Ka Takavale Eiloa Te Vaegā Pulega A Satani

“Ka ko tino amio ma‵sei ka se ‵lei olotou olaga.”​—FAILAUGA 8:13.

1. Kaia e fai ei a te fakaokomaiga o te fakamasinoga o tino amio ma‵sei mo fai se tala fakamafanafana loto?

KO SE leva io me i se taimi fakamuli nei ka fakamasino aka ei a tino amio ma‵sei. Ka maua eiloa ne latou a te ikuga o olotou mea ne fai. (Faataoto 5:22; Failauga 8:12, 13) A te mea tenā se tala fakamafanafana, maise eiloa ki a latou kolā e a‵lofa ki te amiotonu kae ne logo‵mae foki i faifaiga sē fakamaoni kae sē ‵lei a tino amio ma‵sei. Kae ko te ‵toe tino amio masei telā ka fakamasino aka ko te tamana o tino ‵loi, ko Satani te Tiapolo.​—Ioane 8:44.

2. Kaia ne manakogina ei se taimi ke fakatoka faka‵lei aka a te kinauga telā ne fakasae aka i Etena?

² I te fatoaga o Etena, ne maua ne Satani a lagonaga fia maluga, telā ne fai ei ne ia a tino ke ‵teke atu ki te auala e pule mai ei a Ieova. Ne iku atu ei ki te ‵kau atu o ‵tou mātua muamua ki te ‵tekeatuga ki te pulega tonu a Ieova kae ne agasala ei lāua i Tena kilokiloga. (Loma 5:12-14) E tonu, ne iloa ne Ieova a te ikuga o olotou faifaiga sē āva kae ‵teke atu ki a ia. Kae ne matea atu eiloa ne tino ola katoa a te ikuga telā ne mafai fua o fakaseke ki ei. Tela la, ne manakogina se taimi leva ke faka‵lei aka ei te kinauga tenei kae ke fakaasi atu foki i se auala mautinoa me ne ‵se ‵ki eiloa a tino ‵teke konei.

3. Se a te ‵tou tulaga i malo o tino?

³ Ona ko te mea ne ‵teke atu a tino ki te takitakiga a Ieova, ne ‵tau o faka‵tu aka ne latou a olotou vaegā pulega. Ne faipati foki a te apositolo ko Paulo, telā ne tusi atu ki tino tali‵tonu i Loma, ki pulega a tagata e pelā me ko “pule o te malo.” I aso o Paulo, a pule o te malo ko te malo o Loma mai i lalo i te pulega a te tupu ko Nelo, telā ne pule atu mai i te 54-68 T.A. Ne fai atu a Paulo me i vaegā pule o malo penā ‘ne talia ne te Atua.’ (Faitau te Loma 13:1, 2.) E mata, e fakauiga i ei me ne folafola atu ne Paulo me e sili atu a pulega a tagata i te auala e pule mai ei te Atua? Ikai, e se penā loa. I lō te fai penā, ne fai atu a ia me kafai e talia ne Ieova ke ‵tu mai a pulega a tagata, e ‵tau o āva a Kelisiano “ki te mea ne filifili ne te Atua” kae talia a vaegā pulega penā.

Se Auala Telā e Iku Atu ki Fakalavelave ‵Lasi

4. Ke fakamatala mai te pogai e seki iku manuia ei a pulega a tino.

⁴ Kae e mautinoa eiloa me ka se manuia a pulega a tagata kolā e ‵lago atu ki ei a Satani. Kaia? E tasi te pogai, me e se fakavae ki te poto mai i te Atua. Ko Ieova fua e katoatoa tena poto. Tela la, ko ia fua tokotasi te takitaki e fakatuagagina telā e iku manuia tena pulega. (Ielemia 8:9; Loma 16:27) E se pelā mo tino kolā e tauloto sāle mai i tofotofoga mo mea ‵se, e iloa faeloa ne Ieova a te ‵toe auala ‵lei ke gasuesue i ei. So se pulega telā e se tautali atu ki tena takitakiga e se mafai eiloa o iku manuia. Mō te pogai eiloa tenā​—e se aofia i ei a lagona ma‵sei​—a te auala e pule mai ei a Satani e auala i pulega a tagata ne mautinoa eiloa tena sē aoga mai i te kamataga.

5, 6. Se a te mea kāti ne takitaki atu ei a Satani ke ‵teke atu ki a Ieova?

⁵ A te tino poto e ‵kalo keatea mai i te fakataunuga o se mea telā ko se aoga. Kafai e tumau eiloa a tena kausaki atu ki te mea tenā, ka faimalogina a ia ke lavea atu tena mea ‵se. Ko oti eiloa ne fakamaoni mai ne tala mua i taimi e uke me e seai eiloa se aoga ke ‵teke atu ki te Mafuaga telā e malosi katoatoa. (Faitau te Faataoto 21:30.) Kae ko Satani, telā ne ‵kivi ona ko lagona fia maluga kae fakamatamata, ne fulitua atu ki a Ieova. Tela la, ne filifili aka eiloa mo te iloa tonu ne te Tiapolo se auala telā ne mafai fua o iku atu ki fakalavelave ‵lasi.

⁶ Ne fakaata fakamuli mai ne te pule o Papelonia a te uiga fakamatamata o Satani telā ne fakamatala mai ana pati fakamatamata konei: “A koe ne taumafai o kake ki te lagi o tuku tou nofogaaliki mai i luga atu o te fetu tafasili i te maluga. Ne mafaufau koe ke sagasaga koe pelā me se tupu i luga i te mauga tenā i matu, te koga e maopoopo ei a atua. Ne fai ake koe pelā i a koe ka kake atu ki taulu o kaumana ke fai koe pelā mo te Atua Malosi.” (Isaia 14:13-15) Ne seki aoga eiloa a taumafaiga a te tupu valea tenā, kae ne iku atu a te pulega maluga o Papelonia ki se fakaseaiga fakamasiasi. E penā foki loa a Satani mo tena lalolagi, ko pili o fakatakavale katoatoa atu.

Kaia ne Talia ne te Atua ke Tu Tokotasi Mai i Tena Pulega?

7, 8. Ne a nisi mea aoga ne maua mai i te taliaga ne Ieova o mea ma‵sei ke ‵tupu mō se vaitaimi leva?

⁷ E mafau‵fau a nisi tino ki te pogai ne seki puipui ei ne Ieova a tino mai i te ‵kau atu ki a Satani mo te tau‵tali atu ki tena pulega telā ko pili o fakaseai atu. E pelā me ko te Atua Malosi Katoatoa, ne mafai eiloa o fai ne ia te mea tenā. (Esoto 6:3) E tiga eiloa te feitu tenā, ne seki fai a ia penā. Ona ko tena poto, ne iloa aka ei ne ia me i tena sē aofia mō se taimi toetoe mai te ‵tekeatuga a te tagata, e mafai eiloa o maua mai i ei a toe mea ‵lei. Fakamuli loa, ka fakamaluga aka ei a Ieova e pelā me se Pule amiotonu kae alofa, kae ka maua ne tino fakamaoni a mea aoga mai i te fakaikuga a te Atua.

⁸ Moi ne ‵teke atu a tino ki fakamalosiga a Satani kae ita fitifiti ke tu tokotasi latou mai i te pulega a te Atua, penei e se pokotia eiloa a te kāiga o tino i fakalavelave faiga‵ta! Kae koi isi ne mea aoga ne maua mai i te fakaikuga a Ieova ke talia a tino ke pule atu ki a latou eiloa. Ko oti ne fai ei ke ofo malosi a tino loto fakamaoni i te poto ke fakalogologo ki te Atua kae tali‵tonu ki a ia. I te fia o senitenali ko ‵teka atu, ko oti eiloa ne taumafai a tino ki vaegā pulega kese‵kese, kae e seai eiloa se mea mai i ei ne fakamaoni aka me ko te ‵toe mea ‵lei. Ko oti eiloa ne fakamalosi atu a te manatu tonu tenā ki tino tapuaki o te Atua i te lotou tali‵tonu me i te pulega a Ieova ko te ‵toe auala ‵lei. A te ‵tonuga loa, a te taliaga ne Ieova a te pulega masei a Satani ne iku atu ki mea faiga‵ta mō tino, e aofia i ei a tino kolā e tapuaki atu mo te fakamaoni ki te Atua. Kae ko te taliaga o amioga ma‵sei mō se taimi sē tumau ne iku atu ki te mauaga ne tino tapuaki fakamaoni konei a mea aoga.

Se ‵Tekeatuga Telā ne Iku Atu ki te Faka‵maluga o Ieova

9, 10. Fakamatala mai a te auala e iku atu ei te pulega a Satani ki tavaega o Ieova.

⁹ A te taliaga o tino ke fakaloiloi ne Satani kae ke pule atu ki a latou eiloa e se fakamasei atu eiloa i ei ki te pulega a Ieova. E se fai eiloa penā! E fakamaoni mai ne tala mua me i pati a Ielemia, kolā ne tusi mai lalo i te takitakiga a te agaga tapu, e uiga ki te sē mafai ne tino o pule atu ki a latou, e tonu ‵ki eiloa. (Faitau te Ielemia 10:23.) E se gata i ei, ne tuku atu ne te ‵tekeatuga a Satani se avanoaga ke fakaasi atu ne Ieova Ana uiga ‵lei i se auala mautinoa. E pefea la?

¹⁰ Ona ko ikuga fakama‵taku o te pulega a Satani, ko momea aka eiloa a te lavea faka‵lei atu o uiga ‵lei katoatoa o Ieova i lō taimi mua. I te auala tenei, ko lavea ‵lei eiloa ne mata o tino kolā e a‵lofa tonu ki a ia. E tonu, e mafai eiloa o ‵tagi fakaatea, kae ko te auala e pule mai ei a Satani ne fai eiloa pelā me se mea ke tavae atu ei ki te Atua. Ko oti ne fakaasi mai i ei a te auala sili ne fakafesagai atu ei a Ieova ki pati ‵toa e uiga ki tena pulega sili. Ke fakamaoni atu a te munatonu tenā, ke na mafau‵fau malie aka tatou ki nisi uiga o Ieova mo te auala ne fai ei ne te pulega masei a Satani ke fakaasi mai ne Ieova a uiga konei i nisi auala.

11. Ne fakaasi mai pefea a te alofa o Ieova?

¹¹ Te Alofa. E fai mai te Tusi Tapu “me i te Atua ko te alofa eiloa a ia.” (1 Ioane 4:8) A te faitega foki o tino i te kamataga, se fakaasiga o te alofa o te Atua. E se gata i ei, a te auala fakaofoofogia kae gali ne faite ei tatou e molimau foki ki te alofa o te Atua. Ne tuku mai foki ne Ieova mo te alofa ki tino se fale gali telā e aofia i ei a mea e manakogina mō te lotou fia‵fia. (Kenese 1:29-31; Salamo 139:14-16) Kae i te taimi ne oko atu a amioga ma‵sei ki te kāiga o tino, ne fakaasi mai ei ne Ieova a tena alofa i auala ‵fou. E pefea la? Ne siki mai ne te apositolo ko Ioane a pati a Iesu: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:16) E mata, ne mafai o fakaasi mai ne te Atua a tena alofa ki tino i se auala tai fakaofoofogia atu i lō te ugamaiga o tena Tama eiloa e tokotasi ki te lalolagi ke fakasaoloto ei a tino agasala? (Ioane 15:13) A te fakaasiga sili tenei o te alofa ne fai pelā me se fakaakoakoga ki tino, mai i te tukuatuga o te avanoaga ke fakaasi atu foki ne latou a te alofa sē fakapito o te Atua i olotou olaga i aso katoa, e pelā mo te mea ne fai ne Iesu.​—Ioane 17:25, 26.

12. Se a te auala ne fakaasi mai i ei te malosi o Ieova?

¹² Malosi. Ko te ‘Atua Malosi Katoatoa’ fua e maua ne ia te malosi ke faite a te ola. (Fakaasiga 11:17; Salamo 36:9) I te taimi e fanau mai ei se tino, e fai eiloa a ia e pelā me se pepa e seai ne mea e tusitusi i ei, i se auala fakatusa. I te taimi e mate ei, ko oti eiloa ne faka‵fonu ne ia te pepa tenā ki fakaikuga, faifaiga, mo atamai i tena olaga kātoa e uiga ki a ia mo ana uiga totino. E mafai eiloa o tausi a fakamatalaga konā i te mafaufau o Ieova. I te taimi tonu, e mafai o toe fakafoki atu ne Ieova a te ola ki te tino, fakatasi mo mea katoa ne aofia i tena olaga kātoa. (Ioane 5:28, 29) Tela la, e tiga eiloa ne seki aofia i te fuafuaga muamua a te Atua mō tino, ne fai ne te mate ke maua ne Ieova se avanoaga ke fakaasi atu me e sili atu tena malosi i te tanuga. A te ‵tonuga loa, a Ieova ko te ‘Atua Malosi Katoatoa.’

13. Ne fakaasi mai pefea a te fakamaoni ‵lei katoatoa o Ieova i te taulaga a Iesu?

¹³ Fakamaoni. E se mafai o loi a Ieova; kae e se mafai foki o gasuesue i se auala sē tonu. (Teutelonome 32:4; Tito 1:2) Ne puke ‵mau faeloa a ia ki tulaga ma‵luga o te munatonu mo te fakamaoni, faitalia me e foliga mai me e se ‵lei te mea tenā ki a ia. (Loma 8:32) Ko tafaga la te fakalogo‵mae ki a Ieova ke lavea atu tena Tama fagasele e mate i luga i se sataulo e pelā eiloa me ne fai a Iesu mo fai se tino pati masei kae se fakamaoni! Kae ona ko tena alofa mō tino sē ‵lei katoatoa, ne loto fiafia a Ieova ke talia ne ia te mea fakalogo‵mae tenei ke tupu ko te mea ke fakamaluga aka ei te tulaga ‵lei katoatoa o tena fakamaoni. (Faitau te Loma 5:18-21.) I te lalolagi telā e ‵fonu i faifaiga sē fakamaoni ne tuku atu ei a te avanoaga ki a Ieova ke fakaasi mai ne ia a te ‵toe fakamaoni sili.

14, 15. Ne a nisi auala kolā ne fakaasi mai i ei a te lasi o te poto mo te kufaki o Ieova?

¹⁴ Poto. Mai tua eiloa o te taimi ne agasala ei a Atamu mo Eva, ne fakaasi mai ne Ieova a te auala ka fakaseai atu ei ne ia a ikuga ma‵sei katoa kolā ne māfua mai i te lā ‵tekeatuga. (Kenese 3:15) A te gasue fakavave e ‵tusa mo te mea tenā, mo te fakaasi malielie mai ne ia o fakamatalaga liki‵liki o te fuafuaga tenei ki ana tavini, ne mafai o matea faka‵lei atu ei a te poto o Ieova. (Loma 11:33) E seai se mea e mafai o taofi aka ei a te fakataunuga mo te manuia ne te Atua ana fuafuaga. I se lalolagi telā e ‵fonu i amioga finalalolagi, taua, uiga faiga‵ta, sē fakalogo, seai se loto alofa, te fakailoga tino, mo amioga ‵loi, ko oti eiloa ne maua ne Ieova se avanoaga e lava kae ‵toe ke fakaasi atu a te poto tonu ki ana mea ola ne faite. Ne fai mai te soko ko Iakopo: “Ka ko te poto mai te lagi, se poto e tulaga muamua i te ‵ma, e filemu, e loto maulalo, e maliegofie; e ‵fonu foki i te alofa kae fakatupu foki ne ia a galuega ‵lei e uke; e fuafua ‵lei ana mea e fai, e se fakatupu masei foki.”​—Iakopo 3:17.

¹⁵ Te Fa‵ki mo te Kufaki. A te uiga o Ieova ko te fa‵ki mo te kufaki ne mafai eiloa o se lavea atu moi ne saga fakavave atu a ia ki te tulaga sē ‵lei katoatoa, agasala, mo vāivāiga o tino. A te loto fiafia o Ieova ke fa‵ki i te fia afe o tausaga e fakaasi mai i ei me e maua ne ia a uiga fakaofoofogia konei i se auala ‵lei katoatoa, kae e ‵tau o loto fakafetai tatou ki ei. E tonu eiloa a te apositolo ko Petelu i te faimaiga me e ‵tau mo tatou o “mafaufau ki te kufaki o te Aliki io me ko te avanoa ko tuku atu ne ia ki a koutou ke faka‵sao ei koutou.”​—2 Petelu 3:9, 15.

16. Kaia e fai ei a te loto fiafia o Ieova ke fakamagalo atu mo fai se pogai mō te fiafia lasi?

¹⁶ Te Loto Fiafia o Fakamagalo. E agasala kae e ‵siga foki tatou katoa i taimi e uke. (Iakopo 3:2; 1 Ioane 1:8, 9) E ‵tau eiloa o loto fakafetai tatou me e loto fiafia a Ieova ke fakamagalo atu tatou i se “auala lasi”! (Isaia 55:7, Tusi Paia, Samoa) Mafaufau foki ki te manatu tonu tenei: A te fa‵nau mai e pelā me ne tino agasala sē ‵lei katoatoa, e ‵tu eiloa tatou i se tulaga ke lagona atu a te fiafia lasi māfai ko fakamagalo ne te Atua a ‵tou mea ‵se. (Salamo 51:5, 9, 17) A te lagona tonu atu eiloa ne tatou a te uiga fakamafanafana loto tenā o Ieova e fakamalosi aka ei ‵tou a‵lofa ki a ia mo te ‵tou fia fakaakoako atu ki a ia i ‵tou faifaiga ki nisi tino.​—Faitau te Kolose 3:13.

Te Pogai ko se ‵Lei Valevale ei te Lalolagi

17, 18. Ne a auala ne seki iku manuia ei a te vaegā pulega a Satani?

¹⁷ A te lalolagi kātoa a Satani​—se vaega o tena pulega​—ko oti faeloa ne takavale i te fia o senitenali ko ‵teka atu. I te 1991, ne fai mai te nusipepa ko The European: “E mata, ko se ‵lei valevale te lalolagi? Ao, e tonu, kae e se māfua mai i faiga a te Atua​—ne masei valevale te lalolagi ona ko ana tino.” Ko oko eiloa i te ‵tonu o te mea tenā! Ona ko te fakamalosiga a Satani, ne filifili aka ei ne ‵tou mātua muamua a te pulega a tino i lō te pulega a Ieova. Ne fakatu aka ei ne lāua se vaegā pulega telā ne seki iku manuia. A te ‵mae mo logo‵maega ne maua ne tino i te lalolagi kātoa ne fakailoga me ko pokotia a te pulega a tino i se masaki tamate tino.

¹⁸ E foliga mai me i te vaegā pulega a Satani e fakamalosi aka ei a te uiga kaimanako. Kae e se mafai ne te kaimanako o fakatakavale a te alofa, telā ko te fakavae o te pulega a Ieova. Ne seki iku manuia te vaegā pulega a Satani i te tukumaiga o tulaga kolā e fakatalitonugina, te fiafia, io me ko te tokagamalie. Ko oti ne fakamaluga aka a te vaegā pulega a Ieova! E mata, e isi ne fakamaoniga o te mea tenā i aso nei? Ao, e pelā mo te mea ka lavea atu ne tatou i te suā mataupu.

Ne a Mea e Tauloto ne Tatou e Uiga ki Pulega Mai i te Faitau ki te . . .

• Loma 13:1, 2?

• Faataoto 21:30?

• Ielemia 10:23?

• Kolose 3:13?

[Ata i te itulau e 25]

Ne seki aoga lele eiloa a te pulega a Satani ki tino

[Ata i te itulau e 25]

U.S. Army photo

WHO photo by P. Almasy

[Ata i te itulau e 26]

E sili fakafia atu eiloa te malosi o Ieova ke oko foki loa ki te tanuga

[Ata i te itulau e 27]

Ne fakaasi mai a te alofa mo te fakamaoni o Ieova i te taulaga a tena Tama