‵Teke Atu “Te Agaga o te Lalolagi”

“E seki maua ne matou a te agaga o te lalolagi tenei; kae ne maua ne matou a te Agaga ne aumai ne te Atua.”​​—1 KOLINITO 2:​12.

1, 2. (a) Kaia ne tausi ei a tamā manu fo‵liki ko canaries i ana keli fatu kalā o Peletania, i aso mua? (e) Ne a mea fakama‵taku e fe‵paki mo Kelisiano?

ITE 1911, ne talia ne takitaki o Peletania se tulafono ke puipui ei a ola o tino keli fatu kalā. I ana takitasi kolā e keli ei a fatu kalā ne ‵tau o tuku i ei a tamā manu eva fo‵liki e lua e igoa ki canaries. Kaia? Kafai e ‵ka se afi i se ana, e ‵tau o ave ne tino faka‵sao tino a manu konā māfai ko olo atu o faka‵sao a tino kolā e ga‵lue i ei. E pokotia vave a tamā manu konā māfai ko mānava ne latou a kēsi poisini. Kafai ko ‵fonu te ea i te kēsi poisini, ka se nofo ‵toka a manu, kae mafai o ‵to ki lalo mai te koga e ‵tu ei. E tāua ‵ki a te fakailoga tenei. A te kēsi poisini e tasi e se mafai o lavea, e seai foki sena manogi, kae e tamate ne ia te tino mai te taofi aka o sela ‵kula i te toto kolā e fakaoko atu ei te okesene ki te foitino kātoa. Kafai e se iloa ne latou a tulaga fakama‵taku konā, e mafai o mata‵po io me ‵mate a tino faka‵sao tino e aunoa mo te iloa me ko poisini latou.

² E fe‵paki a Kelisiano mo se tulaga tai ‵pau mo tino keli fatu kalā i te feitu faka-te-agaga. E pefea la? I te taimi ne tuku atu ne Iesu ki ana soko te tofiga ke folafola atu te tala ‵lei ki te lalolagi kātoa, ne iloa ne ia me ka uga atu ne ia latou ki se koga fakamataku, se koga telā e pule atu ki ei a Satani mo te agaga o te lalolagi. (Mataio 10:16; 1 Ioane 5:​19) Ona ko te lasi o tena manavase ki ana soko i te po mai mua o tena mate, ne ‵talo a ia ki tena Tamana: “Au e se ‵talo atu ke ave ne koe latou keatea mai te lalolagi, ka ko au e ‵talo atu ke tausi latou ne koe mai te Tino Masei.”​​—Ioane 17:15.

3, 4. Se a te fakailoaga ne tuku atu ne Iesu ki ana soko, kae kaia e ‵tau ei o ‵saga tonu atu tatou ki te mea tenā?

³ Ne fakailoa atu ne Iesu ki ana soko me ka iku atu ki te mate a te sē matapula‵pula i te feitu faka-te-agaga. E isi se uiga fakapito o ana pati ki a tatou, i te vaitaimi o te gataga tenei e ola ei tatou. Ne fakamalosi atu a ia ki ana soko: “Ke matapula‵pula . . . ko te mea ke maua ne koutou te malosi e ‵sao mai ei koutou i mea faiga‵ta katoa ka oko mai, kae ‵tu atu ei foki koutou i mua o te Tama a te Tagata.” (Luka 21:​34-​36) Se mea fakafiafia me ne tauto Iesu me ka tuku atu ne tena Tamana a te agaga tapu ke fakamasaua atu a mea ne tauloto ne latou, kae ke fesoasoani atu ke matapula‵pula kae ke loto ma‵losi foki.​​—Ioane 14:26.

⁴ Kae pefea la tatou i aso nei? E mata, e mafai o fesoasoani mai te agaga tapu tenā ki a tatou? Kafai e mafai, e maua pefea ne tatou? Se a te agaga o te lalolagi, kae e galue pefea? Kae e mafai pefea o manuia tatou i te ‵teke atu ki te agaga o te lalolagi tenei?​​—Faitau te 1 Kolinito 2:​12.

Te Agaga Tapu io me ko te Agaga o te Lalolagi?

5, 6. E fesoasoani mai pefea te agaga tapu, kae ne a ‵tou mea e ‵tau o fai ke maua ne tatou?

⁵ Ne seki tuku atu fua ki tino i te senitenali muamua a te agaga tapu. E mafai foki eiloa o maua i aso nei, kae e mafai o fesoasoani mai te agaga o te Atua ke maua ne tatou te malosi ke fai te mea tonu e pelā foki mo te faiga o ‵tou taviniga. (Loma 12:11; Filipi 4:​13) E mafai foki o ati aka i loto i a tatou a uiga ‵gali e pelā mo te alofa, te atafai mo te ‵lei, kolā ne “fua o te Agaga.” (Kalatia 5:​22, 23) Kae e se faimālō ne Ieova te Atua a tino ke talia ne latou tena agaga tapu.

⁶ Se mea ‵lei ke fesili ifo tatou penei, ‘Ne a mea e mafai o fai ne au ke maua ei te agaga tapu?’ E fakaasi mai i te Tusi Tapu me e isi ne nāi mea kolā e mafai o fai ne tatou. A te auala muamua e tāua kae faigofie fua​​—fakamolemole atu ki te Atua e uiga ki ei. (Faitau te Luka 11:13.) A te suā auala aogā ko te sukesuke kae fakagalue aka a fakatakitakiga i te Muna a te Atua telā ne fakaosofia ki te agaga. (2 Timoteo 3:​16) E tonu, e se ko tino katoa kolā e fai‵tau fua ki te Tusi Tapu e maua ne latou te agaga o te Atua. Kae kafai e sukesuke se Kelisiano loto ‵lei ki te Muna a te Atua, e mafai o ‵goto ifo ki tena loto a lagonaga mo kilokiloga kolā e fakaasi mai i te Muna fakaosofia. E tāua foki ke talia ne tatou me ne fakasopo aka ne Ieova a Iesu e pelā me ko Tena sui kae ne tuku mai foki ne te Atua tena agaga e auala i a ia. (Kolose 2:6) E ‵tusa mo te mea tenā, e ma‵nako tatou o fakafetaui aka ‵tou olaga ki fakaakoakoga mo akoakoga a Iesu. (1 Petelu 2:​21) Kafai e kausaki malosi tatou ke fai pelā mo Keliso, ka maua foki i ei ne tatou te agaga tapu.

7. E fakamalosi aka pefea ne te agaga o te lalolagi a tino taki tokotasi?

⁷ E ‵kese mo te mea tenā, e fakamalosi aka ne te agaga o te lalolagi a tino ke fakaakoako ki a Satani. (Faitau te Efeso 2:​1-3.) E galue te agaga o te lalolagi i auala kese‵kese. E pelā mo fakamaoniga e lavea atu i ‵tou tafa i aso nei, e fakamalosi aka i ei te ‵teke atu ki tulaga o te Atua. E fakamalosi aka ei a “manakoga agasala, ko mea e matea ne tino kae ma‵nako ki ei, mo mea katoa i te lalolagi nei kolā e fakamata‵mata ki ei a tino.” (1 Ioane 2:​16) E māfua mai i ei a manakoga faka-te-foitino e pelā mo te finalalolagi, te ifo ki tupua, faivailakau, loto masei, loto ita mo te konā. (Kalatia 5:​19-​21) Kae e fakamalosi aka foki i ei a manatu fakaaposetate kolā e fakamasei ei a mea ‵malu. (2 Timoteo 2:​14-​18) E mautinoa eiloa, me kafai e taliagofie ne se tino a te agaga o te lalolagi, ka momea aka foki i ei tena fakaakoako ki a Satani.

8. Se a te filifiliga telā e ‵tau o fai ne tatou katoa?

⁸ E se mafai o se pokotia tatou i fakamalosiga sē ‵lei. E ‵tau o filifili ne tino taki tokotasi a te mea telā e talia ne ia ke takitaki ei tena olaga​​—ko te agaga tapu io me ko te agaga o te lalolagi. E mafai o fulitua atu a tino ki te agaga o te lalolagi kae talia ne latou te agaga tapu ke takitaki olotou olaga. Kae e penā foki i te suā feitu. E mafai o ‵to atu ki te malei a te agaga o te lalolagi a tino kolā ne takitaki i se vaitaimi ne te agaga tapu. (Filipi 3:​18, 19) Ke na mafau‵fau nei tatou ki auala ke ‵teke atu ki te agaga o te lalolagi.

Ke Iloa a Fakailoga i te Kamataga

9-11. Ne a nisi fakailoga e iloa ei me ko kamata o pokotia tatou i te agaga o te lalolagi?

⁹ Ne fakaaogā ne tino keli fatu kalā i Peletania, kolā ne fai‵pati ki ei muamua, a tamā manu ke iloa i ei ne latou me e isi se kēsi poisini. Kafai e lavea ne se tino keli fatu kalā a te manu ko tō ki lalo mai te koga e tu ei, e iloa ne ia me e ‵tau o gasuesue fakavave ke sao ei a ia. Ne a fakailoga i te feitu faka-te-agaga e fakaasi mai ei me ko kamata o pokotia tatou i te agaga o te lalolagi?

¹⁰ I te taimi ne fatoā tauloto ei tatou ki muna‵tonu i te Muna a te Atua kae tuku atu ‵tou ola ki a Ieova, kāti ne fai‵tau sāle tatou mo te loto finafinau ki te Tusi Tapu. Kāti ne ‵talo atu faeloa tatou mo te loto kātoa. Ne fia‵fia tatou o ‵kau ki fakatasiga a te fakapotopotoga, kae ‵kilo atu ki fakatasiga takitasi konā e pelā me se fakamalosiga faka-te-agaga, e pelā eiloa me se ipu vai ‵moko ki se tino telā ko tai mate i te fia inu. Ne fesoasoani mai a te faifaiga tenā ke fulitua tatou ki te agaga o te lalolagi.

¹¹ E mata, koi taumafai eiloa tatou o fai‵tau ki te Tusi Tapu i aso takitasi? (Salamo 1:2) E mata, koi ‵talo faeloa tatou mo te loto kātoa? E mata, e fia‵fia malosi tatou ki fakatasiga a te fakapotopotoga, mai te ‵kau atu ki fakatasiga katoa i te vaiaso? (Salamo 84:10) Io me ko ‵galo atu a nisi faifaiga ‵lei konei? E tonu, kāti e isi ne nisi tiute kolā e manakogina i ei ‵tou taimi mo ‵tou malosi, kae fai ei ke faigata ke tumau i te malosi ‵lei i te feitu faka-te-agaga. Kae kafai ko pokotia a nisi faifaiga ‵lei a tatou, e mata, e fai penā me ko fakamalosi aka tatou ne te agaga o te lalolagi? E mata, ka taumafai malosi nei tatou o toe fakamalosi aka a faifaiga ‵lei kolā ne fai muamua ne tatou?

‘Ke mo a ma tō Manava‵se’

12. Ne a nisi mea ne fai atu Iesu ke “fakaeteete” i ei ana soko, kae kaia?

¹² Ne a nisi mea e mafai o fai ne tatou ke ‵teke atu ei ki te agaga o te lalolagi? I te taimi ne fakamalosi aka ei ne Iesu ana soko “ke matapula‵pula,” ne fatoā fakailoa atu fua ne ia ki a latou a nisi mea fakama‵taku kolā ka fe‵paki mo latou. Ana muna: “Fakaeteete koutou! Ke mo a ma tō fai ‵kaiga kae ko‵na sāle, io me manava‵se ki mea o te olaga nei, i te mea manafai e fakapoi mai te aso tenā ki a koutou. Me ka vau pelā mo se malei.”​​—Luka 21:​34, 35.

13, 14. Ne a vaegā fesili e ‵lei ke fesili ifo ne tatou e uiga ki te ‵kai mo te inu?

¹³ Ke mafaufau ki te fakailoaga tenā. E mata, ne taku fakamasei ne Iesu te fia‵fia ki meakai mo meainu? Ikai! Ne iloa ne ia a pati a Solomona: “Ko iloa aka nei ne au me i te mea sili e ‵tau o fai ne tatou ko te fakafia‵fia i te olaga tenei koi ola tatou i ei. E ‵tau mo tatou katoa o ‵kai kae inu kae fakafia‵fia ki mea ne maua ne tatou mai o‵tou galuega. Ko te meaalofa a te Atua tenā.” (Failauga 3:​12, 13) Kae ne iloa ne Iesu me e fakamalosi aka ne te agaga o te lalolagi a te sōna fakaaogāga o mea penā.

¹⁴ E iloa pefea ne tatou me e seki fakapoisini tatou ne te agaga o te lalolagi ki te fakamataku o te kai valea mo te inu malosi? Kāti ka fesili ifo tatou: ‘E saga atu pefea au ki fakatonutonuga e uiga ki te gafula kolā e faitau ne au i te Tusi Tapu io me ko ‵tou tusi? E mata, e se saga atu au ki te fakamalosiga tenei e pelā me ko tō silia, kae fai atu ne fakamasakoga mō faifaiga kolā e fai ne au?a Se a taku kilokiloga ki fakatakitakiga e uiga ki meainu ma‵losi, te auala e ‵tau o fakaaogā ei mo te ‵kalo katoatoa kea‵tea mai ‘fiafiaga o te konā’? E mata, e manatu māmā au ki vaegā fakatakitakiga konā, mo te manatu me e se fakasino tonu mai ki a au? Kafai e fakaasi mai ne nisi tino te lotou manava‵se ki taku inu, e mata, e fai atu au me i a au e ‵lei loa io me kaitaua atu? E mata, e fakamalosi atu au ki nisi tino ke se ‵saga malosi atu ki vaegā fakatakitakiga penā mai te Tusi Tapu?’ E tonu, a te kilokiloga a te tino e fai pelā me se fakailoga ke iloa aka ei me ko pokotia a ia i te agaga o te lalolagi.​​—Fakatusa ki te Loma 13:​11-​14.

Ke se Ola Sai‵tia Ona ko te Manavase

15. Se a te uiga masani ne fai atu Iesu ke fakaeteete i ei?

¹⁵ A te suā auala tāua ke ‵teke atu ei ki te agaga o te lalolagi ko te pule atu ki te ‵tou manavase. Ne iloa ne Iesu me e pelā me ne tino sē ‵lei katoatoa, e manava‵se sāle tatou ki mea masani o te olaga. Ne fai atu a ia mo te alofa ki ana soko: “Ke se manava‵se koutou.” (Mataio 6:​25) E manino ‵lei me e ‵tau o manava‵se tatou ki mea tāua e pelā mo te fakafiafia ki te Atua, te saga tonu atu ki tiute faka-Kelisiano, mo te ‵sala atu ki mea e tausi ei te ola o ‵tou kāiga. (1 Kolinito 7:​32-​34) Ne a la mea e tauloto ne tatou mai pati a Iesu?

16. E pokotia pefea a tino e tokouke i te agaga o te lalolagi?

¹⁶ A te agaga o te lalolagi, telā e fakatāua i ei a mea o te olaga nei kolā e lavea ki mata, e fai i ei ke manava‵se malosi a tino e tokouke. E fai foki i ei ke tali‵tonu tatou me maua te puipuiga mai tupe, kae e taulia fua te tino ona ko te uke mo te ‵gali o ana kope, kae e se ona ko tena tulaga faka-te-agaga. A tino kolā e takitaki‵segina ne fakamalosiga konei e fai pelā me ne pologa ki koloa kae e manava‵se faeloa ke maua ne latou a toe mea ‵fou, toe mea ‵lasi mo te ‵gali. (Faataoto 18:11) A te vaegā kilokiloga ‵se penā ki mea faka-te-lalolagi e fakamāfua aka fua i ei te manavase telā e fai ei ke ola sai‵tia se tino i te feitu faka-te-agaga.​​—Faitau te Mataio 13:​18, 22.

17. E ‵kalo keatea pefea tatou mai te ola sai‵tia ona ko te manavase?

¹⁷ E mafai o se ola sai‵tia tatou ona ko te manavase māfai e faka‵logo ki te fakatonuga a Iesu: “Ke mua koutou o ‵sala tena Malo mo tena amiotonu [o te Atua].” Ne fakamautinoa mai Iesu me kafai e fai ne tatou te mea tenei ka maua eiloa ne tatou a mea kolā e ma‵nako tatou ki ei. (Mataio 6:​33) E fakaasi atu pefea ne tatou te ‵tou tali‵tonu ki te folafolaga tenei? A te auala e tasi ko te ‵sala muamua atu ki te amiotonu o te Atua​​—mai te tau‵tali ki tulaga o te Atua e uiga ki te mea tonu i mea tau tupe. E pelā mo te sē talia ne tatou ke faka‵fonu fakaloiloi a pepa o lafoga kolā e ‵tau o ‵togi atu ki te malo, io me fai atu ne “tamā” ‵loi i ‵tou faifaiga fakapisinisi. E fai ne tatou so se mea e mafai o fai ke ‵tina ‵tou kaitalafu, ko te mea ke fakamaoni tatou ki te ‵tou fai atu “Ao” i te feitu tenā. (Mataio 5:​37; Salamo 37:21) Kāti e se maumea se tino māfai e fakamaoni penā, kae e fai ei ke fiafia te Atua, e maua i ei se lagonaga fiafia, kae fakafoliki foki i ei te manava‵se.

18. Se a te fakaakoakoga ‵lei ne tuku mai ne Iesu mō tatou, kae ka aogā pefea ki a tatou māfai e fakaakoako atu ki ei?

¹⁸ A te ‵sala muamua atu ki te Malo e aofia i ei te iloa ne tatou a mea kolā e ‵tau o fakamuamua i te olaga. Ke mafaufau ki te fakaakoakoga a Iesu. I nisi taimi ne pei a ia ki gatu ‵togi ‵mafa. (Ioane 19:23) Ne kai kae inu a ia ki uaina fakatasi mo ana taugasoa ‵lei. (Mataio 11:​18, 19) Kae ko kope mo fakafiafiaga ne fai fua pelā mo mea e fakamanogi gali ei te meakai kae e se ko te ‵toe mea tāua ki a ia. A te meakai a Iesu ko te faiga o te loto o Ieova. (Ioane 4:​34-​36) A te fakaakoako atu ki a Iesu e fai ei ke fia‵fia ki te olaga! E fia‵fia tatou i te fesoasoani atu ki tino puapuagatia ke maua ne latou a fakamafanafanaga mai te Tusi Tapu. E a‵lofa kae ‵lago mai te fakapotopotoga, kae e fakafiafia foki ne tatou te loto o Ieova. Kafai e iloa ne tatou a mea kolā e ‵tau o fakamuamua, ka se pule mai eiloa a koloa mo fakafiafiaga ki a tatou. E fai a mea konā e pelā me ne mea faigaluega kolā e aogā ki ‵tou tapuakiga ki a Ieova. Kae ko te ‵lago malosi atu o tatou ki te Malo o te Atua, ko te faigata foki o pule mai te agaga o te lalolagi ki a tatou.

Tumau i te Tuku Atu ‘‵Tou Mafaufau ki te Agaga’

19-21. E tumau pefea tatou i te tuku atu o ‘‵tou mafaufau ki te agaga,’ kae kaia e ‵tau ei ke fai tatou penā?

¹⁹ E mafaufau muamua te tino a koi tuai o fai ne ia se mea. A faifaiga sē ‵lei i te kilokiloga a tino e tokouke e masani o māfua mai i mafaufauga faka-te-foitino. Tela la, ne fakamasaua mai te apositolo ko Paulo e uiga ki te manakoga ke puipui faeloa ‵tou mafaufau. Ne tusi mai a ia: “Me ko tino kolā e ola faka te foitino, e mafau‵fau faka te foitino. Ko tino foki kolā e ola faka te Agaga, e mafau‵fau foki faka te Agaga.”​​—Loma 8:5.

²⁰ E ‵kalo keatea pefea tatou mai te taliaga o te agaga o te lalolagi ke pule mai ki ‵tou mafaufau kae fakamuli ifo ko ‵tou faifaiga? Ke fai ne tatou te ‵toe mea e mafai o fai ke puipui ei ‵tou mafaufau mai manatu ‵se o te lalolagi. E pelā mo te filifiliga o fakafiafiaga, e se talia ne tatou ke onoono atu ki polokalame kolā e aofia i ei a faifaiga finalalolagi io me ko fakasauāga ke fakalailai ei ‵tou mafaufau. E iloa ne tatou me e se mafai o nofo a te agaga o te Atua telā e ‵malu kae ‵ma i loto i se mafaufau lailai. (Salamo 11:5; 2 Kolinito 6:​15-​18) E se gata i ei, e ‵kami mai ne tatou te agaga o te Atua ki ‵tou mafaufau e auala i te faitau faeloa ki te Tusi Tapu, ‵talo, te mafaufau ‵loto, mo te ‵kau atu ki fakatasiga. Kae e ga‵lue fakatasi tatou mo te agaga tenā mai te ‵kau atu faeloa ki te galuega talai faka-Kelisiano.

²¹ E tonu, e ‵tau eiloa o ‵teke atu tatou ki te agaga o te lalolagi mo manakoga faka-te-foitino kolā e fakamalosi aka i ei. Ka aogā eiloa a te faiga penā me ne fai mai a Paulo, me i “te mea e manako ki ei te foitino, ka iku eiloa ki te mate; ka ko te tuku atu otou mafaufau ki te mea e manako ki ei te Agaga, ka iku ki te ola mo te filemu.”​​—Loma 8:6.

[Fakamatalaga mai lalo]

E Masaua ne Koe?

• Ke maua te agaga tapu, ne a ‵tou mea e ‵tau o fai?

• Ne a nisi auala e mafai o pokotia ei tatou i te agaga o te lalolagi?

• E ‵teke atu pefea tatou ki te agaga o te lalolagi?

[Fakamatalaga o te Ata i te itulau e 23]

A koi tuai o fanatu ki te galuega io me ko te akoga ke ‵talo atu mō te agaga tapu

[Fakamatalaga o te Ata i te itulau e 25]

E ‵tau o tausi ne tatou ke ‵ma ‵tou mafaufau, fakamaoni i faifaiga fakapisinisi, kae ke fai a mea kolā e fia‵fia tatou ki ei mo te faka‵tau