Ke Maua te Poto Tonu e Uiga ki te Atua
“Kae tenei te ola se gata mai: ke iloa ne tino i a koe ko te Atua tonu e tokotasi.”—Ioane 17:3.
SE A TE FAKALAVELAVE? E fai mai a nisi tino me i te Atua e se se tino tonu. E tali‵tonu a nisi tino me i te Atua e se se tino kae se malosi lasi fua. A ko tino kolā e tali‵tonu i te Atua se tino tonu e kese‵kese olotou akoakoga e uiga ki a ia mo ana uiga kolā e fakaasi mai.
E MAFAI PEFEA O MANUMALO KOE I TE FAKALAVELAVE?E tasi te auala e maua ei ne koe a te poto e uiga ki te Atua ko te onoono atu ki ana mea ne faite. Ne fai mai a te apositolo ko Paulo: “A te uiga se lavea o te [Atua], telā ko tona ‵mana mo tona uiga fakaatua, ko oti eiloa ne fakaasi faka‵lei mai e alatu i te faitega o te lalolagi.” (Loma 1:20) Kafai e iloilo faka‵lei ne koe a mea ne faite, ka uke ‵ki au mea e tauloto e uiga ki te poto mo te malosi o te ‵tou Mafuaga.—Salamo 104:24; Isaia 40:26.
Kae ko te mauaga o te poto tonu e uiga ki te Atua, e manakogina ke ‵suke a tino taki tokotasi ki te Muna a te Atua ko te Tusi Tapu kae sukesuke faka‵lei ki ei. Ke mo a ma talia ne koe ou mafaufauga ke ‵taki ne nisi tino. I lō te fai penā, tautali i pati fakatonutonu i te Tusi Tapu: “Ke se amio fakatasi koutou mo te lalolagi nei, ka ke ‵fuli koutou i te fakafouga otou mafaufau, ko te mea ke fakatalitonu ne koutou me se a te loto o te Atua, te mea ‵lei, te mea e logomalie mo te gali.” (Loma 12:2) Ke mafaufau ki mea kolā e fakaasi mai i te Tusi Tapu e uiga ki te Atua.
E isi se igoa o te Atua. E fia afe taimi ne sae mai ei a te igoa o te Atua i te Tusi Tapu kātoa. E aofia i ‵fuliga e uke o te Tusi Tapu a te igoa tenā i te Salamo 83:18, telā e fai mai penei: “Ko te mea ke iloa ne tino me i o koe fua te igoa ko Ieova, ko te tino tafasili i te maluga i te lalolagi kātoa.”—King James Version.
E isi ne lagonaga o Ieova te Atua kolā e pokotia i mea e fai ne tino. I te otiga ne fakasaoloto ne Ieova a te kau Isalaelu e pelā me ne pologa mai Aikupito, ne seki ‵saga atu latou i nisi taimi ki ana pati fakatonutonu aoga. “Ne fakafanoanoa ei ne latou a ia . . . kae faka‵mae ne latou te Atua Tapu o Isalaelu.”—Salamo 78:40, 41.
E amanaia a Ieova ki a tatou taki tokotasi. Ne fai atu a Iesu ki ana soko: “E mafai ne koutou o ‵togi mai se avā manu eva fo‵liki ki se sene; e seai foki se manu i a latou e to ki te one e se iloa ne te Tamana. E penā foki koutou, e faitaugina katoa otou lauulu. Tela la, sa manava‵se koutou, i te mea e sili atu eiloa koutou i manu eva konā.”—Mataio 10:29-31.
E se fakailoga ne te Atua a itukāiga o tino kese‵kese. Ne fai atu a te apositolo ko Paulo ki tino Eleni i Atenai me “mai te tagata e tokotasi, ne faite ei ne te Atua a itukāiga o tino katoa, kae ne fai foki ne ia ke ola latou i luga i te lalolagi kātoa.” Ne fai atu foki me i te Atua “e se ‵mao mai i a tatou takitokotasi.” (Galuega 17:26, 27) Ne fai mai a te apositolo ko Petelu: “Se mea tonu i te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.”—Galuega 10:34, 35.
SE A TE TAUI?A nisi tino e “toaga ki te Atua, ka ko te mea e seai eiloa se mainaga i a latou.” (Loma 10:2) Kafai e iloa ne koe a mea kolā e akoako ‵tonu mai i te Tusi Tapu e uiga ki te Atua, ka se faka‵segina koe kae ka mafai o “fakapilipili atu” koe ki te Atua—Iakopo 4:8.
Ke maua a nisi fakamatalaga, onoono ki te mataupu 1, “Se a te Fakamatalaga Tonu e Uiga ki te Atua?,” i te tusi ko te Ne a Mea e Akoako ‵Tonu Mai i te Tusi Tapu?a
[Fakamatalaga mai lalo]
a Ne ‵lomi ne Molimau a Ieova.
[Ata i te itulau e 6]
E tasi te auala e maua ei a te poto tonu e uiga ki te Atua ko te onoono atu ki ana mea ne faite