Ke mo a ma Fakalotolotolua
“A tou fakatuanaki, ko oko eiloa i te foliki. Ai a ne fakalotoloto lua ei koe?”—Mataio 14:31.
SE A TE FAKALAVELAVE? Ne fakalotolotolua foki a soko o Iesu i nisi taimi. (Mataio 14:30; Luka 24:36-39; Ioane 20:24, 25) E fakaasi mai i te Tusi Tapu me i te se lava o te fakatuanaki e aofia i “agasala kolā e ‵piki ‵mau ki luga i a tatou.” (Epelu 12:1) Ne tusi mai a te apositolo ko Paulo: “E se maua ne tino katoa te fakatuanaki.” (2 Tesalonia 3:2, Tusi Paia, Samoa) E se ko tena uiga me e se mafai o fakatuanaki a nisi tino. I lō te fai penā, e tokouke a tino e se taumafai ke maua ne latou. Ka fakamanuia ne te Atua a taumafaiga a tino kolā e fai penā.
E MAFAI PEFEA O MANUMALO KOE I TE FAKALAVELAVE? Fai ke iloa a mea kolā e fai ei koe ke fakalotolotolua. Ne fakalotolotolua a te soko ko Tomasi i a Iesu ko oti ne fakatu aka, e tiga eiloa ne fai atu a nisi soko me ko oti ne matea ne latou a ia. Ne manako eiloa a Tomasi ki se fakamaoniga. Se a te ikuga? Ne tuku atu ne Iesu a fakamaoniga kolā ne manakogina ke fakamalosi aka ei tena fakatuanaki.—Ioane 20:24-29.
E tuku mai ne Ieova te Atua, e auala i te Tusi Tapu, a fakamaoniga kolā e manakogina ke fakaseai ei a ‵tou manatu fakalotolotolua. E pelā mo nisi tino e tokouke e se tali‵tonu latou ki te Atua ona ko te mea e ‵losi atu latou ki a ia e uiga ki taua, amioga fakasaua, mo logo‵maega o tino katoa. Ne a pati i te Tusi Tapu e uiga ki te mataupu tenei?
E se pule mai te Atua e auala i malo o tagata. Ne fakasino atu a Iesu ki te agaga se matea ko Satani e pelā me ko “te aliki [pule] masei o te lalolagi.” (Ioane 14:30) Ne ofo atu ne Satani ke pule a Iesu i luga i malo katoa o te lalolagi māfai e tapuaki fakatasi atu ki a ia i ana pati konei: “Ka avatu ne au te pule mo te ‵malu katoa ki a koe, me ko oti ne tuku mai ki a au te pule, telā e mafai o tuku fua ne au ki so se tino e loto au ki ei.” Ne seki fakafiti ne Iesu a te manatu me e pule ne Satani a malo o tagata. I lō te fai penā, ne fai atu a Ia: “Muna a te Tusi, ‘Tapuaki ki te Aliki tou Atua, me na ko ia fua e ‵tau o tavini koe ki ei.’” (Luka 4:5-8) E ‵tau o ‵losi atu ki a Satani mo malo o tagata e uiga ki logo‵maega i te lalolagi, e se ko te Atua.—Fakaasiga 12:9, 12.
Ko pili o fakaseai ne Ieova te Atua a mea katoa kolā e māfua mai i ei a logo‵maega. Ko leva ne fakatoka ne ia se Malo io me se pulega mai lalo i tena Tama, ko Keliso Iesu, ke pule atu ki tino katoa. (Mataio 6:9, 10; 1 Kolinito 15:20-28) I te fakataunuga o valoaga i te Tusi Tapu, ko talai atu nei te tala ‵lei e uiga ki te Malo i te lalolagi kātoa. (Mataio 24:14) Ko pili o fakaseai ne te Malo tenei a tino katoa kolā e ‵teke ki ei e pelā foki mo mea kolā e māfua mai i ei a logo‵maega katoa o tino.—Tanielu 2:44; Mataio 25:31-33, 46; Fakaasiga 21:3, 4.
SE A TE TAUI? A latou kolā e fakalotolotolua e fai pelā me ne galu kolā e peipei valevale “ne matagi o akoakoga a tino fai togafiti.” (Efeso 4:14; 2 Petelu 2:1) E ‵kese mai i ei, a tino kolā e maua ne latou a tali fakafia‵fia ki olotou fesili ka “‵tu mautakitaki i te fakatuanaki.”—1 Kolinito 16:13.
E ma‵nako a Molimau a Ieova, kolā e ‵lomi ne latou a te mekesini tenei, o fesoasoani atu ke maua ne koe a tali ki fesili kolā e fakalotolotolua koe ki ei. E ‵kami ne latou ke kau atu koe ki a latou kae iloilo aka olotou akoakoga i a koe eiloa. Ka fakamalosi aka i ei tou fakatuanaki ki te Atua i se auala lasi ‵ki.
Ke maua a nisi manatu, ke onoono ki te mataupu e 8, “Se a te Malo o te Atua?,” mo te mataupu e 11, “Kaia e Talia ei ne te Atua a Logo‵maega?,” i te tusi ko te Ne a Mea e Akoako ‵Tonu Mai i te Tusi Tapu?a
[Fakamatalaga mai lalo]
a Ne ‵lomi ne Molimau a Ieova.
[Ata i te itulau e 9]
A tino kolā e maua ne latou a tali fakafia‵fia ki olotou fesili e maua ne latou se fakavae ‵mautakitaki mō te lotou fakatuanaki