E Ola te Muna a Ieova
Manatu Tāua Mai i Tusi ki te Kau Kolinito
NE MANAVASE malosi te apositolo ko Paulo ki te fakapotopotoga i Kolinito. Ne logo a ia me e isi ne kinauga i vā o taina i konā kae ko kamata foki o talia ne latou a amioga finalalolagi. Ko oti ne tusi atu te fakapotopotoga ki a Paulo e uiga ki mea konā. Tela la, kāti i te 55 T.A., i te taimi ne nofo ei tou tagata i Efeso i te tolu o ana malaga fakamisionale, ne tusi ne Paulo tena tusi muamua ki te kau Kolinito.
A te tusi i te lua, ko te fakasokoga o te tusi muamua, telā kāti ne tusi i se fia masina mai tua o te tusi muamua. Ona ko te mea e tai ‵pau eiloa a tulaga i loto mo tua o te fakapotopotoga i Kolinito i auala e uke mo ‵tou aso nei, e tāua ‵ki eiloa ki a tatou te fekau i tusi a Paulo ki a latou.—Epelu 4:12.
‘KE MATAPULA‵PULA, TU ‵MAUTAKITAKI, KAE LOTO MALOSI’
E fakamalosi mai a Paulo: “Ke fusi koutou i te manatu e tasi.” (1 Kolinito 1:10) E seai aka se ‘fakavae i tafa o Iesu Keliso,’ telā e fakavae mai ei a uiga faka-Kelisiano. (1 Kolinito 3:11-13) E uiga ki se tino finalalolagi i te fakapotopotoga, e fai mai Paulo: “‵Tuli keatea a te tino amio masei mai i a koutou.” (1 Kolinito 5:13) “A te foitino o te tino, e seki faite mo fai amioga ma‵sei,” ko ana pati, “kae ne faite mo fai vikiga o te Aliki.”—1 Kolinito 6:13.
I tena tali e uiga ki “mea kolā ne tusi mai ei [latou],” ne tuku atu ne Paulo a fakatakitakiga ‵lei kae aogā e uiga ki te fakaipoipoga mo te nofo taka. (1 Kolinito 7:1) Mai tua o tena faiatuga e uiga ki ulu o kāiga Kelisiano, te fakatokaga o fakatasiga Kelisiano, mo te ‵tonu o te toetu, ne fakamalosi atu a Paulo: “Ke matapula‵pula koutou, tu ‵mautakitaki i te fakatuanaki, ke loto ‵toa koutou, ke loto ma‵losi foki.”—1 Kolinito 16:13.
Tali ki Fesili Faka-te-Tusi Tapu:
1:21—E mata, e fakaaogā eiloa ne Ieova “se mea valea” ke fakaola a tino tali‵tonu? Ikai, e se fai penā. Kae ona ko te mea ‘ko se iloa ne tino a te Atua i olotou poto,’ a te mea telā e fakaaogā ne ia ke faka‵sao ei a tino e foliga mai me se mea valea ki te lalolagi.—Ioane 17:25.
5:5—Se a te uiga ke “tuku atu a te tino [masei] ki a Satani, ke fakamasei ne ia tena foitino, ko te mea ke ola a [“te,” NW] agaga”? Kafai ko fakatea mai te fakapotopotoga se tino telā ne fai ne ia se agasala matagā kae sē salamō, e toe fai a ia mo fai se vaega o te lalolagi masei a Satani. (1 Ioane 5:19) Tela la, ko fai ei pelā me ko tuku atu a ia ki a Satani. A te fakateaga o te tino tenā e iku atu i ei ki te fakamaseiga, io me ko te tapalega o te mea matagā tenā, kae fakatumau ei te agaga ‵lei o te fakapotopotoga io me ko tena uiga lauiloa.—2 Timoteo 4:22.
11:26—E fakamanatu fakafia “sāle” a te mate o Iesu, kae “ke oko” ki te taimi fea? Ne seki fai atu Paulo me e ‵tau o fakamanatu sāle te mate o Iesu. A te pati Eleni telā ne ‵fuli ki te “sāle” e fakauiga ki “so se taimi” io me “ko taimi katoa e fai ei penā.” Tela la, ne fai atu Paulo me ko taimi katoa e ‵kai kae inu ei a Kelisiano fakaekegina ki mea fakatusa o te Fakamanatuga, fakatasi i te tausaga i te po 14 o Nisani, e “folafola atu ei ne [latou] te mate o te Aliki.” E fai eiloa ne latou te mea tenei “ke oko ki tena oko mai,” telā ko te taimi e fetaui ei latou mo ia i te toetuga ki te lagi.—1 Tesalonia 4:14-17.
13:13—Kaia e tulaga muamua ei te alofa i te fakatuanaki mo te fakamoemoe? Kafai ko taunu a “mea e fakamoe‵moe tatou ki ei” mo mea e “tali‵tonu” ki ei, ko gata atu foki loa i ei a nisi vaega o te fakatuanaki mo te fakamoemoe. (Epelu 11:1) E tulaga muamua a te alofa i te fakatuanaki mo te fakamoemoe me e tumau eiloa ki te se-gata-mai.
15:29—Se a te uiga o te “papatisogina o latou e sui ei a tino kolā ne ‵mate”? E se fakauiga a Paulo me e ‵tau o papatiso a tino ola ke sui ei a tino kolā ko ‵mate kae seki papatiso. Ne faipati eiloa a Paulo i konei ki te papatisoga o Kelisiano fakaekegina ki te agaga ki se vaegā olaga telā e tumau i ei te lotou fakamaoni ke oko ki te ‵mate kae ‵soko atu ki ei te lotou toe‵tuga ki te olaga faka-te-agaga.
Akoakoga mō Tatou:
1:26-31; 3:3-9; 4:7. A te fakamatamata mo te loto maulalo ona ko Ieova, kae e se mō tatou, e fakamalosi aka ei te fealofani i te fakapotopotoga.
2:3-5. I te taimi ne talai atu ei a ia i Kolinito, te koga ne fakatāua i ei a mataupu silisili mo akoakoga a te kau Eleni, kāti ne manavase a Paulo me e mata, e mafai o fakatalitonu atu a ia ki ana tino fakalogo‵logo. Kae ne seki talia ne ia so se vāivāiga io me ko te mataku ke faka‵tuka atu ki te faiga o te galuega ne tuku atu ne te Atua ke fai ne ia. E penā foki loa, e se ‵tau o talia ne tatou so se fakanofonofoga faigata ke faka‵tuka mai ki a tatou i te folafolaatuga o te tala ‵lei e uiga ki te Malo o te Atua. E mafai eiloa o ‵kilo atu tatou mo te tali‵tonu ki a Ieova mō se fesoasoani e pelā mo te mea ne fai ne Paulo.
2:16. Ke maua “te mafaufau o Keliso,” e ‵tau o iloa ne tatou te auala e mafaufau ei a ia, ke mafaufau foki tatou penā, ke iloa faka‵lei foki ana uiga, kae ke tau‵tali atu tatou i tena fakaakoakoga. (1 Petelu 2:21; 4:1) Ko oko eiloa i te tāua ke sukesuke faka‵lei tatou ki te olaga mo te galuega talai a Iesu!
3:10-15; 4:17. E ‵tau o iloilo kae momea aka te ‵lei o ‵tou atamai i te akoako atu mo te faiga o soko. (Mataio 28:19, 20) Kafai e se akoako faka‵lei atu tatou, kāti ka se mafai o manumalo te ‵tou akoga faka-te-Tusi Tapu i tofotofoga o te fakatuanaki, kae kāti ka logo‵mae malosi tatou i ei telā ka fai ‵tou fakaolataga e pelā “me se tino ne sao mai te afi.”
6:18. Ke “fakagata te fina lalolagi” e se gata fua i te ‵kalo keatea mai faifaiga o te por·neiʹa kae penā foki loa mo ata ma‵sei, amioga sē ‵ma, te mafaufau ki amioga fakatauavaga, te fakatāgata io me ko te fakafāfine—so se mea telā e mafai o iku atu ki te finalalolagi.—Mataio 5:28; Iakopo 3:17.
7:29. E ‵tau o fakaeteete a taki tauavaga ke mo a ma tō ‵saga ifo ki a laua eiloa telā ko fai ei ke tulaga lua a manakoga o te Malo i lā olaga.
10:8-11. Ne fanoanoa ‵ki a Ieova i te taimi ne mui‵mui ei a tino Isalaelu ki a Mose mo Alona. E ‵poto tatou māfai e ‵kalo keatea mai te atiakaga o te uiga ko te loto muimui.
16:2. Ka mafai eiloa o tumau te tukuatuga o ‵tou meaalofa tupe ki te tausiga o manakoga o te Malo māfai ko oti ne fakatoka faka‵lei kae fai foki i se auala masani.
KE TUMAU I TE “FAKATONUTONU OTOU AUALA”
Ne fai atu a Paulo ki te kau Kolinito me e ‵tau mo latou o “fakamagalo . . . kae fakamalosi atu” ki se tino agasala loto salamō telā ko oti ne polopoloki ‵mafa. E tiga eiloa ne fakafanoanoa atu tena tusi muamua ki a latou, ne fakaasi atu ne Paulo te fiafia me ne “fai te [lotou] fanoa‵noa mo ala e sala‵mo ei” latou.—2 Kolinito 2:6, 7; 7:8, 9.
E pelā eiloa mo te otou “mauko‵loa i mea katoa,” e fakamalosi atu Paulo ki te kau Kolinito ke tumau i te “galuega alofa tenei.” Mai tua o ana pati ki te kau ‵teke, ne fai atu ne ia a toe pati fesoasoani ki a latou katoa: “Ke fakatonutonu otou auala, ke fakaaogā ne koutou aku muna ne fai, ke fakatauma‵lie koutou i a koutou eiloa, ke ola filemu koutou.”—2 Kolinito 8:7; 13:11.
Tali ki Fesili Faka-te-Tusi Tapu:
2:15, 16—E fai pefea tatou e pelā me ne ‘taulaga ‵sunu manogi gali a te Keliso’? E fai eiloa penā ona ko te ‵tou faka‵logo ki te Tusi Tapu kae aofia foki i te folafolaatuga o te fekau i ei. E tiga eiloa e mafai o fai te “manogi ‵lei” tenā e pelā me se mea fakatakalialia ki tino sē amio‵tonu, e fai eiloa e pelā me se mea manogi gali ki a Ieova mo tino loto fakamaoni.
5:16—E ‘se fakamasino’ pefea ne Kelisiano fakaekegina “so se tino i feitu faka te foitino”? E se ‵kilo atu latou ki tino i se auala faka-te-foitino, mai te fakaasi atu o te fakailoga tino telā e fakavae ki te lotou maumea, telega, matakāiga io me ko olotou fenua. A te mea telā e tāua ki a latou ko te lotou fesokotakiga i te feitu faka-te-agaga mo olotou taina tali‵tonu.
11:1, 16; 12:11—E mata, ne seki fakaasi atu ne Paulo te loto malamalama ki te kau Kolinito? Ikai, e se penā loa. Kae kāti e foliga atu ki nisi tino me i a ia e uiga fakamatamata kae sē loto malamalama ona ko te mea ne ‵pulu ne ia tena tulaga fakaapositolo.
12:1-4—Ko oi “ne avake foki ki Palataiso”? Ona ko te mea e se faipati te Tusi Tapu e uiga ki se tino telā ne maua ne ia se fakaasiga penā muamua kae ko te fakamatalaga tenā e ‵soko atu ki te ‵puluga ne Paulo tena tulaga fakaapositolo, kāti ne fakaasi atu fua ne ia a mea ne ‵tupu ki a ia. A te mea telā ne lavea ne te apositolo kāti ne fai pelā me se palataiso faka-te-agaga telā e maua ne te fakapotopotoga Kelisiano i te taimi o “te gataga o te lalolagi.”—Tanielu 12:4.
Akoakoga mō Tatou:
3:5. E ‵tusa mo te manatu fakavae, e fai mai te fuaiupu tenei me ne faū eiloa ne Ieova a Kelisiano mō te galuega talai e auala i tena Muna, tena agaga tapu, mo te vaega o tena fakapotopotoga i te lalolagi. (Ioane 16:7; 2 Timoteo 3:16, 17) Se mea ‵lei ke suke‵suke tatou ki te Tusi Tapu mo tusi faka-te-Tusi Tapu mo te loto fiafia, ke tumau i te ‵talo atu mō te agaga tapu, ‵kau atu ki fakatasiga faka-Kelisiano kae fai faeloa ‵tou tusaga i ei.—Salamo 1:1-3; Luka 11:10-13; Epelu 10:24, 25.
4:16. Ona ko te mea e fakafou ne Ieova ‵tou ‘malosi faka-te-agaga i aso takitasi,’ e ‵tau eiloa mo tatou o fakaaogā faka‵lei a fakatokaga a Ieova, kae ke mo a ma talia se aso ke seke e aunoa mo te mafaufau ki mea faka-te-agaga.
4:17, 18. Kafai e masaua ne tatou me i ‘te puapuagā e se tumau kae māmā fua,’ e mafai o fesoasoani mai ke tumau tatou i te fakamaoni ki a Ieova mai lalo i tulaga faiga‵ta.
5:1-5. Ko tafaga la te gali o te auala ne fakaasi mai ne Paulo a lagonaga o Kelisiano fakaekegina ki te lotou fakamoemoega ki te ola i te lagi!
10:13. E pelā me se tulafono masani, vaganā ko oti ne fai a fakatokaga fakapito ke fesoasoani atu i koga e manakogina ei se fesoasoani, e ‵tau fua o ga‵lue tatou i te koga talai telā ko oti ne ‵tofi aka ki tau fakapotopotoga.
13:5. Ke ‘sukesuke ifo faka‵lei me mata e ‵mautakitaki tatou i te fakatuanaki,’ e ‵tau o fakafetaui aka ‵tou amioga ki mea kolā e tauloto ne tatou mai te Tusi Tapu. Ko te mea ke ‘fai se tofotofoga mō tatou,’ e ‵tau o fua aka ‵tou malosi i te feitu faka-te-agaga, e aofia i ei te malosi o ‵tou “tami ki te kese‵kesega o te ‵lei mo te masei” mo te uke o galuega o ‵tou fakatuanaki. (Epelu 5:14; Iakopo 1:22-25) Mai i te fakagalue aka o pati fesoasoani ‵lei a Paulo, e mafai ei o tumau tatou i te sa‵sale atu i te auala o te munatonu.
[Fakamatalaga o te Ata i te itulau e 30]
Se a te uiga o pati konei “me ko te otou ‵kai sāle ki te falaoa tenei kae inu ki te ipu”?—1 Kolinito 11:26