Ko oi te Atua?
KA TALI mai pefea ne koe a te fesili tenā? E mafau‵fau a nisi tino me e iloa ‵lei ne latou te Atua—kae se taugasoa pili foki o latou. E ‵kilo atu a nisi tino ki te Atua e pelā me se kāiga ‵mao. E tali‵tonu latou me e ola a ia kae mu‵tana fua olotou mea e iloa e uiga ki a ia. Kafai koe e talitonu ki te Atua, ka tali mai pefea ne koe a fesili mai lalo nei?
1. E mata, a te Atua se tino tonu?
2. E mata, e isi se igoa o te Atua?
3. E mata, a Iesu ko te Atua Malosi Katoatoa?
4. E mata, e atafai mai te Atua ki a au?
5. E mata, e talia ne te Atua a vaegā tapuakiga katoa?
Kafai e fesili atu koe ki nisi tino ke tali mai ne latou a fesili konei, ka uke ‵ki loa a tali kese‵kese ka maua ne koe. E se tioa eiloa o isi ne tala se mautinoa e pelā foki mo akoakoga se ‵tonu e uiga ki te Atua.
Te Pogai e Tāua ‵ki ei a Tali
I te taimi ne faipati atu ei a ia ki se fafine lotu telā ne fetaui mo ia i te vaikeli, ne faka‵mafa atu ne Iesu Keliso ki a ia a te tāua ke iloa ne ia te mea tonu e uiga ki te Atua. Ne iloa ne te fafine Samalia tenei, me i a Iesu se pelofeta. Kae e isi se mea ne manavase tou fafine ki ei. Ne ‵kese te lotu a Iesu mo tena lotu. I te taimi ne fakaasi atu ei ne tou fafine te mea ne manavase a ia ki ei, ne faipati ‵tonu atu a Iesu: “A koutou e tapuaki mo te se iloa.” (Ioane 4:19-22) Mai te mea tenei ko lavea ei ne tatou me ne akoako atu ne Iesu me e se ko tino ‵lotu katoa e iloa tonu ne latou te Atua.
E mata, ne fakauiga a Iesu me e seai eiloa se tino e mafai o iloa tonu ne ia te Atua? Ikai. Ne toe fai atu a Iesu ki te fafine tenei: “Ko latou kolā e tapuaki fakamaoni, ka tapuaki ki te Tamana i te agaga mo te fakamaoni [“munatonu,” NW]. Ko vaegā tino penei e manako ki ei te Atua ke tapuaki atu ki a ia.” (Ioane 4:23) E mata, e aofia koe i tino kolā e tapuaki atu ki te Atua “i te agaga mo te munatonu”?
E tāua ‵ki ke fakamautinoa aka ne koe te tali ki te fesili tenā. Kaia? Ne faka‵mafa mai ne Iesu i tena ‵talo a te tāua ke maua te iloaga tonu: “Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.” (Ioane 17:3) E tonu, a te fakamoemoega o koe mō aso mai mua e ‵tau o fetaui ‵lei mo te munatonu telā e iloa ne koe e uiga ki te Atua!
E mata, e mafai eiloa o iloa ne tatou te mea tonu e uiga ki te Atua? Ao, e mafai loa! E iloa pefea ne koe? Ne fai mai a Iesu e uiga ki a ia eiloa: “Ko au te auala, te munatonu mo te ola. E seai se tino e fanatu ki te Tamana manafai e se alatu mai i a au.” (Ioane 14:6) Ne fai mai foki a ia: “Kae seai foki se tino e tokotasi e iloa ne ia me ko oi te Tamana, na ko te Tama fua, mo tino ei kolā e manako te Tama o fakaasi a ia ki ei.”—Luka 10:22.
Tela la, a te auala ke iloa ei ne tatou a te Atua e maua i akoakoga a Iesu Keliso, te Tama a te Atua. A te tonuga loa, ne tauto mai a Iesu ki a tatou: “Kafai e faka‵logo koutou ki aku akoakoga, ko oku soko tonu koutou. Ka iloa ne koutou te munatonu, ko te munatonu foki ka fakasaoloto ne ia koutou.”—Ioane 8:31, 32
Kae ne tali aka pefea ne Iesu a fesili e lima kolā ne faka‵sae aka?
[Ata i te itulau e 4]
E mata, e tapuaki atu koe ki se Atua telā e se iloa ‵lei ne koe?