Ke Maua te Fiafia i te Galuega ko te Faiga o Soko

“Olo atu koutou ki fenua katoa ke fai a tino i ei mo oku soko”​—MATAIO 28:⁠19.

1-3. (a) Ne a lagonaga o tino e tokouke e uiga ki te faiga o akoga faka-te-Tusi Tapu? (e) Ne a fesili ka sau‵tala tatou ki ei?

KO SILIA nei mo te 11 vaiaso ne fai ei ne au se akoga mo se kāiga mai Pakistan,” ko pati i te tusi a se tuagane e kau atu ki te potukau telā e fai‵pati ki te ‵gana Initia i te Iunaite Sitete. “E pelā eiloa mo te masani,” ko pati a tou fafine, “ko fai nei matou e pelā me ne taugasoa. E sofi sāle ifo oku loimata māfai e mafaufau au ki te taimi telā ka pili ei o ‵foki atu te kāiga tenei ki Pakistan. E se sofi fua oku loimata ona ko te mea ka ‵galo atu latou konei kae ona foki ko te fiafia ne maua ne au i te taimi ne akoako ei ne au latou e uiga ki a Ieova.”

² E pelā mo te tuagane tenei, e mata, ko oti ne maua ne koe te fiafia i te faiga o se akoga faka-te-Tusi Tapu mo se tino? Ne fia‵fia malosi eiloa a Iesu mo ana soko i te galuega ko te faiga o soko. I te taimi ne ‵foki mai ei a soko o Iesu e toko 70 kolā ne akoako ne ia mo se lipoti fakafiafia, ne faka‵fonu a Iesu ne te “agaga tapu ki te fiafia.” (Luka 10:​17-​21) E penā foki i aso nei, e fia‵fia eiloa a tino e tokouke i aso nei i te galuega ko te faiga o soko. Ne lavea atu te ‵tonu o te mea tenei i te 2007, me ne fai ne tino talai loto fia‵fia kae ga‵lue malosi a akoga faka-te-Tusi Tapu e sili atu i te ono mo te āfa  miliona i masina takitasi!

³ Kae ne seki maua ne nisi tino talai a te fiafia telā e maua i te faiga o se akoga faka-te-Tusi Tapu. Kāti ne seki fai aka eiloa ne nisi tino se akoga i tausaga fakamuli nei. Ne a mea faiga‵ta kāti ka fe‵paki mo tatou i ‵tou taumafaiga ke kamata se akoga faka-te-Tusi Tapu? E mafai pefea o manumalo tatou i vaegā tulaga faiga‵ta penā? Kae ne a fakamanuiaga e maua ne tatou māfai e fai ne tatou te ‵toe mea e mafai o fai ke faka‵logo ki te fakatonuga a Iesu: “Olo atu koutou ki fenua katoa ke fai a tino i ei mo oku soko”?​—Mataio 28:⁠19.

Mea Faiga‵ta Kolā e Mafai o Galo i ei te ‵Tou Fiafia

4, 5. (a) E ‵saga mai pefea a tino e tokouke i nisi koga o te lalolagi ki te galuega talai? (e) Ne a mea faiga‵ta e fe‵paki mo tino talai i nisi koga?

⁴ I koga kese‵kese o te lalolagi, e talia mo te fia‵fia ne tino ke fai‵tau ki ‵tou tusi kae fia‵fia malosi foki ke fai olotou akoga faka-te-Tusi Tapu fakatasi mo tatou. Ne tusi mai se tauavaga Ausetalia kolā ne ga‵lue se tumau i Zambia penei: “E ‵tonu eiloa a tala. A Zambia se koga e gali ‵ki i te talai. Ko tafaga foki la te gali a te talai i tafa o auala! E aumai ‵tonu eiloa a tino ki a matou, kae e ma‵nako eiloa a nisi tino ki ‵lomiga fakapito o ‵tou mekesini.” I se tausaga fakamuli fua nei, ne fai ne taina mo tuagane i Zambia a akoga faka-te-Tusi Tapu e silia atu i te 200,000​—⁠ko tena uiga e sili atu i te tasi o akoga faka-te-Tusi Tapu e fai ne se tino talai e tokotasi.

⁵ I nisi koga, e tai faigata eiloa ke tufa atu ne tino talai a tusi e pelā foki mo te fai faeloa o akoga faka-te-Tusi Tapu. Kaia? Me e masani o seai ne tino i fale, kae kafai e isi e se fia‵fia a tino konā ki mea fakalotu. Kāti ne ‵tupu aka a tino konā i kāiga kolā e se fia‵fia ki mea fakalotu io me ‵teke atu ona ko te mea e matea ne latou a te uke o amioga fakaloiloi e fai i lotu ‵se. E tokouke a tino ko pakia‵kia masei i te feitu faka-te-agaga​—⁠ko pa‵ka latou ona ko te se tausi faka‵lei ne tausi mamoe ‵loi. (Mataio 9:​36) E malamalama tatou, me i vaegā tino penā e mafai o fakaeteete i te aofia o latou i sau‵talaga faka-te-Tusi Tapu.

6. Ne a tapula e fepaki mo ki nisi tino talai?

⁶ E fe‵paki a nisi tino talai fakamaoni mo mea faiga‵ta tai ‵kese kolā e mafai o fai ei ke galo atu te lotou fia‵fia. E tiga eiloa ne loto finafinau latou i se vaitaimi ki te galuega ko te faiga o soko, kae ko se mafai nei ne latou o fai penā ona ko te masaki io me ko te tulaga matua. Ke mafaufau foki la ki nisi tapula kolā e mafai o oko mai ki a tatou. E pelā me se fakaakoakoga, e mata, e mafaufau koe me e se mafai ne koe o fai se akoga faka-te-Tusi Tapu? Kāti e tai ‵pau loa ou lagonaga mo Mose i te taimi ne fakatonu atu ei a Ieova ki a ia ke faipati ki a Falao. Ne fai atu a Mose: “Te Aliki, sa ugagina au. I te taimi ne kamata ei koe o faipati mai ki a au ke oko ki te taimi nei, e seki lagona eiloa ne au se mafuliga ki taku faipati. Taku faipati e se ‵lei kae tuai.” (Esoto 4:​10) E tai ‵pau mo lagonaga konā, ko te manavase māfai e se taunu te fakamoemoega. E manava‵se tatou māfai e se mafai o fai se tino e pelā me se soko ona ko tatou e se ne faiakoga apo. A te ‵tou manavase ki te mea tenā, ka fai i ei ke fakaseke keatea tatou mo te avanoaga ke fai se akoga faka-te-Tusi Tapu. E mafai pefea o fakafesagai atu tatou ki vaegā tulaga penei?

Fakatoka ‵Tou Loto

7. Se a te mea ne fakamalosi atu ki a Iesu i tena taviniga?

⁷ A te mea muamua ko te fakatoka o ‵tou loto. Ne fai mai a Iesu: “A te gutu o te tino e faipati mai i ei a mea kolā e ‵fonu i tona loto.” (Luka 6:​45) Ne loto finafinau malosi a Iesu i tena taviniga ona ko tena fiafia mo tena saga tonu atu ki te ‵lei o nisi tino. E pelā me se fakaakoakoga, i te taimi ne lavea atu ei ne ia te tulaga fakaalofa i te feitu faka-te-agaga o tino Iutaia, “ne tupu ake ei tona loto alofa mō latou.” Ne fai atu a ia ki ana soko: “Ko oko eiloa te lasi o te saito e fia ‵kati, . . . fakatagi atu ki te tino e a ia te fatoaga ke uga mai se kau faigaluega!”​—⁠Mataio 9:​36-​38.

8. (a) Ne a mea e ‵tau mo tatou o mafau‵fau faka‵lei ki ei? (e) Ne a mea e mafai o tauloto ne tatou mai pati a se tino telā e fai sena akoga faka-te-Tusi Tapu?

⁸ I te faiga o te galuega ko te faiga o soko, se mea ‵lei ke mafau‵fau tatou ki mea aoga e uke ne maua ne tatou ona ko te tino telā ne fakaaoga ne ia ana taimi ke fai ne ia ‵tou akoga faka-te-Tusi Tapu. Ke mafau‵fau foki ki tino kolā ka fetaui mo tatou i te galuega talai mo mea aoga ka maua ne latou māfai e fakalogo‵logo ki te fekau telā e folafola atu ne tatou. Ne tusi atu se fafine ki te ofisa lagolago i te fenua e nofo ei a ia, penei: “E fia fakaasi atu ne au a te lasi o toku loto fakafetai ki Molimau kolā e fai ne lāua taku akoga i toku fale. E iloa ne au me i nisi taimi kāti ko ‵fiu laua i a au ona ko te uke o aku fesili kae fakalevaleva foki ne au te lā ‵nofo mai. Kae e kufaki eiloa lāua kae e fia‵fia o fakaasi mai a lā mea ne tauloto. E fakafetai au ki a Ieova mo Iesu me ne fetaui au mo tino konei i toku olaga.”

9. Se a te mea ne saga tonu atu ki ei a Iesu, kae e mafai pefea ne tatou o fakaakoako atu ki a ia?

⁹ E tonu, e se ko tino katoa ne ‵saga atu ki taumafaiga a Iesu o fesoasoani atu ki a latou. (Mataio 23:37) Ne tau‵tali atu a nisi tino i a ia mō se vaitaimi kae oti aka ko ‵teke atu ei ki ana akoakoga kae “ko se tau‵tali foki i a ia.” (Ioane 6:​66) E se gata i ei, ne seki talia ne Iesu a te se fia ‵saga mai o nisi tino ke mafaufau a ia me e se tāua tena fekau. E tiga eiloa e se uke a fuataga o ana fuaga ne ‵toki, ne saga tonu atu eiloa a Iesu ki mea ‵lei kolā ne fai ne ia. Ne matea ne ia me ko ma‵tua ‵lei te fatoaga kae ne maua ne ia te fiafia lasi mai te fesoasoani atu ki te ‵katiga o saito. (Faitau te Ioane 4:​35, 36.) I lō te ‵kilo atu fua ki te laukele sē ola ‵lei i te vā o saito kolā ne ‵toki, e mata, e se ‵tau o ‵saga tonu atu tatou ki mea ‵lei kolā e mafai ne tatou o maua mai ‵tou koga talai? Ke onoono aka tatou me mafai pefea o fakatumau ne tatou se vaegā kilokiloga ‵lei penā.

Talai mo te Fakamoemoega ke Kamata se Akoga Faka-te-Tusi Tapu

10, 11. Ne a mea e mafai ne koe o fai ke fakatumau ei tou fiafia?

¹⁰ E ‵toki ne te tino fai fatoaga a fuaga mo te fakamoemoega ke tau foki ne ia a fuataga o ana mea ne ‵toki. I se auala tai ‵pau, e ‵tau mo tatou o talai mo te fakamoemoega ke kamata se akoga faka-te-Tusi Tapu. Kae pefea la, māfai e kau faeloa koe ki te galuega talai kae e se tokouke a tino e maua i fale io me faigata o toe asi atu ki a latou? E mafai loa o faka‵tuka mai a vaegā mea penei. E mata, ka se toe fia kau atu koe ki te galuega talai mai fale ki fale? E se penā loa! E mafai eiloa o fesokotaki muamua atu tatou ki tino e auala i te talai atu mai fale ki fale se faifaiga masani o te galuega talai telā e magoi ‵ki.

¹¹ Ke fakatumau tou fiafia, e mata, e mafai ne koe o fakaaoga a vaegā auala kese‵kese ke talai atu, kāti ke aofia i ei a auala kolā e mafai ei ne koe o oko atu ki tino? E pelā me se fakaakoakoga, e mata, ko oti ne taumafai koe o talai atu ki tino i tafa o auala io me i koga e ga‵lue latou i ei? E mata, e mafai ne koe o fesokotaki atu ki tino e auala i telefoni io me ‵sala ki napa telefoni o tino kolā ne sau‵tala mo koe e uiga ki te fekau o te Malo ko te mea ke mafai o tumau koe i te fesokotaki atu ki a latou? Mai te fakaasiatuga o te loto kufaki mo te uiga faigofie i te galuega talai, ka fiafia eiloa koe māfai e ‵saga tonu mai a tino ki te fekau o te Malo.

Te Fakafesagai Atu ki te sē Fia ‵Saga Mai o Tino

12. Se a te mea e mafai o fai māfai e se fia ‵saga mai a tino e tokouke i ‵tou koga talai?

¹² Kae e pefea la māfai e se fia‵fia a tino e tokouke i tou koga talai ki lotu? E mata, e mafai ne koe o fakamafuli tau mataupu ki se mea telā e fiafia ki ei te tino? Ne tusi mai te apositolo ko Paulo ki tino tali‵tonu i Kolinito: “Ne galue ei au mō tino Iutaia, ko te mea ke maua ne au a latou; . . . E pelā foki ki tino o fenua fakaatea kolā e se aofia i Tulafono faka-Iutaia, ko te mea ke maua ne au ne tino o fenua fakaatea. E se ko te uiga o te mea nei i a au e se fakalogo ki tulafono a te Atua.” Kaia ne fai ei ne Paulo te mea tenei? “E ola au i so se vaegā olaga o tino” ko ana pati, “ko te mea ke fakaola ne au a nisi o latou, i so se auala e mafai ne au o fakaaoga.” (1 Kolinito 9:​20-​22) E mata, e mafai o fakavae a ‵tou mataupu ki mea kolā e fia‵fia ki ei a tino i ‵tou koga talai? E ma‵nako a tino e tokouke kolā e se fia‵fia ki lotu ke momea aka te ‵lei o te tulaga o fesokotakiga i olotou kāiga. Kāti e ‵sala foki latou ki te uiga tonu o te olaga. E mata, e mafai ne tatou o fakaoko atu a te fekau o te Malo i se auala telā e fakafiafia atu ki a latou?

13, 14. E mafai pefea o fakalasi aka ne tatou a te fiafia e maua mai te galuega ko te faiga o soko?

¹³ Ko gasolo eiloa o fia‵fia malosi a tino talai ki te galuega ko te faiga o soko, ke oko foki loa ki koga kolā ne masani sāle o se fia‵fia i ei a tino. I auala pefea? Mai te tauloto ki se ‵gana fakaa‵tea. Ne iloa aka ne se tauavaga telā ko taki 60 tupu lā tausaga me e lau i afe a tama‵liki Saina e a ‵koga kae e ‵nofo mo olotou kāiga i te koga talai a te olotou fakapotopotoga. “Ona ko te pogai tenei ne ma‵nako maua o tauloto ki te ‵gana Saina,” ko pati a te tagata. Ne toe fai mai a ia: “E tiga eiloa e uke a taimi ka fakamāumāu ne māua i aso takitasi ke tauloto te ‵gana, ne iku atu i ei ki te faiga o akoga faka-te-Tusi Tapu e uke mo tino Saina i te motou koga talai.”

¹⁴ Faitalia me se mafai ne koe o tauloto se ‵gana fou, e mafai eiloa o fakaaoga faka‵lei ne koe a te tusi ko te Good News for People of All Nations māfai e fetaui koe mo se tino telā e faipati ki se isi ‵gana. E mafai o maua ne koe a tusi i ‵gana a tino kolā e fetaui mo koe. E tonu, e manakogina a taimi mo taumafaiga e uke ke fesokotaki atu ki tino kolā e ‵kese olotou ‵gana mo tuu mo aganuu. Kae ke se puli i a koe a te fakatakitakiga telā e maua i te Muna a te Atua: “Ka ko te tino telā e uke ana fuaga ne ‵toki, ka uke foki ana fuataga e maua.”​—⁠2 Kolinito 9:⁠6.

E Aofia i ei te Fakapotopotoga Kātoa

15, 16. (a) Kaia e aofia i ei te fakapotopotoga kātoa i te galuega ko te faiga o soko? (e) Ne a tusaga e mafai o fai ne tino ma‵tua ?

¹⁵ E se faka‵na fua a te galuega ko te faiga o soko ki taumafaiga a se tino e tokotasi. E ‵tau mo te fakapotopotoga kātoa o fakatau fesoasoani. Kaia? Ne fai mai a Iesu: “Tenā te mea e iloa ei ne tino katoa ko oku soko koutou, manafai e fakatau a‵lofa koutou.” (Ioane 13:35) E fakamaoni aka ne a‵koga faka-te-Tusi Tapu a te ‵tonu o pati konei māfai e lavea ne latou te fakatau a‵lofa e maua i taimi o fakatasiga. Ne tusi mai se akoga faka-te-Tusi Tapu, penei: “E fiafia malosi au o kau ki fakatasiga. E talimālō ‵lei a tino i ei!” Ne fai mai a Iesu me ka ‵teke atu a kāiga ‵tonu o tino kolā e ma‵nako ke fai mo fai ana soko. (Faitau te Mataio 10:​35-​37.) E tiga eiloa te feitu tenā, ne tauto mai a ia me ka maua ne latou i loto i te fakapotopotoga a “taina, tuagane, mātua, fanau.”​—⁠Maleko 10:⁠30.

¹⁶ E tāua ‵ki eiloa te tusaga e fai ne ‵tou taina mo tuagane ma‵tua i te fesoasoani atu ki ‵tou a‵koga faka-te-Tusi Tapu ke ga‵solo ki mua. I auala fea? Kafai ko se mafai ne tino ma‵tua o fai se akoga faka-te-Tusi Tapu, kae e fakamalosi mai eiloa olotou tali fakamalosi loto i fakatasiga ki te fakatuanaki o tino kolā e lagona ne latou. A te lotou fakamaoni o sa‵sale i te auala “amiotonu” e fakaopoopo atu ki te gali o te fakapotopotoga kae fakamalosi atu foki ki tino loto fakamaoni ke ‵kau mai ki te fakapotopotoga a te Atua.​—⁠Faataoto 16:⁠31.

Ke Manumalo i te Mataku Valea

17. Ne a mea e mafai o fai māfai e mafaufau se tino me e se mafai ne ia o fai se akoga?

¹⁷ Kae pefea la māfai e mafaufau koe me e se mafai ne koe o fai se akoga faka-te-Tusi Tapu? Ke masaua la me ne fesoasoani atu a Ieova ki a Mose e auala i tena agaga tapu kae tuku atu foki sena soa, ko tena taina, ko Alona. (Esoto 4:​10-​17) Ne tauto mai a Iesu me ka ‵lago mai eiloa te agaga o te Atua ki te ‵tou galuega talai. (Galuega 1:⁠8) E se gata i ei, ne uga atu ne Iesu ana soko e taki tokolua ke olo o fai te galuega. (Luka 10:⁠1) Tela la, kafai e faigata ki a koe ke kamata se akoga faka-te-Tusi Tapu, ‵talo ke tuku mai ne te agaga o te Atua te poto ki a koe kae ‵sala sou soa telā e talitonu kae mafai foki o fesoasoani atu ki a koe. Se mea fakamalosi loto ke masaua me e filifili ne Ieova a tino fatauva​—⁠“a tino va‵lea”​​—⁠ke fakataunu a te galuega fakaofoofogia tenei.​—⁠1 Kolinito 1:​26-​29.

18. E mafai pefea o manumalo i te mafau‵fau me e se magoi ‵tou taumafaiga ke fesoasoani atu ki se akoga faka-te-Tusi Tapu?

¹⁸ E mafai pefea o manumalo tatou i te manavase mafai e se magoi a ‵tou taumafaiga ke fesoasoani atu ki se akoga faka-te-Tusi Tapu. Se mea ‵lei ke masaua ne tatou me i te galuega ko te faiga o soko e ‵kese mo te faiga o se kuka telā e faka‵na loa a te gali mo te masei o te meakai tenā ki te tino tokotasi​​—⁠ko te kuka. Kae ko te faiga o soko e aofia i ei a tino e tokotolu. E fai ne Ieova a te ‵toe vaega tāua, ko te ‵takimaiga ne ia o te tino ki a ia. (Ioane 6:​44) E fai eiloa ne tatou fakatasi mo nisi tino i te fakapotopotoga a te toe mea e mafai o fai ke akoako kae fesoasoani atu ki te tino akoga ke gasolo ki mua. (Faitau te 2 Timoteo 2:​15.) Kae e ‵tau eiloa mo te tino akoga o ola e ‵tusa mo mea kolā e tauloto ne ia. (Mataio 7:​24-​27) E fanoa‵noa eiloa tatou māfai ko taofi aka ne se tino te faiga o tena akoga faka-te-Tusi Tapu. E fakamoe‵moe tatou ke fai ne tino a‵koga se filifiliga ‵lei, kae e ‵tau mo tino takitokotasi “o avatu se ‵tala o ia ki te Atua.”​​—⁠Loma 14:⁠12.

Ne a Fakamanuiaga ka Maua ne Tatou?

19-21. (a) Nea mea aoga e maua ne tatou mai te faiga o akoga faka-te-Tusi Tapu? (e) Se a te kilokiloga a Ieova ki tino katoa kolā e aofia i te faiga o te galuega talai?

¹⁹ A te faiga o akoga faka-te-Tusi Tapu e fesoasoani mai ke ‵saga tonu atu faeloa tatou o ‵sala muamua te Malo. E fakamalosi mai foki i ei ke ‵mau i ‵tou mafaufau kae ke ‵goto ifo ki ‵tou loto a muna‵tonu mai te Muna a te Atua. Kaia? Ne fai mai se paenia ko Palako tena igoa, penei: “A te faiga o akoga faka-te-Tusi Tapu e faimālō ei koe ke fai pelā me se tino apo i te Muna a te Atua. E matea ne au me e ‵tau o fakamalosi aka ne au a toku loto talitonu a koi tuai o akoako ne au te suā tino.”

²⁰ Kafai e se fai ne koe se akoga faka-te-Tusi Tapu, e mata, e fakauiga i ei me se fakatāua ne te Atua au galuega e fai? E tonu, e se penā loa! E fakatāua ‵ki ne Ieova a tou taumafaiga e fai ke avatu ei a tavaega ki a ia. A latou katoa kolā e aofia i te faiga o te galuega talai e fai pelā me “ne tino faigaluega” a te Atua. E tiga loa te feitu tenā, a te faiga o akoga faka-te-Tusi Tapu e momea aka ei te lasi o ‵tou fiafia ke ‵kilo atu ki te auala e fakaola ei ne te Atua a fuaga ne ‵toki ne tatou. (1 Kolinito 3:​6, 9) “A te matea atu o te gasolo ki mua o se akoga faka-te-Tusi Tapu,” ko pati a se paenia e igoa ki a Emi, “e fai ei ke lasi te loto fakafetai o koe ki a Ieova me ne fakaaoga ne ia koe ke tuku atu ki te tino tenā a te ‵toe meaalofa tāua​—⁠ko te avanoaga ke iloa ne ia a Ieova kae ke maua foki ne ia te ola se-gata mai.”

²¹ A te faiga o te ‵toe mea e mafai ne tatou o fai ke kamata a akoga faka-te-Tusi Tapu ka fesoasoani mai eiloa ke ‵saga tonu atu tatou o tavini ki te Atua i te taimi nei kae ka fakamalosi foki i ei ‵tou fakamoemoega ke ‵sao atu tatou ki loto i te lalolagi fou. Fakatasi mo te ‵lago mai o Ieova, e mafai foki o fesoasoani atu tatou o faka‵sao a latou kolā e fakalogo‵logo mai ki a tatou. (Faitau te 1 Timoteo 4:​16.) Mafaga o mea fakafiafia!

E Masaua ne Koe?

• Ne a fakalavelave e taofi aka ei a nisi tino mai te faiga o akoga faka-te-Tusi Tapu?

• Ne a mea kāti e mafai ne tatou o fai māfai e se fia ‵saga mai a tino e tokouke i ‵tou koga talai?

• Ne a fakamanuiaga e maua ne tatou mai te faiga o akoga faka-te-Tusi Tapu?

[Ata i te itulau e 9]

E mata, e fulifuli ne koe a auala e talai atu ei koe ko te mea ke maua ne koe a tino loto ‵lei?