Ko Fakamaluga Aka Te Pulega A Ieova!

“I te Atua Maluga e pule i malo faka te lalolagi.”​—TANIELU 4:17.

1, 2. Ne a nisi pogai ne seki iku manuia ei a pulega a tino?

NE SEKI iku manuia eiloa a pulega a tino! E seai eiloa se fakalotolotolua e uiga ki te mea tenā. A te pogai fakavae mō te sē iku manuia, ko te sē lava o te poto o tino ke pule mai mo te manuia. E lavea malosi atu eiloa a fakamaoniga o te sē iku manuia o pulega a tino i aso nei i te taimi ne fakaasi mai ei ne tino pule e tokouke me i a latou e ‘ma‵natu fakapito, kaima‵nako, fia ma‵luga, pati ma‵sei, e se loto fakafetai, e gutu fatufatu, e faka‵tupu taua, e mata kaitaua, e ita ki te ‵lei, ka fakatupu masei, e se ‵poi i te masei, kae ‵fete foki i te fakamata‵mata.’​—2 Timoteo 3:2-4.

² I aso mua loa, ne ‵teke atu a ‵tou mātua muamua ki te pulega a te Atua. I te faiga o te mea tenā, kāti ne mafau‵fau lāua me ne filifili lāua ke ‵tu tokotasi. Kae ko te ‵tonuga loa, ne faka‵logo lāua ki te pulega a Satani. A te ono miliona o tausaga o faifaiga sē ‵lei a tino​—telā e fakamalosi aka ei ne “te aliki masei o te lalolagi nei,” ko Satani​—ko oti ne fai ei ke masei valevale te olaga o tino i tala mua o tino. (Ioane 12:31) I ana fakamatalaga e uiga ki te tulaga o tino i aso nei, e fai mai The Oxford History of the Twentieth Century me ko oko eiloa i te sē aoga ke “fakamoe‵moe ki se lalolagi ‵lei katoatoa.” E fakamatala mai penei: “E se gata fua i te sē mafai o maua, kae ko taumafaiga ke maua se lalolagi ‵lei katoatoa, ne iku atu fua ki fakalavelave ‵lasi, pulega fakasaua, mo taua tafasili i te ma‵sei.” Ko tafaga te ‵tonu o pati konā me ko seai eiloa se aoga o pulega a tino!

3. Ne a mea e mafai o fai atu ne tatou e uiga ki te auala e pule mai ei te Atua moi ne seki agasala a Atamu mo Eva?

³ Ko oko eiloa i te fakafanoanoa me ne ‵teke atu a ‵tou mātua muamua ki te vaegā pulega fua e tasi telā e ‵lei​—ko te pulega a te Atua! E tonu, e se iloa tonu ne tatou a te taimi ne fakatoka ei ne Ieova tena vaegā pulega ki te lalolagi moi ne tumau a Atamu mo Eva i te fakamaoni ki a ia. Kae e mafai eiloa o tali‵tonu tatou me i te pulega a te Atua telā e talia ne tino ne fakamailoga eiloa ki te alofa mo te sē fakailoga tino. (Galuega 10:34; 1 Ioane 4:8) I te kilo atu ki te poto sē fakanafagina o te Atua, e mafai foki o fakamautinoa aka ne tatou me moi ne tumau eiloa a tino mai lalo i te pulega a Ieova, penei ne mafai eiloa o puipuigina a mea ‵se katoa kolā ne fai ne pulega a tino. A te pulega a te Atua, ka manuia eiloa i te ‘fakamaliega o manakoga o tino katoa.’ (Salamo 145:16) A te ‵tonuga loa, a te mea tenei se pulega ‵lei katoatoa eiloa. (Teutelonome 32:4) Ko oko eiloa i te fakafanoanoa me ne ‵teke atu a tino ki ei!

4. E pefea te lasi o te saolotoga ne talia ei ke pule mai a Satani?

⁴ Se mea ‵lei ke masaua me e tiga eiloa ne talia ne Ieova ke pule atu a tino ki a latou eiloa, e se mafai eiloa o fakagata aka ei tena saolotoga ke pule atu ki ana mea ne faite. Ke oko foki eiloa ki te tupu malosi o Papelonia ne faimalogina ke iloa ne ia me “i te Atua Maluga e pule i malo faka te lalolagi.” (Tanielu 4:17) Ka fai eiloa ne te Malo o te Atua a tena loto mō se taimi tumau. (Mataio 6:10) E tonu, ne talia ne Ieova i se taimi toetoe fua, ke fai a Satani mo fai te “atua masei o te lalolagi nei” ko te mea ke tuku mai ei se tali mautinoa ki kinauga kolā ne faka‵sae aka ne te fili tenā. (2 Kolinito 4:4;1 Ioane 5:19) E tiga eiloa te feitu tenā, e seki fai eiloa ne Satani se mea telā e silia atu i te mea telā e talia ne Ieova. (2 Nofoaiga Tupu 20:6; fakatusa ki te Iopu 1:11, 12; 2:3-6.) Kae ne isi faeloa ne tino kolā ne filifili aka ke faka‵logo latou ki te Atua, faitalia me koi ola latou i se lalolagi telā e pule ne te Fili sili o te Atua.

Te Pulega a te Atua ki Luga i Isalaelu

5. Se a te tautoga ne fai ne Isalaelu ki te Atua?

⁵ Mai i te taimi o Apelu ke oko mai ki aso o te fakatuakaga o te fenua o Isalaelu, ne tapuaki atu eiloa a nisi tino fakamaoni ki a Ieova kae faka‵logo foki ki ana fakatonuga. (Epelu 11:4-22) I aso o Mose, ne fai ne Ieova se feagaiga mo tamaliki a Iakopo, kae ne fai latou mo fai te fenua o Isalaelu. I te 1513 T.L.M., ne tauto atu a te kau Isalaelu mo tino katoa i ei ke talia ne latou a Ieova e pelā me ko te lotou Pule, mai i te fai atu: “Ka fai ne matou a mea katoa kolā ne faipati mai ei te Aliki [ko Ieova].”​—Esoto 19:8.

6, 7. Ne fai pefea te pulega a te Atua ki luga i Isalaelu?

⁶ E isi eiloa se pogai ne filifili aka ei ne Ieova a te kau Isalaelu mo fai ana tino. (Faitau te Teutelonome 7:7, 8.) A te filifiliga tenei ne aofia i ei a mea e uke atu i lō te mauaga fua ne tino Isalaelu a mea ‵lei mai i ei. Ne aofia foki i ei a te igoa o te Atua mo tena pulega sili, kae e tafasili eiloa i te tāua a mea konā. Ne ‵tau o fai a Isalaelu mo fai se molimau ki te manatu tonu me i a Ieova ko te Atua tonu fua e tokotasi. (Isaia 43:10; 44:6-8) Tela la, ne fai atu a Ieova ki te fenua tenā: “A koutou e o te Aliki; ne filifili ne ia koutou mai i tino katoa konei e ‵nofo i te lalolagi, ke fai mo tino o tena fenua.”​—Teutelonome 14:2.

⁷ A te auala ne pule atu ei te Atua ki te kau Isalaelu ne fakaasi mai i ei me ne seki ‵lei katoatoa latou. Ne fakaasi atu foki i ei me ne ‵lei katoatoa ana tulafono kae fakaata atu foki i ei a uiga o te Tino ne tuku mai ne ia. A tulafono a Ieova kolā ne tuku atu e auala i a Mose ne fakaasi faka‵lei mai i ei a te ‵malu o te Atua, tena fiafia malosi ki te fakamaoni, tena loto fiafia o fakamagalo, mo tena kufaki. Fakamuli ifo, i aso o Iosua mo tena kautama, ne faka‵logo a te fenua ki fakatonuga a Ieova kae ne maua ne latou a te filemu mo fakamanuiaga faka-te-agaga. (Iosua 24:21, 22, 31) A te vaitaimi tenā i tala mua o te kau Isalaelu ne fakaasi atu ei te manuia o te pulega a Ieova.

Ne Oko Mai a Ikuga sē ‵Lei i Pulega a Tino

8, 9. Se a te fakamolemole sē ‵lei ne fai ne tino Isalaelu, kae ne a mea ne iku mai i ei?

⁸ I te ‵tekaatuga o taimi, ne fulitua atu faeloa a te kau Isalaelu ki te pulega a te Atua kae ne logo‵mae latou i te galo atu o tena puipuiga. Fakamuli ifo, e auala i te pelofeta ko Samuelu, ne ma‵nako ei a tino Isalaelu ki se tupu, telā e mafai o lavea atu ne latou. Ne fai atu a Ieova ki a Samuelu ke fakataunu te lotou fakamolemole. Kae ne toe fai atu a Ieova: “E se ko koe e ‵teke ki ei a tino; ko au tenei ko ‵teke ne latou ke se fai au mo olotou tupu.” (1 Samuelu 8:7) E tiga eiloa ne talia ne Ieova ke fai ne tino Isalaelu se lotou tupu, ne fakailoa atu ne ia me e maua eiloa a ikuga sē ‵lei māfai ko pule mai se tupu faka-te-foitino.​—Faitau te 1 Samuelu 8:9-18.

⁹ Ne fakaasi mai ne tala mua a te ‵tonu o pati a Ieova. Ne oko atu eiloa a fakalavelave ‵lasi ki tino Isalaelu ona ko te pule atu o se tupu faka-te-foitino, maise eiloa māfai ne seki fakamaoni a te tupu tenā. Mai i te mafau‵fau ki te mea tenā, e sē se mea fakapoi me ne seki iku manuia a pulega a tino kolā e se iloa ne latou a Ieova i te fia o tausaga o aumai a ikuga ‵lei kae tumau. E tonu, e akai atu a nisi takitaki fakapolitiki ki te fakamanuiaga a te Atua ki luga i olotou taumafaiga ke maua te filemu mo te tokagamalie, kae e mafai pefea o fakamanuia ne te Atua a latou kolā e se faka‵logo ki tena pulega?​—Salamo 2:10-12.

Se Fenua Fou Mai Lalo i te Pulega a te Atua

10. Kaia ne sui ei a Isalaelu e pelā me ko te fenua filifilia o te Atua?

¹⁰ Ne fakamaoni atu ne te fenua o Isalaelu a te sē fia‵fia ke tavini atu ki a Ieova mo te fakamaoni. Fakamuli loa, ne ‵teke atu latou ki te Mesia telā ne ‵tofi aka ne te Atua, kae ne ‵teke atu a Ieova ki a latou kae mafaufau a ia ke sui latou ne se potukau o tino kolā ka aofia i se fenua fou. Ne iku atu i ei ki te fanaumaiga o te fakapotopotoga Kelisiano o tino tapuaki fakaekegina ki a Ieova i te tausaga ko te 33 T.A. A te fakapotopotoga tenā, ko te fenua fou mai i lalo i te pulega a Ieova. Ne faipati a Paulo e uiga ki ei e pelā me ko te “Isalaelu a te Atua.”​—Kalatia 6:16.

11, 12. Ne a mea e tai ‵pau ei i te tausiga i te va o tino Isalaelu mo “te Isalaelu a te Atua”?

¹¹ E isi eiloa ne kese‵kesega mo mea e tai ‵pau i ei a te fenua muamua o Isalaelu mo te “Isalaelu a te Atua” fou. E se pelā mo te fenua mua o Isalaelu, e seai se tupu faka-te-foitino o te fakapotopotoga Kelisiano kae e se ‵tau foki o ofo atu ne latou a taulaga manu mō agasala. E tasi te mea e tai ‵pau ei a te fenua o Isalaelu mo te fakapotopotoga Kelisiano ko te fakatokaga o toeaina. (Esoto 19:3-8) E se pule atu a toeaina Kelisiano penā ki te lafu mamoe. I lō te fai penā, e tausi ne latou a te fakapotopotoga kae e fai foki ne latou mo te kaimalie a te takitakiga i galuega faka-Kelisiano. E fakaasi atu ne latou a te alofa i olotou faifaiga ki tino taki tokotasi i te fakapotopotoga, e fakaaloalo kae faka‵malu atu foki ki tino katoa.​—2 Kolinito 1:24; 1 Petelu 5:2, 3.

¹² Mai i te mafaufau ‵loto ki faifaiga a te Atua ki tino Isalaelu, e ati aka ne sui o te “Isalaelu a te Atua” mo olotou taugasoa ko ‘nisi mamoe’ a te loto fakafetai lasi ki a Ieova mo tena pulega. (Ioane 10:16) E pelā mo mea e fakaasi mai i tala mua me i tino pule o Isalaelu ne lasi ‵ki te lotou fakamalosiga ki tino ne pule atu ki ei, i feitu ‵lei io me ko feitu ma‵sei. A te manatu tonu tenā ne fakamalosi atu ki tino kolā e fai ne latou a te takitakiga i va o Kelisiano, me e tiga eiloa e se fai latou mo pule e pelā mo tupu mua, e ‵tau faeloa o tuku atu ne latou se fakaakoakoga ‵lei o te fakatuanaki.​—Epelu 13:7.

Te Auala e Pule Mai ei a Ieova i Aso Nei

13. Ne a mea tāua ne ‵tupu i te 1914?

¹³ E folafola atu ne Kelisiano i aso nei ki te lalolagi me ko pili o palele atu a pulega a tino ki luga i nisi tino. I te 1914, ne fakatu aka ne Ieova tena Malo i te lagi mai lalo i tena Tupu, telā ne ‵tofi aka, ko Iesu Keliso. I te taimi tenā, ne tuku atu ki a Iesu a te pulega ke fanatu o “manumalo sāle i taua.” (Fakaasiga 6:2) Ne fai atu ki te Tupu fou telā ne fakasopo aka: “Pule koe i ou fili.” (Salamo 110:2) Se mea fakafanoanoa me ne ita fitifiti faeloa a atufenua ke faka‵logo ki te pulega a Ieova. Ne tumau eiloa latou i te gasue‵sue e pelā eiloa me “e seai se Atua [ko Ieova].”​—Salamo 14:1.

14, 15. (a) E pulegina pefea tatou i aso nei ne te Malo o te Atua, kae e ‵tusa mo te kilokiloga tenei, ne a fesili e ‵tau o fesili ifo ne tatou? (e) E lavea atu pefea i aso nei a te sili fakafia atu o te pulega a te Atua?

¹⁴ Koi ‵toe eiloa a nai sui fakaekegina o te “Isalaelu a te Atua,” kae e pelā me ne taina o Iesu, e tumau eiloa latou i te gasue‵sue e pelā me ne “sui o Keliso.” (2 Kolinito 5:20) Ko oti ne ‵tofi aka latou e pelā me ko te potukau ko te tavini fakamaoni kae poto kae e tuku mai ne latou a mea‵kai faka-te-agaga ki te kau fakaekegina mo se potukau o Kelisiano, telā e gasolo aka faeloa ki te fia miliona kolā e fakamoe‵moe ke ola i te lalolagi nei ki te se-gata-mai eiloa. (Mataio 24:45-47; Fakaasiga 7:9-15) E lavea atu eiloa a fakamaoniga o te fakamanuiaga a Ieova ki luga i te fakatokaga tenā i te maumea faka-te-agaga telā ko maua ne tino tapuaki ‵tonu i aso nei.

¹⁵ Se mea ‵lei ke fesili ifo tatou taki tokotasi, penei: ‘E mata, e talia katoatoa ne au a tiute kolā e ‵tau o fai i te fakapotopotoga Kelisiano? E mata, e ‵lago faka‵lei atu au ki te pulega a Ieova? E mata, e fakamatamata au ke fai mo fai se tino mai lalo i te Malo o Ieova telā ko pule mai nei? E mata, ko oti ne fakaiku aka ne au ke tumau i te takutaku atu ki tino e uiga ki te Malo o te Atua e ‵tusa mo te mea telā e mafai ne au o fai?’ E pelā me se potukau, e faka‵logo tatou mo te loto fia‵fia ki te takitakiga mai i te Potukau Pule kae ga‵lue fakatasi mo toeaina i te fakapotopotoga. I vaegā auala penā, e fakaasi atu ne tatou a te ‵tou fiafia ki te pulega a te Atua. (Faitau te Epelu 13:17.) A te fakalogo mo te loto fiafia e iku atu ki te tokagamalie i te lalolagi kātoa telā e fai mo fai se mea fakaofoofogia i te lalolagi tenei e ‵nofo mavae‵vae i ei. E fakamalosi aka foki i ei a te filemu mo te amiotonu kae e avatu i ei a tavaega ki a Ieova, me e fakaasi mai i ei me i tena pulega ko te ‵toe vaegā pulega ‵lei.

E Manumalo Eiloa te Pulega a Ieova

16. Se a te fakaikuga e fakafesagai atu ki ei a tino katoa i aso nei?

¹⁶ Ko pilipili mai eiloa a te taimi ka faka‵lei aka ei a kinauga kolā ne faka‵sae aka i Etena. Tela la, tenei eiloa te taimi ke fai ne tino se fakaikuga. E ‵tau o fakaiku aka ne tino taki tokotasi me ka talia ne ia te pulega a Ieova io me ka ‵piki ‵mau a ia ki pulega a tino. Se tulaga taulia eiloa mō tatou ke fesoasoani atu ki tino loto agamalu ke fai ne latou a te filifiliga tonu. E se leva nei, ka sui ei ne te pulega a Ieova i Amaketo a pulega a tino mai lalo i te fakamalosiga a Satani. (Tanielu 2:44; Fakaasiga 16:16) Ka palele atu a pulega a tino, kae ka pule mai a te Malo o te Atua ki te lalolagi kātoa. I te fakataunuga katoatoa o te muna, ka fakamalugagina aka ei a te pulega a Ieova.​—Faitau te Fakaasiga 21:3-5.

17. Ne a manatu ‵tonu e fesoasoani atu ki tino agamalu ke fai ne latou se fakaikuga ‵lei e uiga ki pulega?

¹⁷ A latou kolā e seki fai olotou fakaikuga mautinoa telā e fiafia ki ei a Ieova e ‵tau o ‵talo kae mafaufau ‵loto ki mea aoga ka maua ne tino mai i te pulega a te Atua. Ne seki mafai ne pulega a tino o faka‵lei aka a te fakalavelave ko amioga solitulafono, e aofia i ei a amioga a tagata amio takafia‵toa. Ka ave keatea ne te pulega a te Atua a mea ma‵sei katoa mai i te lalolagi. (Salamo 37:1, 2, 9) Ko oti ne iku atu a te pulega a tino ki taua kolā e fai ‵soko, kae ko te pulega a te Atua ka “fakagata ne ia a taua i te lalolagi kātoa.” (Salamo 46:9) Ka toe fakafoki mai ne te pulega a te Atua a te filemu i te va o tino mo manu! (Isaia 11:6-9) Ko te mativa mo te fiakai ne fai faeloa mo fai ne mea masani mai lalo i te pulega a tino, kae ka fakaseai atu ne te pulega a te Atua a mea konā. (Isaia 65:21) Ne seki mafai foki eiloa ne tino pule kolā ne ‵lei olotou kilokiloga o ave keatea a masaki mo te mate, kae mai lalo i te pulega a te Atua, ka fia‵fia a tino ma‵tua mo tino ma‵saki me ka toe liu talavou latou. (Iopu 33:25; Isaia 35:5, 6) A te ‵tonuga loa, ka toe fai a te lalolagi mo fai se palataiso telā ka toe‵tu aka ki ei a tino ‵mate.​—Luka 23:43; Galuega 24:15.

18. E mafai pefea o fakaasi atu ne tatou me e tali‵tonu tatou i te pulega a te Atua ko te ‵toe pulega ‵lei?

¹⁸ E tonu, ka toe faka‵lei aka ne te pulega a te Atua a logo‵maega katoa ne māfua mai i a Satani i te taimi ne fakamalosi atu ei a ia ki ‵tou mātua muamua ke ‵fulitua atu ki te lā Mafuaga. Kae mafaufau lā ki logo‵maega ne faka‵tupu ne Satani i te 6,000 tupu tausaga, kae ka faka‵lei aka ne te Atua, e auala i a Keliso a logo‵maega katoa konā i loto i te afe tausaga! Ko se fuafuagina eiloa te fakamaoniga o te sili atu o te pulega a te Atua! E pelā me ne Molimau a te ‵tou Atua, e talia ne tatou a ia e pelā me ko te ‵tou Pule. Tela la, ke na fakaasi atu ne tatou i aso takitasi, i itula takitasi o ‵tou olaga, me e fai tatou mo tino tapuaki a Ieova, tino mai lalo i tena Malo, kae fakamata‵mata tatou ke fai mo fai ana Molimau. Kae ke na fakaaoga ne tatou so se avanoaga ke fai atu ki so se tino telā ka fakalogo mai me i te pulega a Ieova ko te ‵toe pulega ‵lei eiloa.

E Pelā mo te Pulega a te Atua, ne a Mea ne Tauloto ne Tatou Mai i te Faitauga ki te . . .

• Teutelonome 7:7, 8?

• 1 Samuelu 8:9-18?

• Epelu 13:17?

• Fakaasiga 21:3-5?

[Ata i te itulau e 29]

Ko oti faeloa ne fakatumau ne Ieova tena pulega

[Ata i te itulau e 31]

A te fakalogo mo te loto fiafia ki te pulega a Ieova e iku atu ki te tokagamalie i te lalolagi kātoa