E O Ieova Tatou​—ko Te Fakaasiga O Te Alofa Kaimalie

“Ko tino o te Aliki [ko Ieova] tatou.”​—LOMA 14:8.

1, 2. (a) Se a te tauliaga e maua ne tatou? (e) Ne a fesili ka mafau‵fau tatou ki ei?

KO OKO eiloa i te tāua o te tauliaga ne tuku atu ki te fenua o Isalaelu i te taimi ne fai atu ei a Ieova ki a latou: “Ka fai koutou mo oku tino ‵tonu eiloa. A te lalolagi kātoa e o oku, ka ko koutou ko oku tino filifilia.” (Esoto 19:⁠5) I aso nei, a sui o te fakapotopotoga Kelisiano e maua ne latou te tulaga taulia ke fai mo tino o Ieova. (1 Petelu 2:9; Fakaasiga 7:9, 14, 15) Se tauliaga telā e mafai o aoga ki a tatou ki te se-gata-mai.

² I tafa o te tauliaga tenā, a te fai mo tino o Ieova e aofia foki i ei se tiute. Kāti e fai mai a nisi tino: ‘E mata, ka mafai ne au o fai a mea kolā e manako a Ieova ki ei ke fai ne au? Kafai e fai ne au se agasala, e mata, ka se toe talia ne ia au? E mata, ka ave keatea toku fiafia māfai e fai au mo tino o Ieova?’ E tāua eiloa ke mafau‵fau ki vaegā mea penā. Muamua la, a te suā fesili telā e ‵tau o mafaufau faka‵lei ki ei: Ne a mea aoga e maua mai i te fai mo tino o Ieova?

A te Fai mo Tino o Ieova e Iku Atu ki te Fiafia

3. Ne aoga pefea ki a Lahapa tena fakaikuga ke tavini atu ki a Ieova?

³ E mata, e maua ne tino kolā e fai mo tino o Ieova a mea aoga mai ei? Mafaufau ki a Lahapa, se fafine talitagata telā ne nofo i Ieliko i aso mua. E seai eiloa se fakalotolotolua me ne akoakogina a ia ki te tapuakiga matagā ki atua o Kanana. Kae i te taimi ne lagona ei ne ia a manumaloga kolā ne tuku atu ne Ieova ki tino Isalaelu, ne iloa ne ia me i a Ieova ko te Atua tonu. Tela la, ne tu tena ola i se tulaga fakamataku ke puipui ei a tino filifilia a te Atua kae ne fakalagolago eiloa tou fafine ki a latou ke faka‵sao ne latou a ia. E fai mai te Tusi Tapu: “E penā foki eiloa te takuamiotonugina o Lahapa. A ia ko te fafine tali tagata ne takuamiotonugina i ana galuega, i te tali‵leiga ne ia a avefekau a tino Iutaia, kae fesoasoani atu ki a latou ke olo i te suā auala.” (Iakopo 2:25) Mafaufau la ki mea aoga ne maua ne ia i te taimi ne fai ei a ia mo fai se vaega o tino ‵ma o te Atua, tino kolā ne akoakogina ki te Tulafono a te Atua i te alofa mo te fakamaoni. Ko tafaga la tena fiafia me ne tiakina ne ia tena vaegā olaga mua! Ne avaga tou fafine ki se tino Isalaelu kae ne maua ne ia se tamaliki tagata, ko Poasa, telā ne fai mo fai se tagata tāua o te Atua.​—Iosua 6:25; Luta 2:4-12; Mataio 1:5, 6.

4. Ne aoga pefea ki a Luta tena fakaikuga ke tavini atu ki a Ieova?

⁴ Ne fakaiku aka foki ne Luta mai i Moapi ke tavini atu a ia ki a Ieova. I te taimi koi foliki ei tou fafine, kāti ne tapuaki atu a ia ki a Kemoso mo nisi atua o Moapi, kae ne iloa ne ia te Atua tonu, ko Ieova, kae ne avaga foki ki se tino Isalaelu telā ne olo atu o ‵nofo i tena fenua. (Faitau te Luta 1:1-6.) Fakamuli ifo, i te taimi ne kamata ei o ‵foki atu a Luta mo Olepa, tena ma, mo te mātua o lā avaga, ko Naomi, ki Peteleema, ne fakamalosi atu a Naomi ki te avā fāfine konā ke toe ‵foki atu ki te lā fenua. E se fai eiloa pelā me e faigofie ki a lāua ke ola i Isalaelu. A Olepa ne toe foki atu “ki tena fenua mo tena atua,” kae e se ko Luta. Ne gasuesue eiloa tou fafine e ‵tusa mo tena fakatuanaki kae ne iloa foki ne ia me ko oi e ‵tau o kau atu a ia ki ei. Ne fai atu tou fafine ki a Naomi: “Sa finau mai ke tiakina koe ne au! Au e loto ke olo tasi tāua. Me i so se koga e fano a koe ki ei, e fano au ki ei; i so se koga e nofo a koe i ei, au e nofo foki i ei. A tou fenua ka fai mo oku fenua, a tou atua ka fai foki mo oku Atua.” (Luta 1:15, 16) Ona ko tena filifiliga ke tavini atu ki a Ieova, ne maua ne Luta a mea aoga mai i te Tulafono a te Atua, telā ne aofia i ei a fakatokaga fakapito mō fafine ko ‵mate olotou avaga, tino ma‵tiva mo tino kolā e seai ne olotou manafa. Mai lalo i te puipuiga a Ieova, ne maua ne ia te fiafia, te puipuiga, mo te tokagamalie.

5. Ne a mea ko oti ne lavea ne koe e uiga ki tino kolā e tavini atu mo te fakamaoni ki a Ieova?

⁵ Kāti e iloa ne koe a nisi tino kolā ne tavini atu ki a Ieova mo te fakamaoni i te fia sefulu o tausaga mai tua o te lotou tukuatuga ki a ia. Fesili atu ki a latou e uiga ki mea aoga ne maua ne latou mai i te tavini atu ki a ia. E tiga eiloa e seai se tino e mafai o sao i fakalavelave, e fakaofoofogia eiloa a te fakamaoni o pati a te faisalamo: “Ke amutia a tino kolā e fai mō latou te Atua ko [Ieova]”!​—Salamo 144:⁠15.

E Faigofie Eiloa a Mea Kolā e Manako ki ei a Ieova

6. Kaia e se ‵tau ei o ma‵taku tatou i te sē mafai ne tatou o fai a mea kolā e manako a Ieova ki ei ke fai ne tatou?

⁶ Kāti ko mafaufau koe me e mata, e mafai ne koe o fai a mea kolā e manako ki ei a Ieova ke fai ne koe. E faigofie ke manavase ki te fakamoemoega o te fai mo fai se tavini a te Atua, ke ola e ‵tusa mo ana tulafono, mo te faipati atu i tena igoa. E pelā mo Mose ne mafaufau me e se lava tena atamai i te taimi ne uga atu ei a ia ke faipati ki tino Isalaelu mo te tupu o Aikupito. Kae ne seki tō faigata te Atua i mea kolā ne manako a ia ke fai ne Mose. A Ieova ne ‘akoako atu [ne ia] a pati ke fai ne ia.’ (Faitau te Esoto 3:11; 4:1, 10, 13-15.) Ona ko te mea ne talia ne Mose a te galuega tenā, ne maua ne ia te fiafia ona ko te faiga o te loto o te Atua. E penā foki eiloa a Ieova i mea kolā e manako a ia ki ei ke fai ne tatou. E malamalama a ia i ‵tou tulaga sē ‵lei katoatoa, kae e manako a ia ke fesoasoani mai ki a tatou. (Salamo 103:14) A te tavini atu ki te Atua e pelā me se soko o Iesu e fakamalosi mai i lō te faiga ke manava‵se tatou, ona ko te mea e aoga ki nisi tino a te vaegā olaga tenā kae e fai foki i ei te loto o Ieova ke fiafia. Ne fai mai a Iesu: “O‵mai ki a au, . . . me ka avatu ne au ki a koutou a te malologa. Ke amo ne koutou taku amoga, kae fakaakoako mai ki a au, me i a au e filemu kae loto maulalo; e maua foki i ei ne koutou a te tokagamalie otou agaga.”​—Mataio 11:28, 29.

7. Kaia e mafai ei o maua ne koe te loto talitonu me ka fesoasoani atu a Ieova ke fai ne koe a mea kolā e fakamoemoe a ia ke fai ne koe?

⁷ Ka tuku mai faeloa ne Ieova a te fakamalosiga e ma‵nako tatou ki ei, māfai e fakalagolago tatou ki a ia mō te malosi. E pelā mo Ielemia ne seki maua faeloa ne ia te loto toa o faipati atu. Tela la, i te taimi ne ‵tofi aka ei a ia ne Ieova ke fai mo Ana pelofeta, ne fai atu a Ielemia: “Te Aliki Sili [ko Ieova], e se iloa ne au o faipati, au koi foliki.” Fakamuli ifo, ne toe fai atu a ia: “Ka fakapuli ne au a te Aliki kae se toe faipati i tena igoa.” (Ielemia 1:6; 20:⁠9) Kae ona ko te fakamalosiga a Ieova, ne mafai ei o talai atu ne Ielemia a fekau kolā e seki fakalogo‵logo ki ei a tino i tausaga e 40. Ne fakatalitonu atu faeloa a Ieova ki a ia i pati konei: “Au e fakatasi atu ki a koe o puipui kae tausi a koe.”​—Ielemia 1:8, 19; 15:⁠20.

8. E fakaasi atu pefea ne tatou me e tali‵tonu tatou ki a Ieova?

⁸ E pelā eiloa mo te fakamalosi atu o Ieova ki a Mose mo Ielemia, e mafai foki ne ia o fesoasoani mai ki a tatou i mea kolā e manako a ia ke fai ne Kelisiano i aso nei. A te mea tāua ko te fakalagolago ki te Atua. E fai mai te Tusi Tapu: “Talitonu ki te Aliki [ko Ieova] mo tou loto kātoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.” (Faataoto 3:5, 6) E fakaasi atu ne tatou me e tali‵tonu tatou ki a Ieova māfai e fakaaoga ne tatou a te fesoasoani telā e tuku mai ne ia e auala i tena Muna mo te fakapotopotoga. Kafai e talia ne tatou a Ieova ke takitaki ne ia a tatou i ‵tou olaga kātoa, e seai eiloa se mea ka taofi aka ei tatou mai i te fakamaoni atu ki a ia.

E Tausi ne Ieova Ana Tino Taki Tokotasi

9, 10. Se a te vaegā puipuiga e folafola mai i te Salamo e 91?

⁹ E tiga eiloa e mafau‵fau latou ki te lotou fakaikuga ke tuku atu latou ki a Ieova, kāti e mafau‵fau a nisi tino e uiga ki te fakamataku o te faiga o se agasala, te sē tāua o latou, mo te ‵teke atu o Ieova ki a latou. Se mea fakafiafia me e tuku mai ne Ieova ki a tatou a puipuiga katoa e ‵tau o maua ke puipui ei ‵tou fesokotakiga tāua mo ia. Ke na onoono aka tatou ki te auala e fakaasi mai ei te mea tenā i te Salamo e 91.

¹⁰ E kamata mai penei a te faisalamo: “So se tino e fano ki te [“koga ‵funa o te,” Tusi Paia, Samoa] Aliki ke sao a ia, so se tino foki telā e nofo i lalo o te tausiga a Ia telā e o ia te Malosi Katoatoa, e mafai o fai atu penei ki a ia, ‘A koe ko toku lafiga mo toku ‵puiga. Koe ko toku Atua; e fakatuanaki au ki ei.’ Ka tausi ne ia koe ke sao mai fakalavelave kolā e seki matea atu, mo masaki foki kolā e oko mai ei te mate.” (Salamo 91:1-3) Masaua la me ne folafola mai te Atua ke puipui ne ia a latou kolā e a‵lofa kae tali‵tonu ki a ia. (Faitau te Salamo 91:9, 14.) Se a te vaegā puipuiga ne fakauiga a ia ki ei? Ia, ne puipui ne Ieova a nisi o tavini i aso mua i te feitu faka-te-foitino​—ne fai penā i nisi taimi ke puipui ei te gafa telā e vau ei te Mesia telā ne folafola mai. Kae ko nisi tagata fakamaoni ne ‵pei ki te falepuipui, ne fakasauagina, kae tamate foki ona ko taumafaiga a te Tiapolo ke ave keatea te lotou fakamaoni ki te Atua. (Epelu 11:34-39) Ne maua ne latou te loto malosi e manakogina ke kufaki ona ko te mea ne puipui ne Ieova latou i te feitu faka-te-agaga mai i mea fakama‵taku kolā e fakamasei ei te lotou fakamaoni. Tela la, e mafai eiloa o fakauiga a te Salamo e 91 e pelā me se folafolaga e uiga ki te puipuiga faka-te-agaga.

11. Se a te “koga ‵funa o te Atua Tafasili i te Maluga,” kae ko oi e puipui ne te Atua i ei?

¹¹ A te “koga ‵funa o te Atua Malosi Katoatoa” telā ne taku mai ne te faisalamo, se koga fakatusa o te puipuiga faka-te-agaga. A tino kolā e ‵nofo i ei mo te Atua e pelā me ne ana mālō e saogalēmū mai i so se mea mo so se tino telā e fakamataku ki te lotou fakatuanaki mo te lotou a‵lofa ki te Atua. (Salamo 15:1, 2; 121:⁠5) E fai pelā me se koga ‵funa, me e se iloa ne tino kolā e se tali‵tonu a te koga tenā. E puipui eiloa i konei ne Ieova a tino kolā e fai atu: ‘A Koe ko toku Atua telā ka talitonu au ki ei.’ Kafai e tumau tatou i te koga faka‵lafi tenei, e se ‵tau o manava‵se tatou e uiga ki te galo atu o te taliaga a te Atua mai i te ‵to atu ki se matāsele a Satani, ‘te tino ‵poa manu.’

12. Ne a mea fakama‵taku e mafai o fakamasei ei ‵tou fesokotakiga mo te Atua?

¹² Ne a mea e fakama‵taku ki ‵tou fesokotakiga tāua mo te Atua? E taku mai ne te faisalamo a nai mea fakama‵taku, kolā e aofia i ei a “mala e oko mai i te po, mo mea ma‵sei kolā e ‵mate ei a tino i te ao.” (Salamo 91:5, 6) Ko oti ne ‵po aka ne te “tino ‵po manu” a tino e tokouke ona ko te manakoga fia tu tokotasi. (2 Kolinito 11:⁠3) E ‵po ne ia a nisi tino e auala i manakoga kaima‵nako, te fakamatamata, mo te fia maumea. Kae ko nisi tino e takitaki ‵se ne ia ki vaegā akoakoga e pelā mo te loto fenua, te evolusione, mo lotu ‵se. (Kolose 2:⁠8) Kae e tokouke a tino ko oti ne ‵to atu ki te matasele ko faifaiga fakatauavaga sē ‵tau. Ona ko mala fakalogo‵mae penā i te feitu faka-te-agaga, ne fai ei ke ‵galo atu i te fia miliona o tino a te lotou a‵lofa ki te Atua.​—Faitau te Salamo 91:7-10; Mataio 24:⁠12.

Te Auala ke Puipui ei Tou Alofa ki te Atua

13. E puipui pefea ne Ieova tatou mai i mea fakama‵taku kolā e fakamasei ei ‵tou ‵lei i te feitu fak-te-agaga?

¹³ E puipui pefea ne Ieova ana tino mai i mea fakama‵taku i te feitu faka-te-agaga? E fai mai te salamo: “Ka tuku atu ne te Atua ana agelu ke tausi ki a koe, o puipui foki koe i koga katoa e fano koe ki ei.” (Salamo 91:11) E takitaki kae puipui tatou ne agelu i te lagi ko te mea ke mafai o talai atu ne tatou a te tala ‵lei. (Fakaasiga 14:⁠6) I tafa o agelu, a toeaina Kelisiano, mai i te puke ‵mau ki te Tusi Tapu i olotou akoakoga, e puipui ne latou a tatou ke mo a ma fakaloiloigina ne akoakoga ‵se. E mafai o tuku mai ne latou a te fesoasoani ki so se tino telā e taumafai ke manumalo a ia i kilokiloga a te lalolagi. (Tito 1:9; 1 Petelu 5:⁠2) Kae e tuku mai foki ne “te tavini fakamaoni kae poto” a mea‵kai faka-te-agaga ke puipui ei tatou mai i te akoakoga ko te evolusione, manakoga ma‵sei kae faka‵se tino, te kausaki atu ki koloa mo tulaga ma‵luga, mo nisi manakoga mo fakamalosiga fakalogo‵mae. (Mataio 24:45) Ne a mea ko oti ne fesoasoani atu ke ‵teke atu koe ki nisi mea fakama‵taku konei?

14. E mafai pefea o fakaaoga faka‵lei ne tatou te puipuiga telā e tuku mai ne te Atua?

¹⁴ Ne a mea e ‵tau o fai ne tatou ko te mea ke tumau i te “koga ‵funa” o puipuiga a te Atua? E pelā eiloa mo te tumau o tatou i te puipuiga mai i mea fakama‵taku faka-te-foitino, e pelā mo fakalavelave ‵tupu fakafuasei, tino amio solitulafono, io me ko masaki, e ‵tau o tumau tatou i te puipuiga o tatou mai i mea fakama‵taku i te feitu faka-te-agaga. Tela la, e ‵tau eiloa o fakaaoga faka‵lei ne tatou a te takitakiga telā e tuku mai ne Ieova mō tatou i ‵tou tusi mo fakatasiga a te fakapotopotoga mo tamā fono. E ‵sala atu tatou ki se fesoasoani mai i toeaina. Kae e mata, e se maua ne tatou a mea aoga mai i uiga kese‵kese kolā e fakaasi atu ne ‵tou taina mo tuagane Kelisiano? A te ‵tonuga loa, a ‵tou fesokotakiga mo te fakapotopotoga e fesoasoani mai ei ke ‵poto tatou.​—Faataoto 13:20; faitau te 1 Petelu 4:⁠10.

15. Kaia e mafai ei o talitonu koe me e mafai o puipui ne Ieova a koe mai i so se mea telā e mafai o fai ei ke galo i a koe tena taliaga?

¹⁵ E seai eiloa se pogai ke fakalotolotolua ei tatou me e mafai o puipui tatou ne Ieova mai i so se mea telā e mafai o fai ei ke galo atu i a tatou tena taliaga. (Loma 8:38, 39) Ko oti ne puipui ne ia te fakapotopotoga mai i lotu ma‵losi mo fili fakapolitiki kolā e taumafai sāle ke se tamate fua tatou, kae ke ‵vae keatea tatou mai i ‵tou Atua tapu. Ko oti eiloa ne fakamaoni aka te ‵tonu o te tautoga a Ieova: “Ka seai eiloa se meatau e mafai o fakapakia ne ia a koe.”​—Isaia 54:⁠17.

Ko oi e Tuku Mai ne ia te Saolotoga ki a Tatou?

16. Kaia e se mafai ei ne te lalolagi o tuku mai te saolotoga ki a tatou?

¹⁶ E mata, a te fai mo tino o Ieova e ave keatea ei ‵tou saolotoga? E ‵kese mai i ei, a te fai mo tino o te lalolagi e ave keatea ei ‵tou saolotoga. E ‵vae keatea te lalolagi mai i a Ieova kae e pulegina ne se atua masei telā e fakapologa ne ia a tino. (Ioane 14:30) E pelā mo te lalolagi a Satani e fakaaoga ne ia a fakalavelave i mea tau tupe ke ave keatea ei mai i tino te lotou saolotoga. (Fakatusa ki te Fakaasiga 13:16, 17.) E isi foki se malosi faka‵se tino o te agasala ke fakapologa ei a tino. (Ioane 8:34; Epelu 3:13) Tela la, kafai foki e folafola mai ne tino sē tali‵tonu a te saolotoga i te taimi e fakamalosi aka ei ne latou se vaegā olaga telā e ‵teke atu ki akoakoga a Ieova, so se tino telā e fakalogo ki ei ka pologa fakavave a ia ki se olaga agasala kae matagā.​—Loma 1:24-32.

17. Se a te saolotoga telā e tuku mai ne Ieova ki a tatou?

¹⁷ I te suā feitu la, ka fakasaoloto tatou ne Ieova mai i so se mea telā e mafai o fakalogo‵mae mai māfai e fakalagolago tatou ki a ia. I nisi auala, e fai eiloa ‵tou tulaga e pelā me se tino telā e tuku atu tena ola ki lima o se tokita tipitipi atamai telā e mafai o fakasaoloto ne tou tagata a ia mai i se tulaga e mafai o mate a ia i ei. E ‵tu atu tatou katoa i se tulaga fakamataku ki te ola​—ko te togimaiga o te agasala. Kafai fua e fakalagolago tatou ki a Ieova, i te fakavae o te taulaga a Keliso, e mafai o fakamoe‵moe tatou ke ‵sao atu i ikuga o te agasala kae ola ki te se-gata-mai. (Ioane 3:36) E pelā eiloa mo te gasolo aka o te ‵tou loto tali‵tonu ki se tokita tipitipi ona ko mea ne fai ne ia, ka gasolo aka foki te ‵tou loto tali‵tonu ki a Ieova i taimi e tumau ei tatou i te tauloto e uiga ki a ia. Tela la, e tumau tatou i te sukesuke faka‵lei ki te Muna a te Atua ona ko te mea ka fesoasoani mai ke a‵lofa atu tatou ki a ia i se auala telā ka ave keatea ei a lagonaga mataku o te fai mo fai ne ana tino.​—1 Ioane 4:⁠18.

18. Se a te ikuga ka maua ne tino kolā e fai mo tino o Ieova?

¹⁸ E tuku mai ne Ieova te saolotoga ke fai a filifiliga ki tino katoa. E fai mai tena Muna: “Ko te ola e ‵tau o filifili ne koutou. Alofa ki te Aliki [ko Ieova] te otou Atua, faka‵logo ki a ia, kae ka ‵nofo leva koutou mo tino i otou gafa i te fenua.” (Teutelonome 30:19, 20) E manako a ia ke fakaasi atu ‵tou a‵lofa ki a ia mai i te faiga eiloa o ‵tou filifiliga mo te fia‵fia ke tavini atu ki a ia. I lō te ave keateaga o ‵tou saolotoga, a te fai mo tino o te Atua telā e a‵lofa tatou ki ei e fai eiloa i ei tatou ke fia‵fia.

19. Kaia e fai ei a te fai mo tino o Ieova e pelā me se fakaasiga o te alofa tauanoa?

¹⁹ E pelā me ne tino agasala, e se ‵tau o fai tatou mo tino o te Atua ‵lei katoatoa. Ko te alofa tauanoa fua o te Atua ne mafai ei o fai tatou penā. (2 Timoteo 1:⁠9) Tela la, ne tusi mai a Paulo: “Kafai e ola tatou, e ola tatou mo te Aliki [ko Ieova], kae kafai foki e ‵mate tatou, e ‵mate tatou mō te Aliki; tela la, me e ola tatou io me ‵mate, ko tino o te Aliki [ko Ieova] tatou.” (Loma 14:⁠8) Ka se mafai eiloa o sala‵mo tatou i te filifiliga ke fai tatou mo tino o Ieova.

Ka Tali Mai Pefea ne Koe?

• Ne a mea aoga e maua i te fai mo tino o Ieova?

• Kaia e mafai ei o fai ne tatou a mea kolā e manako ki ei te Atua ke fai ne tatou?

• E tuku mai pefea ne Ieova a te puipuiga ki ana tavini?

[Ata i te itulau e 14]

Ke fesili atu ki nisi tino a te auala ne maua ei ne latou a mea aoga mai i te fai mo tino o Ieova

[Ata i te itulau e 16]

Ne a nisi auala e tuku mai i ei ne Ieova a te puipuiga?