‵Sala Atu ki Koloa ‵Tonu

1, 2. I te lalolagi tenei, kaia e isi faeloa i ei ne tino ma‵tiva?

A TE tulaga o mea tau tupe i aso nei ko oko loa i te masei kae sē fai mea tonu. E se maua ne talavou a galuega ‵togi. A te tokoukega o tino kolā ko ‵tu olotou ola i se tulaga fakamataku ko olo atu ki fenua kolā e mau‵mea ‵ki. Ko salalau atu te mativa, ke oko foki loa ki fenua mau‵mea. Kae ko gasolo o tokouke ‵ki a tino ma‵tiva. E ‵tusa mo iloiloga fakamuli nei, a te 1 pasene o tino mau‵mea i te lalolagi ko ‵pau mo te maumea o te 99 pasene o tino i te lalolagi kātoa māfai e tuku fakatasi. E tiga eiloa e se mafai o fakamautinoa aka te mea tenā, kae e seai se tino e ‵teke ki te manatu me e lau i te fia piliona o tino e ma‵tiva ‵ki, kae ko nisi tino e lava kae ‵toe olotou maumea ke tausi atu ki olotou kāiga mō se fia o tupulaga. Ne iloa ne Iesu a te tulaga tonu tenei i ana pati: “E ‵nofo faeloa koutou mo tino ma‵tiva.” (Male.14:7) Kaia e lasi ‵ki ei te kese‵kese o tulaga konei?

² Ne malamalama a Iesu me e se mafai o ‵fuli te tulaga tenei i mea tau tupe ke oko atu loa ki te taimi e oko mai ei te Malo o te Atua. Fakatasi mo mea fakapolitiki mo mea fakalotu, a pisinisi ‵lasi kaima‵nako kolā e sui ne “tino faipisinisi” i te Fakaasiga 18:3, ne vaega katoa o te lalolagi a Satani. E tiga eiloa ko oti ne ‵vae katoatoa kea‵tea a tino o te Atua mai mea fakapolitiki mo lotu ‵se, a te tokoukega o tino e se mafai o ‵vae katoatoa kea‵tea mai te vaega tenei o te lalolagi a Satani, ko mea fakapisinisi.

3. Ne a fesili ka sau‵tala tatou ki ei?

³ E pelā me ne Kelisiano, e ‵tau o iloilo faka‵lei aka ‵tou kilokiloga e uiga ki mea fakapisinisi i aso nei, mai te fesili ifo ki a tatou eiloa penei: ‘E mafai pefea o fakaaoga aku koloa faka-te-foitino ke fakaasi atu ei toku fakamaoni ki te Atua? E mafai pefea o fakamu‵tana ifo toku aofia i mea fakapisinisi o te lalolagi nei? Ne a tala ‵gali e fakaasi mai ei a te tali‵tonu katoatoa o tino o te Atua ki a ia i te vaitaimi faigata tenei?’

TE TALA FAKATUSA O TE SITUATI SĒ AMIOTONU

4, 5. (a) Se a te tulaga ne oko ki ei a te situati i te tala fakatusa a Iesu? (e) Se a te fakamalosiga e tuku mai ne Iesu ki ana soko?

⁴ Faitau te Luka 16:1-9. A te tala fakatusa a Iesu e uiga ki te situati sē amiotonu e tāua ‵ki eiloa. Mai tua o te ‵losiatuga mō te fakamāumāu mea, ne gasuesue eiloa te situati mo te “poto” o ‵sala ana “taugasoa” ke fesoasoani atu māfai ko fakatea a ia mai tena tulaga fakasituati.a E tonu, e se fakamalosi ne Iesu ana soko ke gasue‵sue i se auala sē amiotonu ko te mea ke ‵sao ei latou mai te lalolagi tenei. Ne fakamailoga ne ia a te vaegā uiga tenā e pelā mo uiga o “tama o te olaga tenei,” kae ne fakaaoga ne ia a te tala fakatusa tenā ke faka‵mafa aka i ei a te manatu tāua.

⁵ Ne iloa ne Iesu me e pelā mo te situati telā ne oko atu ki se tulaga faigata, e tokouke foki ana soko ka ma‵nako o ‵sala atu ki galuega ‵togi i te lalolagi fai pisinisi sē fai mea tonu tenei. Tela la, e fakamalosi atu a ia ki a latou, penei: “Ke fai ne otou taugasoa i koloa sē amio‵tonu me kafai ko se aoga a mea konā ka mafai ei ne [Ieova mo Iesu] o faka‵lafi a koutou ki loto i fale se-gata-mai.” Se a te mea e mafai o tauloto ne tatou mai pati fakatonutonu a Iesu?

6. E iloa pefea ne tatou me i mea fakapisinisi i aso nei e sē se vaega o te fuafuaga a te Atua?

⁶ E tiga eiloa e se fakamatala mai ne Iesu a te pogai e taku ei ne ia a koloa me e “sē amio‵tonu,” kae e fakaasi manino mai ne te Tusi Tapu me i mea fakapisinisi e sē se vaega o te fuafuaga a te Atua. Ne tuku atu ne Ieova a mea e uke ‵ki ki a Atamu mo Eva i Etena. (Kene. 2:15, 16) Fakamuli ifo, i te taimi ne ‵ligi ifo ei te agaga ki te fakapotopotoga o te kau fakaekegina i te senitenali muamua, “e seai eiloa se tino ne fai mai pelā me i ana mea totino i a ia eiloa, ne fakaaoga fakatasi ne latou a olotou mea katoa.” (Galu. 4:32) Ne fakasino atu te pelofeta ko Isaia ki te taimi telā ka maua ei ne tino katoa a mea faka-te-foitino i te lalolagi nei e aunoa mo se ‵togi. (Isa. 25:6-9; 65:21, 22) Kae i te taimi nei, e ‵tau mo soko o Iesu o “‵poto” i te ‵sala atu ki se auala ke ola ei latou, mai te fakaaogaga o “koloa sē amio‵tonu” o te lalolagi nei a koi ‵sala atu latou ki te auala ke fakafiafia atu te Atua.

TE AUALA POTO KE FAKAAOGA A KOLOA SĒ AMIO‵TONU

7. Ne a pati fakatonutonu e maua ne tatou i te Luka 16:10-13?

⁷ Faitau te Luka 16:10-13. Ne ‵sala eiloa te situati i te tala fakatusa a Iesu ki ne taugasoa mō te ‵lei o ia. Kae ne fakamalosi atu a Iesu ki ana soko ke fai taugasoa mo Ieova mo ia. A fuaiupu mai tua o te tala fakatusa e fakamatala mai ei a te sokoga o te fakaaogaga o “koloa sē amio‵tonu” mo te fakamaoni ki te Atua. Ne faka‵mafa mai ne Iesu a te manatu me e mafai o fakatalitonu atu ‵tou “fakamaoni” fakatasi mo te loto pulea māfai ko maua ne tatou a koloa konā. Pefea la?

8, 9. Taku mai ne fakaakoakoga e uiga ki te auala ne fakaasi atu ei ne nisi tino a te fakamaoni i te fakaaogaga o koloa sē amio‵tonu.

⁸ A te auala manino ke fakatalitonu atu ‵tou fakamaoni ki ‵tou koloa faka-te-foitino, ko te faiga o ‵tou meaalofa tupe ki te galuega talai i te lalolagi kātoa telā ne ‵valo mai ne Iesu me ka tupu. (Mataio 24:14) E pelā, me se fakaakoakoga, ne tausi ne se tamaliki fafine i Initia se pokisi tupe foliki kae kamata o faulu malielie atu ki ei ana sene, kae ko se ‵togi ana mea ta‵fao. I te taimi ne ‵fonu ei te pokisi, ne tuku atu ne ia ana tupe ke fakaaoga mō te faiga o te galuega talai. Ne aumai faeloa ne se taina i Initia telā e isi sena fatoaga niu, se aofaki lasi o niu pelā me ko tena meaalofa ki te ofisa ‵fulitusi i te ‵gana Malayalam, ona ko te mea e iloa ne ia me ‵togi niu faeloa te ofisa, tela la, e ‵lei atu māfai e ave ne ia a niu pelā me se meaalofa, i lō tupe. Te mea tenā se faifaiga poto telā e aoga. E penā foki a taina i Eleni, e avatu faeloa ne latou i aso katoa a sinu olive, cheese, mo nisi mea‵kai aka ki te kāiga i te Peteli.

⁹ E isi se taina mai Sri Lanka, telā ko nofo nei i te suā fenua, ne fakaavanoa faeloa ne ia tena fale i tena fenua tonu mō fai ei a fakatasiga mo fono o fenua kae ke ‵nofo foki ei a latou kolā e aofia i te taviniga tumau. A te mea tenei e fai pelā me ko te meaalofa tupe a te taina tenei, kae se fesoasoani lasi ‵ki eiloa ki tino talai i konā kolā e se na loa ko uke olotou mea. I se fenua telā ne fakatapu ei te galuega, ne fakaavanoa ne taina a olotou fale e pelā me ne Fale Tapuaki, ko mafai ei o fakafaigofie ki paenia mo nisi taina aka kolā e se uke olotou tupe.

10. Ne a nisi fakamanuiaga e maua ne tatou māfai e uiga kaima‵lie tatou?

¹⁰ A nisi fakaakoakoga konei mai tua, e fakaasi mai ei te auala e fai ei a tavini a te Atua e pelā me ne tino kolā e “fakamaoni i te ‵toe mea foliki,” ko te fakaaogaga ne latou a koloa faka-te-foitino, telā e se na ko tāua atu i koloa faka-te-agaga. (Luka 16:10) E pefea a lagonaga o taugasoa konei o Ieova i te faiga o vaegā meaalofa penā? E malama‵lama latou me i te uiga kaimalie ko te auala ke maua ei a koloa “‵tonu.” (Luka 16:11) Ne fakamatala mai ne se tuagane telā e lafo faeloa tena meaalofa ki te galuega o te Malo, a te fakamanuaiaga ne maua ne ia: “Mai te kaimalie o tuku atu a koloa faka-te-foitino, ne tauloto ei ne au se mea fou i te fia tausaga konei. Ne lavea ne au me ko te lasi o toku kaimalie o tuku atu, ko te lasi foki o toku kaimalie i oku uiga ki nisi tino. Ko loto fiafia malosi au o fakamagalo, o kufaki i mea e fai ne nisi tino, kae ko mafai ne au o talia a pati sē ‵lei io me ko polopolokiga.” Ne tauloto ne te tokoukega o tino me i te uiga kaimalie se fakamanuiaga lasi i te feitu faka-te-agaga.​—Sala. 112:5; Faata. 22:9.

11. (a) E fakaasi atu pefea ne tatou a te “poto” mai te loto fia‵fia o tuku atu ‵tou mea? (e) Se a te faifaiga paleni i mea tau tupe telā e fakagalue ne tino o te Atua? (Ke onoono ki te ata i te kamataga.)

¹¹ A te fakaaogaga o kope faka-te-foitino ke fai ei ke gasolo ki mua a manakoga o te Malo, se fakaasiga o te “poto” i se isi auala. E fesoasoani mai eiloa ke fakaaoga faka‵lei ‵tou fakanofonofoga ke fesoasoani atu ki nisi tino. A latou kolā e maua ne latou a mea o te lalolagi nei kae sē mafai o ‵kau katoatoa atu ki te galuega talai io me olo atu ki nisi fenua, e lotoma‵lie ke iloa ne latou me i olotou meaalofa tupe e ‵lago atu ki te galuega talai a nisi tino. (Faata. 19:17) A meaalofa tupe kolā e tuku atu mo te lotomalie, e fesoasoani atu ki te ‵lomiga o tusi mo te faiga o te galuega talai i koga kolā e lasi te tulaga mativa i ei, kae e gasolo ki mua i te feitu faka-te-agaga. Mō se fia o tausaga i nisi koga e pelā mo Congo, Madagascar, mo Rwanda, ne filifili aka ne taina i konā me e mata e ‵togi ne latou a mea‵kai mō olotou kāiga io me ko ‵kopi o te Tusi Tapu, telā e ‵pau eiloa te ‵togi i nisi taimi mo te peofuga i se vaiaso io me i se masina. Nei la, e auala i meaalofa a tino e tokouke mo te “faifaiga paleni” o mea tau tupe, ko oti ne ofo atu ne te fakapotopotoga saukātoa a Ieova ke ‵fuli kae tufatufa atu a ‵kopi o te Tusi Tapu e aunoa mo se ‵togi ki tino taki tokotasi i te kāiga e pelā foki mo a‵koga faka-te-Tusi Tapu kolā e fia‵kai i te feitu faka-te-agaga. (Faitau te 2 Kolinito 8:13-15.) Tela la, a Ieova e fia fai taugasoa ki tino kolā e tuku atu olotou mea e pelā foki mo latou kolā e maua ne latou.

KE MO A MA TŌ AOFIA I “MEA FAKAPISINISI O TE OLAGA NEI”

12. Ne fakaasi atu pefea ne Apelaamo a tena talitonu ki te Atua?

¹² A te suā auala ke fai taugasoa mo Ieova, ko te faiga ke mo a ma tō aofia tatou i mea fakapisinisi o te lalolagi nei kae ke fakaaoga ‵tou fakanofonofoga ke ‵sala atu ki koloa “‵tonu.” A Apelaamo, telā se tagata fakatuanaki i aso mua, ne fakalogo o tiakina ne ia te fa‵kai ko Ulo ko te mea ke fanatu o nofo i faleie kae kausaki atu ki se va fakataugasoa mo Ieova. (Epe. 11:8-10) Ne kilo atu faeloa a ia ki te Atua e pelā me ko te pogai o te maumea tonu, kae ke sē ‵sala atu ki koloa faka-te-foitino, telā se fakaasiga o te sē lava o te loto talitonu. (Kene. 14:22, 23) Ne fakamalosi aka ne Iesu te vaegā fakatuanaki tenei, mai te fai atu ki se tamataene maumea, penei: “Kafai e manako koe ke ‵lei katoatoa koe, fano o fakatau atu au mea katoa kae tufa atu ki tino ma‵tiva, kae ka maua ne koe a koloa e uke i te lagi; ko vau ei koe o fai mo oku soko.” (Mata. 19:21) Ne seki lava te fakatuanaki o te tagata tenā e pelā mo Apelaamo, kae ko nisi tino ne tali‵tonu katoatoa eiloa ki te Atua.

13. (a) Se a te polopolokiga ne tuku atu ne Paulo ki a Timoteo? (e) E mafai pefea o fakagalue aka ne tatou a te polopolokiga a Paulo i aso nei?

¹³ A Timoteo se tagata fakatuanaki. I te otiga ne taku ne ia a Timoteo e pelā me “se sotia ‵lei a Keliso Iesu,” ne fai atu ei a Paulo ki a ia: “E seai se tagata e fai mo fai se sotia e aofia i mea fakapisinisi o te olaga nei, ko te mea ke talia a ia ne te tino telā ne ‵tofi ne ia a ia mo fai se sotia.” (2 Timo. 2:3, 4) E fakagalue eiloa ne soko o Iesu i aso nei, e aofia ei se kautau o tino talai e silia atu mo te tasi miliona, a pati fakatonutonu a Paulo e ‵tusa mo olotou fakanofonofoga. Mai te ‵teke atu ki fakamalosiga ma‵sei e uiga ki mea fakasalalau mo te lalolagi telā e sikomia ei latou, e masaua eiloa ne latou te fakatakitakiga tenei: “A tino ma‵tiva ko pologa a tino mau‵mea.” (Faata. 22:7) E seai aka eiloa se mea e manako ki ei a Satani i tafa o tena manakoga ke fakamāumāu katoa a ‵tou taimi mo malosi ke pologa ki mea fakapisinisi o te lalolagi tenei. E mafai o pologa tatou i se fia o tausaga ki mea tau tupe ona ko nisi fakaikuga. A te faiga o kaitalafu ke ‵togi a fale ‵lasi, kaitalafu mō fakaa‵koga a tamaliki, ‵togiga o motoka ‵togi ‵mafa, pelā foki mo avaga fai fakalasi‵lasi, e mafai o iku atu ki te manavase i mea tau tupe. E fakaasi atu ne tatou te poto māfai e fakafaigofie aka ‵tou olaga kae fakamu‵tana ‵tou kaitalafu mo mea ‵togi valevale, kae fakatoka ke avanoa tatou ke pologa mō te Atua i lō a mea fakapisinisi o te olaga tenei.​—1 Timo. 6:10.

14. Se a te vaegā fakaikuga e ‵tau o fai ne tatou? Taku mai ne fakaakoakoga.

¹⁴ A te tumau i te fakafaigofie aka o ‵tou olaga e aofia i ei te fakatokaga o mea kolā e ‵tau o fakamuamua. Ne olaola ‵lei eiloa te fakateletelega o se pisinisi a se tauavaga. Ona ko te lā manakoga ke toe ‵kau atu ki te taviniga tumau, ne fakamalosi aka ei ne te mea tenā ke ‵togi atu ki tua te lā pisinisi, pōti, mo nisi kope aka. Oti aka, volenitia ei laua ke fesoasoani atu ki te matagaluega fakatu‵tu i te laumua i Warwick, Niu Ioki. Ne maua ne laua se fakamanuiaga fakapito ke tavini atu i te Peteli mo mātua o te tagata mō ne nāi vaiaso, pelā foki mo te lā tamaliki fafine mo tena avaga kolā e ga‵lue foki i te galuega fakatu‵tu i Warwick. Ne maua ne se tuagane paenia mai Colorado i Amelika, se galuega ‵togi sē tumau i te pagike. Ne fia‵fia ‵ki a tino ga‵lue ki ana galuega, telā ne ofo atu ne latou se tulaga telā e fakatolu taimi te lasi o tena peofuga. Kae ona ko te mea ka fai ne tena galuega ke mu‵tana ana taimi i te galuega talai, ne seki talia ei ne ia te tofiga ‵togi ‵lei tenā. Konei a nisi fakaakoakoga e uiga ki mea kolā ne loto fia‵fia a tavini a Ieova o fai. A fakaikuga ke fakamuamua faeloa a manakoga o te Malo, se fakaasiga me e fakatāua ne tatou a ‵tou va fakataugasoa mo te Atua e pelā foki mo koloa faka-te-agaga i lō mea fakapisinisi kolā e ofo mai ne te lalolagi nei.

TAIMI KO SE AOGA EI A KOLOA FAKA-TE-FOITINO

15. Ne a koloa e aumai ne ia te lotomalie sili?

¹⁵ A te maumea faka-te-foitino e sē se fakaasiga o te fakamanuiaga a te Atua. E fakamanuia eiloa ne Ieova a latou kolā e “mau‵mea i te faiga o galuega ‵lei.” (Faitau te 1 Timoteo 6:17-19.) E pelā me se fakaakoakoga, i te taimi ne iloa ei ne Luciab me manakogina malosi a tino talai i Albania, ne fanatu ei a ia mai Italia ki konā i te 1993 kae seai sena galuega, kae na ko te talitonu katoatoa fua ki a Ieova. Ne tauloto faka‵lei ne ia te ‵gana Albania kae ne fesoasoani atu ki tino e toko 60 tupu, kolā ne iku atu ki te faiga o olotou tukuatuga. E tiga eiloa e se ko tino katoa o te Atua e talai atu i koga talai kolā e tokouke a tino fia‵fia i ei, so se mea e fai ne tatou ke fesoasoani atu ki nisi tino ke ‵sala kae ke tumau i te auala ki te ola, e tāua malosi eiloa ki a tatou e pelā foki mo tino konā ki te se gata-mai.​—Mata. 6:20.

16. (a) Ne a mea ka ‵tupu ki mea fakapisinisi o te olaga tenei? (e) E ‵tau o pokotia pefea ‵tou kilokiloga ki te maumea faka-te-foitino mai mea ko iloa ne tatou e uiga ki aso mai mua?

¹⁶ Ne fai mai a Iesu: “Kafai ko se aoga a [koloa sē amio‵tonu],” kae e seki fai mai ‘māfai ko se aoga.’ (Luka 16:9) A te fanaifoga o te tulaga o Pagike mo mea tau tupe i aso fakaoti konei, e se tāua malosi māfai e fakatusa ne tatou ki mea kolā ka ‵tupu i te lalolagi kātoa i aso mai mua nei. A te lalolagi masei tenei a Satani​—e aofia ei a mea fakapolitiki, mea fakalotu mo mea fakapisinisi​—ka se aoga eiloa. Ne ‵valo mai ne te pelofeta ko Esekielu mo Sefanaia me i aulo mo siliva, kolā ko toe mea tāua i te lalolagi fai pisinisi i te fia o senitenali ke oko mai nei, ka se aoga lele eiloa. (Eseki. 7:19; Sefa. 1:18) E pefea ‵tou lagonaga māfai tatou ko ma‵tua kae ne fatoā iloa aka ne tatou me ne faka‵seke ne tatou a koloa ‵tonu ko te mea ke fakaputu aka ne tatou a “koloa sē amio‵tonu” e uke o te lalolagi nei? E mafai eiloa o ‵pau ‵tou lagonaga mo te tagata telā ne galue i tena olaga kātoa ke maua a tupe e uke, kae iloa aka fua ne ia me e se ne tupe ‵tonu. (Faata. 18:11) E tonu, ka se aoga eiloa a vaegā koloa penā, tela la, ke mo a e galo i a koe te avanoaga ke fakaaoga a mea konā ke “fai taugasoa” mo Ieova mo Iesu. Faitalia me ne a mea e fai ne tatou ke fakamuamua ei a manakoga o te Malo o Ieova, e fai eiloa ne mea konā ke mau‵mea tatou i te feitu faka-te-agaga.

17, 18. Ne a fakamanuiaga ka tausi mō taugasoa o te Atua?

¹⁷ Kafai ko oko mai te Malo o te Atua, ka fakaseai atu a kaitalafu mo fale ‵togi, ka uke a mea‵kai sē ‵togi, kae ka se toe manakogina a tokita mo vailakau. Ka fia‵fia eiloa te kāiga o Ieova i te lalolagi ki toe mea ‵lei ka maua ne latou. Ka fakaaoga a aulo, siliva mo penina tāua mo teuteu fakagaligali ki ei a tino, kae sē toe fakaaoga ke maua ei a tupe uke. A laupapa ma‵losi, fatu mo fiti ka mafai o faite ki ei a fale ‵gali. Ka fesoasoani mai a taugasoa ki a tatou mo te lotomalie tonu, kae sē mō tupe. Ka fakaaoga fakatasi katoa ne tatou a mea e maua mai te lalolagi fou.

¹⁸ A te mea tenei se vaega fua o fakamanuiaga sili mō latou kolā e fai taugasoa ki a Ieova mo Iesu. Ka fia‵fia malosi eiloa a tino tapuaki o Ieova i te lalolagi i te taimi e lagona ei ne latou a pati a Iesu: “O‵mai, a koutou kolā ko oti ne fakamanuia ne toku Tamana, ke fai mō koutou te Malo telā ne fakatoka mō koutou talu mai te faitega o te lalolagi.”​—Mata. 25:34.