E Mata, e Atafai Mai te Atua ki a Au?
Tali masani:
▪ “A te Atua ko tō tāua ke saga mai ki oku fakalavelave.”
▪ “Ailoga loa e atafai mai a ia ki a au.”
Ne a pati a Iesu?
▪ “A tamā manu fo‵liki ki a koutou, e se tāua malosi kae ‵togi māmā foki, kae e se puli eiloa se manu e tasi penā i mua o te Atua. E oko eiloa ki lauulu i otou ulu, ko oti katoa ne lau. Tela la, sa ma‵taku, me e sili atu eiloa te taua o koutou i manu fo‵liki e uke!” (Luka 12:6, 7) Se mea mautinoa, me ne akoako mai a Iesu me e alofa mai te Atua ki a tatou.
▪ “Sa manava‵se koutou o fai ake pelā: ‘Ne a mea ka ‵kai ei tatou? Ne a foki mea ka inu ei tatou? Ne a foki mea ka ‵pei ei tatou? Me i mea katoa konā, e salasala ne tino o fenua fakaatea.” (Mataio 6:31, 32) E talitonu a Iesu me iloa ne te Atua a ‵tou manakoga totino.
E FAKAASI tonu mai i te Tusi Tapu me e atafai mai te Atua ki a tatou. (Salamo 55:22; 1 Petelu 5:7) Kafai e atafai mai a ia kae kaia la e pokotia ei tatou i logo‵maega e uke i aso nei? Kafai a te Atua e alofa kae malosi katoatoa, kaia la e se fakagata ei ne ia a ‵logo‵maega?
E aofia i te tali tenei se mea telā e se iloa ne tino e tokouke—me i a Satani, te Tiapolo, ko te pule o te lalolagi masei tenei. I te taimi ne fakaosooso ei ne ia a Iesu, ne ofo atu ne Satani ki a ia a malo katoa o te lalolagi, i ana muna: “Ka avatu ne au te pule mo te ‵malu katoa ki a koe, me ko oti ne tuku mai ki a au te pule, telā e mafai o tuku fua ne au ki so se tino e loto au ki ei.”—Luka 4:5-7.
Ko oi ne fai ne ia a Satani ke pule ki te lalolagi? I te taimi ne fulitua atu ei a ‵tou mātua muamua, ko Atamu mo Eva, ki te Atua kae faka‵logo ki a Satani e fakaasi mai ei me ne filifili ne laua a Satani ke pule i a laua. Talu mai te ‵tekeatuga tenā, ne tuku atu ei ne Ieova te Atua mo te kufaki a te avanoaga ke fakaasi atu te matagā o te pulega a Satani. E se faimālō ne Ieova a tino ke tapuaki atu ki a ia, kae ne ‵tala mai ne ia te avanoaga mō tatou ke toe ‵foki atu ki a ia.—Loma 5:10.
Ona ko te alofa o te Atua mō tatou, ne fai ne ia a fakatokaga ke faka‵sao tatou ne Iesu mai i te pulega a Satani. I se taimi pili mai mua nei, a Iesu ka “fakatakavale ne ia a te Tiapolo, telā e isi sena pule i te mate.” (Epelu 2:14) A te faiga tenā, ka “fakamalepe [ei] a te galuega a te Tiapolo.”—1 Ioane 3:8.
Ka toe fakafoki mai a te palataiso ki te lalolagi. I te taimi tenā, “ka se toe iai ne loimata i mata [o tino]. Ka se toe iai se mate, se fanoanoa, se tagi io me se ‵mae. Ko palele atu a mea mua.”—Fakaasiga 21:4, 5.a
[Fakamatalaga mai lalo]
a Ke maua a nisi fakamatalaga ki te pogai ne talia ei ne te Atua a logo‵maega, ke onoono ki te mataupu e 11 o te tusi ko te Ne a Mea Akoako ‵Tonu Mai i te Tusi Tapu? telā ne ‵lomi ne Molimau a Ieova.
[Ko manatu tāua e 8]
Ka toe fakafoki mai a te palataiso ki te lalolagi