‘E Tāua te Atua me ne Fakaola ne ia te Lakau’!

“A te tino telā ne ‵toki ne ia te fuaga mo te tino foki telā ne fakasiusiu ne ia, e se tāua. Ko te Atua eiloa e tāua me ne fakaola ne ia ke ola te lakau.”​​—1 KOLINITO 3:7.

1. Se a te galuega telā e fai ei tatou ke ‘ga‵lue fakatasi mo te Atua’?

‘E GA‵LUE fakatasi mo te Atua.’ Tenā te auala ne fakamatala mai ei ne te apositolo ko Paulo a te tauliaga gali telā e mafai o maua ne tatou katoa. (Faitau te 1 Kolinito 3:​5-9.) Ne fakasino atu a Paulo ki te galuega ko te faiga o soko. Ne fakatusa ne ia ki te ‵tokiga mo te fakasiusiuga o fuaga. Kafai e ma‵nako tatou ke iku manuia ‵tou taumafaiga i te galuega tāua tenei, e ‵tau eiloa o maua ne tatou te fesoasoani o Ieova. E fakamasaua mai ne Paulo ki a tatou me ko ‘te Atua ne fakaola ne ia te lakau.’

2. Kaia e fesoasoani mai ei te manatu tonu me ko ‘te Atua ne fakaola ne ia te lakau’ ko te mea ke maua ne tatou se kilokiloga tonu ki te ‵tou galuega talai?

² A te manatu tonu fakaofoofogia tenā e fesoasoani mai ke maua ne tatou se kilokiloga tonu ki te ‵tou galuega talai. Kāti e ga‵lue malosi tatou i te talaiatuga mo te akoakoatuga, kae e avatu eiloa a tavaega katoa ki a Ieova māfai ko fai se tino mo fai se soko fou. Kaia? Me e seai eiloa se tino e mafai o malamalama katoatoa i te auala e fai ei se tino mo fai se soko, faitalia te ‵tou taumafai malosi, kae e se maua foki ne tatou te atamai ke pule atu ki ei. Ne fakaasi ‵tonu mai ne te tupu ko Solomona te tulaga tenā i te taimi ne tusi mai ei a ia: “Ko te Atua ne faite ne ia a mea katoa, kae e se mafai ne koe o malamalama i mea e fai ne ia.”​​—Failauga 11:5.

3. Se a te mea e tai ‵pau ei a te ‵tokiga o fuaga mo te faiga o soko?

³ E mata, e fakafi‵ta te faiga o ‵tou galuega ona ko te sē lava o te ‵tou atamai ke iloa aka te auala e fai ei se tino mo fai se soko? Ikai. I lō te fai penā, e fai ei ke fakafiafia kae gali foki. Ne fai mai te tupu ko Solomona: “Ke ‵toki ou lakau i te taeao pelā foki i te afiafi. E se mafai o iloa ne koe me e ola ‵lei katoa io me ka ola ‵lei nisi kae se ola ‵lei nisi.” (Failauga 11:6) E tonu, kafai ko ‵toki ne tatou a fuaga, e se iloa ne tatou te koga ka ola i ei io me e mata, ka ola ‵lei io me ikai. E uke a mea e se mafai o pule faka‵lei atu tatou ki ei. E mafai foki o fai atu tatou penā e uiga ki te galuega ko te faiga o soko. Ne fakasino atu a Iesu ki te manatu tenei i tala fakatusa e lua kolā ne fakamau ki lalo mō tatou i te mataupu e 4 o te tusi Evagelia a Maleko. Ke na onoono aka tatou ki mea e mafai ne tatou o tauloto mai i tala fakatusa e lua konei.

Vaegā Laukele Kese‵kese

4, 5. Ke fakamatala fakatoetoe mai te tala fakatusa a Iesu e uiga ki te tino ‵toki saito telā ne laku tatela atu ne ia a fuaga.

⁴ E pelā mo te mea ne fakamau i te Maleko 4:​1-9, e fakamatala mai Iesu e uiga ki se tino ‵toki saito telā ne laku tatela atu ne ia a fuaga kolā ne ‵tō ki koga kese‵kese. “Fakalogo‵logo mai la koutou! A te tagata ‵toki saito ne fanatu o ‵toki ana saito. I tena ‵tokiga ne ta‵tela ei nisi fuagā saito ki te auala kae olo atu a manu lele o kai ne latou. Ne ta‵tela foki nisi fuagā saito ki te koga pa‵papa e se uke te kele i ei. Ne ‵tupu vave ake i ei ona ko te sē matolu o te kele i ei. Fanake la i ei te la, ko velasia magemage me e seai ne aka. Ne ta‵tela foki nisi fuagā saito ki te vao makai‵kai, ko ola fakatasi ake ei te vao makai‵kai, ko ola saitia i ei ko se fua mai. Kae ne ta‵tela nisi fuagā saito ki te laukele ‵lei, ko ola ake ko tupu ‵lasi, ko kamata o ‵somo mai, kae ‵fua, e taki tolu sefulu a nisi, e taki ono sefulu a nisi, e taki selau a nisi.”

⁵ I aso o te Tusi Tapu, e masani sāle o laku tatela atu a fuaga ke ‵toki aka ei. E tauave ne te tino ‵toki saito a fuaga i loto i te taga o tena gatu io me i loto i se pōla kae laku tatela atu. Tela la, i te tala fakatusa tenei, e se fai pelā me ne manako tonu te tino ‵toki saito o ‵toki a fuaga i vaegā laukele kese‵kese. I lō te fai penā, ne ta‵tela atu a fuaga ki koga kese‵kese.

6. Ne fakamatala mai pefea ne Iesu te uiga o te tala fakatusa ki te tino ‵toki saito?

⁶ E se manakogina ke tuku taumate ne tatou te uiga o te tala fakatusa tenei. Ne toe fakamatala mai ne Iesu tena uiga, telā ne fakamau i te Maleko 4:​14-​20: “A te tagata ‵toki saito, e ‵toki ne ia a te Muna a te Atua. I nisi taimi, a te muna a te Atua e tō i te alatu. A tino konā ne faka‵logo ki ei, kae i te lagonaga ne latou, vau ei Satani o ave keatea te muna telā ne ‵toki i olotou loto. Ka ko nisi tino e pelā mo fuagā saito ne ‵to i koga pa‵papa. I te taimi ne lagona ei ne latou te muna, talia ei ne latou mo te fiafia. Ka ko te mea e seki puke mau latou ki te muna, tela la, ko se tumau ei i a latou. Kafai la e oko mai puapuagā mo sauāga ona ko te muna, ko tiaki ei ne latou. A nisi tino foki e pelā mo fuagā saito ne ‵to i vā o lakau makai‵kai. Ko latou konā ne faka‵logo ki te muna, ka ko manava‵se ki mea o te olaga nei mo te fia‵fia ki koloa mo te kaimanako ki nisi mea, ko ‵fonu olotou olaga i vaegā manatu penā, telā ko ola saitia ei te muna ka ko se fua mai. Ka ko nisi tino e pelā mo fuagā saito ne ‵toki i te laukele ola ‵lei, ko latou konā e faka‵logo ki te muna ko talia ne latou mo te loto fiafia, kae ne fua mai ki taki tolu sefulu nisi, e taki ono sefulu nisi, kae taki selau a nisi.”

7. Se a te mea e fakaata mai i te fuaga mo vaegā laukele kese‵kese?

⁷ Mafaufau la me ne seki fai mai Iesu me ne fakaaogā a fuaga kese‵kese. I lō te fai penā, ne faipati a ia e uiga ki se vaega e tasi o fuaga kolā ne ‵tō atu ki vaegā laukele kese‵kese, kae ne fua mai i ei a ikuga kese‵kese. A te vaegā laukele muamua e makeke, io me pa‵papa; a te lua e se matolu te kele i ei; ko te tolu e ola i ei a vao makai‵kai; kae ko te fa e ‵lei, io me se laukele ola ‵lei, telā ne fua faka‵lei mai i ei te fuaga. (Luka 8:8) Se a te fuaga? Ko te fekau o te Malo telā e maua i te Muna a te Atua. (Mataio 13:19) Se a te mea e fakaata mai i vaegā laukele kese‵kese konā? Ko tino mo tulaga kese‵kese o olotou loto.​​—Faitau te Luka 8:​12, 15.

8. (a) Ko oi e fakaata mai i te tino ‵toki saito? (e) Kaia e kese‵kese ei te auala e ‵saga atu a tino ki te galuega talai o te Malo?

⁸ Ko oi e fakaata mai i te tino ‵toki saito? E fakaata mai i ei a tino kolā e ga‵lue fakatasi mo te Atua, ko latou kolā e talai atu ne latou te tala ‵lei o te Malo. E pelā mo Paulo mo Apolo, e ‵toki kae fakasiusiu ne latou. Kae e tiga eiloa e ga‵lue malosi latou, e kese‵kese a ikuga o olotou galuega. Kaia? Ona ko te kese‵kese o tulaga o loto o tino kolā e lagona ne latou te fekau. I te tala fakatusa, e se mafai eiloa o pule atu te tino ‵toki saito ki ikuga konei. Ko oko eiloa i te fakamafanafana mai te mea tenei, maise eiloa ki ‵tou taina mo tuagane fakamaoni kolā ne ga‵lue i te fia o tausaga, i nisi taimi e sili atu i te sefulu tausaga, kae e foliga mai me e se manuia malosi latou i te lotou galuega!a Kaia e fakamafanafana mai ei te manatu tenei?

9. Se a te munatonu fakamafanafana telā ne faka‵mafa tokolua mai ne te apositolo ko Paulo mo Iesu?

⁹ E se fua aka te fakamaoni o te tino ‵toki fuaga ki ikuga o tena galuega. Ne fakasino atu a Paulo ki te mea tenā i te taimi ne fai mai ei a ia: “Ka maua te ‵togi o galuega a maua, e faka‵tau ki te fua o galuega a te tino ne fai.” (1 Kolinito 3:8) E faka‵tau eiloa te taui ki te faiga o te galuega, kae e se ko ikuga o te galuega tenā. Ne faka‵mafa atu foki ne Iesu te manatu tenei i te taimi ne ‵foki atu ei ana soko mai te lotou malaga talai. Ne fia‵fia latou ona ko te faka‵logo o temoni ki a latou i te fakaaogāga ne latou o te igoa o Iesu. E tiga eiloa ne fakafiafia malosi te mea tenā, ne fai atu Iesu ki a latou: “Sa fia‵fia ona ko agaga ma‵sei ko faka‵logo ki a koutou; kae fia‵fia i te mea ko tusi otou igoa i te lagi.” (Luka 10:​17-​20) Kafai foki loa e foliga mai me e se momea aka te uke o mea e iku mai i galuega a te tino ‵toki, e se fakauiga i ei me e foliki fua tena loto finafinau io me ko tena fakamaoni i lō nisi tino. I te lasiga o taimi, e faka‵na eiloa a ikuga ki te tulaga o te loto o te tino fakalogologo. Kae sili atu i ei, ko te Atua eiloa telā e fakaola ne ia ke ola te lakau!

Te Tiute o Tino Kolā e Lagona ne Latou te Muna

10. Se a te mea e faka‵na ki ei a te fai o te tino telā e lagona ne ia te muna mo fai se laukele ola ‵lei io me ikai?

¹⁰ Kae e a tino kolā e lagona ne latou te muna? E mata, ko leva ne fakaiku aka te vaegā kilokiloga telā ka maua ne latou? Ikai. E faka‵na eiloa ki a latou te lotou fai pelā me se laukele ‵lei io me ikai. A te ‵tonuga loa, e mafai o ‵fuli te tulaga o te loto ke ‵lei io me ke masei. (Loma 6:​17) I tena tala fakatusa, ne fai atu Iesu me “i te lagonaga ne [nisi tino]” a te muna, ne vau Satani kae ave keatea ne ia. Kae ne mafai eiloa o se tupu te mea tenei. I te Iakopo 4:​7, ne fakamalosi atu ki Kelisiano ke “‵teke atu te Tiapolo,” kae ka sola ei a ia keatea mai i a latou. E fakamatala mai ne Iesu a nisi tino e pelā me ne talia muamua ne latou te muna mo te fiafia kae ne seki puke ‵mau ki ei “me seai ne aka” o latou. Kae ne polopoloki atu ki tavini a te Atua ke “‵mautakitaki otou aka mo otou fakavae” ko te mea ke malamalama faka‵lei latou i “te lauefa, te loa, te maluga mo te ‵poko o te alofa o Keliso” telā e “se mafai eiloa o iloa katoatoa.”​​—Efeso 3:​17-​19; Kolose 2:​6, 7.

11. E mafai pefea o ‵kalo keatea se tino mai te taliaga o te manavase ki mea o te olaga nei mo te fiafai ki koloa ke fai ei ke ola sai‵tia te muna?

¹¹ A nisi tino kolā ne lagona ne latou te muna e fakamatala mai e pelā me ne talia ne latou a te “manavase ki mea o te olaga nei mo te fia‵fia ki koloa mo te kaimanako ki nisi mea” ke ola sai‵tia kae ke se ‵fua mai foki i ei te muna. (1 Timoteo 6:​9, 10) E mafai pefea o ‵kalo keatea latou mai i ei? E tali mai te apositolo ko Paulo: “Ke faka‵mao koutou mai te matatupe, kae loto ma‵lie ki mea ko maua ne koutou. Me ne muna mai te Atua, ‘E se tiakina lele eiloa ne au koutou, e se tuku tiaki lele eiloa ne au a koutou.’ ”​​—Epelu 13:5.

12. Kaia e kese‵kese ei a mea e fua mai i tino kolā e fakaata mai i te laukele ola ‵lei?

¹² Fakamuli loa, e fai mai Iesu me i tino kolā ne ‵toki i luga i te laukele ola ‵lei ne fua mai “ki taki tolu sefulu nisi, e taki ono sefulu nisi, kae taki selau a nisi.” E tiga eiloa e ‵lei te tulaga o loto o nisi tino kolā ne ‵saga atu ki te muna kae fua mai foki a fuataga, e kese‵kese eiloa a mea e mafai ne latou o fai i te folafolaatuga o te tala ‵lei ona ko olotou fakanofonofoga. E pelā mo te olaga matua io me se masaki fakafi‵ta, e mafai eiloa o fai i ei ke se uke a mea e fai ne nisi tino i te galuega talai. (Fakatusa ki te Maleko 12:​43, 44.) E tonu, e mafai o mu‵tana fua io me se mafai o pule katoatoa atu te tino ‵toki ki ei, kae e fiafia eiloa a ia māfai e lavea atu me e fai ne Ieova ke ola te lakau tenā.​​—Faitau te Salamo 126:​5, 6.

Te Tino ‵Toki Saito Telā e Moe

13, 14. (a) Fakamatala fakatoetoe mai te tala fakatusa a Iesu e uiga ki te tagata telā ne laku tatela atu a fuaga. (e) Ko oi e fakaata mai i te tino ‵toki saito kae se a te fuaga?

¹³ I te Maleko 4:​26-​29, e maua atu foki ne tatou a te suā tala fakatusa e uiga ki te tino ‵toki saito: “A te Malo o te Atua e fakatusa ki te tino e ‵toki [“laku tatela atu,” Tusi Paia, Samoa] ne ia fuaga lakau i tena manafa. Ne moe i te po, ne ala i te ao, kae matea ake ei ne ia a fuaga ko ‵somo ake kae ola ake foki. Kae e se iloa ne ia a te taimi ne ola ake ei. Ko te laukele ne fai ne ia ke ola fuaga ke fua mai: a te mea muamua e tupu ko te foitino, pito atu ko te moe, kae fakamuli ko ‵fua mai ei. Kafai ko ma‵tua a saito, ko kamata a te tino ‵toki saito o ‵kati te saito, me ko oko mai te taimi tonu e ‵tau ei o ‵kati.”

¹⁴ Ko oi te tino ‵toki saito? E tali‵tonu a nisi tino i Lotu Kelisiano ‵Se me e fakasino atu eiloa ki a Iesu. Kae e mafai pefea o fai atu me ne moe Iesu kae e se iloa ne ia a te auala ne ‵tupu aka ei a fuaga konā? E mautinoa eiloa me e ‵tau o iloa ne Iesu a te ‵tupuakaga o fuaga konā! I lō te fai penā, a te tino ‵toki saito tenei, e pelā mo te tino ‵toki saito telā ne taku atu muamua, e fakaata mai i ei a tino talai katoa o te Malo, ko latou kolā e ‵toki ne latou a fuaga o te Malo e auala i te lotou talai atu mo te loto finafinau. A te fuaga telā ne ‵pei atu ki te laukele ko te muna telā e talai atu ne latou.b

15, 16. Se a te munatonu e uiga ki te tupuakaga o se lakau mo te ‵tupuakaga i te feitu faka-te-agaga telā ne taku mai ne Iesu i tena tala fakatusa e uiga ki te tino ‵toki saito?

¹⁵ E fai mai Iesu me i te tino ‵toki saito “ne moe i te po, [kae] ne ala i te ao.” E se fakauiga i ei me ne fakatamala te tino ‵toki saito. E fakaasi mai fua i ei a faifaiga masani a te tokoukega o tino. E fakaasi mai i te faka‵tuga o pati i te fuaiupu tenei a te faifaiga tumau o te galue i te ao kae moe i te po mō se vaitaimi. Ne fakamatala mai ne Iesu a te mea ne tupu i te taimi tenā. “A fuaga ko ‵somo ake kae ola ake foki,” ko ana muna. Ne toe fakaopoopo mai Iesu: “Kae e se iloa ne ia a te taimi ne ola ake ei.” E faka‵mafa mai i ei a te manatu me ne tupu aka te lakau i a ia eiloa.

¹⁶ Se a te manatu telā ne faka‵mafa atu ne Iesu i konei? Masaua la me ne faka‵mafa atu te ‵tupuakaga o te lakau mo tena tupuakaga malielie foki. “Ko te laukele ne fai ne ia ke ola fuaga ke ‵fua mai: a te mea muamua e tupu ko te foitino, pito atu ko te moe, kae fakamuli ko ‵fua mai ei.” (Maleko 4:​28) Ne tupu malielie aka te lakau tenei kae e tupu fakasolo mai foki a vaega takitasi i ei. E se mafai o faimālō io me e fakava‵vave aka tena tupuakaga. E penā foki loa te ‵tupuakaga i te feitu faka-te-agaga. E tupu fakasolo mai a te mea tenei e ‵tusa mo te taliaga ne Ieova ke tupu aka te munatonu i te loto o se tino telā e fetaui ‵lei mō te ola se-gata-mai.​​—Galuega 13:​48, Tusi Paia, Samoa; Epelu 6:1.

17. Ko oi e aofia i tino fia‵fia i te taimi ne fua mai ei ne te fuaga o te munatonu a fuataga?

¹⁷ E aofia pefea te tino ‵toki saito i te ‵katiga o te saito “māfai ko oko mai te taimi ‵kati saito”? Kafai ko fai ne Ieova ke ola aka te munatonu o te Malo i loto o soko ‵fou, ka oko fakamuli atu eiloa latou ki te tulaga telā ka fakamalosi aka ei latou ne te lotou a‵lofa ki te Atua ke tuku atu olotou ola ki a ia. E fakamailoga ne latou te lotou tukuatuga e auala i te papatisoga ki te vai. A taina kolā e tumau i te ‵tupu aka ki te matua ‵lei i te feitu faka-te-agaga e mafai eiloa o maua malielie ne latou a tiute e uke atu i te fakapotopotoga. A fuataga o te Malo e tau ne te tino ‵toki muamua pelā foki mo tino talai o te Malo kolā kāti ne seki aofia tonu latou i te ‵tokiga o te fuaga telā ne iku atu ki se vaegā soko penā. (Faitau te Ioane 4:​36-​38.) A te ‵tonuga loa, “ka fia‵fia fakatasi . . . te tino ‵toki saito mo te tino ‵kati saito.”

Akoakoga mō Tatou i Aso Nei

18, 19. (a) Ne fakamalosi atu pefea ki a koe eiloa a te mafaufau ki tala fakatusa konei a Iesu? (e) Ne a mea ka suke‵suke ki ei i te suā mataupu?

¹⁸ Ne a mea ne tauloto ne tatou mai i te ‵tou sukesukega ki tala fakatusa e lua konei ne fakamau i te Maleko mataupu e 4? E mafai o lavea faka‵lei atu ne tatou me e isi se galuega e ‵tau o fai ne tatou​​—ko te ‵tokiga o fuaga. E se ‵tau lele eiloa o talia ne tatou ne fakamasakoga mo fakalavelave mo tulaga faiga‵ta ke taofi aka ei tatou mai te faiga o te galuega tenei. (Failauga 11:4) Kae e iloa ‵lei foki ne tatou te ‵tou tauliaga gali ke fai pelā me ne tino kolā e ga‵lue fakatasi mo te Atua. A Ieova ko te tino telā e fai ne ia a tino mo fai ne soko, mai te fakamanuia ne ia a ‵tou taumafaiga mo taumafaiga a nisi tino kolā e talia ne latou te fekau. E iloa ne tatou me e se mafai o faimālō ne tatou te tupuakaga o se tino i te feitu faka-te-agaga. E iloa foki ne tatou me e se ‵tau o loto vāi‵vāi tatou io me ‵tuka ‵tou loto māfai e tuai io me e se gasolo atu ki mua te ‵tupuakaga tenā. Ko oko eiloa i te fakamafanafana mai ke iloa atu me i te ‵tou manuia e faka‵na eiloa ki te ‵tou fakamaoni ki a Ieova mo te galuega telā ko oti ne tuku mai ki a tatou ke talai atu te “Tala ‵Lei e uiga ki te Malo . . . mo fai te molimau ki tino katoa.”​​—Mataio 24:14.

¹⁹ Ne a foki a mea ne akoako mai ne Iesu e uiga ki te ‵tupuakaga o soko ‵fou mo te galuega o te Malo? A te tali ki te fesili tenā e maua i nisi tala fakatusa kolā ne fakamau i tala a tusi Evagelia. Ka iloilo ne tatou a nisi tala fakatusa konei i te suā mataupu.

[Fakamatalaga mai lalo]

E Masaua ne Koe?

• Ne a nisi mea e tai ‵pau ei a te ‵tokiga o fuaga mo te talaiatuga o te fekau o te Malo?

• E fua aka pefea ne Ieova a te fakamaoni o se tino talai o te Malo?

• Se a te mea tai ‵pau telā ne faka‵mafa mai ne Iesu i te va o te ‵tupuakaga o se lakau mo te ‵tupuakaga i te feitu faka-te-agaga?

• E “fia‵fia fakatasi” pefea a te “tino ‵toki saito mo te tino ‵kati saito”?

[Fakamatalaga o te Ata i te itulau e 21]

Kaia ne fakatusa ei ne Iesu a te tino talai o te Malo o te Atua ki se tino ‵toki saito?

[Fakamatalaga o te Ata i te itulau e 23]

Ko latou kolā ne fakaata mai i te laukele ola ‵lei ne ‵kau atu mo te loto kātoa ki te talaiatuga o te Malo e ‵tusa mo olotou fakanofonofoga

[Fakamatalaga o te Ata i te itulau e 24]

Ko te Atua ne fakaola faeloa ne ia te lakau