Valoaga e Uiga ki te Mesia

ONA ko te mea ko iloa ne latou a mea ne tusi ne Isaia mo nisi pelofeta e uiga ki te Mesia, ko leva eiloa ne fakamoe‵moe a tino Iutaia ki tena oko mai. Tela la, ne ‘‵nofo fakatalitali’ eiloa a tino Iutaia i aso o Iesu ki te oko atu o te Mesia. (Luka 3:15) Se mea tāua eiloa, me ne aofia i valoaga i te Tusi Tapu a fakamatalaga fakaofoofogia e uiga ki te olaga o te Mesia. E seai se tino e mafai o ‵valo mai io me fakatoka ne ia ke ‵tupu a mea konā i te olaga o Iesu.

Fakamatalaga ki te Fanau Mai o te Mesia. Ne ‵valo mai a Isaia me ka fanau mai te Mesia, io me ko te Keliso i se tamafine e seki iloa ne ia tāgata. Mai tua o tena fakamatalaga ki te fanaumaiga fakaofoofogia o Iesu, ne tusi mai te apositolo ko Mataio: “Ne ‵tupu katoa a mea konei, ko te mea ke fakataunu ei a muna a te Aliki kolā ne faipatigina ne te pelofeta: ‘Kiloke, ka faitama se tamafine e seki iloa ne ia tāgata, kae ka fanau ne ia se tama tagata.’” (Mataio 1:22, 23; Isaia 7:14) Ne ‵valo mai foki ne Isaia me ka vau te Keliso i te gafa o Tavita, kae taku faka‵lei mai ei te igoa o Iese, te tamana o Tavita. Ne vau eiloa Iesu mai te gafa o Tavita. (Mataio 1:6, 16; Luka 3:23, 31, 32) Tela la, a koi tuai o fanau mai Iesu, ne fai atu te agelu ko Kapilielu ki tena mātua, ko Malia: “A ia ka fai ne te Aliki te Atua mo tupu, e pelā eiloa mo tona tupuna ko Tavita.”—Luka 1:32, 33; Isaia 11:1-5, 10; Loma 15:12.

Fakamatalaga ki te Olaga o te Mesia. I te sunako i Nasaleta, ne faitau atu ne Iesu i se leo maluga a te valoaga a Isaia, e aofia i ei a pati konei: “Ko i luga i a au te agaga o te Aliki. Ne faū ne ia au o lauga atu te Tala ‵Lei ki tino ma‵tiva.” I te fakasino atu me fakauiga te valoaga tenā ki a ia, ne fai atu Iesu: “Ko fakataunu i te aso nei a te vaega o te Tusi tenei, telā ko oti ne fakalogo‵logo koutou ki ei.” (Luka 4:17-21; Isaia 61:1, 2) Ne ‵valo mai foki ne Isaia a faifaiga a‵lofa, agamalū kae loto maulalo o Iesu ki tino kolā e ma‵nako ke faka‵lei olotou ma‵saki. Ne tusi mai Mataio: “E tokouke a tino ne tau‵tali atu i a ia. Ne fai foki ne ia ke ‵lei olotou masaki katoa. Kae ne fakatonu atu ke se fakaasi atu ki tino a te mea ne fai ne ia, ko te mea ke fakamaonia ei a muna a te pelofeta ko Isaia: . . . ‘E se fakakinau io me pakalaga, . . . e se unu ne ia se mouku ko magemage.’”—Mataio 8:16, 17; 12:10-21; Isaia 42:1-4; 53:4, 5.

Fakamatalaga ki Logo‵maega o te Mesia. Ne ‵valo mai a Isaia me ka se taliagina a te Mesia ne te tokoukega o tino Isalaelu kae ka fai a ia e pelā me se “fatu telā e ‵siga” ei latou. (1 Petelu 2:6-8; Isaia 8:14, 15) Kae tonu eiloa, faitalia a vavega ne fai ne Iesu, “kae se tali‵tonu eiloa latou ki a ia. Ko te mea ke fakataunu ei te muna a te pelofeta ko Isaia: ‘Te Aliki, ko oi ne tali‵tonu ki omotou muna ne fai atu?’” (Ioane 12:37, 38; Isaia 53:1) A te pogai e tasi ne seki tali‵tonu ei a tino Iutaia ki a Iesu, ko te talitonuga ‵se me ka fakatakavale ne te Mesia a te malo o Loma kae fakatu aka se malo tu tokotasi o Tavita i te lalolagi nei. Ona ko te mea ne logo‵mae kae ne mate atu a Iesu, ne seki talia ne te tokoukega o tino Iutaia a ia e pelā me ko te Mesia. Kae ko oti ne ‵valo mai a Isaia me ka logo‵mae te Mesia a koi tuai o fai a ia mo Tupu.

I te tusi ko Isaia, ne faipati fakavaloaga mai te Mesia: “Ne ‵fuli atu toku tua ki a latou kolā ne ‵kini ne latou a au. E seki ‵vao ne au latou i te o‵maiga o fakaitaita au, . . . kae puaki mai ki oku mata.” Ne fai mai ne Mataio a mea ne ‵tupu i te fakamasinoga o Iesu: “Ne puapuaki latou ki ona mata kae ‵kini a ia; kae laupāpā foki ne nisi tino.” (Isaia 50:6; Mataio 26:67) Ne tusi mai a Isaia: “Ne fai fakamaseigina a ia, kae ne kufaki eiloa ne ia mo te loto maulalo.” Tela la, i te taimi ne fesili atu ei Pilato ki a Iesu e uiga ki ‵losiga a te kau Iutaia, kae ko Iesu ne seki “tali se muna e tasi; tela la, ko oko eiloa i te ofo o te kovana.”—Isaia 53:7; Mataio 27:12-14; Galuega 8:28, 32-35.

Fakamatalaga ki te Mate o te Mesia. Ne tumau eiloa te fakataunuga o valoaga a Isaia i te taimi ne mate ei Iesu mo taimi mai tua ifo i ei. Ne ‵valo mai Isaia: “Ne tuku a ia ki te tānuga fakatasi mo tino amio ma‵sei, ne tanu fakatasi a ia mo tino mau‵mea.” (Isaia 53:9) Ne fakataunu pefea te valoaga tenei telā e foliga mai me e se fetaui a mea e faipati ki ei? I te taimi ne mate ei Iesu, ne fakasataulo fakatasi a ia mo tino kai‵soa e tokolua. (Mataio 27:38) Kae fakamuli ifo, ne tanu ne Iosefa te Alimataia a te foitino o Iesu i tena koga tanu tino ‵mate fou. (Mataio 27:57-60) Ne fakataunu foki i te mate o Iesu se vaega tāua ‵ki e tasi o valoaga a Isaia. E uiga ki te Mesia ne fai mai Isaia: “A taku tavini fakamaoni, telā e fiafia au ki ei, ka amo ne ia te fakasalaga o tino katoa, tela la, ka fakamagalo ne au latou ona ko ia.” E tonu, e auala i te mate o Iesu ne tuku mai ei te togiola ko te mea ke mafai o fakaseai atu te agasala mai tino fakamaoni katoa.—Isaia 53:8, 11; Loma 4:25.

Valoaga Kolā ka Fakataunu Eiloa

Ke fakaasi faka‵lei atu ne latou mai te Tusi Tapu me ko oi tonu te Mesia, ne uke atu a taimi ne siki sāle mai ne te kau apositolo mo Iesu a valoaga a Isaia i lō nisi tusi aka i te Tusi Tapu. Kae e se ko te tusi fua a Isaia e maua i ei a valoaga e uiga ki mea ka ‵tupu i aso mai mua. E uke foki a nisi valoaga i te Tusi Tapu i te ‵gana Epelu ne fakataunu e auala i a Iesu, tena Malo, mo mea ‵lei katoa kolā ka fakataunu ne te Malo i aso mai mua.a (Galuega 28:23; Fakaasiga 19:10) E mata, e mautinoa eiloa me ka fakataunu a valoaga konei? Ne fai atu Iesu ki ana tino Iutaia fakalogo‵logo: “Ke se ma‵natu koutou i a au ne vau o ofa te Tulafono, io me ko pelofeta [telā ko te Tusi Tapu i te ‵gana Epelu]. Au ne seki vau o ofa kae o fakataunu faka‵lei. E tonu, au e fai atu ki a koutou, e galo atu te lagi mo te lalolagi, kae se galo atu eiloa se togi io me se tamā mataimanu o te Tulafono, seiloga ke oko ki te gataga o mea katoa.”—Mataio 5:17, 18.

Ne fakasino atu foki a Iesu ki te fakataunuga o valoaga i te Tusi Tapu mai mea kolā ne ‵tupu i ona tafa e pelā foki mo mea ka ‵tupu fakamuli. (Tanielu 9:27; Mataio 15:7-9; 24:15) E se gata i ei, ne ‵valo mai ne Iesu mo ana soko a mea kolā ka ‵tupu mai tua o olotou aso, e aofia i ei a mea e uke kolā ko lavea atu ne tatou e ‵tupu i ‵tou aso nei. Ka faipati a te suā mataupu ki mea konei mo nisi valoaga i te Tusi Tapu kolā ka fakataunu i aso mai mua.

[Fakamatalaga mai lalo]

[Fakamatalaga o te Ata i te itulau e 4]

“Ka faitama se tamafine . . . kae ka fanau ne ia se tama tagata”

[Fakamatalaga o te Ata i te itulau e 5]

“E seki ‵vao ne au latou i te o‵maiga o fakaitaita au”