E Mata, a Tupe ko te Pogai o te Fiafia Tonu?

A SONIA ne fanau i Sepania. I te taimi koi foliki ei a ia, ne kau atu a ia fakatasi mo tena mātua ki fakatasiga a Molimau a Ieova. Kae i te taimi ko matua ei tou fafine, ne fanatu a ia ki Lonitona, i Egelani, kae ne galue fakamuli tou fafine i mea tau tupe telā e panaki mo tupe ‵teu.

Ne fiafia malosi a Sonia ki tena galuega. Ne uke ‵ki ana tupe ne maua mai i ei kae ne uke ‵ki a tupe ne tausi ne ia mai i tino kolā ne fesoasoani atu a ia ki ei. Se galuega fakafiafia kae ne manuia eiloa tou fafine i ana taumafaiga. Ne masani sāle o galue a Sonia i itula e 18 i te aso, kae i nisi po e lua io me e tolu fua a itula ne moe ei a ia. Ne fakavae tena olaga kātoa ki tena galuega. Kae ne ‵fuli fakavave tena olaga i se taimi e tasi. Ne logo‵mae a Sonia i te masaki ko te faka‵mate​—⁠kāti ko te sē lava o tena moe. Ko 30 fua ana tausaga.

Ne ‵mate te feitu e tasi o te foitino o Sonia, kae ne seki mautinoa i tokita me ka toe mafai o faipati tou fafine. Ne faimalaga fakavave atu tena mātua ki Egelani ke tausi atu ki tou fafine. I te taimi ne toe kamata ei o sasale a Sonia, ne fai atu tena mātua, “Au ka fano ki te fakatasiga a te fakapotopotoga, kae e ‵tau eiloa o vau koe ke olo tāua me e se mafai ne au o tiakina koe ke nofo tokotasi.” Ne lotomalie eiloa a Sonia ke fano a ia. Se a te ikuga?

“A mea katoa ne lagona ne au, ko oko eiloa i te ‵tonu. Ko se faka‵tau eiloa i te gali,” ne fai mai a Sonia. “Ne fiafia au o talia se akoga faka-te-Tusi Tapu mo se tokotasi mai i te fia o tino ne fetaui matou i te taimi muamua ne fano ei au ki te Kingdom Hall. Ko se toe āsi mai oku taugasoa mua, kae ko oku taugasoa ‵fou ne a‵lofa kae atafai mai ki a au.”

Fakamuli loa, ne toe mafai ne Sonia o faipati, kae ne gasolo vave atu foki a ia ki mua i te feitu faka-te-agaga. E seki kātoa te tausaga, kae ne papatiso tou fafine. Ne ga‵lue tumau a te tokoukega o ana taugasoa ‵fou i te galuega faka-Kelisiano, kae ne lavea ne ia te fia‵fia malosi o latou. Ne mafaufau ifo a Sonia: ‘Au e manako ke fai foki au penā. Au e manako ke tuku atu ki a Ieova a toe mea ‵lei!’ Nei la, ko kau atu foki a Sonia ki te taviniga tumau.

Ne a mea ne tauloto ne Sonia mai i tena olaga? “E tiga eiloa ne maua ne au a tupe e uke, a te galue malosi mo te sē tokagamalie i te galuega ‵togi ne fai ei au ke manavase kae se fiafia. Ko fatoa iloa ne au me i te ‵toe mea tāua i te olaga ko te mauaga o se fesokotakiga ‵lei mo toku Tamana faka-te-lagi, ko Ieova. Nei la, ko fiafia tonu eiloa au.”

Ne tusi mai a te apositolo ko Paulo: “Me i te manako ki tupe, ko te māfuaga tenā o mea ma‵sei katoa. A nisi tino ko oko eiloa i te ma‵nako ke maua ne latou, ka ko olo foki keatea mai te fakatuanaki, ka ko fatifati nei olotou loto i puapuaga e uke.” (1 Timoteo 6:​10) E mafai eiloa o ‵lago atu a Sonia ki te ‵tonu o pati konei ona ko mea ne ‵tupu ki a ia.