Ko oi e Mafai o Iloa ne Ia a Mea ka ‵Tupu?

“Ko au fua tokotasi ko te Atua . . . Ne ‵valo ne au te mea ka tupu mai i te kamataga; ne folafola ne au i aso mua eiloa a te mea tenei ko oti ne tupu.”—Isaia 46:9, 10.

I TAIMI faiga‵ta konei, e iloilo ne tino sukesuke ki mea fakapolitiki, mea tau tupe mo mea o te olaga, a tala fakasolopito mo mea masani e ‵tupu i aso nei ke mafai ei o iloa ne latou a mea ka ‵tupu i aso mai mua. Ona ko te fia iloa vave ne nisi tino a mea ka ‵tupu ki a latou i aso mai mua, e ‵sala atu latou ki tino ‵poto i matematega o fetu io me ko faifaiga faivailakau ke maua ne fakamatalaga mai i ei. E fakafanoanoa sāle a tali e maua ne vaegā tino penā. E mata, e se mafai lele eiloa o iloa ne tatou a mea ka ‵tupu ki te lalolagi nei, ‵tou kāiga mo tatou taki tokotasi? Kae sili atu i ei, e mata, e isi se tino e mafai o iloa ne ia a mea ka ‵tupu i aso mai mua?

I ana pati ki te pelofeta ko Isaia, kolā e siki mai i luga nei, ne fakamatala mai ne te Atua Sili, ko Ieova, me e mafai o ‵valo mai ne ia a mea ka ‵tupu i aso mai mua. E auala i a Isaia, ne ‵valo mai ne te Atua a te fakasaolotoga o te kau Isalaelu mua mai te ‵nofo fakapagota i Papelonia mo te lotou ‵foki atu o toe ati aka Ielusalema mo tena faletapu. E pefea te ‵tonu o te valoaga tenei? Kāti i se 200 tausaga mai mua atu i ei, ne taku tonu mai ne Isaia a te igoa o te tino telā ka fakatakavale ne ia a Papelonia, ko Kulesa. E se gata i ei, ne fakamatala faka‵lei mai foki ne Isaia a te aofaga a Kulesa—ko te fakatafega keatea a vai mai te vaitafe ko te Eufilate, telā e puipui ei te fa‵kai. Ne ‵valo mai foki ne ia me ka ma‵tala fua a mataloa ‵lasi o te fa‵kai e aunoa mo se pogai ‵lei, telā ne fakafaigofie aka ei te manumalo o Kulesa.—Isaia 44:24–45:7.

Kafai e fakatusa ki te Atua, e se mafai lele o iloa ne tāgata a mea ka ‵tupu i aso mai mua. Ne tusi mai te tupu poto ko Solomona: “Ke mo a eiloa koe e fakamatamata e uiga mō te aso taeao. E se mafai o iloa ne koe te mea ka tupu mai i te taimi nei ke oko ki te aso taeao.” (Faataoto 27:1) Koi aogā eiloa te kilokiloga tenā. E se mafai foki o iloa ne se tino a mea ka ‵tupu ki a ia eiloa i aso mai mua. Kaia e ‵kese ei te Atua? E malamalama katoatoa a ia i ana mea ne faite, e aofia i ei a uiga mo manakoga o tino. Kafai e fakaiku aka ke fakaaogā tena malosi tenā, e mafai o lavea ‵mao ne te Atua a faifaiga ka fai ne tino taki tokotasi mo fenua. E se gata i ei, e mafai eiloa o pule atu a ia ki ikuga o mea e ‵tupu. Kafai e ‵valo mai a ia e auala i pelofeta me ka tupu se mea, ‘ko Ia foki eiloa e fakataunu ne Ia a fuafuaga mo valoaga konā.’ (Isaia 44:26) Ko Ieova te Atua fua e mafai o fai mai ne ia a pati konā.

Ne ola a Isaia i tausaga e sili atu i te 700 mai mua o Iesu, te Mesia. Kae ne ‵valo mai ne Isaia a mea e uiga ki te oko mai o te Mesia. Maise eiloa talu mai i te 18 senitenali o vau ki mua, ne fakafesili ne tino ‵teke ki te Tusi Tapu a te ‵tonu o te tusi a Isaia. Ne fai mai latou me i valoaga a Isaia e se ne valoaga ‵tonu kae ne tusi fua mai tua o te tupuga o mea konā, se fakamauga fua ki lalo o mea kolā ko oti ne ‵tupu. E mata, e tonu te mea tenā? I te 1947, ne maua aka ei se ‵kopi o te tusi a Isaia, fakatasi mo nisi pelugā tusi, i se ana i tafa o te Tai ‵Mate. Ne fakamautinoa mai ne tino ‵poto me i te ‵kopi tenei ne tusi i tausaga e sili atu i te selau mai mua o fanau mai te Mesia io me ko Keliso telā ne ‵valo mai. E tonu, ne ‵valo mai eiloa i te Tusi Tapu a mea ka ‵tupu i aso mai mua!

Ne seki mafai ne Isaia mo nisi tino ne tusi ne latou te Tusi Tapu o ‵valo mai i te lotou poto eiloa a mea ka ‵tupu i aso mai mua. “Ka ko te agaga tapu e fakatasi atu ki tino kolā e folafola atu ne latou a te talaiga telā ne aumai mai i te Atua.” (2 Petelu 1:21) Ka onoono tatou i te mataupu e ‵soko mai ki nisi fakamatalaga e uiga ki te olaga o Iesu kolā ne ‵valo mai ne Isaia. Ka oti, ko onoono ei tatou ki mea kolā ne ‵valo mai ne Iesu mo ana soko e uiga ki ‵tou aso nei mo aso mai mua.