Te ‵Toe Fanau Fou—E Tupu Pefea te Mea Tenei?

NE FAI‵PATI a Iesu mo Nikotemo ki te tāua, te pogai, mo te aoga o te ‵toe fanau fou mo te auala foki e ‵tau ei o tupu te mea tenā. Ne fai mai a Iesu: “Au e muna ‵tonu atu ki a koe, kafai e se fanau mai se tino i te vai mo te agaga, e se mafai eiloa o ulu atu ki te Malo o te Atua.” (Ioane 3:5) Tela la, e toe fanau mai se tino e auala i te vai mo te agaga. Kae se a te mea e fakauiga ki ei a te tugapati ko te “vai mo te agaga”?

“Vai mo te Agaga”​—Ne a Mea Konei?

Ona ko te mea ne fai a ia mo fai se faiakoga i te lotu Iutaia, e sē se fakalotolotolua me ne masani ‵lei a Nikotemo mo te auala e fakaaoga ei ne te Tusi Tapu faka-Epelu a te tugapati ko te “agaga o te Atua”​—te malosi galue o te Atua, telā e mafai o fakamalosi aka ei a tino ke fai ne latou a galuega fakaofoofogia. (Kenese 41:38; Esoto 31:3; 1 Samuelu 10:6) Tela la, i te taimi ne fakaaoga ei ne Iesu a te pati ko te “agaga,” ne mafai o malamalama a Nikotemo i te mea tenā ko te agaga tapu, te malosi galue o te Atua.

Kae e a pati a Iesu e uiga ki te vai? Mafaufau ki mea ne ‵tupu mai mua kae mai tua malie foki o te sau‵talaga mo Nikotemo. E fakaasi mai i mea konei me ne fai ne Ioane te Papatiso mo soko o Iesu a te papatisoga ki te vai. (Ioane 1:​19, 31; 3:​22; 4:​1-3) Ne lauiloa eiloa te faifaiga tenei i Ielusalema. Tela la, i te taimi ne faipati ei a Iesu e uiga ki te vai, ne iloa ne Nikotemo me ne seki fakasino atu fua a Iesu ki te vai, kae ki te vai o te papatisoga.a

Ne Papatiso ki te “Agaga Tapu”

Kafai e fakauiga a ‘te ‵toe fanau mai i te vai’ ki te papatisoga ki te vai, se a la te mea e fakauiga ki ei a ‘te ‵toe fanau mai i te agaga’? A koi tuai o sau‵tala a Nikotemo mo Iesu, ne faka‵pula atu ne Ioane te Papatiso me e se aofia fua te vai i te papatisoga kae ko te agaga foki. Ne fai atu tou tagata: “E papatiso ne au koutou ki te vai, kae ka papatiso ne ia koutou ki te agaga tapu.” (Maleko 1:​7, 8) E fakamatala mai ne te tino tusi Evagelia ko Maleko a te taimi muamua ne tupu ei te vaegā papatisoga tenā. Ne tusi mai a ia: “E seki leva foki kae fanatu a Iesu mai Nasaleta i Kalilaia, papatiso ei a ia ne Ioane i te Iolitana. I te fanakega a Iesu mai te vai, ne lavea ne ia te lagi ko matala, mo te agaga tapu ko fanaifo ki luga i a ia e pelā mo se lupe.” (Maleko 1:​9, 10) I te taimi ne ufi ei ki lalo a Iesu i te Iolitana, ne papatiso a ia ki te vai. I te taimi eiloa ne maua ei ne ia te agaga mai te lagi, ne papatiso ei a ia ki te agaga tapu.

Mai tua o tausaga e tolu talu mai tena papatisoga, ne fakatalitonu atu a Iesu ki ana soko: “Kae se leva nei ko papatisogina ei koutou ki te agaga tapu.” (Galuega 1:5) Ne tupu anafea te mea tenā?

I te aso o te Penitekoso i te tausaga ko te 33 T.A., kāti e toko 120 a soko o Iesu ne maopoopo i se fale i Ielusalema. “I mo taimi foki eiloa konā, ne lagona ne latou te ‵gulu mai luga i te lagi e pelā eiloa mo se afā ko agi, tofu katoa ei te fale i te laumatagi tenā. Telā, lavea ei ne latou a ulaga afi e foliga mai e pelā mo ne alelo e patele mai ki a latou taki tokotasi. Ko ‵fonu latou katoa i te agaga tapu.” (Galuega 2:​1-4) I te aso foki eiloa tenā, ne fakamalosi atu ki nisi tino i Ielusalema ke papatiso ki te vai. Ne fai atu a te apositolo ko Petelu ki se vaitino: “Sala‵mo katoa koutou ki otou agasala, kae ke papatisogina foki koutou i te igoa o Iesu Keliso, ko te mea ke fakamagalogina otou agasala; ke maua foki ne koutou te meaalofa a te Atua ko te agaga tapu.” Ne a mea ne iku mai i ei? “A te tokoukega o latou ne tali‵tonu ki tena lauga, telā papatiso ei latou; kāti e ‵tusa mo te tolu afe a tino ne fakaopoopo ki te lotou aofaki i te aso tenā.”​—Galuega 2:​38, 41.

E Lua Vaegā Papatisoga e ‵Tau o Fai

Ne a mea e fakaasi mai i papatisoga konei e uiga ki te ‵toe fanau fou? E fakaasi mai i ei me e mafai o tupu te ‵toe fanau fou e auala i te faiga o papatisoga e lua. Masaua la me ne papatiso muamua a Iesu ki te vai. Oti aka, ne maua ne ia te agaga tapu. E penā foki a soko i te senitenali muamua, ne papatiso muamua latou ki te vai (ne papatiso a nisi tino ne Ioane te Papatiso), kae oti aka ne maua ne latou te agaga tapu. (Ioane 1:​26-36) E penā foki loa te toko 3,000 soko ‵fou, ne papatiso muamua ki te vai, kae maua fakamuli ne latou te agaga tapu.

A te mafaufau ki papatisoga kolā ne ‵tupu i te Penitekoso 33 T.A., e ‵tau o pefea te ‵tou fakamoemoe ke tupu te ‵toe fanau fou i aso nei? E ‵pau eiloa mo mea ne ‵tupu i aso o apositolo a Iesu mo ana soko. Muamua la, e salamo se tino ki ana agasala, e fulitua ki ana auala ma‵sei, e tuku atu tena olaga ki a Ieova ke tapuaki kae tavini atu ki a ia, mo te fakaasi atu ei i mua o tino katoa tena tukuatuga e auala i te papatisoga ki te vai. Kafai la e filifili a ia ne te Atua ke tavini atu e pelā me se pule i Tena Malo, ko fakaeke ei a ia ki te agaga tapu. A te faiga muamua tenei (te papatisoga ki te vai) e ‵tau o māfua mai i te tino; a te lua o faifaiga (te papatisoga ki te agaga) e māfua mai i te Atua. Kafai se tino e aofia i papatisoga konā e lua, ko maua ei ne ia te ‵toe fanau fou.

Kaia la ne fakaaoga ei ne Iesu i tena sau‵talaga mo Nikotemo a te tugapati ko te “fanau mai se tino i te vai mo te agaga”? Ke faka‵mafa atu me i tino kolā e papatiso ki te vai mo te agaga e ‵tau o fai ne latou se ‵fuliga lasi. Ka fakamatala mai i te suā mataupu a te vaega tenei o te ‵toe fanau fou.

[Fakamatalaga mai lalo]

[Ata i te itulau e 9]

Ne papatiso ne Ioane a tino Isalaelu kolā ko sala‵mo ki te vai