Fakamasani a Taina ke Kausaki Atu ki Tauliaga i te Fakapotopotoga

“Kafai te tamaliki akoga ko palele ana akoakoga, ko ‵pau ei mo tena faiakoga.” —LUKA 6:40.

1. I tena galuega talai i te lalolagi, ne fakatoka pefea ne Iesu te fakavae mō se fakapotopotoga?

I TE fakaotiga o tena tusi Evagelia, ne tusi mai te apositolo ko Ioane, penei: “Kae uke ake foki a nisi mea ne fai ne Iesu; kae moi ne tusi katoa ana mea ne fai, i toku taofi ka se mafai o ofi i te lalolagi a tusi konei, manafai ne tusi.” (Ioane 21:25) E aofia i mea katoa kolā ne fai ne Iesu i te taimi toetoe ne fai ei tena galuega fakamalosi loto i te lalolagi nei, ko te ‵salaga ki tāgata kolā e mafai o akoako ne ia ke fai ne latou tena galuega māfai ko foki atu a ia ki te lagi. I te 33 T.A., i te taimi ne foki atu ei a ia ki te lagi, kae ko oti ne fakatoka ne Iesu te fakavae o se fakapotopotoga telā ka lau i afe te aofaki o latou.—Galuega 2:41, 42; 4:4; 6:7.

2, 3. (a) Kaia e manakogina malosi ei ke kausaki atu a taina papatiso ki tauliaga i te fakapotopotoga? (e) Ne a mea ka sau‵tala tatou ki ei i te mataupu tenei?

² E tiga eiloa ko sili atu i te fitu miliona o tino talai o te Malo i fakapotopotoga e sili atu i te 100,000 i te lalolagi kātoa i aso nei, kae koi manakogina eiloa a tāgata ke mafai o fai ne latou te takitakiga i te feitu faka-te-agaga. E pelā me se fakaakoakoga, e lasi ‵ki eiloa te manakogina o toeaina Kelisiano. E ‵tau eiloa o fakamālō atu ki a latou kolā e kausaki atu ki te tauliaga tenei, me e ‘ma‵nako latou o fai a galuega ‵lei.’—1 Timoteo 3:1.

³ Kae e se sōna maua fua ne tāgata a tauliaga konā i te fakapotopotoga. E se manakogina a akoakoga ma‵luga io me ko te atamai i mea o te olaga ke maua ei ne se tagata a te tauliaga tenei. Ke tavini faka‵lei atu i se vaegā tulaga penā, e ‵tau o malosi ‵lei a ia i te feitu faka-te-agaga. E ‵tau o maua ne ia a uiga faka-te-agaga i lō te atamai mo nisi mea aka. E mafai pefea o fesoasoani atu ki tāgata i te fakapotopotoga ke fai penā? Ne fai mai a Iesu: “Kafai te tamaliki akoga ko palele ana akoakoga, ko ‵pau ei mo tena faiakoga.” (Luka 6:40) I te mataupu tenei, ka sau‵tala eiloa tatou ki nisi auala kolā ne fesoasoani atu ei a te Faiakoga Sili, ko Iesu Keliso ki ana soko ke kausaki atu mō tiute e uke, kae ka lavea ne tatou me ne a akoakoga tāua ka maua ne tatou mai mea ne fai ne ia.

“Ko Taku ne au Koutou ko Taugasoa”

4. Ne fakaasi atu pefea ne Iesu a ia eiloa e pelā me se taugasoa tonu ki ana soko?

⁴ Ne fai ne Iesu ana soko e pelā me ne taugasoa, kae e se pelā me ne tino e ma‵lalo i a ia. Ne fakamāumāu ne ia ana taimi fakatasi mo latou, ne talitonu katoatoa ki a latou, kae ‘taku atu ne ia a mea katoa ne lagona ne ia mai tena Tamana.’ (Faitau te Ioane 15:15.) Mafaufau ki te fia‵fia ne maua ne latou i te taimi ne tali ei ne Iesu te lotou fesili: “Ne a foki a fakailoga e iloa ei tou foki mai mo te gataga o te lalolagi?” (Mataio 24:3, 4) Ne fakaasi atu foki ne ia ki ana soko ana mafaufauga mo ana lagonaga totino. I te po ne fakalata ei a ia, ne puke ne Iesu a Petelu, Iakopo, mo Ioane ki te fatoaga o Ketesemane, telā ne ‵talo atu ei a ia mo te loto mafatia. Kāti ne seki lagona ne te tokotolu apositolo a pati a Iesu i tena ‵talo, kae ne lavea ne latou me ne mafatia malosi a ia. (Maleko 14:33-38) Mafaufau foki ki te lasi o te pokotiaga ne ‵tau o oko ki te tokotolu konei i te taimi ne ‵fuli ei a foliga o Iesu. (Maleko 9:2-8; 2 Petelu 1:16-18) A te va fakataugasoa ‵pili o Iesu mo ana soko ne fakamalosi atu ki a latou ke tumau i te faiga o te galuega tāua telā e ‵tau o fai ne latou.

5. Ne a nisi auala e mafai ei o fesoasoani atu a toeaina Kelisiano ki nisi tino?

⁵ E pelā mo Iesu, e ‵tau o fai taugasoa a toeaina Kelisiano i aso nei mo nisi tino kae fesoasoani atu ki a latou. E ati aka ne latou se fesokotakiga gali kae ‵pili mo taina tali‵tonu mai te fakaavanoa o olotou taimi ke fakaasi atu te lotou amanaia ki a latou. E isi ne taimi e se ‵tau ei o fai‵pati a toeaina e uiga ki nisi mea. Kae e sautala eiloa latou mo olotou taina ki mea ne tauloto ne latou mai te Muna a te Atua. E tali‵tonu eiloa a toeaina ki olotou taina. E se ‵tau eiloa o manatu fatauva se toeaina ki se tavini fesoasoani telā e tai foliki ifo. Kae e ‵kilo atu latou ki a ia e pelā me se tagata atamai telā e gasolo faeloa ki mua i te feitu faka-te-agaga, kae fai ne ia se galuega tāua mō te fakapotopotoga.

“Ko Avatu ne au te Fakaakoakoga mō Koutou”

6, 7. Fakamatala mai a te fakaakoakoga ne tuku atu ne Iesu ki ana soko kae ne aoga pefea ki a latou a te mea tenei.

⁶ E tiga eiloa ne fia‵fia a soko o Iesu ki mea faka-te-agaga, kae ne pokotia olotou mafaufauga i nisi taimi ona ko te auala ne ‵tupu aka ei latou io me ko tuu mo aganuu. (Mataio 19:9, 10; Luka 9:46-48; Ioane 4:27) Kae ne seki fakatonu io me fakamatakutaku ne Iesu ana soko. Ne seki fai atu ne ia se mea telā e se mafai ne latou o fai io me fakatonu atu ke fai ne latou se mea telā e se mafai o fai ne ia. Kae ne akoako ne Iesu latou e auala i fakaakoakoga.—Faitau te Ioane 13:15.

⁷ Se a te vaegā fakaakoakoga ne tuku atu ne Iesu ki ana soko? (1 Petelu 2:21) Ne fakafaigofie ne ia tena olaga ko te mea ke mafai o tavini atu a ia ki nisi tino. (Luka 9:58) Ne loto maulalo a Iesu kae fakavae faeloa ana akoakoga ki te Tusi Tapu. (Ioane 5:19; 17:14, 17) Ne faigofie fua ke olo atu a tino ki a ia kae atafai foki. Ne fakamalosi a ia ne te alofa ke fai a mea katoa. (Mataio 19:13-15; Ioane 15:12) Ne maua ne soko o Iesu se fakamalosiga ‵lei mai tena fakaakoakoga. E pelā mo te mea e tasi, ne seki mataku a Iakopo i te mate kae ne tavini fakamaoni eiloa a ia ki te Atua ke oko ki te taimi ne tamate ei a ia. (Galuega 12:1, 2) Ne tautali fakamaoni atu a Ioane ki kalafaga o Iesu mō se 60 tausaga.—Fakaasiga 1:1, 2, 9.

8. Ne a fakaakoakoga e tuku atu ne toeaina ki talavou tāgata mo nisi tino?

⁸ A toeaina kolā e fakaasi atu te alofa sē fakapito, e loto maulalo, kae a‵lofa, e tuku eiloa ne latou se fakaakoakoga ‵lei mō talavou tāgata. (1 Petelu 5:2, 3) E se gata i ei, e fia‵fia foki a toeaina ke fai latou e pelā me ne fakaakoakoga ‵lei ko te mea ke mafai ne taina o fakaakoako ki te malosi o te lotou fakatuanaki, te auala e akoako ei latou, te auala e ola ei latou e pelā me ne Kelisiano, mo te auala e talai atu ei latou.—Epelu 13:7.

‘Ne Uga ne Iesu Latou Kae Tuku Atu a Fakatonuga’

9. E iloa pefea ne tatou me ne fakamasani ne Iesu ana soko ke fai te galuega ko te faiga o soko?

⁹ Mai tua o te lua tausaga ne galue ei a ia mo te loto finafinau i te galuega talai, ne fakalauefa atu ne Iesu te faiga o te galuega talai e auala i te ugaatuga o ana apositolo e toko 12 ke talai. Muamua la, ne tuku atu ne ia ki a latou a fakatonuga. (Mataio 10:5-14) A koituai o fagai fakavavega ne ia se fia afe o tino, ne fai atu ne Iesu ki ana soko a te auala ke fakatoka ei a tino kae tufa atu a meakai. (Luka 9:12-17) E manino ‵lei, me ne akoako ne Iesu ana soko mai te tukuatuga ki a latou a fakatonuga ma‵nino kae ‵tonu. A te auala tenei ke akoako atu, fakatasi mo te fakamalosiga a te agaga tapu, ne fesoasoani fakamuli atu ki apositolo ke fakatoka ne latou te faiga o te galuega lasi ko te talai atu telā ne kamata i te 33 T.A.

10, 11. I auala fea e mafai ei o akoako atu a tino ‵fou?

¹⁰ I aso nei, e kamata o akoako ne tatou se tagata ki mea faka-te-agaga māfai ko talia ne ia ke fai sena akoga faka-te-Tusi Tapu. E mafai o fesoasoani atu tatou ki a ia ke iloa ne ia o faitau faka‵lei. E tumau eiloa te ‵tou fesoasoani atu ki a ia i te taimi e fai ei ne tatou a tena akoga faka-te-Tusi Tapu. Kafai ko kamata o kau atu faeloa a ia ki fakatasiga Kelisiano, ka gasolo eiloa ki mua ana taumafaiga faka-te-agaga māfai ko kau a ia ki te Akoga mō Tino Talai, ko fai pelā me se tino talai seki papatiso mo nisi mea aka. Mai tua o te papatisoga, e mafai o aofia i ana akoakoga a te fesoasoani atu ki te faitega o mea ma‵sei o te Kingdom Hall. Fakamuli loa, e mafai o fesoasoani atu se taina ki a ia ke iloa ne ia a mea kolā e ‵tau o fai ke mafai o fai a ia e pelā me se tavini fesoasoani.

¹¹ Kafai e tuku atu ne toeaina se tiute ke fai ne se taina papatiso, e fakamatala faka‵lei atu ne se toeaina a te faiga o te tiute tenā i te fakapotopotoga mo mea kolā e ‵tau o fai ne ia. E ‵tau o malamalama a te taina tenā i mea kolā e ‵tau o fai ne ia. Kafai e se mafai ne ia o fai a mea kolā e ‵tau o fai ne ia, e se ‵tau o fakaiku fakavave aka ne se toeaina me ko se fetaui ‵lei a ia ki te tiute tenā. Kae e mafai o fakasino atu se toeaina atafai ki feitu tāua kolā e ‵tau saga tonu a ia ki ei kae toe fakamatala atu a mea e ‵tau o fai ne ia. A te ‵kilo atu ki tāgata kolā e ‵saga faka‵lei atu ki vaegā taumafaiga penā kae maua ne latou te fiafia mai te tavini atu ki nisi tino se mea fakafiafia eiloa ki toeaina.—Galuega 20:35.

“A Tino ‵Poto e Faka‵logo ki Manatu Fesoasoani”

12. Ne a mea ne fai ei ke ma‵goi a pati fakatonutonu a Iesu?

¹² Ne akoako ne Iesu ana soko mai te tukuatuga o pati fakatonutonu kolā ne manakogina ne latou. E pelā me se fakaakoakoga, ne polopoloki ne Iesu a Iakopo mo Ioane kolā ne ma‵nako ke ‵to ifo te afi mai te lagi ki nisi tino Samalia kolā ne seki talia ne latou a ia. (Luka 9:52-55) I te taimi ne fanatu ei a te mātua o Iakopo mo Ioane ki a Iesu o fakamolemole atu ke maua ne tulaga ‵lei o ana tama i te Malo, ne faipati ‵tonu atu a Iesu ki te tautaina konā, penei: “Ka ko ia telā ka nofo i toku feitu fakaatamai mo ia foki ka nofo i toku feitu fakamaui; e seai la saku pule i ei, na ko latou eiloa ko oti ne fakatoka ne toku Tamana mō latou te koga tenā.” (Mataio 20:20-23) I taimi katoa, ne tuku atu ne Iesu a pati fakatonutonu kolā e ma‵nino, e aoga, kae fakavae tonu ki fakatakitakiga a te Atua. Ne akoako ne ia ana soko ke iloa ne latou o mafau‵fau faka‵lei kae gasue‵sue e ‵tusa mo te Muna a te Atua. (Mataio 17:24-27) Ne iloa ne Iesu a tapula o ana soko kae ne seki fakamoemoe a ia ke ‵lei katoatoa olotou mea e fai. Ne polopoloki ne ia latou ona ko tena alofa tonu ki a latou.—Ioane 13:1.

13, 14. (a) Ko oi e manakogina ne latou a pati fakatonutonu? (e) Taku mai ne fakaakoakoga e uiga ki pati fakatonutonu e mafai o tuku atu ne se toeaina ke fesoasoani atu ki se tino telā e se gasolo ki mua i te feitu faka-te-agaga.

¹³ So se tagata telā e kausaki atu mō tiute i te fakapotopotoga Kelisiano ka manako eiloa ki ne fakatakitakiga faka-te-Tusi Tapu i se taimi. “A tino ‵poto e faka‵logo sale ki manatu fesoasoani,” ko pati i te Faataoto 12:15. E fai mai se taina talavou, penei: “A te ‵toe mea faigata ki a au ko te fakafesagai atu ki oku vāivāiga. Ne mafai o maua ne au se kilokiloga ‵lei ona ko te fakatakitakiga ne tuku mai ne se toeaina ki a au.”

¹⁴ Kafai e lavea ne toeaina me e isi se uiga telā e taofi aka ne ia te gasolo ki mua o se taina i te feitu faka-te-agaga, e gasue‵sue eiloa latou o fakatonutonu a ia i te agaga o te loto maulalo. (Kalatia 6:1) I nisi taimi, e manakogina a pati fakatonutonu ona ko nisi uiga o te tino. Kafai e foliga mai me e se galue malosi se taina, e mafai o fesoasoani atu se toeaina ki a ia o faka‵mafa atu a te manatu me i a Iesu se tino talai loto finafinau telā ne fakatonu ne ia ana soko ke olo atu o fai a soko. (Mataio 28:19, 20; Luka 8:1) Kafai e lavea atu me e isi se taina e uiga fia sili, e mafai o fakaasi atu ne se toeaina te auala ne fesoasoani atu ei a Iesu ki Ana soko ke lavea ne latou te fakamataku o te fia sili. (Luka 22:24-27) Kae e a māfai e seai se loto fakamagalo i se taina? Ka aoga eiloa a te tala fakatusa e uiga ki se pologa telā ne seki fakamagalo ne ia te kaitalafu foliki fua a tena taina, faitalia me ko oti ne fakamagalo tena kaitalafu lasi ‵ki. (Mataio 18:21-35) Kafai e manakogina a pati fakatonutonu, se mea ‵lei ke na fai fakavave aka ne toeaina a te mea tenā.—Faitau te Faataoto 27:9.

“Fakamasani” ne Koe a Koe Eiloa

15. E mafai pefea o fesoasoani atu te kāiga o se tagata ke tavini atu a ia ki nisi tino?

¹⁵ E fai ne toeaina te takitakiga i te akoakoga o tāgata ke kausaki atu ki tauliaga, kae e mafai o ‵lago atu a nisi tino ki olotou taumafaiga. E pelā me se fakaakoakoga, e mafai kae ‵tau o ‵lago atu a kāiga o se tagata ki a ia ke kausaki atu ki tauliaga i te fakapotopotoga. Kae kafai ko oti ne fai a ia mo fai se toeaina, ka maua ne ia a mea aoga mai te ‵lago atu o tena avaga mo ana tama‵liki. A te lotoma‵lie o latou o talia mai tou tagata ke tavini atu mō te fakapotopotoga e tāua ‵ki eiloa ko te mea ke fai faka‵lei tena tiute. A te loto fia‵fia o latou e fai ei ke maua ne tou tagata te fiafia e pelā foki loa mo nisi tino i te fakapotopotoga.—Faataoto 15:20; 31:10, 23.

16. (a) I o oi te tiute ke kausaki atu ki tauliaga i te fakapotopotoga? (e) E mafai pefea o kausaki atu se tagata ki tauliaga i te fakapotopotoga?

¹⁶ E tiga eiloa e mafai o fesoasoani kae ‵lago atu a nisi tino ki a ia, kae i o ia eiloa te tiute ke kausaki atu ki tauliaga i te fakapotopotoga. (Faitau te Kalatia 6:5.) E tonu, e se manakogina ke fai se taina e pelā me se tavini fesoasoani io me se toeaina ko te mea ke tavini atu a ia mō nisi tino kae ke aofia katoatoa i te galuega talai. Kae ko te kausaki atu ki tauliaga i te fakapotopotoga e fakasino eiloa ki te taumafai ke fetaui ‵lei a ia mo mea kolā e fakaasi mai i te Tusi Tapu. (1 Timoteo 3:1-13; Tito 1:5-9; 1 Petelu 5:1-3) Tela la, kafai e manako se tagata ke tavini atu e pelā me se tavini fesoasoani io me se toeaina kae ne seki filifili a ia ke fai penā, e ‵tau o saga tonu a ia ki feitu kolā e manakogina ke gasolo atu ei a ia ki mua i te feitu faka-te-agaga. E manakogina i ei a te faitau faeloa ki te Tusi Tapu, te faiga o sukesukega totino, mafaufau ‵loto, ‵talo atu mo te loto kātoa, mo te aofia i te galuega talai faka-Kelisiano mo te loto finafinau. I vaegā auala penā, e mafai o fakagalue ne ia a pati fakatonutonu a Paulo ki a Timoteo: “Fakamasani ki te olaga amio Atua.”—1 Timoteo 4:7.

17, 18. Ne a mea e mafai ne se taina papatiso o fai māfai e mafaufau a ia me e se mafai ne ia o tavini atu, io me se manako eiloa ke tavini atu a ia?

¹⁷ Kae e a māfai e mafaufau se tagata me e se mafai eiloa ne ia o fai a tauliaga penā? E ‵tau o mafaufau faka‵lei a ia ki te lasi o te mea ne fai ne Ieova te Atua mo Iesu Keliso mō tatou. E tonu, a Ieova e “amo ne ia ‵tou amoga.” (Salamo 68:19) Tela la, e mafai o fesoasoani atu te ‵tou Tamana faka-te-lagi ki se taina ke mafai ne ia o fai a tiute i te fakapotopotoga. A te mafaufau ki te manatu me e lasi ‵ki te manakoga mō tagata ma‵tua ‵lei ke tavini atu i te fakapotopotoga saukātoa a te Atua, e mafai o aoga ki se taina telā e se tavini atu nei e pelā me se tavini fesoasoani io me se toeaina. A te mafaufau ki vaegā manatu penā e mafai o fai ei se taina ke manumalo i lagonaga sē ‵lei. E mafai o ‵talo atu a ia mō te agaga tapu, kae mafaufau me ka fesoasoani atu a fuataga o te agaga e aofia i ei a te filemu mo te loto pulea —ko uiga kolā e manakogina ke ave keatea ei a te manavase io me ko lagonaga me e se lava tena atamai. (Luka 11:13; Kalatia 5:22, 23) E mafai o talitonu katoatoa a ia me ka fakamanuia ne Ieova a tino katoa kolā e kausaki atu mo se loto lagona ‵lei.

¹⁸ Kāti e se manako eiloa se taina ke tavini atu mō te fakapotopotoga. Ne a mea e mafai o fesoasoani atu ki a ia? Ne tusi mai te apositolo ko Paulo: “Me i te Atua e galue faeloa i loto i a koutou, o fai ne ia koutou ke iloa o fai a mea kolā e loto a ia ki ei.” (Filipi 2:13) E tuku mai ne te Atua a te manakoga ke tavini atu, kae e mafai o fakamalosi atu te agaga o Ieova ki se tino ke fai ne ia te taviniga tapu. (Filipi 4:13) E se gata i ei, e mafai o ‵talo atu se Kelisiano ke mafai ne te Atua o fai a ia ke fai te mea tonu.—Salamo 25:4, 5.

19. Se a te mea e fakatalitonu mai ki a tatou e uiga ki te faka‵sopoakaga o “tausi mamoe e tokofitu, mo aliki sili e tokovalu”?

¹⁹ E fakamanuia eiloa ne Ieova a taumafaiga a toeaina ke akoako atu a nisi tino. E maua foki ne latou kolā e ‵saga atu ki ei kae kausaki atu ki tauliaga i te fakapotopotoga ana fakamanuiaga. E fakatalitonu mai te Tusi Tapu ki a tatou me e aofia i tino o te Atua a “tausi mamoe e tokofitu, mo aliki sili e tokovalu”—ko te aofaki o tāgata ata‵mai kolā e manakogina—kolā ka faka‵sopo ke fai ne latou te takitakiga i te fakapotopotoga saukātoa a Ieova. (Mika 5:5, Tusi Paia, Samoa) Ma‵faga o fakamanuiaga lasi ke iloa atu me tokouke a tāgata Kelisiano ko oti ne akoako kae ko kausaki atu nei mo te loto maulalo ki tauliaga ke tavini atu kae ke avatu ei a vikiga ki a Ieova!

Ka Tali Mai ne Koe Pefea?

• Ne fesoasoani atu pefea a Iesu ki ana soko ke fetaui ‵lei mō tiute e uke?

• E mafai pefea ne toeaina o tau‵tali i a Iesu i te taimi e fesoasoani atu ei latou ki tāgata i te fakapotopotoga ke fai ne latou te takitakiga?

• Se a te tusaga e fai ne kāiga o se tagata ke fesoasoani atu ke mafai ne ia o kausaki ki tauliaga i te fakapotopotoga?

• Ne a mea e mafai o fai ne se tagata ke kausaki atu mō tauliaga i te fakapotopotoga?

[Ata i te itulau e 31]

Ne a akoakoga e mafai ne koe o tuku atu ki tau akoga faka-te-Tusi Tapu i te taimi e gasolo ei a ia ki mua?

[Ata i te itulau e 32]

E mafai pefea o fakaasi atu ne tāgata me e kausaki atu latou ki tauliaga i te fakapotopotoga?