Iesu​—Te ‵Toe Fakaakokoga ‵Lei Ke Tau ‵Tali Ki Ei

E MATA, e fia fai koe mo fai se tino tai ‵lei kae fiafia ‵ki? E fakamatala mai ne te apositolo ko Petelu a te auala e mafai ei o fai tatou penā. E tusi mai a ia: “I te mea i a Keliso ne puapuagatia mō koutou, kae tuku atu foki ne ia ki a koutou te fakaakoakoga, ke tau‵tali ei koutou i ona kalafaga.” (1 Petelu 2:​21) A te ‵tonuga loa, ona ko te mea ne ola a ia i se olaga fakaofoofogia, ne uke ‵ki a mea ne fai ne Iesu Keliso i tena olaga kolā e mafai o fakaakoako tatou ki ei. Mai i te tauloto e uiga ki a Iesu kae fakaakoako atu ki tena vaegā olaga, e mautinoa eiloa me e mafai o momea aka i ei te fai o tatou mo fai ne tino ‵lei kae fia‵fia. Ke na onoono faka‵lei nei tatou ki nisi uiga kolā ne maua ne te tagata sili tenei kae ke iloa te auala e mafai ei o maua ne tatou a mea aoga mai tena fakaakoakoga.

Ne paleni ‵lei te olaga o Iesu. E tiga eiloa ne fai mai a Iesu me “e seai se koga mo ona fakatapū,” ne seki fakamalosi aka io me ne ola a ia i se olaga fakataputapu kae faigata. (Mataio 8:​20) Ne kau atu a ia ki ‵kaiga. (Luka 5:​29) E fakaasi mai i te vavega muamua ne fai ne ia​—te ‵fuliga o vai ki te uaina ‵lei i te ‵kaiga o te fakaipoipoga​—me ne seki ‵kalo keatea a ia mai tino io me ne ola a ia i se olaga fakataputapu kae faigata. (Ioane 2:​1-​11) Kae ne fakaasi manino mai ne Iesu a te ‵toe mea tāua ki a ia. Ana muna: “A taku mea‵kai, ko te fai ne au a te loto o ia telā ne uga mai ne ia au, kae o fakapalele foki a te galuega ne tuku mai ne ia ki a au ke fai.”​—Ioane 4:​34.

□ Kai iloilo aka eiloa ne koe tou olaga ke lavea aka me e mafai o fakapaleni faka‵lei ou fakamoemoega i te feitu faka-te-foitino mo te feitu faka-te-agaga?

Ne faigofie ke olo atu ki a Iesu. E fakaata mai i te Tusi Tapu a Iesu e pelā me se tagata telā e atafai kae mata fiafia. Ne seki kaitaua a ia māfai ko olo atu a tino mo fakalavelave io me ne fesili faiga‵ta. I te taimi e tasi ne ualolo atu ei a te vaitino ki a ia, ne patele atu ki tena gatu se fafine telā ne logo‵mae i se masaki i tausaga e 12 mo te fakamoemoega ke ‵lei a ia. Ne seki ‵teke atu ne ia tou fafine ona ko te foliga mai me ne seki āva a ia kae ne muna atu tou tagata mo te atafai: “Taku tama, ko tou fakatuanaki ko ola ei koe.” (Maleko 5:​25-​34) Ne fia‵fia foki a tama‵liki ke olo atu ki a ia, e aunoa mo te ma‵taku me ka se fia saga atu a ia ki a latou. (Maleko 10:​13-​16) Ne aofia eiloa i ana faifaiga ki ana soko a sau‵talaga ‵gali mo latou. Ne seki fakalotolotolua latou i te lotou fakapili‵pili atu ki a ia.​—Maleko 6:​30-​32.

□ E pefea te faigofie ki nisi tino ke olo atu ki a koe?

Ne loto malamalama kae alofa atafai a ia. E tasi o uiga tafasili i te gali o Iesu ko tena atamai ke mafaufau ki tulaga o nisi tino, ke maua te loto malamalama i olotou lagonaga, kae ke fesoasoani atu ki a latou. E fai mai te apositolo ko Ioane me i te taimi ne lavea atu ei ne Iesu i a Malia ko tagi i te mate o tena tuagane, ko Lasalo, “ne lagona ei ne Iesu te ‵mae o tona loto, mo te fi‵ta o tona mafaufau” kae ne “tagi Iesu.” Ne mafai eiloa o laveagofie ne tino maimoa a te lasi o te alofa o Iesu ki te kāiga tenā, se lagonaga telā ne seki mā tou tagata ke fakaasi faka‵sau atu. Kae ko se faka‵tau foki eiloa i te lasi o tena alofa atafai ne fakaasi atu i te taimi ne toe fakaola mai ei ne ia tena taugasoa!​—Ioane 11:​33-​44.

I te suā taimi, e isi se tagata ne logo‵mae i te masaki ko te lepela​—se masaki fakatakalialia telā ne fai ei ke ‵vae keatea a ia mai tino​—ne fakamolemole atu ki a Iesu: “Te Aliki, kafai e loto koe ki ei, e mafai ne koe o faka‵lei toku masaki.” Ne fakamalosi loto eiloa te auala ne saga atu ei a Iesu: “Ne ‵kapa atu a te lima o Iesu o fakapatele ki a ia, kae fai atu, ‘Au e loto ki ei, ke ‵lei koe!’” (Mataio 8:​2, 3) Ne seki faka‵lei fua ne Iesu a masaki o tino ko te mea ke fakataunu ei a te valoaga. Ne manako eiloa tou tagata ke fakaseai atu te lotou fanoa‵noa. Ne takitakigina a mea katoa ne fai ne ia ki tena toe tugapati lauiloa: “Pelā mo te mea e ma‵nako koutou ke fai atu ne nisi tino ki a koutou, ke fai foki eiloa ne koutou penā ki a latou.”​—Luka 6:​31.

□ E mata, e mafai o lavea atu tou alofa atafai ki nisi tino i au faifaiga?

Ne malamalama kae poto a Iesu. E tiga eiloa ne seki fai ne ia se mea ‵se, ne seki fakamoemoe eiloa Iesu ke ‵lei katoatoa a nisi tino io me mafaufau me e ‵lei atu a ia i nisi tino; kae ne seki gasuesue foki a ia e aunoa mo te malamalama. I te taimi e tasi, ne fakaasi atu ne se fafine, telā ne lauiloa ‘i te fa‵kai tenā, me ne ola a ia i se olaga finalalolagi,’ a te fakatuanaki mo te loto fakafetai mai te ‵fuluga ne ia o vae o Iesu ki ana loimata. Ne talia ne Iesu ke fai ne tou fafine te mea tenā, telā ne ofo malosi ei te tino ne ‵kami ne ia Iesu kae taku fakamasei ne ia te fafine tenā. Ne malamalama Iesu i te loto fakamaoni o te fafine, ne seki taku fakamasei ne ia tou fafine ona ko ana agasala. I lō te fai penā, ne fai atu tou tagata: “Ko ola koe i tou fakatuanaki; fano la mo te manuia.” Kāti ne iku atu eiloa te atafai o Iesu ki te tiakinaga ne te fafine tenā a tena olaga fai agasala mua.​—Luka 7:​37-​50.

□ E mata, e lauiloa koe i te vave o fakamālō kae tuai o fakamasei atu?

Ne āva kae ne seki fakailoga tino a ia. Ona ko te ‵pau o lā uiga kae kāiga foki laua i te feitu faka-te-foitino, kāti tenā te pogai ne alofa fakapito ei a Iesu ki tena soko ko Ioane.a E tiga eiloa te feitu tenā, ne seki fakaasi atu ne ia te fakailoga tino, io me ko te fapito ki tou tagata i lō nisi soko. (Ioane 13:23) E tonu, i te taimi ne akai atu ei a Ioane mo tena taina ko Iakopo ki ne tulaga taulia i te Malo o te Atua, ne tali atu Iesu: “Kae e seai la saku pule ki te ‵tofiga me ko oi ka nofo i toku feitu fakaatamai mo toku feitu fakamaui.”​—Maleko 10:​35-40.

Ne fakaasi atu faeloa ne Iesu te āva ki nisi tino. Ne seki fakaasi atu ne ia a uiga fakailoga tino faitalia me ne fai penā a nisi tino i ana tafa. E pelā mo te kilokiloga me e tāua atu faeloa a tagata i fafine. Kae ne fakaasi atu eiloa ne Iesu te āva ‵tau ki fafine. Ne fakaasi atu ne ia i te taimi muamua tena tulaga pelā me ko te Mesia, ki se fafine telā e sē se tino Iutaia kae se Samalia, telā ne ‵kilo fakatakalialia ki ei te kau Iutaia, kae e se mafai eiloa o fakatalofa atu ki tou fafine. (Ioane 4:​7-​26) Kae ne tuku atu ne Iesu te tauliaga ki fafine ke fai mo molimau muamua ki tena toetu.​—Mataio 28:​9, 10.

□ E a, e se fakailoga tino koe i au faifaiga ki tino mai telega, ‵gana, fenua kese‵kese, se tagata io me se fafine?

Se tama mo se taina telā e fakamaoni ki ana tiute. E foliga mai me ne mate atu te tamana fai o Iesu, ko Iosefa, i te taimi koi talavou ei a Iesu. Kāti ne fesoasoani atu eiloa a Iesu i mea tau tupe ki tena mātua mo ana taina mo tuagane fo‵liki mai te galue e pelā me se kamuta. (Maleko 6:3) I toe taimi fakaotioti o tena olaga, ne tuku atu ne ia tena mātua ke tausi ne tena soko ko Ioane.​—Ioane 19:​26, 27.

□ E mafai o fakaakoako atu koe ki a Iesu i te fakataunuga o ou tiute faka-te-kāiga?

Ne fai a Iesu mo fai se taugasoa tonu. E pelā me se taugasoa, ne tu ‵kese eiloa Iesu. E pefea la? Ne seki ‵teke atu a ia ki ana taugasoa ona ko te mea ne fai ne latou a mea ‵se, ke oko foki loa ki mea ‵se kolā ne fai ‵soko. Ne seki fai faeloa ne ana soko a mea e ‵tusa mo te mea e manako a ia ki ei. Kae ne fakamaoni atu ne tou tagata me koi fai eiloa a ia mo fai te lotou taugasoa mai te saga tonu atu ki olotou uiga ‵lei i lō te mafaufau fua ki olotou lagonaga ma‵sei. (Maleko 9:​33-​35; Luka 22:​24-​27) E tiga eiloa e se faimālō atu ana manatu, ne ‵kami ne ia latou ke fakaasi ‵tonu mai olotou lagonaga.​—Mataio 16:​13-​15.

E sili atu i mea katoa, ne alofa Iesu ki ana taugasoa. (Ioane 13:1) E pefea te lasi o tena alofa? Ana muna: “A te alofa tafasili e ‵tau o fakaasi ne te tino, ko te tuku atu o tona ola e sui ei a ola o ona taugasoa.” (Ioane 15:13) E mata, e isi aka foki se tino e mafai o tuku atu ne ia se mea e sili atu i te tāua i lō tena ola?

□ E mata, e tumau eiloa koe i te fai mo fai se taugasoa faitalia me e fakaitaita io me fakafanoanoa atu nisi tino ki a koe?

Ne loto toa kae matua tena mafaufau. Ne ‵kese ‵ki eiloa Iesu mai i te tino vāivāi kae ‵seva telā e ‵lomi sāle ne tino ‵lomi ata. E fakamatala mai i tusi Evagelia me i a ia se tagata malosi kae loto finafinau. Ne ‵tuli fakalua ne Iesu a tino faipisinisi, mo olotou mea ‵togi mai te faletapu. (Maleko 11:​15-​17; Ioane 2:​14-​17) I te taimi ne olo atu ei se vaitino o puke fakapagota a “Iesu te Nasaleta,” ne tu atu Iesu mo te loto toa ke fakailoa atu me ko ia eiloa tenā kae ke puipui foki ana soko, mai te fai atu mo te mautinoa: “Ko au tenei; tela la, kafai e ‵sala mai koutou ki a au, tuku atu tino konei ke olo.” (Ioane 18:​4-9) E se tioa eiloa o fai atu a Ponotio Pilato i te taimi ne lavea ei ne ia te loto toa o Iesu i te taimi ne puke fakapagota ei mo faifaiga ma‵sei ne fai ki a ia: “Kilo mai! Tenei te tagata!”​—Ioane 19:​4, 5.

□ E mata, e gasuesue koe i se auala mautinoa mo te loto toa māfai e iloa ne koe a mea e ‵tau o fai ne koe?

A uiga konei mo nisi uiga tu ‵kese e fai ei a Iesu mo fai te fakaakoakoga ‵lei katoatoa mō tatou. Kafai e talia ne tatou ke fakaakoako atu ki ana uiga, ka momea aka te ‵tou fai mo fai ne tino ‵lei kae fia‵fia. Ko te pogai eiloa tenei ne fakamalosi atu ei te apositolo ko Petelu ki Kelisiano ke tau‵tali fakapili‵pili atu ki kalafaga o Iesu. E a, e taumafai koe o tautali fakapilipili atu ki kalafaga o Iesu?

E se Fai Fua Pelā me se Fakaakoakoga ‵Lei ke Tau‵tali ki ei

Kae e se fai fua Iesu e pelā me se fakaakoakoga ‵lei ke tau‵tali ki ei. Ana muna: “Ko au te auala, te munatonu mo te ola. E seai se tino e fanatu ki te Tamana manafai e se alatu mai i a au.” (Ioane 14:6) I tafa o te fakailoa atu ne ia o te munatonu e uiga ki te Atua, ne ‵tala ne ia te auala ke fakapilipili atu ki a Ia, ne fai ne Iesu ke mafai ne tino fakamaoni o maua te ola.​—Ioane 3:​16.

Ne faipati mai a Iesu e uiga ki te mea tenei i te taimi ne fakaasi mai ei ne ia te pogai o tena vau ki te lalolagi: “E pelā mo te Tama a te Tagata, e seki vau au ke tavini mai a tino ki a au, kae ke tavini atu au; ke tuku atu foki a toku ola mō tino e tokouke.” (Mataio 20:28) Mai te tukuatuga o tena ola e pelā me se taulaga, ne fakatakato ei ne Iesu te fakavae mō tino ke maua te ola se-gata-mai. Ne a mea e ‵tau o fai ne tatou ke maua ei a mea aogā mai te fakatokaga tenā? Ne fakamatala mai ne Iesu: “Tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.”​—Ioane 17:3.

E tonu, a te taumafai ke iloa ‵lei ne tatou a Iesu, te fakakoako atu ki tena vaegā olaga, mo te fakaasi atu o te fakatuanaki ki tena mate pelā me se taulaga, ko mea kolā e ‵tau o fai ke maua ei te ola se-gata-mai. E ‵kami ne matou koe ke fakaavanoa se taimi ke sukesuke ki te tusi e maua ei te vaegā poto tenā, ko te Tusi Tapu, kae taumafai ke fakagalue aka a pati i ei, e pelā mo te mea ne fai ne Iesu.b

E akoako mai i te olaga o Iesu a uiga e ‵tau o fakaasi atu ne tatou. A tena mate pelā me se taulaga e mafai o fakasaoloto ei tatou mai te agasala mo te ‵togi o te agasala, ko te mate. (Loma 6:​23) E mafai eiloa o fakafanoanoa ‵tou olaga e aunoa mo te fakaakoakoga aoga a Iesu Keliso! Ke mo a eiloa ma talia ne tatou so se mea mo te manavase ki mea o te olaga ke ave keatea ei a te avanoaga ke mafau‵fau kae tau‵tali fakapili‵pili atu ki te fakaakoakoga a te ‵toe tagata sili telā ne ola​—ko Iesu Keliso.

[Fakamatalaga mai lalo]

[Pokisi/​Ata i te itulau e 7]

◼ Ne āva kae ne seki fakailoga tino a Iesu ki tino katoa

◼ Ne fai a ia mo taugasoa tonu ke oko ki te fakaotiga

◼ Ne loto toa a ia

E mata, e taumafai koe o tautali fakapilipili atu ki kalafaga o Iesu?

[Ata i te itulau e 5]

Ne paleni ‵lei a Iesu. . .

. .  faigofie ke olo atu ki ei a tino

. .  kae alofa atafai