E Mafai o Fakamalosi ne Koe se Kelisiano ko Mate Faka-te-Agaga

I te Aso Lua, i a Apelila 11, ka ‵kau mai ki te Fakamanatuga a Kelisiano ko ‵mate faka-te-agaga. Ne kamata o ‵tele atu latou i te fakatau‵telega kae ne kamata o ‵tele malielie ona ko pogai kese‵kese, kae e taku mai a nisi pogai i te polosiua Toe Foki Mai ki a Ieova. (Epe 12:⁠1) Kae koi tāua eiloa a tino ‵mate faka-te-agaga ki a Ieova, kolā ne ‵togi ne ia ki te toto o tena Tama. (Ga 20:28; 1Pe 1:18, 19) E fesoasoani atu pefea tatou ki a latou ke toe ‵foki mai ki te fakapotopotoga?

E taumafai a toeaina Kelisiano ke ‵sala kae fesoasoani atu ki Kelisiano ko ‵mate faka-te-agaga e pelā eiloa mo se tausi mamoe telā e ‵sala malosi atu ki mamoe ko ‵galo mai te lafu. (Lu 15:4-7) E fakaata mai i te mea tenei a te alofa atafai o Ieova. (Ie 23:3, 4) E mafai ne tatou katoa, kae e se ko toeaina fua, o fakamalosi atu ki vaegā tino penā. A ‵tou taumafaiga ke fakaasi atu te atafai mo te alofa fakataina ne mea fakafiafia ki a Ieova kae maua foki se lagonaga fiafia i ei. (Fat 19:17; Ga 20:35) Tela la, mafaufau ki se tino e mafai o fakamalosi koe ki ei, kae ke na fai eiloa penā e aunoa mo te fakatalave!

ONOONO KI TE VITIO FAKAMALOSI ATU KI TINO KO ‵MATE I TE FEITU FAKA-TE-AGAGA, KO MAFAU‵FAU EI KI FESILI KONEI:

• Se a te mea muamua ne fai ne Abbey i te taimi ne fetaui ei a ia mo se Molimau telā e se iloa ne ia?

• Kaia e ‵tau ei o fakailoa ne tatou ki toeaina māfai ko mafau‵fau tatou o fesoasoani atu ki se tino ko mate faka-te-agaga?

• Ne fakatoka pefea a Abbey ke asi atu ki a Laura i te lua o taimi?

• Ne fakaasi atu pefea ne Abbey tena loto mau, kufaki, mo te alofa i te taumafai o fesoasoani atu ki a Laura?

• Ne a mea e mafai o tauloto ne tatou mai te tala fakatusa a Iesu i te Luka 15:8-10?

• Ne a fakamanuiaga ne iku mai ona ko te fakatau fesoasoani atu ki a Laura?