Koloa Kolā e Maua Mai i te Atua
KAFAI e fakamaoni koe ki te Atua, e mata, ka fakamanuia ne ia koe ki koloa e uke? Kāti la, kae e se ko te vaegā maumea telā e fakamoemoe koe ki ei. Mafaufau la ki a Malia, te mātua o Iesu. Ne fakasae atu te agelu ko Kapilielu ki tou fafine kae fai atu me i te Atua “ko oti ne fakamanuia atu” ki a ia kae ka fanau mai ne ia te Tama a te Atua. (Luka 1:28, 30-32) Kae ne seki maumea a ia. I te taimi ne ofo atu ei ne Malia se taulaga mai tua o te fanaumaiga o Iesu, ne avatu ne ia “se avā lupe io me ne tamā lupe e lua,” telā e fai mo fai se taulaga masani e tuku atu ne tino ma‵tiva ki a Ieova.—Luka 2:24; Levitiko 12:8.
E mata, e fakauiga a te mativa o Malia me ne seki maua ne ia te fakamanuiaga a te Atua? E ‵kese mai i ei, i te taimi ne āsi atu ei a ia ki tena kāiga ko Elisapeta, “ne pukea ei Elisapeta ne te agaga tapu, faipati malosi atu ei ki a Malia: ‘Amutia koe i fafine katoa! Ke amutia foki te tamaliki telā ka fanau ne koe.’ ” (Luka 1:41, 42) Ne taulia a Malia ke fai mo te mātua faka-te-foitino o te Tama fagasele eiloa a te Atua.
A Iesu e sē se tagata maumea. Ne seki fanau kae tupu aka fua a ia i se kāiga mativa kae ne mativa foki eiloa a Iesu i tena olaga kātoa i te lalolagi. Ne fai atu a ia i se taimi e tasi ki se tagata telā ne manako ke fai mo fai sena soko: “E isi ne lua o alope, mo manueva e isi foki ne olotou ofaga, ka ko au te Tama a te Tagata, e seai se koga mo oku fakatapū.” (Luka 9:57, 58) E tiga eiloa te feitu tenā, a mea ne fai ne Iesu Keliso i tena vauga ki te lalolagi ne mafai ei o maua ne ana soko a te maumea. Ne tusi mai a te apositolo ko Paulo: Ne “fai a ia mo tino mativa i tena vauga ki te lalolagi i se auala fatauva.” (2 Kolinito 8:9) Ne a vaegā koloa ne tuku atu ne Iesu ki ana soko? Kae e a i aso nei?
Ne a Vaegā Koloa?
A te maumea faka-te-foitino e fai faeloa e pelā me se fakalavelave ki te fakatuanaki, me i te tino maumea e talitonu ki ana tupe i lō te Atua. Ne fai mai a Iesu: “Ko oko eiloa i te faigata i tino mauko‵loa o ulu atu ki te Malo o te Atua!” (Maleko 10:23) Kae e fakamaoni mai i ei me i te maumea telā ne tuku atu ne Iesu ki ana soko e se ko koloa faka-te-foitino.
A te ‵tonuga loa, ne ma‵tiva a te tokoukega o Kelisiano i te senitenali muamua. I te taimi ne fakamolemole atu ei se tagata ‵pili ki ne tupe, ne tali atu a Petelu: “E seai ne aku tupe, kae ka tuku atu fua ne au a te mea tenei e nofo mo au i te igoa o Iesu Keliso te Nasaleta, ko fakatonu atu au ki a koe, sasale!”—Galuega 3:6.
E fakaasi mai foki i pati a te soko ko Iakopo me ne aofia eiloa a tino ma‵tiva i te fakapotopotoga Kelisiano. Ne tusi mai a ia: “Fakalogo mai e oku taina fagasele! Ne filifili ne te Atua a tino ma‵tiva o te lalolagi nei ke mau‵mea i te fakatuanaki, kae ke maua foki ne latou a te Malo telā ne folafola mai ne ia ki tino e a‵lofa ki a ia.” (Iakopo 2:5) E se gata i ei, ne fai mai foki te apositolo ko Paulo me e se tokouke “e ‵poto i mea faka te lalolagi” io me “pule” io me e “fa‵nau mai i kāiga aliki” ne kalagagina ke fai mo vaega o te fakapotopotoga Kelisiano.—1 Kolinito 1:26.
Kafai e seki tuku atu ne Iesu ki ana soko a koloa faka-te-foitino, ne a la vaegā koloa ne tuku atu ne ia ki a latou? I se tusi telā ne avatu ne Iesu ki te fakapotopotoga i Semulana, ne fai atu a ia: “E iloa ne au ou puapuaga; e iloa foki ne au i a koe e mativa, ka ko te ‵tonuga a koe e maumea!” (Fakaasiga 2:8, 9) Ne maua ne Kelisiano i Semulana a koloa e sili atu i te tāua i lō siliva io me ko aulo, faitalia te lotou tulaga ma‵tiva. Ne mau‵mea latou ona ko te lotou fakatuanaki mo te lotou fakamaoni ki te Atua. E tāua ‵ki eiloa a te fakatuanaki “me se ko tino katoa” e maua ne latou. (2 Tesalonia 3:2) A latou kolā e se fakatuanaki e fai eiloa pelā me ne tino ma‵tiva i te kilokiloga a te Atua.—Fakaasiga 3:17, 18.
Te Maumea Telā e Iku Mai i te Fakatuanaki
Ne a auala e tāua ei te fakatuanaki? A latou kolā e fakatuanaki ki te Atua e maua ne latou a mea aoga mai i te “alofa kaimalie, tena loto mau mo te kufaki.” (Loma 2:4) E “fakamagalo foki [olotou] agasala” ona ko te lotou fakatuanaki ki te taulaga togiola a Iesu. (Efeso 1:7) E se gata i ei, e maua foki ne latou te poto telā e tuku atu ne “te muna a Keliso” ki tino kolā e fakatuanaki. (Kolose 3:16) I te taimi e ‵talo atu ei latou ki te Atua i te fakatuanaki, a “te filemu o te Atua, telā e sili atu i mea e iloa ne tatou” ka puipui ne ia olotou loto mo mafaufau, kae ka maua ei ne latou te lotomalie mo te fiafia.—Filipi 4:7.
I tafa o mea aoga katoa konei, a latou kolā e fakatuanaki ki te Atua e auala i tena Tama, ko Iesu Keliso, e maua ne latou a te fakamoemoega fakaofoofogia o te ola se-gata-mai. Konei eiloa a pati lauiloa a Iesu Keliso: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:16) E fakamalosi aka te fakamoemoega tāua tenā māfai ko iloa tonu ne se tino a te Tamana mo te Tama, me ne fai mai foki a Iesu: “Tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.”—Ioane 17:3.
E tiga eiloa e aofia malosi i fakamanuiaga a te Atua a fakamanuiaga faka-te-agaga, e isi foki ne mea aoga i mea tau lagonaga mo te feitu faka-te-foitino e maua mai i ei. E pelā mo Dalídio mai i Pasili. A koi tuai o iloa tonu ne ia a te fuafuaga a te Atua, ne fakavalevale a ia ki te fakaaogaga ‵se o te kava. Ne fakamasei malosi atu a te mea tenei ki tena fesokotakiga mo tena kāiga. E se gata i ei, ne seki lava ‵lei olotou tupe. Kae ne kamata o sukesuke a ia ki te Tusi Tapu fakatasi mo Molimau a Ieova kae ne fai ne ia se ‵fuliga lasi ‵ki.
Ne takitaki atu a Dalídio ne mea ‵fou kolā ne tauloto ne ia ke tiakina ne ia ana faifaiga ma‵sei. Ne gasolo malosi atu a ia ki mua i te feitu faka-te-agaga telā ne fai mai a ia: “Ne masani sāle au o fanatu mai i te fale inu e tasi ki te suā fale inu; kae nei la, ko fanatu au mai fale ki fale.” Ko oti ne fai a ia mo fai se tavini galue tumau o te Muna a te Atua. A te vaegā ‵fuliga tenā ne fai ei ke gasolo aka o ‵lei tena malosi faka-te-foitino penā foki loa mo tena tulaga i mea tau tupe. Ne fai mai a Dalídio, “A tupe kolā ne fakamaumau ne au ki meainu ma‵losi, ko fakaaoga nei ne au ke fesoasoani atu ki nisi tino ma‵tiva io me ‵togi ki ei a mea kolā e manakogina ne au.” Ko oti foki ne maua ne ia a taugasoa ‵tonu e tokouke e auala i ana fesokotakiga ki tino kolā e ‵pau te lotou kilokiloga faka-te-agaga. Ko maua nei ne Dalídio a te filemu o te mafaufau mo te lotomalie i so se mea telā ne mafai o mafaufau a ia ki ei a koi tuai o iloa ‵lei ne ia te Atua.
E fai te tala o Renato e pelā me se fakaakoakoga gali o tino kolā ne fakamalosi aka te lotou fakatuanaki ki a Ieova te Atua. Kafai e lavea ne koe ana mata katakata kae fiafia i aso nei, se mea faigata ke talitonu me ne ma‵sei ‵ki a mea ne ‵tupu ki a ia i te olaga. I te taimi ne fatoa fanau mai ei a ia, ne tiakina a ia ne tena mātua. Ne tuku tiaki a ia i loto i se taga mai lalo i se nofoga, mafolefole valevale kae uliuli tena foitino mo tena pito koi ‵mau eiloa. Ne sa‵sale atu a te avā fafine kae ne lavea ne lāua te taga mai lalo i te nofoga e gasuesue. Ne mafau‵fau muamua lāua me ne tiakina ne se tino se pūsi i konā. I te taimi ne iloa ei ne lāua me se pepe ne fatoa fanau, ne avatu fakavave ne lāua a ia ki se fa‵kaimasaki pili mō se fesoasoani mai tokita.
E tokotasi mai i fafine konā se Molimau a Ieova, kae ne fai atu tou fafine ki a Rita, ko te suā Molimau, e uiga ki te pepe. Ne tigaina a Rita i te fia o tama ‵to, kae e tokotasi fua tena tamaliki fafine. Ne manako malosi a ia ki se tama tagata, tela la, ne fakaiku aka ne tou fafine ke puke ne ia a Renato.
Ne fai atu a Rita ki a Renato a koi foliki tou tagata me i a ia e se ko tena mātua tonu. Kae ne tausi atu eiloa a ia i te alofa mo te atafai kae taumafai malosi foki o akoako atu a akoakoga fakavae i te Tusi Tapu ki tou tagata. I te taimi ko gasolo aka ei o matua tou tagata, ne kamata o fiafia malosi a ia ki te Tusi Tapu. Ne gasolo aka foki tena loto fakafetai ki te auala fakaofoofogia ne fakasao ei a ia. Ne ‵fonu ana mata i loimata i te taimi e faitau ei a ia ki pati a te faisalamo ko Tavita: “E mafai ne toku tamana mo toku mātua o tiakina au, ka ko te Aliki [ko Ieova] ka tausi ne ia a au.”—Salamo 27:10.
Ona ko tena loto fakafetai mō mea katoa ne fai ne Ieova mō ia, ne papatiso a Renato i te 2002 kae fai mo fai se tavini Kelisiano telā e galue tumau i te tausaga mai tua ifo. E seki iloa eiloa ne ia tena tamana mo tena mātua tonu kae kāti ka se toe iloa eiloa ne ia. Kae e mafaufau a Renato me i te ‵toe meaalofa tāua ko oti ne maua ne ia ko te iloa mo te fakatuanaki ki a Ieova e pelā me ko tena Tamana alofa kae atafai.
Kāti e manako foki koe ke maua se va pili kae alofa mo te Atua, telā ka fai ei ke aoga tonu tou olaga. A te avanoaga ke maua se vaegā fesokotakiga penā mo Ieova te Atua mo tena Tama, ko Iesu Keliso, e ‵tala atu ki tino katoa—tino mau‵mea mo tino ma‵tiva. Kāti e se maua i ei a te maumea faka-te-foitino kae ka iku atu ki te mauaga o te filemu mo te lotomalie tonu telā e se mafai o ‵togi ki tupe i te lalolagi nei. E ‵tonu eiloa a pati i te Faataoto 10:22: “Ko te fakamanuiaga a te Aliki [ko Ieova] e fai ne ia koe ke maumea.”
E saga malosi mai a Ieova te Atua ki tino kolā e olo atu ki a ia: “Moi ne faka‵logo mai eiloa koutou ki aku fakatonuga, e penei a fakamanuiaga mo koutou e ‵tafe eiloa pelā me se vaitafe telā e se mafai o ‵masa pakupaku! E penei e maua ne koutou te manumalo pelā mo galu kolā e ‵fati ki luga i te tafatai.” (Isaia 48:18) Kae ne tauto mai a ia me i a latou kolā e olo atu ki a ia mo lagonaga mo te kilokiloga tonu ka fakamanuia malosi ne ia: “Fakalogo ki te Aliki, kae loto maulalo, kae ka maua ne koe te maumea, te fakaaloalogina mo te ola leva.”—Faataoto 22:4.
[Te Manatu Tāua i te itulau e 5]
E tiga eiloa ne ma‵tiva latou i te feitu faka-te-foitino, ne fakamanuia malosi ne te Atua a te kāiga o Iesu i te lalolagi nei
[Ata i te itulau e 6]
E iku atu te fakatuanaki ki te Atua ki te mauaga o te filemu, te lotomalie, mo te fiafia