2 E se Atafai Mai Eiloa te Atua e Mata, e Tonu te Manatu Tenā?

Mea kolā kāti ne logo koe i ei: “Kafai e atafai tonu mai te Atua ki tino, ka ave ei keatea ne ia a mea ma‵sei mo logo‵maega mai te lalolagi. Kae tiga eiloa e manavase a ia e uiga ki tino, e se fia saga mai eiloa a ia ki mea e ‵tupu ki a au.”

Mea kolā e akoako mai i te Tusi Tapu: E se māfua mai i a Ieova te Atua a mea ma‵sei katoa. (Iakopo 1:13) E tiga eiloa e mafai o ave keatea ne ia a mea ma‵sei i so se taimi, e talia ne ia ke tumau te olaga masei o tino i te vaitaimi nei ko te mea ke faka‵lei aka a fakalavelave kolā ne ‵sae aka i te kamataga o tala fakasolopito o tino. Ka gasuesue eiloa a ia mō te ‵lei o tino katoa kae faka‵lei aka a fakalavelave kolā ne fakamāfua aka ne latou kolā e ‵teke ki tena pulega.—Kenese 3:1-6; Isaia 65:17.a

I tafa o tena manavase ki te kāiga o tino katoa, e fakaasi mai eiloa ne te Atua a tena atafai tonu ki a tatou taki tokotasi. E fakaasi mai i te Mataio 10:29-31 me e iloilo ne ia a fakamatalaga e uiga ki a tatou faitalia me e se iloa ne tatou: “E mafai ne koutou o ‵togi mai se avā manu eva fo‵liki ki se sene; e seai foki se manu i a latou e to ki te one e se iloa ne te Tamana. E penā foki koutou, e faitaugina katoa otou lauulu. Tela la, sa manava‵se koutou, i te mea e sili atu eiloa koutou i manu eva konā!”

Te auala e fesoasoani mai ei a te iloaga e uiga ki te munatonu ki a koe: E masani eiloa o ‵kalo keatea tatou mai tino kolā e se atafai kae sē fia ‵saga mai. E se ‵poi eiloa tatou, me i te loi e uiga ki te sē atafai mai o te Atua e fai ei a tino e tokouke ke ‵kalo keatea mai te tauloto e uiga ki a ia io me ke olo atu ki a ia māfai fua ko seai ne pogai ke fai ei penā. A te iloa atu me e atafai tonu mai eiloa a Ieova e mafai o takitaki atu ei koe ke tauloto ki mea e uke e uiga ki a ia kae ati aka se va fakataugasoa mo ia.

E pelā me se fakaakoakoga, kāti ne ‵talo atu koe ki te Atua kae mafaufau me e mata e fakalogologo mai a ia io me e tali mai ki tau ‵talo. E fakatalitonu mai te Tusi Tapu ki a tatou me i te Tino telā e lagona ne ia a “talosaga” e fakaavanoa mai ne ia te fesokotakiga tenei i taimi katoa mō tino katoa kolā e fia fakapilipili ‵tonu atu ki a ia.—Salamo 65:2.

E ‵kami tatou ne te Atua ke “fakaeke katoa ki luga i a ia a mea e manava‵se ei koutou, me e atafai atu eiloa ki a koutou.” (1 Petelu 5:7) E mafai o fakalago‵lago tatou ki tena atafai ke oko loa ki taimi o puapuaga, me e fai mai tena Muna, penei: “Te Aliki e nofo pili ki a latou kolā e loto vāi‵vai, e faka‵sao foki ne ia a latou kolā ko seai ne olotou fakamoemoega.”—Salamo 34:18.

[Fakamatalaga fakaopoopo]

[Manatu tāua i te itulau e 5]

Kafai e se atafai mai te Atua, kaia la e ‵kami ei ne ia tatou ke ‵talo atu ki a ia?