Fesoasoani Atu ki a Latou ke ‵Foki Fakavave Mai!
“Ko oi te tino ka olo matou ki ei? A muna o te ola se gata mai, e ‵nofo mo koe.”—IOANE 6:68.
1. Ne a muna a Petelu ne fai atu i te taimi ne tiakina ei ne soko e tokouke a Iesu?
NE TIAKINA Iesu Keliso i se taimi e tasi ne ana soko e tokouke kolā ne ‵teke atu ki se mea e tasi i ana akoakoga. “Kae pefea koutou, e fia olo foki koutou keatea?” ne fesili a ia ki ana apositolo. Ne tali atu Petelu: “Te Aliki, ko oi te tino ka olo matou ki ei? A muna o te ola se gata mai, e ‵nofo mo koe.” (Ioane 6:51-69) E seai aka foki se koga ke olo ki ei. Ne seki maua i te Lotu Iutaia i aso konā a “muna o te ola se gata mai,” kae e mautinoa foki loa me e se mafai o maua a vaegā muna penā i aso nei i Papelonia te Sili, te emupaea o lotu ‵se i te lalolagi. Kae ko so se tino ko galo mai te lafu a te Atua kae ko fia fakafiafia atu ki a Ieova, tenei eiloa “te taimi ko ‵tau ei koutou o ala ake” kae toe ‵foki mai ki te lafu.—Loma 13:11.
2. Se a te mea e ‵tau o masaua e uiga ki mea ‵funa io me ko mea tau fakamasinoga?
2 Ne fakaasi atu ne Ieova tena manavase ki mamoe ‵galo o Isalaelu. (Faitau te Esekielu 34:15, 16.) E penā foki loa a toeaina Kelisiano, e maua ne latou se manakoga mo se tiute ke fesoasoani atu ki se mamoe fakatusa ne galo mai te lafu. Kafai e ‵tofi aka ne latou se tino talai ke a‵koga mo se tino mate faka-te-agaga telā ko manako ki se fesoasoani, se a te mea e ‵tau o fai māfai ko iloa ne te faiakoga me ne fai ne te tino tenā se agasala matagā? I lō te tuku atu o pati fakatonutonu e uiga ki so se mea tau fakamasinoga io me se mea ‵funa, e ‵tau o fakamalosi atu a te tino talai ke faipati atu te tino tenā ki toeaina. Kafai e se fai ne ia te mea tenā, ko ‵tau ei mo te tino talai o fakailoa atu ki toeaina. —Levitiko 5:1; Kalatia 6:1.
3. Ne a mea ne fai ne te tagata telā e 100 ana mamoe i te taimi ne maua ei se mamoe e tasi ne galo?
3 I te mataupu mai mua, ne fakasino atu ki te tala fakatusa a Iesu e uiga ki se tagata telā e isi ne ana mamoe e 100. I te taimi ne galo ei se mamoe e tasi mai te lafu, ne tiakina ne ia a te toko 99 kae fanatu o ‵sala ki te mamoe ne galo. Ko tafaga la te fiafia o te tagata tenā i te taimi ne maua ne ia! (Luka 15:4-7) E maua ne tatou se fiafia tai ‵pau māfai ko foki mai se tokotasi o mamoe a te Atua telā ne galo atu mai te lafu. Ona ko te alofa, kāti ko oti ne asi sāle atu a toeaina mo nisi tino o te fakapotopotoga ki te tino mate faka-te-agaga. E ma‵nako foki latou ke foki mai te tino tenā ki te lafu kae ke maua te fesoasoani, te puipuiga, mo te fakamanuiaga a te Atua. (Teutelonome 33:27; Salamo 91:14; Faataoto 10:22) Kafai e maua ne latou se avanoaga ke fesoasoani atu, ne a mea e mafai o fai ne latou?
4. Se a te mea e mafai o malamalama tatou i ei mai te Kalatia 6:2, 5?
4 Kāti e mafai o fesoasoani atu latou ki se tino ke foki mai ki te fakapotopotoga mai te fakaasi atu mo te atafai me e alofa a Ieova ki Ana mamoe kae e manako fua a ia ke fai ne tatou a mea kolā e mafai o fai ne tatou. E aofia i mea konei a te sukesuke ki te Tusi Tapu, te kau atu ki fakatasiga Kelisiano, mo te talaiatuga o te tala ‵lei o te Malo. Kāti e ‵lei ke faitau te Kalatia 6:2, 5 kae taku atu me e mafai ne Kelisiano o fesoasoani ke fakamāmā aka ei te amoga a te suā tino, kae “e ‵tau eiloa mo te tino o amo tena amoga” o tiute i te feitu faka-te-agaga. E seai se tino e mafai o fakamaoni ki te Atua mō tatou.
E Mata, ne Fakalavelave Atu a te “Manava‵se ki Mea o te Olaga”?
5, 6. (a) Kaia e tāua ei ke faka‵logo faka‵lei tatou ki pati a taina tali‵tonu kolā ko ‵mate faka-te-agaga? (e) E mafai pefea o fesoasoani atu koe ki tino ‵mate faka-te-agaga ke lavea ne latou te fakamataku ki a latou a te sē ‵kau atu ki tino o te Atua?
5 E ‵tau o fakalogo‵logo faka‵lei a toeaina mo nisi tino talai ma‵tua ‵lei māfai ko fakaasi atu ne tino taki tokotasi konā a mea katoa i olotou loto, ko te mea ke iloa ne latou te auala ke fesoasoani atu ki a latou. Mafaufau la i a koe se toeaina ko āsi atu ki se tauavaga kolā ne ‵galo atu mai te fakapotopotoga ona ko te “manava‵se ki mea o te olaga nei.” (Luka 21:34) A fakalavelave i mea tau tupe io me ko te momea aka o tiute faka-te-kāiga e mafai o fai ei laua ke ‵mate faka-te-agaga. Kāti ko ma‵nako fua laua ki se fakatapūga, kae ke taku atu ne koe te manatu me i te ‵vae keatea e se fesoasoani atu ki a laua. (Faitau te Faataoto 18:1.) E mafai ne koe o fesili atu mo te poto: “E mata, ne sili atu te lū fia‵fia talu mai te taimi ne fakagata aka ei te lū ‵kau atu ki fakatasiga? E mata, ko gasolo aka o ‵lei te olaga o te lū kāiga? E mata, koi malosi eiloa te fiafia o Ieova i a koulua?”—Neemia 8:10.
6 A te mafaufau ki vaegā fesili penā e mafai o fesoasoani atu ki tino ‵mate faka-te-agaga ke lavea ne latou me e galo atu te lotou ma‵losi faka-te-agaga mo te fiafia ona ko te sē ‵kau atu ki te fakapotopotoga. (Mataio 5:3; Epelu 10:24, 25) Kāti e fesoasoani atu ke iloa ne latou me i te fakatamala ke talai atu te tala ‵lei ne iku eiloa ki te galo atu o te fiafia. (Mataio 28:19, 20) Tela la, se a te ‵toe mea poto e ‵tau o fai ne latou?
7. Ne a mea e mafai o fakamalosi atu ne tatou ke fai ne tino kolā ne ‵galo atu mai te lafu?
7 Ne fai atu Iesu: “Fakaeteete koutou! Ke mo a ma to fai ‵kaiga kae ko‵na sāle, io me manava‵se ki mea o te olaga nei . . . Tela la, a koutou ke matapula‵pula kae ‵talo sāle, ko te mea ke maua ne koutou te malosi e ‵sao mai ei koutou i mea faiga‵ta katoa ka oko mai.” (Luka 21:34-36) A tino kolā ko oti ne ‵galo atu mai te lafu kae ko fia maua te fiafia ne maua muamua ne latou, e mafai o fakamalosi aka ke ‵talo atu mō te agaga tapu mo te fesoasoani o te Atua kae ke ola foki e ‵tusa mo olotou ‵talo.—Luka 11:13.
E Mata, e Isi se Pogai ne Vai‵vai ei Latou?
8, 9. E mafai pefea o fakasakosako koe mo te tino telā ne fakavāivāi?
8 Ona ko te sē ‵lei katoatoa o tino, e mafai o se lotoma‵lie ki se mea, kae e mafai ei o fakavāivāi atu te mea tenei ki se tino. Ko oti ne vaivai nisi tino ona ko te mea ne seki ola e ‵tusa mo auala o te Atua se tino telā e fakaaloalogina i te fakapotopotoga. Kafai ne pokotia se tino mate faka-te-agaga i se auala penā, e mafai o taku atu ne te toeaina telā e āsi atu ki ei me e se fakavāivāi ne Ieova so se tino. Tela la, kaia e ‵tau ei o fakagata ne se tino tena fesokotakiga ‵lei mo te Atua, penā foki loa mo Ana tino? I lō te fai penā, e a, e se ‵tau o tumau se tino i te tavini atu ki te Atua, mo te loto talitonu me e iloa ne “te famasino o te lalolagi kātoa” a mea ne ‵tupu kae ka faka‵lei ne ia a mea konā i te auala tonu? (Kenese 18:25; Kolose 3:23-25) Kafai ne ‵lave te vae o se tino kae ne siga ki lalo, ka se nofo atu eiloa a ia i lalo e aunoa mo te taumafai ke toe tu aka ki luga.
9 I te taumafai ke fesoasoani atu i te feitu faka-te-agaga, e mafai o taku atu ne se toeaina me i te tekaatuga o taimi, e iloa aka ne nisi tino me ko kamata o se tāua malosi a te mea telā ne fakavāivāi atu ki a latou. A te ‵tonuga loa, kāti ko se toe lavea atu a te mea telā ne fakavāivāi atu. Kafai ne vāivāi se tino ona ko te mea ne polopoloki a ia, a te mafaufau ‵loto fakatasi mo te faiga o ‵talo e mafai o fesoasoani atu ke fakaiku aka me kāti ne ‵tau eiloa o maua ne ia te polopolokiga tenā kae ne seki ‵tau o talia ne ia te mea tenā ke fakavāivāi atu.—Salamo 119:165; Epelu 12:5-13.
E Mata, se Fakalavelave i se Akoakoga?
10, 11. Ne a auala e mafai o ma‵goi i te taumafai ke fesoasoani atu ki se tino telā e ‵kese tena malamalama i se akoakoga faka-te-Tusi Tapu?
10 Kāti ne tiakina ne nisi tino a te lafu a te Atua ona ko te mea ne seki lotoma‵lie latou ki se akoakoga faka-te-Tusi Tapu. A tino Isalaelu kolā ne fakasaoloto mai te ‵nofo pologa i Aikupito ne “puli i a latou a mea a te [Atua] ne fai” mō latou kae ne “seki faka‵tali ki se fakatonuga mai i a ia.” (Salamo 106:13) Kāti e mafai o fakamasaua atu ki te tino mate faka-te-agaga me i “te tavini fakamaoni kae poto” e tuku mai ne ia a toe mea‵kai faka-te-agaga ‵lei. (Mataio 24:45) Tenā eiloa te auala ne tauloto muamua ei ne te tino te munatonu. Tela la, kaia e se ‵tau ei o fakaiku aka ne ia ke toe kau mai ki te munatonu?—2 Ioane 4.
11 Kafai e taumafai ke fesoasoani atu ki tino kolā ne ‵galo mai te lafu a te Atua, e mafai o fakasino atu te toeaina ki soko kolā ne tiakina ne latou a Iesu ona ko te ‵teke atu ki se akoakoga e tasi mai i ana akoakoga. (Ioane 6:53, 66) Mai te fakagata aka o te ‵kau atu ki a Keliso mo ana soko fakamaoni, ne galo atu ei te lotou malosi faka-te-agaga mo te lotou fia‵fia. E mata, ko oti ne maua ne tino kolā ne fakagata te lotou ‵kau atu ki te fakapotopotoga Kelisiano se isi koga telā ne maua ei ne latou a mea‵kai ‵gali faka-te-agaga? Ikai, e seai eiloa!
E Mata, ne Aofia i ei se Agasala Matagā?
12, 13. Kafai e isi se tino ne galo mai te lafu ko taku ‵tonu mai me ne fai ne ia se agasala matagā, e mafai pefea o fesoasoani atu ki a ia?
12 Ko oti ne fakagata aka ne nisi tino te lotou ‵kau atu ki te galuega talai mo fakatasiga ona ko te mea ne fai ne latou se agasala matagā. Kāti e mafau‵fau latou me kafai e taku ‵tonu atu te lotou agasala ki toeaina, ka faka‵tea latou. Kae ka se faka‵tea latou mai te fakapotopotoga māfai ko oti ne taofi aka te lotou amioga masei telā e se fetaui mo te Tusi Tapu kae ko sala‵mo tonu. (2 Kolinito 7:10, 11) I lō te fai penā, ka toe taliagina latou, kae ka tuku atu ne toeaina a te fesoasoani faka-te-agaga telā e ‵tau o maua ne latou.
13 Kafai koe se tino talai matua ‵lei telā ko oti ne ‵tofi aka ke fesoasoani atu ki se tino mate faka-te-agaga, se a te mea e ‵tau o fai ne koe māfai ko taku atu ne ia me ne fai ne ia se agasala matagā? E pelā mo te mea ne taku atu muamua, i lō te aofia o koe i te mea tenā, fakamalosi atu ke fanatu a ia o faipati ki te kau toeaina. Kafai e se manako a ia ke fai penā, ka fakaasi atu eiloa ne koe tou manavase ki te igoa o Ieova mo te ‵lei i te feitu faka-te-agaga o te fakapotopotoga mai te gasuesue e ‵tusa mo te takitakiga a te Atua e uiga ki mea penā. (Faitau te Levitiko 5:1.) Ka iloa ne toeaina te auala ke fesoasoani atu ki so se tino telā e fia foki mai kae fia ola foki e ‵tusa mo te loto o te Atua. Kāti e manakogina a te polopoloki mo te alofa. (Epelu 12:7-11) Kafai e iloa ne te tino tenā me ko agasala a ia ki te Atua, ko oti ne fakagata aka tena amioga masei, kae ko salamō tonu, ka fesoasoani atu a toeaina, kae e mafai ei o maua ne ia te fakamagaloga a Ieova.—Isaia 1:18; 55:7; Iakopo 5:13-16.
E Maua te Fiafia Māfai ko Toe Foki Mai te Tama
14. Ke fakamatala mai i au pati eiloa te tala fakatusa a Iesu e uiga ki te tama fakamaumau mea.
14 Kafai e taumafai ke fesoasoani atu ki se mamoe ne galo, kāti ka fakasino atu te tino ne ‵tofi aka ke fesoasoani atu, ki te tala fakatusa a Iesu i te Luka 15:11-24. I te tala fakatusa tenā, ne fakamaumau ne se tamataene tena vaega ki se olaga matagā. Fakamuli ifo, ne kamata o takalialia a ia ki te vaegā olaga matagā ne ola a ia i ei. Ne kamata o fiakai, manatu ki tena kāiga, kae ne fakaiku aka i tena mafaufau—me ka foki atu a ia ki te fale! I te taimi koi ‵mao eiloa a ia, ne lavea a ia ne tena tamana, tele atu, ‵sai kae sogi atu ki tou tagata, kae ne lasi ‵ki eiloa tena fiafia. A te mafaufau ki te tala fakatusa tenei e mafai o fakamalosi aka ei se tino ne tapeapea atu keatea ke toe foki mai ki te lafu. Ona ko te mea ko pili o fakaseai atu te olaga masei tenei, e ‵tau mo ia o ‘foki fakavave mai ki te fale.’
15. Kaia ne tapea‵pea atu ei keatea a nisi tino mai te fakapotopotoga?
15 A te tokoukega o tino ne tapea‵pea atu keatea mai te fakapotopotoga e se fai loa pelā mo te tama fakamaumau mea. E tapea‵pea malie atu eiloa keatea a nisi tino, e pelā mo te poti telā e tapeapea malie atu mai te matāfaga. Ko taotaomaki atu ki nisi tino a te manavase ki mea o te olaga nei telā ko se toe fia ‵saga atu latou ki mea faka-te-agaga. Kae e talia ne nisi tino ke fakavāivāi latou ne se tino i te fakapotopotoga, io me ko olo atu latou keatea ona ko te sē lotoma‵lie ki se akoakoga faka-te-Tusi Tapu. Ne kamata o aofia a nāi tino i amioga kolā e ‵teke atu ki ei te Tusi Tapu. Kae ko manatu fesoasoani kolā e tuku mai e uiga ki tulaga takitasi konei e mafai o fesoasoani atu ki a koe i au taumafaiga ke fakamalosi atu ki tino kolā ne tiakina ne latou te lafu ona ko pogai konei io me ko nisi pogai aka foki, ko te mea ke ‵foki fakavave mai latou a koi tuai o to talimuli ‵ki.
“Mālō, Taku Tama!”
16-18. (a) Ne fesoasoani atu pefea se toeaina ki se taina telā ne mate faka-te-agaga i tausaga e uke? (e) Kaia ne mate faka-te-agaga ei te taina tenei, ne fesoasoani atu pefea ki tou tagata, kae ne saga atu pefea te fakapotopotoga ki a ia?
16 E fai mai se toeaina Kelisiano: “E fia‵fia malosi te motou potukau toeaina ke āsi atu ki tino kolā ko ‵mate faka-te-agaga. Ne mafaufau au ki se taina telā ne suke‵suke tasi maua kae ne fesoasoani atu au ke iloa ‵lei ne ia te munatonu. Ne mate faka-te-agaga tou tagata i tausaga e 25 kae ne fepaki eiloa a ia mo se tulaga faigata ‵ki, telā ne fakamatala atu ne au te auala e mafai o fesoasoani atu ki a ia a akoakoga faka-te-agaga mai te Tusi Tapu. Mai tua malie ifo, ne kamata o fanatu tou tagata ki te Kingdom Hall kae ne talia ne ia se akoga faka-te-Tusi Tapu ke fesoasoani atu o fakamalosi aka tena fakaikuga ke foki mai ki te lafu.”
17 Kaia ne mate faka-te-agaga ei te taina tenei? E taku ‵tonu mai a ia: “Ne kamata o saga malosi atu au ki mea faka-te-lalolagi i lō mea faka-te-agaga. Ne fakagata ei ne au aku sukesukega, te kau atu ki te galuega talai, mo fakatasiga foki. Ne iloa aka ei ne au me ko se toe fai au mo fai se vaega o te fakapotopotoga Kelisiano. Kae ne maua ne au te fesoasoani ke toe foki atu ona ko te saga tonu mai mo te fiafia o te toeaina tenā.” Ne kamata o feoloolo a fakalavelave o te taina tenei mai tua o te taliaga ne ia se akoga faka-te-Tusi Tapu. Ana muna, “Ne iloa aka ne au me i te mea telā ne galo i toku olaga ko te alofa mo te takitakiga a Ieova mo tena fakapotopotoga.”
18 Ne saga atu pefea a te fakapotopotoga ki te taina tenei? Ana muna: “Ne mafaufau au me e ‵pau au mo te tama fakamāumāu mea telā ne faipati ki ei a Iesu Keliso. E tonu, ne fai mai ki a au se tokotasi o tuagane lomatua tela ne nofo atu i konā i te 30 tausaga ko ‵teka kae koi tavini atu eiloa mo te fakamaoni ki a Ieova, ‘Mālō, taku Tama!’ Ne otia malosi toku loto i ei. Ne lagona ifo ne au me ko nofo atu eiloa au i te koga telā e ‵tau o nofo au i ei. Kae e fia fakaasi atu eiloa ne au toku loto fakafetai tonu mō te alofa, mataalofa, kufaki, mo te fiafia telā ne fakaasi mai ki a au ne te toeaina tenā mo te fakapotopotoga kātoa. Ne fesoasoani tonu mai eiloa te lotou a‵lofa ki a Ieova mo tuakoi ke toe foki mai au ki te lafu.”
Fakamalosi Atu ke na Gasue‵sue Eiloa Nei!
19, 20. E mafai pefea o fakamalosi atu koe ki tino ‵mate faka-te-agaga ke toe ‵foki fakavave mai ki te lafu kae e mafai pefea o fakaasi atu ne koe me e se fakamoemoe te Atua ke fai ne tatou a mea kolā e se mafai ne tatou o fai?
19 Ko ola nei tatou i aso fakaoti, kae ko pili ‵ki mai eiloa te gataga o te olaga masei tenei. Tela la, fakamalosi atu ki tino ‵mate faka-te-agaga ke na ‵kau mai ki fakatasiga Kelisiano. Fakamalosi atu ke kamata o ‵kau fakavave mai. Fakamasaua atu me e taumafai a Satani ke fakamasei te lotou fesokotakiga mo te Atua kae fai foki ei ke mafau‵fau latou me kafai e tiakina ne latou te tapuakiga tonu ka fakamāmā aka ei olotou amoga i te olaga. Ke fakatalitonu atu ki a latou me e mafai o maua ne latou te fiafia tonu mai te fai fua mo fai ne soko fakamaoni o Iesu.—Faitau te Mataio 11:28-30.
20 Fakamasaua atu ki tino ‵mate faka-te-agaga me e fakamoemoe a te Atua ke fai fua te mea e mafai ne tatou o fai. I te taimi ne taku fakamasei ei a te tuagane o Lasalo ko Malia mō te ‵ligi atu ne ia o te sausau ‵togi ‵mafa ki te ulu o Iesu mai mua malie eiloa o tena mate, ne fai atu Iesu: “Sa fakalavelave ki a ia! . . . Ko fai ne ia te mea e mafai ne ia o fai.” (Maleko 14:6-8) Ne tavae ne Iesu te fafine mativa ko mate tena avaga telā ne tuku atu ne ia se tamā meaalofa foliki i te faletapu. Ne fai foki ne ia te mea e mafai ne ia o fai. (Luka 21:1-4) A te tokoukega o tatou e mafai o ‵kau atu ki fakatasiga Kelisiano mo te galuega talai o te Malo. Fakatasi mo te fesoasoani o Ieova, ka mafai eiloa ne tino tokouke kolā koi ‵mate faka-te-agaga nei o fai foki penā.
21, 22. Ne a mea e mafai o fakatalitonu atu ki tino kolā ko toe ‵foki mai ki a Ieova?
21 Kafai e mataku se mamoe fakatusa telā ne galo atu mai te lafu ke toe foki atu ki ana taina, ke fakamasaua atu te fiafia ne maua i te taimi ne toe foki atu ei te tama fakamaumau mea ki te fale. E maua foki eiloa te fiafia māfai ko toe ‵foki mai a tino penā ki te fakapotopotoga. Fakamalosi atu ki a latou ke na gasue‵sue nei o ‵teke atu te Tiapolo kae ke fakapilipili atu ki te Atua.—Iakopo 4:7, 8.
22 E faka‵tali mai eiloa te fiafia ki tino kolā e toe ‵foki atu ki a Ieova. (Tagiga a Ielemia 3:40) E seai eiloa se fakalotolotolua me ne maua ne latou te fiafia lasi i te taimi ne tavini atu ei latou ki te Atua i aso ko ‵teka. E uke atu foki a fakamanuiaga i aso mai mua mō tino kolā e toe ‵foki fakavave mai ki te lafu!
Ka Tali Mai Pefea ne Koe?
• E mafai pefea o fesoasoani atu koe ki se Kelisiano telā ne fakavāivāi kae ko mate faka-te-agaga?
• Ne a auala e mafai o fesoasoani atu ki se tino telā ne tiakina ne ia te lafu a te Atua ona ko tena kilokiloga ki se akoakoga?
• E mafai pefea o fesoasoani atu ki se tino telā e mataku ma toe foki mai ki te fakapotopotoga?
[Fakamatalaga o te Ata i te itulau e 16]
Fakalogologo faka‵lei i te taimi e fakaasi mai ei ne se tino talitonu telā ko mate faka-te-agaga a mea katoa i tena loto
[Fakamatalaga o te Ata i te itulau e 18]
A te mafaufau ki te tala fakatusa a Iesu e uiga ki te tama fakamaumau mea e mafai o fakamalosi atu ki nisi tino ke toe ‵foki mai ki te lafu