Mea Kolā ne Akoako Atu ne Iesu e Uiga ki te Malo o te Atua

“Ne malaga Iesu i loto i fa‵kai ‵lasi mo fa‵kai fo‵liki, o takutaku atu te Tala ‵lei e uiga ki te Malo o te Atua.”​—LUKA 8:1.

E MA‵NAKO eiloa tatou o fai‵pati atu e uiga ki mea kolā e tāua ki a tatou, mea kolā e pele i ‵tou loto. E pelā mo pati a Iesu, “me i te gutu e faipati mai ne ia a mea e uke i te loto.” (Mataio 12:34) Kafai e mafau‵fau tatou ki mea kolā ne faipati ki ei a Iesu i tena galuega talai, e mafai o fai atu tatou me i te Malo o te Atua ne pele ‵ki i tena loto.

Se a te Malo o te Atua? A te malo se pulega telā e pule ne se tupu. Tela la, a te Malo o te Atua se pulega telā e fakatoka ne te Atua. Ne faipati a Iesu e uiga ki te Malo o te Atua, kae fai ne ia e pelā me ko te matua o tena fekau. E sili atu i te 110 o fakamatalaga ki te Malo tenā i Tusi Evagelia konei e fa. Kae ne seki akoako atu fua a Iesu e auala i ana pati. Ne akoako atu foki ne ia mea e uke e uiga ki te Malo o te Atua mo mea kolā ka fai ne te Malo tenā, e auala i ana faifaiga.

Ko oi a te Tupu i ei? A te Tupu o te Malo o te Atua e se fai pelā me e palotagina ne tino. I lō te fai penā, a te Pule tenei ne filifili eiloa ne te Atua. Ne fakaasi atu ne Iesu i ana akoakoga, me i a ia ko te tino telā ne filifili aka ne te Atua ke fai mo Tupu.

Ne iloa ne Iesu me ne ‵valo mai i valoaga i te Tusi Tapu me i te Mesia telā folafola mai ka pule ne ia se Malo telā e se toe gata mai. (2 Samuelu 7:12-14; Tanielu 7:13, 14; Mataio 26:63, 64) Ke masaua me ne folafola atu ne Iesu a ia eiloa e pelā me ko te Mesia. Tela la, ne iloa ne Iesu me i a ia ko te Tupu telā ne ‵tofi aka ne te Atua. (Ioane 4:25, 26) E tonu, ne fakaaoga fakafia ne Iesu a te tugapati tenei “toku malo.”​—Ioane 18:36.

Ne akoako atu foki a Iesu me e isi aka foki ne tino kolā ka pule fakatasi mo ia i te Malo. (Luka 22:28-30) Ne taku ne ia a pule lagolago konei ki se “lafu foliki” me e foliki fua te aofaki o latou. Ne fai atu a ia e uiga ki a latou: “Ko loto fiafia eiloa te otou Tamana o tuku atu ki a koutou a te Malo.” (Luka 12:32) E fakaasi mai i te ‵toe tusi o te Tusi Tapu me ka maua ne te toko 144,000 a te tauliaga ke pule fakatasi mo Keliso.​—Fakaasiga 5:9, 10; 14:1.

Ne fakatu i fea te Malo tenā? Ne fai atu a Iesu ki te tupu o Loma ko Ponitio Pilato, penei: “E se mai te lalolagi nei a toku Malo.” (Ioane 18:36) Ka pule mai a te Malo o te Atua mai lalo i a Keliso ki tino katoa. Ne fakasino fakafia atu a Iesu ki te Malo o te Atua e pelā me ko “te Malo o te lagi.”a (Mataio 4:17; 5:3, 10, 19, 20) Tela la, a te Malo o te Atua se pulega i te lagi.

Ne fakamoemoe katoatoa a Iesu ke foki atu ki te lagi mai tua o tena nofoga i te lalolagi. I konā, ne fai mai a ia, me ka ‘fakatoka ne ia se koga,’ mai te ‵tala atu o te auala ke ‵kau atu ki a ia ana pule lagolago.​—Ioane 14:2, 3.

Se a te mea ka fakataunu ne te Malo? Ne akoako ne Iesu ana tino fakalogo‵logo ke ‵talo ki te Atua: “Ke oko mai tou Malo, ke fai te mea e loto koe ki ei i lalo nei e pelā mo te faiga i te lagi.” (Mataio 6:9, 10) Ko oti ne fai te loto o te Atua i te lagi. A te Malo ko te auala telā ne fakatoka ke fakataunu ei a te fuafuaga a te Atua mō te lalolagi. Ke fakataunu a te mea tenā, ka fai ne te Malo a ‵fuliga tāua ki te lalolagi.

Se a te mea ka fai ne te Malo i te lalolagi? Ne akoako mai ne Iesu me ka fakaseai ne te Malo o te Atua a mea ma‵sei katoa mai te ave keateaga o tino kolā ne fakaiku aka ke fai ne latou a mea ma‵sei konā. (Mataio 25:31-34, 46) Tenā eiloa te fakaotiga o vaega katoa o faifaiga sē fakamaoni mo mea ma‵sei. Ne akoako mai ne Iesu me ka ‵fonu te lalolagi i tino kolā e “loto maulalo,” amio‵tonu, a‵lofa fakamagalo, “loto ‵ma,” kae filemu.​—Mataio 5:5-9.

E mata, ka ‵nofo atu a vaegā tino fakamaoni penā i se paneta lailai? E se taitai eiloa! Ne folafola mai ne Iesu me ka isi ne ‵fuliga fakaofoofogia mai lalo i te Malo o te Atua. Ne fai atu se tagata telā ka fai o tamate ki a Iesu, penei: “Masaua mai au manafai e vau koe i tou ‵malu fakatupu.” Ne tali atu a Iesu ki a ia: ‘Au e muna ‵tonu atu ki a koe i te aso nei, ka fetaui tāua i te Palataiso.’ (Luka 23:42, 43) Ao, ka ‵fuli ne te Malo o te Atua a te lalolagi tenei ki se lalolagi palataiso​—faka‵pau ki te fatoaga o Etena.

Ne a foki a nisi mea ka fai ne te Malo mō tino? Ne fai ne Iesu a mea e uke atu i lō te folafola atu o mea ka fai ne te Malo o te Atua. Ne fakaasi atu foki ne ia a mea ka fai ne te Malo tenei. Ne fai ne Iesu a vavega e uke ki te faka‵leiga o masaki, telā se ata foliki fua o mea ka fai ne ia i aso mai mua i tena Malo. Ne fakamau ne te Evagelia a pati a Iesu: “Ne fano sāle a Iesu i Kalilaia kātoa, o akoako atu i olotou fale tapuaki, o folafola atu foki a te Tala ‵Lei o te Malo, kae o faka‵lei foki a tino ma‵saki kolā e maua ne masaki valevale.”​—Mataio 4:23.

Ne faka‵lei ne Iesu a masaki e uke. Ne “faka‵pula ne ia a mata o se tino ne fanau mai e ‵kivi.” (Ioane 9:1-7, 32, 33) Ne faka‵lei ne Iesu se tagata telā ne maua ne te masaki ko te lepela, mai te fakapatele atu mo te atafai ki a ia. (Maleko 1:40-42) Ne “aumai ne latou ki a ia a te tagata ‵tuli kae gūgū,” kae ne fakaasi atu ne Iesu me ne mafai ne ia o fai “a tino ‵tuli ke ‵logo olotou taliga, mo tino gūgū ke fai‵pati.”​—Maleko 7:31-37.

E se mafai o sao te mate i lima o te Tupu filifilia a te Atua. I taimi e tolu kolā ne fakamau ki lalo, ne toe faka‵tu mai ei ne Iesu a tino mai te mate. Ne fakatu aka ne ia te tama tagata e tokotasi a se fafine ko mate tena avaga, se tamaliki fafine ko 12 ana tausaga, mo tena taugasoa pele ko Lasalo.​—Luka 7:11-15; 8:41-55; Ioane 11:38-44.

Ke fakamatala atu a mea fakaofoofogia i aso mai mua kolā e fakatali‵tali ki ei a tino kolā e ‵nofo mai lalo i te Malo o te Atua, ne ‵valo mai a Iesu e auala i te apositolo ko Ioane: “Ko ‵nofo nei mo tino te fale o te Atua! Ka ‵nofo fakatasi a ia mo latou, kae ka fai latou mo ona tino. A te Atua ka fakatasi eiloa mo latou, kae ka fai a ia mo olotou Atua. Ka se toe iai ne loimata i olotou mata. Ka se toe iai se mate, se fanoanoa, se ‵tagi io me se ‵mae. Ko palele atu a mea mua.” (Fakaasiga 1:1; 21:3, 4) Mafaufau la​—ki se lalolagi telā e seai ne loimata io me se fanoanoa i ei, se logo‵mae mo te mate! Kae ka tali katoatoa mai ei a te ‵talo telā ne akoako mai ne Iesu ki a tatou​—me ka fai tonu eiloa a te loto o te Atua i te lalolagi nei e pelā mo te faiga i te lagi.

Ka oko mai māfea te Malo o te Atua? Ne akoako mai a Iesu me i te kamataga o te pulega fakatupu a Iesu ka fetaui eiloa mo te vaitaimi fakapito telā ne taku ne ia ki tena “fakatasi mai.” Ne tuku mai ne Iesu se valoaga ke fakaasi mai i ei a te taimi o tena fakatasi mai i te malosi faka-Tupu. A te taimi tenei ka fakamailoga ki fakalavelave i te lalolagi kātoa, e aofia i ei a taua, oge meakai, mafuie, masaki mo amioga ma‵sei i te lalolagi. (Mataio 24:3, 7-12; Luka 21:10, 11) A mea konei e pelā foki mo nisi mea aka kolā ne ‵valo mai ne Iesu ne fakamaoni mai eiloa talu mai te 1914, te tausaga telā ne kamata i ei a te Taua Muamua a te lalolagi. Tela la, ko pule mai nei a Iesu e pelā me ko te Tupu. Ko pili o oko mai te taimi ka pule mai ei a te Malo tenei kae fai foki te loto o te Atua i te lalolagi nei.b

Se a te uiga o te Malo o te Atua telā ko pili o oko mai ki a koe? A mea katoa konā e fakalagolago eiloa ki te auala e filifili ei koe ke saga atu ki te fekau a Iesu.

[Fakamatalaga fakaopoopo]