamoemoegina,” ko pati a Junia. “E aoga kae fakafiafia foki a vaegā taimi fakapoi penā.” E tonu, e se mafai o fakaseai katoatoa ne tatou te fanoanoa io me se mea ke sui ki ei te tino pele telā ko mate, kae mafai o aoga malosi a fakamafanafanaga e tuku atu ne tatou e auala i ‵tou faifaiga ke fesoasoani atu ki te tino fanoanoa. (1 Ioa. 3:18) Ne fai mai a Gaby: “E fakafetai lasi au ki a Ieova mō toeaina a‵lofa kolā ne fesoasoani ke fakafesagai atu au ki mea faiga‵ta katoa ne fe‵paki mo au. Ne fai ne latou ke lagona tonu ne au a lima a‵lofa o Ieova e ‵sai mai ki a au.”

20. Kaia e fai ei a tautoga a Ieova e pelā me se fakamafanafanaga sili?

²⁰ Ko oko eiloa i te fakamafanafana ke iloa atu i a Ieova, te Atua o fakamafanafanaga, ka fakaseai katoatoa ne ia te fanoanoa kae tuku mai ne ia te fakamafanafanaga tumau me ka “lagona ei ne tino katoa kolā i loto i tanuga a tena leo [Keliso] ko ulu mai ei ki tua”! (Ioa. 5:28, 29) Ne tauto mai te Atua me “ka fakagata ne ia te mate ke se toe ai eiloa, ka solo ne ia a loimata mai i mata o tino.” (Isa. 25.8) Tela la, i lō te “‵tagi fakatasi mo latou kolā e ‵tagi,” a tino katoa i te lalolagi ka “fia‵fia fakatasi mo latou kolā e fia‵fia.”​—Loma 12:15.