Taina​—‵Toki A Mea Faka-te-agaga Kae Kausaki Atu Ki Ei!

“Ka ko te tino telā e ‵toki i luga i te agaga, e maua ne ia . . . a te ola se gata mai.”​—KALATIA 6:8.

1, 2. Ka fakataunu pefea a pati i te Mataio 9:37, 38, e ‵tusa mo manakoga o te fakapotopotoga?

KO MOLIMAU eiloa koe ki mea konei e ‵tupu. Ko oti ne fakataunu a pati a Iesu Keliso. “Ko oko eiloa i te lasi o te saito e fia ‵kati, ka ko tino ga‵lue i te saito e se tokouke,” ko muna a Iesu. “Fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.” (Mataio 9:37, 38) E tali mai eiloa ne Ieova te Atua a vaegā ‵talo i se auala tu ‵kese. Talu mai te tausaga faka-te-taviniga i te 2009, ne fanaka eiloa ki luga a te aofaki o fakapotopotoga a Ieova mai i te 2,031, telā ko oko atu latou ki te 105,298. A te aofaki masani o latou kolā ne papatiso i aso takitasi e ‵tusa mo te 757!

² A te vaegā gasoloakaga tenā e fai ei ke momea aka te manakogina o taina kolā e fetaui ‵lei ke fai ne latou a te takitakiga i te akoako mo te tausi atu ki fakapotopotoga. (Efeso 4:11) I se sefulu tupu tausaga ko ‵teka, ne ‵tofi aka ne Ieova a tagata kolā e fetaui ‵lei ke tausi atu ki manakoga o ana mamoe, kae e tali‵tonu tatou me ka tumau eiloa a ia i te fai penā. E fakatalitonu mai ki a tatou a te valoaga telā ne tusi i te Mika 5:5, Tusi Paia, Samoa, me i aso fakaoti konei, ka sui ne tino o Ieova a “tausi mamoe e tokofitu” mo “aliki sili e tokovalu,” ki se aofaki lasi o tagata kolā e fetaui ‵lei ke fai ne latou a te takitakiga.

3. Fakamatala mai me se a te uiga ke ‘‵toki a mea faka-te-agaga.’

³ Kafai koe se tagata Molimau a Ieova telā ko oti ne papatiso, se a te mea e mafai o fesoasoani atu ke maua ne koe a tauliaga mō te taviniga? A te kī tāua ko te ‘‵toki ne koe a mea faka-te-agaga.’ (Kalatia 6:8) A te faiga penā e aofia i ei a te ola i se auala telā e talia ei ne koe te agaga tapu o te Atua ke galue i tou olaga. Ke na fakaiku aka ke mo a ma ‘‵toki ne koe a mea faka-te-foitino.’ Ke mo a ma talia ne koe a vaegā mea pelā mo se olaga gali mo fakafiafiaga ke fakavāivāi ei tou manakoga ke fakaaoga tou olaga i te taviniga ki te Atua. E ‵tau mo Kelisiano katoa o ‘‵toki a mea faka-te-agaga,’ kae ko tagata kolā e fai penā, e mafai o fetaui ‵lei fakamuli ki tauliaga i te fakapotopotoga. Ona ko te lasi o te manakoga mō tavini fakafaifeau mo toeaina i aso nei, e fakasino atu eiloa a te mataupu tenei ki tagata Kelisiano. Tela la, taina, e fakamalosi atu matou ke aofia i otou ‵talo a mea i te mataupu tenei.

Kausaki Atu mō Galuega ‵Lei

4, 5. (a) Ne a tauliaga i te fakapotopotoga ne fakamalosi atu ki tagata papatiso ke kausaki ki ei? (e) E mafai pefea o kausaki atu se tino ki ei?

⁴ E se mafai o fai se tagata Kelisiano mo fai se ovasia e aunoa mo taumafaiga. E ‵tau mo ia o fai a “galuega ‵lei.” (1 Timoteo 3:1) E aofia i ei a te tavini atu ki taina tali‵tonu mai te tausi tonu atu ki olotou manakoga. (Faitau te Isaia 32:1, 2.) A te tagata telā e kausaki atu mo te loto lagona ‵lei e se fia takutakua. Kae e manako a ia ko te mea ke maua ne nisi tino a mea aoga.

⁵ E taumafai eiloa a te tino telā e fia fai pelā me se tavini fakafaifeau kae kausaki atu foki ke fai a ia e pelā me se ovasia o fakafetaui tena olaga mo mea kolā e fakaasi mai i te Tusi Tapu. (1 Timoteo 3:1-10, 12, 13; Tito 1:5-9) Kafai koe se tagata tukugina atu, fesili ifo ki a koe eiloa: “E mata, e kau katoatoa atu au ki te galuega talai, kae fesoasoani atu au ki nisi tino ke fai penā? E mata, e fakamalosi aka ne au oku taina tapuaki mai te fakaasi atu o te fiafia tonu ki a latou? E mata, e maua ne au a te uiga ke fai pelā me se tino akoga ‵lei o te Muna a te Atua? E mata, e momea aka toku ‵lei i te faiga o aku tali? E mata, e saga tonu atu au ki tofiga kolā ne tuku mai ne toeaina?’ (2 Timoteo 4:5) E manakogina ke mafau‵fau faka‵lei ki vaegā fesili penā.

6. Se a te kī tāua ki te mauaga o tauliaga penā i te fakapotopotoga?

⁶ A te suā auala ke kausaki atu ki tiute i te fakapotopotoga ko te ‘fakamalosiga o‵tou foitino i loto e alatu i te agaga [o te Atua].’ (Efeso 3:16) E se manakogina a te palota ko te mea ke fai e pelā me se tavini fakafaifeau io me se toeaina i te fakapotopotoga Kelisiano. E maua fua te tauliaga tenei e auala i te gasolo ki mua i te feitu faka-te-agaga. E mafai pefea o gasolo ki mua i te feitu faka-te-agaga? A te auala e tasi ko te “takitaki te agaga i o‵tou olaga” kae ati aka a fuataga o te agaga. (Kalatia 5:16, 22, 23) Kafai e tuku atu ne koe a fakamaoniga o uiga faka-te-agaga kolā e manakogina ke fai ei a tiute fakaopoopo, kae fakagalue aka ne koe a pati fakatonutonu ke momea aka te ‵lei, ka “matea ne tino katoa tou gasolosolo ki mua.”​—1 Timoteo 4:15.

E Manakogina te Uiga ko te Alofa sē Fakapito

7. Ne a mea e aofia i te tavini atu ki nisi tino?

⁷ A te tavini atu ki nisi tino e aofia i ei a te galue malosi mo te uiga ko te alofa sē fakapito. Ona ko te mea e fai a ovasia Kelisiano e pelā me ne tausi mamoe faka-te-agaga, e manava‵se malosi eiloa latou ki fakalavelave o mamoe. Mafaufau la ki te auala ne pokotia ei a te apositolo ko Paulo i tena tiute ko te tausi mamoe. Ne fai atu a ia ki taina tali‵tonu i Kolinito: “Au ne tusi atu muamua ki a koutou i te fi‵ta mo te mafaufau sē toka, e pelā foki mo loimata ma‵ligi. Ne seki fai ne au a te mea nei ke fanoa‵noa ei koutou, kae ke fai mo mea ke iloa tonu ei ne koutou i te lasi o toku alofa mō koutou katoa.” (2 Kolinito 2:4) E fakamaoni mai eiloa me ne tuku katoatoa atu te loto o Paulo ki tena galuega.

8, 9. Taku mai ne fakaakoakoga i te Tusi Tapu ke fakaasi mai i ei a te auala e tausi atu ei a tagata ki manakoga o nisi tino.

⁸ A te uiga ko te alofa sē fakapito e fai faeloa e pelā me se fakailoga o tagata kolā ne ga‵lue ma‵losi mō tavini a Ieova. E pelā me se fakaakoakoga, se mea faigata ke fakaataata ne tatou a Noa e fai atu ki nisi tino i tena kāiga: ‘Fakailoa mai te taimi e oti ei te faitega o te vaka ko olo tasi ei tatou.’ E seki fai atu a Mose ki tino Isalaelu i Aikupito, penei: ‘Ka fetaui tatou i te Tai Kula. ‵Sala atu te ‵toe auala ‵lei ke oko atu koutou ki konā.’ Ne seki fai atu a Iosua: ‘Fakailoa mai a te taimi e maofa ei a ‵pui o Ieliko.’ Kae ne seki ‵losi atu a Isaia ki se tino fakaa‵tea kae fai atu: ‘Telā tou tagata! Uga atu a ia.’​—Isaia 6:8.

⁹ A te ‵toe fakaakoakoga sili o se tagata telā ne talia ke fakamalosi aka a ia ne te agaga o te Atua, ko Iesu Keliso. Ne talia katoatoa ne ia a tena galuega ke tavini atu e pelā me se Fakaola o tino katoa. (Ioane 3:16) E mata, e se fai ne te alofa sē fakapito o Iesu ke fai foki tatou penā? I te taimi ne fakamatala atu ei ne ia ana lagonaga mō te lafu mamoe, ne fai mai se taina telā ko leva ne fai mo fai se toeaina, penei: “A pati a Iesu ki a Petelu​—tausi taku lafu foliki​—⁠ne otia malosi au i ei. I tausaga mai tua ifo, e fiafia eiloa au ki te auala e mafai ei ne pati a‵lofa io me se faifaiga atafai o fakamalosi ne ia se tino. A te tausi atu ki mamoe se galuega e fiafia malosi au ki ei.”​—Ioane 21:16.

10. Se a te mea e fai ei ke gasue‵sue a tagata Kelisiano o tau‵tali i te fakaakoakoga a Iesu ke tavini atu ki nisi tino?

¹⁰ Kafai e onoono tatou ki mamoe a te Atua, e ma‵nako eiloa a tagata tukugina atu i te fakapotopotoga o fakaasi atu a te kilokiloga a Iesu, telā ne fai mai: “Ka avatu ne au ki a koutou a te malōlōga.” (Mataio 11:28) A te fakatuanaki ki te Atua mo te alofa ki te fakapotopotoga e fai ei ke gasue‵sue a tagata Kelisiano o kausaki atu ki te faiga o te galuega ‵lei tenei, kae e sē mafau‵fau me ko tō uke a mea e ‵tau o fai, io me ko tō faigata. Kae e a māfai e se manako se tino ke kausaki atu ki ei? E mata, e mafai o ati aka ne se taina a te manakoga ke tavini atu ki te fakapotopotoga?

Ke Ati Aka a te Manakoga ke Tavini Atu

11. E mafai pefea o ati aka ne se tino a te manakoga ke tavini atu ki nisi tino?

¹¹ Kafai e sē kausaki atu koe ki tiute penā ona ko te manavase me e se lava tou atamai, se mea ‵lei ke ‵talo atu koe mō te agaga tapu. (Luka 11:13) Ka fesoasoani atu a te agaga o Ieova ke kufaki koe i so se mea e manavase koe ki ei i te feitu tenei. A te manakoga ke tavini atu e tuku mai ne te Atua, me ko te agaga o Ieova telā e tuku mai ne ia te malosi ke kausaki atu ki te taviniga tapu. (Filipi 2:13; 4:13) Tela la, se mea ‵lei ke akai atu ki a Ieova ke fesoasoani atu ke ati aka ne koe se manakoga ke talia a tauliaga i te taviniga.​—Faitau te Salamo 25:4, 5.

12. E mafai pefea o maua ne se tino a te poto ke fai a tiute kolā ne tuku atu ki ei?

¹² Ona ko te mea e foliga faigata ki a ia a manakoga o te lafu mamoe kae manakogina i ei a galuega e uke ke tausi atu ki a latou, e mafai eiloa o fakaiku aka ne se Kelisiano ke mo a ma kausaki atu ki ei. Io me e mafai o mafaufau a ia me e se lava tena poto ke fai ne ia a tiute konā. Kafai tenei te pogai, kāti e mafai o maua ne ia te poto mai te fai pelā me se tino akoga telā e sukesuke mo te loto finafinau ki te Muna a te Atua mo tusi faka-te-Tusi Tapu. E mafai o fesili ifo a ia, penei: ‘E mata, e fakaavanoa ne au a te taimi ke sukesuke ki te Muna a te Atua, kae ‵talo atu mō te poto?’ Ne tusi mai a te soko ko Iakopo: “Kafai se tino o koutou e se maua ne ia te poto, e ‵tau mo ia o ‵talo ki te Atua, me ko ia tenā ka tuku mai ne ia ki a ia; me i te Atua e tuku mai fua ne ia te poto ki tino katoa i te agaga alofa mo te kaimalie.” (Iakopo 1:5) E mata, e talitonu koe ki te fakamatalaga fakaosofia tenei? Mai te tali atu ki te ‵talo a Solomona, ne tuku atu ne te Atua ki a ia a “te poto mo te malamalama” telā ne mafai ei o iloa ne ia te ‵lei mo te masei i te taimi e fai ei ne ia te fakamasinoga. (1 Tupu 3:7-14) E tonu, a te tala o Solomona se mea fakapito. Kae e mafai o tali‵tonu tatou me ka tuku mai ne te Atua a te poto ki tagata kolā e maua ne latou a tiute i te fakapotopotoga ko te mea ke mafai ne latou o tausi faka‵lei atu ki mamoe.​—Faataoto 2:6.

13, 14. (a) Fakamatala mai a te auala ne pokotia ei a Paulo i te ‘alofa ki a Keliso.’ (e) E mafai pefea o pokotia tatou i te ‘alofa o Keliso’?

¹³ A te suā fesoasoani ke ati aka ei a te manakoga ke tavini atu ki nisi tino ko te mafaufau ‵loto ki mea katoa ne fai ne Ieova mo tena Tama mō tatou. E pelā me se fakaakoakoga, mafaufau ki te 2 Kolinito 5:14, 15. (Faitau.) I te auala fea e “pule ne te alofa o Keliso” a tatou? A te alofa telā ne fakaasi mai ne Keliso mai te tukumaiga o tena ola mō tatou e ‵tusa mo te loto o te Atua e tu ‵kese eiloa, tela la, kafai ko momea aka te ‵tou loto fakafetai, ka otia malosi eiloa ‵tou loto. Ne takitaki a Paulo ne te alofa o Keliso. Ne fai i ei ke ‵kalo keatea a ia mai te uiga kaimanako kae ne fesoasoani atu ki a ia ke taofi ‵mau ki tena kilokiloga tāua ke tavini atu ki te Atua mo tino i loto mo tino i tua o te fakapotopotoga.

¹⁴ A te mafaufau ‵loto ki te alofa o Keliso mō tino e fakamalosi aka ei a te loto fakafetai i loto i a tatou. E pelā me se ikuga, ko iloa ne tatou me se mea sē ‵lei ke tumau tatou i te ‘‵toki o mea i luga i te foitino’ mai te kausaki atu ki fakamoemoega kaima‵nako kae fakamuamua ne tatou a ‵tou manakoga totino. I lo te fai penā, e ‵fuli ‵tou olaga ke fakamuamua ne tatou a te galuega a te Atua telā ne tuku mai ke fai ne tatou. Ne gasue‵sue eiloa tatou ke “fakatau tavini” mō ‵tou taina i te alofa. (Faitau te Kalatia 5:13.) Kafai e maua ne tatou a te kilokiloga me i a tatou ne tavini kolā e ga‵lue mo te loto maulalo mō tavini tukugina atu a Ieova, ka tausi ne tatou a latou i te fakaaloalo mo te āva. E mautinoa eiloa me e se tau‵tali atu tatou i te uiga ita kae fakamaualuga telā ne fakamalosi aka ne Satani.​—Fakaasiga 12:10.

Taumafaiga Faka-te-Kāiga

15, 16. Se a te tusaga o te kāiga e fai māfai ko fetaui ‵lei se tagata ke fai pelā me se tavini fakafaifeau io me se toeaina?

¹⁵ Kafai a te taina se tagata avaga kae isi ne ana tama‵liki, e ‵tau o onoono faka‵lei ki te tulaga o tena kāiga māfai ko fakaiku aka me e fetaui ‵lei a ia ke fai e pelā me se tavini fakafaifeau io me se toeaina. A te tonuga loa, e pokotia a te feitu faka-te-agaga mo uiga o tena kāiga i tena tauliaga. E faka‵mafa mai ne te mea tenei a te tāua o te tiute o te kāiga i te ‵lago atu ki te tagata avaga mo te tamana i te taimi e taumafai ei a ia o tavini atu e pelā me se tavini fakafaifeau io me se toeaina i te fakapotopotoga.​—Faitau te 1 Timoteo 3:4, 5, 12.

¹⁶ E fiafia eiloa a Ieova māfai e fakatau fesoasoani a kāiga Kelisiano. (Efeso 3:14, 15) E paleni ‵lei eiloa ke fai ne se ulu o te kāiga a tiute i te fakapotopotoga kae tausi atu ki tena kāiga i se ‘feitu ‵lei.’ Tela la, e tāua eiloa ke sukesuke se toeaina io me se tavini fakafaifeau ki te Tusi Tapu mo tena avaga mo tama‵liki ko te mea ke maua ne latou katoa a mea aoga mai te Tapuakiga a Kāiga i vaiaso katoa. E ‵tau o ‵kau fakatasi a ia mo latou i te galuega talai i taimi katoa. Ona ko te pogai tenā, e tāua ke fakatau fesoasoani a kāiga ki taumafaiga a te ulu o te kāiga.

E Mata, ka Toe Tavini Atu Koe?

17, 18. (a) Kafai ko se fetaui ‵lei se tagata ki se tauliaga, se a te mea e manakogina ke fai? (e) Se a te kilokiloga e ‵tau o maua ne se taina telā ne tavini muamua atu e pelā me se toeaina io me se tavini fakafaifeau?

¹⁷ Kāti ko oti koe ne fai e pelā me se toeaina io me se tavini fakafaifeau i se taimi e tasi kae ko se fai nei koe penā i te taimi nei. E alofa koe ki a Ieova kae e talitonu koe me e atafai mai a ia ki a koe. (1 Petelu 5:6, 7) E mata, ko oti ne fai atu ke fai ne koe a nisi fakamafuli‵fuliga? Ke toka o fakaasi atu se mea ‵se kae galue ki ei fakatasi mo te fesoasoani o te Atua. Ke fakaeteete i te kaitaua. Ke poto, kae fakaasi atu se kilokiloga ‵lei. Ne fai mai penei se toeaina telā ne tavini atu mō tausaga e uke kae ko galo atu tena tauliaga: “Ne fakaiku aka ne au ke fakatumau toku kau atu ki fakatasiga, galuega talai, mo te faitauga ki te Tusi Tapu telā ne fai ne au i te taimi koi tavini ei au e pelā me se toeaina​—se fakamoemoega telā ne mafai o fakataunu ne au. Ne tauloto ne au a te kufaki me ne mafaufau au me ka toe maua ne au oku tauliaga i se tausaga e tasi io me lua, kae e foliga mai me toeitiiti ko kātoa te fitu tausaga kae toe fai au e pelā me se toeaina. I te taimi tenā, ne fesoasoani mai ki a au a te fakamalosiga ke mo a ma ‵fiu kae ke tumau i te kausaki atu ki ei.”

¹⁸ Kafai a koe se taina telā ne oko ki se tulaga e penei mo te mea ne fakamatala mai, ke mo a koe ma loto vāivāi. Ke mafaufau ki te auala e fakamanuia ei ne Ieova tau taviniga fakatasi mo tou kāiga. Ke ati aka tou kāiga i te feitu faka-te-agaga, āsi atu ki tino ma‵saki, kae fakamalosi atu a tino vāi‵vai. Mai mea katoa, ke fakatāua malosi ne koe a te tauliaga ke ‵viki atu ki te Atua kae folafola atu a te tala ‵lei o te Malo e pelā me se tokotasi o Molimau a Ieova.a​—Salamo 145:1, 2; Isaia 43:10-12.

Ke Maua se Kilokiloga Fou

19, 20. (a) Ne a mea e fakamalosi atu ki tagata papatiso katoa ke fai ne latou? (e) Se a te mea ka sau‵tala ki ei i te suā mataupu?

¹⁹ Ko oko eiloa i te lasi o te manakoga mō ovasia mo tavini fakafaifeau i aso nei i lō taimi mua. Tela la, e fakamalosi atu ki tagata papatiso katoa ke maua ne latou se kilokiloga fou e uiga ki olotou fakanofonofoga kae ke fesili ifo ki a latou eiloa, ‘Kafai au e sē se tavini fakafaifeau io me se toeaina, e mata, e ‵tau o sukesuke ne au a pogai e se maua ei ne au a tauliaga konā? Ke fesoasoani atu a te agaga o te Atua ke maua ne koe se kilokiloga tonu e uiga ki te manatu tāua tenei.

²⁰ Ka maua ne tino katoa i te fakapotopotoga a mea aoga mai i taumafaiga a‵lofa sē fakapito o olotou taina tali‵tonu. Kafai e fakaasi atu ne tatou a faifaiga atafai kae kaimalie, ka maua ei ne tatou a te fiafia telā e maua mai te tavini atu ki nisi tino kae ke maua ne tatou se kilokiloga faka-te-agaga. Kae, e pelā mo te mea telā ka fakaasi mai i te suā mataupu, e se ‵tau o fakafanoanoa ne tatou a te agaga tapu o te Atua. E mafai pefea o ‵kalo keatea tatou mai te mea tenā?

[Fakamatalaga fakaopoopo]

Ka Tali Mai Pefea ne Koe?

• Se a te mea e fakatalitonu mai ki a tatou i te valoaga telā ne fakamau i te Mika 5:5?

• Fakamatala mai me ne a mea e aofia i te uiga ko te alofa sē fakapito.

• E mafai pefea o fakamalosi aka ne se tino a te manakoga ke tavini atu ki nisi tino?

• E pefea te tāua o te fesoasoani o te kāiga māfai ko fetaui ‵lei se tagata ke tavini atu e pelā me se tavini fakafaifeau io me se toeaina?

[Ata i te itulau e 24]

Ne a mea e mafai o fai ne koe ke kausaki atu ki tauliaga i te fakapotopotoga?