E Mata, e Talia ne te Atua a Vaegā Tapuakiga Katoa?

Tali masani:

▪ “A lotu katoa ne auala kolā e takitaki atu ei a tino ki te Atua.”

▪ “E se tāua ou talitonuga māfai e fakamaoni koe.”

Ne a pati a Iesu?

▪ “Ulu atu koutou ki te mataloa mataliki; me i te mataloa mataefa e faigofie ei te auala e tau atu ki te malaia, e tokouke foki latou kolā e olo atu i ei. Ka ko te mataloa mataliki e faigata te auala e tau atu ki te ola, e timomo foki a tino e maua ne latou.” (Mataio 7:​13, 14) Ne seki talitonu a Iesu me i lotu ne auala katoa e takitaki atu ei a tino ki te Atua.

▪ “E tokouke e fai mai ki a au penei, ‘Te Aliki, te Aliki! Ko tou igoa ne folafola atu ei ne matou a te Muna a te Atua. Ko tou igoa foki ne tuli ei ne matou a temoni, kae fai foki i ei ne matou a vavega!’ Telā, taku tonu atu ei ne au ki a latou, ‘E se iloa ne au koutou; olo keatea mai i a au, tino amio ma‵sei!’” (Mataio 7:​22, 23) E se talia ne Iesu a tino katoa kolā e fai mai me tau‵tali atu latou i a ia.

E TOKOUKE a tino lotu e fakatāua ne latou olotou talitonuga mo tuu mo aganuu. Kae pefea la māfai ko ‵seke a akoakoga konei mo mea kolā e fakaasi mai i te Muna a te Atua, ko te Tusi Tapu? Ne fakaasi mai ne Iesu a te fakamataku o te tautali i tuu mo aganuu a tagata i ana pati ki takitaki lotu i ona aso: “Tenei te pogai ko fakaseaoga ei ne koutou a te muna a te Atua, ona ko otou akoakoga.” Kae ne toe siki mai ne ia a muna konei a te Atua: “A tino konei e āva mai fua ki a au i olotou gutu ka ko olotou loto e ‵mao mai i a au. E se aoga olotou tapuakiga ki a au, i te mea ko akoako atu ne latou a akoakoga a tino ke fai pelā me ne tulafono a te Atua!”​​—Mataio 15:​1-9; Isaia 29:13.

E tāua foki ‵tou amioga, kae e se ko mea fua e tali‵tonu tatou ki ei. E uiga ki tino kolā e fai mai me tapuaki atu latou ki te Atua, e fai mai te Tusi Tapu, penei: “E molimau latou me e iloa ne latou te Atua, kae fakafiti ki te Atua i olotou faifaiga.” (Tito 1:​16) E tonu, e fai mai te Tusi Tapu e uiga ki tino kolā e ola i ‵tou aso nei: “I lō te a‵lofa ki te Atua, e fia‵fia malosi latou ki fakafiafiaga. E tiga eiloa e fakaasi mai ne latou i a latou ne tino lotu, kae ko te lotou lotu e se se lotu tonu. Ke mo a eiloa e fai fakatasi ‵tou mea mo vaegā tino penā.”​—2 Timoteo 3:​4, 5, Contemporary English Version.

E aoga a te loto fakamaoni, kae e uke atu a mea e manakogina i ei. Kaia? Me e mafai eiloa o ‵se se tino fakamaoni. Tela la, e tāua ‵ki ke iloa ne tatou te mea tonu e uiga ki te Atua. (Loma 10:​2, 3) Kafai e talia ne tatou te poto tenei kae ola e ‵tusa mo mea e fakaasi mai i te Tusi Tapu ka fai ei ke fakafiafia atu tatou ki te Atua. (Mataio 7:​21) Tela la, a te lotu tonu e aofia i ei te mauaga o se loto lagona tonu, te talitonu ki mea kolā e ‵tonu, mo te faiga o mea ‵tonu. Kae ko te faiga o mea ‵tonu e fakauiga eiloa ki te faiga o te loto o te Atua i aso takitasi!​—1 Ioane 2:​17.

Kafai e fia iloa ne koe a mea e uke atu ki mea kolā e fakamatala mai ne te Tusi Tapu e uiga ki te Atua, fesokotaki atu ki Molimau a Ieova ke fai sau akoga faka-te-Tusi Tapu e aunoa mo se ‵togi.

[Ko manatu tāua e 9]

A te lotu tonu e aofia i ei te mauaga o se loto lagona tonu, te talitonu ki mea kolā e ‵tonu, mo te faiga o mea ‵tonu