‘Ke Faipati Atu Te Muna A Te Atua Mo Te Loto Toa’

“Ko ‵fonu katoa latou i te agaga tapu, kamata eiloa o fai‵pati atu ne latou a te muna a te Atua mo te loto toa.”​—GALUEGA 4:31.

1, 2. Kaia e ‵tau ei mo tatou o taumafai ke ma‵goi te faiga o te ‵tou galuega talai?

I TE tolu o aso mai mua o tena mate, ne fai a Iesu ki ana soko, penei: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.” A koi tuai o fanaka a ia ki te lagi, ne fakatonu atu a Iesu telā ne toetu aka ki ana soko ke ‘fai a tino mo ana soko, akoako atu foki latou ke faka‵logo ki mea katoa kolā ne fakatonu atu ne ia ki a latou.’ Ne tauto atu a ia me ka fakatasi a ia mo latou “ke oko eiloa ki te gataga o te lalolagi.”​—Mataio 24:14; 26:​1, 2; 28:​19, 20.

² E pelā me ne Molimau a Ieova, e ‵kau malosi atu tatou ki se galuega telā ne kamata i te senitenali muamua. E seai aka foki se galuega e ‵pau tena aoga mo te galuega talai fakaola tino o te Malo mo te faiga o soko. Kae ko oko eiloa i te tāua ke ma‵goi tatou i te faiga o te ‵tou galuega talai! I te mataupu tenei, ka matea atu ne tatou a te auala e fesoasoani mai ei a te takitakiga a te agaga tapu ke fai‵pati atu tatou mo te loto ‵toa i te taimi e ‵kau atu ei tatou ki te galuega talai. Ka fakaasi mai ne te avā mataupu kolā e ‵soko mai ki ei a te auala e mafai ei o takitaki tatou ne te agaga o Ieova ke akoako atu mo te atamai kae ke tumau foki i te talai atu.

E ‵Tau mo Tatou o Loto ‵Toa

3. Kaia e manakogina ei a te loto toa i te kau atu ki te galuega talai o te Malo?

³ A te galuega ko te folafolaatuga o te Malo telā ne tuku mai ne te Atua se tauliaga tafasili i te fakaaloalogina. Kae e faigata eiloa i nisi taimi. E tiga eiloa e talia mo te fia‵fia ne nisi tino a te tala ‵lei o te Malo o te Atua, e fakamaoni mai ne tino e tokouke me e fai eiloa latou e pelā mo tino kolā ne ola i aso o Noa. Ne fai mai a Iesu: “Ne seki iloa ne latou a mea ne ‵tupu ke oko ki te pokoga o te lolo telā ne tapea‵pea ei a latou katoa.” (Mataio 24:​38, 39) Kae e isi foki ne tino kolā e fakatauemu io me e ‵teke mai ki a tatou. (2 Petelu 3:3) E mafai o ‵teke mai a tino pule, tama‵liki i te akoga io me ko tino e ga‵lue tasi tatou, ke oko foki eiloa ki kāiga ‵pili. E se gata i ei, e ‵tau o ‵teke atu tatou ki ‵tou vāivāiga totino, e pelā mo te mata ma mo te mataku ki tino. E mafai eiloa o uke a mea e fai ei ke faigata ki a tatou ke ‘‵tala ‵tou gutu’ kae fai‵pati atu a te muna a te Atua “mo te sē poi,” io me ko te loto toa. (Efeso 6:​19, 20) A te tumau i te faipati atu o te muna a te Atua e manakogina i ei a te loto toa. Ne a mea e mafai o fesoasoani mai ke maua ne tatou a te loto toa?

4. (a) Se a te loto toa? (e) Ne fakamalosi aka pefea ne te apositolo ko Paulo a te loto toa ke faipati atu ki te kau Tesalonia?

⁴ A te pati Eleni telā ne ‵fuli ki te “loto toa” e fakauiga ki te “sē mataku ma faipati atu, faipati ‵tonu atu, mo te faipati atu i se auala manino.” E fakaasi mai i te pati tenā a te manatu e uiga ki te “loto malosi, loto talitonu, . . . mo te sē mataku.” E se fakauiga a te loto toa ki te pati ‵toko io me ko te sē āva. (Kolose 4:6) E tiga eiloa e ‵tau o loto ‵toa tatou, e ‵tau foki mo tatou o taumafai ke filemu te ‵tou va mo tino katoa. (Loma 12:18) E se gata i ei, i te taimi e talai atu ei ne tatou a te tala ‵lei o te Malo o te Atua, e ‵tau o fakatumau ne tatou se kilokiloga paleni ‵lei i te va o te loto toa mo te atamai i te faipati atu ko te mea ke se fakaitaita ne tatou se tino e aunoa mo te iloa atu. A te ‵tonuga loa, e manakogina ne te loto toa a uiga kolā e ‵tau o taumafai malosi ke ati aka ne tatou. E se maua a te vaegā loto toa tenei mai i ‵tou malosi eiloa. Mai tua o te ‘sonafai mo te muna maseigina’ o te apositolo ko Paulo mo ana taugasoa i Filipi, ne mafai pefea o maua ne latou a te “loto malosi” io me ko te loto toa ke fai‵pati atu ki tino i Tesalonia? E auala i “te motou Atua,” ne tusi mai a Paulo. (Faitau te 1 Tesalonia 2:2.) E mafai o ave keatea ne Ieova a ‵tou lagonaga ma‵taku kae tuku mai ne ia ki a tatou a te loto toa tai ‵pau.

5. Ne tuku atu pefea ne Ieova a te loto toa ki a Petelu, Ioane, mo nisi soko?

⁵ I te taimi ne ‵teke atu ei “a takitaki o [tino] Iutaia, toeaina mo faiakoga o te Tulafono,” ne fai atu a te apositolo ko Petelu mo Ioane: “Fai mai ake me tefea te mea e tonu i mua o te Atua: ko te faka‵logo ki a koutou io me ko te faka‵logo ki te Atua? Me se mafai o fakagata ne māua te ma fai‵pati ki mea ne matea kae lagona ne māua.” I lō te ‵talo atu ki te Atua ke fakagata a fakasauaga, ne akai atu penei latou mo taina tali‵tonu: “Tela la e te Aliki, sa saga ki te lotou pulepulega masei, kae fesoasoani mai ki a matou, ko au tavini, ko te mea ke fai‵pati ne matou tau muna mo te loto toa.” (Galuega 4:​5, 19, 20, 29) Ne saga atu pefea a Ieova ki te lotou akai? (Faitau te Galuega 4:31.) Ne fesoasoani atu a Ieova ke maua ne latou a te loto toa e auala i tena agaga. E mafai foki o fai ne te agaga o te Atua a te mea tenā ki a tatou. E mafai la pefea o maua ne tatou a te agaga o te Atua ke takitaki i ei a tatou i te galuega talai?

Ke Fakamalosi Aka te Loto Toa

6, 7. Se a te ‵toe auala ‵lei ke maua ei te agaga tapu o te Atua? Tuku mai ne fakaakoakoga.

⁶ A te ‵toe auala ‵lei ke maua ei te agaga tapu o te Atua ko te akai atu ki ei. Ne fai atu a Iesu ki ana tino fakalogo‵logo: “Tela la, kafai koutou e ma‵sei, kae e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te agaga tapu ki tino kolā e fakamolemole atu ki a ia?” (Luka 11:13) A te ‵tonuga loa, e ‵tau o ‵talo atu faeloa tatou mō te agaga tapu. Kafai e isi ne vaega o te galuega talai​—e pelā mo te talai atu i auala, i taimi e seki fuafuagina, io me ko koga ga‵lue​—⁠e ‵ma tatou i ei, e mafai o ‵talo atu tatou ki a Ieova mō tena agaga kae akai atu ke fesoasoani mai ke maua te loto toa telā e manakogina.​—1 Tesalonia 5:17.

⁷ Tenā eiloa te mea ne fai ne se fafine Kelisiano e igoa ki a Rosa.a I te aso e tasi ne nofo atu ei a Rosa i tena koga galue, e isi se faiakoga e ga‵lue tasi lāua e faitau ne ia se lipoti mai i se isi akoga e uiga ki te sonafai o tama‵liki i ei. Ne fanoanoa malosi te faiakoga ki mea ne faitau ne ia telā ne tagi malosi kae fai atu, “Tapa, se a katoa la te masei o te lalolagi tenei?” Ne seki mafai o fakaseke ne Rosa a te avanoaga ke tuku atu se molimau. Ne a ana mea ne fai ke maua ne ia te loto toa ke faipati atu? ‘Ne ‵talo atu au ki a Ieova kae akai atu mō tena agaga ke fesoasoani mai ki a au,’ ko muna a Rosa. Ne mafai ei o tuku atu ne ia se molimau ‵lei kae fai foki a fakatokaga ke toe sau‵tala ki nisi mataupu. Mafaufau foki la ki se tamaliki fafine ko lima ana tausaga e igoa ki a Milane, telā e nofo i te fa‵kai ko Niu Ioki. E fai mai a Milane: “A koi tuai o fanatu au ki te akoga, e ‵talo atu faeloa māua mo toku mami ki a Ieova.” Ne a mea e ‵talo atu lāua ki ei? Ke maua ne Milane a te loto toa ke tu ‵mautakitaki kae faipati atu foki e uiga ki tena Atua! Ne fesoasoani atu a te mea tenei ki a Milane ke fakamatala atu ne ia tena tulaga i aso fanau mo aso malō‵lō kae ke ‵kalo keatea foki mai i te kau atu i taimi ko fakamanatu ei a mea konei,” ko muna a tena mātua. E mata, e se fakaasi mai i fakaakoakoga konei me kafai e fia fakamalosi aka a te loto toa, e tāua eiloa a te faiga o ‵talo?

8. Ne a mea e mafai o tauloto ne tatou mai i te pelofeta ko Ielemia e uiga ki te loto toa?

⁸ Mafaufau foki ki te mea ne fesoasoani atu ki a Ielemia ke maua ne ia te loto toa. I te taimi ne ‵tofi aka ei ne Ieova a ia e pelā me se pelofeta ki atufenua, ne tali atu a Ielemia: “E se iloa ne au o faipati, au koi foliki.” (Ielemia 1:​4-6) Kae fakamuli ifo, ne kamata o fakamaoni kae malosi a Ielemia i tena galuega talai telā ne ‵kilo atu a tino e tokouke ki a ia e pelā me se tino telā e faipati fua ki fakalavelave faiga‵ta. (Ielemia 38:4) I tausaga e silia atu i te 65, ne folafola atu ne ia mo te loto toa a fakamasinoga a Ieova. Ne lauiloa malosi eiloa a ia i Isalaelu ona ko tena talai atu e aunoa mo te mataku mo te loto malosi, tela la, i te taimi ne faipati atu ei a Iesu mo te loto toa i te 600 tausaga mai tua ifo i ei, ne tali‵tonu a nisi tino me ko toe ola mai a Ielemia. (Mataio 16:​13, 14) Ne manumalo pefea a te pelofeta ko Ielemia telā ne ita muamua ma talai atu ona ko te mata ma? E fai mai a ia: “Ko tau fekau [te muna a te Atua] ka ‵ka pelā me se afi i loto i a au. E taumafai au o taofi i loto, kae e se mafai eiloa o taofi ne au.” (Ielemia 20:9) E tonu, ne tuku atu ne te muna a Ieova a te ‵mana ki a Ielemia kae ne fakamalosi aka ei tou tagata ke faipati atu.

9. Kaia e mafai ei o pokotia tatou i te muna a te Atua e pelā mo te auala ne pokotia ei a Ielemia?

⁹ I tena tusi ki te kau Epelu, ne tusi atu a te apositolo ko Paulo: “Me i te muna a te Atua e ola kae galue mo te ‵mana. E sili atu foki tona ‵kai i se pelu e ‵kai matalua. E ‵suki ne ia te loto mo te agaga ke mavaelua, ke oko foki eiloa ki sokoga ivi mo ‵kano; e fakamasino foki ne ia a manako mo mafaufauga o loto o tino.” (Epelu 4:12) E mafai o pokotia tatou i te fekau, io me ko te muna a te Atua e pelā mo te auala ne pokotia ei a Ielemia. Masaua la me faitalia eiloa ne fakaaoga a tagata ke tusi a te Tusi Tapu, e se aofia a poto o tino i te tusi tenei, me ne fakaosofia eiloa ne te Atua a te tusiga. I te 2 Petelu 1:​21, e fai‵tau tatou, penei: “Me e seai eiloa se talaiga fakapelofeta kai vau mai i te loto eiloa o te tino, ka ko te agaga tapu e fakatasi atu ki tino kolā e folafola atu ne latou a te talaiga telā ne aumai mai i te Atua.” Kafai e fakaaoga faka‵lei ne tatou a taimi ke fai ‵tou sukesukega aoga ki te Tusi Tapu, ka ‵fonu a ‵tou mafaufau i te fekau telā ne fakaosofia ne te agaga tapu. (Faitau te 1 Kolinito 2:10.) E mafai o fai a te fekau tenā e pelā me se ‘afi ‵ka’ i loto i a tatou, telā ko se mafai eiloa ne tatou o taofi aka.

10, 11. (a) E ‵tau o fai pefea a ‵tou sukesukega ki te Tusi Tapu māfai e fia maua ne tatou a te loto toa ke fai‵pati atu? (e) Ke taku mai se mea e tasi e mafaufau koe o fai ke momea aka ei a te ‵lei o au sukesukega totino.

¹⁰ Ke maua ne tatou a fakamalosiga mai i ‵tou sukesukega totino ki te Tusi Tapu, e ‵tau o fai i se auala telā e pokotia ei ‵tou lagonaga i te fekau i te Tusi Tapu. E pelā mo te pelofeta ko Esekielu telā ne tuku atu ki ei se fakaasiga ke kai ki te pelugā tusi telā e aofia i ei se fekau tāua ke fakaoko atu ki tino loto ma‵keke. Ne ‵tau o malamalama katoatoa a Esekielu i te fekau kae fai foki mo vaega o tena foitino. A te faiga tenā e fai ei ke fakafiafia a te fakaokoatuga o te fekau​—e pelā mo te gali o te hani.​—Faitau te Esekielu 2:8–3:​4, 7-9.

¹¹ E ‵tu atu tatou i se tulaga tai ‵pau mo Esekielu. I aso nei, e se fia faka‵logo mai a tino e tokouke ki pati i te Tusi Tapu. Kafai e fia tumau tatou i te fai‵pati atu o te muna a te Atua, se mea tāua ke suke‵suke tatou ki te Tusi Tapu i se auala telā e fai ei ke malamalama kae tali‵tonu katoatoa tatou ki ei. E ‵tau o fai faeloa​—kae e se ko te fai, oti, ko se fai​—⁠a ‵tou sukesukega. E ‵tau o fai ‵tou manakoga e pelā mo te faisalamo telā ne usu mai, penei: “Te Aliki, toku lafiga mo toku fakaolataga, ke talia mai ne koe aku muna mo oku mafaufauga!” (Salamo 19:14) Ko oko eiloa i te tāua ke mafaufau ‵loto tatou ki mea e fai‵tau ne tatou, ko te mea ke ‵goto tonu eiloa ki te loto a muna‵tonu i te Tusi Tapu! E mautinoa i ei, me e ‵tau mo tatou o taumafai ke momea aka te ‵lei o ‵tou sukesukega totino.b

12. Kaia e fesoasoani mai a fakatasiga Kelisiano ke takitaki ei tatou ne te agaga tapu?

¹² A te suā auala ke maua ei a mea aoga mai i te agaga tapu o Ieova ko te “mafaufau te suā tino ki te suā tino, ke fakatau fesoasoani foki koutou o fakaasi te alofa mo te fai mea ‵lei. Ke tumau faeloa te maopoopo sāle o tatou, e pelā mo te mea e masani ei a nisi tino o koutou.” (Epelu 10:​24, 25) A te taumafai malosi o tatou ke ‵kau atu faeloa ki fakatasiga a Kelisiano, ke fakalogologo faka‵lei, mo te fakagaluegaga o mea e tauloto ne tatou, ne auala ‵lei ke takitaki ei tatou ne te agaga. E se gata i ei, e tuku mai eiloa ne te agaga o Ieova a te takitakiga e auala i te fakapotopotoga, ne?​—Faitau te Fakaasiga 3:6.

Mea Aoga i te Taumafai ke Maua te Loto Toa

13. Ne a mea e mafai o tauloto ne tatou mai i mea ne fai ne Kelisiano i te senitenali muamua i te galuega talai?

¹³ A te agaga tapu ko te ‵toe malosi ‵mana eiloa i te lagi mo te lalolagi, kae e mafai o fakamalosi aka ei a tino ke fai ne latou a te loto o Ieova. Mai i lalo i tena fakamalosiga, ne fakataunu ei ne Kelisiano i te senitenali muamua se matugā galuega talai lasi. Ne talai atu ne latou a te tala ‵lei “ki tino katoa mai lalo o te lagi.” (Kolose 1:23) Kafai e mafau‵fau tatou ki te tokoukega o latou kolā “e seki a‵koga,” e fakamaoni mai eiloa i ei me ne fakamalosi aka latou ne se mea telā e sili atu tena malosi.​—Galuega 4:13.

14. Se a te mea e mafai o fesoasoani mai ke maua te loto finafinau “e pelā mo te ‵ka o se afi fakatasi mo te agaga”?

¹⁴ A te ola i se auala telā e fai ei ke takitaki ‵tou olaga ne te agaga tapu e mafai o fakamalosi aka foki ei tatou ke fakataunu a te ‵tou galuega talai mo te loto malosi. A mea tāua e lua o te ‵talo atu faeloa mō te agaga, te faiga faeloa mo te loto fiafia a sukesukega totino kae aoga, te mafaufau ‵loto mo te ‵talo atu e uiga ki mea e fai‵tau tatou ki ei, mo te ‵kau atu faeloa ki fakatasiga Kelisiano e mafai o fesoasoani mai ke “ga‵lue malosi” tatou. (Loma 12:11) E fai mai te Tusi Tapu e uiga ki “se tagata Iutaia e igoa ki a Apolo, ne fanau i Alesania, kae ne vau ki Efeso,” penei: “Ne akoakogina a ia i Ala Tonu o te Aliki; kae loto malosi foki a ia o akoako tonu atu a mea ‵tonu e uiga ki a Iesu.” (Galuega 18:​24, 25) Mai i te “‵ka e pelā me se afi fakatasi mo te Agaga” e mafai eiloa o fakaasi atu ne tatou a te loto toa i te ‵tou galuega talai mai fale ki fale mo te talai atu i taimi e seki fuafuagina.​—Loma 12:​11, The Bible​—An American Translation.

15. E aoga pefea ki a tatou a te fai‵pati atu mo te loto toa lasi?

¹⁵ A te momea aka o te ‵tou loto toa i te talai atu e maua ei ne tatou a mea aoga. E momea aka ei a te ‵lei o ‵tou kilokiloga me ko malamalama katoatoa tatou i te tāua mo te aoga o te ‵tou galuega. E momea aka i ei a te ‵tou loto finafinau ona ko te mea ko maua ne tatou a te fiafia lasi i te taimi ko magoi ei te faiga o ‵tou galuega talai. Kae e fakamalosi aka foki a te ‵tou loto finafinau ona ko te mea ko momea aka a te ‵tou matapula‵pula ki te tāua o te galuega talai.

16. Ne a mea e ‵tau o fai ne tatou māfai ko gasolo o vāivāi a te ‵tou loto finafinau mō te galuega talai?

¹⁶ Kae e a māfai ko galo atu te ‵tou loto finafinau mō te galuega talai io me ko se ‵pau eiloa ‵tou mea e fai e pelā mo aso mua? Ko ‵tau ei o fai ne koe se iloiloga mo te fakamaoni e uiga ki a koe eiloa. Ne tusi mai a Paulo: “Ke sukesuke ifo faka‵lei koutou ki a koutou eiloa, me mata e ‵mautakitaki koutou i te otou fakatuanaki.” (2 Kolinito 13:5) Ke fesili ifo koe penei: ‘E mata, koi maua ne au te loto finafinau? E mata, e ‵talo atu au ki a Ieova mō tena agaga? E mata, e fakaasi atu i aku ‵talo me e fakalagolago au ki a ia ke fai tena loto? E mata, e aofia i ei a pati fakafetai mō te galuega ne tuku mai ne ia ki a tatou? E pefea aku faifaiga i aku sukesukega totino? E pefea te uke o oku taimi e fakamāumāu ki te mafaufau ‵loto ki mea e faitau kae lagona ne au? E pefea te uke o taimi e fai ei oku tusaga i fakatasiga a te fakapotopotoga?’ A te mafaufau ki vaegā fesili penei e mafai o fesoasoani atu ke iloa ne koe a auala kolā e vāivāi ei koe kae taumafai o toe faka‵lei aka.

Ke na Talia te Agaga o te Atua ke Fai Koe ke Loto Toa

17, 18. (a) E pefea te lasi o te galuega talai telā e fai i aso nei? (e) E mafai pefea o fakaasi atu ne tatou a te ‵tou ‘fai‵pati atu e aunoa mo se fakalavelave’ i te folafolaatuga o te tala ‵lei o te Malo o te Atua?

¹⁷ Ne fai atu a Iesu, telā ne toetu aka, ki ana soko: “Ka faka‵fonugina koutou i te ‵mana manafai e oko atu ki luga i a koutou a te agaga tapu. Ka fai foki koutou mo molimau ki a au i Ielusalema, i Iutaia kātoa mo Samalia, ke oko eiloa ki kapakapalagi o te lalolagi.” (Galuega 1:8) A te galuega telā ko oti ne kamata i te taimi tenā ko fai i se auala lasi ‵ki i aso nei. Ko tai kātoa nei te fitu miliona o Molimau a Ieova e folafola atu ne latou a te fekau o te Malo i atufenua e silia atu i te 230, kae fakamāumāu ne latou a itula toeitiiti ko kātoa te 1.5 piliona i te faiga o te galuega talai i te tausaga. Ko oko eiloa i te fakafiafia loto a te ‵kau atu mo te loto finafinau ki te galuega telā ka se toe fai eiloa!

¹⁸ E pelā mo mea ne ‵tupu i te senitenali muamua, e fai eiloa a te galuega talai i aso nei mai lalo i te takitakiga a te agaga o te Atua. Kafai e ‵saga atu tatou ki te takitakiga a te agaga, ka ‘seai foki ne fakalavelave e taofigina ei ‵tou fai‵pati atu’ i te ‵tou galuega talai. (Galuega 28:31) Tela la, ke na takitaki eiloa tatou ne te agaga i te taimi e folafola atu ei te tala ‵lei o te Malo o te Atua!

[Fakamatalaga fakaopoopo]

Ne a Mea ne Tauloto ne Koe?

• Kaia e ‵tau ei o loto ‵toa tatou i te fai‵pati atu o te muna a te Atua?

• Se a te mea ne fesoasoani atu ki soko mua ke fai‵pati atu mo te loto toa?

• E mafai pefea o maua ne tatou a te loto toa?

• E aoga pefea ki a tatou a te mauaga o te loto toa?

[Ata i te itulau e 13]

E mafai pefea o fesoasoani atu a mātua ki olotou tama‵liki ke maua ne latou a te loto toa?

[Ata i te itulau e 14]

A te faiga o se tamā ‵talo e mafai o fesoasoani atu ki a koe ke fakamalosi aka tou loto toa i te galuega talai